1-2. Ko e hā ‘a e ngaahi ‘uhinga lelei ‘oku tau ma‘u ke fefakahāhā‘aki ai ‘a e ‘ofa mateakí?

‘OKU tau ma‘u ‘a e ngaahi ‘uhinga lelei ke fefakahāhā‘aki ai ‘a e ‘ofa mateakí. Ko e hā ‘a e ni‘ihi ‘o kinautolu? Fakatokanga‘i ‘a e anga hono tali ‘a e fehu‘i ko iá ‘e ha ngaahi palōveepi fakamānava‘i: “‘Oua na‘a tuku ke mavahe meiate koe ‘a e ‘ofa mateakí mo e faitōnungá. . . . Te ke ma‘u leva ai ‘a e lelei‘ia mo e vavanga fakaefakakaukau lelei ‘i he ‘ao ‘o e ‘Otuá pea mo e tangatá.” “Ko ha tangata ‘ofa mateaki ‘okú ne ma‘u ‘aonga mei ai.” “‘Ilonga ‘a ia ‘oku tuli ki he mā‘oni‘oní mo e ‘ofa mateakí te ne ma‘u ‘a e mo‘ui.”​—Pal. 3:3, 4; 11:17, fkm. ‘i lalo; 21:21.

² ‘Oku lave ‘a e ngaahi palōveepi ko ení ki he ‘uhinga ‘e tolu ‘oku totonu ai ke tau fakahāhā ‘a e ‘ofa mateakí. ‘Uluakí, ko hono fakahāhā ‘a e ‘ofa mateakí ‘okú ne ‘ai ke tau mahu‘inga ‘i he ‘ao ‘o e ‘Otuá. Uá, ‘i hono fakahāhā ‘a e ‘ofa mateakí, ‘oku tau ma‘u ‘aonga mei ai. Ko e fakatātaá, ‘oku tau fa‘u ‘a e kaume‘a tu‘uloa mo e ni‘ihi kehé. Tolú, ko e tuli ki he ‘ofa mateakí ‘oku taki atu ki he ngaahi tāpuaki ‘i he kaha‘ú, ‘o kau ai ‘a e mo‘ui ta‘engatá. Ko e mo‘oni, ‘oku tau ma‘u ‘a e ngaahi ‘uhinga lelei ke talangofua ai ki he fakamanatu ‘a Sihová: “Mou fefakafeangai‘aki ‘i he ‘ofa mateaki mo e meesi.”​—Sāk. 7:9.

3. Ko e hā ‘a e ngaahi fehu‘i te tau lāulea ki ai ‘i he kupu ko ení?

³ ‘I he kupu ko ení, te tau lāulea ai ki he tali ‘o e fehu‘i ‘e fā. Ko hai ‘oku totonu ke tau fakahāhā ki ai ‘a e ‘ofa mateakí? Ko e hā ‘e lava ke tau ako mei he tohi ‘a Luté fekau‘aki mo e ‘ofa mateakí? ‘E lava fēfē ke tau fakahāhā ‘a e ‘ofa mateakí he ‘ahó ni? Ko e hā ‘a e ‘aonga ‘e ma‘u ‘e he fa‘ahinga ‘oku nau fakahāhā ‘a e ‘ofa mateakí?

4. ‘E lava fēfē ke tau fa‘ifa‘itaki kia Sihova ‘i hono fakahāhā ‘a e ‘ofa mateakí? (Ma‘ake 10:29, 30)

⁴ Hangē ko ia na‘a tau ako ki ai ‘i he kupu ki mu‘á, ‘oku tuku  tauhi ‘e Sihova ‘ene ‘ofa mateakí​—‘a ‘ene ngaahi ongo‘i ‘ofa ‘oku tolonga mo pīkitaí​—ki he fa‘ahinga ‘oku ‘ofa mo tauhi kiate iá. (Tan. 9:4) ‘Oku tau loto ke hoko “ko e kau fa‘ifa‘itaki ki he ‘Otuá, ‘i he tu‘unga ko ‘ene fānau ‘ofeina.” (‘Ef. 5:1) Ko ia ai, ‘oku tau holi ke fakatupulekina ‘a e ngaahi ongo‘i māfana​—ko ha mātu‘aki pīkitai tu‘uloa​—ki hotau fanga tokoua mo e fanga tuofāfine fakalaumālié.​—Lau ‘a e Ma‘ake 10:29, 30.

