NA‘E pehē ‘e Sīsū ‘i he taimi ‘e taha: “‘Oku ‘i ai ‘a e fiefia lahi ange ‘i he foaki atú ‘i he ma‘u maí.” (Ngā. 20:35) Ko e fo‘i mo‘oni tefito ko iá ‘oku kaunga ki hotau vaha‘angatae mo Sihová. Ko e hā hono ‘uhingá? Kuo ‘omai ‘e Sihova ‘a e ngaahi me‘a‘ofa lahi ‘okú ne ‘ai kitautolu ke tau fiefia, ka ‘e lava ke tau ma‘u na‘a mo e fiefia lahi ange ‘i hono foaki ha me‘a‘ofa kia Sihova. Ko e hā ‘a e me‘a‘ofa ‘e lava ke tau foaki kia Sihová? ‘Oku pehē ‘i he Palōveepi 3:9: “Fakalāngilangi‘i ‘a Sihova ‘aki ho‘o ngaahi me‘a mahu‘ingá.” Ko ‘etau “ngaahi me‘a mahu‘ingá” ‘oku kau ki ai ‘a hotau taimí, hotau ngaahi talēnití, hotau mālohí, mo ‘etau koloa fakamatelié. ‘I he‘etau ngāue‘aki ‘a e ngaahi koloa ko iá ke ‘ai ke laka ki mu‘a ‘a e lotu mo‘oní, ‘oku tau foaki ai ha me‘a‘ofa kia Sihova, pea ‘i he fai peheé ‘oku tau ma‘u ai ‘a e fiefia lahi.

‘I he‘ene hoko mai ki he‘etau koloa fakamatelié, ko e hā te ne tokoni‘i kitautolu ke ‘oua te tau tukunoa‘i ‘a hono foaki ‘a ‘etau me‘a‘ofa kia Sihová? Na‘e tala ‘e he ‘apositolo ko Paulá ki he kau Kolinitoó ke nau “tuku mavahe ha me‘a” ko ha tokoni. (1 Kol. 16:2) Ko e hā ‘e lava ke ke faí kapau ‘okú ke loto ke ma‘u ha fakamatala lahi ange fekau‘aki mo e ngaahi founga ‘o e tokoní ‘oku ala ma‘u ‘i ho feitu‘ú? Kātaki ‘o sio ki he puha ‘i laló.

Ko e tokoni ‘i he ‘initanetí ‘oku ‘ikai malava ke fai ‘i he fonua kotoa pē. Kae kehe, ko e fakamatala ki he ngaahi founga kehe ‘o e tokoní ‘oku lava ke ma‘u ia ‘i he peesi uepi ki he tokoní. ‘I he fonua ‘e ni‘ihi, ko ha fakamatala ‘i he peesi ko iá ‘oku ‘omi ai ‘a e tali ki he ngaahi fehu‘i ‘oku toutou ‘eke fekau‘aki mo e tokoní.