Na‘e toe fokotu‘u ‘i he talité ha kautaha fo‘ou na‘e ui ko e Kautaha ‘a e Ngaahi Pule‘angá. Ko ‘ene taumu‘á ke “pouaki ‘a e ngāue fāitaha fakavaha‘apule‘angá pea ke ma‘u ‘a e melino mo e malu fakavaha‘apule‘angá.” Na‘e poupou‘i ‘e he ngaahi lotu lahi ‘i he Pule‘anga-Ha‘a-Kalisitiané ‘a e Kautaha ‘a e Ngaahi Pule‘angá. Na‘e fakahīkihiki‘i ia ‘e he Kōsilio ‘o e Ngaahi Siasi ‘o Kalaisí ‘i ‘Ameliká ‘o pehē “ko e fakahāhā fakapolitikale ia ‘o e Pule‘anga ‘o e ‘Otuá ‘i he māmaní.” Na‘e poupou‘i ‘e he kōsilio ko ení ‘a e Kautaha ‘a e Ngaahi Pule‘angá ‘aki hono fekau‘i atu ‘a e kau fakafofonga ki he Fakataha ki he Melinó ‘i Pālesí. Na‘e pehē ‘e he taha ‘o e kau fakafofonga ko iá ko e fakatahá “na‘e kamata ai ha kuonga fo‘ou ‘i he hisitōlia ‘o e māmaní.”

Na‘e kamata ha kuonga fo‘ou, ka na‘e ‘ikai kamata‘i ia ‘e he kau tangata na‘a nau kau ‘i he fakataha ko ia ki he melinó. ‘I he 1919 na‘e kamata ha kuonga fo‘ou ‘o e ngāue fakamalangá ‘i hono fakaivia ‘e Sihova ‘ene kakaí ke malanga ‘o lahi ange ia ‘i ha toe taimi ki mu‘a. Ka ki mu‘a iá, na‘e fiema‘u ha liliu faka‘aufuli ki he tu‘unga ‘o e Kau Ako Tohi Tapú.

Ko e fili fakata‘u ‘o e kau talēkita ‘o e Watch Tower Bible and Tract Society na‘e faka‘aho ki he Tokonaki, Sanuali 4, 1919. ‘I he taimi ko iá, ko Joseph F. Rutherford, na‘á ne takimu‘a ‘i he kakai ‘a Sihová, na‘e tuku pilīsone ta‘etotonu ia mo ha toko fitu kehe, ‘i Atlanta, Siōsia, ‘Amelika. Ko e fehu‘í, ‘E toe fili pē ‘a e fanga tokoua ne tuku pilīsoné ke nau hoko atu? Pe ‘e fetongi kinautolu?

‘I he loki pilīsoné, na‘e hoha‘a ‘a Tokoua Rutherford ki he kaha‘u ‘o e kautahá. Na‘á ne ‘ilo na‘e loto ‘a e fanga tokoua ‘e ni‘ihi ‘e lelei tahá ke fili ha taha kehe ke palesiteni. ‘I he ‘uhinga ko ení, na‘á ne fai ha tohi ki he fa‘ahinga ‘e ‘i aí, ‘o fokotu‘u ‘a tokoua Evander J. Coward ke hoko ko e palesitení. Na‘e fakamatala‘i ‘e Rutherford ko Coward ko ha tokotaha “nonga,” “fakapotopoto” mo “mateaki ki he ‘Eikí.” Kae kehe, na‘e sai‘ia ‘a e fanga tokoua tokolahi ‘i ha founga ‘e taha,  ko hono toloi ‘a e filí ‘i ha māhina ‘e ono. Na‘e loto ki ai ‘a e timi fakalao na‘a nau taukapo‘i ‘a e fanga tokoua ne tuku pilīsoné. Na‘e ‘ita ‘a e ni‘ihi lolotonga e lāuleá.

Pea na‘e hoko ha me‘a ‘a ia na‘e pehē ‘e Richard H. Barber ki mui ai na‘e ‘hangē ia ha lingi lolo ki ha tahi hoú.’ Na‘e lea hake ha tokoua ‘i ai: “‘Oku ‘ikai ko ha loea au, ka ‘i he ha‘u ki he tu‘unga fakalaó, ‘oku ou ‘ilo‘i ha me‘a fekau‘aki mo e lao ‘o e mateakí. Ko e mateakí ‘oku fiema‘u ‘e he ‘Otuá. Ko e founga lelei taha ke tau fakahaa‘i ai ‘etau mateaki ki he ‘Otuá ko hono fai ha fili pea toe fili pē ‘a Tokoua Rutherford ko e palesitení.”—Saame 18:25.

