1. ʻOku anga-fēfē tali ʻa e tokolahi ki he kalanga ʻa e potó ʻi he ʻaho ní? (Palōveepi 1:20, 21)

 ʻI HE ngaahi fonua lahi, kuo anga-maheni ʻa e sio ki he kau malanga fiefia ʻo e Puleʻangá ʻoku nau tufa ʻa e ʻū tohi ʻi he ngaahi hala moʻumoʻuá ki he kau feʻaluʻakí. Kuó ke kau ʻi he founga fakamānako ko eni ʻo e ngāue fakafaifekaú? Kapau ko ia, ʻoku ʻikai ha veiveiua kuó ke fakakaukau fekauʻaki mo e lea fakaefakatātā ʻoku maʻu ʻi he tohi Palōvēpí​—ʻa ia ko e potó ʻoku kalanga leʻo-lahi ʻi he feituʻu kakaí ke fanongo ʻa e kakaí ki heʻene faleʻí. (Lau ʻa e Palōveepi 1:20, 21.) Ko e Tohi Tapú mo ʻetau ʻū tohí ʻoku maʻu ai ʻa e “poto moʻoní”​—ʻa e poto ʻa Sihová. Ko e fakamatala tofu pē eni ʻoku fiemaʻu ʻe he kakaí koeʻuhí ke nau lava ʻo fou ai ʻi he ʻuluaki sitepu ki he hala ʻo e moʻuí. ʻOku tau fiefia ʻi hono tali ʻe ha tokotaha ʻa e taha ʻetau ʻū tohí. Ka ʻoku ʻikai ke fai pehē ʻa e tokotaha kotoa. Ko e niʻihi ʻoku nau saiʻia ke tukunoaʻi pē ʻa e meʻa ʻoku leaʻaki ʻe he Tohi Tapú. Ko e niʻihi ʻoku nau kataʻi kitautolu. ʻOku nau fakakaukau ko e Tohi Tapú ʻoku ʻolokuonga. Pea ko e niʻihi ʻoku nau fakaangaʻi ʻa e faleʻi ʻa e Tohi Tapú fekauʻaki mo e tuʻunga fakaeʻulungāngá, ʻo taukaveʻi ko e faʻahinga ʻoku muimui ki aí ʻoku nau anga-fefeka mo māʻoniʻoni-fakaekita. Neongo ia, ʻoku anga-ʻofa ʻa Sihova ʻo hokohoko atu hono ʻai ke ala maʻu ʻe he taha kotoa ʻa e poto moʻoní. ʻI he ngaahi founga fē?

2. ʻOku anga-fēfē ala maʻu ʻa e poto moʻoní he ʻaho ní, ka ko e hā ʻoku fili ʻe he kakai tokolahi tahá ke nau faí?

² Ko e founga ʻe taha ʻoku ʻai ai ʻe Sihova ʻa e poto moʻoní ke fanongoá ʻoku fakafou ʻi heʻene Folofolá, ʻa e Tohi Tapú. Ko e tohi ko iá ʻoku ala maʻu ʻe he meimei tokotaha kotoa. Kae fēfē ʻetau ʻū tohi Fakatohitapú? Mālō ki he tāpuaki ʻa Sihová, ʻoku ala maʻu ia ʻi he lea laka hake ʻi he 1,000. Ko e faʻahinga ʻoku nau fanongó, ʻa ia ʻoku nau lau pea ngāueʻaki ʻa e meʻa ʻoku nau akó, te nau maʻu ʻaonga mei ai. Kae kehe, ko e kakai tokolahi tahá ʻoku nau fili ke  tukunoaʻi ʻa e leʻo ʻo e poto moʻoní. ʻI he fiemaʻu ke nau fai ha fili, ʻoku nau saiʻia ke falala pē kiate kinautolu pe ke fanongo ki he kaungā-faʻahinga ʻo e tangatá. ʻOku aʻu nai ʻo nau siolalo mai kiate kitautolu koeʻuhi ko ʻetau fili ke muimui ʻi he meʻa ʻoku leaʻaki ʻe he Tohi Tapú. ʻE lāulea ʻa e kupu ko ení ki he ʻuhinga ʻoku fakafeangai peheni ai ʻa e kakaí. Neongo ia, ʻuluakí tau lāulea angé ki he founga ʻe lava ke tau maʻu ai ʻa e poto meia Sihová.

