1. Ko e hā ʻoku fiemaʻu ai kiate kitautolu kotoa ʻa e poto fakaʻotuá? (Palōveepi 4:7)

 KAPAU kuo faifai ange ʻo ke fai ha fili mahuʻinga, ʻoku ʻikai ha veiveiua naʻá ke lotu ki ha poto​—pea ki ha ʻuhinga lelei. (Sēm. 1:5) Naʻe tohi ʻe Tuʻi Solomone: “Ko e potó ʻa e meʻa mahuʻinga tahá.” (Lau ʻa e Palōveepi 4:7.) Ko e moʻoni, naʻe ʻikai talanoa ʻa Solomone ia fekauʻaki mo ha faʻahinga poto pē ʻi he māmaní. Naʻá ne lave ki he poto ʻoku haʻu meia Sihova ko e ʻOtuá. (Pal. 2:6) Ka ʻe lava ʻe he poto fakaʻotuá ʻo tokoniʻi kitautolu ke fekuki mo e ngaahi palopalema ʻoku tau fehangahangai mo ia ʻi he ʻaho ní? ʻIo ʻe lava, hangē ko ia te tau vakai ki ai ʻi he kupu ko ení.

2. Ko e hā ʻa e founga ʻe taha ʻe lava ke tau hoko ai ʻo poto moʻoní?

² Ko e founga ʻe taha ʻe lava ke tau hoko ai ʻo poto moʻoni ko hono ako mo ngāueʻaki ʻa e ngaahi akonaki ʻa ha ongo tangata ʻa ia naʻe tokaʻi lahi koeʻuhí ko hona potó. ʻUluakí, te tau lāulea kia Solomone. ʻOku pehē ʻe he Tohi Tapú “naʻe foaki ʻe he ʻOtuá kia Solomone ʻa e poto mo e ʻiloʻilo lahi ʻaupito.” (1 Tuʻi 4:29) Uá, te tau lāulea kia Sīsū, ʻa ia ko hono potó naʻe ʻikai alafakatataua. (Māt. 12:42) Naʻe ʻi ai ha kikite fekauʻaki mo Sīsū naʻe pehē: “ʻE nofo ʻiate ia ʻa e laumālie ʻo Sihová, ʻa e laumālie ʻo e potó mo e mahinó.”​—ʻAi. 11:2.

3. Ko e hā te tau lāulea ki ai ʻi he kupu ko ení?

³ ʻI hono ngāueʻaki ʻe Solomone mo Sīsū ʻa hona poto mei he ʻOtuá, naʻá na fai ai ʻa e ngaahi faleʻi ʻaonga fekauʻaki mo e ngaahi meʻa ʻoku mahuʻinga kiate kitautolu kotoa. ʻI he kupu ko ení, te tau lāulea ai ki he tolu ʻo kinautolu: Ko e fiemaʻu ke maʻu ha vakai mafamafatatau ki he paʻangá, ngāue paʻangá pea fekauʻaki mo kitautolu tonu.

4. Naʻe anga-fēfē kehekehe ʻa e tuʻunga fakaʻekonōmika ʻo Solomone mo Sīsuú?

⁴ Ko Solomone naʻá ne koloaʻia lahi, pea naʻá ne nofo ʻi ha ʻapi masani. (1 Tuʻi 10:7, 14, 15) ʻI he tafaʻaki ʻe tahá, ko Sīsū naʻe ʻikai  ke loko lahi ʻene koloá pea naʻe ʻikai hano ʻapi. (Māt. 8:20) Neongo ia, naʻe maʻu ʻe he ongo tangatá ha vakai mafamafatatau ki he ngaahi meʻa fakamatelié koeʻuhi ko hona potó naʻe haʻu mei he Matavai tatau​—ko Sihova ko e ʻOtuá.

