1-2. (a) Ko e hā ‘okú ne tokoni‘i kitautolu ke hokohoko atu he ‘aho taki taha? Fakamatala‘i. (e) Ko e hā te tau lāulea ki ai ‘i he kupu ko ení?

“‘I HE‘EKU fakakaukau fekau‘aki mo e ‘ahi‘ahi kuó u fekuki mo iá, ‘oku ou ‘ilo na‘e ‘ikai ke u mei lava ‘iate au pē ‘o fekuki toko taha mo ia.” Kuo faifai ange peá ke lea pehē? Ko e tokolahi ‘o kitautolu kuo tau lea pehē. Mahalo na‘á ke lea‘aki ia ‘i he hili ha‘o fakakaukauloto atu ki he malava ke ke fekuki mo ha puke lahi pe ko e mate ha ‘ofa‘anga. ‘I he vakai atu ki aí, ‘okú ke ongo‘i na‘e malava ke ke hokohoko atu he ‘aho taki taha koe‘uhí pē na‘e ‘oatu ‘e he laumālie mā‘oni‘oni ‘o Sihová kiate koe ‘a e “mālohi ‘oku mahulu atu ia ‘i he tu‘unga anga-mahení.”​—2 Kol. 4:7-9.

² ‘Oku tau toe falala foki ki he laumālie mā‘oni‘oní ke fekuki ai mo e tākiekina ‘a e māmani fulikivanu ko ení. (1 Sio. 5:19) Tānaki atu ki aí, kuo pau ke tau fāinga mo e “ngaahi kongakau laumālie fulikivanu.” (‘Ef. 6:12) ‘I he fakakaukau atu ki he ngaahi tenge kotoa ko ení, te tau lāulea ki he founga ‘e ua ‘a ia ‘e tokoni‘i ai kitautolu ‘e he laumālie mā‘oni‘oní. Pea te tau lāulea ki he me‘a ‘e lava ke tau fai ke ma‘u ‘aonga kakato ai mei he laumālie mā‘oni‘oní.

3. Ko e hā ‘a e founga ‘e taha ‘a ia ‘oku tokoni‘i ai kitautolu ‘e Sihova ke kātekina ‘a e ‘ahi‘ahí?

³ ‘Oku tokoni‘i kitautolu ‘e he laumālie mā‘oni‘oni ‘o Sihová ‘aki hono ‘omai ‘a e mālohi ke fakakakato‘aki hotau ngaahi fatongiá neongo ‘a e ‘ahi‘ahí. Na‘e ongo‘i ‘e he ‘apositolo ko Paulá na‘e malava ke ne hanganaki ngāue neongo hono ngaahi ‘ahi‘ahí koe‘uhi na‘á ne falala ki he “mālohi ‘o e Kalaisí.” (2 Kol. 12:9) ‘I he fononga fakamisinale hono ua ‘a Paulá, na‘e ‘ikai ngata pē ‘ene ngāue mālohi ‘i he ngāue fakamalangá ka na‘á ne toe poupou‘i fakapa‘anga ‘a ia tonu. Na‘á ne nofo ‘i Kolinitō ‘i he ‘api ‘o ‘Akuila mo Pīsilá. Na‘á na  ngaohi-tēniti. Koe‘uhi na‘e fai ‘e Paula ‘a e ngāue tatau, na‘á ne ngāue mo kinaua he ‘aho ‘e ni‘ihi. (Ngā. 18:1-4) Na‘e ‘oange ‘e he laumālie mā‘oni‘oní kia Paula ‘a e mālohi ke ngāue fakamāmani pea ke fakahoko ‘ene ngāue fakafaifekaú.

