‘OKU vakai‘i ‘e ha tokotaha fakamatala ‘ea ‘a e anga ‘o e tu‘u ‘a e ‘eá. ‘Okú ne sio ki ha matangi mālohi fakatupu maumau ‘oku nga‘unu vave mai ki ha feitu‘u ‘oku tokolahi ai e kakaí. Koe‘uhi ‘okú ne tokanga ki he malu ‘a e kakaí, ‘okú ne toutou fakatokanga kiate kitautolu ki mu‘a ke fu‘u tōmui.

‘I ha founga meimei tatau, ko Sihova he taimí ni ‘okú ne fakatokanga ki he fa‘ahinga ‘i he māmaní fekau‘aki mo ha “matangi mālohi” ‘oku toe fakatupu maumau ange ia ‘i ha me‘a pē kuo nau fanongo nai ki ai ‘i ha fakamatala ‘ea. ‘Oku anga-fēfē ‘ene fai ení? Pea ‘e lava fēfē ke tau fakapapau‘i ‘okú ne ‘oange ki he kakaí ha taimi fe‘unga ke mateuteu ai? Ke tali iá, tau ‘uluaki lāulea angé ki he ngaahi fakatokanga ‘e ni‘ihi ‘a Sihova ‘i he kuohilí.

‘I he taimi ‘o e Tohi Tapú, na‘e fakatokanga ‘a Sihova ki ha “ngaahi matangi mālohi,” pe ngaahi ngāue fakaefakamaau, ‘a ia te ne ‘omai ki he fa‘ahinga talangata‘a ‘ilo‘ilo pau ki he‘ene fekaú. (Pal. 10:25; Sel. 30:23) ‘I he tu‘unga taki taha, na‘á ne fakatokanga tokamu‘a ki he kakai talangata‘á pea fakahinohino ke nau fai ha liliu na‘e fehoanaki mo hono finangaló. (2 Tu‘i 17:12-15; Nehe. 9:29, 30) Ke fakalototo‘a‘i ke nau liliú, na‘á ne fa‘a ngāue‘aki ‘ene kau sevāniti mateaki ‘i he māmaní ke fanongonongo ‘ene ngaahi fakamāú pea ke fai ia ‘i ha founga fakavavevave.—‘Ēm. 3:7.

Na‘e kau ‘a Noa ‘i he kau sevāniti faitōnunga ko iá. ‘I he laui ta‘u, na‘á ne fakatokanga ta‘emanavahē ki he kakai ‘ulungaanga ta‘etaau mo fakamālohi ‘i hono ‘ahó fekau‘aki mo e Lōmaki na‘e teu ke hoko. (Sēn. 6:9-13, 17) Na‘á ne toe tala ange ‘a e me‘a ne fiema‘u ke nau fai ke hao aí—ko ia ki mui ai na‘e ui ia “ko ha tokotaha malanga‘i ‘o e mā‘oni‘oní.”—2 Pita 2:5.

Neongo ‘a e feinga ‘a Noá, ko e kakai ‘i he māmani ki mu‘a he Lōmakí na‘a nau tukunoa‘i ‘a e pōpoaki faka‘otuá. Na‘a nau fakahāhā ‘a e tui vaivai. Ko e olá, na‘a nau mate ‘i he “hoko mai ‘a e Lōmakí ‘o tafi‘i kotoa atu kinautolu.” (Māt. 24:39; Hep. 11:7) ‘I he ofi ki hono faka‘auha kinautolú, na‘e ‘ikai lava ke nau pehē na‘e ‘ikai fakatokanga ange ‘a e ‘Otuá kiate kinautolu.

