1. ʻOku anga-fēfē hono fakamatalaʻi ʻe he Tohi Tapú ʻa e ʻofa moʻoní?

 “KO E ulo ʻa e ʻofá ko ha afi kakaha, ko e ulo meia Iā. Heʻikai lava ke tāmateʻi ʻa e ʻofá ʻe he ngaahi vai ʻoku tafe mālohí, pea heʻikai lava ke tafiʻi atu ia ʻe he ngaahi vaitafé.” b (Hiva. 8:6, 7) He fakamatala fakaʻofoʻofa ē fekauʻaki mo e ʻofa moʻoní! Ko e ngaahi lea ko ení ʻoku maʻu ai ha moʻoni fakatupu tuipau ki he ngaahi hoa malí: ʻE lava ke mo tauʻaki fakahāhā ʻa e ʻofa heʻikai kaʻangá.

2. Ko e hā kuo pau ke fai ʻe ha ongo meʻa ke fakapapauʻi heʻikai hoko ʻena ʻofá ʻo momoko?

² Ko hono maʻu ʻe ha ongo meʻa mali ʻa e ʻofa heʻikai kaʻangá lolotonga ʻena kei moʻuí ʻoku fakatuʻunga pē ʻiate kinaua. Ke fakatātaaʻí, ko ha afi ʻoku tafu ʻoku malava ke moʻui pē ʻo ʻikai ʻosiʻosi​—kapau pē ʻoku tafunaki. Kapau heʻikai ke tolo maʻu pē ia, ʻe faai atu pē ʻo mate ʻa e afí. ʻI he tuʻunga meimei tatau, ko e ʻofa ʻi he vahaʻa ʻo ha husepāniti mo ha uaifi ʻe lava ke mālohi ai pē ʻo ʻikai ʻosi​—kapau pē te na fakaivimālohiʻi hona vahaʻangataé. ʻI he taimi ʻe niʻihi, ʻe ongoʻi ʻe ha ongo meʻa ko ʻena ʻofá ʻoku fakaʻaʻau ke momoko, tautefito ʻi he taimi ʻoku lōmekina ai kinaua ʻe ha faingataʻa fakapaʻanga, mahamahakí pe ko e ngaahi pole ʻo hono ʻohake ʻa e fānaú. Ko ia kapau ʻokú ke ʻosi mali, ʻe lava fēfē ke ke tauhi ke moʻui ʻa e “ulo meia Iā” ʻi hoʻo nofo malí? ʻI he kupu ko ení, te tau lāulea ai ki he founga ʻe tolu ke tauhi ai homo vahaʻangataé ke mālohi pea maʻu ha nofo mali fiefia. c

3. ʻOku anga-fēfē ʻa e tokoni hono maʻu ha vahaʻangatae mālohi mo Sihova ki ha ongo meʻa ke tauhi ke moʻui ʻena ʻofá? (Tangata Malanga 4:12) (Sio foki ki he fakatātaá.)

³ Ke tauhi ke moʻui ʻa e “ulo meia Iā,” ko e husepānití mo e  uaifí fakatouʻosi ʻoku totonu ke na ngāue ke maʻu ha vahaʻangatae mālohi mo Sihova. ʻOku anga-fēfē tokoni ʻa e haʻi ko ení ki heʻena nofo malí? ʻI he taimi ʻoku fakamahuʻingaʻi ai ʻe ha ongo meʻa ʻena kaumeʻa mo ʻena Tamai fakahēvaní, ʻokú na ngāueʻaki loto-lelei ʻene faleʻí, ʻa ia ʻoku tokoniʻi leva ai kinaua ke fakaʻehiʻehi pea ikuʻi ʻa e ngaahi palopalema ʻe lava ke ne ʻai ʻena feʻofaʻakí ke hoko ʻo momokó. (Lau ʻa e Tangata Malanga 4:12.) Ko e kakai fakalaumālié ʻoku nau feinga foki ke faʻifaʻitaki kia Sihova pea fakatupulekina ʻa e ngaahi ʻulungaanga ʻokú ne fakahāhaá, hangē ko e anga-lelei, kātaki mo e fakamolemole. (ʻEf. 4:32–5:1) Ko ha ongo meʻa ʻokú na fakahāhā ʻa e ngaahi ʻulungaanga ko iá ʻokú na ʻai ai ke faingofua ange ki he ʻofá ke tupulekina. Ko ha tuofefine ko Lena, kuó ne mali laka hake ʻi he taʻu ʻe 25, ʻokú ne pehē, “ʻOku faingofua ke ʻofa mo fakaʻapaʻapaʻi ha tokotaha fakalaumālie.”

