1. Ko e hā naʻe hoko lolotonga hono fakaʻauha ʻo Selusalemá?

 ʻI HE taʻu 607 ki muʻa ʻia Kalaisí, naʻe ʻohofi ai ʻe Tuʻi Nepukanesa II fakataha mo ʻene fuʻu kau tau Pāpiloné ʻa e kolo ko Selusalemá. ʻOku pehē ʻe he Tohi Tapú naʻe tāmateʻi ʻaki ʻa e heletā ʻe he tuʻí ʻa e kau talavoú. Naʻe “ʻikai te ne maemaeʻekina ha talavou pe finemui, ha fatutangata pe ha aʻuaʻu.” Ko e fakaʻosí, naʻá ne “tutu ʻa e fale ʻo Elohimi, pea nau laiki ʻa e ʻa ʻo Selusalema, ʻo nau fakamomofi hono ngaahi palasi, ʻo maumau hono ngaahi naunau mahuʻinga.”​—2 Kal. 36:17, 19.

2. Ko e hā ʻa e fakatokanga naʻe ʻoatu ʻe Sihová, pea ko e hā ʻe hoko ki he kau Siú?

² Naʻe ʻikai totonu ke ʻohovale ʻa e kau Siú ʻi hono fakaʻauha ʻo Selusalemá. ʻI he ngaahi taʻu lahi, naʻe fekau atu ʻe he ʻOtuá ha kau palōfita ke nau fakatokanga ki he kakaí kapau ʻe hokohoko atu ʻenau talangataʻá, ʻe ʻohofi kinautolu ʻe he kau Pāpiloné. Ko e kau Siu tokolahi naʻe tāmateʻi ʻaki ʻa e heletaá, pea ko e faʻahinga naʻe haó ngalingali naʻa nau nofo pōpula ʻi Pāpilone. (Sel. 15:2) Naʻe fēfē nai ʻa e nofo pōpulá? Naʻe hokosia nai ʻe he kau Kalisitiané ha meʻa meimei tatau mo e nofo pōpula ʻi Pāpiloné? Kapau ko ia, naʻe hoko ení ʻanefē?

3. Ko e hā ʻa e kehekehe ʻo e nofo pōpula ʻi Pāpiloné mei he nofo pōpula ʻi ʻIsipité?

³ Naʻe tala ʻe Sihova ki he kau Siú ʻi he taimi naʻe ʻave pōpula  ai kinautolú, kuo pau ke nau tali ʻa e ʻātakai foʻoú pea moʻui ʻi he founga lelei taha ʻe ala lavá. Naʻá ne tala kiate kinautolu fakafou ʻia Selemaia: “Mou laga ae gaahi fale, o nofo ai; bea to ae gaahi goue, mo kai hono fua; bea kumi ke melino ae kolo aia kuou buleʻi ke fetuku fakabobula akimoutolu ki ai, bea hufia ia kia Jihova: He te mou maʻu ae fiemalie i hono melino.” (Sel. 29:5, 7, PM) Ko e kau Siu naʻe muimui ʻi he fakahinohino ʻa Sihová naʻe lava pē nau maʻu ha kiʻi fiemālie neongo ʻa e nofo pōpulá. Naʻe fakaʻatā ʻe he kau Pāpiloné ke tokangaʻi pē ʻe he kau Siú ʻa e lahi taha ʻo ʻenau ngaahi ngāué mo nau fefonongaʻaki tauʻatāina ʻi he fonuá. ʻI he taimi ko iá, ko Pāpilone ʻa e senitā ki he ngaahi meʻa fakapisinisí. ʻOku hā mei he ngaahi maʻuʻanga fakamatala motuʻá, ʻi he lolotonga ʻa e nofo pōpula ʻa e kau Siú, naʻe ako ai ʻa e tokolahi ki he pōtoʻi ʻi he fefakatauʻakí pea naʻa nau hoko ko e kau tangata nima-meaʻa. Naʻe aʻu ʻa e kau Siu ʻe niʻihi ʻo tuʻumālie. Ko e nofo pōpula ko ení naʻe ʻikai ke fuʻu faingataʻa ia ʻo hangē ko ia naʻe hokosia ʻe he kau ʻIsileli naʻe nofo pōpula ʻi ʻIsipité ʻi he taʻu ʻe lauingeau ki muʻá.​—Lau ʻa e ʻEkisoto 2:23-25.

