1. ‘Oku anga-fēfē hono tokoni‘i kitautolu ‘e he 2 Kolinitō 3:1-3 ke hounga‘ia ‘i he monū ‘oku tau ma‘u ke fakahoko ha ako Tohi Tapu ‘e taki atu ki he papitaisó? (Sio ki he tā ‘i he takafí.)

‘OKU anga-fēfē ho‘o ongo‘i ‘i he taimi ‘okú ke sio ai ki he papitaiso ha ako Tohi Tapu mei ho‘o fakataha‘angá? ‘Oku ‘ikai ha veiveiua ‘oku ‘ai ai ho lotó ke fiefia. (Māt. 28:19) Pea kapau ko koe na‘á ke ako mo e ākonga fo‘oú, he fiefia ē ko koe ke sio tonu ki he papitaiso ‘a e tokotaha ko iá! (1 Tes. 2:19, 20) Ko e kau ākonga toki papitaiso fo‘oú ‘oku ‘ikai ngata pē ‘enau hoko ko e “ngaahi tohi fakaongoongolelei” ‘a e fa‘ahinga na‘e ako mo kinautolú kae pehē foki ki he fakataha‘angá kotoa.​—Lau ‘a e 2 Kolinitō 3:1-3.

2. (a) Ko e hā ‘a e fehu‘i mahu‘inga ‘oku fiema‘u ke tau fakakaukau ki aí, pea ko e hā hono ‘uhingá? (e) Ko e hā ‘a e ako Tohi Tapu? (Sio ki he fakamatala ‘i lalo.)

² ‘I he ta‘u ‘e fā kuo maliu atú, ‘oku lelei ‘aupito ke sio ki he ‘avalisi ‘o e kau ako Tohi Tapu * na‘e līpooti ‘i he māhina taki taha ‘i māmani lahí ko e toko 10,000,000. Pea ‘i he lolotonga ‘a e ngaahi ta‘u ko iá, ‘oku faka‘avalisi ko e toko 280,000 tupu na‘e papitaiso ‘i he ta‘u taki taha, ko e Kau Fakamo‘oni ‘a Sihova mo e kau ākonga fo‘ou ‘a Sīsū Kalaisi. ‘E lava fēfē ke tau tokoni‘i ha fa‘ahinga tokolahi ange ‘i he kau ako Tohi Tapu ‘e laui miliona ko iá ke nau papitaiso? ‘I he lolotonga ko ia ‘a e kei kātaki ‘a Sihova ‘o faka‘atā ‘a e taimi mo e faingamālie ki he kakaí ke nau hoko ko e kau  ākonga ‘a Kalaisi, ‘oku tau loto ke fai ‘a e kotoa ‘oku tau malavá ke tokoni‘i kinautolu ke fakalakalaka ki he papitaisó ‘i he vave taha ‘e ala lavá. Ko e taimi ‘oku toé ‘oku tātāi‘i!​—1 Kol. 7:29a; 1 Pita 4:7.

3. Ko e hā te tau lāulea ki ai ‘i he kupu ko ení fekau‘aki mo hono fakahoko ‘a e ngaahi ako Tohi Tapú?

³ Koe‘uhi ko e fiema‘u fakavavevave ko ia ke ngaohi ākongá, na‘e fai ha savea ‘i he ngaahi ‘ōfisi va‘á ke ‘ilo‘i ‘a e founga ‘e lava ke tau tokoni‘i ai ‘a e kau ako Tohi Tapu tokolahi ange ke fakalakalaka ki he papitaisó. ‘I he kupu ko ení mo e kupu hono hokó, te tau vakai ai ki he me‘a ‘e lava ke tau ako mei he kau tāimu‘a, kau misinale mo e kau ‘ovasia sēketi taukeí. * (Pal. 11:14; 15:22) ‘Oku nau fakamatala ki he me‘a ‘e lava ke fai ‘e he kau faiako Tohi Tapú mo ‘enau kau akó ke ‘ai ke lavame‘a ange ‘a e ako Tohi Tapú. ‘I he kupu ko ení, te tau lāulea ai ki he me‘a ‘e nima ‘oku fiema‘u ke fai ‘e he tokotaha ako taki taha ke fakalakalaka ai ki he papitaisó.

