1. Ko e hā ʻoku fakaeʻa mai ʻi he tohi ʻa Fakahaá fekauʻaki mo e kakai ʻa e ʻOtuá?

 KO E tohi ʻa Fakahaá ʻoku fakaeʻa mai ai ko e Puleʻanga fakahēvani ʻo e ʻOtuá kuo fokotuʻu pea ko Sētane kuo kapusi mei hēvani. (Fkh. 12:1-9) Ko e kapusi ko iá naʻe hoko ai ʻa e nonga ʻi he ngaahi langí, kae fakatupunga ai ʻa e ngaahi faingataʻa kiate kitautolu. Ko e hā hono ʻuhingá? Koeʻuhí ko e ʻita ʻa Sētané ʻoku fakahangataha ki he faʻahinga ʻoku tauhi faitōnunga kia Sihova ʻi heni ʻi he māmaní.​—Fkh. 12:12, 15, 17.

2. Ko e hā te ne tokoniʻi kitautolu ke nofoʻaki tuʻu maʻú?

² ʻE lava fēfē ke tau nofoʻaki tuʻu maʻu ʻi he fehangahangai mo e ngaahi ʻoho ʻa Sētané? (Fkh. 13:10) Ko e meʻa ʻe taha te ne tokoniʻi kitautolu ko hono ʻiloʻi ʻa e meʻa ʻoku tuku tauhi mai ʻi he kahaʻú. Ko e fakatātaá, ʻi he tohi ʻa Fakahaá, ʻoku fakamatalaʻi ai ʻe he ʻapositolo ko Sioné ʻa e niʻihi ʻo e ngaahi tāpuaki ʻoku vavé ni ke tau maʻu. ʻOku kau ʻi he ngaahi tāpuaki ko iá ʻa hono toʻo ʻosi atu ʻa e ngaahi fili ʻo e ʻOtuá. Tau sivisiviʻi he taimí ni ʻa e anga hono fakamatalaʻi ʻi he tohi ʻa Fakahaá ʻa e ngaahi fili ko ení pea mo e meʻa ʻe hoko kiate kinautolú.

3. Ko e hā ʻa e niʻihi ʻo e ngaahi fakaʻilonga ʻoku ʻomai ʻi he tohi ʻa Fakahaá?

³ ʻI he ʻuluaki veesi pē ʻo e tohi Fakahaá, ʻoku tala mai ko e fakamatala ʻoku teu ke tau laú ʻoku ʻomai ia “ʻi ha ngaahi fakaʻilonga,” ʻa ia, ʻi ha lea fakaefakatātā. (Fkh. 1:1) Ko e ngaahi fili ʻo e ʻOtuá ʻoku fakamatalaʻi fakaefakatātā. ʻOku tau vakai ki ha fanga manu fekai. Ko e fakatātaá, ʻoku ʻi ai ha “manu fekai ʻoku ʻalu hake mei he tahí.” ʻOku ʻi ai hono “meʻatui ʻe hongofulu mo ʻulu fitu.” (Fkh. 13:1) ʻOku muimui mai ʻi he manu fekai ko iá ha “toe manu fekai  ʻe taha ʻoku ʻalu hake mei he māmaní.” Ko e manu fekai ko iá ʻoku lea ʻo hangē ha talākoní pea ʻokú ne ʻai “ke ʻalu hifo ha afi mei he langí.” (Fkh. 13:11-13) Pea ʻoku tau vakai ki ha toe manu fekai kehe, ko ha “manu fekai lanu kula ʻahoʻaho,” ʻa ia ʻoku heka ai ha fefine feʻauaki. Ko e fanga manu fekai ʻe tolu ko ení ʻoku nau fakafofongaʻi ʻa e ngaahi fili fuoloa ʻo Sihova ko e ʻOtuá mo hono Puleʻangá. Ko ia ai, ʻoku mahuʻinga ke tau ʻiloʻi kinautolu.​—Fkh. 17:1, 3.