4. Ko hai ʻa e faʻahinga naʻe pau ke nau faingataʻaʻia fakataha mo e kau Siu taʻefaitōnungá, pea ko e hā naʻe ʻikai ai ke nau malava ʻo fai ʻa e meʻa kotoa naʻe fiemaʻu ʻe he Laó?

⁴ Ko e niʻihi ʻo e kau Siu naʻe fakaheeʻí ko e kau sevāniti faitōnunga ʻa e ʻOtuá. Neongo naʻe ʻikai ke nau fai ha kovi, naʻe pau ke nau faingataʻaʻia fakataha mo e toenga ʻo e kakaí. Naʻe maʻu ʻe he kau Siú ʻenau ngaahi fiemaʻu fakamatelié, ka naʻe lava fēfē ke nau lotu kia Sihova? Kuo fakaʻauha ʻa e temipalé mo e ʻōlitá, pea naʻe ʻikai ke lava ʻa e kau taulaʻeikí ʻo ngāue ʻi ha founga naʻe fokotuʻutuʻu maau. Ka naʻe fai ʻe he kau Siu faitōnungá ʻa e meʻa naʻa nau malavá ke muimui ki he Lao ʻa e ʻOtuá. Ko e fakatātaá, naʻe fakafisi ʻa Taniela, Setaleki, Mēsake mo ʻApitenikō ke nau kai ʻa e meʻakai naʻe tapui ki he kau Siú. Pea ʻoku pehē ʻe he Tohi Tapú naʻe lotu maʻu pē ʻa Taniela ki he ʻOtuá. (Tan. 1:8; 6:10) Kae kehe, koeʻuhí ko hono puleʻi kinautolu ʻe he puleʻanga panganí, naʻe faingataʻa ai ki he kau Siu faitōnungá ke nau fai ʻa e meʻa kotoa naʻe fiemaʻu ʻe he Laó.

5. Ko e hā ʻa e ʻamanaki naʻe ʻoange ʻe Sihova ki hono kakaí, pea ko e hā naʻe fakaofo ai ʻa e talaʻofa ko ení?

⁵ Naʻe malava nai ke toe lotu ʻa e kau ʻIsilelí ki he ʻOtuá ʻi ha founga ʻoku mātuʻaki fakahōifua? ʻI he taimi ko iá, naʻe hā ngali faingataʻa nai koeʻuhí he naʻe ʻikai ʻaupito ke fakatauʻatāinaʻi ʻe Pāpilone ʻenau kau pōpulá. Ka naʻe talaʻofa ʻe Sihova ko e ʻOtuá ʻe fakatauʻatāinaʻi hono kakaí, pea naʻe faifai atu pē ʻo hoko ia. Ko e ngaahi talaʻofa ʻa e ʻOtuá ʻoku hoko maʻu pē ia ʻo moʻoni!​—ʻAi. 55:11.

6, 7. Ko e hā ʻoku mātuʻaki mahuʻinga ai kiate kitautolu ke fakatonutonu ʻetau mahinó?

⁶ Kuo hokosia nai ʻe he kau Kalisitiané ha meʻa meimei tatau mo e nofo pōpula ʻi Pāpiloné? ʻI he ngaahi taʻu lahi, naʻe pehē ai ʻe he Taua Leʻo ko e kau Kalisitiane faitōnungá naʻa nau nofo pōpula ki Pāpilone ʻi he 1918 pea fakatauʻatāinaʻi kinautolu mei Pāpilone ʻi he 1919. Kae kehe, ʻi he kupu ko ení mo e kupu hokó, te tau ako ai ki he ʻuhinga ʻoku mātuʻaki mahuʻinga ai ke fakatonutonu ʻetau mahinó.