Na‘e manatu‘i ‘e he kaungā-nofo pilīsone ko A. H. Macmillan ‘i he ‘aho hono hokó na‘e tukituki ange ‘a Tokoua Rutherford ‘i he holisi hono loki pilīsoné pea pehē ange, “Mono mai ho nimá.” Na‘e mono ange ‘e Tokoua Rutherford ha mākoni. Na‘e sio ‘a Macmillan ki he ki‘i pōpoaki nounoú peá ne ‘ilo‘i leva hono ‘uhingá. Na‘e pehē ai: “RUTHERFORD WISE VAN BARBER ANDERSON BULLY MO SPILL TALĒKITA ‘ULUAKI TOKO TOLÚ ‘OFA ATU.” Na‘e ‘uhinga eni na‘e toe fili kotoa pē ‘a e kau talēkitá pea ko Joseph Rutherford mo William Van Amburgh na‘á na hoko atu pē. Ko ia, ko Tokoua Rutherford na‘e hoko atu pē ko e palesitení.

‘I hono kei tuku pilīsone ‘a e fanga tokoua ‘e toko valú, na‘e tufaki ‘e he Kau Ako Tohi Tapu faitōnungá ha tohi tangi ke tuku ange kinautolu. Na‘e ma‘u ‘e he fanga tokoua loto-to‘a ko ení ha fakamo‘oni ‘e 700,000 tupu. ‘I he Pulelulu, Ma‘asi 26, 1919, ki mu‘a ke fakahū ‘a e tohi tangí, na‘e tuku ange mai ‘a Tokoua Rutherford mo e fanga tokoua fua fatongia kehé.

‘I he lea ‘a Tokoua Rutherford ki he fa‘ahinga na‘a nau talitali iá, na‘á ne pehē: “‘Oku ou tuipau ko e hokosia ko ení ko hono teu‘i ia kitautolu ki ha taimi faingata‘a ange. . . . Ko ho‘omou faitaú na‘e ‘ikai ko e fai pē ke tuku ange homou fanga tokoua mei pilīsoné. Na‘e ‘ikai ko e taumu‘a tefitó ia. . . . Ko e faitau na‘a mou fakahokó ko e faifakamo‘oni ia ki he Mo‘oní, pea ko e fa‘ahinga kuo nau fai iá kuo nau ma‘u ha tāpuaki fakaofo.”

Ko e ngaahi me‘a ne hoko ‘i hono ‘ahi‘ahi‘i hotau fanga tokouá ‘okú ne ‘omai nai ai ‘a e faka‘ilonga ‘o e tataki ‘a Sihová. ‘I Mē 14, 1919, na‘e faitu‘utu‘uni ‘a e fakamaau‘anga tangí: “Ko e kau faka‘iloa ‘i he keisi ko ení na‘e ‘ikai ke nau ma‘u ‘a e . . . fakamaau totonu na‘a nau tuha mo iá, pea ‘i he ‘uhinga ko iá ‘oku fakafoki ‘a e tu‘utu‘uní.” Na‘e tukuaki‘i ‘a e fanga tokouá ki he hia mafatukituki, pea ko e me‘a ko ení na‘e mei uesia ai pē honau lēkōtí kapau na‘e fakamolemole‘i pe tuku hifo pē nai honau tauteá. Na‘e ‘ikai ha toe tautea. Ko hono olá, na‘e kei ma‘u pē ‘e Fakamaau Rutherford ‘ene laiseni fakalao ke taukapo‘i ‘a e kakai ‘a Sihová ‘i he Fakamaau‘anga Lahi ‘i ‘Ameliká, na‘e tu‘o lahi ‘ene fai pehē hili hono tuku ange iá.

“He‘ikai ke mau tangutu noa pē ‘o tatali ki he ‘Eikí ke ne ‘ave kimautolu ki hēvani,” ko e manatu ia ‘a Tokoua Macmillan. “Na‘a mau ‘ilo na‘e pau ke mau fai ha me‘a ke fakapapau‘i ‘a e finangalo mo‘oni ‘o e ‘Eikí.”

Ka ko e fanga tokoua ‘i he ‘ulu‘i ‘apitangá na‘e ‘ikai lava ke nau hoko atu pē ‘a e ngāue na‘a nau fai ‘i he laui ta‘ú. He ko e hā? Koe‘uhi lolotonga hono tuku pilīsone kinautolú, ko e ngaahi peleti pulusi kotoa na‘e ngāue‘aki ke pulusi ‘a e ‘ū tohí na‘e faka‘auha. Na‘e fakalotosi‘i eni, pea na‘e fifili ‘a e fanga tokoua ‘e ni‘ihi pe kuo ngata ‘a e ngāue fakamalangá.