4-5. ʻOku anga-fēfē hono tokoniʻi kitautolu ʻe he meʻa ʻoku hiki ʻi he Taniela 7:15-17 ke mahinoʻi ʻa e ʻuhinga ʻo e ngaahi fakaʻilonga ko ení?

⁴ Ki muʻa ke lava ʻo tau ʻiloʻi ʻa e ngaahi fili ko ení, ʻoku fiemaʻu ke tau mahinoʻi ʻa e ʻuhinga ʻo e lea fakaefakatātā ko ení. Ko e kī ki hono mahinoʻi iá ko hono fakaʻatā ʻa e Tohi Tapú ke ne fakamatalaʻi ia. Ko e lahi ʻo e ngaahi fakaʻilonga ʻoku maʻu ʻi he tohi ʻa Fakahaá ʻoku ʻosi fakamatalaʻi ia ʻi he ngaahi tohi kehe ʻi he Tohi Tapú. Ko e fakatātaá, ko e palōfita ko Tanielá naʻá ne misi ʻo mamata ki he “ʻalu hake mei he tahí ʻa e ngaahi fuʻu manu ʻe fā.” (Tan. 7:1-3) ʻOku tala mai ʻe Taniela ʻa e meʻa ʻoku nau fakafofongaʻí. Ko e ngaahi fuʻu manu ko ení ʻoku nau fakafofongaʻi ʻa e “ngaahi tuʻi” pe ngaahi founga-pule ʻe fā. (Lau ʻa e Taniela 7:15-17.) Ko e fakamatala māʻalaʻala ko iá ʻokú ne tokoniʻi kitautolu ke mahinoʻi ko e fanga manu fekai ʻoku fakamatala ki ai ʻi he tohi ʻa Fakahaá kuo pau pē ʻoku nau toe ʻuhinga ki he ngaahi mafai fakapolitikale.

⁵ Tau sivisiviʻi angé he taimí ni ʻa e niʻihi ʻo e ngaahi fakaʻilonga ʻoku fakamatalaʻi ʻi he tohi ʻa Fakahaá. ʻI heʻetau fai iá, te tau vakai ai ki he anga hono tokoniʻi kitautolu ʻe he Tohi Tapú ke ʻiloʻi ʻa e ʻuhinga ʻo e ngaahi fakaʻilonga ko ení. Te tau kamataʻaki ʻa e ngaahi holongā ʻo e fanga manu fekaí. ʻUluakí, te tau vakai pe ko hai ʻoku nau fakafofongaʻí. Pea te tau sio leva ki he meʻa ʻoku hoko ki he fanga manu fekai ko iá. Fakaʻosí, te tau lāulea ki he ʻuhinga ʻo e ngaahi meʻa ko ení kiate kitautolú.

6. ʻOku ʻuhinga ki he hā ʻa e manu fekai ʻulu fitu ʻoku lave ki ai ʻi he Fakahā 13:1-4?

⁶ Ko hai ʻokú ne fakafofongaʻi ʻa e manu fekai ʻulu fitú? (Lau ʻa e Fakahā 13:1-4.) ʻOku tau fakatokangaʻi ko e manu fekai ko ení ʻokú ne hangē ha lēpatí ka ko hono ngaahi vaʻé naʻe hangē ia ko e vaʻe ʻo ha peá pea ko hono ngutú naʻe hangē ko e ngutu ʻo ha laione, pea naʻe ʻi ai hono meʻatui ʻe hongofulu. Ko e ngaahi tafaʻaki kotoa ʻo e manu fekai ko ení ʻoku toe hā mai ia ʻi he ngaahi fuʻu manu ʻe fā ʻoku lave ki ai ʻi he Taniela 7. Neongo ia, ʻi he tohi ko eni ʻa Fakahaá, ko e ngaahi tafaʻaki ko ení ʻoku fakatahaʻi ia ʻi he manu fekai pē ʻe taha, kae ʻikai ko ha fuʻu manu kehekehe ʻe fā. Ko e manu fekai ko ení ʻoku ʻikai ke ne fakafofongaʻi ha founga-pule pē ʻe taha pe ko ha ʻemipaea ʻi māmani. ʻOku lave ki ai ʻoku pule “ki he matakali mo e kakai mo e lea mo e puleʻanga kotoa pē.” Ko ia kuo pau pē ʻoku lahi ange ia ʻi ha founga-pule fakafonua pē ʻe taha. (Fkh. 13:7) Ko e manu fekai leva ko ení kuo pau pē ʻokú ne fakafofongaʻi ʻa e kotoa ʻo e ngaahi mafai fakapolitikale kuó ne puleʻi ʻa e faʻahinga ʻo e tangatá ʻi he kotoa ʻo e hisitōliá. *​—Tml. 8:9.

