1-2. Ko e hā ʻoku kau ki he “ngāue lelei” ʻa ha mātuʻa?

 KAPAU kuó ke ngāue ko ha sevāniti fakafaifekau ʻi ha vahaʻa taimi, ʻokú ke huʻu atu nai ʻi he hala ke taau ke ngāue ko ha mātuʻa. ʻE lava ke ke kakapa atu ki he “ngāue lelei” ko iá?—1 Tīm. 3:1.

² Ko e hā ʻoku kau ki he ngāue ʻa ha mātuʻa? ʻOkú ne takimuʻa ʻi he ngāue fakamalangá, ngāue mālohi ʻi he tauhi-sipí mo e faiakó, pea langa hake ʻa e fakatahaʻangá ʻaki ʻa e lea mo e faʻifaʻitakiʻanga. ʻI ha ʻuhinga lelei, ʻoku ui ʻe he Tohi Tapú ʻa e kau mātuʻa ngāue mālohí ko e “ngaahi meʻaʻofa ko e kau tangata.”—ʻEf. 4:8.

3. ʻE lava fēfē ke hoko ha tokoua ʻo taau ke ngāue ko ha mātuʻa? (1 Tīmote 3:​1-7; Taitusi 1:​5-9)

³ ʻE lava fēfē ke ke taau ke ngāue ko ha mātuʻa? Ko e taau ke hoko ko ha mātuʻá ʻoku ʻikai ke hangē ia ko e ngaahi fiemaʻu ki ha lakanga ʻi ha ngāue fakamāmani. Ko e meʻa ʻoku faʻa hokó, kapau ʻokú ke maʻu ʻa e ngaahi pōtoʻi ngāue tefito ʻoku kumi ki ai ha pule ngāue, te ke maʻu ʻa e ngāué. ʻI hono kehé, kapau ʻokú ke fakaʻamu ke fakanofo koe ko ha mātuʻa, ʻoku fiemaʻu ʻa e meʻa lahi ange ia ʻi hono maʻu ʻa e pōtoʻi ʻi he ngāue fakamalangá mo e faiakó. ʻOku fiemaʻu ke ke aʻusia ʻa e ngaahi tuʻunga taau Fakatohitapu ki he kau mātuʻá ʻa ia ʻoku lisi ʻi he 1 Tīmote 3:​1-7 mo e Taitusi 1:​5-9. (Lau.) ʻE lāulea ʻa e kupu ko ení ki he ngaahi meʻa ʻoku fiemaʻu mei he kau mātuʻá ʻi he tafaʻaki tefito ʻe tolu: Ko hono maʻu ha ongoongo lelei fakatouʻosi ʻi loto mo tuʻa ʻi he fakatahaʻangá, fokotuʻu ha faʻifaʻitakiʻanga lelei ʻi he tuʻunga ko ha ʻuluʻi fāmili, pea loto-lelei ke ngāue maʻá e fakatahaʻangá.

MAʻU HA ONGOONGO ʻOKU LELEI

4. ʻOku ʻuhinga ki he hā ʻa e ‘ʻikai ala tukuakiʻi ki ha meʻá’?

⁴ Ke taau ke hoko ko ha mātuʻa, kuo pau ke “ʻikai ala tukuakiʻi [koe] ki ha meʻa,” ʻa ia, ko hono maʻu ha ongoongo ʻoku lelei ʻi he  fakatahaʻangá koeʻuhi ko hoʻo tōʻongá ʻoku ʻataʻatā mei hano lumaʻi. Tānaki atu ki ai, ʻoku totonu ke ke maʻu “ha fakaongoongolelei mei he faʻahinga ʻi tuʻá.” ʻE manukiʻi nai ʻe he kau taʻetuí ʻa hoʻo tui faka-Kalisitiané, ka ʻoku ʻikai totonu ke nau maʻu ha makatuʻunga ke fehuʻia hoʻo faitotonú pe tōʻongá. (Tan. 6:​4, 5) ʻEke hifo, ‘ʻOku ou maʻu ha ongoongo ʻoku lelei fakatouʻosi ʻi loto pea ʻi tuʻa ʻi he fakatahaʻangá?’

