1, 2. (a) Ko e hā ‘a e pale ‘oku fakatu‘otu‘a atu ki ai ‘a e kau sevāniti ‘a e ‘Otuá? (e) Ko e hā ‘okú ne tokoni‘i kitautolu ke hanganaki fakahangataha hotau matá ki he palé? (Sio ki he ‘uluaki fakatātā ‘i he kupú ni.)

KO E kau Kalisitiane paní ‘oku nau ma‘u ha ‘amanaki mahu‘inga. ‘Oku nau fakatu‘otu‘a atu ke mo‘ui ‘i hēvani. Na‘e ui ‘e he ‘apositolo ko Paulá ‘a e ‘amanaki ko ení ko e “pale ‘o e ui fakahēvani mei he ‘Otuá.” (Fil. 3:14) Te nau pule ‘i hēvani fakataha mo Sīsū Kalaisi ‘i hono Pule‘angá pea ngāue mo ia ‘i hono tokoni‘i ‘a e fa‘ahinga ‘o e tangatá ke nau hoko ‘o haohaoa. (Fkh. 20:6) Ko ha ‘amanaki fisifisimu‘a mo‘oni eni! ‘Oku fakatu‘otu‘a atu ‘a e fanga sipi kehé ki ha pale kehe. ‘Oku nau ‘amanaki ke mo‘ui ta‘engata ‘i Palataisi ‘i he māmaní, pea ko e ‘amanakí ni ‘okú ne ‘ai kinautolu ke nau fiefia mo‘oni!​—2 Pita 3:13.

² Na‘e loto ‘a Paula ke tokoni‘i ‘a hono kaungā-Kalisitiane paní ke nau nofo‘aki faitōnunga pea ma‘u ‘a e palé. Na‘á ne tala ange kiate kinautolu: “Hanganaki fakama‘u homou ‘atamaí ‘i he ngaahi me‘a ‘i ‘olungá.” (Kol. 3:2) Na‘e fiema‘u ke nau tokangataha ki he‘enau ‘amanaki mahu‘inga fakahēvaní. (Kol. 1:4, 5) Ko e fakakaukau fekau‘aki mo e ngaahi  tāpuaki ‘a Sihová ‘okú ne tokoni‘i ‘a e kau sevāniti kotoa ‘a e ‘Otuá ke hanganaki fakahangataha honau matá ki he palé. ‘Oku fe‘ungamālie eni ‘o tatau ai pē pe ‘oku nau ‘amanaki ke mo‘ui ‘i hēvani pe ‘i māmani.​—1 Kol. 9:24.

3. Ko e hā na‘e fakatokanga ‘a Paula fekau‘aki mo ia ki he kau Kalisitiané?

³ Na‘e toe fakatokanga ‘a Paula ki he kau Kalisitiané fekau‘aki mo e ngaahi fakatu‘utāmaki ‘e lava ke ne to‘o meiate kinautolu ‘a e palé. Ko e fakatātaá, na‘á ne tohi ki he kau Kolosé fekau‘aki mo e kau Kalisitiane loi na‘a nau feinga ke fakahōifua‘i ‘a e ‘Otuá ‘aki ‘enau muimui ‘i he Lao ‘a Mōsesé kae ‘ikai tui kia Kalaisi. (Kol. 2:16-18) Na‘e toe lāulea ‘a Paula ki he fakatu‘utāmaki ‘oku kei hoko he ‘ahó ni ‘a ia ‘e lava ke ne ta‘ofi kitautolu foki mei hono ma‘u ‘a e palé. Na‘á ne fakamatala‘i ‘a e founga ke taliteke‘i ai ‘a e ngaahi holi ta‘etāú mo e me‘a ke fai ‘i he ‘i ai ‘etau ngaahi palopalema ‘i hotau fāmilí pe mo hotau fanga tokoua ‘i he fakataha‘angá. Ko e fale‘i mahu‘inga ‘a Paulá ‘e lava ke ne tokoni‘i kitautolu ‘i he ‘ahó ni. Ko ia tau sivisivi‘i angé ‘a e ni‘ihi ‘o e ngaahi fakatokanga anga-‘ofa ‘oku tau ma‘u ‘i he‘ene tohi ki he kau Kolosé.

