1-2. (a) Ko e hā kuo fai ʻe he ngaahi puleʻanga ʻe niʻihi ki he kakai ʻa Sihová, ka ʻoku anga-fēfē fakafeangai ʻene kakaí? (e) ʻE lava fēfē ke iku atu ʻa e fakatangá ki he fiefia? (Lave foki ki he tā ʻi he takafí.)

 ʻI HE taimí ni, ko ʻetau ngāué ʻoku fakangatangata pe tapui ʻi he ngaahi fonua ʻe 30 tupu takatakai he māmaní. ʻI he niʻihi ʻo e ngaahi fonua ko iá, ko e kau maʻu mafaí kuo nau tuku pilīsone hotau fanga tokouá mo e fanga tuofāfiné. Ko e hā ʻa e hala naʻa nau faí? Fakatatau ki he vakai ʻa Sihová naʻe halaʻatā ha kovi naʻa nau fai. Ko e meʻa pē kuo nau faí ko e lau mo ako ʻa e Tohi Tapú, vahevahe atu ʻenau tuí ki he niʻihi kehé, pea maʻu ʻa e ngaahi fakatahá mo honau kaungātuí. Kuo nau fakafisi foki ke kau ʻi he ngaahi meʻa fakapolitikalé. Neongo ʻa e fakafepaki kakahá, ko e kau sevāniti faitōnunga ko eni ʻa e ʻOtuá kuo nau tauhi maʻu ʻenau anga-tonú *​—ʻo fakahāhā ʻa e līʻoa taʻealamamotu kia Sihova. Pea ʻoku nau fiefia ʻi hono fai iá!

² ʻOku ngalingali kuó ke sio ʻi he ngaahi tā ʻo e Kau Fakamoʻoni loto-toʻa ko ení pea fakatokangaʻi ʻenau fofonga malimalí. ʻOku nau fiefia koeʻuhí ʻoku nau ʻiloʻi ʻoku fiefia ʻa Sihova ʻiate kinautolu koeʻuhi ko ʻenau tauhi maʻu ʻenau anga-tonu kiate iá. (1 Kal. 29:17a) Naʻe pehē ʻe Sīsū: “Fiefia ē ko kinautolu kuo fakatangaʻi koeʻuhi ko e māʻoniʻoní . . . Mou fiefia mo tomeʻe, he ʻoku lahi hoʻomou totongí.”​—Māt. 5:10-12.

3. Hangē ko ia ʻoku hiki ʻi he Ngāue 4:19, 20, naʻe anga-fēfē fakafeangai ʻa e kau ʻapositoló ki he fakatanga ʻi he ʻuluaki senitulí, pea ko e hā hono ʻuhingá?

³ Ko hotau fanga tokouá mo e fanga tuofāfiné ʻoku nau hokosia ʻa e meʻa naʻe kātekina ʻe he kau ʻapositoló ʻi he ʻuluaki senitulí  ʻi hono fakatangaʻi ko ʻenau malanga fekauʻaki mo Sīsuú. Ko e kau fakamaau ʻi he fakamaauʻanga māʻolunga faka-Siú naʻa nau toutou “tuʻutuʻuni ke tuku ʻenau lea ʻi he huafa ʻo Sīsuú.” (Ngā. 4:18; 5:27, 28, 40) Naʻe anga-fēfē fakafeangai ʻa e kau ʻapositoló? (Lau ʻa e Ngāue 4:19, 20.) Naʻa nau ʻiloʻi ko ha mafai māʻolunga ange naʻá ne ‘fekauʻi kinautolu ke nau malanga ki he kakaí pea ke fai ha fakamoʻoni fakaʻāuliliki’ fekauʻaki mo e Kalaisí. (Ngā. 10:42) Ko ia ko ʻenau ongo tangata leá, ʻa Pita mo Sione, naʻá na lea loto-toʻa te nau talangofua ki he ʻOtuá kae ʻikai ki he kau fakamaau ko iá pea talaki heʻikai tuku ʻenau lea fekauʻaki mo Sīsuú. Ko hono moʻoní, naʻe hangē ia naʻa nau ʻeke ʻa e fehuʻi ko ení ki he kau maʻu mafaí, ‘ʻOku mou pehē koā ʻe kimoutolu ko hoʻomou fekaú ʻoku māʻolunga ange ʻi he fekau ʻa e ʻOtuá?’

