Lau ʻa e Sēnesi 37:​23-28; 39:​17-23 ke ako mei he hokosia ʻa Siosifá fekauʻaki mo hono kātekina ʻa e fakamaau taʻetotonú.

Sivisiviʻi ʻa e potutohí. Ko e hā naʻe taki atu ki he fakafeangai taʻetotonu kia Siosifá? (Sēn. 37:​3-11; 39:​1, 6-10) Ko e hā hono lōloa ʻo e pau ke kātekina ʻe Siosifa ʻa e fakamaau taʻetotonú? (Sēn. 37:2; 41:46) Lolotonga ʻa e taimi ko iá, ko e hā naʻe fai ʻe Sihova maʻa Siosifá, ka ko e hā naʻe ʻikai ke Ne faí?—Sēn. 39:​2, 21; w23.01 17 ¶13.

Keli loloto ange. ʻOku ʻikai ke pehē ʻe he Tohi Tapú naʻe taukapoʻi ʻe Siosifa ʻa ia tonu ʻi he tukuakiʻi loi ʻa e uaifi ʻo Pōtifá. ʻOku anga-fēfē nai hono tokoniʻi kitautolu ʻe he ngaahi konga Tohi Tapu hokó ke fakaʻuhinga ʻi he ʻuhinga naʻe fili nai ai ʻa Siosifa ke hanganaki fakalongo pē pe ko e ʻuhinga ʻoku ʻikai fiemaʻu ai ke tau ʻamanekina ʻe fakaeʻa ʻa e ngaahi fakaikiikí kotoa? (Pal. 20:2; Sione 21:25; Ngā. 21:37) Ko e hā ʻa e ngaahi ʻulungaanga naʻá ne tokoniʻi nai ʻa Siosifa ke kātekina ʻa e fakamaau taʻetotonú?—Mai. 7:7; Luke 14:11; Sēm. 1:​2, 3.

ʻIloʻi ʻa e ngaahi lēsoní. ʻEke hifo:

• ‘Ko e hā ʻa e fakafeangai taʻetotonu ʻe lava ke u ʻamanekina ke fehangahangai mo ia ʻi he tuʻunga ko ha ākonga ʻa Sīsū?’ (Luke 21:​12, 16, 17; Hep. 10:​33, 34)

• ‘ʻE lava fēfē ke u mateuteu ke fekuki lavameʻa mo e fakamaau taʻetotonú?’ (Saame 62:​7, 8; 105:​17-19; w19.07 2-7)