3. Ko e hā ʻoku kaunga ki he poto moʻoní?

³ Ko e potó ʻoku lava ke ʻuhinga ia ki he malava ke ngāueʻaki ʻa e meʻa ʻoku tau ʻiloʻí ke fai ʻa e ngaahi fili lelei. Kae kehe, ko e poto moʻoní ʻoku kaunga ki ai ʻa e meʻa lahi ange. ʻOku pehē ʻe he Tohi Tapú: “Ko e manavahē kia Sihová ko e kamataʻanga ia ʻo e potó, pea ko e ʻilo ki he Tokotaha Fungani Māʻoniʻoní ko e mahinó ia.” (Pal. 9:10) Ko ia ʻi he fiemaʻu ke tau fai ha fili mahuʻinga, ʻoku totonu ke tau ʻai ʻa e fakakaukau ʻa Sihová​—ʻa e “ʻilo ki he Tokotaha Fungani Māʻoniʻoní”​—ko e makatuʻunga ia ki heʻetau filí. ʻE lava ke tau fai ia ʻaki ʻa e vakai ki he Tohi Tapú mo ʻetau ʻū tohi Fakatohitapú. ʻI heʻetau fai iá, ʻoku tau fakahāhā ai ʻa e poto moʻoní.​—Pal. 2:5-7.

4. Ko e hā ko Sihova toko taha pē ai ʻe lava ke ne ʻomai ʻa e poto moʻoní?

⁴ Ko Sihova toko taha pē ʻe lava ke ne ʻomai ʻa e poto moʻoní. (Loma 16:27) Ko e hā ʻokú ne hoko ai ko e Matavai ʻo e potó? ʻUluakí, ʻi he tuʻunga ko e Tokotaha-Fakatupú, ʻokú ne maʻu ʻa e ʻilo mo e mahino taʻefakangatangata fekauʻaki mo ʻene fakatupú. (Saame 104:24) Uá, ko e ngaahi ngāue kotoa ʻa Sihová ʻoku tapua mai ai ʻa e potó. (Loma 11:33) Tolú, ko e faleʻi fakapotopoto ʻa Sihová ʻoku ʻaonga maʻu pē ki he faʻahinga ʻoku nau ngāueʻakí. (Pal. 2:10-12) Kapau ʻoku tau loto ke maʻu ʻa e poto moʻoní, kuo pau ke tau tali ʻa e ngaahi moʻoni tefito ko ení pea fakaʻatā ia ke ne tataki kitautolu ʻi hono fai ʻa e ngaahi filí pea mo ʻetau tōʻongá.

5. Ko e hā ʻoku hoko ki he kakai ʻoku nau fakafisi ke tali ʻa Sihova ko e Matavai ʻo e poto moʻoní?

⁵ Ko e tokolahi ʻoku tau fetaulaki ʻi he ngāue fakafaifekaú ʻoku nau fakahaaʻi ʻoku fakaofo hono tisaini ʻo natulá; ka, ʻoku nau fakaʻikaiʻi ʻa e ʻi ai ha Tokotaha-Fakatupu pea ʻave ʻa e lāngilangí ki he ʻevalūsiō. Ko e niʻihi leva ʻoku nau taku ʻoku nau tui ki he ʻOtuá, ka ʻoku nau vakai ki he tuʻunga Fakatohitapú ʻoku ʻolokuonga pea fili ke muimui ʻi he ʻalunga pē ʻanautolu. ʻOku iku atu eni ki he hā? ʻOku hoko ʻa e māmaní ko ha feituʻu lelei ange koeʻuhi ʻoku falala pē ʻa e kakaí ki haʻanautolú poto kae ʻikai ki he ʻOtuá? Kuo nau maʻu ʻa e fiefia moʻoní pe ko ha ʻamanaki papau ki he kahaʻú? Ko e meʻa ʻoku tau vakai ki aí ʻokú ne fakatuipauʻi kitautolu ki he moʻoni ko ení: “ʻOku ʻikai ha poto, pe ha ʻiloʻilo, pe ha faleʻi ʻe lava ke tuʻu ʻo fakafepaki kia Sihova.” (Pal. 21:30) He ueʻi ē kitautolu ʻe he meʻa ko iá ke tau hanga kia Sihova ki he poto moʻoní! Ko e meʻa pangó, ko e kakai tokolahi tahá ʻoku ʻikai ke nau pehē. Ko e hā hono ʻuhingá?

