1. Ko e hā ʻetau “fiemaʻu fakalaumālié,” pea ʻoku anga-fēfē ʻene kaunga ki he fiefiá?

 KO E fiefia moʻoní ʻoku ʻikai ko ha foʻi ongoʻi māfana pē ʻoku tau maʻu pea mole atu. ʻE lava ke tolonga ia ʻi he kotoa ʻo e moʻui ʻa ha taha. ʻO anga-fēfē? Naʻe fakamatalaʻi ʻe Sīsū ʻi heʻene Malanga ʻi he Moʻungá: “Fiefia ē ko kinautolu ʻoku nau lāuʻilo ki heʻenau fiemaʻu fakalaumālié.” (Māt. 5:3) Naʻe ʻiloʻi ʻe Sīsū ko e faʻahinga ʻo e tangatá kuo ngaohi kinautolu mo ha holi mālohi ke ʻiloʻi mo lotu ki honau Tokotaha-Fakatupú, ʻa Sihova ko e ʻOtuá. Ko ʻetau “fiemaʻu fakalaumālié” ia. Pea koeʻuhi ko Sihova ʻa e “ʻOtua fiefiá,” ko e faʻahinga ʻoku nau lotu kiate iá ʻe lava foki ke nau fiefia.​—1 Tīm. 1:11.

2-3. (a) Fakatatau kia Sīsū, ko hai ʻe toe lava ke hoko ʻo fiefiá? (e) Ko e hā te tau lāulea ki ai ʻi he kupu ko ení, pea ko e hā ʻoku fiemaʻu ai ení?

² ʻOku tau fiemaʻu ke ʻi ha tuʻunga lelei ʻetau moʻuí ka tau toki fiefia? ʻIkai. ʻI he malanga ʻa Sīsuú, naʻá ne leaʻaki ha meʻa fakaʻohovale. “Ko kinautolu ʻoku mamahí”​—koeʻuhi ko hono lōmekina ʻe heʻenau angahalá pe koeʻuhi ko ʻenau hokosia ha ngaahi tuʻunga fakamamahi ʻi he moʻuí​—ʻe lava ke nau fiefia. Naʻe leaʻaki ʻe Sīsū ʻa e meʻa tatau fekauʻaki mo e faʻahinga “kuo fakatangaʻi koeʻuhi ko e māʻoniʻoní” pe ko e faʻahinga ʻoku “lumaʻi” koeʻuhi ko ʻenau hoko ko ha muimui ʻo Kalaisí. (Māt. 5:4, 10, 11) Ka ʻoku malava fēfē ke hoko ʻo fiefia moʻoni ʻi ha ngaahi tuʻunga pehē?

³ Naʻe akoʻi mai ʻe Sīsū ko e fiefiá ʻoku haʻu ia ʻo ʻikai mei hono maʻu ha ngaahi tuʻunga lelei ʻi heʻetau moʻuí, ka mei hono fakalato ʻetau fiemaʻu fakalaumālié pea ʻunuʻunu ofi ki he ʻOtuá. (Sēm.  4:8) ʻE lava fēfē ke tau fai ia? ʻI he kupu ko ení, te tau lāulea ai ki he sitepu tefito ʻe tolu ʻe taki atu ki he fiefia moʻoní.

4. Ko e hā ʻa e ʻuluaki sitepu ki hono maʻu ʻo e fiefia moʻoní? (Saame 1:1-3)

⁴ SITEPU 1: Ke hoko ʻo fiefia moʻoní, kuo pau ke tau fafangaʻi fakalaumālie kitautolu. Ko e tangatá mo e fanga manú ʻoku nau fiemaʻu ʻa e meʻakai fakamatelie ke nau moʻui. Ka ko e tangatá pē ʻe lava ke nau fafanga kinautolu ʻaki ʻa e meʻakai fakalaumālié. Pea ʻoku tau fiemaʻu ia. Ko e ʻuhinga ia naʻe pehē ai ʻe Sīsū: “Kuo pau ke moʻui ʻa e tangatá, ʻo ʻikai ʻi he maá pē, ka ʻi he folofola kotoa pē ʻoku haʻu mei he fofonga ʻo Sihová.” (Māt. 4:4) Ko ia ai, ʻoku totonu ke ʻoua ʻe ʻosi atu ha ʻaho ʻoku teʻeki ke tau fafanga ʻaki kitautolu ʻa e meʻakai fakalaumālie mei he Folofola mahuʻinga ʻa e ʻOtuá, ʻa e Tohi Tapú. Naʻe fakahaaʻi ʻe he tokotaha-tohi-sāmé: ‘Fiefia ē ka ko e tangata ko ʻene fiefiá ʻoku ʻi he lao ʻa Sihová, pea ʻokú ne lau ia ʻi he ʻaho mo e pō.’​—Lau ʻa e Saame 1:1-3.