4. Fakatatau ki he 2 Kolinitō 12:7e-9, ko e hā na‘e fāinga mo Paulá?

⁴ Lau ‘a e 2 Kolinitō 12:7e-9. ‘I he fakamatala ko ení, ko e hā na‘e ‘uhinga ki ai ‘a Paula ‘i he‘ene pehē na‘á ne fāinga mo ha “tolounua ‘i he kakanó”? Kapau ‘oku tolounua ha me‘a ‘i ho sinó, te ke mamahi‘ia lahi. Ko ia na‘e pehē ‘e Paula na‘á ne fehangahangai mo ha ‘ahi‘ahi fakafo‘ituitui fakamamahi. Na‘á ne ui ‘a e ‘ahi‘ahi ko ení “ko ha ‘āngelo ‘a Sētane” ‘okú ne hanganaki “sipi‘i” (“taa‘i,” fkm. ‘i lalo) ia. Na‘e ‘ikai nai fakatupunga fakahangatonu ‘e Sētane mo ‘ene kau ‘āngelo tēmenioó ‘a e ngaahi ‘ahi‘ahi ‘o Paulá, ‘o hangē ko hono ‘ai ke tolounua hono kakanó. Ka ‘i he fakatokanga‘i ‘e he ngaahi laumālie fulikivanu ko iá ‘a e ‘tolounuá,’ na‘a nau vēkeveke nai ke toe teke ia ke toe loloto ange, hangē ko e laú, ke fakalahi ‘a e mamahi ‘a Paulá. Ko e hā na‘e fai ‘e Paulá?

5. Na‘e anga-fēfē ‘a e tali ‘a Sihova ki he ngaahi lotu ‘a Paulá?

⁵ ‘I he kamatá, na‘e loto ‘a Paula ke to‘o ‘a e “tolounua.” ‘Okú ne pehē: “Na‘e tu‘o tolu ‘eku kōlenga ki he ‘Eikí [Sihova] . . . ke mavahe atu ia meiate au.” Ka, neongo ‘a e ngaahi lotu ‘a Paulá, na‘e kei nofo pē ‘a e tolounuá ‘i hono kakanó. ‘Oku ‘uhinga ení na‘e ‘ikai ke tali ‘e Sihova ‘a e ngaahi lotu ‘a Paulá? ‘Ikai ‘aupito. Na‘á ne tali ia. Na‘e ‘ikai to‘o ‘e Sihova ‘a e palopalemá, ka na‘á ne ‘oange kia Paula ‘a e mālohi ke kātekina ia. Na‘e pehē ‘e Sihova: “Ko hoku mālohí ‘oku fakahaohaoa‘i ia ‘i ho‘o hoko ‘o vaivaí.” (2 Kol. 12:8, 9) Pea ‘i he tokoni ‘a e ‘Otuá, na‘e malava ke tauhi ma‘u ‘e Paula ‘ene fiefiá mo e nonga ‘i lotó!​—Fil. 4:4-7.

6. (a) ‘Oku anga-fēfē nai ‘a e tali ‘e Sihova ‘etau ngaahi lotú? (e) Ko e hā ‘a e ngaahi tala‘ofa mei he ngaahi konga Tohi Tapu ‘oku haá ‘okú ne ‘oatu ‘a e mālohi kiate koe?

⁶ Hangē ko Paulá, kuó ke kōlenga ‘i ha taimi kia Sihova ke fakahaofi koe mei ha ‘ahi‘ahi? Neongo ho‘o ngaahi kōlenga loto-mo‘oní ‘oku kei ‘i ai pē ‘a e palopalemá​—pe hoko ‘o toe kovi ange—​na‘á ke hoha‘a nai pe ‘oku ke ta‘efakahōifua kia Sihova? Kapau ko ia, manatu‘i ‘a e fa‘ifa‘itaki‘anga ‘a Paulá. Hangē pē ko hono tali ‘e Sihova ‘ene ngaahi lotú, te Ne tali mo‘oni ho‘o ngaahi lotú! He‘ikai nai ke to‘o ‘e Sihova ‘a e palopalemá. Kae fakafou ‘i he laumālie mā‘oni‘oní, te ne ‘oatu kiate koe ‘a e mālohi ‘oku fiema‘u ke ke kātekina ‘aki ‘a e ‘ahi‘ahí. (Saame 61:3, 4) ‘E ‘lī nai koe ki lalo,’ ka ko Sihova he‘ikai te ne li‘aki koe.​—2 Kol. 4:8, 9; Fil. 4:13.

7-8. (a) ‘I he founga fē ‘oku hangē ai ‘a e laumālie mā‘oni‘oní ko e matangí? (e) Na‘e anga-fēfē hono fakamatala‘i ‘e Pita ‘a e ngāue ‘a e laumālie mā‘oni‘oní?

⁷ Ko e hā ha toe founga ‘a ia ‘oku tokoni‘i ai kitautolu ‘e he laumālie mā‘oni‘oní? Hangē ko ha matangi lelei ‘i ha tahi hou, ko e laumālie mā‘oni‘oní ‘okú ne ue‘i kitautolu ke tau nga‘unu ki mu‘a neongo ‘a e ngaahi ‘ahi‘ahi faingata‘á ke tau a‘u ki he māmani fo‘ou malu kuo tala‘ofa mai ‘e he ‘Otuá.