4. Ko e hā naʻe fili ai ʻe Sihova ʻa Siosifa mo Mele ke na hoko ko e ongo mātuʻa ʻa e Mīsaia ʻi he kahaʻú?

⁴ Fakakaukau ki ha faʻifaʻitakiʻanga ʻi he Tohi Tapú. ʻI he taimi naʻe pau ke fili ai ʻe Sihova ha ongo meʻa ke hoko ko e ongo mātuʻa ʻa e Mīsaia ʻi he kahaʻú, naʻá Ne fili ʻa Siosifa mo Mele mei he hako tokolahi ʻo Tēvitá. Ko e hā hono ʻuhingá? Naʻá na fakatou maʻu ha vahaʻangatae fakafoʻituitui mo Sihova, pea naʻe ʻiloʻi ʻe Sihova te na langa hake ʻena nofo malí ʻi heʻena ʻofa kiate iá. Ngaahi hoa mali, ko e hā ʻe lava ke mou ako meia Siosifa mo Melé?

5. Ko e hā ʻe lava ke ako ʻe he ngaahi husepānití meia Siosifá?

⁵ Naʻe ngāueʻaki loto-lelei ʻe Siosifa ʻa e tataki ʻa Sihová, pea naʻe ʻai ai ke ne hoko ko ha husepāniti lelei ange. Naʻe aʻu ʻo tuʻo tolu ʻene maʻu ʻa e ngaahi fakahinohino mei he ʻOtuá fekauʻaki mo hono fāmilí. ʻI he taimi taki taha, naʻá ne talangofua leva, naʻa mo e ʻi he taimi naʻe ʻuhinga iá ko hono fai ʻa e ngaahi liliu lahi. (Māt. 1:20, 24; 2:13-15, 19-21) ʻI he muimui ki he tataki ʻa e ʻOtuá, naʻe maluʻi ʻe Siosifa ʻa Mele, poupouʻi ia, pea tokonaki maʻana. Sioloto atu ki hono ʻai ʻe he ngaahi tōʻonga ʻa Siosifá ʻa Mele ke ne ʻofa mo fakaʻapaʻapaʻi lahi ia! Ngaahi husepāniti, ʻe lava ke mou faʻifaʻitaki kia Siosifa ʻaki ʻa e kumi ki he faleʻi makatuʻunga ʻi he Tohi Tapú ki hono tokangaʻi ho fāmilí. d ʻI he taimi ʻokú ke ngāueʻaki ai ʻa e faleʻi ko ení, neongo kapau ʻoku ʻuhinga iá ko hono fai ʻa e ngaahi liliu, ʻokú ke fakahāhā ʻa e ʻofa ki ho uaifí pea ʻokú ke fakaivimālohiʻi ai hoʻo nofo malí. Ko ha tuofefine ʻi Vanuatu, ʻa ia kuó ne mali ʻi he taʻu ʻe 20 tupu ʻokú ne pehē: “ʻI he taimi ʻoku kumi ai ʻa hoku husepānití ki he tataki ʻa Sihová pea ngāueʻaki iá, ʻoku ou fakaʻapaʻapaʻi lahi ange ai ia. ʻOku ou ongoʻi malu, pea ʻoku ou falala pau ki heʻene ngaahi filí.”

