1, 2. (a) ‘E lava fēfē ke uesia kitautolu ‘i ha ngaahi liliu fakafokifā ‘i he mo‘uí? (Sio ki he ‘uluaki fakatātā ‘i he kupú ni.) (e) Fakatatau ki he Saame 131, ko e hā ‘e lava ke ne tokoni‘i kitautolu ke nonga ‘a ‘etau fakakaukaú?

HILI ‘a e ngāue ‘a Lloyd mo Alexandra ‘i Pēteli ‘o laka hake ‘i he ta‘u ‘e 25, na‘e vahe‘i kinaua ki he ngāue fakamalangá. ‘I he ‘uluaki taimí, na‘á na loto-mamahi. ‘Oku pehē ‘e Lloyd: “Na‘á ku ongo‘i ‘o hangē ko e Pētelí mo hoku vāhenga-ngāué kuo hoko ia ko hoku konga. Na‘á ku mahino‘i ‘i hoku ‘atamaí ‘a e ngaahi ‘uhinga ki he liliú, ka ‘i he ngaahi uike mo e māhina hoko atu aí, na‘á ku fa‘a hokosia ‘a e ongo‘i li‘ekina.” ‘I ha mōmeniti na‘e ongo‘i lelei ai ‘a Lloyd fekau‘aki mo e liliú, pea ‘i he mōmeniti hono hokó na‘á ne ongo‘i loto-mafasia.

² ‘I he taimi ki he taimi, ‘e ‘i ai ‘a e ngaahi liliu ‘i he mo‘uí na‘e ‘ikai ke tau ‘amanekina, pea te nau ‘ai nai kitautolu ke tau ongo‘i loto-mo‘ua mo loto-mafasia lahi. (Pal. 12:25) ‘I he faingata‘a ke tali pe fe‘unu‘aki ki he ngaahi liliú, ko e hā ‘e lava ke tau fai ke hanganaki nongá? (Lau ‘a e Saame 131:1-3.) Tau sio angé ki he founga na‘e malava ai ‘a e ni‘ihi ‘o e kau sevāniti ‘a Sihová, fakatou‘osi ‘i he kuohilí pea ‘i hotau ‘ahó ni, ‘o ma‘u ‘a e nonga ‘o e fakakaukaú na‘a mo e  taimi na‘e hoko ai ha liliu fakafokifā ki he‘enau mo‘uí.

3. Na‘e anga-fēfē ‘a e hoko ha liliu fakafokifā ki he mo‘ui ‘a Siosifá?

³ Ko e fakatātaá, fakakaukau fekau‘aki mo Siosifa. ‘I he kotoa ‘o e ngaahi foha ‘o Sēkopé, ko Siosifa na‘á ne ‘ofa taha aí. Na‘e ‘ai ‘e he me‘á ni ke meheka lahi ‘a hono fanga tokouá. ‘I he ta‘u 17 ‘a Siosifá, na‘a nau fakatau atu ia ko ha pōpula. (Sēn. 37:2-4, 23-28) ‘I he ta‘u nai ‘e 13, na‘á ne faingata‘a‘ia ai ‘i ‘Isipite, ‘uluakí ‘i he tu‘unga ko ha pōpula pea na‘e tuku pilīsone ia ki mui ai. Na‘e mama‘o ‘aupito ‘a Siosifa mei he‘ene tamaí, ‘a ē na‘á ne ‘ofa lahi aí. Ko hono tu‘ungá na‘e mei lava ke ‘ai ai ia ke ne ongo‘i ‘oku ‘ikai ha‘ane ‘amanaki peá ne ‘ita, ka na‘e ‘ikai ke pehē. Ko e hā na‘á ne tokoni‘i iá?

4. (a) Ko e hā na‘e fai ‘e Siosifa ‘i he‘ene ‘i he pilīsoné? (e) Na‘e anga-fēfē hono tali ‘e Sihova ‘a e ngaahi lotu ‘a Siosifá?