‘I he taimi ‘e ni‘ihi, na‘e fakatokanga ‘a Sihova ki he fa‘ahinga taautaha ki mu‘a pē ke hoko mai ‘a e “matangi mālohi” ‘ene fakamāú. Na‘a mo ia, na‘á ne fakapapau‘i ke ‘oatu ha taimi fe‘unga ki he fa‘ahinga talangata‘á ke nau liliu. Ko e fakatātaá, na‘á ne ‘oatu tokamu‘a ‘a e ngaahi fakatokanga lolotonga ‘a e Mala ‘e Hongofulu na‘e tō ki ‘Isipité. Ko e fakatātaá, na‘e fekau ‘e Sihova ‘a Mōsese mo ‘Ēlone ke fakatokanga kia Felo mo ‘ene kau sevānití fekau‘aki mo e mala hono fitú, ko ha ‘uha-‘aisi fakatupu maumau. Koe‘uhi ko e ‘uhá ‘e tō ‘i he ‘aho hono hokó, na‘e ‘oatu ‘e he ‘Otuá ha taimi fe‘unga ke nau kumi ha malu‘anga pea hao ‘i he fakatamakí? ‘Oku pehē ‘e he Tohi Tapú: “Ko ha taha pē ‘i he lotolotonga ‘o e kau sevāniti ‘a Feló na‘e manavahē ki he folofola ‘a Sihová na‘á ne fakahū fakavave ‘ene kau sevāniti ‘a‘aná mo ‘ene fanga monumanú ki he ngaahi falé, kae ‘ilonga ‘a ia na‘e ‘ikai tokanga ki he folofola ‘a Sihová na‘á ne tuku pē ‘ene kau sevānití mo ‘ene fanga monumanú ‘i he vaó.” (‘Eki. 9:18-21) ‘Oku hā mahino, na‘e ‘oatu ‘e Sihova ‘a e fakatokanga fe‘unga, ko ia ko e fa‘ahinga na‘a nau ngāue vavé na‘a nau hao mei he nunu‘a fakamamahi ‘o e mala ko iá.

Ko Felo mo ‘ene kau sevānití na‘a nau ma‘u foki ha fakatokanga ki mu‘a ‘i he mala hono hongofulú. Kae kehe, na‘a nau fakavalevale ‘o taliteke‘i ‘a e fakatokangá. (‘Eki. 4:22, 23) Ko e olá, na‘a nau sio ki he mate honau ‘uluaki fohá. He fakamamahi ē! (‘Eki. 11:4-10; 12:29) Na‘e ‘i ai ha taimi fe‘unga ke nau talangofua ki he fakatokangá? ‘Io! Na‘e fakatokanga vave ‘a Mōsese ki he kau ‘Isilelí fekau‘aki mo e mala hono hongofulu na‘e teu ke toó pea fakahinohino kinautolu ki he founga ke fakahaofi ai honau ngaahi fāmilí. (‘Eki. 12:21-28) Ko e toko fiha  na‘e fanongo ki he fakatokangá? Fakatatau ki he fakafuofua ‘e ni‘ihi, ko e toko tolu miliona, kau ai ‘a e kau ‘Isileli mo ha “fu‘u tokolahi kehe” na‘e ‘ikai ko e kau ‘Isileli pea mo e kau ‘Isipite, na‘a nau hao ‘i he fakamaau ‘a e ‘Otuá pea mavahe mei ‘Isipité.—‘Eki. 12:38; fkm. ‘i lalo.

Hangē ko e ngaahi fakatātā ko ení, na‘e fakapapau‘i ma‘u pē ‘e Sihova ke ‘i ai ha taimi fe‘unga ki he kakaí ke talangofua ki he‘ene fakatokangá. (Teu. 32:4) Ko e hā ‘okú ne ue‘i ‘a e ‘Otuá ke fai peheé? Na‘e fakamatala ‘a e ‘apositolo ko Pitá ko Sihova “‘oku ‘ikai te ne finangalo ke faka‘auha ha taha ka ‘okú ne finangalo ke a‘usia ‘e he tokotaha kotoa ‘a e fakatomalá.” (2 Pita 3:9) ‘Io, na‘e tokanga ‘a e ‘Otuá ki he kakaí. Na‘á ne loto ke nau fakatomala pea fai ha ngaahi liliu ki mu‘a ke hoko mai ‘ene fakamāú.—‘Ai. 48:17, 18; Loma 2:4.