⁷ Fakakaukau ki heni: Ko Pāpilone ko e Lahí ʻa e ʻemipaea ʻi māmani ʻo e lotu loí. Pea naʻe ʻikai ke hoko ʻa e kakai ʻa e ʻOtuá ko e kau pōpula ki he lotu loí ʻi he 1918. ʻOku moʻoni eni he ko e lolotonga ʻa e taimi ko iá naʻe fakatangaʻi ʻa e kau paní. Ka ko e lahi taha hono fakatangaʻi kinautolú naʻe fakatupunga ia ʻe he ngaahi puleʻangá, kae ʻikai ko e lotu loí. Ki muʻa fuoloa ʻi he Tau 1 ʻa Māmaní, naʻe ʻosi fakamavaheʻi pē ʻe he kau  sevāniti pani ʻa e ʻOtuá kinautolu mei he lotu loí. Ko ia ʻoku hā mei hení naʻe ʻikai ke hoko ʻa e kakai ʻa Sihová ʻo nofo pōpula ki Pāpilone ko e Lahi ʻi he 1918.

8. Ko e hā naʻe hoko hili e mate ʻa e kau ʻapositoló? (Sio ki he ʻuluaki fakatātā ʻi he kupú ni.)

⁸ ʻI he Penitekosi ʻo e taʻu 33, naʻe pani ai ʻa e laui afe ʻo e kau Kalisitiane foʻoú ʻaki ʻa e laumālie māʻoniʻoní. Naʻa nau hoko ai “ko ha matakali kuo fili, ko ha tuʻunga taulaʻeiki fakatuʻi, ko ha puleʻanga māʻoniʻoni, ko ha kakai ke hoko ko ha koloa makehe.” (Lau ʻa e 1 Pita 2:9, 10.) Naʻe tokangaʻi lelei ʻe he kau ʻapositoló ʻa e ngaahi fakatahaʻangá ʻi heʻenau kei moʻuí. Kae kehe, hili e mate ʻa e kau ʻapositoló, naʻe kamata ke akoʻi ʻe he kau tangata ʻe niʻihi ʻa e ngaahi fakakaukau loí pea naʻa nau loto ke tohoakiʻi atu ai ʻa e kau ākongá mei he moʻoní. Ko e kau tangata ko ení naʻa nau saiʻia ʻi he ngaahi filōsofia ʻa ʻAlisitōtolo mo Palató, pea naʻe kamata ke nau akoʻi ʻena ngaahi fakakaukaú kae ʻikai ko e moʻoni mei he Folofola ʻa e ʻOtuá. (Ngā. 20:30; 2 Tes. 2:6-8) Ko e tokolahi aí ko e kau tangata naʻe tuʻu-ki-muʻa pea ko e kau ʻovasia ʻi he ngaahi fakatahaʻangá. Ko ia, neongo naʻe tala ʻe Sīsū ki hono kau muimuí, “Ko kimoutolu kotoa pē ko e fanga tokoua,” naʻe kamata hono fokotuʻu ʻa e kalasi ʻo e haʻa faifekaú.​—Māt. 23:8.

9. Fakamatalaʻi ʻa e founga naʻe kamata ke ngāue fakataha ai ʻa e kau Kalisitiane tafoki mei he moʻoní mo e puleʻanga Lomá. Ko e hā ʻa e olá?