6. Ko e hā ʻe lava ke ako ʻe he ngaahi uaifí meia Melé?

⁶ Naʻe maʻu ʻe Mele ʻa e vahaʻangatae fakafoʻituitui mo Sihova; ko ʻene tuí naʻe ʻikai makatuʻunga ia ʻi he meʻa naʻe fai ʻe Siosifá. Naʻá ne  ʻiloʻi lelei ʻa e Folofolá. (Sio ki he nouti ako ʻo e Luke 1:46.) Naʻá ne vaheʻi foki ʻa e taimi ke fakalaulauloto ai. (Luke 2:19, 51) ʻOku ʻikai ha veiveiua, ko e tuʻunga fakalaumālie ʻo Melé naʻá ne ʻai ia ke ne hoko ko ha uaifi lelei ʻaupito. ʻI he ʻahó ni, ko e ngaahi uaifi tokolahi ʻoku nau feinga ke faʻifaʻitaki kia Mele. Ko e fakatātaá, ko ha tuofefine ko Emiko ʻokú ne pehē: “ʻI he teʻeki ke u malí, naʻe ʻi ai ʻeku taimi-tēpile fakalaumālie fakafoʻituitui. Ka ʻi he hili ʻeku malí, naʻá ku ʻiloʻi koeʻuhi ko hoku husepānití naʻá ne lotu maʻa kimaua pea takimuʻa ʻi he lotú, ko ʻeku tuí naʻe kamata ke fakafalala ia ki he meʻa naʻá ne faí. Naʻá ku ʻiloʻi naʻe fiemaʻu ke u fua pē ʻeku kavenga ʻaʻaku ʻi heʻene haʻu ki hoku vahaʻangatae mo Sihová. Ko ia ʻi he taimí ni ʻoku ou vaheʻi hoku taimi fakafoʻituitui mo hoku ʻOtuá​—lotu, lau ʻa e Folofolá, pea fakalaulauloto ki heʻene ngaahi fakakaukaú.” (Kal. 6:5) Uaifi, ʻi hoʻo hokohoko atu ke fakaivimālohiʻi hoʻo kaumeʻa mo Sihová, ko ho husepānití te ne maʻu ʻa e ʻuhinga lahi ange ke fakahīkihikiʻi koe pea ʻofa ʻiate koe.​—Pal. 31:30.

7. Ko e hā ʻe lava ke ako ʻe he ngaahi hoa malí meia Siosifa mo Mele ʻo fekauʻaki mo e lotu fakatahá?

⁷ Ko Siosifa mo Mele naʻá na ngāue fakataha foki ke tauhi hona vahaʻangatae mo Sihová ke mālohi. Naʻá na mahinoʻi ʻa e mahuʻinga ʻo e lotu fakataha kia Sihova ko ha fāmilí. (Luke 2:22-24, 41; 4:16) Naʻe mei faingataʻa nai ke fai pehē, tautefito ʻi he ʻalu ke tokolahi ange ʻa e fāmilí, ka naʻe malava ke nau fai pehē. He faʻifaʻitakiʻanga lelei ʻaupito ē ki he ngaahi hoa mali ʻi he ʻaho ní! Kapau ʻoku ʻi ai haʻo fānau, ʻo hangē ko Siosifa mo Melé, ʻe faingataʻa nai ke maʻu ʻa e ngaahi fakatahá pe ke vaheʻi ʻa e taimi ki he lotu fakafāmilí. ʻE toe faingataʻa ange nai ke fokotuʻutuʻu ʻa e taimi ke ako pe lotu fakataha ai ko ha ongo meʻa. Neongo ia, manatuʻi ʻi he taimi ʻokú mo lotu fakataha ai kia Sihová, te mo ʻunuʻunu ofi ange ai kiate ia pea te mo vāofi ange. Ko ia fakamuʻomuʻa ʻa e lotú.

8. Ko e hā ʻe lava ke fai ʻe ha ongo meʻa ʻoku palopalema ʻena nofo malí ke maʻu ʻaonga kakato ange mei he lotu fakafāmilí?

⁸ Fēfē kapau ʻoku palopalema hoʻo nofo malí? Ko e foʻi fakakaukau ʻo e lotu fakafāmili fakatahá heʻikai ke hā ngali fakamānako. Kapau ko ia, kamata ʻaki ʻa e lāulea ki ha meʻa nounou mo fakafiefia, ko ha meʻa ʻokú mo fakatou loto ke lāulea ki ai. Ko e sitepu ko ení ʻe lava ke fakaivimālohiʻi ai homo vahaʻangataé pea mo hoʻomo holi ke fai ʻa e ngaahi meʻa fakalaumālié ko ha ongo meʻa mali.