⁸ ‘I he tu‘unga ko ha tangata toutai, ko e ‘apositolo ko Pitá na‘á ne maheni mo e folau tahí. Ko ia ‘oku taau ke fakatokanga‘i na‘á ne fakamatala‘i ‘a e ngāue ‘a e laumālie mā‘oni‘oní ‘o ngāue‘aki ‘a e fakalea ‘oku hā ngali na‘e fekau‘aki mo e folau tahí. Na‘á ne tohi: “Na‘e te‘eki ‘i ai ha taimi ‘e ‘omi ai ha kikite ‘i he tu‘utu‘uni ‘a e tangatá, ka na‘e lea mei he ‘Otuá ha kau tangata ‘i hono ue‘i kinautolu ‘e he laumālie mā‘oni‘oní.” Ko e fo‘i lea faka-Kalisi na‘e liliu ko e “ue‘i” ‘oku ‘uhinga fakafo‘ilea ki he “fataki; taki.”​—2 Pita 1:21; fkm. ‘i lalo.

9. Ko e hā ‘a e lea fakaefakatātā na‘e ‘omai ‘e Pita ‘i he‘ene ngāue‘aki ‘a e fo‘i lea “taki”?

⁹ Ko e hā ‘a e lea fakaefakatātā na‘e ‘omai ‘e Pita ‘i he ngāue‘aki ‘a e fo‘i lea “taki”? Na‘e ngāue‘aki ‘e Luke, ‘a e tokotaha-tohi ‘o e tohi Ngāué, ha founga meimei tatau ‘o e fo‘i lea faka-Kalisí ke fakamatala‘i ha vaka ‘oku “‘auhia” ‘i he matangí. (Ngā. 27:15) Ko ia ‘i he taimi na‘e tohi ai ‘e Pita ‘o pehē ko e kau hiki Tohi Tapú na‘e “taki,”  na‘á ne ngāue‘aki ‘a e “fakalea ke ue‘i ‘a e kakaí ke fakakaukau ki he folau tahí,” ko e lau ia ‘a ha mataotao Tohi Tapu ‘e taha. Ko hono mo‘oní na‘e pehē ‘e Pita, hangē pē ko hono ue‘i ‘e he matangí ha vaka ke fakakakato ‘ene fonongá, ko e kau palōfita mo e kau hiki Tohi Tapú na‘e ue‘i kinautolu ‘e he laumālie mā‘oni‘oní ke fakakakato ‘enau ngāué. Na‘e pehē ‘e he tokotaha mataotao tatau: “Na‘e fusi ‘e he kau palōfitá ‘a e laá, hangē ko e laú.” Na‘e fai ‘e Sihova ‘ene tafa‘akí. Na‘á ne tokonaki ‘a e “matangi,” pe laumālie mā‘oni‘oní. Na‘e fai ‘e he kau hiki Tohi Tapú ‘enau tafa‘akí. Na‘a nau ngāue ‘o fehoanaki mo e fakahinohino ‘a e laumālie ko iá.

10-11. Ko e hā ‘a e me‘a ‘e ua ‘oku fiema‘u ke tau fai ke fakapapau‘i ‘oku tataki kitautolu ‘e he laumālie mā‘oni‘oní? Fakatātaa‘i.

¹⁰ Ko e mo‘oni, ‘i he ‘ahó ni ‘oku ‘ikai ke toe ngāue‘aki ‘e Sihova hono laumālie mā‘oni‘oní ke ‘ai ‘a e kakaí ke hiki ha ngaahi tohi Tohi Tapu. Kae kehe, ko e laumālie mā‘oni‘oní ‘okú ne kei fakaivimālohi‘i pē ‘a e kakai ‘a e ‘Otuá. ‘Oku kei fai pē ‘e Sihova ‘ene tafa‘akí. ‘Oku lava fēfē ke tau ma‘u ‘aonga mei he laumālie mā‘oni‘oni ‘o e ‘Otuá? ‘Oku fiema‘u ke tau fakapapau‘i ‘oku tau hanganaki fai ‘etau tafa‘akí. Anga-fēfē?