5. ʻE lava fēfē ke ke fakahāhā ko ha tokotaha koe ʻoku “ʻofa ki he leleí”?

⁵ Kapau ko ha tokotaha koe ʻoku “ʻofa ki he leleí,” ʻokú ke kumi ki he lelei ʻi he niʻihi kehé pea fakaongoongoleleiʻi kinautolu ki heʻenau ngaahi ʻulungaanga leleí. ʻOkú ke fiefia foki ke failelei ki he niʻihi kehé pea toe hulu atu ai. (1 Tes. 2:8) Ko e hā ʻoku mahuʻinga ai ʻa e ʻulungaanga ko ení ki he kau mātuʻá? Koeʻuhí ʻoku nau ngāueʻaki lahi honau taimi mahuʻingá ke tauhi ʻa e fakatahaʻangá pea tokangaʻi ʻa e ngaahi vāhenga-ngāué. (1 Pita 5:​1-3) Neongo ia, ko e fiefia ʻoku haʻu mei he ngāue maʻá e niʻihi kehé ʻoku laka mamaʻo ia ʻi ha feilaulau pē.—Ngā. 20:35.

6. Ko e hā ʻa e ngaahi founga ʻe niʻihi ke fakahāhā ai ʻa e “anga-talitali kakai”? (Hepelū 13:​2, 16; sio foki ki he fakatātaá.)

⁶ ʻOkú ke fakahāhā ʻokú ke “anga-talitali kakai” ʻi hoʻo fai ʻa e ngaahi meʻa lelei maʻá e niʻihi kehé, kau ai ʻa e faʻahinga ʻoku ʻikai ko ho ngaahi kaumeʻa ofí. (1 Pita 4:9) Ko ha maʻuʻanga fakamatala ʻe taha ʻoku fakamatalaʻi ai ʻa e tangata anga-talitali kakaí ʻo anga peheni: “Ko e matapā ʻo hono falé—pea mo hono lotó—kuo pau ke fakaava ia ki he kau solá.” ʻEke hifo, ‘ʻOku fēfē ʻa hoku ongoongó ʻi heʻene haʻu ki hono talitali lelei ʻa e kau ʻaʻahí?’ (Lau ʻa e Hepelū 13:​2, 16.) Ko ha tangata anga-talitali kakai ʻokú ne vahevahe ha meʻa pē ʻokú ne maʻu ki he kau ʻaʻahí, ʻo kau ai ʻa e faʻahinga māʻulalo ʻoku ʻikai ke nau loko maʻu ha meʻá pea mo e kau sevāniti ngāue mālohí hangē ko e kau ʻovasia sēketí mo e kau malanga ʻaʻahí.—Sēn. 18:​2-8; Pal. 3:27; Luke 14:​13, 14; Ngā. 16:15; Loma 12:13.

7. ʻOku anga-fēfē hono fakahāhā ʻe ha mātuʻa “ʻoku ʻikai ko ha tokotaha ʻofa ia ki he paʻangá”?

⁷ “ʻOku ʻikai ko ha tokotaha ʻofa ia ki he paʻangá.” ʻOku ʻuhinga ení ʻoku ʻikai ke ke tokangataha ki he ngaahi meʻa fakamatelié. Pe ʻokú ke tuʻumālie pe masiva, ʻokú ke fakamuʻomuʻa ʻa e ngaahi meʻa ʻo e Puleʻangá ʻi he ngaahi tafaʻaki kotoa hoʻo moʻuí. (Māt. 6:33) ʻOkú ke ngāueʻaki ho taimí, iví mo e ngaahi koloá ke lotu kia Sihova, ke tokangaʻi ho fāmilí, pea ke ngāue maʻá e fakatahaʻangá. (Māt. 6:24; 1 Sio. 2:​15-17)  ʻEke hifo: ‘ʻOku anga-fēfē ʻeku vakai ki he paʻangá? ʻOku ou fiemālie pē ʻi hono maʻu ʻa e ngaahi fiemaʻu tefitó? Pe ʻoku ou tokangataha ki he fakatupu paʻangá mo e feinga ke maʻu ha ngaahi koloa fakamatelie lahi angé?’—1 Tīm. 6:​6, 17-19.