5. Ko e hā ʻa e vakai mafamafatatau naʻe maʻu ʻe Solomone fekauʻaki mo e paʻangá?

⁵ Naʻe fakahaaʻi ʻe Solomone ko e paʻangá “ko ha maluʻanga.” (Tml. 7:12) ʻI heʻetau maʻu ʻa e paʻangá ʻoku malava ke tau fakatau mai ʻaki ʻa e meʻa ʻoku tau fiemaʻu pau ʻi he moʻuí pea mo ʻetau ngaahi fiemaʻu kehe nai. Neongo ʻa e koloaʻia ʻa Solomoné, naʻá ne lāuʻilo ʻoku ʻi ai ʻa e ngaahi meʻa ʻoku mahuʻinga ange ʻi he paʻangá. Ko e fakatātaá, naʻá ne tohi: “ʻOku lelei ange ke fili ki ha hingoa lelei [pe “ki ha ongoongo ʻoku lelei,” fkm. ʻi lalo] ʻi he fili ki ha koloa lahi.” (Pal. 22:1) Naʻe toe vakai foki ʻa Solomone ko e kakai ʻoku nau ʻofa ki he paʻangá ʻoku tātātaha ke nau fiefia ʻi he meʻa ʻoku nau maʻú. (Tml. 5:10, 12) Pea naʻá ne fakatokanga ke ʻoua te tau falala kakato ki he paʻangá, koeʻuhí neongo pe ko e hā ʻa e lahi ʻo e paʻanga ʻoku tau maʻú ʻe lava ke mole vave atu ia.​—Pal. 23:4, 5.

6. Ko e hā ʻa e vakai mafamafatatau naʻe maʻu ʻe Sīsū fekauʻaki mo e ngaahi meʻa fakamatelié? (Mātiu 6:31-33)

⁶ Naʻe maʻu ʻe Sīsū ha vakai mafamafatatau ki he ngaahi meʻa fakamatelié. Naʻá ne fiefia ʻi he meʻakaí mo e inú. (Luke 19:2, 6, 7) ʻI he taimi ʻe taha, naʻá ne ngaohi ʻa e uaine lelei tahá​—ko ʻene fuofua maná. (Sione 2:10, 11) Pea ʻi he ʻaho naʻá ne pekia aí, naʻa ne tui ha kofu mamafa. (Sione 19:23, 24) Ka naʻe ʻikai ke fakaʻatā ʻe Sīsū ʻa e ngaahi meʻa fakamatelié ke hoko ko e meʻa muʻomuʻa taha ia ʻi heʻene moʻuí. Naʻá ne tala ki hono kau muimuí: “ʻOku ʻikai lava ha taha ke ngāue fakatamaioʻeiki ki ha ʻeiki ʻe toko ua . . . Heʻikai lava ke mou ngāue fakatamaioʻeiki ki he ʻOtuá pea ki he Koloá.” (Māt. 6:24) Naʻe akoʻi ʻe Sīsū kapau te tau fuofua kumi ki he Puleʻangá, ʻe fakapapauʻi ʻe Sihova te tau maʻu ʻa e meʻa ʻoku tau fiemaʻú.​—Lau ʻa e Mātiu 6:31-33.

7. Naʻe anga-fēfē maʻu ʻaonga ha tokoua ʻe taha mei hono maʻu ha vakai mafamafatatau ki he paʻangá?

⁷ Ko e tokolahi hotau fanga tokouá mo e fanga tuofāfiné kuo nau maʻu ʻaonga mei hono ngāueʻaki ʻa e poto fakaʻotuá ʻi he haʻu ko ia ki he paʻangá. Fakakaukau ki he faʻifaʻitakiʻanga ʻa ha tokoua teʻeki mali ko Daniel. ʻOkú ne pehē:  “ʻI heʻeku taʻu hongofulu tupú, naʻá ku fili ke ʻai ʻa e ngaahi ngāue fakalaumālié ko e meʻa mahuʻinga taha ʻi heʻeku moʻuí.” Koeʻuhi kuo tauhi ʻe Daniel ʻene moʻuí ke faingofua, kuo malava ai ke ne ngāueʻaki hono taimí mo e pōtoʻí ʻi he ngaahi poloseki fakateokalati lahi. ʻOkú ne toe pehē: “ʻOku lava ke u fakahaaʻi moʻoni atu kuo ʻikai ʻaupito ke u fakaʻiseʻisa ʻi he ʻalunga naʻá ku filí. Ko e moʻoni, naʻe mei malava ke u maʻu ha paʻanga lahi kapau naʻá ku ʻai ia ko e meʻa mahuʻinga taha ʻi heʻeku moʻuí. Ka ʻe lava fēfē ke fetongi ʻe he paʻangá ʻa e ngaahi kaumeʻa kuó u maʻú? ʻE lava fēfē ke ne fetongi ʻa e fiemālie ʻoku ou maʻu ʻi hono ʻiloʻi ʻoku ou fakamuʻomuʻa ʻa e Puleʻangá? ʻOku ʻikai ha paʻanga ʻe ala fakatataua ki he ngaahi tāpuaki kuo ʻomai ʻe Sihova kiate aú.” ʻOku hā mahino, ʻoku tau maʻu ʻaonga ʻi he taimi ʻoku tau tokangataha ai ki he ngaahi meʻa fakalaumālié kae ʻikai ki he paʻangá.