7. Ko e hā ʻoku fakafofongaʻi ʻe he ʻulu taki taha ʻe fitu ʻo e manu fekaí?

⁷ Ko e hā ʻoku fakafofongaʻi ʻe he ʻulu taki taha ʻe fitú? Ko ha fakalika ki heni ʻoku maʻu ʻi he Fakahā vahe 17, ʻa ia ʻoku fakamatala ai ki ha ʻīmisi ʻo e manu fekai naʻe lave ki ai ʻi he Fakahā vahe 13. ʻI he Fakahā 17:10, ʻoku tala mai ai: “ʻOku ʻi ai ʻa e tuʻi ʻe fitu: Kuo tō ha toko nima, ko e taha ʻoku ʻi aí ni, pea kuo teʻeki ke aʻu mai ʻa e toko taha; ka ʻi he taimi ʻe aʻu mai aí, kuo pau ke ne nofo ʻo kiʻi fuoloa siʻi.” ʻI he kotoa ʻo e ngaahi mafai fakapolitikale kuo ngāueʻaki ʻe Sētané, ko e mafai ai ʻe fitu kuo nau tuʻu-ki-muʻa  ko e ngaahi “ʻulu.” Ko e ngaahi ʻemipaea eni ʻi māmani kuo nau kaunga fakahangatonu ki he kakai ʻa e ʻOtuá. ʻI he taimi ʻo e ʻapositolo ko Sioné, ko e mafai ʻe nima ko ení naʻa nau ʻosi pule ʻi māmani: Ko ʻIsipite, ʻAsīlia, Pāpilone, Mītia-Pēsia mo Kalisi. Ko e puleʻanga hau ʻi māmani hono onó, ʻa Loma, naʻe kei pule ʻi he taimi naʻe maʻu ai ʻe Sione ʻa e meʻa fakahaá. Ko hai ʻe hoko ko e puleʻanga hau fakaʻosí pe ʻulu hono fitú?

8. Ko hai ʻokú ne fakafofongaʻi ʻa e ʻulu hono fitu ʻo e manu fekaí?

⁸ Hangē ko ia te tau vakai ki aí, ko e ngaahi kikite ʻi he tohi ʻa Tanielá te ne tokoniʻi kitautolu ke ʻiloʻi ʻa e ʻulu hono fitu mo fakaʻosi ʻo e manu fekaí. Ko hai ʻa e hau ʻi māmani kuo pule ʻi he taimi ko eni ʻo e ngataʻangá, lolotonga ʻa e “ʻaho ʻo e ʻEikí”? (Fkh. 1:10) Ko hono fakatahaʻi ia ʻo e Puleʻanga Fakatahataha Pilitāniá mo ʻAmelika, ʻi hono fakalea ʻe tahá, ko e Puleʻanga Hau ʻi Māmani ko Pilitānia-ʻAmeliká. ‘E lava leva ke tau fakamulituku ai ko e ʻulu hono fitu ia ʻo e manu fekaí naʻe lave ki ai ʻi he Fakahā 13:1-4.