4. Hangē ko ia ʻoku fakahaaʻi ʻi he Ngāue 5:27-29, ko e hā ʻa e faʻifaʻitakiʻanga naʻe fokotuʻu ʻe he kau ʻapositoló ki he kau Kalisitiane moʻoní kotoa, pea ʻe lava fēfē ke tau faʻifaʻitaki kiate kinautolu?

⁴ Naʻe fokotuʻu ʻe he kau ʻapositoló ha faʻifaʻitakiʻanga lelei kuo muimui ai ʻa e kau Kalisitiane moʻoní kotoa talu mei ai, ʻa ia, ke “talangofua ki he ʻOtuá ko e pulé ia kae ʻikai ki he tangatá.” (Lau ʻa e Ngāue 5:27-29.) Hili hono haha ʻa e kau ʻapositoló koeʻuhi ko ʻenau tauhi maʻu ʻenau anga-tonú, naʻa nau ʻalu atu mei he fakamaauʻanga māʻolunga faka-Siú, ʻo nau “fiefia koeʻuhi kuo lau kinautolu ʻoku taau ke ngaohikoviʻi” koeʻuhi ko e huafa ʻo Sīsuú, pea naʻa nau hokohoko atu ke malanga!​—Ngā. 5:40-42.

5. Ko e hā ʻa e ongo fehuʻi ʻoku fiemaʻu ke tau talí?

⁵ Ko e faʻifaʻitakiʻanga naʻe fokotuʻu ʻe he kau ʻapositoló ʻoku malanga hake ai ha ngaahi fehuʻi. Ko e fakatātaá, naʻe anga-fēfē fehoanaki ʻenau fili ke talangofua ki he ʻOtuá kae ʻikai ki he tangatá mo e fekau Fakatohitapu ke “fakamoʻulaloa ʻa e tokotaha kotoa pē ki he ngaahi mafai māʻolungá”? (Loma 13:1) ʻE lava fēfē ke tau “talangofua ki he ngaahi founga-pulé mo e kau maʻu mafaí,” hangē ko e lea ʻa e ʻapositolo ko Paulá, pea kei tauhi maʻu pē ʻa e anga-tonu ki he ʻOtuá ko hotau Pule muʻomuʻa tahá?​—Tai. 3:1.

6. (a) Ko hai ʻa e “ngaahi mafai māʻolungá” ʻoku lave ki ai ʻi he Loma 13:1, pea ko e hā ʻoku totonu ke tau ʻoatu kiate kinautolú? (e) Ko e hā ʻoku fakamoʻoniʻi fekauʻaki mo e kotoa ʻo e kau pule fakaetangatá?

⁶ Lau ʻa e Loma 13:1. ʻI he veesi ko ení, ko e  kupuʻi lea “ngaahi mafai māʻolungá” ʻoku ʻuhinga ia ki he kau pule fakaetangata ʻoku nau maʻu ʻa e mafai ke puleʻi ʻa e niʻihi kehé. Ko e kau Kalisitiané ʻoku nau fakamoʻulaloa ki he ngaahi mafai fakaemāmani ko ení. Ko e kau pule ko ení ʻoku nau tauhi maʻu ʻa e maʻumaʻuluta ʻa e kakaí, fokotuʻu ʻa e lao, pea ʻi he taimi ʻe niʻihi ʻoku aʻu ʻo nau taukapoʻi ʻa e kakai ʻa Sihová. (Fkh. 12:16) Ko ia ʻoku fekauʻi mai ke tau ʻoatu kiate kinautolu ʻa e ngaahi tukuhau, totongi, manavahē mo e fakaʻapaʻapa ʻoku nau fiemaʻú. (Loma 13:7) Neongo ia, ko e ngaahi puleʻanga fakaemāmani ko iá ʻoku nau maʻu ʻa e mafaí koeʻuhí pē ʻoku fakaʻatā ʻe Sihova ke nau maʻu ia. Naʻe fakamahino ʻe Sīsū ʻa e tefitoʻi moʻoni ko iá ʻi he taimi naʻe fakaʻeke ai ia ʻe he Kōvana Loma ko Ponitō Pailató. ʻI he lave ʻa Pailato ki he mafai naʻá ne maʻu ke fakahaofi ʻa e moʻui ʻa Sīsuú pe ke tāmateʻi iá, naʻe tala ange ʻe Sīsū: “Naʻe ʻikai ʻaupito mei ʻi ai hao mafai kiate au ka ne taʻeʻoua hono tuku atu kiate koe mei ʻolungá.” (Sione 19:9-11) Hangē pē ko e tuʻunga ʻo Pailató, ko e mafai ʻo e kotoa ʻo e kau pule fakaetangata mo e kau taki fakapolitikale ʻi he ʻaho ní ʻoku fakangatangata.