8. ʻOku anga-fēfē ʻetau ʻiloʻi naʻe maʻu ʻe Solomone ha vakai mafamafatatau ki he ngāué? (Tangata Malanga 5:18, 19)

⁸ Naʻe ui ʻe Solomone ʻa e fiefia ʻe lava ke tau maʻu mei heʻetau ngāue mālohí ko e “meʻaʻofa . . . ʻa e ʻOtuá.” (Lau ʻa e Tangata Malanga 5:18, 19.) Naʻá ne tohi: “ʻOku ʻaonga ʻa e faʻahinga kotoa pē ʻo e ngāue mālohí.” (Pal. 14:23) Naʻe ʻiloʻi ʻe Solomone ʻa e meʻa naʻá ne talanoa fekauʻaki mo iá. Ko ha tokotaha ngāue ia! Naʻá ne langa ʻa e ngaahi fale, tō ʻa e ngaahi ngoue kālepi, pea ngaohi ʻa e ngaahi ngoue mo e ngaahi vai. Naʻá ne toe langa mo e ngaahi kolo. (1 Tuʻi 9:19; Tml. 2:4-6) Ko ha ngāue mālohi ia pea ʻoku ʻikai ha veiveiua naʻe ʻoange ai kiate ia ʻa e fiemālie. Ka naʻe ʻikai ke falala ʻa Solomone ki he ngaahi ngāue pē ko iá ke ne ʻomai ʻa e fiefiá kiate ia. Naʻá ne toe kau foki ʻi he ngaahi ngāue fakalaumālie. Ko e fakatātaá, naʻá ne tokangaʻi hono langa ʻo ha temipale lāngilangiʻia ki he lotu kia Sihová​—ko ha poloseki langa taʻu ʻe fitu! (1 Tuʻi 6:38; 9:1) Hili ʻa e kau ʻi he ngaahi ngāue kehekehe ko ení, fakatouʻosi ʻa e ngāue fakamāmani mo e fakalaumālie, naʻe ʻiloʻi ʻe Solomone ko e ngaahi ngāue fakalaumālié ʻoku mahuʻinga mamaʻo ange ia ʻi he ngāue fakamāmaní. Naʻá ne tohi: “Ko e fakamulitukú leva eni, hili hono fanongoa ʻa e meʻa kotoa pē: Manavahē ki he ʻOtua moʻoní pea tauhi ʻene ngaahi fekaú.”​—Tml. 12:13.

9. Naʻe anga-fēfē hono tauhi ʻe Sīsū ʻene ngāue paʻangá ke ʻi hono tuʻunga totonú?

⁹ Ko Sīsū ko ha tokotaha ngāue mālohi. ʻI heʻene tupu haké, naʻá ne ngāue ko ha tufunga. (Mk. 6:3) ʻOku ʻikai ha veiveiua naʻe houngaʻia ʻene ongo mātuʻá ʻi heʻene tokoní ʻi heʻena feinga mālohi ke tokonaki maʻa hona fāmili tokolahí. Pea ʻi he tuʻunga ko ha tufunga, ko e tangata haohaoa ko Sīsuú kuo pau pē naʻe fiemaʻua ʻene ngāué! ʻOku ngalingali naʻe fiefia moʻoni ʻa Sīsū ʻi heʻene ngāué. Neongo ia, naʻa mo e ʻi he taimi naʻe ngāue paʻanga ai ʻa Sīsuú, naʻá ne vaheʻi ʻa e taimi ki he ngaahi ngāue fakalaumālié. (Sione 7:15) Ki mui ai, ʻi he tuʻunga ko ha faifekau taimi-kakato, naʻá ne faleʻi ʻene kau fanongó: “Mou ngāue, ʻo ʻikai maʻá e meʻakai ʻoku ʻauhá, ka maʻá e meʻakai ʻoku tolonga atu ki he moʻui taʻengatá.” (Sione 6:27) Pea ʻi he Malanga ʻi he Moʻungá, naʻe pehē ʻe Sīsū: “Faʻoaki koloa maʻamoutolu ʻi hēvani.”​—Māt. 6:20.