5-6. (a) Ko e hā ʻe lava ke tau ako mei he Tohi Tapú? (e) ʻI he ngaahi founga fē ʻe lava ke tokoniʻi ai kitautolu ʻi hono lau ʻa e Tohi Tapú?

⁵ ʻI he Tohi Tapú, kuo ʻomai anga-ʻofa ai ʻe Sihova ʻa e fakamatala mātuʻaki mahuʻinga ki he founga ke tau maʻu ai ha moʻui fiefiá. ʻOku tau ako ai ki heʻene taumuʻa ki heʻetau moʻuí. ʻOku tau ako ai ki he founga ʻe lava ke tau ʻunuʻunu ofi ai kiate ia pea mo e meʻa ke tau fai ke fakamolemoleʻi ai ʻetau angahalá. Pea ʻoku tau ako fekauʻaki mo e ʻamanaki fakaofo ʻokú ne talaʻofa mai ki he kahaʻú. (Sel. 29:11) Ko e ngaahi moʻoni ko eni ʻoku tau maʻu mei hono ako ʻa e Tohi Tapú ʻokú ne fakafonu hotau lotó ʻaki ʻa e fiefia!

⁶ Hangē ko ia ʻoku tau ʻiloʻí, ko e Tohi Tapú  ʻoku fonu foki ʻi he faleʻi ʻaonga ki he moʻui fakaʻahó. ʻI he taimi ʻoku tau muimui ai ki he faleʻi ko iá, ʻe lava ke tau maʻu ai ʻa e fiefiá. ʻI he taimi pē ʻokú ke ongoʻi loto-siʻi ai ʻi he ngaahi palopalema ʻi he moʻuí, fakamoleki ha taimi lahi ange ke lau ʻa e Folofola ʻa Sihová pea fakalaulauloto ki ai. Naʻe pehē ʻe Sīsū: “He fiefia ē ko e faʻahinga ʻoku fanongo ki he folofola ʻa e ʻOtuá pea tauhi iá!”​—Luke 11:28.

7. ʻE lava fēfē ke ke maʻu ʻa e ʻaonga lahi tahá mei hoʻo fakamoleki ʻa e taimi ke lau ʻa e Folofola ʻa e ʻOtuá?

⁷ ʻI hoʻo lau ʻa e Folofola ʻa e ʻOtuá, vaheʻi ʻa e taimi ke ke ʻahiʻahiʻi ke ʻiloʻi ʻa e meʻa ʻokú ke laú. Ke fakatātaaʻí, kuó ke hokosia ʻa e meʻá ni? ʻOku ngaohi ʻe ha taha hoʻo meʻakai manakó. Ka koeʻuhí ʻokú ke fuʻu fakavavevave pe ʻoku moʻua hoʻo fakakaukaú ʻi ha meʻa, ʻokú ke folo fakavave pē ʻa e meʻakaí ʻo ʻikai ke ʻahiʻahiʻi fakalelei ia. Hili hoʻo kaí, ʻokú ke toki fakatokangaʻi hake naʻe fuʻu vave hoʻo kaí peá ke fakaʻamu naʻá ke maʻu māmālie ia ke ke maʻu hono ifó. Kuó ke lau fakavave ʻa e Tohi Tapú ʻo ʻikai ai ke ke ʻahiʻahiʻi ke ʻiloʻi ʻa ʻene pōpoakí? Vaheʻi ʻa e taimi ke fiefia ʻi hono lau ʻa e Folofola ʻa e ʻOtuá; sioloto atu ki he meʻa ʻoku hokó, feinga ke fanongo ki he ngaahi leʻo kehekehe ʻoku kau aí, pea fakakaukau fekauʻaki mo e meʻa ʻokú ke laú. Ko hoʻo fai ʻa e ngaahi meʻa ko ení ʻe fakalahi ai hoʻo fiefiá.