⁴ Lolotonga ‘a e faingata‘a‘ia ‘a Siosifa ‘i he pilīsoné, ‘oku pau pē na‘á ne tokangataha ki he founga na‘e tokoni‘i ai ia ‘e Sihová. (Sēn. 39:21; Saame 105:17-19) Mahalo pē na‘á ne fakakaukau foki fekau‘aki mo ‘ene ngaahi misi fakaekikite ‘i he‘ene kei si‘í peá ne ongo‘i papau ai na‘e ‘iate ia ‘a Sihova. (Sēn. 37:5-11) Ngalingali na‘á ne toutou lotu ‘o ne tala kia Sihova ‘a e me‘a kotoa pē na‘e ‘i hono lotó. (Saame 145:18) Pea na‘e tali ‘e Sihova ‘a e ngaahi lotu ‘a Siosifá ‘aki hono ‘ai ke ne tuipau te Ne “‘iate ia” ‘o tatau ai pē pe ko e hā ‘e hokó.​—Ngā. 7:9, 10. * (Sio ki he fakamatala ‘i lalo.)

5. ‘E lava fēfē ke ‘ai kitautolu ‘e he “nonga ‘a e ‘Otuá” ke tau toe fakapapau‘i ange ai ke tauhi kia Sihova?

⁵ Tatau ai pē pe ko e hā hono faingata‘a ‘a hotau tu‘ungá, ‘e lava ke tau ma‘u ‘a e “nonga ‘a e ‘Otuá” ‘a ia ‘okú ne malu‘i ‘etau “ngaahi mafai fakaefakakaukaú” pea ‘ai kitautolu ke tau ongo‘i nonga. (Lau ‘a e Filipai 4:6, 7.) ‘I he‘etau ongo‘i loto-mo‘ua mo loto-mafasiá, ‘e lava ke fakaivimālohi‘i kitautolu ‘e he “nonga ‘a e ‘Otuá” ke tau hanganaki tauhi kia Sihova pea ‘ikai ke fo‘i. Tau ako angé ‘a e ngaahi fakatātā fekau‘aki mo e fanga tokoua mo e fanga tuofāfine ‘i onopooni ‘a ia kuo nau hokosia ‘a e me‘á ni.

6, 7. ‘E lava fēfē ke tokoni‘i kitautolu ‘e he‘etau ngaahi lotú ke tau toe ma‘u ‘a e nonga ‘o e fakakaukaú? ‘Omai ha fakatātā.

⁶ ‘I he fanongo ‘a Ryan mo Juliette kuo ngata ‘a hona vāhenga-ngāue ko e ongo tāimu‘a makehe fakataimí, na‘á na ongo‘i loto-si‘i. ‘Oku pehē ‘e Ryan: “Na‘á ma tala hangatonu ‘a e me‘á ni kia Sihova ‘i he lotu. Na‘á ma ‘ilo‘i ‘okú ma ma‘u heni ha faingamālie makehe ke fakahāhā ‘a e falala kiate ia. Ko e tokolahi ‘i he‘emau fakataha‘angá na‘a nau fo‘ou ki he mo‘oní, ko ia na‘á ma lotu ke tokoni‘i kimaua ‘e Sihova ke ma fokotu‘u ha fa‘ifa‘itaki‘anga lelei ‘aupito ‘i he tuí.”

⁷ Na‘e anga-fēfē hono tali ‘e Sihova ‘ena lotú? ‘Oku pehē ‘e Ryan: “‘I he hili pē ‘a e lotú na‘e mole ‘a e ngaahi ongo‘i ‘ikai lelei mo e hoha‘a na‘á ma mu‘aki hokosiá. Ko e nonga ‘a e ‘Otuá na‘á ne malu‘i ‘a homa lotó mo ‘ema mafai fakaefakakaukaú. Na‘á ma ‘ilo‘i ‘e lava ke hokohoko atu ‘ema ‘aonga kia Sihová kapau te ma tauhi ma‘u ‘a e fakakaukau totonú.”