10. Ko e hā ʻa e pole ʻe fehangahangai nai mo e niʻihi ʻi heʻenau ngāue paʻangá?

¹⁰ Ko e poto fakaʻotuá ʻokú ne tokoniʻi kitautolu ke maʻu ha vakai mafamafatatau ki heʻetau ngāue paʻangá. ʻI hotau tuʻunga ko e kau Kalisitiané, ʻoku akoʻi kitautolu ke tau “ngāue mālohi, ʻo fai ha ngāue lelei.” (ʻEf. 4:28) Ko e kau pule ngāué ʻoku nau faʻa fakatokangaʻi ʻetau faitotonú mo ʻetau ngāue mālohí, pea te nau tala mai nai ʻenau fakamahuʻingaʻi ʻetau founga ngāué. ʻI heʻetau maʻu ʻa e ngaahi fakaueʻiloto lelei, te tau kamata nai ke ngāue ʻi ha ngaahi houa lahi ange, ʻo tau ʻamanaki ʻe ʻai ai ʻetau pule ngāué ke ne vakai lelei ange ki he Kau Fakamoʻoni ʻa Sihová.  Neongo ia, ʻe vave nai ʻetau fakatokangaʻi ʻoku kamata ke tau fakaliʻeliʻaki hotau ngaahi fatongia ʻi he fāmilí mo e ngāue fakateokalatí. ʻOku fiemaʻu ke tau fai ha liliu​—ke tau hoko ʻo mafamafatatau.

11. Ko e hā naʻe ako ʻe ha tokoua fekauʻaki mo hono maʻu ha vakai mafamafatatau ki he ngāué?

¹¹ Ko ha tokoua kei siʻi ko William naʻá ne fakamoʻoniʻi tonu ʻa e mahuʻinga hono tauhi ʻa e ngāue paʻangá ke ʻi hono tuʻunga totonú. ʻOku fakamatala ʻa William fekauʻaki mo ha mātuʻa naʻá ne ngāue ki ai ki muʻa: “[Ko e tokoua ko ení] ko ha faʻifaʻitakiʻanga lelei ia ʻo ha taha ʻokú ne maʻu ha vakai mafamafatatau ki he ngāué. ʻOkú ne ngāue mālohi, pea ʻokú ne fengāueʻaki lelei mo ʻene kau kasitomaá koeʻuhí ko e lelei ʻene ngāué. Ka ʻi he ngataʻanga ʻo e ʻahó, ʻi he ʻosi ʻa e ngāué, ʻokú ne ʻiloʻi ʻa e founga ke tuku ai ʻene ngāué ki tafaʻaki pea tokangataha ki hono fāmilí mo ʻene lotú. Pea ʻokú ke ʻilo ha meʻa? Ko e taha ia ʻi he kakai fiefia taha ʻoku ou ʻiloʻí!” *

12. Naʻe anga-fēfē hono fakahāhā ʻe Solomone naʻá ne maʻu ha vakai mafamafatatau fekauʻaki mo ia tonu, ka naʻe anga-fēfē ʻa e mole ia meiate iá?