6. Fakatatau ki he Palōveepi 1:22-25, ko hai ʻoku fakaongotuli ki he kalanga ʻa e poto moʻoní?

⁶ Ko e tokolahi ʻoku nau fakaongotuli ʻi he “kalanga leʻo-lahi” ʻa e poto moʻoní ʻi he halá. Fakatatau ki he Tohi Tapú, ʻoku ʻi ai ʻa e kulupu ʻe tolu ʻo e kakai ʻoku nau talitekeʻi ʻa e potó: “Kau taʻetaukei,” “kau manuki,” mo e “kau vale.” (Lau ʻa e Palōveepi 1:22-25.) Tau vakai fakalelei angé ki he ngaahi tōʻonga ʻokú ne fakatupunga ʻa e faʻahinga ko iá ke nau talitekeʻi ʻa e poto fakaʻotuá, pea te tau lāulea foki ki he founga ʻe lava ke tau fakaʻehiʻehi ai mei hono fakatupulekina ʻa e ngaahi tōʻonga ko iá.

7. Ko e hā ʻoku fili ai ʻa e niʻihi ke nau “taʻetaukei” pē?

⁷ Ko e ‘kau taʻetaukeí’ ko e faʻahinga ia ʻoku nau taʻefakapotopoto, tākiekinangofua pe kākaaʻingofua. (Pal. 14:15, fkm. ʻi lalo) ʻOku tau faʻa fetaulaki mo e faʻahinga peheé ʻi heʻetau ngāue  fakafaifekaú. Ko e fakatātaá, fakakaukau ki he laui miliona ʻoku takihalaʻi ʻe he kau taki lotú pe kau taki fakapolitikalé. Ko e niʻihi ʻoku nau fakameʻapangoʻia ʻi heʻenau ʻiloʻi kuo kākaaʻi kinautolu ʻe he kau taki ko iá. Ka ko e faʻahinga ʻoku lave ki ai ʻi he Palōveepi 1:22 ʻoku nau fili ke nau taʻetaukei pē koeʻuhí ʻoku nau saiʻia pē kinautolu ai. (Sel. 5:31) ʻOku nau fiefia pē ʻi he muimui ʻi heʻenau ngaahi hehemá pea ʻikai loto ke ako ʻa e meʻa ʻoku leaʻaki ʻe he Tohi Tapú pe ke talangofua ki heʻene ngaahi tuʻungá. Ko e tokolahi ʻoku nau ongoʻi hangē ko e fefine lotu fefeka ko eni ʻi Quebec, Kānata, naʻá ne tala ange ki ha Fakamoʻoni naʻe ʻaʻahi kiate ia, “Kapau kuo takihalaʻi kimautolu ʻe heʻemau faifekaú, ko e foʻui pē ia ʻoʻona, ʻo ʻikai ko kimautolu!” Ko hono moʻoní ʻoku ʻikai ke tau loto ke faʻifaʻitaki ki he faʻahinga ʻoku nau fie taʻeʻilo pē kinautolú!​—Pal. 1:32; 27:12.

8. Ko e hā te ne tokoniʻi kitautolu ke maʻu ʻa e faʻahinga taukei totonú?

⁸ ʻI ha ʻuhinga lelei, ʻoku fakalototoʻaʻi kitautolu ʻe he Tohi Tapú ke ʻoua te tau taʻetaukei pē ka ke tau “hoko ʻo matuʻotuʻa ʻi [heʻetau] mahinó.” (1 Kol. 14:20) ʻOku tau maʻu ʻa e faʻahinga taukei totonú ʻaki hono ngāueʻaki ʻa e ngaahi tefitoʻi moʻoni Fakatohitapú ʻi heʻetau moʻuí. ʻI he faai atu ʻa e taimí, ʻoku tau vakai tonu ai ki he founga hono tokoniʻi kitautolu ʻe he ngaahi tefitoʻi moʻoni ko iá ke fakaʻehiʻehi mei he palopalemá pea fai ʻa e ngaahi fili fakapotopoto. ʻOku lelei ke tau vakaiʻi ʻetau fakalakalaká. Kapau kuo tau ako ʻa e Tohi Tapú pea maʻu ʻa e ngaahi fakatahá ʻi ha vahaʻa taimi, te tau ʻeke hifo nai pe ko e hā kuo teʻeki ke tau fou ai ʻi he sitepu ke fai ha fakatapui kia Sihova pea papitaisó. Kapau kuo tau ʻosi papitaiso, ʻoku tau fai ha fakalakalaka ʻi he tuʻunga ko ha tokotaha malanga pe faiako ʻo e ongoongo leleí? ʻOku fakahaaʻi ʻi heʻetau ngaahi filí ʻoku tataki kitautolu ʻe he ngaahi tefitoʻi moʻoni Fakatohitapú? ʻOku tau fakahāhā ʻa e ʻulungaanga faka-Kalisitiané ʻi heʻetau fakafeangai ki he niʻihi kehé? Kapau ʻoku tau sio ki ha matāmama ke fakaleleiʻi, tau tokangataha ki he ngaahi fakamanatu ʻa Sihová, ʻa ia ʻokú ne “ʻai ke poto ʻa e tokotaha taʻetaukeí.”​—Saame 19:7.