8. Ko e hā ʻa e ngaahi founga ʻe niʻihi ʻokú ke fakahaaʻi ai ʻokú ke “anga-fakamaʻumaʻu ʻi [hoʻo] ngaahi tōʻongá” mo “mapuleʻi-kita”?

⁸ Kapau ʻokú ke “anga-fakamaʻumaʻu ʻi [hoʻo] ngaahi tōʻongá” mo “mapuleʻi-kita,” ʻokú ke mafamafatatau ʻi he ngaahi tafaʻaki kotoa ʻo hoʻo moʻuí. ʻOku kau ki heni ʻa e fakaʻehiʻehi mei he kai fakaputá, inu tōtuʻá, ʻaiʻai noaʻia ʻi he ʻai valá mo e teuteú, mo e fakafiefia tōtuʻá. ʻOku ʻikai ke taki pōpula koe ʻe he ngaahi ākenga ʻo e māmaní. (Luke 21:34; Sēm. 4:4) ʻOkú ke loto-maʻu, ʻa ia, ʻokú ke hanganaki nonga naʻa mo hono fakaʻitaʻi koé. Ko koé ʻoku “ʻikai ko ha tokotaha ʻoku faʻa konā”; pea ʻoku ʻikai ke ke maʻu ha ongoongo ʻo e hoko ko ha tokotaha inu tōtuʻa. ʻEke hifo, ‘ʻOku fakahaaʻi ʻi heʻeku founga moʻuí ʻoku ou anga-fakamaʻumaʻu ʻi heʻeku ngaahi tōʻongá mo mapuleʻi-kita?’

9. Ko e hā ʻoku kaunga ki he hoko ʻo “fakakaukau lelei” mo “maau”?

⁹ Kapau ʻokú ke “fakakaukau lelei,” ʻokú ke sivisiviʻi fakalelei ʻa e ngaahi meʻá ʻo makatuʻunga ʻi he ngaahi tefitoʻi moʻoni Fakatohitapú. Kuó ke fakakaukau fakamātoato ki he ngaahi tefitoʻi moʻoni ko ení, pea kuó ke maʻu ai ʻa e vavanga mo e mahino. ʻOku ʻikai ke ke fakavave ke fai ha fakamulituku. ʻI hono kehé, ʻokú ke fakapapauʻi ʻokú ke maʻu ʻa e kotoa ʻo e ngaahi moʻoniʻi meʻa ʻoku fiemaʻú. (Pal. 18:13) Ko e olá, ʻokú ke fai ʻa e ngaahi fili mafamafatatau ʻoku tapua atu ai ʻa e fakakaukau ʻa Sihová. Kapau ko ha tokotaha “maau” koe, ʻokú ke fokotuʻutuʻu maau mo tauhi-taimi. ʻOkú ke ʻiloa ʻi he hoko ʻo alafalalaʻanga pea muimui ki he fakahinohinó. Ko e ngaahi ʻulungaanga kotoa ko ení ʻe tokoni ia ke ke maʻu ha ongoongo ʻoku lelei. Tau lāulea he taimí ni ki he founga ke aʻusia ai ʻa e ngaahi tuʻunga taau Fakatohitapu ʻi hono fokotuʻu ha faʻifaʻitakiʻanga lelei ko ha ʻuluʻi fāmili.

FOKOTUʻU HA FAʻIFAʻITAKIʻANGA LELEI KO HA ʻULUʻI FĀMILI

10. ʻOku anga-fēfē hono “tokangaʻi lelei” ʻe ha tangata ʻa hono falé?