5-6. Ko e fo‘i lea “mateaki” ‘e ‘uhinga nai ia ki ha fa‘ahinga vaha‘angatae fēfē?

⁵ Te ke loto-tatau mo‘oni ko e lelei ange ‘etau mahino‘i ‘a e ‘uhinga ‘o e ‘ofa mateakí, ko e lelei ange ia ‘a e malava ke tau fakahāhā ia ki hotau kaungālotú. Ke fakalahi ‘etau mahino‘i ‘a e ‘ofa mateakí, tau sio angé ki he anga hono fakahoa ia ki he mateakí, ‘a ia ko e fo‘i lea ‘oku ngāue angamaheni‘aki. Fakakaukau ki ha fakatātā.

 ⁶ ‘I he ‘ahó ni ‘oku tau fakamatala‘i nai ha tokotaha kuo ngāue ki ha kautaha tatau ‘i he laui ta‘u ko ha tokotaha ngāue mateaki. Neongo ia, ‘i hono ta‘u kotoa ‘i he kautahá, kuo te‘eki ai nai ke ne fetaulaki mo ha taha ‘o e kau talēkitá. He‘ikai nai ke ne loto-tatau ma‘u pē mo e ngaahi tu‘utu‘uni ngāué. ‘Oku ‘ikai ke ne ‘ofa ‘i he kautahá, ka ‘okú ne fiefia ke ma‘u ha ngāue mo ha vahe. Te ne hokohoko atu ke ngāue ‘o a‘u ki ha‘ane penisoni, tuku kehe kapau ‘e tu‘uaki ange ha ngāue lelei ange ‘i ha feitu‘u kehe.

7-8. (a) Ko e hā ‘okú ne ue‘i ha tokotaha ke fakahāhā ‘a e ‘ofa mateakí? (e) Ko e hā te tau lāulea ai ki he ngaahi konga mei he tohi ‘a Luté?

⁷ Ko e faikehekehe ‘i he mateakí na‘e lave ki ai ‘a e  palakalafi 6 mo e ‘ofa mateakí ko e fakaue‘iloto ‘a ha taha. ‘I he Tohi Tapú, ko e hā ‘a e fakaue‘iloto ‘oku hā mahino mei he ngaahi ‘ofa mateaki ‘oku fakahāhā ‘e he kakai ‘a e ‘Otuá? Ko e fa‘ahinga na‘a nau fakahāhā ‘a e ‘ofa mateakí na‘a nau fai ia, ‘o ‘ikai koe‘uhí na‘e pau ke nau fai pehē, ka koe‘uhí na‘e ue‘i kinautolu ‘e honau lotó. Fakakaukau ki he fa‘ifa‘itaki‘anga ‘a Tēvitá. Na‘e ue‘i ia ‘e hono lotó ke fakahāhā ‘a e ‘ofa mateaki ki hono kaume‘a ‘ofeina ko Sionatané neongo na‘e loto ‘a e tamai ‘a Sionatané ke tāmate‘i ‘a Tēvita. Hili ‘a e ngaahi ta‘u mei he mate ‘a Sionatané, na‘e kei fakahāhā pē ‘e Tēvita ‘a e ‘ofa mateakí ki he foha ‘o Sionatane ko Mefipōsetí.​—1 Sām. 20:9, 14, 15; 2 Sām. 4:4; 8:15; 9:1, 6, 7.

⁸ ‘E lava ke tau ako ‘a e me‘a lahi fekau‘aki mo e ‘ofa mateakí ‘i he lāulea ki he ngaahi konga mei he tohi ‘a Luté. Ko e hā ‘a e ngaahi lēsoni fekau‘aki mo e ‘ofa mateakí ‘e lava ke tau ako mei he fa‘ahinga ‘oku hā ‘i he tohi ko iá? ‘E lava fēfē ke tau ngāue‘aki ‘a e ngaahi lēsoni ko ení ‘i he‘etau fakataha‘angá? *

