ʻOKÚ KE fāinga ke tauhi hoʻo ako Tohi Tapu fakafoʻituituí ke tuʻumaʻu mo fakafiefia? ʻOku ngalingali ʻoku tau pehē kotoa pē ʻi he taimi ʻe niʻihi. Kae fakakaukau ki he ngaahi meʻa kehe ʻoku tau fai tuʻumaʻú, hangē ko e kaukaú. Ko e kaukaú ʻoku fiemaʻu ki ai ʻa e taimi mo e ivi, ka he ongoʻi fakaivifoʻou ē ʻoku tau maʻu ʻi he hili iá! Ko e ako Tohi Tapú foki ʻe lava ke ne ʻai ke tau maʻu ha ongoʻi fakaivifoʻou ʻo hangē ia ko hano “fufulu ʻaki ʻa e vai ko e folofolá.” (ʻEf. 5:26) Fakakaukau ki ha ngaahi fokotuʻu ʻe niʻihi ʻe lava ke tokoni:

• Fokotuʻu ha taimi-tēpile. Ko e ako Tohi Tapu fakafoʻituituí ʻoku kau ia ʻi he “ngaahi meʻa ʻoku mahuʻinga angé” ʻa ia kuo pau ke ʻoua ʻe fakaliʻeliʻaki ʻe ha Kalisitiane. (Fil. 1:10) Ke tokoniʻi koe ke ke muimui ki hoʻo taimi-tēpilé, fēfē ke ke fakapipiki ia ʻi ha feituʻu ʻoku faingofua hoʻo sio ki aí, hangē ko ha kiʻi papa ʻi he holisí pe ʻi he matapā ʻo e ʻaisí? Pe ʻe ʻaonga nai ke ke seti hoʻo meʻangāue fakaʻilekitulōniká ke ne fakamanatu atu hoʻo taimi akó ki muʻa siʻi pē ke kamata.

• Feʻunuʻaki ki hoʻo ngaahi fiemaʻú. ʻOku faingofua ange kiate koe ke ke tokangataha ʻi ha vahaʻa taimi fuoloa pe ʻi ha vahaʻa taimi nounou? Ko koe pē ʻokú ke ʻiloʻi lelei taha ho tuʻungá. Feʻunuʻaki hoʻo taimi akó ʻo fakatatau ki ai. Kapau ʻokú ke fakatoupīkoi ʻi he aʻu ki he taimi akó, fēfē ke ke fili ke ako ʻi ha miniti pē ʻe hongofulu? ʻI hoʻo ako naʻa mo e ʻi he kiʻi vahaʻa taimi nounou ko iá, te ke lavaʻi ai ʻa e meʻa lahi ange ia kapau naʻe ʻikai ke ke ako. Pea ʻi hoʻo kamata akó pē, ʻe ueʻi nai ai koe ke ke hokohoko atu.—Fil. 2:13.

• Fili tokamuʻa ʻa e ngaahi kaveingá. Kapau ʻokú ke tangutu hifo peá ke toki fakakaukau ki he meʻa te ke akó, heʻikai nai ke ke “ngāue lelei taha ʻaki ho taimí.” (ʻEf. 5:16) Fēfē ke ke ʻai ha lisi ʻo e ngaahi kupu pe kaveinga te ke saiʻia ke akó? ʻI he haʻu pē ha foʻi fehuʻi ki ho ʻatamaí, hikiʻi hifo ia. Pea ʻi he ngataʻanga ʻo e ako taki taha, te ke tānaki nai ha ngaahi fakakaukau kehe ki hoʻo lisi ʻo e meʻa te ke saiʻia ke akó.

• Hoko ʻo feʻunuʻakingofua. Feinga ke ʻai ke feʻunuʻakingofua hoʻo taimi-tēpilé, hangē ko e lahi ʻo e taimi ʻokú ke fakamoleki ʻi he akó pe ko e ngaahi kaveinga ʻokú ke filí. Ko e meʻa ʻoku mahuʻingá—ʻoku ʻikai ko e taimi, lōloa pe meʻa ʻokú ke akó—ka ko hoʻo fai tuʻumaʻu hoʻo akó.

ʻOku tau maʻu ʻaonga moʻoni mei ha taimi-tēpile ako tuʻumaʻu. ʻOku tau ʻunuʻunu ofi ange kia Sihova, ʻoku tau ako ke fai fakapotopoto, pea ʻoku tau ongoʻi fakaivifoʻou.—Sios. 1:8.