¹² ʻI he taimi naʻe hoko ai ʻa Solomone ko ha tokotaha lotu faitōnunga ʻa Sihová, naʻá ne maʻu ha vakai mafamafatatau kiate ia tonu. ʻI heʻene kei talavoú, naʻá ne fakahaaʻi anga-fakanānā hono ngaahi ngātangá pea kole ʻa e tataki ʻa Sihová. (1 Tuʻi 3:7-9) ʻI he konga ki muʻa ʻo e pule ʻa Solomoné, naʻá ne toe lāuʻilo ki he fakatuʻutāmaki ʻo e hoko ʻo pōlepolé. Naʻá ne tohi: “Ko e pōlepolé ʻoku iku atu ia ki he ʻauha, pea ko ha laumālie hīkisia ʻoku iku atu ia ki he hinga.” (Pal. 16:18) Ko e meʻa fakamamahí, naʻe ʻikai ke ngāueʻaki ʻe Solomone ʻene faleʻí tonu ki mui ai. ʻI ha taimi lolotonga ʻene pulé, naʻe kamata ke ne pōlepole ʻo tukunoaʻi ʻa e ngaahi fiemaʻu ʻa e ʻOtuá. Ko e fakatātaá, ko e taha ʻo e ngaahi laó naʻe pehē ai ko ha tuʻi Hepelū ʻoku ʻikai totonu “ke ne maʻu maʻana ha ngaahi uaifi tokolahi, koeʻuhí ke ʻoua naʻa afe ʻa hono lotó.” (Teu. 17:17) Naʻe tukunoaʻi ʻe Solomone ʻa e lao ko iá peá ne  maʻu ha uaifi ʻe 700 mo e kau sinifu ʻe 300, ko e tokolahi ʻo kinautolu ko e kau pangani! (1 Tuʻi 11:1-3) Mahalo naʻe ongoʻi ʻe Solomone kuó ne “puleʻi ʻa e meʻa kotoa.” Pe ko e hā pē ʻa e tuʻungá, naʻe faai atu pē ʻo faingataʻaʻia ʻa Solomone ʻi he ngaahi nunuʻa ʻo ʻene mavahe meia Sihová.​—1 Tuʻi 11:9-13.

13. Ko e hā ʻe lava ke tau ako mei he fakalaulauloto ki he tōʻonga anga-fakatōkilalo ʻa Sīsuú?

¹³ Naʻe tauhi maʻu ʻe Sīsū ha vakai mafamafatatau mo anga-fakatōkilalo fekauʻaki mo ia tonu. ʻI he ki muʻa ke hoko ʻa Sīsū ko ha tangatá, naʻá ne langa hake ha lēkooti fakaofo ʻi he ngāue ʻa Sihová. Naʻe fakafou ʻia Sīsū, “ʻa hono fakatupu ʻa e ngaahi meʻa kehe kotoa pē ʻi he langí pea ʻi he māmaní.” (Kol. 1:16) ʻI he papitaiso ʻa Sīsuú, naʻe hā mahino naʻá ne manatuʻi ʻa e ngaahi meʻa naʻá ne fakahoko ʻi he taimi naʻá ne ʻi heʻene Tamaí ai. (Māt. 3:16; Sione 17:5) Ka ko e ʻilo ko iá naʻe ʻikai ke ne ʻai ʻa Sīsū ke ne hoko ʻo pōlepole. ʻI hono kehé, naʻe ʻikai ʻaupito ke ne hakeakiʻi ia ʻo māʻolunga ange ʻi ha toe taha. Naʻá ne tala ange ki heʻene kau ākongá naʻe ʻikai ke ne haʻu ki he māmaní “ke tauhi fakasevāniti ki ai, ka ke ngāue fakasevāniti pea ke foaki ʻene moʻuí ko ha huhuʻi ko e fetongi ʻo e tokolahi.” (Māt. 20:28) Naʻá ne toe fakahaaʻi anga-fakanānā naʻe ʻikai lava ke ne fai ha meʻa ʻe taha ʻiate ia pē. (Sione 5:19) He anga-fakatōkilalo ē naʻe fakahāhā ʻe Sīsuú! Naʻe tokonaki mai ʻe Sīsū ha faʻifaʻitakiʻanga lelei ʻaupito ke tau muimui ai.