9. Ko e hā na‘e fakamulituku ai ‘a Nāomi kuo fakafepaki‘i ia ‘e Sihová?

⁹ ‘I he tohi ‘a Luté, ‘oku tau lau ai ‘a e talanoa kia Nāomi, Lute ko e uaifi ‘o ‘ene tamá, pea mo ha tangata manavahē-‘Otua ko Pōasi, ‘a ia ko ha kāinga ‘o e husepāniti ‘o Nāomí. Koe‘uhi ko ha honge ‘i ‘Isileli, ko Nāomi mo hono husepānití mo hona ongo fohá na‘a nau hiki ki Mōape. Lolotonga ‘enau ‘i aí, na‘e mate ai ‘a e husepāniti ‘o Nāomí. Na‘e mali ai ‘ene ongo tamaikí, ka ko e me‘a fakamamahí, na‘á na toe mate foki. (Lute 1:3-5; 2:1) Ko e ngaahi tā ko iá na‘á ne ‘ai ‘a Nāomi ke fakautuutu ai pē ‘a e siva ‘ene ‘amanakí. Na‘e mātu‘aki lōmekina ia ‘e he mamahí ‘o ne fakamulituku ai kuo fakafepaki‘i ia ‘e Sihova. Fakatokanga‘i ‘a e anga ‘ene fakahaa‘i ‘ene ongo‘i fekau‘aki mo e ‘Otuá: “Kuo tafoki ‘a Sihova meiate au.” “Kuo ‘ai ‘e he Māfimafi-Aoniú ‘a ‘eku mo‘uí ke kona-‘ī‘ī.” Na‘á ne toe pehē: “Ko Sihova na‘á ne fakafepaki‘i aú pea ko e Māfimafi-Aoniú na‘á ne fakatupunga ‘eku mamahí.”​—Lute 1:13, 20, 21.

10. Na‘e anga-fēfē fakafeangai ‘a Sihova ki he ngaahi lea ta‘efakakaukau‘i ‘a Nāomí?

 ¹⁰ Na‘e anga-fēfē fakafeangai ‘a Sihova ki he ngaahi lea ta‘efakakaukau‘i ‘a Nāomí? Na‘e ‘ikai ke ne tafoki mei he‘ene sevāniti puputu‘ú. ‘I hono kehé, na‘á ne fakahāhā ‘a e kaungāongo‘i kiate ia. ‘Oku mahino‘i ‘e Sihova ko e “ngaohikoviá ‘oku lava ke ne ‘ai ‘a e tokotaha potó ke sesele.” (Tml. 7:7) Neongo ia, na‘e fiema‘u ‘e Nāomi ‘a e tokoni ke lava ‘o ne vakai na‘e ‘i hono tafa‘akí ‘a Sihova. Ko e hā ‘a e tokoni na‘e tokonaki ‘e he ‘Otuá? (1 Sām. 2:8) Na‘á ne ue‘i ‘a Lute ke kakapa atu pea fakahāhā ‘a e ‘ofa mateakí kia Nāomi. ‘I he loto-lelei mo e anga-fakaalaala, na‘e tokoni‘i ‘e Lute ‘ene fa‘ē-‘i-he-fonó ke toe ma‘u ‘ene mafamafatatau fakaeongo mo fakalaumālié. Ko e hā ‘oku tau ako mei he fa‘ifa‘itaki‘anga ‘a Luté?

11. Ko e hā ‘oku kakapa atu ai ‘a e fanga tokoua mo e fanga tuofāfine loto-‘ofá ki he fa‘ahinga loto-mamahí?

¹¹ Ko e ‘ofa mateakí ‘okú ne ue‘i kitautolu ke kakapa atu ki he fa‘ahinga ‘oku loto-mamahí. Hangē pē ko e pīkitai ‘a Lute kia Nāomí, ko e fanga tokoua mo e fanga tuofāfine loto-‘ofa ‘i he ‘aho ní ‘oku nau loto-lelei ke pīkitai ki he fa‘ahinga ‘i he fakataha‘angá ‘oku nau loto-mamahi lahi mo loto-mafasiá. ‘Oku nau ‘ofa ‘i honau fanga tokouá, pea ‘oku nau vēkeveke ke fai ha me‘a pē ‘oku nau malava ke tokoni‘i kinautolu. (Pal. 12:25, fkm. ‘i lalo.; 24:10) ‘Oku fehoanakimālie eni mo e ekinaki ‘a e ‘apositolo ko Paulá: “Lea fakanonga ki he fa‘ahinga ‘oku loto-mafasiá, poupou ki he kau vaivaí, mou kātaki ‘i he feangainga mo e tokotaha kotoa.”​—1 Tes. 5:14.