8-10. (a) ‘E lava fēfē ke tokoni‘i kitautolu ‘e he laumālie ‘o e ‘Otuá ‘i he taimi ‘oku tau loto-mo‘ua aí? (e) ‘E anga-fēfē nai hono tokoni‘i kitautolu ‘e Sihova ‘i he‘etau tokangataha ki he tauhi kiate iá?

⁸ Ko e laumālie ‘o e ‘Otuá ‘e lava ke ne ‘ai kitautolu ke tau ongo‘i nonga, pea ‘e lava foki ke ne tataki kitautolu ki he ngaahi veesi ‘i he Tohi Tapú te ne tokoni‘i kitautolu ke tau mahino‘i ‘a e me‘a ‘oku mahu‘inga mo‘oni ‘i he mo‘uí. (Lau ‘a e Sione 14:26, 27.) Fakakaukau angé ki he me‘a  na‘e hoko kia Philip mo Mary, ko ha ongo me‘a mali na‘á na ‘i he Pētelí ‘i he meimei ta‘u ‘e 25. ‘I loto ‘i he māhina ‘e fā, na‘e mate fakatou‘osi ai ‘ena ongo fa‘eé mo ha kāinga ‘e taha, pea na‘e pau ke na tokanga‘i ‘a e tamai ‘a Mary, ‘a ia na‘e hoholo tamaki.

⁹ ‘Oku pehē ‘e Philip: “Na‘á ku pehē ‘e au na‘e lelei ‘eku fekuki mo iá ‘i ha tu‘unga pau, ka na‘e ‘i ai ‘a e me‘a na‘e mole. Na‘á ku lau ‘a e Kolose 1:11 ‘i ha kupu ako ‘i he Taua Le‘o. Ko e mo‘oni, na‘á ku kātaki, ka na‘e ‘ikai ‘i he tu‘unga kakato tahá. Na‘e fiema‘u ke u “kātekina ‘a e me‘a kotoa pē ‘i he kātaki mo e fiefia.” Na‘e fakamanatu mai ‘i he veesi ko ení ko ‘eku fiefia ‘i he mo‘uí ‘oku fakatu‘unga ia, ‘ikai ‘i hoku ngaahi tu‘ungá, ka ko e ola ‘o e ngāue ‘a e laumālie ‘o e ‘Otuá ‘i he‘eku mo‘uí.”

¹⁰ Koe‘uhi na‘e hanganaki tokangataha ‘a Philip mo Mary ki he tauhi kia Sihová, na‘á ne tāpuaki‘i kinaua ‘i he ngaahi founga lahi. ‘I he‘ena mavahe pē mei Pētelí, na‘á na fakatou ma‘u ha kau ako Tohi Tapu ‘a ia na‘a nau fai ha fakalakalaka lelei pea loto ke ako lahi ange ‘i he tu‘o taha he uiké. ‘Oku pehē ‘e Mary: “Ko ‘ema fiefiá na‘e ‘iate kinautolu pea ko e founga ia ‘a Sihova ki hono tala mai ‘e lelei ‘a e me‘a kotoa pē.”

11, 12. (a) Na‘e anga-fēfē hono fai ‘e Siosifa ha me‘a na‘e lava ke tāpuaki‘i ‘e Sihova? (e) Na‘e anga-fēfē hono fakapale‘i ‘e Sihova ‘a Siosifá?

¹¹ ‘I he hoko ha liliu fakafokifā ‘i he mo‘uí, te tau hoko nai ai ‘o mātu‘aki loto-mo‘ua ‘o tau fakakaukau pē ai ki he‘etau ngaahi palopalemá. Na‘e mei lava ke hoko ia kia Siosifa. ‘I hono kehé, na‘á ne fili ke fai ‘a e lelei taha ‘i he‘ene malavá ‘i hono tu‘ungá. Hangē pē ko e ngāue mālohi ‘a Siosifa kia Pōtifá, na‘á ne ngāue mālohi ‘i he pilīsoné ‘i ha me‘a pē na‘e vahe‘i ange ‘e he ‘ōfisa pulé ke ne fai.​—Sēn. 39:21-23.