14. Ko e hā ʻe lava ke tau ako meia Sīsū fekauʻaki mo hono maʻu ha vakai totonu kiate kitautolú?

¹⁴ Naʻe akoʻi ʻe Sīsū hono kau muimuí ke nau maʻu ha vakai totonu kiate kinautolu tonu. ʻI he taimi ʻe taha, naʻe fakapapauʻi ʻe Sīsū kiate kinautolu: “[Ko] homou ngaahi tuʻoni louʻulú kuo ʻosi lau fakalautelau ia.” (Māt. 10:30) Ko e kupuʻi lea ko iá ʻoku mātuʻaki fakafiemālie kiate kitautolu, tautefito kapau ʻoku tau hehema ke maʻu ha vakai taʻepau kiate kitautolu tonu. ʻOku ʻuhinga iá ko ʻetau Tamai fakahēvaní ʻokú ne tokanga lahi mai kiate kitautolu​—ʻoku tau mahuʻinga moʻoni ʻi hono ʻaó. Heʻikai ʻaupito te tau loto ke fehuʻia ʻa e vakai mai ʻa Sihova kiate kitautolú ʻaki ʻetau fakamulituku ʻoku ʻikai ke tau tuha ke hoko ko ʻene kau lotu pea ke maʻu ʻa e moʻuí ʻi heʻene māmani foʻoú.

15. (a) Ko e hā ʻa e vakai mafamafatatau fekauʻaki mo kitautolu naʻe fokotuʻu mai ʻi he Taua Leʻo ke tau fakatupulekiná? (e) Hangē ko ia ʻoku hā ʻi he fakatātā ʻi he peesi 24, kapau ʻoku tau fuʻu tokangataha kiate kitautolu, ko e hā ʻa e ngaahi tāpuaki ʻoku tau tō mei aí?

 ¹⁵ ʻI he taʻu nai ʻe 15 kuo maliu atú, naʻe fokotuʻu mai ʻi he Taua Leʻo ke tau fakatupulekina ʻa e vakai mafamafatatau ko ení fekauʻaki mo kitautolu: “ʻOku pau moʻoni, heʻikai te tau loto ke fakakaukau fuʻu māʻolunga fekauʻaki mo kitautolu ʻo aʻu ki ha tuʻunga te tau hoko ai ʻo loto-mahikihiki; pea heʻikai te tau loto ke ʻalu ʻo fuʻu hulu ki he tafaʻaki ʻe tahá ʻo ʻikai ha momoʻi fakakaukau ʻe taha fekauʻaki mo kitautolu. Ka, ʻoku totonu ko ʻetau taumuʻá ia ke fakatupulekina ha vakai totonu kia kitautolu, ha vakai ko ia te tau fakakaukau ai ki hotau ngaahi mālohingá pea pehē ki hotau ngaahi ngātangá. Naʻe fakalea ia ʻe ha fefine Kalisitiane ʻi he founga ko ení: ‘ʻOku ʻikai ke u tēvolo; hala ke u ʻāngelo. ʻOku ʻi ai pē ʻeku ngaahi tafaʻaki lelei mo e tafaʻaki kovi, pea ʻoku pehē pē mo e tokotaha kotoa.’” * ʻE lava ke ke vakai ki he ʻaonga ʻe hoko ʻi hono fakatupulekina ha vakai mafamafatatau fekauʻaki mo kitautolu?

16. Ko e hā ʻoku ʻomai ai ʻe Sihova ʻa e tataki fakapotopotó?

¹⁶ Fakafou ʻi he Folofolá, ʻoku ʻomai ai ʻe Sihova ʻa e tataki fakapotopotó. ʻOkú ne ʻofa ʻiate kitautolu, pea ʻokú ne loto ke tau fiefia. (ʻAi. 48:17, 18) Ko e ʻalunga fakapotopotó​—ʻa ē ʻokú ne ʻomai ʻa e fiefia lahi tahá​—ko hono fakamuʻomuʻa ʻa e ngaahi meʻa ʻa Sihová ʻi heʻetau moʻuí. ʻI heʻetau fai iá, te tau kalofi ai ʻa e ngaahi palopalema lahi ʻoku hokosia ʻe he faʻahinga ʻoku tokanga tōtuʻa ki he paʻangá, ngāue paʻangá pe kiate kinautolu tonu. ʻOfa ke tau fakapapauʻi kotoa ke tau hoko ʻo poto pea ʻai ʻa e loto ʻo Sihová ke fiefia!​—Pal. 23:15.