Naʻe tupulaki ʻa e fiemaʻu ki ha ʻū tohi ʻi he fakalahi ko ia ʻa e ngāue fakamalangá. Ko e fanga tokoua ʻi he Pēteli ʻi Brooklyn naʻa nau faʻu ʻa e makasiní, ka naʻa nau kei fakafalala pē ki he ngaahi kautaha fakakomēsialé ke nau pulusi ʻa e ʻū tohi takafi fefeká. Hili ha laui māhina ʻo e ʻikai pulusi mai ha ʻū tohi feʻunga pea kamata ke uesia ai ʻa e ngāue fakamalangá, naʻe ʻeke ʻe Tokoua Rutherford kia Robert Martin, ʻa e pule ʻo e fale pulusí, fekauʻaki mo e malava ke faʻu ʻa e ʻū tohí.

“Ko ha fakakaukau fakaofo ia,” ko e manatu ia ʻa Tokoua Martin, “koeʻuhí naʻe ʻuhinga iá ko hono maʻu mai ʻa e ngaahi naunau ke lava ʻo pulusi ʻa e ʻū tohí.” Naʻe lisi ʻe he fanga tokouá ha feituʻu ʻi he 18 Concord Street ʻi Brooklyn pea maʻu mai mo e ngaahi naunau naʻe fiemaʻú.

Naʻe ʻikai ke fiefia ʻa e taha kotoa ʻi he fokotuʻutuʻu foʻou ko ení. Ko e palesiteni ʻo ha kautaha naʻa nau pulusi ʻetau ʻū tohí naʻá ne ʻaʻahi ki he fale pulusi foʻoú. Naʻá ne pehē: “Ko eni ʻoku mou maʻu ʻa e ngaahi naunau pulusi lelei tahá, pea ʻoku ʻikai ha taha ʻi he feituʻú ni ʻokú ne ʻilo ha meʻa fekauʻaki mo hono ngāueʻaki iá. ʻI ha māhina ʻe ono mei heni ko e kotoa ʻo e ngaahi meʻá ni ʻe hoko ko ha fokotuʻunga veve.”

“Naʻe hā ngali naʻe moʻoni eni,” ko e lea ia ʻa Tokoua Martin, “ka naʻe ʻikai fakakau ʻi heʻene leá ʻa e ʻEikí; pea kuó ne kau maʻu pē mo kimautolu.” Naʻe moʻoni ʻa Tokoua Martin. Naʻe vave hono faʻu ʻi he fale pulusi foʻoú ʻa e ʻū tohi ʻe 2,000 he ʻaho taki taha.

Tānaki atu ki hono pulusi ʻe he kakai ʻa Sihová ʻa e niʻihi ʻo ʻenau ʻū tohí, naʻe kamata ke nau ngāueʻaki ha founga foʻou ke fakamafola ʻa e ongoongo leleí​—ko hono fakamafola ʻi he letioó. ʻI he efiafi Sāpate, ʻo Fepueli 26, 1922, naʻe lea ʻa Tokoua Rutherford ʻi he letioó ko e fuofua taimí  ia. Naʻá ne fakahoko ʻa e malanga “Laui Miliona ʻOku Lolotonga Moʻui ʻE ʻIkai ʻAupito Te Nau Mate” ʻi he fale fakamafola lea KOG ʻi Los Angeles, Kalefōnia, ʻAmelika.

Naʻe fakafuofua ki he toko 25,000 naʻa nau fanongo ki he polokalamá. Ko e niʻihi ʻo kinautolu naʻa nau ʻomai ʻa e ngaahi tohi ʻo e houngaʻia ʻi he polokalamá. Ko e taha ʻo e ngaahi tohi ko ení naʻe meia Willard Ashford, naʻá ne nofo ʻi Santa Ana, Kalefōnia. Naʻá ne fakaongoongoleleiʻi ʻa Tokoua Rutherford ki he malanga “fakafiefia mo mālie” naʻá ne faí. Naʻá ne toe pehē: “Koeʻuhi naʻe puke ha toko tolu ʻi homau ʻapí naʻe ʻikai mei malava ki ha taha ʻo kimautolu ke fanongo kiate koe neongo kapau naʻá ke malanga ʻi he poloka hokó kae mālō mo e founga ko ení.”

Naʻe hokohoko atu ʻa e fakamafolaleá ʻi he ngaahi uike hokó. ʻI he ngataʻanga ʻo e taʻú, naʻe fakafuofua ʻe he The Watch Tower “ko e kakai nai ʻe toko 300,000 naʻa nau maʻu ʻa e pōpoakí fakafou ʻi he letioó.”