¹¹ Fakakaukau ki he fakahoa ko ení. Ke ma‘u ‘aonga mei he matangí, ko ha tokotaha folau tahi kuo pau ke ne fai ‘a e me‘a ‘e ua. ‘Uluakí, kuo pau ke ne ‘ai ke angimui ‘a e matangí ‘i hono vaká. He ko hono mo‘oní, he‘ikai ke nga‘unu hono vaká kapau ‘e tau ‘i he taulangá ‘o ‘ikai ‘alu ki he feitu‘u ‘e puhi ai ‘e he matangí. Uá, ‘oku fiema‘u ke ne fusi ‘a e laá ke mafola lelei. ‘Oku hā mahino, tatau ai pē pe ‘oku puhi ‘a e matangí, ‘e toki nga‘unu pē ‘a e vaká ki mu‘a kapau ‘e mafola lelei ‘a e laá. ‘I he tu‘unga meimei tatau, ‘e lava ke tau kītaki ‘i he ngāue ‘a Sihová kapau pē te tau ma‘u ‘a e tokoni ‘a e laumālie mā‘oni‘oní. Ke ma‘u ‘aonga mei he laumālie ko iá, kuo pau ke tau fai ‘a e me‘a ‘e ua. ‘Uluakí, kuo pau ke tau ‘ai ke angimui ‘iate kitautolu ‘a e laumālie ‘o e ‘Otuá ‘aki ‘a e kau ki he ngaahi ngāue ‘oku tataki ‘e he laumālie ‘o e ‘Otuá. Uá, ‘oku fiema‘u ke tau “fusi ‘a e laá” ke mafola lelei ‘aki ‘a e kau kakato ki he ngaahi ngāue ko ení ‘i he lelei taha ‘o ‘etau malavá. (Saame 119:32) ‘I he‘etau fakahoko ‘a e me‘a ‘e ua ko ení, ko e laumālie mā‘oni‘oní te ne teke kitautolu ki mu‘a  neongo ‘a e ngaahi peau ‘o e fakafepakí mo e ‘ahi‘ahí pea ‘e tokoni‘i ai kitautolu ke tau kātaki faitōnunga ‘i he hala ki he māmani fo‘ou ‘a e ‘Otuá.

12. Ko e hā te tau lāulea ki ai he taimi ní?

¹² Kuo tau lāulea mai eni ki he founga ‘e ua ‘a ia ‘oku tokoni‘i ai kitautolu ‘e he laumālie mā‘oni‘oní. ‘Oku ‘omai ‘e he laumālie mā‘oni‘oní ‘a e mālohi pea tokoni‘i kitautolu ke nofo‘aki faitōnunga neongo ‘a e fekuki mo e ngaahi ‘ahi‘ahí. ‘Oku toe ue‘i kitautolu ‘e he laumālie mā‘oni‘oní ke tau nga‘unu ki mu‘a pea tokoni‘i kitautolu ke tau nofo ai pē ‘i he hala ki he mo‘ui ta‘engatá. Te tau lāulea he taimí ni ki he me‘a ‘e fā kuo pau ke tau fai ke ma‘u ‘aonga kakato ai mei he laumālie mā‘oni‘oní.

13. Fakatatau ki he 2 Tīmote 3:16, 17, ‘e tākiekina fēfē kitautolu ‘e he Folofolá, pea ko e hā kuo pau ke tau faí?

¹³ ‘Uluakí, ako ‘a e Folofola ‘a e ‘Otuá. (Lau ‘a e 2 Tīmote 3:16, 17.) Na‘e ngāue‘aki ‘e he ‘Otuá hono laumālié ke “fakamānava‘i” ‘ene fakakaukaú ki he ‘atamai ‘o e kau hiki Tohi Tapú. ‘I he‘etau lau ‘a e Tohi Tapú pea fakalaulauloto ki he me‘a ‘oku tau laú, ‘oku hū ai ‘a e ngaahi fakahinohino ‘a e ‘Otuá ki hotau ‘atamaí mo e lotó. ‘Oku ue‘i kitautolu ‘e he ngaahi fakakaukau fakamānava‘i ko iá ke ‘ai ‘etau mo‘uí ke fehoanaki mo e finangalo ‘o e ‘Otuá. (Hep. 4:12) Ka ke ma‘u ‘aonga kakato mei he laumālie mā‘oni‘oní, kuo pau ke tau vahe‘i ha taimi ke ako tu‘uma‘u ‘a e Tohi Tapú pea fakakaukau loloto fekau‘aki mo e me‘a ‘oku tau laú. Pea ‘e tākiekina leva ‘e he Folofola ‘a e ‘Otuá ‘a e me‘a kotoa ‘oku tau lea‘aki mo faí.