4. Ko e hā ‘e lava ai ke ta‘ofi kitautolu ‘e he holi ta‘etāú mei hono ma‘u ‘a e palé?

⁴ Hili ‘a e fakamanatu ‘a Paula ki hono fanga tokouá fekau‘aki mo ‘enau ‘amanaki fakaofó, na‘á ne tohi: “Ko ia ai, mou ‘ai ke mate ‘a e ngaahi kupu ‘o homou sinó ‘a ia ‘oku ‘i he māmaní ‘i he fekau‘aki mo e fehokotaki fakasino ta‘etāú, ta‘ema‘á, holi ta‘emapule‘i fakaefehokotaki fakasinó, holi pangó, mo e mānumanú.” (Kol. 3:5) Ko e ngaahi holi ta‘etāú ‘e lava ke mātu‘aki mālohi pea ‘e lava ke ne ‘ai ke mole hotau vaha‘angatae mo Sihová mo ‘etau ‘amanaki ki he kaha‘ú. Ko e tokoua ‘e taha ‘a ia na‘á ne tukulolo ki he‘ene ngaahi holi ta‘etāú pea foki ki mui ki he fakataha‘angá ‘okú ne pehē na‘e hoko ‘a e ngaahi holí ni ‘o mālohi ‘aupito ‘o ne “toki foki mai ai kuo fu‘u tōmui.”

5. ‘E lava fēfē ke tau malu‘i kitautolu ‘i he ngaahi tu‘unga fakatu‘utāmakí?

⁵ ‘Oku fiema‘u ke tautefito ‘etau tokangá kapau ‘oku tau ‘i ha tu‘unga ‘e lava ke ne taki kitautolu ke tau talangata‘a ki he ngaahi tu‘unga fakae‘ulungaanga ‘a Sihová. Ko e fakatātaá, ‘oku fakapotopoto ki ha ongo me‘a ‘okú na faisō ke fokotu‘u ha fakangatangata ‘i he kamata‘angá pē fekau‘aki mo e ngaahi me‘a hangē ko e feala‘akí, ‘umá, mo e nofo toko uá. (Pal. 22:3) ‘E lava ke hoko ‘a e ngaahi tu‘unga fakatu‘utāmaki kehe ‘i he‘etau ‘alu ‘i ha folau fakapisinisi pe ‘i he taimi ‘oku tau ngāue ai mo ha fefine pe ko ha tangata. (Pal. 2:10-12, 16) Ko e hā ‘e lava ke ke fai ke malu‘i ai koé? Fakahaa‘i ko koé ko e taha ‘o e Kau Fakamo‘oni ‘a Sihová. Tō‘onga‘aki ‘a e ‘ulungaanga tāú, pea ‘oua ‘aupito na‘a ngalo ko e fakamalingá ‘e lava ke iku ia ki he fakatamaki. ‘Oku toe fiema‘u foki ke tau tokanga kapau ‘oku tau loto-mamahi pea ta‘elata. Te tau fiema‘u nai ha taha ke ne ‘ai ke tau ongo‘i ‘oku fiema‘u kitautolu. Te tau ongo‘i mātu‘aki feifeingavale nai ‘o tau tali ai ha tokanga ‘oku fai mai mei ha taha. ‘Oku fakatu‘utāmaki eni. Kapau ‘e faifai ange peá ke ongo‘i pehē, ‘oua ‘e fai ha me‘a te ne ta‘ofi koe mei hono ma‘u ‘a e palé. Hanga kia Sihova mo ho fanga tokouá mo e fanga tuofāfiné ki ha tokoni.​—Lau ‘a e Saame 34:18; Palōveepi 13:20.

6. Ko e hā ‘oku totonu ke tau manatu‘i ‘i he‘etau fili ‘a e fakafiefiá?

⁶ Ke ‘ai ke mate ‘a e ngaahi holi ta‘etāú, ‘oku fiema‘u ke tau si‘aki ‘a e fakafiefia ta‘etāú. ‘I he ‘ahó ni ko e lahi ‘o e fakafiefia ‘oku ala ma‘ú ‘oku fakamanatu mai ai ‘a e ngaahi me‘a na‘e hoko ‘i Sōtoma mo Komolá. (Sute 7) Ko e fa‘ahinga ‘oku nau fa‘u ‘a e fakafiefiá ‘oku nau ‘ai ‘a e fehokotaki fakasino ta‘etāú ke hā ngali nōmolo mo ‘ikai hano maumau. Ko ia ‘oku fiema‘u ma‘u pē ke tau tokanga. He‘ikai lava ke tau tali ha fa‘ahinga fakafiefia pē ‘oku tu‘uaki mai ‘e he māmaní. ‘I hono kehé, ‘oku fiema‘u ke tau fili ‘a e fakafiefia ‘e ‘ikai ta‘ofi ai kitautolu mei hono ma‘u ‘a e pale ko e mo‘uí.​—Pal. 4:23.