8. ʻOku anga-fēfē hono fakahoko ʻe he “tamaioʻeiki anga-tonu mo potó” hono ngafá? (Sio foki ki he fakamatala ʻi laló.)

⁸ Naʻe fakanofo ʻe Sīsū ʻa e “tamaioʻeiki anga-tonu mo potó” ke tokonaki mai ʻa e meʻakai fakalaumālie ʻi he taimi totonu, pea ʻoku mātuʻaki fafangaʻi lelei fakalaumālie kitautolu. * (Māt. 24:45) Ko e Folofola fakamānavaʻí ʻoku makatuʻunga tefito ai ʻa e meʻa kotoa ʻoku tokonaki mai ʻe he tamaioʻeiki anga-tonú. (1 Tes. 2:13) Ko e meʻakai fakalaumālie ko iá ʻokú ne tokoniʻi kitautolu ke ʻiloʻi ʻa e fakakaukau ʻa Sihová hangē ko ia ʻoku fakahaaʻi mai ʻi he Tohi Tapú. Ko e ʻuhinga eni ʻoku tau lau ai ʻa e Taua Leʻo mo e ʻĀ Hake! pea mo e ngaahi kupu ʻi he jw.org. ʻOku tau teuteu ki he ngaahi fakataha ki he lolotonga e uiké mo e fakaʻosinga uiké. Pea ʻoku tau sio ʻi he polokalama fakamāhina ʻi he JW Broadcasting^® kapau ʻoku ala maʻu. Ko hono fafangaʻi kitautolu ʻaki ʻa e meʻakai fakalaumālie feʻungá ʻe tokoniʻi ai kitautolu ke tau fou ʻi he sitepu hono ua ʻoku taki atu ki he fiefia moʻoní.

9. Ko e hā ʻa e sitepu hono ua ʻoku taki atu ki he fiefia moʻoní?

⁹ SITEPU 2: Ke hoko ʻo fiefia moʻoní, ʻoku fiemaʻu ke tau moʻuiʻaki ʻa e ngaahi tuʻunga ʻa Sihová. Naʻe tohi ʻe he tokotaha-tohi-sāmé: “Fiefia ē ko e tokotaha kotoa pē ʻoku manavahē kia Sihová, ʻa ia ʻoku ʻaʻeva ʻi Hono ngaahi ʻalungá.” (Saame 128:1) Ke manavahē kia Sihová ʻoku ʻuhinga iá ʻoku tau fakaʻapaʻapa lahi kiate ia ʻo tau fakaʻehiʻehi ai mei hono fai ha meʻa ʻoku taʻefakahōifua kiate ia. (Pal. 16:6) Ko ia ʻoku hokohoko atu ʻetau feinga ke muimui ʻi he ngaahi tuʻunga ʻa e ʻOtuá ki he tonú mo e halá hangē ʻoku fakamatalaʻi ʻi he ngaahi peesi ʻo e Tohi Tapú. (2 Kol. 7:1) Te tau fiefia kapau te tau fai ʻa e ngaahi meʻa ʻoku ʻofa ai ʻa Sihová pea siʻaki ʻa e ngaahi meʻa ʻokú ne fehiʻa aí.​—Saame 37:27; 97:10; Loma 12:9.