4. Ko e hā ‘oku totonu ke tau ‘ilo‘i fekau‘aki mo e ako Tohi Tapu ‘i he matapaá?

⁴ Ko e tokolahi hotau fanga tokouá mo e fanga tuofāfiné ‘oku nau fakahoko ‘a e ngaahi ako Tohi Tapú ‘i he matapā ‘o e tokotaha-‘apí. Neongo ko e kamata‘anga lelei eni ki hono fakatupulekina ‘a e mahu‘inga‘ia ‘i he Tohi Tapú, ko e ngaahi fetalanoa‘aki ko ení ‘oku fa‘a taimi nounou pea ‘ikai nai ke fakahoko ‘i he uike kotoa. Ke fakatupulekina ha mahu‘inga‘ia lahi ange, ‘e ‘eke nai ‘e he ni‘ihi ‘a e fika telefoni ‘a e tokotaha mahu‘inga‘iá pea tā ki ai pe ‘ave ha ki‘i pōpoaki ‘i he hili ‘a e ‘a‘ahi taki taha ke vahevahe ha fakamatala Fakatohitapu nounou. Ko e toutou fetalanoa‘aki peheé ‘e hokohoko atu ‘i ha laui māhina ‘o ‘ikai fakahoko ai ha ako Tohi Tapu ola lelei. ‘E fakalakalaka mo‘oni ha tokotaha ako ki he fakatapuí mo e papitaisó kapau ko e kotoa pē ia ‘o e taimi mo e feinga ‘okú ne lī‘oa ki hono ako ‘a e Folofola ‘a e ‘Otuá? Mahalo pē ‘ikai.

5. Fakatatau ki he Luke 14:27-33, ko e hā na‘e fakamamafa‘i ‘e Sīsū ‘a ia ‘e lava ke ne tokoni‘i kitautolu ‘i he‘etau ngāue ngaohi ākongá?

⁵ ‘I he taimi ‘e taha, na‘e fai ‘e Sīsū ha talanoa fakatātā fekau‘aki mo e me‘a ke fai ‘e ha taha ke hoko ai ko ha‘ane ākonga. Na‘á ne talanoa fekau‘aki mo ha taha na‘á ne loto ke langa ha taua pea mo ha tu‘i na‘á ne loto ke laka atu ‘i he taú. Na‘e pehē ‘e Sīsū ko e tokotaha langá kuo pau ke ne tomu‘a “tangutu hifo ‘o fika‘i ‘a e fakamolé” ke fakakakato ‘a e tauá pea ko e tu‘í kuo pau ke ne tomu‘a “nofo hifo ‘o alea‘i” pe ‘e lava koā ‘e he‘ene kau taú ‘o fakakakato ‘enau taumu‘á. (Lau ‘a e Luke 14:27-33.) ‘I he tu‘unga meimei tatau, na‘e ‘ilo‘i ‘e Sīsū ko ha tokotaha ‘okú ne loto ke hoko ko ‘ene ākonga ‘oku totonu ke ne  sivisivi‘i fakalelei ‘a e ‘uhinga ‘o e muimui kiate iá. ‘I he ‘uhinga ko iá, ‘oku fiema‘u ke tau fakalototo‘a‘i ‘a e fa‘ahinga ‘oku hā ngali te nau hoko ko ha ākongá ke ako mo kitautolu ‘i he uike taki taha. ‘E lava fēfē ke tau fai ia?

6. Ko e hā nai te tau feinga ke fai ke fakalakalaka ai ‘a e ngaahi akó?

⁶ Kamata‘aki hono fakalōloa ‘a e taimi ako ‘i he matapaá. Mahalo ‘e lava ke ke lāulea ki ha toe poini mei he Tohi Tapú ‘i ho‘o ‘a‘ahi taki taha. ‘I he alāanga pē ‘a e tokotaha-‘apí ki he lōloa ange ‘a e ‘a‘ahí, kole ange pe ‘oku ‘i ai ha feitu‘u ‘e lava ke mo tangutu fakataha ai ‘o hoko atu ‘a e fetalanoa‘akí. Ko e tali ‘a e tokotaha-‘apí ‘e fakahaa‘i ai pe ‘okú ne mahu‘inga‘ia mo‘oni ‘i he ako Tohi Tapú. Faai atu pē, ke ‘ai ke vave ange ‘ene fakalakalaká, te ke ‘eke ange nai ki he tokotaha akó pe te ne loto-lelei ke ako tu‘o ua he uike. Neongo ia, ‘oku fiema‘u ‘a e me‘a lahi ‘i he ako tu‘o taha pe tu‘o ua he uiké.