12. Ko e hā ‘a e founga lelei taha ke tokoni‘i ai ha tokoua pe tuofefine loto-si‘i?

¹² Ko e founga lelei taha ‘oku fa‘a lava ke ke tokoni ai ki ha tokoua pe tuofefine loto-si‘i ko e fanongo tokanga kiate ia pea fakapapau‘i ange kiate ia ho‘o ‘ofá. Ko ho‘o tokanga anga-lelei ki ha taha ‘o e fanga sipi mahu‘inga ‘a Sihová ‘oku ‘ikai ke ta‘efakatokanga‘i ia ‘e hotau ‘Otuá. (Saame 41:1) ‘Oku pehē ‘i he Palōveepi 19:17: “Ko e tokotaha ‘okú ne fakahāhā ‘a e lelei‘ia ‘i he mā‘ulaló ‘okú ne ‘oatu ha nō kia Sihova, pea te Ne totongi fakafoki kiate ia ‘a e me‘a ‘okú ne faí.”

13. Na‘e anga-fēfē ‘a e kehe ‘a Lute meia ‘Opá, pea ko e hā na‘e hoko ai ‘a e fili ‘a Luté ko ha fakahāhā ‘o e ‘ofa mateakí? (Sio ki he tā ‘i he takafí.)

¹³ ‘Oku tau ma‘u ‘a e vavanga lahi ange ki he ‘ofa mateakí ‘i he lāulea ki he me‘a na‘e hoko kia Nāomi hili ‘a e mate hono husepānití mo ‘ene ongo tamá. ‘I hono ‘ilo‘i ‘e Nāomi na‘e “fakahanga ‘a e tokanga ‘a Sihová ki hono kakaí ‘aki ‘ene ‘oange kiate kinautolu ‘a e me‘akai,” na‘á ne fili ke foki ki hono fonuá. (Lute 1:6) Na‘á ne kamata fononga atu mo e ongo uaifi ‘ene ongo tamá. Kae kehe, ‘i he‘enau fononga atú, na‘e tu‘o tolu ‘a e kōlenga ‘a Nāomi ki he ongo fefiné ke na foki ki Mōape. Ko e hā ‘a e me‘a na‘e hokó? ‘Oku tau lau: “Na‘e ‘uma ‘a ‘Opa ki he‘ene fa‘ē-‘i-he-fonó peá ne mavahe. Ka na‘e pīkitai ‘a Lute ‘iate ia.” (Lute 1:7-14) ‘I he fili ‘a ‘Opa ke fokí, na‘á ne muimui pē ki he fakahinohino ‘a Nāomí, ‘o fai  ‘a e me‘a na‘e ‘amanekina meiate iá. Kae kehe, ko Lute na‘á ne fai ‘a e me‘a lahi ange. Na‘á ne ‘atā foki ke mavahe, ka koe‘uhi ko e ‘ofa mateakí na‘á ne fili ai ke nofo ‘o tokoni ki hono kāinga na‘e fiema‘u tokoní. (Lute 1:16, 17) Na‘e fili ‘a Lute ke pīkitai kia Nāomi, ‘o ‘ikai koe‘uhí na‘e pau ke ne fai pehē, ka koe‘uhí na‘á ne loto ki ai. Ko e fili ‘a Luté ko ha fakahāhā ia ‘o e ‘ofa mateaki mo‘oní. Ko e hā ‘a e lēsoni mei he talanoa ko ení?

14. (a) ‘I he ‘ahó ni, ko e hā ‘a e fili ‘oku fai ‘e he fanga tokoua mo e fanga tuofāfine anga-‘ofá? (e) Fakatatau ki he Hepelū 13:16, ko e hā ‘a e ngaahi feilaulau ‘oku fakahōifua ki he ‘Otuá?