7. Ko e hā ‘a e ngaahi palopalema ‘e lava ke malanga hake ‘i he fakataha‘anga Kalisitiané?

⁷ ‘Oku tau fiefia ‘i he hoko ko e konga ‘o e fakataha‘anga Kalisitiané. ‘Oku tau ako ‘a e Folofola ‘a e ‘Otuá ‘i he ngaahi fakatahá, pea ‘oku tau fetokoni‘aki anga-‘ofa. ‘Oku tokoni eni kiate kitautolu ke hanganaki fakahangataha hotau matá ki he palé. Ka ‘i he taimi ‘e ni‘ihi ‘oku ‘i ai ha ngaahi ta‘efemahino‘aki ‘a ia ‘e lava ke ne fakatupunga ha ngaahi palopalema mo hotau fanga tokouá mo e fanga tuofāfiné. Kapau ‘oku ‘ikai ke tau fakalelei‘i ‘a e ngaahi palopalema ko ení, ‘e lavangofua ke iku ia ki he loto-‘ita.​—Lau ‘a e 1 Pita 3:8, 9.

8, 9. (a) Ko e hā ‘a e ongo ‘ulungaanga te na tokoni‘i kitautolu ke tau ma‘u ‘a e palé? (e) Ko e hā ‘e lava ke ne tokoni‘i kitautolu ke tau tauhi ‘a e melinó kapau ‘oku fakalotomamahi‘i kitautolu ‘e ha kaungā-Kalisitiane?

⁸ He‘ikai lava ke tau faka‘atā ‘a e loto-‘itá ke ne ta‘ofi kitautolu mei hono ma‘u ‘a e palé. Na‘e fakamatala‘i ‘e Paula ‘a e me‘a ‘oku fiema‘u ke fai ‘e he kau Kalisitiané: “‘I he tu‘unga ko e kakai fili ‘a e ‘Otuá, ‘a ia ‘oku mā‘oni‘oni mo ‘ofeiná, mou kofu‘aki kimoutolu ‘a e manava‘ofa kaungāongo‘i loloto, anga-lelei, anga-fakatōkilalo, anga-malū, mo e kātaki. Hokohoko atu ‘a e fekātaki‘aki mo e fefakamolemole‘aki loto-lelei neongo ai pē ‘o kapau ‘oku ‘i ai ha taha ‘okú ne ma‘u ha ‘uhinga ke lāunga ai fekau‘aki mo ha taha. Hangē tofu pē ko ia ne fakamolemole‘i loto-lelei kimoutolu ‘e Sihová, kuo pau foki ke mou fai ‘a e me‘a tatau. Kae tuku kehe ‘a e ngaahi me‘á ni kotoa, mou kofu‘aki kimoutolu ‘a e ‘ofá, he ko ha fakama‘u haohaoa ia ‘o e fā‘ūtahá.”​—Kol. 3:12-14.

⁹ Ko e ‘ofá mo e anga-leleí ‘e lava ke na tokoni‘i kitautolu ke tau fakamolemole‘i ‘a e ni‘ihi kehé. Kapau ‘oku tau ongo‘i loto-mamahi ‘i ha me‘a na‘e lea‘aki pe fai ‘e ha taha, ‘e lava ke tau fakakaukau ki he ngaahi taimi na‘a tau lea‘aki ai pe fai ha me‘a ta‘e‘ofa ki he ni‘ihi kehé pea nau fakamolemole‘i kitautolu. He hounga‘ia ē ko kitautolu ‘i he‘enau ‘ofá mo e anga-leleí! (Lau ‘a e Tangata Malanga 7:21, 22.) ‘Oku tau fakamālō ‘i hono fakafā‘ūtaha‘i ‘i he anga-lelei ‘e Kalaisi ‘a e kau lotu mo‘oní. (Kol. 3:15) ‘Oku tau ‘ofa kotoa ‘i he ‘Otua tatau, malanga‘i ‘a e pōpoaki tatau, pea ma‘u ‘a e ngaahi palopalema tatau. Kapau ‘oku tau anga-lelei mo anga-‘ofa pea fefakamolemole‘aki, ‘e toe fā‘ūtaha ange ai ‘a e fakataha‘angá pea ‘e lava ke tau nofo‘aki tokangataha ki he palé.