14. (a) Ko e hā ‘oku lava ai ke tau pehē ko ‘etau ngaahi fakataha faka-Kalisitiané ‘a e feitu‘u ‘oku “angimui ai ‘a e matangí”? (e) Ko e hā ‘e tokoni kiate kitautolu ke ma‘u ‘aonga kakato mei he laumālie mā‘oni‘oní ‘i he‘etau ngaahi fakatahá?

¹⁴ Uá, lotu fakataha ki he ‘Otuá. (Saame 22:22) ‘I ha ‘uhinga, ko ‘etau ngaahi fakataha faka-Kalisitiané ‘a e feitu‘u ‘oku “angimui ai ‘a e matangí.” Ko e laumālie ‘o Sihová ‘oku ‘i he‘etau ngaahi fakatahá. (Fkh. 2:29) Ko e hā ‘oku lava ai ke tau lea peheé? Koe‘uhi ‘i he taimi ‘oku tau fakataha ai ki he lotú mo hotau kaungā-Kalisitiané, ‘oku tau lotu ‘o kole ‘a e laumālie mā‘oni‘oní, ‘oku tau hiva‘i ‘a e ngaahi hiva ‘o e Pule‘angá ‘o makatu‘unga ‘i he Folofola ‘a e ‘Otuá, pea ‘oku tau fanongo ki he ngaahi fakahinohino makatu‘unga ‘i he Tohi Tapú ‘oku fakahoko ‘e he fanga tokoua kuo fakanofo ‘e he laumālie mā‘oni‘oní. Pea ko e laumālie tatau pē ‘oku tokoni ki he fanga tuofāfiné ke teuteu mo fakahoko ‘enau ngaahi kongá. Kae kehe, ke ma‘u ‘aonga kakato mei he laumālie mā‘oni‘oní, ‘oku fiema‘u ke tau ‘alu ki he ngaahi fakatahá kuo tau mateuteu ke kau ki ai. ‘I he founga ko iá, ‘oku tau ma‘u ai ‘a e ngaahi fakatahá ‘o hangē ha vaka kuo “mafola hono laá.”

15. ‘Oku anga-fēfē kaunga ‘a e laumālie mā‘oni‘oní ki he ngāue fakamalangá?

¹⁵ Tolú, kau ‘i he ngāue fakamalangá. ‘I he‘etau ngāue‘aki ‘a e Tohi Tapú ‘i he ngāue fakamalangá mo e ngāue fakafaiakó, ‘oku tau faka‘atā ai ‘a e laumālie mā‘oni‘oní ke kau ‘i he‘etau ngāue fakafaifekaú. (Loma 15:18, 19) Neongo ia, ke ma‘u ‘aonga kakato mei he laumālie ‘o e ‘Otuá, kuo pau ke ke kau ma‘u pē ‘i he ngāue fakamalangá pea ngāue‘aki ‘a e Tohi Tapú ‘i he faingamālie kotoa. Ko e founga ‘e taha ‘e lava ke ke ‘ai ai ho‘o ngāue fakafaifekaú ke mohu ‘uhinga angé ko hono ngāue‘aki ‘a e sīpinga fetalanoa‘aki mei he Polokalama Ngāue ki he Fakataha Mo‘uí mo e Ngāue Fakafaifekaú.

16. Ko e hā ‘a e founga fakahangatonu taha ke ma‘u ai ‘a e laumālie mā‘oni‘oní?

¹⁶ Faá, lotu kia Sihova. (Māt. 7:7-11; Luke 11:13) Ko e founga fakahangatonu taha ke ma‘u ai ‘a e laumālie mā‘oni‘oní ko e kole ia kia Sihova ‘i he lotu. ‘Oku hala‘atā ha me‘a ‘e lava ke ne ta‘ofi ‘etau lotú mei he‘ene a‘u kia Sihová pe ta‘ofi ‘a e me‘a‘ofa lelei ‘o e laumālie mā‘oni‘oni ‘a e ‘Otuá mei he‘ene a‘u mai kiate kitautolú​—pe ko ha pilīsone pea na‘a mo Sētane. (Sēm. 1:17) ‘Oku totonu ke fēfē ‘etau lotú koe‘uhi ke tau ma‘u ‘aonga kakato ai mei he laumālie mā‘oni‘oní? Ke talí, tau sivisivi‘i fakaikiiki angé ‘a e kaveinga ‘o e lotú ‘aki  ‘a e lāulea ki ha talanoa fakatātā ‘oku ma‘u pē ‘i he Kōsipeli ‘a Luké. *

17. Ko e hā ‘a e lēsoni fekau‘aki mo e lotú ‘e lava ke tau ako mei he talanoa fakatātā ‘a Sīsū ‘oku hiki ‘i he Luke 11:5-9, 13?