ʻI he loto-toʻa ʻa e Kau Ako Tohi Tapú ʻi he ola ko ení, naʻa nau fakapapauʻi ke langa ha fale fakamafolalea ʻi ha feituʻu ʻi Staten Island, ʻo ʻikai fuʻu mamaʻo mei he Pēteli ʻi Brooklyn. ʻI he ngaahi taʻu hokó, naʻe ngāueʻaki ʻe he Kau Ako Tohi Tapú ʻa e fale fakamafolalea ko ení, ʻa e WBBR, ke fakamafola ʻa e pōpoaki ʻo e Puleʻangá ki he ngaahi feituʻu lahi.

ʻI Sune 15, 1922, naʻe fanongonongo ʻi he ʻīsiu ʻo e Watch Tower ʻe fakahoko ha fakataha-lahi ʻi Cedar Point, Ohio, mei Sepitema 5 ki he 13, 1922. Naʻe fiefia lahi ʻa e Kau Ako Tohi Tapú ʻi heʻenau aʻu atu ki Cedar Point.

ʻI heʻene malanga talitalí, naʻe tala ange ʻe Tokoua Rutherford ki he kau fanongó: “ʻOku ou mātuʻaki ʻiloʻi papau, ko e ʻEikí te ne . . . tāpuakiʻi ʻa e fakataha-lahi ko ení pea ʻoatu mo ha fakamoʻoni kuo teʻeki ke fakahoko ia ʻi he māmaní.” Ko e kau malanga ʻi he fakataha-lahi ko iá naʻa nau fakaʻaiʻai ʻa e ngāue fakamalangá.

Pea ʻi he Falaite, Sepitema 8, ko e toko 8,000 nai naʻa nau hū atu ki he holo fakataha-lahí, ʻo fakatuʻotuʻa vēkeveke atu ki he malanga ʻa Tokoua Rutherford. Naʻa nau fakaʻamu te ne fakamatalaʻi ʻa e ʻuhinga ʻo e “ADV,” ʻa ia  naʻe ʻasi ʻi heʻenau tohi fakaafé. ʻI heʻenau tangutu hifó, ʻoku ʻikai ha veiveiua naʻe fakatokangaʻi ʻe he niʻihi ha ngaahi lā naʻe kei takai ʻi ʻolunga ʻi he peletifōmú. Ko Arthur Claus, ʻa ia naʻá ne fononga ki he fakataha-lahí mei Tulsa, Oklahoma, ʻAmelika, naʻá ne maʻu ha tangutuʻanga naʻe fanongo lelei ai, he naʻe faingataʻa eni he naʻe ʻikai ha meʻa fakaongo leʻo-lahi naʻe ngāueʻaki he taimi ko iá.

Ke fakapapauʻi naʻe ʻikai ha fakahohaʻa, naʻe fanongonongo ʻe he tokotaha-seá heʻikai ke toe fakahū mai ha taha ʻe tōmui ki he holó lolotonga ʻa e malanga ʻa Tokoua Rutherford. ʻI he 9:30 a.m., naʻe kamata toʻo-lea ʻa Tokoua Rutherford mei he lea ʻa Sīsū ʻi he Mātiu 4:17: “Kuo ofi ʻa e Puleʻanga ʻo hēvaní.” ʻI he lāulea ki he founga ʻe fanongo ai ʻa e faʻahinga ʻo e tangatá ki he Puleʻanga ko ení, naʻá ne pehē: “Naʻe fanongonongo tonu ʻe Sīsū ʻi heʻene ʻi hení te ne fakahoko ha utu-taʻu ʻo ʻene kakaí, lolotonga ia te ne tānaki mai kiate ia ʻa e faʻahinga loto-moʻoni mo mateaki.”

Ko Tokoua Claus, naʻá ne kau ʻi he kau tangutú, naʻá ne manatuʻi: “Naʻa mau fanongo lelei ki he foʻi lea kotoa pē.” Kae fakafokifā pē, naʻá ne ongoʻi puke pea naʻe pau ke ne mavahe. Naʻe ʻalu taʻefieʻalu pē ʻa Arthur mei he holó, ʻo ʻiloʻi heʻikai toe fakahū ia ki loto.

ʻI ha miniti siʻi mei ai, naʻá ne ongoʻi sai ange. Naʻá ne pehē ʻi heʻene lue foki atu ki he holó, naʻá ne fanongo ki ha pasipasi leʻo-lahi. Naʻe hangē naʻá ne maʻu ha ivi makehe! Naʻá ne fili kapau naʻe fiemaʻu ke ne kaka ki ʻolunga he falé, te ne fai ia koeʻuhí pē ke lava ʻo ne fanongo ki he toenga ʻo e malanga mālie ko ení. Ko Tokoua Claus, ko ha kiʻi talavou taʻu 23 ʻi he taimi ko iá, naʻá ne maʻu ha feituʻu ke kaka hake ai ki he ʻató! Ko e ngaahi matapā sioʻata ʻi he ʻató naʻe ava, pea ʻi heʻene ofi hake ki aí, naʻá ne fakatokangaʻi “naʻe lava ke ne fanongo lelei ai.”