¹² ‘I he ‘aho ‘e taha, na‘e vahe‘i ai ‘a Siosifa ke ne tokanga‘i ‘a e ongo pōpula na‘á na ngāue ‘i he loto‘ā ‘o Feló. Na‘e anga-lelei ‘a Siosifa kiate kinaua, pea na‘e ongo‘i fiemālie fe‘unga ‘a e ongo tangatá ke na talanoa kiate ia fekau‘aki mo ‘ena loto-mo‘uá mo ‘ena misi fakalotohoha‘a ‘i he pō ki mu‘á. (Sēn. 40:5-8) Na‘e ‘ikai ke ‘ilo‘i ‘e Siosifa ‘i he taimi ko iá, ka ko e fetalanoa‘aki ko iá na‘e faifai pē ‘o iku ki he‘ene tau‘atāina. ‘I he ta‘u ‘e ua ki mui ai, na‘e tuku ange ia mei he pilīsoné peá ne hoko ko e pule ma‘u mafai lahi ‘i ‘Isipite. Ko Felo pē taha na‘á ne ma‘u ‘a e mafai lahi ange ‘ia Siosifá!​—Sēn. 41:1, 14-16, 39-41.

13. ‘E lava fēfē ke tau fai ha me‘a ‘i ha founga ‘e tāpuaki‘i ‘e Sihova, ‘o tatau ai pē pe ko e hā hotau tu‘ungá?

¹³ ‘I he hangē ko Siosifá, te tau ‘i ha tu‘unga nai he‘ikai lava mo‘oni ke tau mapule‘i. Ka ‘o kapau te tau kātaki pea fai ‘a e lelei taha ‘o ‘etau malavá, ‘e tāpuaki‘i kitautolu ‘e Sihova. (Saame 37:5) Na‘a mo e taimi ‘oku tau ongo‘i puputu‘u ai mo loto-mo‘uá, he‘ikai ke “tuku ai pē ke siva [‘etau] ‘amanakí,” pe tōnoa. (2 Kol. 4:8; fakamatala ‘i lalo) ‘E ‘iate kitautolu ‘a Sihova, tautefito kapau te tau hanganaki tokangataha ki he‘etau ngāue fakafaifekaú.

14-16. Na‘e anga-fēfē ‘a e hanganaki tokangataha ‘a Filipe ki he‘ene ngāue fakafaifekaú neongo na‘e hoko ha liliu ki he‘ene mo‘uí?

¹⁴ Ko Filipe ko e ‘evangelioó ko ha fa‘ifa‘itaki‘anga lelei ‘aupito ia ‘o ha tokotaha na‘e hanganaki tokangataha ki he‘ene ngāue fakafaifekaú ‘o tatau ai pē pe ko e hā ‘a e liliu ‘i he‘ene mo‘uí. ‘I he taimi ‘e taha, na‘á ne ma‘u ai ha vāhenga-ngāue fo‘ou ‘i Selusalema. (Ngā. 6:1-6) Pea na‘e liliu ‘a e me‘a kotoa. Hili hono fakapoongi ‘a Sitīvení, na‘e fakatanga‘i kakaha ‘a e kau Kalisitiané pea na‘a nau hola mei Selusalema. Koe‘uhi na‘e loto ‘a Filipe ke ne hanganaki femo‘uekina ‘i he ngāue kia Sihová, na‘á ne ‘alu ki he kolo ko Samēliá, ‘a ia na‘e fiema‘u ai ke fanongo ‘a e kakaí ki he ongoongo leleí.​—Māt. 10:5; Ngā. 8:1, 5.