10, 11. (a) Ko e hā ‘oku fakatu‘utāmaki ai ‘a e meheká? (e) ‘E lava fēfē ke tau fakapapau‘i ‘oku ‘ikai ke ta‘ofi kitautolu ‘e he meheká mei hono ma‘u ‘a e palé?

¹⁰ Ko e meheká ‘e lava ke ne ta‘ofi kitautolu mei hono ma‘u ‘a e palé. ‘Oku fakahaa‘i ‘i he ngaahi fakatātā ‘i he Tohi Tapú ‘a e fakatu‘utāmaki ‘o e meheká. Ko e fakatātaá, na‘e meheka ‘a Keini kia ‘Ēpeli peá ne tāmate‘i ia. Na‘e meheka ‘a Kola, Tētani, mo ‘Apilami kia Mōsese pea nau angatu‘u kiate ia. Na‘e meheka ‘a Tu‘i Saula kia Tēvita peá ne feinga ke tāmate‘i ia. ‘Oku mo‘oni ‘aupito ‘a e me‘a ‘oku lea‘aki ‘e he Folofola ‘a e ‘Otuá: “Ko e feitu‘u pē ‘oku ‘i ai ‘a e meheká mo e loto-feke‘ike‘í, ‘e ‘i ai foki ‘a e māveuveú mo e me‘a fulikivanu kotoa pē.”​—Sēm. 3:16.

¹¹ Kapau ‘oku tau ngāue mālohi ke hoko ‘o anga-‘ofa mo anga-lelei mo‘oni, ‘e ‘ikai faingofua ha‘atau hoko ‘o meheka. ‘Oku pehē ‘e he Folofola ‘a e ‘Otuá: “Ko e ‘ofá ‘oku kātaki mo anga-lelei. Ko e ‘ofá ‘oku ‘ikai te ne meheka.” (1 Kol. 13:4) Ke fakapapau‘i he‘ikai hoko ‘a e meheká ko e konga ‘o hotau anga‘itangatá, ‘oku fiema‘u ke tau feinga ke sio ki he ngaahi me‘á ‘i he anga ‘o e sio ki ai ‘a Sihová. ‘Oku fiema‘u ke tau vakai ki hotau fanga tokouá mo e fanga tuofāfiné ko e ngaahi mēmipa kinautolu ‘o e sino tatau, ‘a ia ko e fakataha‘angá. ‘Oku pehē ‘e he Tohi Tapú: “Kapau ‘oku fakalāngilangi‘i ha kupu ‘e taha, ‘oku kaungā-fiefia mo ia ‘a e ngaahi kupu kehé kotoa.” (1 Kol. 12:16-18, 26) Kapau ‘oku hoko ha me‘a lelei ki ha taha ‘o hotau fanga tokouá, te tau fiefia ‘iate ia, ‘o ‘ikai meheka. Fakakaukau angé ki he fa‘ifa‘itaki‘anga lelei ‘a e foha ‘o Tu‘i Saula ko Sionatané. Na‘e ‘ikai ke meheka ‘a Sionatane ‘i hono fili ‘o Tēvita ke hoko ko e tu‘i kae ‘ikai ko iá. Na‘e a‘u ‘o ne fakalototo‘a‘i mo tokoni‘i ‘a Tēvita. (1 Sām. 23:16-18) ‘E lava ke tau hoko ‘o anga-lelei mo anga-‘ofa hangē ko Sionatané?

12. Ko e hā ‘a e fale‘i mei he Tohi Tapú te ne tokoni‘i hotau fāmilí ke ma‘u ‘a e palé?

¹² ‘I hono ngāue‘aki ‘e he mēmipa kotoa ‘o hotau fāmilí ‘a e ngaahi tefito‘i mo‘oni Fakatohitapú, ‘e melino ai mo fiefia ‘a hotau fāmilí pea te tau ma‘u ‘a e palé. Na‘e ‘omai ‘e Paula ‘a e fale‘i fakapotopoto ko ení ki he ngaahi fāmilí: “Ko kimoutolu ngaahi uaifi, mou anganofo ki homou ngaahi husepānití, he ‘oku taau ia ‘i he vakai mai ‘a e ‘Eikí. Ko kimoutolu ngaahi husepāniti, mou hanganaki ‘ofa ki homou ngaahi uaifí pea ‘oua te mou ‘ita tōlili kiate kinautolu. Ko kimoutolu fānau, mou talangofua ki ho‘omou mātu‘á ‘i he me‘a kotoa pē, he ‘oku fakahōifua eni ki he ‘Eikí. Ko kimoutolu ngaahi tamai, ‘oua te mou faka‘ita‘i ho‘omou fānaú, koe‘uhi ke ‘oua te nau hoko ‘o loto-mafasia.” (Kol. 3:18-21) ‘E lava ke ke sio ki ha founga ‘e lava ke tokoni ai ‘a e fale‘i ko ení ki ho fāmilí?