⁹ ʻI he taʻu 313 hili ʻa Kalaisí, naʻe puleʻi ai ʻe ʻEmipola Konisitanitaine ʻa e ʻEmipaea pangani ʻo Lomá, pea fakalaoʻi ai ʻa e founga lotu ko eni ʻa e kau Kalisitiane tafoki mei he moʻoní. Hili iá, naʻe kamata leva ʻa e Siasí ke nau ngāue vāofi mo e puleʻanga Lomá. Ko e fakatātaá, naʻe fai ʻe Konisitanitaine ha fakataha mo e kau taki lotú, ʻa ia naʻe ʻiloa ia ko e Fakataha ʻo Niseá. Hili ʻa e fakataha ko iá, naʻe ʻave ai ʻe he ʻEmipolá ʻa e faifekau ko ʻEliasi ʻo tuku pōpula koeʻuhí naʻe ʻikai ke ne loto ia ke tui ko Sīsū ʻa e ʻOtuá. Ki mui aí, naʻe hoko ʻa Fiotosiasi ko e ʻemipola Lomá, pea naʻe hoko leva ʻa e Siasi Katoliká ko e lotu fakaʻofisiale ia ʻo e ʻEmipaea Lomá. ʻOku pehē ʻe he kau faihisitōliá naʻe hoko ʻa e kau Loma panganí ko e “Kalisitiane” lolotonga ʻa e taimi ʻo ʻEmipola Fiotosiasí. Ka ko hono moʻoní ko e taimi ko iá, ko e kau Kalisitiane tafoki mei he moʻoní naʻa nau ʻosi tali ʻe kinautolu ʻa e ngaahi akonaki fakapanganí, ko ia naʻa nau ʻosi hoko ai ko e konga ʻo Pāpilone ko e Lahí. Neongo ia, naʻe kei ʻi ai pē ʻa e kau Kalisitiane pani faitōnunga ʻe niʻihi. Naʻa nau hangē ko e uite naʻe talanoa ki ai ʻa Sīsuú. Ko e faʻahinga faitōnunga ko ení naʻa nau fai honau lelei tahá ke lotu ki he ʻOtuá, ka naʻe fanongo ʻa e tokosiʻi ki he meʻa naʻa nau leaʻakí. (Lau ʻa e Mātiu 13:24, 25, 37-39.) Naʻa nau hoko moʻoni ko e kau pōpula ki Pāpilone!

10. Ko e hā naʻe kamata ke fehuʻia ai ʻe he kakaí ʻa e siasí?

¹⁰ ʻI he ʻuluaki ngaahi taʻu ʻe lauingeau siʻi hili ʻa Kalaisí, naʻe tokolahi pē ʻa e kakai naʻa nau kei lava ʻo lau ʻa e Tohi Tapú ʻi he lea faka-Kalisí pe lea faka-Latiná. Naʻe lava ke nau fakahoa ʻa e ngaahi akonaki ʻi he Folofola ʻa e ʻOtuá mo e ngaahi akonaki ʻa e siasí. ʻI he taimi naʻe ʻiloʻi ai ʻe he niʻihi ʻo e kakaí ʻa e loi ʻa e ngaahi akonaki ʻa e siasí, naʻa nau talitekeʻi ia. Ka naʻe fakatuʻutāmaki ke tala ki he niʻihi kehé ʻenau fakakaukaú, pea naʻe lava pē ke tāmateʻi ai kinautolu.

11. Naʻe anga-fēfē hono puleʻi ʻe he siasí ʻa e Tohi Tapú?

¹¹ ʻI he faai mai ʻa e taimí, ko e tokosiʻi pē naʻe lea faka-Kalisi pe lea faka-Latiná. Pea naʻe ʻikai ke fakaʻatā ʻe he kau taki lotu ʻo e siasí ke liliu ʻa e Folofola ʻa e ʻOtuá ki he lea  naʻe leaʻaki ʻe he kakaí. Ko e olá, ko e haʻa faifekaú pē mo e niʻihi ʻo e kakai naʻe akó naʻe lava ke nau lau ʻa e Tohi Tapú, pea ko e niʻihi ʻo e haʻa faifekaú naʻe ʻikai ke nau lava ʻo lautohi pe tohi lelei. Ko ha taha pē naʻe ʻikai ke ne loto-tatau mo e meʻa naʻe akoʻi ʻe he siasí naʻe tautea mamafa ia. Naʻe pau ki he kau Kalisitiane pani faitōnungá ke nau fakataha fakatahataha ʻi ha ngaahi kulupu tokosiʻi, pea ko e niʻihi naʻe ʻikai pē ke nau lava ʻo fakataha. ʻI he meimei tatau mo e kau Siu nofo pōpula ʻi Pāpiloné, ko e kau paní ʻa e “tuʻunga taulaʻeiki fakatuʻi” naʻe ʻikai ke nau lava ʻo lotu ʻi ha founga fokotuʻutuʻu maau. Naʻe puleʻi fefeka ʻe Pāpilone ko e Lahi ʻa e kakaí!

12, 13. Ko e hā ʻa e ʻuhinga ʻe ua naʻe maʻu ai ʻe he kau Kalisitiane moʻoní ha ʻamanaki ʻo e tauʻatāiná? Fakamatalaʻi.