¹⁴ Ko e ‘ofa mateakí ‘oku fakalaka atu ia ‘i hono fai pē ‘a e me‘a ‘oku ‘amanekiná. ‘I he ‘ahó ni, hangē pē ko e kuohilí, ko e tokolahi hotau fanga tokouá mo e fanga tuofāfiné kuo nau fili ke fakahāhā ‘a e ‘ofa mateakí ki he kaungātuí, ‘o a‘u ki he fa‘ahinga ‘oku ‘ikai ke nau ‘ilo‘í. Ko e fakatātaá, ‘i he‘enau ‘ilo na‘e hoko ha fakatamaki fakanatula, ‘oku nau loto leva ke ‘ilo pe ‘e anga-fēfē ha‘anau fai ha tokoni. ‘I he faingata‘a‘ia ha taha ‘i he fakataha‘angá, ‘oku ‘ikai ke nau toumoua ke kakapa atu ki he tokotaha ko iá ‘o fai ha tokoni ‘aonga. Hangē ko e kau Masitōnia ‘i he ‘uluaki senitulí, ‘oku nau fai ‘a e me‘a lahi ange ‘i he me‘a na‘e ‘amanekina meia kinautolú. ‘Oku nau fai ‘a e ngaahi feilaulau fakafo‘ituitui, ‘o foaki atu “‘o mahulu atu ia ‘i he me‘a na‘a nau ma‘ú,” koe‘uhi ke tokoni ki honau fanga tokoua masivesivá. (2 Kol. 8:3) He fiefia ē ko Sihova ‘i ha laumālie anga-‘ofa pehē!​—Lau ‘a e Hepelū 13:16.

15-16. Na‘e anga-fēfē hono fakahāhā ‘e Lute ‘ene kīvoí?

¹⁵ ‘E lava ke tau ako ha ngaahi lēsoni lelei mei hono sivisivi‘i ‘a e anga hono tokoni‘i ‘e Lute ‘a Nāomí. Tau lāulea angé ki ha ni‘ihi.

¹⁶ Hoko ‘o kīvoi. ‘I hono tala ange ‘e Lute ki he‘ene fa‘ē-‘i-he-fono ko Nāomí te ne ‘alu mo ia ki Siutá, na‘á ne ‘uluaki taliteke‘i ia. Ka na‘e ‘ikai ke fo‘i ‘a Lute. Ko e hā ‘a e olá? “‘I he vakai ‘a Nāomi ki he vilitaki ange ‘a Lute ke na oó, na‘e tuku ai ‘ene feinga ke fakaloto‘i iá.”​—Lute 1:15-18.

17. Ko e hā te ne tokoni‘i kitautolu ke ‘oua ‘e fo‘ingofuá?

¹⁷ Ngāue‘aki: ‘Oku fiema‘u ‘a e kātaki ke tokoni‘i ai ‘a e fa‘ahinga ‘oku loto-mafasiá, ka ‘oku ‘ikai totonu ke tau fo‘i ‘iate kinautolu. Ko ha tuofefine ‘oku fiema‘u tokoni te ne ‘uluaki taliteke‘i nai ‘etau tokoní. * Neongo ia, ko e ‘ofa mateakí te ne ue‘i kitautolu ke fai hotau lelei tahá ke pīkitai kiate ia. (Kal. 6:2) ‘Oku tau ‘amanaki ‘e faai atu pē ‘o ne tali ‘etau fietokoní pea tuku kitautolu ke tau tokoni‘i hake ia mei he siva ‘ene ‘amanakí.