¹⁵ Na‘e loto-lelei ‘a Filipe ke ne ‘alu ki ha feitu‘u pē na‘e tataki ia ki ai ‘e he laumālie ‘o e ‘Otuá. Ko ia na‘e ngāue‘aki ia ‘e Sihova ke ne malanga ‘i he ngaahi feitu‘u na‘e te‘eki ke fanongo ai ‘a e kakaí ki he ongoongo leleí. Na‘e siolalo ‘a e kau Siu tokolahi ki he kau Samēliá pea ngaohikovi‘i kinautolu. Ka na‘e ‘ikai ke filifilimānako ‘a Filipe, pea na‘á ne vēkeveke ke vahevahe kiate kinautolu ‘a e ongoongo leleí. Pea na‘e fanongo “kotoa” ‘a e kau Samēliá kiate ia!​—Ngā. 8:6-8.

¹⁶ Ko hono hokó, na‘e tataki ‘e he laumālie ‘o e ‘Otuá ‘a Filipe ke ne malanga ‘i he ongo kolo ko ‘Asitoti mo Sesaliá, ‘a ia na‘e tokolahi ai ‘a e kau Senitailé. (Ngā. 8:39, 40) Na‘e toe hoko ha liliu ki he mo‘ui ‘a Filipé. Na‘á ne nofo ai ‘o ne ma‘u fāmili. Kae tatau ai pē pe ko e hā ‘a e liliu na‘e hoko ki he mo‘ui ‘a Filipé, na‘á ne hanganaki femo‘uekina ‘i he‘ene ngāue fakafaifekaú, pea na‘e hokohoko atu hono tāpuaki‘i ia ‘e Sihova mo hono fāmilí.​—Ngā. 21:8, 9.

17, 18. ‘I he liliu ‘i ha founga ‘a ‘etau mo‘uí, ‘e tokoni‘i fēfē kitautolu ‘i he tokangataha ki he ngāue fakafaifekaú?

¹⁷ ‘Oku pehē ‘e he tokolahi ‘i he ngāue taimi-kakató ko e tokangataha ki he‘enau ngāue fakafaifekaú ‘oku tokoni‘i ai kinautolu ke nau hanganaki fiefia mo fakakaukau pau na‘a mo e hoko ‘a e liliu ki honau tu‘ungá. Ko e fakatātaá, ‘i he taimi na‘e mavahe ai mei he Pētelí ha ongo me‘a ‘Afilika Tonga ko Osborne mo Polite, na‘á na fakakaukau ‘e faingofua ke ma‘u ha ngāue konga taimi mo ha feitu‘u ke na nofo ai. Ka ‘oku pehē ‘e Osborne: “Ko e me‘a pangó, na‘e ‘ikai ke ma‘u vave ha ngāue pa‘anga ‘o hangē ko ia na‘á ma ‘amanaki ki aí.” ‘Oku pehē ‘e Polite: “Na‘e ‘ikai te ma ma‘u ha ngāue ‘i he māhina ‘e tolu, pea na‘e ‘ikai ha‘ama pa‘anga na‘e tātānaki. Ko ha palopalema mo‘oni ia.”

¹⁸ Ko e hā na‘á ne tokoni‘i ‘a Osborne mo Polite ‘i he tu‘unga fakalotomafasia ko ení? ‘Oku pehē ‘e Osborne: “Ko e malanga fakataha mo e fakataha‘angá na‘e tokoni‘i lahi ai kimaua ke ma hanganaki  tokangataha mo ma‘u ha fakakaukau pau.” ‘I he ‘ikai ke tangutu pē ‘i ‘api ‘o hoha‘á, na‘á na fakapapau‘i ke hanganaki femo‘uekina ‘i he ngāue fakafaifekaú. Ko hono fai ‘a e me‘a ko ení na‘á na ma‘u ai ha fiefia lahi! Pea ‘oku toe pehē ‘e Osborne: “Na‘á ma kumi ngāue takai holo, pea na‘e faifai pē ‘o ma ma‘u ha ngāue.”

19-21. (a) Ko e hā te ne tokoni‘i kitautolu ke tauhi ma‘u ‘a e nonga ‘o ‘etau fakakaukaú? (e) ‘E lava fēfē ke tau ma‘u ‘aonga ‘i he‘etau fe‘unu‘aki ki ha liliu ta‘e‘amanekina?

