Ke fakahoko ʻa e ngāue fakamalangá, naʻe fiemaʻu ki he Kau Ako Tohi Tapú ke nau taʻemanavahē. ʻE fiemaʻu ke nau fanongonongo ʻa e “ongoongo leleí” ki he kau anga vaivaí pehē foki ki he “ʻaho ʻo e sāuní” ki he fulikivanú.

Ko Tokoua J. H. Hoskin, naʻá ne nofo ʻi Kānata, naʻá ne faifakamoʻoni taʻemanavahē neongo ʻa e fakafepakí. ʻI he faʻahitaʻu failau ʻo e 1921, naʻá ne fetaulaki mo ha faifekau Metotisi. Naʻe kamata ʻe Tokoua Hoskin ʻa e fetalanoaʻakí ʻaki ʻene pehē: “ʻOku totonu ke ta talanoa felotoi ʻi he Folofolá, pea kapau heʻikai ke ta loto-tatau ki ha meʻa, ʻe lava ke ta fakangata ʻeta talanoá ʻi he melino peá ta kei kaungāmeʻa pē.” Ka naʻe ʻikai ke hoko ia. Naʻe pehē ʻe Tokoua Hoskin: “Naʻá ma talanoa ʻi ha miniti siʻi pē pea naʻe tukiʻi [ʻe he faifekaú] ʻa e matapaá ʻo u pehē ʻe moefe ai pē hono laʻi sioʻatá ki he falikí.”

“Ko e hā ʻoku ʻikai ke mou ʻalu ai ʻo talanoa ki he kau hītení?” ko e kaila ia ʻa e faifekaú. Naʻe fakalongolongo pē ʻa Tokoua Hoskin, ka ʻi heʻene mavahé, naʻá ne pehē loto pē, ‘Ko u ongoʻi ne u talanoa ki he taha ʻo kinautolu!’

ʻI he malanga ʻa e faifekaú ʻi he ʻaho hokó, naʻe hoko atu ʻene fakafilí. “Naʻá ne fakatokanga ki heʻene tākangá fekauʻaki mo au, ʻo tala ki he kakaí ko e tokotaha loi lahi taha au kuo haʻu ki he koló pea naʻe totonu ke fanaʻi au,” ko e manatu ia ʻa Tokoua Hoskin. ʻI he ʻikai taʻofi ia ʻi he meʻá ni, naʻe hokohoko atu ʻene malangá pea naʻe ola lelei. Naʻá ne pehē: “Naʻá ku fiefia lahi ʻi he malanga ʻi aí. Naʻe aʻu ʻo pehē ʻe he kakai ʻe niʻihi, ‘ʻOku mau ʻiloʻi ko e tangata koe ʻa e ʻOtuá!’ pea nau tala mai te nau ʻomai ha meʻa pē ʻoku ou fiemaʻu.”

Ke tokoniʻi ʻa e faʻahinga mahuʻingaʻiá ke fakalakalaká, ko e Kau Ako Tohi Tapú naʻa nau pulusi ʻa e polokalama ako Tohi Tapu ʻi he The Golden Age. * Naʻe ʻi ai ʻa e ngaahi fehuʻi Fakatohitapu ki he fānaú ke lāulea ki ai mo e ngaahi mātuʻá. Ko e ngaahi mātuʻá “naʻa nau ʻoatu ʻa e ngaahi fehuʻi ko ení ki heʻenau fānaú pea tokoniʻi kinautolu ke kumi ʻa e talí ʻi he Tohi Tapú.” Ko e niʻihi ʻo e ngaahi fehuʻí, hangē ko e “Ko e tohi ʻe fiha ʻi he Tohi Tapú?,” naʻe akoʻi ai ʻa e ngaahi moʻoni tefito. Ko e niʻihi, hangē ko e “ʻOku totonu  ke ʻamanekina ʻe he Kalisitiane moʻoni kotoa pē ʻa e fakatangá ʻi ha faʻahinga founga?,” naʻe teuʻi ai ʻa e fānaú ke nau malanga taʻemanavahē.