9. Ko e hā kuo pau ai ke fakamoleki ʻe ha husepāniti mo ha uaifi ha taimi fakatahá?

⁹ Ongo meʻa mali, ʻe lava foki ke mo tauhi hoʻomo ʻofá ke moʻui ʻaki ʻa e fakamoleki ha taimi fakataha. ʻI hoʻomo fai peheé, ʻoku ngalingali ʻe siʻisiʻi ange ai ʻa e malava ke mo māvahevahé​—fakaeʻatamai mo e fakaeongo. (Sēn. 2:24) Fakatokangaʻi ʻa e meʻa naʻe ʻiloʻi ʻe Lilia mo Ruslan ʻi he hili pē ʻena malí, laka hake ʻi he taʻu ʻe 15 kuo maliu atú. ʻOku pehē ʻe Lilia: “Naʻá ma ʻiloʻi heʻikai malava ke ma fakamoleki fakataha ha taimi lahi ʻo hangē ko ia naʻá ma fakakaukau ki aí. Ko e ʻaho taki taha naʻá ma femoʻuekina ʻi he ngāue paʻangá, ngāue fakaʻapí pea ko e toenga ʻo e ʻahó maʻá e fānaú. Naʻá ma ʻiloʻi kapau heʻikai ke ma fakamoleki fakataha ʻa e taimi ko ha ongo meʻa mali, ʻe lava ke ma hoko ʻo vāmamaʻo.”

10. ʻE lava fēfē ke ngāueʻaki ʻe he ngaahi hoa malí ʻa e tefitoʻi moʻoni ʻi he ʻEfesō 5:15, 16?

¹⁰ Ko e hā ʻe lava ke fai ʻe he ngaahi hoa malí ke fakapapauʻi ʻokú nau fakamoleki ʻa e taimi fakatahá? ʻE lava ke mo vaheʻi ʻa e taimi pe fakataimitēpileʻi ʻa e taimi fakaekimoua. (Lau ʻa e ʻEfesō 5:15, 16.) Ko ha tokoua ʻi Naisīlia ko Uzondu ʻokú ne pehē: “ʻI hono fakataimitēpileʻi ʻeku ngaahi ngāué, ʻoku ou fakakau ai ʻa e taimi ke u fakamoleki fakataha mo hoku uaifí, pea ʻoku ou fakamuʻomuʻa ʻa e taimi ko iá.” (Fil. 1: 10) Fakakaukau ki he anga hono ngāue lelei taha ʻaki ʻe Anastasia, ko ha uaifi ʻo ha ʻovasia sēketi ʻi Molotova ʻa hono taimí. ʻOkú ne pehē: “ʻOku ou feinga ke fai ʻeku ngaahi ngāue fakafoʻituituí lolotonga ʻa e femoʻuekina hoku husepānití ʻi hono ngaahi fatongiá. ʻI he founga ko iá, ʻoku lava ke ma fakamoleki fakataha ai ʻa e taimi ʻamui ange.” Kae fēfē kapau ko hoʻo taimi-tēpilé ʻokú ne ʻai ke faingataʻa ke mo fakamoleki fakataha ha taimi?

11. Ko e hā ʻa e ngaahi ngāue naʻe fai fakataha ʻe ʻAkuila mo Pīsilá?

¹¹ Ko e ngaahi hoa malí ʻe lava ke nau ako mei he faʻifaʻitakiʻanga ʻa ʻAkuila mo Pīsilá, ko ha ongo meʻa naʻe ʻofeina ʻe he muʻaki kau Kalisitiané. (Loma 16:3, 4) Neongo ʻoku ʻikai ke ʻomai ʻe he Tohi Tapú ʻa e ngaahi fakaikiiki fekauʻaki mo ʻena nofo malí, ʻoku fakahaaʻi mai ai naʻá na kau fakataha ʻi he ngāue, malanga mo hono tokoniʻi ʻa e niʻihi kehé. (Ngā. 18:2, 3, 24-26) Ko hono moʻoní, ʻi he taimi pē ʻoku lave ai ʻa e Tohi Tapú kia ʻAkuila mo Pīsilá, ʻoku lave fakataha maʻu pē kiate kinaua.

12. Ko e hā ʻe lava ke fai ʻe ha husepāniti mo e uaifi ke na fakamoleki fakataha ʻa e taimi lahi ange? (Sio foki ki he fakatātaá.)