9. Ko hai ʻokú ne fakafofongaʻi ʻa e manu fekai ʻoku ʻi ai hono “ongo meʻatui hangē ha lamí”?

⁹ ʻOku toe tala mai ʻi he Fakahā vahe 13 ko e ʻulu hono fitu ko ení, ʻa e Puleʻanga Hau ʻi Māmani ko Pilitānia-ʻAmeliká, ʻokú ne toe hoko ko ha manu fekai ʻoku ʻi ai hono “ongo meʻatui hangē ha lamí, ka naʻá ne kamata lea ʻo hangē ha talākoní.” Ko e manu fekai ko ení “ʻokú ne fakahoko ʻa e ngaahi mana lalahi, ʻo aʻu ki hono ʻai ke ʻalu hifo ha afi mei he langí ki he māmaní ʻi he ʻao ʻo e faʻahinga ʻo e tangatá.” (Fkh. 13:11-15) ʻI he Fakahā vahe 16 mo e 19 ʻoku fakamatalaʻi ai ʻa e manu fekai ko ení ko e “palōfita loí.” (Fkh. 16:13; 19:20) ʻOku lave ʻa Taniela ki ha meʻa meimei tatau, ʻa ia, ko e Puleʻanga Hau ʻi Māmani ko Pilitānia-ʻAmeliká te ne “ʻomi ʻa e fakaʻauha fakalilifu.” (Tan. 8:19, 23, 24, fkm. ʻi lalo) Ko e meʻa tofu pē ia naʻe hoko ʻi he lolotonga ʻa e Tau II ʻa Māmaní. Ko e ongo foʻi pomu ʻātomi ʻe ua naʻe kaunga ki hono fakangata ʻa e tau ko iá ʻi he Pasifikí ko e tupu ia mei he ngāue fakataha ʻa e kau faisaienisi ʻa Pilitānia mo ʻAmeliká. Ko e Puleʻanga Hau ʻi Māmani ko Pilitānia-ʻAmeliká, naʻá ne ʻai ai ke “ʻalu hifo ha afi mei he langí ki he māmaní.”

10. Ko e hā ʻoku fakafofongaʻi ʻe he “ʻīmisi ʻo e manu fekaí”? (Fakahā 13:14, 15; 17:3, 8, 11)

¹⁰ Hokó ʻoku tau sio ki ha manu fekai ʻe taha. Ko e manu fekai ko ení ʻoku meimei fōtunga tatau pē mo e manu fekai ʻulu fitú ka ʻoku lanu kula ʻahoʻaho ia. Naʻe ui ia ko e “ʻīmisi ʻo e manu fekaí” pea ʻoku fakamatalaʻi ia ko ha ‘tuʻi hono valu.’ * (Lau ʻa e Fakahā 13:14, 15; 17:3, 8, 11.) Ko e “tuʻi” ko ení ʻoku lave ki ai naʻá ne ʻi ai, pea ʻikai ke ne toe ʻi ai pea ki mui ai ʻokú ne toe ʻasi hake. Naʻá ne ʻuluaki ʻi ai ko e Kautaha ʻa e Ngaahi Puleʻangá. Pea naʻe ʻikai ke toe ʻi ai ʻi he lolotonga ʻa e Tau II ʻa Māmaní. Ki mui ai naʻá ne toe ʻasi hake ʻo hoko ko e kautaha ʻa e Ngaahi Puleʻanga Fakatahatahá, ʻa ia ʻokú ne pouaki he taimí ni ʻa e lelei ʻo e fokotuʻutuʻu fakapolitikale fakamāmanilahí.

11. Ko e hā ʻoku langaʻi ʻe he fanga manu fekai fakapolitikalé, pea ko e hā ʻoku ʻikai fiemaʻu ai ke tau ilifia kiate kinautolú?

¹¹ ʻOku ngāueʻaki ʻe he fanga manu fekai fakapolitikalé ʻenau fakamatala fakangali leleí ke langaʻi ʻa e fakafepaki kia Sihova mo ʻene kakaí. ʻI ha tuʻunga fakaefakatātā ʻoku nau fakatahatahaʻi ʻa e “ngaahi tuʻi ʻo e māmani kotoa kuo nofoʻí” ki he tau ʻo ʻĀmaketoné, ʻa ia ko e “ʻaho lahi ʻo e ʻOtua Māfimafi-Aoniú.” (Fkh. 16:13, 14, 16) Ka heʻikai ha meʻa te tau ilifia ki ai. Ko hotau ʻOtua lahi, ko Sihová, te ne ngāue vave mai ke fakahaofi ʻa e faʻahinga kotoa ʻoku poupou ki hono tuʻunga-pulé.​—‘Isi. 38:21-23.