Naʻe toe ʻi ai mo e polokalama ko e ngaahi fehuʻi Fakatohitapu mo e tali ki he Kau Ako Tohi Tapu naʻa nau ʻosi ʻilo lahi ange ki he Tohi Tapú. Ko e talí naʻe maʻu ia ʻi he ʻuluaki voliume ʻo e Studies in the Scriptures. Naʻe maʻu ʻaonga ʻa e kau lautohi ʻe laui afe mei he ongo polokalama ko ení, ka ʻi he The Golden Age ʻo Tīsema 21, 1921, naʻe fanongonongo ai ʻe ʻikai ke toe hoko atu ʻa e ongo polokalamá ni. Ko e hā naʻe fai ai ʻa e liliu fakafokifā ko iá?

Naʻe ʻiloʻi ʻe he faʻahinga naʻe takimuʻá ko e kau ako Tohi Tapu foʻoú naʻe fiemaʻu ke nau ako ʻa e ngaahi moʻoni tefitó ʻi ha founga maau. Ke aʻusia iá, ko e tohi The Harp of God naʻe tuku ange ʻi Nōvema 1921. Ko e faʻahinga mahuʻingaʻia naʻa nau tali ʻa e tohí naʻa nau kau foki ʻi he ako ʻi he The Harp. Ko e ako ko ení naʻa nau fai pē ʻe kinautolu naʻe tokoniʻi ai ke nau ʻiloʻi ʻa e “fokotuʻutuʻu ʻa e ʻOtuá ke tāpuakiʻi ʻa e faʻahinga ʻo e tangatá ʻaki ʻa e moʻui taʻengatá.” Naʻe fakahoko fēfē ʻa e ako ko ení?

ʻI he tali ʻe ha taha ha tatau ʻo e tohí, naʻá ne maʻu ha kiʻi kaati ʻo hā ai ʻa e ngaahi peesi ke ne laú. ʻI he uike hokó, naʻá ne maʻu ha kaati mo ha ngaahi fehuʻi ʻo fakatefito ʻi he meʻa naʻá ne laú. ʻI he ngataʻanga ʻo e kātí naʻe ʻasi ai ʻa e ngaahi peesi ke ne lau ki he uike hokó.

ʻI he uike taki taha ʻo aʻu ki he uike 12, naʻe maʻu ʻe he tokotaha akó ha kaati foʻou naʻe meili atu mei he kalasi fakalotofonuá pe fakatahaʻangá. Ko e kātí naʻe faʻa ʻoatu ia mei he faʻahinga taʻumotuʻa ʻi he fakatahaʻangá pe fakangatangata honau tuʻungá. Ko e fakatātaá, ko Anna K. Gardner, mei Millvale, Pennsylvania, ʻAmelika, naʻá ne pehē: “ʻI hono tuku ange mai ʻo e The Harp of God, ko Thayle, ko ha tuofefine faingataʻaʻia, naʻá ne maʻu ʻa e ngāue lahi ange ke fai, ʻa ia ko hono ʻoatu ʻa e ngaahi kaati mo e fehuʻi fakauiké.” ʻI he kakato ʻa e akó, naʻe ʻaʻahi ha tokotaha ki he tokotaha akó ke toe fakalahi ʻene ako Tohi Tapú.

ʻI he ngataʻanga ʻo e taʻú, naʻe lī atu ʻe Tokoua J. F. Rutherford ha tohi ki he kalasí kotoa. Naʻá ne pehē “ko e faifakamoʻoni ki he Puleʻangá ʻi he taʻu ko ení kuo lahi ange pea ola lelei ange ʻi ha vahaʻa taimi utu-taʻu pē.” Peá ne tānaki atu: “ʻOku lahi ʻa e ngāue ʻoku toe ke fakahokó. Fakalototoʻaʻi ʻa e niʻihi kehé ke kau ʻi he ngāue faitāpuekina ko ení.” ʻOku hā mahino naʻe muimui ʻa e Kau Ako Tohi Tapú ki he faleʻi ko ení. Ko e taʻu 1922 naʻa nau tuʻuaki taʻemanavahē ʻa e Puleʻangá ʻi ha founga makehe atu.