7. ʻI he ngaahi tuʻunga fē kuo pau ke ʻoua te tau fakamoʻulaloa ai ki he kau pule fakaetangatá, pea ko e hā ʻoku totonu ke nau lāuʻilo ki aí?

⁷ ʻOku fakamoʻulaloa ʻa e kau Kalisitiané ki he ngaahi puleʻanga fakaetangatá ʻi he taimi ʻoku ʻikai fepaki ai ʻa e ngaahi lao fakaemāmaní mo e lao ʻa e ʻOtuá. Ka ʻoku ʻikai lava ke tau talangofua ki he tangatá ʻi he taimi ʻoku nau fiemaʻu ai ke tau fai ha meʻa ʻoku tapui ʻe he ʻOtuá pe ʻi he taimi ʻoku nau tapui ai ʻa e meʻa ʻoku fiemaʻu ʻe he ʻOtuá. Ko e fakatātaá, te nau fiemaʻu nai ki he kau talavoú ke nau kau ʻi he kau tau ʻa e fonuá. * Pe te nau tapui nai hono ngāueʻaki ʻetau Tohi Tapú mo ʻetau ʻū tohi Fakatohitapú pea taʻofi ʻetau malangá mo e lotu fakatahá. ʻI he taimi ʻoku ngāuehalaʻaki ai ʻe he kau pulé honau mafaí, hangē ko hono fakatangaʻi ʻa e kau ākonga ʻa Kalaisí, kuo pau ke nau fai ha tali ki he ʻOtuá. ʻOku ʻafioʻi ia ʻe Sihova!​—Tml. 5:8.

8. Ko e hā ʻa e kehekehe ʻi he “māʻolungá” mo e “aoniú,” pea ko e hā ʻoku mahuʻinga ai ení?

⁸ Ko e foʻi lea “māʻolunga” ʻoku ʻuhinga iá ki he “tuʻunga lelei ange, lahi ange, māʻolunga ange.” Ka ʻoku ʻikai ʻuhinga iá “ki he tuʻunga lelei taha, lahi taha, māʻolunga taha.” Ko hono fakamatalaʻi eni ia ʻo ha foʻi lea ʻe taha​—ko e “aoniu.” Neongo ʻoku lave ki he ngaahi puleʻanga fakaetangatá ko e “ngaahi mafai māʻolungá,” ʻoku ʻi ai ha toe mafai ʻa ia ko e māʻolunga tahá ia​—ko e aoniú. ʻI he Tohi Tapú, ʻoku tuʻo fā hono ui ai ʻa Sihova ko e ʻOtuá ko e “Tokotaha Aoniú.”​—Tan. 7:18, 22, 25, 27.

9. Ko e hā naʻe mamata ki ai ʻa e palōfita ko Tanielá ʻi he ngaahi vīsoné?

⁹ Naʻe mamata ʻa e palōfita ko Tanielá ʻi ha ngaahi vīsone naʻe fakahaaʻi mahino ai ʻa e aoniu ʻa Sihova ʻi he kotoa ʻo e ngaahi mafai kehé. Naʻe ʻuluaki mamata ʻa Taniela ki ha ngaahi fuʻu manu ʻe fā ʻoku nau fakafofongaʻi ʻa e ngaahi hau ʻi māmani ʻi he kuohilí mo e lolotongá ni​—Pāpilone, Mītia-Pēsia, Kalisi pea mo Loma pea mo hono huli ʻi onopōní, ʻa Pilitānia-ʻAmelika. (Tan. 7:1-3, 17) Naʻe mamata leva ʻa Taniela kia Sihova ko e ʻOtuá ʻokú ne ʻafio ʻi hono taloni fakahēvaní. (Tan. 7:9, 10) Ko e meʻa hono hoko naʻe mamata ki ai ʻa e palōfita faitōnunga ko iá ʻoku totonu ke hoko ko ha fakatokanga ki he kau pule ʻi he ʻaho ní.