‘I he ‘ahó ni, ko e kakaí kotoa kuo pau foki ke nau tali ki ha fakatokanga fakavavevave ‘oku talaki he taimí ni ‘i māmani lahi. ‘I he ‘i māmani ‘a Sīsuú, na‘á ne fakatokanga ko e fokotu‘utu‘u lolotongá ‘e faai atu pē ‘o faka‘auha ‘i he “fu‘u mamahi lahi.” (Māt. 24:21) ‘I he fekau‘aki mo e fakamaau ko ia ‘i he kaha‘ú, na‘á ne ‘omai ha kikite fakaikiiki fekau‘aki mo e me‘a ke ‘amanekina ‘e hono kau muimuí ‘e hoko ‘i he fakaofi mai ‘a e taimi ko iá. Na‘e fakamatala‘i ‘e Sīsū ‘a e ngaahi me‘a tefito ‘e hoko fakamāmanilahi ‘a ia ‘oku tau sio ki ai he ‘ahó ni.—Māt. 24:3-12; Luke 21:10-13.

‘I he fekau‘aki mo e kikite ko iá, ‘oku ekinaki ‘a Sihova he taimí ni ki he tokotaha kotoa ke fakamo‘ulaloa ki He‘ene tu‘unga-pule anga-‘ofá. ‘Okú ne faka‘amu ke ma‘u ‘e he kakai talangofuá ha mo‘ui lelei ange he taimí ni pehē foki ki he ngaahi tāpuaki ‘i he kaha‘ú ‘i he‘ene māmani fo‘ou mā‘oni‘oní. (2 Pita 3:13) Ke fakalototo‘a‘i ‘a e tui ki he‘ene tala‘ofá, kuo tokonaki mai ‘e Sihova ha pōpoaki fakahaofi mo‘ui—‘a e “ongoongo lelei ko ‘eni ‘o e Pule‘angá,” ‘a ia na‘e tomu‘a tala ‘e Sīsū ‘e “malanga‘i ia ‘i he kotoa ‘o e māmani kuo nofo‘í ko ha fakamo‘oni ki he ngaahi pule‘anga kotoa pē.” (Māt. 24:14) Kuo fokotu‘utu‘u maau ‘e he ‘Otuá ‘ene kau lotu mo‘oní ke nau fai ‘a e “fakamo‘oni” ko ení pe malanga‘i ‘a e pōpoaki faka‘otuá ni, ‘i he fonua ‘e 240 nai. ‘Oku loto ‘a Sihova ke talangofua ‘a e kakai tokolahi taha ‘e ala lavá ki he fakatokangá pea hao ‘i he “matangi mālohi” ‘o ‘ene fakamaau mā‘oni‘oní.—Sēf. 1:14, 15; 2:2, 3.

Ko e fehu‘i mātu‘aki mahu‘ingá leva, ‘oku ‘ikai ko e pehē pe ‘oku ‘omai ‘e Sihova ‘a e taimi fe‘unga ki he kakaí ke talangofua ki he‘ene ngaahi fakatokangá. Ko e fakamo‘oní ‘oku fakahaa‘i ai ‘okú ne fai pehē ma‘u pē. Ka ko e fehu‘i mahu‘ingá: ‘E talangofua ‘a e kakaí ki he fakatokanga ‘a e ‘Otuá lolotonga ‘ene kei faingamālié? ‘Ofa ke tau hokohoko atu ko e kau talafekau ‘a e ‘Otuá, ke tokoni‘i ‘a e tokolahi taha ‘e ala lavá ke hao ‘i he ngata‘anga ‘o e fokotu‘utu‘u ko ení.