7. ‘E lava fēfē ke teuteu lelei ‘a e faiakó ki he ako Tohi Tapu taki taha?

⁷ ‘I he tu‘unga ko e faiakó, ‘oku fiema‘u ke ke teuteu lelei ki he ako Tohi Tapu taki taha. ‘E lava ke ke kamata ‘aki hono lau ‘a e fakamatalá pea sio ki he ngaahi konga Tohi Tapú. Feinga ke mahino‘i lelei ‘a e ngaahi poini tefitó. Fakakaukau ki he kaveinga ‘o e lēsoní, ngaahi kaveinga tokoní, ngaahi fehu‘i ‘i he akó, ko e ngaahi konga Tohi Tapu ke “lau,” ko e fakatātaá pea mo ha vitiō pē ‘e tokoni nai ki hono fakamatala‘i ‘a e kaveingá. Pea ‘i ho‘o fakakaukau ki ho‘o tokotaha akó, fakalaulauloto ki he anga ha‘o fakahaa‘i ‘a e fakamatalá ‘i ha founga faingofua mo mā‘ala‘ala ‘a ia ‘e mahinongofua ki ho‘o tokotaha akó peá ne ngāue‘aki ia.​—Nehe. 8:8; Pal. 15:28a.

8. Ko e hā ‘oku ako‘i mai ‘e he ngaahi lea ‘a e ‘apositolo ko Paulá ‘i he Kolose 1:9, 10 fekau‘aki mo ‘etau lotu ma‘a ‘etau kau ako Tohi Tapú?

⁸ Ko e konga ho‘o teuteú ko e lotu kia Sihova fekau‘aki mo e tokotaha akó pea mo ‘ene fiema‘ú. Kole kia Sihova ke ne tokoni‘i koe ke faiako mei he Tohi Tapú ‘i ha founga ‘e a‘u ai ki he loto ‘o e tokotahá. (Lau ‘a e Kolose 1:9, 10.) Feinga ke tomu‘a fakakaukau ki ha me‘a nai ‘e faingata‘a ke mahino‘i pe tali ‘e he tokotaha akó. Manatu‘i ko ho‘o taumu‘á ke tokoni‘i ia ke fakalakalaka atu ki he papitaisó.

9. ‘E lava fēfē ke tokoni‘i ‘e he faiakó ‘a e tokotaha akó ke teuteu ki he‘ene akó? Fakamatala‘i.

⁹ Fakafou ‘i he ako Tohi Tapu tu‘uma‘u ‘a e tokotaha akó ‘oku tau ‘amanaki te ne hounga‘ia ‘i he me‘a kuo fai ‘e Sihova mo Sīsuú pea loto ke ako lahi ange. (Māt. 5:3, 6) Ke ma‘u ‘aonga kakato mei he akó, ko e tokotaha akó ‘oku fiema‘u  ke ne tokangataha ki he me‘a ‘okú ne akó. Ke a‘usia ení, fakamatala‘i kiate ia ‘a e mahu‘inga ke ne teuteu ki he ako taki taha ‘aki hono lau ‘a e lēsoní ki mu‘a pea fakakaukauloto ki he kaunga ‘a e fakamatalá kiate iá. ‘E lava fēfē ke tokoni ‘a e faiakó? Teuteu ha lēsoni fakataha mo e tokotaha akó ke fakahaa‘i kiate ia ‘a e founga ke fai ai ení. * Fakamatala‘i ange ‘a e founga ke ma‘u ai ‘a e tali hangatonu ki he fehu‘í, pea fakahaa‘i ange ‘a e tokoni hono faka‘ilonga‘i ‘a e fo‘i lea pe kupu‘i lea tefitó ke ne manatu‘i ‘a e talí. Kole ange leva ke ne fai ‘a e talí ‘i he lea pē ‘a‘ana. ‘I he‘ene fai peheé, ‘e malava ai ke ke fakapapau‘i pe ‘okú ne mahino‘i lelei ‘a e fakamatalá. Ka ‘oku ‘i ai ‘a e me‘a ‘e taha ‘e lava ke ke fakalototo‘a‘i ho‘o tokotaha akó ke ne fai.