10. Fakatatau ki he Loma 12:2, ko e hā hotau fatongiá?

¹⁰ Lau ʻa e Loma 12:2. ʻE ʻiloʻi nai ʻe ha tokotaha ko Sihova ʻokú ne maʻu ʻa e mafai ke fakapapauʻi ʻa e meʻa ʻoku tonú mo e meʻa ʻoku halá, ka kuo pau ke ne tali foki ʻa e ngaahi tuʻunga ʻa e ʻOtuá. Ko e fakatātaá, ʻe ʻiloʻi nai ʻe ha tokotaha ko e puleʻangá ʻoku nau maʻu ʻa e totonu ke fokotuʻu ʻa e fakangatangata ki he vave ʻo e lele ʻi he halá. Ka heʻikai nai ke ne loto-lelei ke tali ʻa e ngaahi fakangatangata ko iá. Ko hono olá, te ne lele ʻo fuʻu oma ange ʻi he vave ʻoku totonu ke ne ngata aí. ʻOku tau fakahāhā ʻi heʻetau tōʻongá  ʻoku tau tui moʻoni ko e muimui ki he ngaahi tuʻunga ʻa Sihová ʻa e founga moʻui lelei tahá. (Pal. 12:28) Naʻe ongoʻi pehē ʻa Tēvita, he naʻá ne pehē fekauʻaki mo Sihova: “Kuó ke ʻai ke u ʻilo ʻa e hala ʻo e moʻuí. ʻOku ʻi ho ʻaó ʻa e fuʻu mavava; ʻoku ʻi ai ʻa e fiefia ʻi ho nima toʻomataʻú ʻo taʻengata.”​—Saame 16:11.

11-12. (a) ʻI he taimi ʻoku tau loto-moʻua ai pe loto-siʻí, ko e hā kuo pau ke tau tokanga ki aí? (e) ʻE lava fēfē ke tokoniʻi kitautolu ʻe he ngaahi lea ʻi he Filipai 4:8 ʻi hono fili ʻo e fakafiefiá?

¹¹ ʻI he taimi ʻoku tau loto-moʻua ai pe loto-siʻí, ʻoku tau ongoʻi nai ʻoku tau fiemaʻu nai ha meʻa ke tau hanganoa ai ke ʻoua ʻe tokanga ki heʻetau ngaahi palopalemá. ʻOku mahino pē ia, ka kuo pau ke tau tokanga ke ʻoua te tau iku fai ai ha meʻa ʻoku fehiʻa ai ʻa Sihova.​—ʻEf. 5:10-12, 15-17.

¹² ʻI he tohi ʻa e ʻapositolo ko Paulá ki he kau Filipaí, naʻá ne ekinaki ki he kau Kalisitiané ke hokohoko atu ʻenau tokanga ki he ngaahi meʻa ʻoku “māʻoniʻoní, . . . maʻá, . . . ʻofeiná, [mo] leleí.” (Lau ʻa e Filipai 4:8.) Neongo naʻe ʻikai fakatefito ʻa e tohi ʻa Paulá ʻi he fakafiefiá, ko e meʻa naʻá ne tohí ʻoku totonu ke ne tākiekina ʻa e ngaahi fakafiefia ʻoku tau filí. ʻAhiʻahiʻi eni: ʻI he taimi pē ʻoku ʻasi ai ʻa e foʻi lea “ngaahi meʻa” ʻi he vēsí, fetongi ʻaki ia ʻa e foʻi lea ko e “ngaahi hiva,” “faiva,” “tohi talanoa” pe “keimi vitiō.” Ko hono fai ení ʻe tokoniʻi ai koe ke ʻiloʻi pe ko fē ʻa e meʻa ʻoku fakahōifua ki he ʻOtuá mo e ngaahi meʻa ʻoku ʻikaí. ʻOku tau loto ke ʻai ʻetau moʻuí ke fehoanaki mo e ngaahi tuʻunga māʻolunga ʻa Sihová. (Saame 119:1-3) ʻI heʻetau maʻu leva ha konisēnisi ʻataʻataá, ʻe lava ke tau fou ʻi he sitepu hoko ʻoku taki atu ki he fiefia moʻoní.​—Ngā. 23:1.