9. ʻOku anga-fēfē hono fakahāhā ʻe he ‘kau manukí’ ʻoku nau talitekeʻi ʻa e potó?

⁹ Ko e kulupu hono ua ʻo e kakai ʻoku nau tukunoaʻi ʻa e poto fakaʻotuá ko e “kau manuki.” ʻI he taimi ʻe niʻihi, ʻoku tau fetaulaki mo e faʻahinga peheé ʻi heʻetau ngāue fakamalangá. ʻOku nau fiefia ʻi hono manukiʻi ʻa e niʻihi kehé. (Saame 123:4) Naʻe fakatokanga ʻa e Tohi Tapú ʻi he ngaahi ʻaho fakaʻosí, ʻe tokolahi ʻa e kau manukí. (2 Pita 3:3, 4) Hangē ko e ongo foha-ʻi-he-fono ʻo e tangata māʻoniʻoni ko Loté, ko e kakai ʻe niʻihi ʻi he ʻahó ni ʻoku ʻikai ke nau tokanga ki he fakatokanga fakaʻotuá. (Sēn. 19:14) Ko e tokolahi ʻoku nau katakataʻi ʻa e faʻahinga ʻoku nau moʻuiʻaki ʻa e ngaahi tefitoʻi moʻoni Fakatohitapú. Ko e kau manukí ʻoku ueʻi kinautolu ʻe heʻenau “ngaahi holi ʻa kinautolu ki he ngaahi meʻa taʻefakaʻotuá.” (Sute 7, 17, 18) He fehoanakimālie ē ko e fakamatala ʻi he Tohi Tapú fekauʻaki mo e kau manukí pea mo e kau tafoki ʻo fakafepaki ki he moʻoní mo e niʻihi kuo nau talitekeʻi ʻa Sihová!

10. Hangē ko ia ʻoku hā ʻi he Saame 1:1, ʻe lava fēfē ke tau fakaʻehiʻehi mei he ʻalunga ʻo e kau manukí?

¹⁰ ʻE lava fēfē ke tau maluʻi kitautolu mei he muimui ʻi he ʻalunga ʻo e kau manukí? Ko e founga ʻe taha ko e fakaʻehiʻehi mei he feohi mo e faʻahinga ʻoku nau fakahāhā ʻa e tōʻonga fakaangá. (Lau ʻa e Saame 1:1.) ʻOku ʻuhinga ení ʻoku ʻikai ke tau fanongo pe lau ha meʻa pē mei he kau tafoki ʻo fakafepaki ki he moʻoní. ʻOku tau ʻiloʻi kapau heʻikai ke tau tokanga, ʻe lavangofua ke tau fakatupulekina ha laumālie fakaanga pea kamata ke veiveiua ʻia Sihova pea mo e tataki ʻoku tau maʻu fakafou ʻi heʻene kautahá. Ke fakaʻehiʻehi mei he ʻalunga ko iá, ʻe lava ke tau ʻeke hifo: ‘ʻOku ou faʻa leaʻaki ha meʻa ʻikai lelei ʻi heʻetau maʻu ha fakahinohino pe fakamatala foʻou? ʻOku ou hehema ke fakasio ha tōnounou ʻa e faʻahinga ʻoku takimuʻá?’ ʻI heʻetau fakavave ke fakatonutonu  ʻa e ngaahi hehema ko iá, ʻe hōifua mai ʻa Sihova kiate kitautolu.​—Pal. 3:34, 35.