10. Ko e hā ‘oku mahu‘inga ai ke lau faka‘aho ‘a e Tohi Tapú, pea ko e hā ‘oku fiema‘u ke fai ke ma‘u ‘aonga kakato ai mei he lau Tohi Tapú?

¹⁰ Tānaki atu ki he ako ‘i he uike kotoa mo e faiakó, ko e tokotaha akó te ne ma‘u ‘aonga mei hono fai ‘i he ‘aho taki taha ‘a e ngaahi me‘a ‘e ni‘ihi ‘iate ia pē. ‘Oku fiema‘u ke ne fetu‘utaki mo Sihova. Anga-fēfē? ‘Aki ‘a e fanongo pea talanoa kia Sihova. ‘E lava ke ne fanongo ki he ‘Otuá ‘aki hono lau faka‘aho ‘a e Tohi Tapú. (Sios. 1:8; Saame 1:1-3) Fakahaa‘i ange ‘a e founga ke ngāue‘aki ai ‘a e “Taimi-Tēpile Lau Tohi Tapu” ‘oku hā ‘i he jw.org. * Ko e mo‘oni, ke tokoni‘i ia ke ma‘u ‘aonga kakato mei he‘ene lau Tohi Tapú, fakalototo‘a‘i ia ke fakalaulauloto ki he me‘a ‘oku ako‘i ‘e he Tohi Tapú fekau‘aki mo Sihová pea mo e founga ‘e lava ke ne ngāue‘aki ai ‘a e me‘a ‘okú ne akó ‘i he‘ene mo‘uí tonu.​—Ngā. 17:11; Sēm. 1:25.

11. ‘E lava fēfē ke ako ha tokotaha ako ki he founga totonu ke lotu aí, pea ko e hā ‘oku mahu‘inga ai kiate ia ke lotu ma‘u pē kia Sihová?

¹¹ Fakalototo‘a‘i ho‘o tokotaha akó ke talanoa kia Sihova ‘aki ‘a e lotu ‘i he ‘aho taki taha. Fai ‘a e ngaahi lotu loto-mo‘oni ‘i he kamata‘anga mo e ngata‘anga ‘o e ako taki taha, pea lave ki ho‘o tokotaha akó ‘i he ngaahi lotu ko iá. ‘I he‘ene fanongo ki ho‘o ngaahi lotú, te ne ako ai ki he founga ke lotu ai mei hono lotó pea fai loto-mo‘oni ‘ene ngaahi lotú kia Sihova ko e ‘Otuá fakafou ‘i he huafa ‘o Sīsū Kalaisí. (Māt. 6:9; Sione 15:16) Sioloto atu ki he anga hono tokoni‘i ‘e he lau faka‘aho ‘o e Tohi Tapú (fanongo kia Sihova) pea mo e lotú (talanoa kia Sihova) ‘a ho‘o tokotaha akó ke ‘unu‘unu ofi ange ki he ‘Otuá! (Sēm. 4:8) Kapau ‘e fai ia ‘e he tokotaha akó ‘i he ‘aho kotoa, ‘e tokoni‘i ai ia ke fakalakalaka atu ki he fakatapuí mo e papitaisó. Ko e hā ha toe me‘a te ne tokoni‘i ia?

12. ‘E lava fēfē ke tokoni‘i ‘e ha faiako ha tokotaha ako ke fakatupulekina ha vaha‘angatae mo Sihova?