Na‘e kei mahu‘inga‘ia ha taha ‘i he pōpoaki ‘o e Pule‘angá na‘e malanga‘i ‘e he Kau Ako Tohi Tapú? Ke tali ‘a e fehu‘i ko iá, na‘e fili ‘e Tokoua Rutherford ke fai ha malanga. ‘E fakaafe‘i ki ai ‘a e kakaí. “Kapau he‘ikai ha‘u ha taha ki he fakataha ko iá,” ko e lea ia ‘a Tokoua Macmillan, “ko ‘etau lavá ia.”

Na‘e fai ia ‘i he Sāpate, Mē 4, 1919, neongo na‘e puke lahi ‘a Tokoua Rutherford, na‘á ne fakahoko ‘a e malanga “‘Amanaki ki he Fa‘ahinga Mafasiá” ‘i Los Angeles, Kalefōnia. Na‘e ha‘u ‘a e toko 3,500 nai ki ai, pea foki ‘a e laui ngeau he na‘e fonu. ‘I he ‘aho hokó, na‘e toe ha‘u ha toko 1,500. Na‘e ma‘u ‘e he fanga tokouá ‘a e talí—na‘e kei mahu‘inga‘ia ‘a e kakaí!

Ko e me‘a hono hoko na‘e fai ‘e he fanga tokouá na‘e fokotu‘u ai ha ‘alunga ki he ngāue fakamalanga ‘a e Kau Fakamo‘oni ‘a Sihová ‘o a‘u mai ki he ‘ahó ni.

‘I he Watch Tower ‘o ‘Aokosi 1, 1919, na‘e fanongonongo ai ‘i he konga ki mu‘a ‘o Sepitemá, ‘e fai ha fakataha-lahi ‘i Cedar Point, Ohio. “Na‘e ongo‘i ‘e he taha kotoa kuo pau ke nau ‘alu ki ai,” ko e manatu ia ‘a Clarence B. Beaty, ko ha ki‘i talavou Ako Tohi Tapu mei Missouri. Na‘e toko 6,000 tupu ‘a e fanga tokoua na‘a nau ma‘u  ‘a e fakataha ko iá, ‘o tokolahi mama‘o ia ‘i he me‘a na‘a nau ‘amanekiná. Na‘e toe fakafiefia ‘a e fakataha ko ení, he na‘e papitaiso ‘a e toko 200 tupu ‘i he Anovai Erie.

‘I Sepitema 5, 1919, ko e ‘aho hono nima ia ‘o e fakataha-lahí, ‘i he malanga ‘a Tokoua Rutherford ko e “Tokanga ki he Kaungāngāué,” na‘á ne fanongonongo ai ha makasini fo‘ou, na‘e fakakaveinga ko e The Golden Age. * ‘E “talaki ai ‘a e ngaahi ongoongo mahu‘inga lolotongá, ‘oatu mo ha fakamatala Fakatohitapu ki he ‘uhinga ‘o e hoko ‘a e ngaahi me‘a lalahi ko ení.”

Na‘e fakalototo‘a‘i ‘a e Kau Ako Tohi Tapú kotoa ke nau malanga loto-to‘a ‘aki ‘a e makasini fo‘ou ko ení. Na‘e pehē ‘i ha tohi ‘o fakamatala‘i ai ‘a e founga ke fokotu‘utu‘u ai e ngāué: “Tuku ke manatu‘i ‘e he tokotaha [papitaiso] mateaki taki taha ko ha monū lahi ia ke ngāue, pea ma‘u ‘a e faingamālie ko ení pea kau ‘i hono ‘oatu ‘a e fu‘u fakamo‘oni ko ení ki he māmaní.” Na‘e fakaofo ‘a e olá! ‘I Tīsema, ko e kau malanga faivelenga ‘o e Pule‘angá na‘a nau ma‘u ‘a e tukuhau ‘e 50,000 tupu ki he makasini fo‘oú.

‘I he ngata‘anga ‘o e 1919, na‘e toe fokotu‘utu‘u maau mo fakaivia ‘a e kakai ‘a Sihová. Pehē foki, ko e ngaahi kikite mahu‘inga fekau‘aki mo e ngaahi ‘aho faka‘osí kuo fakahoko. Ko hono sivi mo fakama‘a ‘a e kakai ‘a e ‘Otuá, na‘e tomu‘a tala ‘i he Malakai 3:1-4, na‘e kakato. Na‘e fakatau‘atāina‘i ‘a e kakai ‘a Sihová mei he pōpula fakaefakatātā ki “Pāpilone ko e Lahi,” pea na‘e fakanofo ‘e Sīsū “‘a e tamaio‘eiki anga-tonu mo potó.” * (Fkh. 18:2, 4; Māt. 24:45) ‘I he taimi ko ení na‘e mateuteu ‘a e Kau Ako Tohi Tapú ki he ngāue na‘e tuku tauhi mai ‘e Sihova kiate kinautolú.