11. ʻOku anga-fēfē vakai ʻa e ‘kau valé’ ki he ngaahi tuʻunga fakaeʻulungaanga ʻa Sihová?

¹¹ Ko e kulupu hono tolu ʻoku nau talitekeʻi ʻa e potó ko e “kau vale.”  ʻOku nau valé koeʻuhí ʻoku nau fakafisi ke moʻuiʻaki ʻa e ngaahi lao fakaeʻulungaanga ʻa e ʻOtuá. ʻOku nau fai pē ʻa e meʻa ʻoku hā lelei ʻi heʻenau vakaí. (Pal. 12:15) Ko e faʻahingá ni ʻoku nau talitekeʻi ʻa Sihova, ʻa e Matavai ʻo e potó. (Saame 53:1) ʻI heʻetau fetaulaki mo kinautolu ʻi he ngāue fakamalangá, ʻoku nau faʻa fakaangaʻi mālohi kitautolu ko ʻetau fakaʻapaʻapaʻi ʻa e ngaahi tuʻunga ʻi he Tohi Tapú. Ka ʻoku halaʻatā ha meʻa lelei te nau ʻomai. ʻOku fakahaaʻi ʻe he Tohi Tapú: “Ko e poto moʻoní ʻoku ʻikai ala maʻu ia ʻe ha vale; ʻoku ʻikai te ne maʻu ha meʻa ke ne leaʻaki ʻi he matapā ʻo e koló.” (Pal. 24:7) Ko e kau valé ʻoku ʻikai ke nau ʻomai ha lea ʻo e poto moʻoni. Tāneʻineʻi ke fakatokanga mai ʻa Sihova ke tau “fakamamaʻo mei he tangata valé”!​—Pal. 14:7.

12. Ko e hā te ne tokoniʻi kitautolu ke talitekeʻi ʻa e ʻalunga ʻo e kau valé?

¹² ʻI he ʻikai hangē ko e faʻahinga ʻoku nau fehiʻa ʻi he faleʻi fakaʻotuá, ʻoku tau fakatupulekina ʻa e ʻofa ki he ngaahi founga ʻa e ʻOtuá, ʻo kau ai ʻene ngaahi tuʻunga fakaeʻulungāngá. ʻE lava ke tau fakaivimālohiʻi ʻa e ʻofa ko iá ʻaki hono fakahoa ʻa e ola ʻo e talangofuá ki he nunuʻa ʻo e talangataʻá. Vakai ki he faʻahinga palopalema ʻoku hoko ki he kakaí koeʻuhi ko ʻenau fakavalevale ʻo talitekeʻi ʻa e faleʻi fakapotopoto ʻa Sihová. Pea fakakaukau leva ki he lelei ange hoʻo moʻuí koeʻuhi ko hoʻo talangofua ki he ʻOtuá.​—Saame 32:8, 10.

13. ʻOku fakamālohiʻi kitautolu ʻe Sihova ke talangofua ki heʻene faleʻi fakapotopotó?

¹³ ʻOku ʻai ʻe Sihova ʻa e potó ke ala maʻu ia ʻe he taha kotoa, ka ʻoku ʻikai te ne fakamālohiʻi ha taha ke ne tali ia. Neongo ia, ʻokú ne fakamatalaʻi ʻa e nunuʻa ʻe hoko ki he faʻahinga ʻoku ʻikai ke nau fanongo ki he potó. (Pal. 1:29-32) Ko e faʻahinga ʻoku nau fili ke ʻoua ʻe talangofua ki he ʻOtuá te nau “fua ʻa e ngaahi nunuʻa ʻo honau ʻalungá.” ʻI he faai atu ʻa e taimí, ko e meʻa pē ʻe ʻomai ʻe heʻenau founga moʻuí ko e loto-mamahi, faingataʻaʻia, pea iku atu ki he ʻauha. ʻI he tafaʻaki ʻe tahá, ko e faʻahinga ʻoku nau fanongo ki he faleʻi fakapotopoto ʻa Sihová pea ngāueʻaki iá ʻoku talaʻofa kiate kinautolu: “Ko e tokotaha ʻoku fanongo kiate aú te ne nofo malu pea ʻe ʻikai fakahohaʻasi ia ʻe he tailiili ki he faingataʻá.”​—Pal. 1:33.

14-15. Ko e hā ʻoku tau ako mei he Palōveepi 4:23?