18. Ko e hā ‘a e me‘a kuo pau pē na‘e fakalotomamahi kia Luté?

¹⁸ ‘Oua na‘a tau mamahingofua. ‘I he a‘u ‘a Nāomi mo Lute ki Pētelihemá, na‘e fetaulaki ‘a Nāomi mo hono ngaahi kaungā‘api ki mu‘á. Na‘á ne tala ange: “Na‘á ku ‘alu fonu atu, ka kuo fakafoki nge‘esi mai au ‘e Sihova.” (Lute 1:21) Sioloto atu ki he anga ‘o e ongo‘i ‘a Lute ‘i he‘ene fanongo ki he lea ko ia ‘a Nāomí! Na‘e fai ‘e Lute ‘a e me‘a lahi ke tokoni‘i ‘a Nāomi. Na‘e tangi ‘a Lute mo ia, fakafiemālie‘i ia, peá na fe‘ao ‘i he ngaahi ‘aho lahi. Neongo ‘a e ngaahi me‘á ni kotoa, na‘e pehē ‘e Nāomi: “Kuo fakafoki nge‘esi mai au ‘e Sihova.” Ko e ngaahi lea ko ia ‘a Nāomí, na‘e ‘ikai ke ne fakamālō‘ia ‘a e poupou ‘a Luté, ‘a ia na‘á ne tu‘u pē ‘i hono tafa‘akí. Kuo pau pē na‘e fakalotomamahi ‘a e me‘a ko iá kia Lute! Neongo ia, na‘á ne pīkitai kia Nāomi.

19. Ko e hā te ne tokoni‘i kitautolu ke pīkitai ki ha tokotaha ‘oku loto-mamahi?

¹⁹ Ngāue‘aki: ‘I he ‘ahó ni, ko ha tuofefine ‘oku faingata‘a‘ia te ne ‘uluaki lea mai nai kiate kitautolu ‘i ha founga fakalotomamahi​—neongo  ‘etau ngaahi feinga kotoa ke tokoni‘i iá. Ka ‘oku tau feinga ke ‘oua te tau mamahingofua. ‘Oku tau pīkitai ki hotau tuofefine ‘oku fiema‘u tokoní, pea ‘oku tau kōlenga kia Sihova ke tokoni‘i kitautolu ke tau ‘ilo‘i ha founga ke fakafiemālie‘i ai ia.​—Pal. 17:17.

20. Ko e hā na‘á ne ‘oange kia Lute ‘a e mālohi ke ‘oua ‘e fo‘í?

²⁰ Fai ha fakalototo‘a ‘i he taimi totonu. Na‘e fakahāhā ‘e Lute ‘a e ‘ofa mateakí kia Nāomi, ka ‘i he taimi ko ení na‘e fiema‘u ‘e Lute ‘a e fakalototo‘a. Pea na‘e ue‘i ‘e Sihova ‘a Pōasi ke ne fakalototo‘a‘i ia. Na‘e tala ange ‘e Pōasi kia Lute: “Ofa ke fakapale‘i koe ‘e Sihova ‘i he me‘a kuó ke faí, pea ‘ofa ke ‘i ai ha totongi haohaoa kiate koe meia Sihova ko e ‘Otua ‘o ‘Isilelí, ‘a ia ko hono lalo kapakaú ē kuó ke kumi hūfanga ki aí.” Ko e ngaahi lea fakalotomāfana ko iá na‘e maongo loloto kia Lute. ‘I he tali ki aí, na‘e pehē ange ‘e Lute kia Pōasi: “Kuó ke fakafiemālie‘i au pea kuó ke lea fakalotolahi mai ki ho‘o kaunangá.” (Lute 2:12, 13) Ko e ngaahi lea taimi totonu ‘a Pōasí na‘á ne ‘oange kia Lute ‘a e mālohi na‘e fiema‘u ke ‘oua ‘e fo‘i.

21. Hangē ko ia ‘oku fakamatala‘i ‘i he ‘Aisea 32:1, 2, ko e hā ‘e tokonaki mai ‘e he kau mātu‘a tokangá?

²¹ Ngāue‘aki: Ko e fa‘ahinga ‘oku nau fakahāhā ‘a e ‘ofa mateakí ki he ni‘ihi kehé ‘oku nau fa‘a fiema‘u ‘a e fakalototo‘a. Hangē pē ko hono fakapapau‘i ange ‘e Pōasi kia Lute ‘oku ‘ikai ke ta‘efakatokanga‘i ‘ene anga-leleí, ko e kau mātu‘a fakatokanga me‘a he ‘aho ní ‘oku nau fakamālō‘ia ‘i he hounga‘ia ‘a e tokoni ‘oku fai ‘e he fanga tokoua mo e fanga tuofāfine anga-‘ofá. Ko e ngaahi fakaongoongolelei taimi totonu mo loto-māfana ko iá ‘e ‘oange ai ki he fanga tokouá ‘a e mālohi ‘oku nau fiema‘ú ke ‘oua ‘e fo‘i.​—Lau ‘a e ‘Aisea 32:1, 2.