13. ‘E lava fēfē ke tokoni‘i ‘e ha tuofefine Kalisitiane ‘a hono husepāniti ta‘etuí ke ne loto ke tauhi kia Sihova?

¹³ Mahalo pē ko ha tuofefine koe ‘oku ‘ikai ke tauhi ho husepānití kia Sihova. Ko e hā te ke faí kapau ‘okú ke ongo‘i ‘oku ‘ikai te ne fai atu ‘a e tō‘onga ‘oku totonu ke ne faí? Te ke ‘ita nai ai pea fakakikihi mo ia, ka ‘e ‘ai ‘e he me‘a ko iá ke lelei ange ai ‘a e tu‘ungá? Neongo kapau te ke mālohi ‘i he fakakikihí, te ke ‘ai ai ia ke ne loto ke tauhi kia Sihova? Mahalo pē ‘ikai. Ka ‘o kapau te ke fakahāhā ‘a e faka‘apa‘apa ki hono ngafa ko e ‘ulu ‘o e fāmilí, ‘e lava ke ke tokoni ai ki ho fāmilí ke toe melino ange pea te ke ‘oatu ai ‘a e lāngilangi kia Sihova. Ko ho‘o fa‘ifa‘itaki‘anga leleí ‘e a‘u  ‘o ne ‘ai ke loto ho husepānití ke ne tauhi kia Sihova, pea ‘e lava leva ai ke mo fakatou ma‘u ‘a e palé.​—Lau ‘a e 1 Pita 3:1, 2.

14. Ko e hā ‘oku totonu ke fai ‘e ha husepāniti Kalisitiane kapau ‘oku ‘ikai ke faka‘apa‘apa‘i ia ‘e hono uaifi ta‘etuí?

¹⁴ Mahalo pē ko ha tokoua koe ‘oku ‘ikai ke tauhi ho uaifí kia Sihova. Ko e hā ‘e lava ke ke faí kapau ‘okú ke ongo‘i ‘oku ‘ikai te ne faka‘apa‘apa‘i koe? Kapau na‘á ke feinga ke fakahaa‘i kiate ia pe ko hai ‘oku pulé ‘aki hono kailangaki‘i, te ne faka‘apa‘apa atu ai kiate koe? ‘Ikai ‘aupito! ‘Oku ‘amanekina mai ‘e he ‘Otuá te ke hoko ko ha husepāniti ‘ofa ‘oku fa‘ifa‘itaki kia Sīsū. (‘Ef. 5:23) Ko Sīsū, ‘a e ‘ulu ‘o e fakataha‘angá, ‘okú ne kātaki ma‘u pē mo anga-‘ofa. (Luke 9:46-48) Kapau ‘okú ke fa‘ifa‘itaki kia Sīsū, ‘e loto nai ‘i ha taimi ho uaifí ke ne tauhi foki mo ia kia Sihova.

15. ‘Oku anga-fēfē hono fakahāhā ‘e ha tangata Kalisitiane ki hono uaifí ‘okú ne ‘ofa ‘iate ia?

¹⁵ ‘Oku fakahinohino‘i ‘e Sihova ‘a e ngaahi husepānití: “Mou hanganaki ‘ofa ki homou ngaahi uaifí pea ‘oua te mou ‘ita tōlili kiate kinautolu.” (Kol. 3:19) Ko ha husepāniti anga-‘ofa ‘okú ne fakahāhā ‘a e faka‘apa‘apa ki hono uaifí. Anga-fēfē? ‘Okú ne fanongo ki he‘ene fakakaukaú pea ‘ai ke ne ‘ilo ko e me‘a ‘okú ne lea‘akí ‘oku mahu‘inga kiate ia. (1 Pita 3:7) Neongo kapau ‘oku ‘ikai lava ke ne fai ma‘u pē ‘a e me‘a ‘okú ne fiema‘ú, ko e fanongo kiate iá ‘e lava ke tokoni‘i ai ia ke ne fai ha ngaahi fili lelei ange. (Pal. 15:22) Ko ha husepāniti anga-‘ofa ‘oku ‘ikai te ne kouna‘i ‘a hono uaifí ke ne faka‘apa‘apa kiate ia. ‘I hono kehé, ‘okú ne feinga ke ma‘u ‘a ‘ene faka‘apa‘apá. ‘I he ‘ofa ha husepāniti ki hono uaifí mo e fānaú, ‘oku ngalingali ange ai te nau fiefia ‘i he‘enau tauhi kia Sihová pea ma‘u ‘a e pale ko e mo‘uí.