¹⁴ ʻI heʻetau ngāueʻaki ʻa e poto mei he ʻOtuá, ʻoku tau maʻu ʻaonga maʻu pē. Hangē ko ia kuo tau lāulea ki aí, ʻoku ʻai ʻe Sihova ʻa e faleʻi fakapotopotó ke faingofua hono ala maʻú. Ko e fakatātaá, ʻi he kotoa ʻo e tohi Palōvēpí, ʻokú ne tokonaki mai ai ʻa e faleʻi tuʻuloa te ne fakaleleiʻi ʻetau moʻuí kapau ʻoku tau ngāueʻaki ia. Tau lāulea angé ki ha fakatātā ʻe fā ʻo e faleʻi fakapotopoto ko iá.

¹⁵ Maluʻi ho lotó. ʻOku pehē ʻe he Tohi Tapú: “Hiliō ʻi he ngaahi meʻa kotoa ʻokú ke maluʻí, maluʻi ho lotó, he ʻoku mei ai ʻa e ngaahi matavai  ʻo e moʻuí.” (Pal. 4:23) Fakakaukau ki he meʻa ʻoku fiemaʻu ke fai ke maluʻi ai hotau mafú. ʻOku fiemaʻu ke tau kai ʻa e meʻakai moʻui lelei, fakamālohisino feʻunga, pea fakaʻehiʻehi mei hono fai ha ngaahi meʻa ʻikai fakatupu moʻui lelei. ʻOku tau fai ʻa e meʻa meimei tatau ke maluʻi hotau lotó. ʻOku tau fafangaʻi fakaʻaho ia ʻaki ʻa e Folofola ʻa e ʻOtuá. ʻOku tau teuteu ki he fakatahá, maʻu ia pea kau ki ai. ʻOku tau hanganaki longomoʻui ʻaki ʻa e ngāue tōtōivi maʻu pē ʻi he ngāue fakafaifekaú. Pea ʻoku tau fakaʻehiʻehi mei hono fakatupulekina ʻa e ngaahi tōʻonga koví ʻaki ʻa e mātuʻaki fakaʻehiʻehi mei ha meʻa pē ʻe lava ke ne fakameleʻi ʻetau fakakaukaú, hangē ko e fakafiefia taʻetāú mo e feohi koví.

16. Ko e hā ʻoku mātuʻaki ʻaonga ai ʻa e Palōveepi 23:4, 5 he ʻaho ní?

¹⁶ Fiemālie pē ʻi he meʻa ʻokú ke maʻú. ʻOku ʻomai ʻe he Tohi Tapú ʻa e faleʻi ko ení: “ʻOua naʻá ke fakaongosia ke maʻu ha koloa. . . . ʻI haʻo hila ki ai, ʻoku ʻikai ke ʻi ai, he ko e moʻoni te ne ʻai kapakau ʻo hangē ha ʻīkalé peá ne puna atu ki he ʻataá.” (Pal. 23:4, 5) Ko e koloa fakamatelié ʻoku ʻikai fakapapauʻi ʻe tuʻuloa. Neongo ia, ko e koloaʻiá mo e masivá ʻi he ʻahó ni ʻoku nau nōfoʻi ʻi he feinga ke maʻu ha paʻangá. ʻOku faʻa fakatupunga ʻe he meʻá ni ke nau tōʻonga ʻi ha founga ʻe maumauʻi ai honau ongoongó, ko honau vahaʻangataé, pea naʻa mo ʻenau moʻui leleí. (Pal. 28:20; 1 Tīm. 6:9, 10) ʻI he tafaʻaki ʻe tahá, ko e potó ʻokú ne tokoniʻi kitautolu ke maʻu ha vakai mafamafatatau ki he paʻangá. Ko ha vakai pehē ʻokú ne maluʻi kitautolu mei he mānumanú pea ʻoku taki atu ai kitautolu ki he fiemālie mo e fiefia.​—Tml. 7:12.

17. ʻE lava fēfē ke tau maʻu ʻa e “ʻelelo ʻo e potó,” hangē ko ia ʻoku lave ki ai ʻi he Palōveepi 12:18?