¹² ʻE lava fēfē ke faʻifaʻitaki ʻa e ngaahi hoa malí kia ʻAkuila mo Pīsila? Fakakaukau ki he ngaahi meʻa lahi ʻoku fiemaʻu ke ke fai mo ho hoá. ʻE lava ke mo fakahoko fakataha ʻa e ngaahi ngāue ko ení kae ʻikai ko e fai toko taha pē ia? Ko e fakatātaá, naʻe malanga fakataha ʻa ʻAkuila mo Pīsila. ʻOkú mo fai maʻu pē ʻa e ngaahi palani ke fai ʻa e meʻa tatau? Ko ʻAkuila mo Pīsila naʻá na toe ngāue fakataha. ʻOkú ke ngāue kehekehe nai mo ho hoá, ka ʻe lava ke mo fai fakataha ʻa e ngaahi ngāue fakaʻapí? (Tml. 4:9) ʻI hoʻomo fetokoniʻaki ke fakahoko ha ngāue, ʻokú mo ongoʻi ange ai hangē ha timí pea ʻokú mo maʻu ai ha faingamālie ke talanoa. Ko Robert mo Linda kuó na mali ʻi he taʻu ʻe 50 tupu. ʻOku pehē ʻe Robert: “Ko e moʻoni, ʻoku ʻikai lahi homa taimi ke fakamoleki fakataha ʻi he fakafiefiá. Ka ʻi he taimi ʻoku ou fufulu ai ʻa e ʻū peletí pea holo mātuʻu ia ʻe hoku uaifí pe ʻi he taimi ʻoku ou huo ai ʻi tuʻa pea haʻu hoku uaifí ʻo ma ngāue fakatahá, ʻoku ou ongoʻi fiefia lahi. Ko hono fai fakataha ʻa e ngaahi meʻá ʻokú ne ʻai ke ma vāofi. ʻOku hokohoko atu ai ke tupulekina ʻema ʻofá.”

13. Ke fāʻūtaha moʻoní, ko e hā ʻoku totonu ke fai ʻe ha husepāniti mo ha uaifi?

¹³ Kae kehe, manatuʻi, ʻoku ʻikai ko hoʻomo fakatahá pē pea tokoni ai ki he fāʻūtahá. ʻOku pehē ʻe ha uaifi ʻi Pelēsila: “ʻI he ngaahi ʻahó ni, koeʻuhi ko e lahi ʻa e ngaahi fakahohaʻá, kuó u ʻiloʻi ʻe lava ke ma tō ai ʻi he tauhele ʻo e fakakaukau ʻokú ma fakamoleki ʻa e taimi fakataha koeʻuhí pē ʻokú ma ʻi he malumalu ʻo e fale tatau. Kuó u ako ʻoku fiemaʻu ke ke fai ʻa e meʻa lahi ange ʻi hoʻomo nofo fakatahá pē. ʻOku fiemaʻu ke u ʻoange ki hoku hoá ʻa e tokanga ʻokú ne fiemaʻú.” Fakatokangaʻi ʻa e founga ʻoku fakapapauʻi ai ʻe Bruno mo hono uaifí, ʻa Tays, ʻokú na fefakahāhāʻaki ʻa e tokangá. ʻOkú ne pehē: “Lolotonga homa taimi ʻataá, ʻokú ma  tuku ʻema telefoni toʻotoʻó ki tafaʻaki pea fiefia ʻi he taimi ʻokú ma maʻú.”

14. Kapau ʻoku ʻikai ke fiefia ha ongo meʻa ʻi he fakamoleki fakataha ʻa e taimí, ko e hā ʻe lava ke na faí?

¹⁴ Kae kehe, fēfē kapau ʻoku ʻikai ke ke fiefia mo ho hoá ʻi he fakamoleki fakataha ʻa e taimí? Mahalo ʻoku kehekehe ʻa e meʻa ʻokú mo saiʻia aí pe mahalo ʻokú mo tauʻaki fakatupu ʻita. Ko e hā ʻe lava ke ke faí? Fakakaukau ki heʻetau fakatātā ki muʻa ange ki he afi naʻe tafú. ʻOku ʻikai ke kamatá pē ʻo ulo kakaha. ʻOku fiemaʻu ke tolo māmālie ia ʻaki ʻa e ngaahi konga fefie lalahi. ʻI he tuʻunga meimei tatau, fēfē ke mo kamata ʻaki hono fakamoleki fakataha ha kiʻi taimi siʻi pē ʻi he ʻaho taki taha? Fakapapauʻi ke fai ha meʻa ʻokú mo fakatou saiʻia ai, ʻo ʻikai ko ha meʻa ʻe lava ke ne fakatupunga ha kē. (Sēm. 3:18) ʻI he kamataʻaki ʻa e fanga kiʻi meʻa iiki pē, ʻe kamata nai ke mo toe fakamoʻui hoʻomo ʻofá.