Ka naʻe ʻikai ko Arthur pē naʻe ʻi aí. Naʻe ʻi ai foki mo e niʻihi hono kaungāmeʻá. Ko e taha ai, ko  Frank Johnson, naʻá ne lele atu ʻo ʻeke ange kiate ia, “ʻOku ʻi ai haʻo kiʻi hele māsila?”

“ʻIo, ʻoku ʻi ai,” ko e lea ia ʻa Arthur.

“Ko e tali koe ki heʻemau lotú,” ko e tali ia ʻa Frank. “ʻOkú ke sio ki he lā ʻoku takai ko ení? Ko ha fakaʻilonga ia, ʻoku haʻi ki he ngaahi foʻi faʻo ko ení. Fanongo lelei ki he Fakamāú. * ʻI heʻene pehē, ‘pea kuo pau ke mou tuʻuaki, tuʻuaki,’ tuʻusi ʻa e foʻi afo ʻe fā ko ení.”

Ko ia naʻe puke ʻe Arthur ʻa e helé, ʻo tatali mo e niʻihi kehé ki he fakaʻilongá. Taimi nounou mei ai, naʻe aʻu ʻa Tokoua Rutherford ki he tumutumu ʻene malangá. ʻI hono ueʻi ʻe he loto-māfaná mo e faivelengá, kuo pau pē naʻe kaikaila ʻa Tokoua Rutherford: “Hoko ko e kau fakamoʻoni anga-tonu mo moʻoni maʻá e ʻEikí. Laka atu ki muʻa ʻi he taú kae ʻoua kuo fakalala ʻa e toetoenga kotoa pē ʻo Pāpiloné. Fakaongo atu ki he mamaʻó ʻa e pōpoakí. Kuo pau ke ʻilo ʻe he māmaní ko Sihova ko e ʻOtuá ia pea ko Sīsū Kalaisí ko e Tuʻi ʻo e ngaahi tuʻi mo e ʻEiki ʻo e ngaahi ʻeiki. Ko e ʻaho eni ʻo e ngaahi ʻahó. Vakai, ʻoku pule ʻa e Tuʻí! Ko ʻene kau fakafofonga tuʻuakí kimoutolu. Ko ia tuʻuaki, tuʻuaki, tuʻuaki, ʻa e Tuʻí mo hono Puleʻangá!”

ʻOku fakamatala ʻa Arthur ko ia mo e fanga tokoua kehé naʻa nau tuʻusi ʻa e ngaahi afó pea naʻe ʻalu hifo māmālie ʻa e fakaʻilongá. ʻI he fehoanaki mo e mataʻitohi “ADV,” naʻe pehē ʻi he fakaʻilongá: “Tuʻuaki ʻa e Tuʻí mo e Puleʻangá.”

Ko e fakataha-lahi ʻi Cedar Point naʻá ne tokoniʻi ʻa e fanga tokouá ke tokangataha ki he ngāue mahuʻinga ʻo e malangaʻi ʻo e Puleʻangá, pea ko e faʻahinga naʻa nau maʻu ha laumālie loto-leleí naʻa nau fiefia ke kau ki ai. Ko ha kolopota (ʻoku ʻiloa he taimí ni ko e tāimuʻá) mei Oklahoma, ʻAmelika, naʻá ne tohi, “Ko e vāhenga naʻa mau ngāue aí ko e feituʻu keliʻanga malalá, pea naʻe lahi ʻaupito ai ʻa e masivá.” Naʻá ne pehē ʻi he faʻa fanongo ʻa e kakaí ki he pōpoaki naʻe maʻu ʻi he makasini Golden Age, “naʻa nau tangi ʻa loʻimata.” Naʻá ne fakamāʻopoʻopo ia ʻo peheni, “Ko ha tāpuaki ia ke fakafiemālieʻi kinautolu.”

Naʻe ongoʻi ʻe he Kau Ako Tohi Tapu ko ení ʻa e fakavavevave ʻa e lea ʻa Sīsū ʻi he Luke 10:2: “Ko e utu-taʻú ʻoku lahi, ka ʻoku tokosiʻi ʻa e kau ngāué.” ʻI he ngataʻanga ʻo e taʻú, naʻa nau fakapapauʻi lahi ange ke tuʻuaki atu ki he mamaʻó ʻa e pōpoaki ʻo e Puleʻangá.