13. Ko e hā ʻa e sitepu hono tolu ʻoku taki atu ki he fiefia moʻoní? (Sione 4:23, 24)

¹³ SITEPU 3: Fakapapauʻi ko e lotu kia Sihová ʻoku fakamuʻomuʻa ʻi hoʻo moʻuí. ʻI he tuʻunga ko hotau Tokotaha-Fakatupu, ko Sihova ʻokú ne tuha moʻoni mo ʻetau lotú. (Fkh. 4:11; 14:6, 7) Ko ia ʻoku fiemaʻu ke tau fakamuʻomuʻa ʻa e lotu kiate iá ʻo fai ia ʻi he founga ʻoku fakahōifua kiate iá, “ʻi he laumālie mo e moʻoni.” (Lau ʻa e Sione 4:23, 24.) ʻOku tau loto ke tataki ʻe he laumālie māʻoniʻoni ʻo e ʻOtuá ʻetau lotú koeʻuhí ke fehoanaki mo e ngaahi moʻoni ʻoku maʻu ʻi heʻene Folofolá. Ko ʻetau lotú kuo pau ke fakamuʻomuʻa ia neongo kapau ʻoku tau nofo ʻi ha fonua ʻoku fakangatangata ai pe tapui ʻetau ngāué. ʻI he taimí ni, ʻoku ʻi ai hotau fanga tokoua mo e fanga tuofāfine ʻe toko 100 tupu ʻoku tuku pilīsone koeʻuhí pē ko ʻenau kau ki he Kau Fakamoʻoni ʻa Sihová. * Neongo ia, ʻoku nau fakahoko fiefia ha meʻa pē ʻoku malava ke nau fai ke lotu, ako pea talanoa ki he niʻihi kehé fekauʻaki mo hotau ʻOtuá pea mo hono Puleʻangá. ʻI he taimi ʻoku lumaʻi pe fakatangaʻi ai kitautolú, ʻe lava ke tau fiefia ʻi hono ʻiloʻi ʻoku kau ʻa Sihova mo kitautolu pea te ne fakapaleʻi kitautolu.​—Sēm. 1:12; 1 Pita 4:14.

14. Ko e hā naʻe hoko ki ha tokoua kei siʻi ʻi Tasikisitani, pea ko e hā hono ʻuhingá?

¹⁴ Ko e ngaahi hokosia ʻi he moʻuí ʻoku fakapapauʻi ai ko e sitepu ʻe tolu naʻa tau toki lāulea ki aí ʻoku taki atu ki he fiefia moʻoní, neongo pe ko e hā hotau tuʻungá. Fakakaukau ki he meʻa naʻe hoko ki he taʻu 19 ko Jovidon Bobojonov, mei Tasikisitani, ʻa ia naʻá ne fakafisi ke kau ʻi he ngāue fakakautaú. ʻI ʻOkatopa 4, 2019, naʻe ʻave fakamālohi ia mei hono ʻapí, ʻo tuku ia ʻi ha pilīsone ʻi ha laui māhina, pea ngaohikovia ia hangē ha tokotaha faihiá. Ko e fakamaau taʻetotonu ko ení naʻá ne tohoakiʻi ʻa e tokanga ʻa e ngaahi fonua lahi. Naʻe līpooti naʻe haha ia ʻi ha feinga ke tenge ia ke ne fai ha fuakava ke kau ʻi he taú pea tui ha teunga sōtia. Hili iá, naʻe fakahalaiaʻi pea ʻave ia ki ha kemi fakamamahi ʻo aʻu ki he  taimi naʻe hanga ai ʻe he palesiteni ʻo e fonuá ʻo toʻo hono tauteá pea tuʻutuʻuni ke tuku ange ia. ʻI he kotoa ʻo e ngaahi meʻa ko iá, naʻe tauhi maʻu ʻe Jovidon ʻene anga-tonú mo ʻene fiefiá. Anga-fēfē? ʻAki ʻene lāuʻilo maʻu pē ki heʻene fiemaʻu fakalaumālié.

15. Naʻe anga-fēfē hono fafangaʻi fakalaumālie ʻe Jovidon ʻa ia tonu lolotonga ʻene ʻi pilīsoné?

¹⁵ Lolotonga ʻa e ʻi pilīsone ʻa Jovidon, naʻá ne fafangaʻi fakalaumālie ia, naʻa mo e taimi naʻe ʻikai ke ne maʻu ai ha Tohi Tapú pe ko ha taha ʻo ʻetau ʻū tohí. Naʻe malava fēfē ia? Ko e fanga tokoua mo e fanga tuofāfine fakalotofonuá naʻa nau ʻave ʻa e meʻakai kiate ia pea hiki ʻa e konga tohi fakaʻahó ʻi he kato meʻakaí. Ko ia naʻe malava ai ke ne lau ʻa e Tohi Tapú pea fakalaulauloto ki ai ʻi he ʻaho kotoa. Hili hono tuku ange ia mei pilīsoné, ko e faleʻi eni naʻá ne fai ki he faʻahinga ʻoku teʻeki ai ke nau fehangahangai mo ha ʻahiʻahi kakaha: “ʻOku mātuʻaki mahuʻinga ke ke ngāuekakatoʻaki hoʻo tauʻatāiná ke fakalolotoʻi hoʻo ʻilo fekauʻaki mo Sihová ʻaki hono lau ʻene Folofolá mo ʻetau ʻū tohí.”