12. Ko e hā ʻe hoko ki he kotoa ʻo e fanga manu fekaí?

 ¹² Ko e hā ʻoku hoko ki he kotoa ʻo e fanga manu fekaí? ʻOku ʻomai ʻi he Fakahā 19:20 ʻa e talí: “Naʻe puke mai ʻa e manu fekaí fakataha mo e palōfita loi naʻá ne fai ʻi hono ʻaó ʻa e ngaahi mana ʻa ia naʻá ne takihalaʻi ʻaki ʻa e faʻahinga naʻa nau maʻu ʻa e fakaʻilonga ʻo e manu fekaí pea mo e faʻahinga ʻoku nau lotu ki hono ʻīmisí. Lolotonga ʻena kei moʻuí, naʻe lī fakatouʻosi kinaua ki he ano afi ʻoku ulo sūlifa.” Ko ia ʻi he kei pule pē ʻa e ngaahi fili fakapolitikale ko eni ʻo e ʻOtuá, te ne fakaʻauha taʻengata kinautolu.

13. Ko e hā ʻa e pole ʻoku fehangahangai mo e kau Kalisitiané koeʻuhi ko e ngaahi founga-pule ʻi he māmaní?

¹³ Ko e hā ʻa e ʻuhinga ʻo e meʻá ni kiate kitautolú? ʻI he tuʻunga ko e kau Kalisitiané, kuo pau ke tau mateaki ki he ʻOtuá mo hono Puleʻangá. (Sione 18:36) Ke fai iá, ʻoku fiemaʻu ke tau nofoʻaki tuʻu-ʻatā mei he ngaahi meʻa fakapolitikale ʻi he māmani ko ení. Ka ko e tuʻu-ʻatā peheé ʻe lava ke mātuʻaki faingataʻa, koeʻuhí ʻoku kounaʻi ʻe he ngaahi founga-pule ʻi he māmaní ʻetau poupou kakató, fakatouʻosi ʻi he lea mo e ngāue. Ko e faʻahinga ʻoku nau tukulolo ki heʻenau tengé ʻoku nau maʻu ʻa e fakaʻilonga ʻo e manu fekaí. (Fkh. 13:16, 17) Kae kehe, ko ha taha pē ʻokú ne maʻu ʻa e fakaʻilonga ko iá, te ne taʻefakahōifuaʻi ʻa Sihova pea mole ai meiate ia ʻa e moʻui taʻengatá. (Fkh. 14:9, 10; 20:4) He mahuʻinga leva ē kiate kitautolu taki taha ke mātuʻaki tuʻu-ʻatā, tatau ai pē pe ko e hā ʻa e lahi hono tenge kitautolú!

14. Ko e hā ʻa e meʻa fakaʻohovale naʻe sio ki ai ʻa e ʻapositolo ko Sioné, hangē ko ia ʻoku fakamatalaʻi ʻi he Fakahā 17:3-5?

¹⁴ Ko e ʻapositolo ko Sioné ʻokú ne lave naʻá ne “mātuʻaki ofoofo” ʻi ha meʻa ʻe taha naʻá ne mamata ki ai. Ko e hā ia? Ko ha fefine naʻá ne heka atu ʻi he taha ʻo e fanga manu fekai anga-fītaʻa ko ení. (Fkh. 17:1, 2, 6) ʻOku fakatātaaʻi ia ko ha “fuʻu fefine feʻauaki” pea ʻoku ui ko “Pāpilone ko e Lahi.” ʻOkú ne “fehokotaki fakasino taʻetāú” mo e “ngaahi tuʻi ʻo e māmaní.”​—Lau ʻa e Fakahā 17:3-5.