¹⁷ Lau ‘a e Luke 11:5-9, 13. ‘I he talanoa fakatātā ‘a Sīsuú ‘oku fakahaa‘i mai ai ‘a e founga ‘oku totonu ke tau lotu ai ‘o kole ‘a e laumālie mā‘oni‘oní. ‘I he talanoa fakatātaá, na‘e ma‘u ‘e he tangatá ‘a e me‘a na‘á ne fiema‘ú “koe‘uhi ko ‘ene vilitakí.” Na‘e ‘ikai ke ne ilifia ke kole tokoni ki hono kaume‘á neongo na‘e fuoloa ‘a e po‘ulí. (Sio ki he nouti akó ki he Luke 11:8 ‘i he mwb18 Siulai.) Na‘e anga-fēfē hono ngāue‘aki ‘e Sīsū ‘a e talanoa fakatātā ko ení ki he lotú? Na‘á ne pehē: “Hanganaki kole, pea ‘e foaki atu kiate kimoutolu; hanganaki kumi, pea te mou ‘ilo; hanganaki tukituki, pea ‘e fakaava atu kiate kimoutolu.” Ko ia, ko e hā ‘a e lēsoni kiate kitautolú? Ke ma‘u ‘a e tokoni ‘a e laumālie mā‘oni‘oní, kuo pau ke tau kīvoi ‘i he lotu fekau‘aki mo iá.

18. Fakatatau ki he talanoa fakatātā ‘a Sīsuú, ko e hā ‘e lava ai ke tau tuipau ‘e ‘omai ‘e Sihova hono laumālie mā‘oni‘oní?

¹⁸ ‘Oku toe tokoni‘i kitautolu ‘e he talanoa fakatātā ‘a Sīsuú ke sio ki he ‘uhinga ‘e ‘omai ai ‘e Sihova hono laumālie mā‘oni‘oní. Ko e tangata ‘i he talanoa fakatātaá na‘á ne loto ke hoko ko ha tokotaha talitali kakai lelei. Na‘á ne ongo‘i na‘e fiema‘u ke ne ‘oange ha me‘akai ki he‘ene tokotaha ‘a‘ahi ‘i he tu‘apoó ka na‘e ‘ikai ha me‘a ke ne ‘oange kiate ia. Na‘e pehē ‘e Sīsū na‘e tali ‘e he kaungā‘apí koe‘uhi ko e vilitaki ‘a e tangatá ‘i he kole ki ha maá. Ko e hā ‘a e poini ‘a Sīsuú? Kapau ‘oku loto-lelei ‘a e tangata ta‘ehaohaoá ke tokoni ki ha kaungā‘api vilitaki, huanoa ange ai hono tokoni‘i ‘e he‘etau Tamai fakahēvani anga-leleí ‘a e fa‘ahinga ‘oku kīvoi ‘i he kole kiate ia ‘a e laumālie mā‘oni‘oní! Ko ia ai, ‘e lava ke tau lotu fakataha mo e tuipau ‘e tali ‘e Sihova ‘etau kōlenga ‘a e laumālie mā‘oni‘oní.​—Saame 10:17; 66:19.

19. Ko e hā ‘oku lava ai ke tau fakapapau‘i te tau ikuná?

¹⁹ ‘Oku lava ke tau fakapapau‘i neongo ‘a e ngaahi feinga ta‘emālōlō ‘a Sētane ke ikuna‘i kitautolú, te tau ikuna. Ko e hā hono ‘uhingá? Koe‘uhi ‘oku tokoni‘i kitautolu ‘e he laumālie mā‘oni‘oní ‘i he founga ‘e ua. ‘Uluakí, ‘okú ne ‘omai ‘a e mālohi ‘oku fiema‘u ke tau iku‘i ‘aki ‘a e ngaahi ‘ahi‘ahí. Uá, ko e mālohi ia ‘okú ne “‘ai ke mafola ‘a e laá,” ‘o tokoni ke tau nga‘unu ai ki mu‘a ‘i he tauhi kia Sihova he taimí ni ‘o a‘u ki he māmani fo‘ou ‘a e ‘Otuá. Fakatauange ke tau fakapapau‘i ke ma‘u ‘aonga kakato mei he tokoni ‘a e laumālie mā‘oni‘oní!