10. Fakatatau ki he Taniela 7:13, 14, 27, ko hai ʻoku ʻoange ki ai ʻe Sihova ʻa e tuʻunga-pule ki he māmaní, pea ko e hā ʻoku fakamoʻoniʻi heni fekauʻaki mo Iá?

¹⁰ Lau ʻa e Taniela 7:13, 14, 27. Ko e ʻOtuá ʻokú ne toʻo ʻa e tuʻunga-pule kotoa pē mei he ngaahi puleʻanga fakaetangatá pea foaki ia ki ha niʻihi kehe ʻoku nau tuha ange mo mālohi ange. Ka kia hai? Ki ha “taha hangē ha foha ʻo e tangatá,”  ko Sīsū Kalaisi, pea ki he “kakai tapu ʻa e Tokotaha Aoniú,” ʻa e toko 144,000 te nau pule “ʻo taʻengata pea taʻengata.” (Tan. 7:18) ʻOku hā mahino, ko Sihova “ʻa e Tokotaha Aoniú,” he ko ia toko taha pē ʻokú ne maʻu ʻa e mafai ke fai ha ngāue pehē.

11. Ko e hā ha toe meʻa naʻe hiki ʻe Taniela ʻoku fakahaaʻi ai ʻa e aoniu ʻa Sihova ʻi he ngaahi puleʻangá?

¹¹ Ko e meʻa naʻe mamata ki ai ʻa Taniela ʻi he vīsoné ʻoku fehoanaki ia mo e meʻa naʻá ne lave ki ai ki muʻa ange. Ko e “ʻOtua ʻo langí,” ko e lea ia ʻa Tanielá, ʻokú ne “fakahifo ʻa e ngaahi tuʻi pea fokotuʻu ʻa e ngaahi tuʻi.” Naʻá ne toe hiki “ko e Fungani Māʻolungá ʻa e Pule ʻi he puleʻanga ʻo e faʻahinga ʻo e tangatá pea ko ia ʻokú ne foaki ʻa e pulé ki ha taha pē ʻokú ne loto ki ai.” (Tan. 2:19-21; 4:17) Kuo ʻi ai ha taimi kuo fakahifo ai pe fokotuʻu ʻe Sihova ha kau pule? ʻAupito!

12. ʻOmai ha fakatātā ʻo e founga hono fakahifo ʻe Sihova ʻa e ngaahi tuʻi mei honau taloní ʻi he kuohilí. (Sio ki he fakatātaá.)

¹² Kuo fakahaaʻi mahino ʻe Sihova ʻene aoniú ʻi he “ngaahi mafai māʻolungá.” Fakakaukau ki ha fakatātā ʻe tolu. Ko Felo ʻo ʻIsipité naʻá ne tuku pōpula ʻa e kakai ʻa Sihová pea toutou fakafisi ke tuku ange kinautolu. Ka naʻe fakatauʻatāinaʻi kinautolu ʻe he ʻOtuá pea tuku ke melemo ʻa Felo ʻi he Tahi Kulokulá. (ʻEki. 14:26-28; Saame 136:15) Ko Tuʻi Pelisasa ʻo Pāpiloné naʻá ne fai ha kātoanga kai pea “hakeakiʻi [ʻa ia tonu] ke fakafepaki ki he ʻEiki ʻo e langí” pea “fakahīkihikiʻi ʻa e ngaahi ʻotua siliva mo koula” kae ʻikai ko Sihova. (Tan. 5:22, 23) Ka naʻe fakatōkilaloʻi ʻe he ʻOtuá ʻa e tangata hīkisia ko iá. ʻI he “pō pē ko iá,” naʻe tāmateʻi ʻa Pelisasa pea ko hono puleʻangá naʻe foaki ia ki he kau Mītiá mo e kau Pēsiá. (Tan. 5:28, 30, 31) Ko Tuʻi Hēlota ʻAkilipa I ʻo Pālesitainé naʻá ne fekauʻi ke tāmateʻi ʻa e ʻapositolo ko Sēmisí pea tuku pilīsone leva ʻa e ʻapositolo ko Pitá, pea mo e taumuʻa ke tāmateʻi ia. Ka naʻe taʻofi ʻe Sihova ʻa Hēlota mei heʻene fakahoko ʻene faʻufaʻú. “Naʻe taaʻi ia ʻe he ʻāngelo ʻa Sihová,” peá ne mate.​—Ngā. 12:1-5, 21-23.