16, 17. ‘I he tu‘unga ko ha tokotaha kei si‘í, ‘e lava fēfē ke ke faka‘ehi‘ehi mei he hoko ‘o loto-mamahi tōtu‘a ‘i ho‘o ongo mātu‘á?

¹⁶ Mahalo pē ko ha tokotaha ta‘u hongofulu tupu koe pea ‘okú ke ongo‘i ‘oku ‘ikai ke mahino‘i koe ‘e ho‘o ongo mātu‘á pe ‘okú na fu‘u fefeka. Te ke mātu‘aki loto-mamahi nai heni ‘o ke fifili ai pe ‘okú ke kei loto koā ke tauhi kia Sihova. Ka ‘o kapau te ke li‘aki ‘a Sihova, te ke ‘ilo‘i ai ‘oku ‘ikai ha taha ‘i he māmaní ‘e ‘ofa lahi ‘iate koe ‘o hangē ko ho‘o ongo mātu‘a Kalisitiané mo ho ngaahi kaume‘a ‘i he fakataha‘angá.

¹⁷ Fakakaukau ki he me‘á ni: Kapau na‘e ‘ikai ‘aupito ke fakatonutonu koe ‘e ho‘o ongo mātu‘á, te ke ‘ilo‘i fēfē pe ‘okú na tokanga mo‘oni kiate koe? (Hep. 12:8) Ko e mo‘oni, ‘oku ‘ikai te na haohaoa, ko ia ko e founga ‘o ‘ena akonaki‘i koé te ke loto-mamahi nai ai. Kae ‘oua ‘e tokangataha ki he me‘a ko iá. ‘I hono kehé, feinga ke mahino‘i ‘a e ngaahi ‘uhinga ‘o e me‘a ‘okú na faí mo lea‘akí. Hanganaki anga-mokomoko, pea feinga ke ‘oua ‘e hoha‘a tōtu‘a. ‘Oku pehē ‘e he Folofola ‘a e ‘Otuá: “Ko ha tangata ‘okú ne ma‘u ‘a e ‘iló ‘okú ne mapule‘i ‘a ‘ene leá, pea ko ha tangata ‘ilo‘ilo te ne anga-mokomoko ai pē.” (Pal. 17:27) ‘Ai ko ho‘o taumu‘á ia ke hoko ko ha tokotaha matu‘otu‘a ‘okú ne tali ‘a e akonakí pea ako mei ai ‘o tatau ai pē pe ‘oku fēfē ‘a hono fai maí. (Pal. 1:8) ‘Oua ‘aupito na‘a ngalo ko hono ma‘u ‘a e ongo mātu‘a ‘okú na ‘ofa kia Sihová ko ha me‘a‘ofa mahu‘inga ia. ‘Okú na loto ke tokoni‘i koe ke ke mo‘ui ta‘engata.

18. Ko e hā ‘okú ke fakapapau‘i ai ke hanganaki fakahangataha ho matá ki he palé?

¹⁸ Pe ‘oku tau ‘amanaki ke mo‘ui ta‘engata ‘i hēvani pe ‘i ha māmani palataisi, ko kitautolu taki taha ‘e lava ke tau fakatu‘otu‘a atu ki ha kaha‘u fisifisimu‘a. Ko ‘etau ‘amanakí ‘oku mo‘oni. ‘Oku makatu‘unga ia ‘i he tala‘ofa ‘a e Tokotaha-Fakatupu ‘o e ‘univēsí, ‘a ia ‘okú ne pehē: “‘E fonu mo‘oni ‘a e māmaní ‘i he ‘ilo‘i ‘o Sihová.” (‘Ai. 11:9) Kuo vavé ni ke ako‘i ‘e he ‘Otuá ‘a e tokotaha kotoa pē ‘i he māmaní. Ko ha pale ia ‘oku tuha ke ngāue ki ai. Ko ia manatu‘i ma‘u pē ‘a e me‘a kuo tala‘ofa‘aki ‘e Sihova kiate koé, pea ‘oua na‘a tuku ke ta‘ofi koe ‘e ha me‘a mei hono ma‘u ‘a e palé!