15. Ko e hā ʻoku mātuʻaki mahuʻinga ai ʻa e fakaʻapaʻapá koeʻuhi ke tauhi ke moʻui ʻa e ʻofa ʻa ha ongo meʻa?

¹⁵ Ko e fakaʻapaʻapá ʻoku mātuʻaki mahuʻinga ʻi ha nofo mali. ʻOku hangē ia ko e ʻosikena ʻokú ne ʻai ke ulo kakaha ha afi ʻoku tafu. ʻI he ʻikai ʻi ai ha ʻosikená, ʻoku vave ʻa e mate ʻa e afí. ʻI he tuʻunga meimei tatau, ʻi he ʻikai ha fakaʻapaʻapá, ʻe ʻiloʻi ʻe ha ongo meʻa ko ʻena ʻofá ʻe lava ke vave ʻene momokó. ʻI he tafaʻaki ʻe tahá, ko ha husepāniti mo ha uaifi ʻokú na feinga ke fefakahāhāʻaki ʻa e fakaʻapaʻapá ʻokú na ngāue fakataha ke tauhi ʻena ʻofá ke moʻui. Neongo ia, manatuʻi ko hoʻo fakahāhā ʻa e fakaʻapaʻapá ʻoku ʻikai ʻuhinga iá ʻokú ke ongoʻi ʻokú ke fakahāhā ia, ka ʻoku ʻuhinga iá pe ʻoku ongoʻi ʻe ho hoá ʻoku fakaʻapaʻapaʻi ia. Ko Penny mo Aret kuó na mali laka hake ʻi he taʻu ʻe 25. ʻOku pehē ʻe Penny: “Ko ʻema fefakaʻapaʻapaʻakí ʻokú ne faʻu ha ʻatimosifia māfana ʻi homa ʻapí. ʻOkú ma ongoʻi tauʻatāina ke fakahaaʻi ʻema ngaahi ongoʻí koeʻuhí ʻokú ma ʻiloʻi ʻokú ma fakatou fakamahuʻingaʻi ʻema ngaahi fakakaukaú.” Ko ia ko e hā ʻe lava ke ke fai ke tokoni ki ho hoá ke ne ongoʻi ʻokú ke fakaʻapaʻapaʻi moʻoni iá? Fakakaukau ki he faʻifaʻitakiʻanga ʻa ʻĒpalahame mo Selá.

16. Ko e hā ʻe lava ke ako ʻe he ngaahi husepānití mei he faʻifaʻitakiʻanga ʻa ʻĒpalahamé? (1 Pita 3:7) (Sio foki ki he fakatātaá.)

¹⁶ Naʻe fakafeangai ʻa ʻĒpalahame kia Sela ʻi he fakaʻapaʻapa. Naʻá ne fanongo ki he ngaahi fakakaukau ʻa Selá pea fakaʻapaʻapaʻi ʻene ngaahi ongoʻí. ʻI he taimi ʻe taha, naʻe loto-mamahi ʻa Sela, peá ne huaʻi atu ʻene ngaahi ongoʻí kia ʻĒpalahame, pea aʻu ʻo tukuakiʻi ia. Naʻe fai ʻe ʻĒpalahame ha tali ʻita kiate ia? ʻIkai. Naʻá ne ʻiloʻi ko Selá ko ha uaifi naʻe anganofo mo poupou kiate ia. Naʻe fanongo ʻa ʻĒpalahame kiate ia pea feinga ke fakaleleiʻi ʻa e ʻīsiú. (Sēn. 16:5, 6) Ko e hā ʻe lava ke tau ako mei aí? Ngaahi husepāniti, ʻoku mou maʻu ʻa e mafai ke fai ʻa e ngaahi fili maʻa homou fāmilí. (1 Kol. 11:3) Neongo ia, ko e meʻa anga-ʻofa ke faí ko e fanongo ki he fakakaukau ho uaifí ki muʻa ke fai ha fili, tautefito kapau ko e filí ʻe kaunga kiate ia.  (1 Kol. 13:4, 5) ʻI he ngaahi taimi ʻe niʻihi, ʻe ongoʻi loto-mafasia nai ho uaifí pea fiemaʻu nai ke fakahaaʻi ʻa e anga ʻene ngaahi ongoʻí. ʻOkú ke fakaʻapaʻapaʻi ʻene ngaahi ongoʻí ʻaki ʻa e fanongo tokanga? (Lau ʻa e 1 Pita 3:7.) Ko Angela mo Dmitry kuó na mali ʻi he meimei taʻu ʻe 30. ʻOkú ne fakamatala ki he anga hono ʻai ia ʻe hono husepānití ke ne ongoʻi ʻoku fakaʻapaʻapaʻi iá: “ʻOku mateuteu maʻu pē ʻa Dmitry ke fanongo mai kiate au ʻi he taimi ʻoku ou loto-mamahi aí pe ʻi he taimi ʻoku ou fie talanoa aí. ʻOkú ne anga-kātaki mai kiate au, naʻa mo e taimi ʻoku ou mamahi fakaeongo aí.”