¹² Ko e me‘a ‘oku ako ‘e ha tokotaha ‘i ha ako Tohi Tapu ‘oku totonu ke ‘ikai ngata pē ‘ene fakamānako ki hono ‘atamaí kae pehē foki ki hono lotó. Ko e hā hono ‘uhingá? Ko hotau lotó​—‘oku kau ai ‘etau ngaahi holí, ongo‘í mo e fakaue‘ilotó​—‘okú ne ue‘i kitautolu ke fai ha ngāue. Na‘e ngāue‘aki ‘e Sīsū ‘a e ngaahi faka‘uhinga totonu na‘e fakamānako ki he ‘atamaí. Ka na‘e muimui ‘a e kakaí ‘iate ia koe‘uhí na‘á ne toe ue‘i honau lotó. (Luke 24:15, 27, 32) Ko ho‘o tokotaha akó ‘oku fiema‘u ke ne vakai kia Sihova ko ha Tokotaha mo‘oni, ko ha tokotaha ‘e lava ke ne fakatupulekina ha vaha‘angatae mo ia, pea vakai kiate Ia ko ‘ene Tamai, ko hono ‘Otua mo hono Kaume‘a. (Saame 25:4, 5) Lolotonga ‘a e ako Tohi Tapú, tohoaki‘i ‘a e tokangá ki he ‘ulungaanga ‘o e ‘Otuá. (‘Eki. 34:5, 6; 1 Pita 5:6, 7) Tatau ai pē pe ko e hā ‘a e kaveinga ‘okú ke lāulea ki aí, fakamamafa‘i pe ko e fa‘ahinga Tokotaha fēfē ‘a Sihova. Tokoni‘i ‘a e tokotaha akó ke hounga‘ia ‘i he ngaahi ‘ulungaanga faka‘ofo‘ofa ‘o Sihová​—‘ene ‘ofá, anga-leleí mo e manava‘ofá. Na‘e pehē ‘e Sīsū ko e “fekau lahi tahá mo mu‘omu‘á” ko e “‘ofa kia Sihova ko ho ‘Otuá.” (Māt. 22:37, 38) Feinga ke tokoni‘i ho‘o tokotaha akó ke ‘ofa lahi ki he ‘Otuá mei he lotó.

13. ‘Omai ha fakatātā ‘o e founga ke tokoni‘i ha tokotaha ako ke ako fekau‘aki mo e ‘ulungaanga ‘o Sihová.

¹³ ‘I ho‘o fetalanoa‘aki mo ho‘o tokotaha akó, fakahaa‘i kiate ia ho‘o ngaahi ongo‘i loloto fekau‘aki mo Sihová. ‘E tokoni nai eni ki ho‘o tokotaha akó ke ne ‘ilo‘i ‘a e fiema‘u ke ne fakatupulekina ha vaha‘angatae fakafo‘ituitui māfana mo e ‘Otuá. (Saame 73:28) Ko e fakatātaá, ‘oku ‘i ai ha kupu‘i lea ‘i he tohi akó pe ‘i ha konga Tohi Tapu ‘oku fakahaa‘i ai ha me‘a fekau‘aki mo Sihova​—ko ‘ene ‘ofa, poto, fakamaau totonu pe mālohi​—‘oku maongo ki ho lotó? Tala ange ia ki ho‘o tokotaha akó pea ‘ai ke ne ‘ilo‘i ko e taha eni ‘i he ngaahi ‘uhinga lahi ‘okú ke ‘ofa ai ‘i he‘etau Tamai fakahēvaní. ‘Oku toe ‘i ai mo e me‘a ‘e taha ‘oku fiema‘u ke fai ‘e he tokotaha ako Tohi Tapu kotoa koe‘uhi ke fakalakalaka ai ki he papitaisó.

14. Ko e hā ‘oku tala mai ‘e he Hepelū 10:24, 25 fekau‘aki mo e anga hono tokoni‘i ‘e he ngaahi fakataha ‘a e fakataha‘angá ha tokotaha ako Tohi Tapu ke fakalakalaka?