¹⁰ Kapau ko ha husepāniti koe pea ʻokú ke loto ke taau ko ha mātuʻa, ko e ongoongo ʻo ho fāmilí ʻe kaunga ia ki ho tuʻunga tāú. Ko ia ai, ʻoku fiemaʻu ke ke “tokangaʻi lelei [ʻa ho] falé.” ʻOku fiemaʻu ke ke maʻu ha ongoongo ʻo e hoko ko ha ʻuluʻi fāmili ʻofa mo fua fatongia. ʻOku kau ki heni ʻa e takimuʻa ʻi he ngaahi tafaʻaki kotoa ʻetau lotú. Ko e hā ʻoku mātuʻaki mahuʻinga ai ení? Naʻe fakaʻuhinga ʻa e ʻapositolo ko Paulá: “Kapau ʻoku ʻikai ʻiloʻi ʻe ha tangata ʻa e founga ke tokangaʻi lelei ai ʻa hono falé tonu, ʻe anga-fēfē ai haʻane tokangaʻi ʻa e fakatahaʻanga ʻa e ʻOtuá?”—1 Tīm. 3:5.

11-12. ʻOku anga-fēfē kaunga ʻa e tōʻonga ʻa e ngaahi mēmipa ʻo e fāmili ʻo ha tangata ki hono tuʻunga tāú? (Sio foki ki he fakatātaá.)

¹¹ Kapau ko ha tamai koe, kuo pau ke ke ʻai hoʻo fānau īkí ke nau “fakamoʻulaloa ʻi he anga-fakamātoato fakaʻaufuli.” ʻOku fiemaʻu ke ke akoʻi mo teuʻi anga-ʻofa kinautolu. Ko e moʻoni, hangē pē ko e kotoa ʻo e fānaú, te nau kakata mo vaʻinga. Ka koeʻuhi ko hoʻo teuʻi lelei kinautolú, te nau talangofua, anga-fakaʻapaʻapa mo anga-lelei. Pehē foki, kuo pau ke ke fai ho lelei tahá ke tokoniʻi hoʻo fānaú ke nau fakatupulekina ha vahaʻangatae lelei mo Sihova, ke moʻuiʻaki ʻa e ngaahi tefitoʻi moʻoni Fakatohitapú, pea ke fakalakalaka ki he papitaisó.

¹² “ʻOkú ne maʻu ha fānau ʻoku tui ʻa ia ʻoku ʻikai ke tukuakiʻi ki ha anga-fulikivanu pe angatuʻu.” Kapau ko ha kiʻi tama ʻoku tui ʻi ha fāmili ʻokú ne halaia ʻi hono fai ha angahala mamafa, ʻe anga-fēfē hono uesia ai ʻa e tamaí? Kapau naʻe fakataʻetaʻetokanga ʻa e tamaí ʻi hono teuʻi mo  akonakiʻi ʻa e kiʻi tamá, ʻoku ngalingali heʻikai ke ne taau ke ngāue ko ha mātuʻa.—Sio ki he ʻīsiu ʻo e Taua Leʻo ʻo Nōvema 1, 1996, p. 19, pal. 6-7.

NGĀUE MAʻÁ E FAKATAHAʻANGÁ

13. ʻE lava fēfē ke ke fakahāhā ʻokú ke “fakakaukau fakaʻatuʻi,” “ʻikai ke taʻefieauna”?