16. Ko e hā naʻe fakahangataha ki ai ʻe Jovidon ʻene fakakaukaú?

¹⁶ Ko hotau tokouá naʻá ne moʻuiʻaki ʻa e ngaahi tuʻunga ʻa Sihová. ʻI he ʻikai ke nōfoʻi ʻi he ngaahi holi fehālaakí pea fai ha tōʻonga kovi, naʻá ne tokangataha kia Sihova pea mo e meʻa ʻoku mahuʻinga kiate Iá. Naʻe ofoofo ʻa Jovidon  ʻi he fakaʻofoʻofa ʻo e fakatupu ʻa e ʻOtuá. ʻI he pongipongi kotoa naʻá ne ʻā hake ʻo fanongo ki he tangi mo e hiva ʻa e fanga manupuná. ʻI he poʻulí naʻá ne hanga hake ki he māhiná mo e fetuʻú. Naʻá ne pehē: “Ko e ngaahi meʻaʻofa ko ia meia Sihová naʻá ne ʻai au ke u ongoʻi fiefia mo loto-toʻa.” ʻI he taimi ʻoku tau houngaʻia ai ʻi he ngaahi tokonaki fakalaumālie mo fakamatelie ʻa Sihová, ʻoku tau maʻu ai ha loto fiefia, pea ko e fiefia ko iá ʻe lava ke ne fakaivimālohiʻi ʻetau malava ke kātakí.

17. ʻE lava fēfē ke ngāueʻaki ʻa e lea ʻi he 1 Pita 1:6, 7 ki ha tokotaha ʻokú ne ʻi ha tuʻunga meimei tatau nai mo Jovidon?

¹⁷ Naʻe toe ʻai foki ʻe Jovidon ʻa e lotu kia Sihová ko e meʻa muʻomuʻá. Naʻá ne ʻiloʻi ʻa e mahuʻinga hono tauhi ʻene anga-tonu ki he ʻOtua moʻoní. Naʻe pehē ʻe Sīsū: “Ko Sihova ko ho ʻOtuá kuo pau ke ke lotu ki aí, pea ko ia toko taha pē kuo pau ke ke fai ki ai ʻa e ngāue toputapú.” (Luke 4:8) Ko e kau komanitaá mo e kau sōtiá naʻa nau loto ke siʻaki ʻe Jovidon ʻene lotú. ʻI hono kehé, naʻá ne lotu tōtōivi ʻi he ʻaho mo e pō kotoa, ʻo kole kia Sihova ke ne tokoniʻi ia ke ʻoua ʻe foʻi pea ʻoua ʻe fakangaloku ʻene tuí. Neongo hono ngaohikovia taʻetotonu ʻa Jovidon, naʻe ʻikai ʻaupito ke ne fakangaloku. Ko hono olá, ʻoku lava he taimí ni ke ne fiefia lahi ʻi hono maʻu ha meʻa naʻe ʻikai ke ne maʻu ki muʻa ke ʻave fakamālohi, haha mo tuku pilīsone iá​—ko ha tui kuo siviʻi.​—Lau ʻa e 1 Pita 1:6, 7.

18. ʻE lava fēfē ke tau tauhi maʻu ʻetau fiefiá?

¹⁸ ʻOku ʻafioʻi ʻe Sihova ʻa e meʻa ʻoku tau fiemaʻu ke hoko ai ʻo fiefia moʻoní. Kapau te ke muimui ʻi he sitepu ʻe tolu ʻoku taki atu ki he fiefia moʻoní, ʻe lava ke ke tauhi maʻu hoʻo fiefiá neongo ʻa e ngaahi pole faingataʻá. Pea ko koe foki ʻe malava ke ke pehē: “Fiefia ē ko e kakai ʻa ia ko honau ʻOtuá ʻa Sihová!”​—Saame 144:15.