¹⁴ Ko kitautolu kotoa ‘oku tau loto ke fakalakalaka ‘etau kau akó ki he papitaisó. Ko e founga mahu‘inga ‘e taha ‘e lava ke tau tokoni‘i ai kinautolú ko hono fakalototo‘a‘i kinautolu ke ma‘u ‘a e ngaahi fakataha ‘a e fakataha‘angá. ‘Oku pehē ‘e he kau faiako taukeí ko e kau ako ‘oku nau ma‘u ‘a e ngaahi fakatahá ‘oku vave taha ‘enau fakalakalaká. (Saame 111:1)  ‘Oku fakamatala‘i ‘e he kau faiako ‘e ni‘ihi ki he‘enau kau akó te nau ako ‘a e konga pē ‘i he‘enau ako Tohi Tapú pea ko e toengá mei he ngaahi fakatahá. Lau ‘a e Hepelū 10:24, 25 mo ho‘o tokotaha akó pea fakamatala‘i kiate ia ‘a e ‘aonga te ne ma‘u kapau ‘e ha‘u ki he ngaahi fakatahá. Hulu‘i kiate ia ‘a e vitiō Ko e Hā ‘Oku Fai ‘i ha Fale Fakataha‘anga? * Tokoni‘i ho‘o tokotaha akó ke hoko ‘a hono ma‘u ‘a e fakataha fakauiké ko ha konga mahu‘inga ‘ene mo‘uí.

15. Ko e hā ‘e lava ke tau fai ke fakalototo‘a‘i ha tokotaha ako ke ma‘u ma‘u pē ‘a e ngaahi fakatahá?

¹⁵ Ko e hā ‘e lava ke ke fai kapau ‘oku te‘eki ai ke ma‘u ‘e ho‘o tokotaha akó ha fakataha pe ‘oku ‘ikai ke ne ma‘u ma‘u pē ia? Vahevahe loto-vēkeveke ange ‘a e me‘a na‘á ke ako mei ha fakataha ki muí ni mai. ‘Oku fakaue‘iloto ange ia ‘i hono fakaafe‘i pē ‘a e tokotaha akó ke ma‘u ‘a e fakatahá. ‘Oange kiate ia ‘a e Taua Le‘o pe Polokalama Ngāue ki he Fakataha Mo‘uí mo e Ngāue Fakafaifekaú ‘a ia ‘oku fai ai ‘a e ako ‘i he fakatahá. Fakahaa‘i ange ‘a e me‘a ‘e fai ki ai ‘a e lāulea ‘i he fakataha hokó, pea ‘eke ange pe ko fē ‘a e konga ‘oku fakamānako taha kiate iá. Ko e me‘a ‘oku hokosia ‘e ho‘o tokotaha akó ‘i he‘ene fuofua ma‘u fakatahá ‘e laka mama‘o ange ia ‘i ha me‘a pē na‘á ne hokosia ‘i ha fakatahataha fakalotu kehe. (1 Kol. 14:24, 25) Te ne fetaulaki mo e ni‘ihi kehe ‘a ia ‘e lava ke ne fa‘ifa‘itaki ki he‘enau fa‘ifa‘itaki‘anga leleí pea te nau tokoni kiate ia ke fakalakalaka ki he papitaisó.

16. ‘E lava fēfē ke tau fakahoko ‘a e ngaahi ako Tohi Tapu ‘e taki atu ki he papitaisó, pea ko e hā te tau ako ‘i he kupu hono hokó?

¹⁶ ‘E lava fēfē ke tau fakahoko ‘a e ngaahi ako Tohi Tapu ‘e taki atu ki he papitaisó? ‘E lava ke tau tokoni‘i ‘a e tokotaha ako taki taha ke mahu‘inga‘ia mo‘oni ‘i he akó ‘aki hono fakalototo‘a‘i ia ke ako ‘i he uike kotoa pea teuteu ki he ako taki taha. ‘Oku tau toe loto ke fakalototo‘a‘i ia ke fetu‘utaki mo Sihova ‘i he ‘aho kotoa pea fakatupulekina ha vaha‘angatae fakafo‘ituitui mo Ia. ‘Oku tau loto ke ue‘i ‘a e tokotaha akó ke ma‘u ‘a e ngaahi fakataha ‘a e fakataha‘angá. (Sio ki he puha “ Me‘a ‘Oku Fiema‘u ke Fai ‘e he Kau Akó ke Fakalakalaka ki he Papitaisó.”) Neongo ia, hangē ko ia ‘e fakamatala‘i ‘i he kupu hono hokó, ‘oku ‘i ai ha toe me‘a ‘e nima ‘e lava ke fai ‘e he kau faiako Tohi Tapú ke taki atu ai ‘a e kau akó ki he papitaisó.