¹³ Ko e fanga tokoua ʻoku nau fakatupulekina ʻa e ngaahi ʻulungaanga lelei faka-Kalisitiané ko ha koloa kinautolu ki he fakatahaʻangá. Ko ha tangata “ʻoku fakakaukau fakaʻatuʻi” ʻokú ne pouaki ʻa e melinó. Kapau ʻokú ke loto ke ʻiloʻi koe ko ha tokotaha fakaʻatuʻi, fanongo ki he niʻihi kehé pea feinga ke mahinoʻi ʻa e anga ʻenau fakakaukaú. ʻI ha fakataha, te ke loto-lelei ke poupou ki he fili ʻa e tokolahí kapau ʻoku ʻikai ke maumauʻi ai ha lao pe tefitoʻi moʻoni Fakatohitapu? Ko e “ʻikai ke taʻefieauna” ʻoku ʻuhinga iá ʻoku ʻikai ke ke tuʻukāivi ke fai ʻa e ngaahi meʻá ʻi hoʻo foungá. ʻOkú ke fakamahuʻingaʻi ʻa e ʻaonga ʻo e tokolahi ʻa e kau faleʻí. (Sēn. 13:​8, 9; Pal. 15:22) ʻOku ʻikai ke ke “faʻa kē” pe “ʻita vave.” ʻI he ʻikai ke anga-fefeka pe lotolotokehé, ʻokú ke anga-fakaalaala mo fakapotopoto. ʻI he tuʻunga ko ha tangata fakamelino, ʻokú ke tamuʻomuʻa ke fakamelino, naʻa mo e ʻi he ngaahi tuʻunga faingataʻá. (Sēm. 3:​17, 18) Ko hoʻo ngaahi lea anga-ʻofá ʻe lava ke ne fakamolū ʻa e tōʻonga ʻa e niʻihi kehé, ʻo kau ai ʻa e kau fakafepakí.—Fkm. 8:​1-3; Pal. 20:3; 25:15; Māt. 5:​23, 24.

14. Ko e hā ʻoku ʻuhinga ki ai ʻa e “ʻikai . . . toki liliu foʻou” mo e “mateaki”?

¹⁴ Ko ha tokoua ʻoku taau ke hoko ko ha mātuʻa “ʻoku ʻikai ko ha tangata toki liliu foʻou.” Neongo ʻoku ʻikai fiemaʻu ia ke ke papitaiso ʻi ha ngaahi taʻu lahi, ʻoku fiemaʻu ʻa e taimi ke ke hoko ai ko ha Kalisitiane matuʻotuʻa. Ki muʻa ke fakanofo koe ko ha mātuʻa, kuo pau ke ke fakahāhā ʻo hangē ko Sīsuú, ʻokú ke anga-fakatōkilalo pea ʻokú ke fiemālie ke tatali kia Sihova ki ha faʻahinga vāhenga-ngāue pē. (Māt. 20:23; Fil. 2:​5-8) ʻE lava ke ke fakamoʻoniʻi ʻokú ke “mateaki” ʻaki ʻa e pīkitai kia Sihova mo ʻene ngaahi tuʻunga māʻoniʻoní pea ʻaki ʻa e muimui ki he tataki ʻoku ʻomai fakafou ʻi heʻene kautahá.—1 Tīm. 4:15.

15. Kuo pau ke hoko ha mātuʻa ko ha tokotaha-malanga lelei ʻaupito? Fakamatalaʻi.

 ¹⁵ ʻOku fakahaaʻi mahino mai ʻe he Folofolá ko e kau mātuʻá kuo pau ke nau “taau ke faiako.” ʻOku ʻuhinga ení kuo pau ke ke hoko ko ha tokotaha-malanga lelei ʻaupito? ʻIkai. Ko e kau mātuʻa taau tokolahi, neongo ʻoku ʻikai ko e kau malanga mālie tahá ia, ʻoku nau faiako ola lelei ʻi he ngāue fakafaifekaú pea ʻi he ngaahi ʻaʻahi fakatauhisipí. (1 Tīm. 3:2; fakafehoanaki ʻa e 1 Kolinitō 12:​28, 29 mo e ʻEfesō 4:11.) Neongo ia, ʻoku fiemaʻu ke hokohoko atu hoʻo ngāue ke fakaleleiʻi hoʻo pōtoʻi ko ha faiakó. ʻE lava fēfē ke ke hoko ʻo ola lelei angé?

16. ʻE lava fēfē ke ke hoko ko ha faiako ola lelei ange? (Sio foki ki he fakatātaá.)