17. Ko e hā ʻe lava ke ako ʻe he ngaahi uaifí mei he faʻifaʻitakiʻanga ʻa Selá? (1 Pita 3:5, 6)

¹⁷ Naʻe fakaʻapaʻapaʻi ʻe Sela ʻa ʻĒpalahame ʻaki ʻa e poupou ki heʻene ngaahi filí. (Sēn. 12:5) ʻI he taimi ʻe taha, naʻe fili ʻa ʻĒpalahame ke ne fakaaʻu atu ʻa e anga-talitali kakaí ki ha kau ʻaʻahi fakatuʻupakē. Naʻá ne kole kia Sela ke taʻofi ʻa e meʻa naʻá ne faí pea teuteu ha ngaahi foʻi mā. (Sēn. 18:6) Naʻe ngāue fakatoʻotoʻo ʻa Sela pea poupou ki he fili ʻa ʻĒpalahamé. Ngaahi uaifi, ʻe lava ke mou faʻifaʻitaki kia Sela ʻaki ʻa e poupou ki he ngaahi fili homou ngaahi husepānití. ʻI hoʻomou fai iá, ʻoku mou fakaivimālohiʻi ai hoʻomou nofo malí. (Lau ʻa e 1 Pita 3:5, 6.) Ko Dmitry, naʻe lave ki ai ʻi he palakalafi ki muʻá, ʻokú ne fakamatala ki he anga hono ʻai ia ʻe hono uaifí ke ne ongoʻi ʻoku fakaʻapaʻapaʻi iá. ʻOkú ne pehē: “ʻOku ou houngaʻia ʻi he ngaahi feinga ʻa Angela ke poupouʻi ʻeku ngaahi filí, neongo kapau ʻoku ʻikai ke tatau ʻema ngaahi fakakaukaú. Kapau ko e olá ʻoku ʻikai ko e lelei tahá ia, ʻoku ʻikai ke ne fakaangaʻi au.” He faingofua ē ke ʻofa ʻi ha taha ʻokú ne fakaʻapaʻapaʻi koe!

18. ʻOku anga-fēfē ʻa e maʻu ʻaonga ʻa e ngaahi hoa malí mei he ngāue ke tauhi ke moʻui ʻenau ʻofá?

¹⁸ ʻI he ʻahó ni, ʻoku loto ʻa Sētane ke ne tāmateʻi ʻa e ʻofa ʻoku lotolotoi ʻi he ngaahi nofo mali Kalisitiané. ʻOkú ne ʻiloʻi kapau ʻe mole ʻa e feʻofaʻaki ʻa ha ongo meʻa mali, ʻe kamata nai ke na ʻauhia meia Sihova. Kae kehe, ko e ʻofa moʻoní heʻikai lava ke tāmateʻi! Ko ia fakatauange ke hoko ʻa e ʻofa ʻi hoʻo nofo malí ʻo hangē ko e ʻofa ʻoku fakamatalaʻi ʻi he Hiva ʻa Solomoné. Hoko ʻo fakapapauʻi ke langa hake hoʻomo moʻuí ʻia Sihova, fakamoleki fakataha ʻa e taimi, peá mo fakatou fakaʻapaʻapaʻi ʻa hoʻomo ngaahi ongoʻí mo e fiemaʻú. ʻI hoʻomo fai iá, ko hoʻomo nofo malí ʻe ʻoatu ai ʻa e lāngilangí ki he Matavai ʻo e ʻofa moʻoní, ʻa Sihova, pea hangē pē ko ha afi ʻoku tafunaki maʻu pē, ko hoʻomo ʻofá ʻe ulo kakaha ai pē ʻo tuʻuloa.