15-16. Ko hai ʻa “Pāpilone ko e Lahi,” pea ʻoku anga-fēfē ʻetau ʻiloʻi iá?

¹⁵ Ko hai ʻa “Pāpilone ko e Lahi”? Ko e fefine ko ení heʻikai lava ke ne fakafofongaʻi ha kautaha fakapolitikale koeʻuhí ʻoku lave ki ai ʻokú ne fehokotaki fakasino taʻetaau mo e kau taki fakapolitikale ʻo e māmaní. (Fkh. 18:9) Ko e moʻoni, ʻokú ne feinga mālohi ke puleʻi ʻa e kau taki ko ení, ʻo ne heka fakaefakatātā ʻiate kinautolu. ʻIkai ko ia pē, heʻikai lava ke ne fakafofongaʻi ʻa e ngaahi ʻelemēniti fakakomēsiale mānumanu ʻo e māmani ʻo Sētané. ʻOku lave kehe pē ki ai ko e “kau mēsianiti ʻo e māmaní.”​—Fkh. 18:11, 15, 16.

¹⁶ ʻI he Folofolá, ko e kupuʻi lea “fefine feʻauaki” ʻe lava ke ʻuhinga ki he faʻahinga ʻoku nau taku ʻoku nau tauhi ki he ʻOtuá ka ʻoku nau kau ʻi ha faʻahinga founga ʻo e tauhi ʻaitolí pe ʻi ha toe founga kehe ʻoku nau hoko ai ko e kaumeʻa ʻo e māmaní. (1 Kal. 5:25; Sēm. 4:4) ʻI hono kehé, ko e faʻahinga ʻoku nau lotu faitōnunga ki he ʻOtuá ʻoku lave kiate kinautolu ʻoku nau “kei nofo anga-maʻa” pe ko ha “kau nofo tāupoʻou.” (2 Kol. 11:2; Fkh. 14:4) Ko Pāpilone ʻi he kuonga muʻá naʻe hoko ko e senitā ia ʻo e lotu loí. Ko ia kuo pau leva ko Pāpilone ko e Lahí ʻokú ne fakafofongaʻi ʻa e ngaahi founga kotoa ʻo e lotu loí. Ko hono moʻoní, ko ia ʻa e ʻemipaea ʻi māmani ʻo e lotu loí.​—Fkh. 17:5, 18; sio ki he kupu ʻi he Uepisaití ʻi he jw.org “Ko Hai ʻa Pāpilone ko e Lahi?”

17. Ko e hā ʻe hoko ki Pāpilone ko e Lahí?

¹⁷ Ko e hā ʻe hoko ki Pāpilone ko e Lahí? ʻOku peheni hono tali ia ʻe he Fakahā 17:16, 17: “Ko e meʻatui ʻe hongofulu naʻá ke sio ki aí pea mo e manu fekaí te nau fehiʻa ki he fefine feʻauakí pea te nau ʻai ia ke hoko ko e koto halaʻatā mo telefua, pea te nau keina hono kakanó pea tutu fakaʻaufuli ia ʻaki ʻa e afi. He kuo ʻai ʻe he ʻOtuá ki honau lotó ke nau fakahoko ʻa ʻene fakakaukaú.”  ʻIo, ʻe ueʻi ʻe Sihova ʻa e ngaahi puleʻangá ke ngāueʻaki ʻa e manu fekai lanu kula ʻahoʻahó, ʻa ia, ko e Ngaahi Puleʻanga Fakatahatahá, ke ʻohofi ʻa e ʻemipaea ʻi māmani ʻo e lotu loí pea fakaʻauha ʻosi ia.​—Fkh. 18:21-24.

18. ʻE lava fēfē ke tau fakapapauʻi ʻoku ʻikai ʻaupito haʻatau kaunga ki Pāpilone ko e Lahi?