¹⁹ Hangē ko ia kuo tau vakai ki aí, kapau ‘oku tau ngāue‘aki ‘a e lelei taha ‘i hotau tu‘ungá pea falala kakato kia Sihova, te tau malava ke tauhi ma‘u ‘a e nonga ‘o ‘etau fakakaukaú ‘o tatau ai pē pe ko e hā ‘e hokó. (Lau ‘a e Maika 7:7.) Te tau ‘ilo‘i nai ‘i ha taimi ko e anga ‘o ‘etau fe‘unu‘aki ki ha liliú ‘e ‘ai mo‘oni ai ke mālohi ‘etau kaume‘a mo Sihová. ‘Oku fakamatala ‘a Polite ko hono toe vahe‘i ki ha ngāue kehe mei Pētelí kuo ako‘i ai ia ki he ‘uhinga mo‘oni ‘o e falala kia Sihová na‘a mo e taimi ‘oku hā ngali mātu‘aki faingata‘a ai ‘a e mo‘uí. ‘Okú ne pehē: “Kuo toe vāofi ange ‘a hoku vaha‘angatae mo iá.”

²⁰ Ko Mary, na‘e lave ki ai ki mu‘á, ‘okú ne kei tokanga‘i pē ‘ene tamai ta‘umotu‘á mo ngāue tāimu‘a. ‘Okú ne pehē: “Kuó u ako ‘i he taimi ‘oku ou ongo‘i loto-mo‘ua aí, ‘oku fiema‘u ke u ki‘i tu‘u, ‘o lotu, pea ma‘u leva ha taimi mālōlō. Ko hono tuku ‘a e ngaahi me‘á ki he to‘ukupu ‘o Sihová ‘oku ngalingali ko e lēsoni lahi taha ia kuó u akó, pea ‘e mātu‘aki fiema‘u ia ‘i he kaha‘ú.”

²¹ ‘Oku fakahaa‘i ‘e Lloyd mo Alexandra ko e ngaahi liliu ‘i he‘ena mo‘uí kuo ‘ahi‘ahi‘i ai ‘ena tuí ‘i he ngaahi founga ta‘e‘amanekina. Ka ‘oku lava ke na sio ki he anga hono tokoni‘i mo‘oni kinaua ‘i he ngaahi ‘ahi‘ahi ko ení. ‘Okú ne ‘ilo‘i he taimí ni ‘oku mālohi fe‘unga ‘ena tuí ke na ma‘u ai ‘a e fiemālie ‘i he taimi ‘oku ‘i ai ai ‘ena ngaahi palopalemá, pea ‘okú na ongo‘i kuó na hoko ko e ongo me‘a lelei ange.

22. Kapau ‘oku tau fai ‘a e lelei taha ‘o ‘etau malavá ‘i hotau tu‘ungá, ko e hā ‘e lava ke tau fakapapau‘í?

²² ‘I he fokotu‘utu‘u ko ení, ‘e lava ke hoko ha liliu fakafokifā ki he‘etau mo‘uí. Te tau ma‘u nai ha vāhenga-ngāue kehe ‘i he ngāue ‘a Sihová, hoko ‘o mahamahaki, pe fiema‘u ke tokanga‘i hotau fāmilí ‘i ha founga fo‘ou. Kae tatau ai pē pe ko e hā nai ‘e hokó, hoko ‘o tuipau ‘oku tokanga ‘a Sihova fekau‘aki mo koe pea te ne tokoni‘i koe ‘i he taimi totonu. (Hep. 4:16; 1 Pita 5:6, 7) Pea fai ‘i he taimí ni ‘a e lelei taha ‘i ho‘o malavá ‘i ho tu‘ungá. Lotu ki ho‘o Tamaí, ‘a Sihova, pea ako ke falala kakato kiate ia. ‘I he foungá ni, tatau ai pē pe ko e hā ‘a e liliu ‘e hoko ki ho tu‘ungá, te ke ma‘u ma‘u pē ‘a e nonga ‘i he fakakaukaú ‘a ia ‘oku ha‘u meia Sihova.