¹² Naʻe ʻi ai nai ha taimi naʻe lotu tauʻatāina ai ʻa e kau Kalisitiane moʻoní mo fakahōifua ki he ʻOtuá? ʻIo! Naʻe ʻi ai ha ʻamanaki ʻi he ʻuhinga mahuʻinga ʻe ua. Ko e ʻuluakí, ko hono fuofua ngāueʻaki ʻa e mīsini pulusí. Ki muʻa hono faʻu ia ʻi he taʻu 1450 nai, naʻe hiki tatau tohi nima pē ʻa e Tohi Tapú ʻa ia naʻe ʻikai ke faingofua. Naʻe aʻu ʻo māhina ʻe hongofulu ki ha tokotaha pōtoʻi ke ne hiki tatau ha Tohi Tapu pē ʻe taha! ʻIkai ko ia pē, naʻe tohi ʻe he kau hiki tataú ʻi he takainga tohi pe kiliʻimanu. Ko hono olá, naʻe siʻisiʻi pē ʻa e Tohi Tapu naʻe maʻú pea naʻe totongi mamafa ʻaupito. Neongo ia, naʻe lava ʻe ha tokotaha pōtoʻi ke ne paaki ʻi ha mīsini pulusi ha ngaahi peesi ʻe 1,300 tupu ʻi he ʻaho taki taha!

¹³ Ko e ʻuhinga hono uá, ko hono liliu ʻa e Tohi Tapú ki ha lea kehe. ʻI he taʻu 1500 nai, naʻe liliu ʻe ha kau tangata loto-toʻa tokosiʻi ʻa e Folofola ʻa e ʻOtuá ki he lea naʻe leaʻaki ʻe he kakaí. Naʻa nau fai ʻa e ngāue ko ení neongo ʻenau ʻiloʻi ʻe lava ke tāmateʻi ai kinautolu.  Naʻe ʻita lahi ʻa e kau taki lotu ʻo e siasí. Ko e hā hono ʻuhingá? Koeʻuhí naʻa nau ilifia kapau ʻe lau ʻe he kau tangata mo e kau fefine loto-moʻoní ʻa e Tohi Tapú ʻi heʻenau leá, ʻe lava ke nau ʻeke ai ʻa e ngaahi fehuʻi hangē ko ení: ‘Ko fē ʻi he Tohi Tapú ʻa e akonaki pulekatolió? Ko fē ʻi he Tohi Tapú ʻoku pehē ai kuo pau ke totongi ʻe ha taha ʻa e pātelé kae toki fai ha misa maʻá e kau maté? Ko fē ʻi he Tohi Tapú ʻoku lave ai fekauʻaki mo e kau tuʻitapú mo e kau katinalé?’ ʻOku lahi ʻa e ngaahi akonaki loi ʻa e siasí naʻe makatuʻunga ia ʻi he ngaahi filōsofia ʻa ʻAlisitōtolo mo Palató, ko e ongo tangata eni naʻe moʻui ʻi he taʻu ʻe lauingeau ki muʻa ʻia Kalaisí. Naʻe ʻita ʻa e kau taki lotu ʻo e siasí ʻi he taimi naʻe fehuʻia ai kinautolu ʻe he kakaí. Ko e kau tangata mo e kau fefine naʻa nau talitekeʻi ʻenau ngaahi akonakí naʻe tautea mate kinautolu. Naʻe loto ʻa e kau taki lotu ʻo e siasí ke taʻofi hono lau ʻa e Tohi Tapú ʻe he kakaí mo hono ʻeke ha ngaahi fehuʻi, pea ʻi he tuʻunga lahi tahá ko e meʻa ia naʻe hokó. Ka naʻe tokosiʻi pē ʻa e kakai loto-toʻa naʻa nau fakafisi ke puleʻi kinautolu ʻe Pāpilone ko e Lahi. Naʻa nau maʻu ʻa e moʻoní mei he Folofola ʻa e ʻOtuá, pea naʻa nau loto ke maʻu ʻa e ʻilo lahi ange! Naʻe vavé ni ke fakatauʻatāina kinautolu mei he lotu loí.

14. (a) Ko e hā naʻe fai ʻe he kakai naʻe loto ke nau ako ʻa e Tohi Tapú? (e) Fakamatalaʻi ʻa e fekumi ʻa Tokoua Russell ki he moʻoní.