¹⁸ Ko e hā ʻene ʻuhinga kiate kitautolú? ʻOku fiemaʻu ke tau tauhi maʻu ʻa e “founga lotu ʻoku maʻa mo taʻeʻuliʻi ʻi he anga ʻo e vakai ʻa hotau ʻOtuá.” (Sēm. 1:27) Heʻikai ʻaupito te tau loto ke fakaʻatā kitautolu ke tākiekina ʻe he ngaahi akonaki loí, ngaahi kātoanga fakapanganí, tuʻunga fakaeʻulungaanga ololaló mo e ngaahi tōʻonga fakahaʻele faʻahikehe ʻa Pāpilone ko e Lahí! Pea ʻe hokohoko atu ʻetau fakatokanga ki he kakaí ke nau “hiki meiate ia,” ke nau fakaʻehiʻehi ai mei he halaia fakataha mo ia ʻi he ʻao ʻo e ʻOtuá.​—Fkh. 18:4.

19. Ko hai ʻa e “fuʻu talākoni lanu kulokula mālohi”?

¹⁹ ʻOku toe lave ʻa e tohi ʻa Fakahaá ki ha “fuʻu talākoni lanu kulokula mālohi.” (Fkh. 12:3) ʻOku faitau ʻa e talākoni ko ení mo Sīsū pea mo ʻene kau ʻāngeló. (Fkh. 12:7-9) ʻOkú ne ʻohofi ʻa e kakai ʻa e ʻOtuá, pea ʻokú ne ʻoange ʻa e mālohi ki he fanga manu fekai fakapolitikalé. (Fkh. 12:17; 13:4) Ko hai ʻa e talākoni ko ení? Ko e “ngata ʻo onoʻahó, ʻa e tokotaha ʻoku ui ko e Tēvoló mo Sētané.” (Fkh. 12:9; 20:2) Ko ia ʻokú ne teke mui ʻi he ngaahi fili kehe kotoa ʻo Sihová.

20. Ko e hā ʻe hoko ki he talākoní?

²⁰ Ko e hā ʻoku hoko ki he talākoní? ʻOku pehē ʻi he Fakahā 20:1-3 ʻe ʻi ai ha ʻāngelo te ne lī ʻa Sētane ki ha luo taʻehanotakele, ʻa ia ʻokú ne fakafofongaʻi ʻa e tuku pilīsone. Lolotonga hono tuku pilīsone ʻo Sētané, heʻikai “te ne toe takihalaʻi ʻa e ngaahi puleʻangá kae ʻoua ke ngata ʻa e taʻu ʻe 1,000.” Fakaʻosí, ko Sētane mo ʻene fanga tēmenioó ʻe fakaʻauha ʻosi, ʻo fakatātaaʻi ia ʻi hono lī kinautolu ki he “ano ʻo e afi mo e sūlifá.” (Fkh. 20:10) Sioloto atu ki ha māmani ʻoku ʻikai ke ʻi ai ʻa Sētane mo ʻene fanga tēmenioó. He taimi fakalata ē ko ia!

21. Ko e hā ʻe lava ke tau fiefia ai fekauʻaki mo e meʻa kuo tau lau ʻi he tohi ʻa Fakahaá?

²¹ He fakalototoʻa ē ke mahinoʻi ʻa e ʻuhinga ʻo e ngaahi fakaʻilonga ko eni ʻoku hiki ʻi he tohi ʻa Fakahaá! Kuo malava ke tau ʻiloʻi ʻa e ngaahi fili ʻo Sihová pea tau toe vakai foki ki he meʻa ʻe hoko kiate kinautolú. ʻIo, “fiefia ē ko e tokotaha ʻokú ne lau leʻo-lahi ʻa e ngaahi lea ʻo e kikité ni pea mo e faʻahinga ʻoku nau fanongo ki aí”! (Fkh. 1:3) Ka ʻi he hili hono toʻo atu ʻa e ngaahi fili ʻo e ʻOtuá, ko e hā ʻa e ngaahi tāpuaki ʻe maʻu ʻe he faʻahinga faitōnunga ʻo e tangatá? Te tau lāulea ki ai ʻi he kupu fakaʻosi ʻo e kupu hokohoko ko ení.