22-23. Na‘e anga-fēfē liliu ‘a e fakakaukau ‘a Nāomí, pea ko e hā hono ‘uhingá? (Saame 136:23, 26)

²² Hili atu ha ngaahi taimi, na‘e tokonaki nima-homo ‘e Pōasi ha me‘akai ma‘a Lute mo Nāomi.  (Lute 2:14-18) Na‘e anga-fēfē fakafeangai ‘a Nāomi ki he nima-homo ‘a Pōasí? Na‘á ne pehē: “‘Ofa ke faitāpuekina ia ‘e Sihova, ‘a ia kuo ‘ikai tuku ‘ene ‘ofa mateaki ki he kau mo‘uí mo e kau maté.” (Lute 2:20a) He liliu lahi ē ko e fakakaukau ‘a Nāomí! Ki mu‘á, na‘á ne tangi ‘i he mamahi: “Ko Sihova na‘á ne fakafepaki‘i aú,” ka ko eni kuó ne kalanga fiefia: “[Ko] Sihova . . . kuo ‘ikai tuku ‘ene ‘ofa mateaki.” Ko e hā na‘e tokoni nai ki he liliu ‘a e fakakaukau ‘a Nāomí?

²³ Na‘e faai atu pē ‘o kamata ke sio ‘a Nāomi ki he to‘ukupu ‘o Sihová ‘i he‘ene mo‘uí. Na‘e ngāue‘aki ‘e Sihova ‘a Lute ke ne tokonaki ‘a e poupou na‘e fiema‘u ki he fononga ki Siutá. (Lute 1:16) Na‘e toe sio foki ‘a Nāomi ki he to‘ukupu ‘o Sihová ‘i he anga-‘ofa ko ia ‘a Pōasi ‘o fai ha tokonaki nima-homo ma‘á e ongo fefiné, ko ha taha ia ‘i hona “kau totongi huhu‘í.” * (Lute 2:19, 20e) Kuo pau pē na‘á ne fakakaukau, ‘Ko ‘eku toki mahino‘i eni, na‘e ‘ikai ‘aupito li‘aki au ‘e Sihova. Kuó ne kau ma‘u pē mo au!’ (Lau ‘a e Saame 136:23, 26.) He hounga‘ia ē kuo pau na‘e ma‘u ‘e Nāomi ‘i he ‘ikai fo‘i ‘a Lute mo Pōasi ‘iate iá! ‘Oku lava ke tau sioloto atu ki he fiefia ‘a e toko tolu ko iá ‘i he iku‘anga lelei na‘e hokó.

24. Ko e hā ‘oku tau loto ai ke hanganaki fakahāhā ‘a e ‘ofa mateakí ki hotau kaungātuí?

²⁴ Ko e hā kuo tau ako mei he tohi ‘a Luté fekau‘aki mo e ‘ofa mateakí? ‘Oku ue‘i kitautolu ‘e he ‘ofa mateakí ke ‘oua te tau fo‘ingofua ‘i he fanga tokoua mo e fanga tuofāfine ‘oku loto-mamahí. ‘Okú ne toe ue‘i kitautolu ke fai ha feilaulau ke tokoni‘i kinautolu. Ko e kau mātu‘á ‘oku fiema‘u ke nau fai ha fakalototo‘a taimi totonu mo loto-māfana ki he fa‘ahinga ‘oku nau fakaa‘u atu ‘a e ‘ofa mateakí ki he ni‘ihi kehé. ‘I he‘etau vakai ki hono toe ma‘u ‘e he fa‘ahinga ‘oku fiema‘u tokoní ‘enau mālohi fakalaumālié, ‘oku tau ongo‘i fiefia mo‘oni. (Ngā. 20:35) Ka ko e hā ‘a e ‘uhinga mu‘omu‘a taha ki he‘etau fakahāhā ‘a e ‘ofa mateakí? Koe‘uhí ‘oku tau loto ke fa‘ifa‘itaki pea fakahōifua‘i ‘a Sihova, ‘a ia ‘oku “fonu ‘i he ‘ofa mateaki.”​—‘Eki. 34:6; Saame 33:22.