¹⁷ Fakakaukau ki muʻa ke ke lea. Kapau heʻikai ke tau tokanga, ʻe lava ke tau fakatupunga ha maumau lahi ʻaki ʻetau leá. ʻOku pehē ʻe he Tohi Tapú: “Ko e lea taʻefakakaukaú ʻoku hangē ia ko hano hokohokaʻi ʻe ha heletaá, ka ko e ʻelelo ʻo e potó ko ha faitoʻo.” (Pal. 12:18) ʻOku tau tauhi maʻu ʻa e ngaahi vahaʻangatae leleí ʻi heʻetau fakaʻehiʻehi mei hono lauʻi ʻa e tōnounou ʻa e niʻihi kehé. (Pal. 20:19) Ke hoko ʻetau leá ko ha faitoʻo kae ʻikai fakalotomamahí, kuo pau ke tau fakafonu ʻaki hotau lotó ʻa e ʻilo mei he Folofola ʻa e ʻOtuá. (Luke 6:45) ʻI he taimi ʻoku tau fakalaulauloto ai ki he meʻa ʻoku leaʻaki ʻe he Tohi Tapú, ʻe  lava ke hoko ʻetau leá ʻo hangē ko ha “matavai ʻo e potó” ʻo fakaivifoʻou ki he niʻihi kehé.​—Pal. 18:4.

18. ʻE lava fēfē ke tokoniʻi kitautolu ʻe hono ngāueʻaki ʻa e Palōveepi 24:6 ke lavameʻa ʻi he ngāue fakafaifekaú?

¹⁸ Muimui ʻi he fakahinohinó. ʻOku ʻomai ʻi he Tohi Tapú ʻa e faleʻi ʻaonga ko eni ki he lavameʻá: “ʻI hono fai ʻa e tataki fakapotopotó te ke faitau leva, pea ʻi he tokolahi ʻa e kau faleʻí ʻoku ʻi ai ʻa e lavameʻa.” (Pal. 24:6, fkm. ʻi lalo) Fakakaukau ki he founga ʻoku taki atu ai hono ngāueʻaki ʻa e tefitoʻi moʻoni ko ení ki he lavameʻa ʻi heʻetau ngāue fakamalangá mo e ngāue fakafaiakó. ʻI he ʻikai fakahoko ʻa e ngāue fakafaifekaú ʻi he founga pē ʻatautolú, ʻoku tau feinga ke muimui ki he ngaahi fokotuʻu kuo ʻomai kiate kitautolú. ʻOku tau maʻu ʻa e fakahinohino fakapotopoto ʻi heʻetau ngaahi fakatahá, ʻa ia ʻoku fai ai ʻe he kau faleʻi taukei ʻa e ngaahi malanga mo e fakahāhā makatuʻunga ʻi he Tohi Tapú ke akoʻi ai kitautolu. Tānaki atu ki aí, ʻoku tokonaki mai ʻe he kautaha ʻa Sihová ʻa e ngaahi meʻangāue ʻaonga​—ʻū tohi mo e ʻū vitiō​—ʻe lava ke ne tokoniʻi ʻa e kakaí ke nau mahinoʻi ʻa e Tohi Tapú. ʻOkú ke ako ke ngāueʻaki ola lelei ʻa e ngaahi meʻangāue ko ení?

19. ʻOku anga-fēfē hoʻo ongoʻi fekauʻaki mo e poto ʻoku tokonaki mai ʻe Sihová? (Palōveepi 3:13-18)

¹⁹ Lau ʻa e Palōveepi 3:13-18. He houngaʻia ē ko kitautolu ki he faleʻi ʻaonga ʻoku maʻu ʻi he Folofola ʻa e ʻOtuá! Naʻa tau mei ʻi fē ka ne taʻeʻoua ia? ʻI he kupu ko ení, kuo tau vakai ki he ngaahi fakatātā ʻe niʻihi ʻo e poto ʻaonga ʻoku maʻu ʻi he tohi Palōvēpí. Ko e moʻoni, kuo tokonaki mai ʻe Sihova ʻa e ngaahi lea fakapotopoto ʻi he kotoa ʻo e Folofolá. ʻOfa ke tau fakapapauʻi maʻu pē ke ngāueʻaki ʻa e poto ʻoku tokonaki mai ʻe Sihová. Ko e anga ʻo e vakai ʻa e māmaní ki he poto ko iá ʻoku ʻikai mahuʻinga ia kiate kitautolu; ʻoku tau tuipau “ko kinautolu ʻoku nau puke maʻu [ʻa e potó] ʻe vakai atu kiate kinautolu ʻoku nau fiefia.”