¹⁶ “Piki maʻu ki he folofola moʻoní.” Ke ola lelei ange hoʻo faiakó, fakatefito hoʻo faiako ʻi he ʻao ʻo e kakaí mo hoʻo akonaki fakatāutahá ʻi he Folofola ʻa e ʻOtuá. Hoko ko ha tokotaha ako fakamātoato ʻo e Tohi Tapú mo ʻetau ʻū tohí. (Pal. 15:28; 16:23) Lolotonga hoʻo akó, tokanga fakalelei ki hono ngāueʻaki totonu ʻo e ngaahi konga Tohi Tapú. Pea ʻi hoʻo faiakó, feinga mālohi ke aʻu ki he loto hoʻo kau fanongó. ʻE lava ke ke fakalakalaka ʻi he faiakó kapau ʻokú ke kole tokoni pea ngāueʻaki ʻa e ngaahi fokotuʻu mei he kau mātuʻa taukeí. (1 Tīm. 5:17) Ko e kau mātuʻá ʻoku fiemaʻu ke nau “malava . . . ʻo fai ʻa e fakalototoʻa” ki honau fanga tokouá mo e fanga tuofāfiné; kae kehe, ʻi he taimi ʻe niʻihi kuo pau ki he kau mātuʻá ke nau akonakiʻi pe aʻu ʻo “valokiʻi” kinautolu. Ko e hā pē tuʻungá, ko e kau mātuʻá kuo pau ke nau anga-lelei maʻu pē. Kapau ʻokú ke anga-fakaalaala mo anga-ʻofa pea fakatefito hoʻo faiakó ʻi he Folofola ʻa e ʻOtuá, te ke hoko ai ʻo ola lelei koeʻuhí te ke faʻifaʻitaki ki he Faiako Lahí, ʻa Sīsū.—Māt. 11:​28-30; 2 Tīm. 2:24.

HOKOHOKO ATU HOʻO KAKAPA ATÚ

17. (a) Ko e hā ʻe lava ke ne tokoniʻi ʻa e kau sevāniti fakafaifekaú ke hokohoko atu ʻenau kakapa atú? (e) Ko e hā ʻoku totonu ke manatuʻi ʻe he kau mātuʻá ʻi hono sivisiviʻi ʻa e fanga tokoua ke fakanofó? (Sio ki he puha “ Hoko ʻo Anga-Fakanānā ʻi Hono Sivisiviʻi ʻa e Niʻihi Kehé.”)

¹⁷ ʻI he hili hono sivisiviʻi ʻa e ngaahi tuʻunga taau ke ngāue ko ha mātuʻá, ʻe ongoʻi nai ʻe he kau sevāniti fakafaifekau ʻe niʻihi heʻikai ʻaupito  ke nau taau. Kae manatuʻi ʻoku ʻikai ke ʻamanekina ʻe Sihova pe ko ʻene kautahá te ke fakahāhā haohaoa ʻa e ngaahi ʻulungaanga ko ení. (1 Pita 2:21) Pea ko e laumālie mālohi ia ʻo Sihová te ne tokoniʻi koe ke fakatupulekina ʻa e ngaahi tuʻunga taau ko ení. (Fil. 2:13) ʻOku ʻi ai ha ʻulungaanga pau ʻokú ke loto ke fakaleleiʻi? Lotu kia Sihova fekauʻaki mo ia. Fekumi ʻi he kaveingá, pea kole ki ha taha ʻo e kau mātuʻá ki ha ngaahi fokotuʻu ki he founga ke fakaleleiʻi ai iá.

18. ʻOku fakalototoʻaʻi ʻa e kotoa ʻo e kau sevāniti fakafaifekaú ke nau fai ʻa e hā?

¹⁸ ʻOfa ke tau hokohoko atu kotoa, kau ai ʻa e faʻahinga ʻoku nau lolotonga ngāue ko e kau mātuʻá, ke fakatupulekina ʻa e ngaahi ʻulungaanga naʻe lāulea ki ai ʻi he kupu ko ení. (Fil. 3:16) Ko ha sevāniti fakafaifekau koe? Kakapa atu! Kole kia Sihova ke ne akoʻi mo fakafuo koe ke ke hoko ʻo toe ʻaonga lahi ange ʻi he ngāue kiate iá pea mo e fakatahaʻangá. (ʻAi. 64:8) Fakatauange ke tāpuakiʻi lahi ʻe Sihova hoʻo ngaahi feinga ke taau ke ngāue ko ha mātuʻá.