Te ke saiʻia ke maʻu ʻaonga lahi ange mei hoʻo ako fakafoʻituituí? ʻE lava ke ke ʻahiʻahiʻi ʻa e ngaahi fokotuʻu ko ení ke ke maʻu ha ʻātakai fakamānako ki he akó:

• Fili ha feituʻu ʻoku feʻungamālie. Kapau ʻoku malava, kumi ha feituʻu ʻoku ʻikai ke felekeu pea ʻoku maama lelei. ʻE lava ke ke ako ʻi ha tesi pe ko ha tēpile, pe ʻe lava ke ke fili ha feituʻu fakafiemālie ʻi tuʻa.

• Kumi ha feituʻu lōngonoa. Naʻe fili ʻa Sīsū ke lotu “ʻi he hengihengí” ʻi ha “potu lala.” (Mk. 1:35) Kapau ʻoku ʻikai ke maʻu ha feituʻu lōngonoa, ʻe lava ke ke tala ange ki ho fāmilí pe ko e faʻahinga ʻoku mou nofó ke nau ʻiloʻi hoʻo taimi akó pea kole ange ke ʻoua te nau fakahohaʻasi koe.

• Hanganaki tokangataha. Fakaʻehiʻehi mei he ngaahi fakahohaʻá. Kapau ʻokú ke ngāueʻaki hoʻo telefoní pe tepiletí ke ako, seti ia ki ha tuʻunga heʻikai ke fakahohaʻasi ai koe. Pea kapau ʻokú ke fakakaukau ki ha meʻa ʻoku fiemaʻu ke ke fai, ʻai ha kiʻi nouti nounou ke toki ʻai ia ʻamui ange. Kapau ʻoku faingataʻa ke ke tokangataha, kiʻi tuʻu ʻo luelue pe faofao.