¹⁴ Naʻe loto ʻa e kakai tokolahi ke nau lau mo ako ʻa e Tohi Tapú pea talanoa fekauʻaki mo e meʻa kuo nau akó. Naʻe ʻikai ke nau loto ke tala ange ʻe he kau taki lotu ʻo e ngaahi siasí ʻa e meʻa ʻoku totonu ke nau tui ki aí. Ko ia naʻa nau hola ai ki he ngaahi fonua naʻa nau tauʻatāina ai ke ako ʻa e Tohi Tapú. Ko e taha ʻo e ngaahi fonua ko iá ko ʻAmelika. ʻI he 1870 naʻe kamata ai ʻa Charles Taze Russell mo ha niʻihi tokosiʻi ke nau ako fakaʻāuliliki ʻa e Tohi Tapú. ʻUluakí, naʻe fiemaʻu ʻe Tokoua Russell ke ne ʻiloʻi ʻa e lotu naʻa nau akoʻi ʻa e moʻoní. Naʻá ne fakahoa fakalelei ʻa e ngaahi akonaki ʻa e ngaahi lotu naʻe taku ko e kau Kalisitiané, mo e ngaahi lotu taʻefakakalisitiané ki he meʻa ʻoku leaʻaki ʻe he Tohi Tapú. Naʻá ne ʻiloʻi leva ai naʻe ʻikai ha taha ʻi he ngaahi lotu ko ení ʻe muimui kakato ki he Folofola ʻa e ʻOtuá. ʻI he taimi ʻe taha, naʻá ne talanoa ai mo e niʻihi ʻo e kau taki lotu ʻi he ngaahi lotu kehekehe. Naʻe ʻamanaki ʻa Tokoua Russell te nau tali ʻa e moʻoni naʻá ne maʻu mo ʻene kulupú mei he Tohi Tapú pea akoʻi ʻa e moʻoni ko iá ki heʻenau ngaahi fakatahaʻangá. Ka naʻe ʻikai ke mahuʻingaʻia ai ʻa e kau taki lotú. Naʻe vave hono ʻiloʻi ʻe he Kau Ako Tohi Tapú he ʻikai lava ke nau lotu ki he ʻOtuá fakataha mo e faʻahinga naʻa nau hoko ko e konga ʻo e lotu loí.​—Lau ʻa e 2 Kolinitō 6:14.

15. (a) Ko fē ʻa e taimi naʻe nofo pōpula ai ʻa e kau Kalisitiane moʻoní ki Pāpiloné? (e) Ko e hā ʻa e ngaahi fehuʻi ʻe tali ʻi he kupu hokó?

¹⁵ ʻI he kupu ko ení, kuo tau ako ai naʻe hoko ʻo nofo pōpula ʻa e kau Kalisitiane moʻoní ki Pāpilone hili pē ʻa e mate ʻa e ʻapositolo fakamuimuí. Neongo ia, ʻoku kei fiemaʻu ke tau ʻiloʻi ʻa e tali ki he ngaahi fehuʻi ko ení: ʻOku anga-fēfē ʻetau ʻiloʻi naʻe tauʻatāina moʻoni ʻa e kau paní mei Pāpilone ko e Lahi, lolotonga ʻa e ngaahi taʻu ki muʻa ʻi he 1914? Ko e moʻoni naʻe taʻefakahōifua kia Sihova ʻene kau sevānití koeʻuhí ko e hōloa ʻenau ngāue fakamalangá lolotonga ʻa e Tau 1 ʻa Māmaní? Naʻe fakangaloku nai ʻe hotau fanga tokoua ʻe niʻihi ʻenau tuʻu-ʻatā faka-Kalisitiané mo ʻikai fakahōifua kia Sihova ʻi he taimi ko iá? Fakaʻosí, kapau naʻe nofo pōpula ʻa e kau Kalisitiané ki he lotu loí hili ʻa e mate ʻa e kau ʻapositoló, ko fē ʻa e taimi naʻa nau tauʻatāina aí? Ko e ngaahi fehuʻi lelei ʻaupito eni pea ʻe tali ia ʻi he kupu hokó.