“FEFINE.” Ko e anga ia ʻo e lea ʻa Sīsū ki he kakai fefiné ʻi he taimi ʻe niʻihi. Ko e fakatātaá, ʻi he taimi naʻá ne fakamoʻui ai ha fefine naʻe puke ʻo ne ʻai ia ke ne pikoua ʻi he taʻu ʻe 18, naʻe pehē ange ʻe Sīsū: “Fefine, kuo vetekina koe mei hoʻo puké.” (Luke 13:10-13) Naʻe aʻu ʻo ngāueʻaki ʻe Sīsū ʻa e lea anga-maheni ko ení ki heʻene faʻeé tonu, ʻa ia naʻe vakai ki ai ko ha anga-fakaʻapaʻapa ia ʻi he taimi ʻo e Tohi Tapú. (Sione 19:26; 20:13) Ka naʻe ʻi ai ha lea naʻe toe anga-fakaʻapaʻapa ange ia.

ʻOku ngāueʻaki ʻe he Tohi Tapú ʻa e lea lelei mo anga-ʻofa moʻoni ʻi he taimi ʻoku lave ai ki ha kau fefine pau. Naʻe ngāueʻaki ia ʻe Sīsū ʻi heʻene lea ki ha fefine naʻe puke ʻi he ʻau totó ʻi he taʻu ʻe 12. Ko e anga ʻo ʻene fakaofiofi kia Sīsuú naʻe ʻikai ke fuʻu fehoanaki ia mo e Lao ʻa e ʻOtuá, ʻa ia naʻe fakahaaʻi ai ko ha tokotaha pehē naʻe taʻemaʻa ia. Naʻe lava ke fakakikihiʻi naʻe totonu ke ne fakamavaheʻi ia mei he niʻihi kehé koeʻuhí ko hono tuʻungá. (Liv. 15:19-27) Ka naʻá ne holiholivale. Ko hono moʻoní, “naʻá ne tofanga ʻi he ngaahi mamahi lahi ko e tupu mei he kau toketā tokolahi pea kuó ne fakamoleki ai ʻa e kotoa ʻo ʻene koloá pea kuo ʻikai hano ʻaonga, ka ʻi hono kehé, kuo hoko ia ʻo kovi ange.”​—Mk. 5:25, 26.

Naʻe moulu fakalongolongo atu ʻa e fefiné ʻi he haʻohaʻonga ʻo e fuʻu kakaí, ʻo ne fakaofiofi atu mei mui ʻo ala ki he tapa ʻo e kofu tuʻa ʻo Sīsuú. Naʻe tuʻu leva ʻi he taimi pē ko iá ʻa ʻene ʻau totó! Naʻe fakakaukau ʻa e fefiné ʻe ʻikai lava ke fakatokangaʻi ia, ka naʻe ʻeke ʻe Sīsū: “Ko hai ia naʻe ala mai kiate aú?” (Luke 8:45-47) ʻI hení, naʻe manavahē mo tetetete ʻa e fefiné ʻo ne fakatōmapeʻe ʻi muʻa ʻia Sīsuú “peá ne tala ange kiate ia ʻa e moʻoní kotoa.”​—Mk. 5:33.

Ke ongoʻi fiemālie pē ʻa e fefiné, naʻe tala ange anga-ʻofa ʻe Sīsū: “ʻOfefine, loto-toʻa!” (Māt. 9:22) Fakatatau ki ha mataotao Tohi Tapu ʻe taha, ko e foʻilea faka-Hepelū mo faka-Kalisi ki he “ʻofefine” ʻoku lava ke ngāueʻaki ko ha metafoa ke fakahaaʻi ai ʻa e “anga-lelei mo e anga-ʻofa.” Naʻe toe ʻoatu ʻe Sīsū ha fakafiemālie ʻaki ʻene pehē: “Kuo fakamoʻui koe ʻe hoʻo tuí. ʻAlu ʻi he fiemālie, peá ke moʻui lelei mei ho mahaki fakamamahí.”​—Mk. 5:34.

“ʻOfefine.” Ko e anga ia ʻo e lea ʻa e tokotaha ʻIsileli tuʻumālie ko Pōasí ki he fefine Mōape ko Luté. Naʻá ne ongoʻi manavasiʻi foki koeʻuhí ko ha tokotaha tufi paʻale ia ʻi he fonua ʻo ha tangata naʻe ʻikai ke ne maheni mo ia. Naʻe pehē ange ʻe Pōasi, ‘E hoku ʻofefine, . . . fanongo.’ Naʻá ne fakaʻaiʻai leva ʻa Lute ke hokohoko atu ʻene tufi ʻi heʻene ngoué. Naʻe fakatōmapeʻe ʻa Lute ʻi muʻa ʻia Pōasi peá ne ʻeke ange ʻa e ʻuhinga ʻokú ne anga-lelei ange ai kiate iá he ko e muli ia. Naʻe toe ʻoange ʻe Pōasi ha fakafiemālie kiate ia ʻaki ʻene pehē: “Kuo fakaha o lahi kiate au, aia kotoabe kuo ke fai ki hoo faʻe i he fono, [ʻa e uitou ko Naomí] . . . Ke totogi e Jihova a hoo gaue.”​—Lute 2:8-12, PM.

He faʻifaʻitakiʻanga lelei ē ko Sīsū mo Pōasi ki he kau mātuʻa Kalisitiané! ʻI he taimi ʻe niʻihi, ʻe fakataha nai ha mātuʻa ʻe toko ua mo ha tuofefine Kalisitiane ʻokú ne fiemaʻu nai ha tokoni Fakatohitapu mo ha fakalototoʻa. Hili ʻena kumi ki he tataki ʻa Sihová ʻi he lotu pea fanongo lelei ki he meʻa ʻoku leaʻaki ʻe he tuofefiné, ʻe ʻoatu leva ʻe he mātuʻa ʻe toko uá ha fakafiemālie mo e fakanonga mei he Folofola ʻa e ʻOtuá​—Loma 15:4.