NA‘E fehangahangai ‘a Sitīveni mo ha kulupu ‘o e kau tangata fakafili. ‘I he hoko ko e kau mēmipa ‘o e fakamaau‘anga mā‘olunga ‘i ‘Isilelí, ‘a e Sanetalimí, ko e kau fakamaau ko ia ‘e toko 71 na‘a nau kau ‘i he kau tangata ma‘u mafai lahi taha ‘i he fonuá. Na‘e fakatahataha‘i kinautolu ‘e he Taula‘eiki Lahi ko Kaiafasí, ‘a ia na‘á ne tokanga‘i ‘a e fakamaau‘angá ‘i ha ngaahi māhina si‘i ki mu‘a ange ‘i he taimi na‘e fakahalaia‘i ai ki he mate ‘a Sīsuú. (Māt. 26:57, 59; Ngā. 6:8-12) ‘I he‘enau ‘omi taha taha ha ngaahi tukuaki‘i loí, na‘a nau fakatokanga‘i ai ha me‘a mātu‘aki faka‘ohovale fekau‘aki mo Sitīveni​—ko hono fofongá na‘e “hangē ko e fofonga ‘o ha ‘āngeló.”​—Ngā. 6:13-15.

Na‘e lava fēfē ke hanganaki nonga mo fiemālie ‘a Sitīveni ‘i ha tu‘unga fakamanavahē pehē? Ki mu‘a ke toho atu ia ki he ‘ao ‘o Sanetalimí, na‘e nōfo‘i kakato ‘a Sitīveni ‘i he‘ene ngāue fakafaifekaú ‘i he malumalu ‘o e tataki mālohi ‘a e laumālie ‘o e ‘Otuá. (Ngā. 6:3-7) ‘I hono fakamāu‘í, na‘e ngāue ‘iate ia ‘a e laumālie tatau, fakatou‘osi ko ha fakafiemālie pea ko ha fakamanatu. (Sione 14:16) ‘I hono fai ‘e Sitīveni ‘a ‘ene taukapo loto-to‘a, ‘oku hiki ‘i he Ngāue vahe 7, na‘e fakamanatu ‘e he laumālie mā‘oni‘oní kiate ia ha kupu nai ‘e 20 pe lahi ange mei he Ngaahi Konga Tohi Tapu Faka-Hepeluú. (Sione 14:26) Ka na‘e fakaivimālohi‘i lahi ange ‘a e tui ‘a Sitīvení ‘i he‘ene ma‘u ha vīsone fekau‘aki mo Sīsū ‘okú ne tu‘u ‘i he nima to‘omata‘u ‘o e ‘Otuá.​—Ngā. 7:54-56, 59, 60.

Te tau fehangahangai nai ‘i ha ‘aho mo ha ngaahi fakamanamana mo e fakatanga. (Sione 15:20) ‘I he fafanga‘i tu‘uma‘u kitautolu ‘aki ‘a e Folofola ‘a e ‘Otuá pea ‘i he longomo‘ui ‘i he ngāue fakafaifekaú, ‘oku tau faka‘atā ai ‘a e laumālie ‘o Sihová ke ngāue ‘iate kitautolu. Te tau ma‘u foki ai ‘a e mālohi ke matu‘uaki ‘a e fakafepakí lolotonga ‘a e tauhi ma‘u ‘etau nonga ‘i lotó.​—1 Pita 4:12-14.