13. ʻOmai ha fakatātā ʻo e founga naʻe ikunaʻi ai ʻe Sihova ha kulupu ʻo e kau pule.

¹³ Kuo toe fakahaaʻi foki ʻe Sihova ʻene aoniú ʻi he fekauʻaki mo e kulupu ʻo e kau pule. Naʻá ne faitau maʻa ʻIsileli, ʻo ʻai ke malava ke nau fakaʻauha ʻa e faʻahi ʻo e ngaahi tuʻi Kēnani ʻe 31 pea ke ikunaʻi ʻa e ngaahi konga lahi ʻo e Fonua ʻo e Talaʻofá. (Sios. 11:4-6, 20; 12:1, 7, 24) Naʻe toe tokoniʻi ʻe Sihova ʻa e kau ʻIsilelí ke nau taaʻi  ʻa Tuʻi Peni-hētati mo e kau pule Sīlia kehe ʻe toko 32.​—1 Tuʻi 20:1, 26-29.

14-15. (a) Ko e hā naʻe leaʻaki ʻe Tuʻi Nepukanesa mo Talaiasi fekauʻaki mo e tuʻunga-hau ʻo Sihová? (e) Ko e hā naʻe leaʻaki ʻe he tokotaha-tohi-sāmé fekauʻaki mo Sihova mo Hono puleʻangá?

¹⁴ ʻI he taimi ki he taimi, kuo fakamoʻoniʻi ʻe Sihova ko ia ʻa e Tokotaha Aoniú! ʻI he taimi naʻe pōlepole ai ʻa Tuʻi Nepukanesa ʻo Pāpiloné ʻi hono ‘mālohí mo e iví pea mo hono lāngilangiʻia lahí’ kae ʻikai ke fakahaaʻi anga-fakatōkilalo ko Sihova ʻa e Tokotaha ʻoku tuha mo e fakahīkihikí, naʻe ʻai ʻe he ʻOtuá ke ne vale. Hili ʻene saí, ko Nepukanesa naʻá ne “fakahīkihikiʻi ʻa e Fungani Māʻolungá” pea fakahaaʻi ko “ʻene [Sihova] pulé ko ha pule taʻengata.” Naʻá ne toe pehē: “ʻOku ʻikai ha taha ʻe malava ke ne taʻofi ia.” (Tan. 4:30, 33-35) Hili hono ʻahiʻahiʻi ʻa e anga-tonu ʻa Taniela ki he ʻOtuá pea fakahaofi ia ʻe Sihova mei he ʻana ʻo e fanga laioné, naʻe tuʻutuʻuni ʻe Tuʻi Talaiasi: “Ki he kakaí ke nau tetetete ʻi he manavahē ʻi he ʻao ʻo e ʻOtua ʻo Tanielá. He ko e ʻOtua moʻui ia pea ʻokú ne tolonga ʻo taʻengata. Ko hono puleʻangá ʻe ʻikai ʻaupito ke ʻauha, pea ko hono tuʻunga-haú ʻoku taʻengata.”​—Tan. 6:7-10, 19-22, 26, 27, fkm. ʻi lalo.

¹⁵ Naʻe fakahaaʻi ʻe he tokotaha-tohi-sāmé: “Kuo veuki ʻe Sihova ʻa e faʻufaʻu ʻa e ngaahi puleʻangá; kuó ne fakafehālaakiʻi ʻa e palani ʻa e ngaahi kakaí.” Naʻá ne toe pehē: “Fiefia ē ko e puleʻanga ʻa ia ko honau ʻOtuá ʻa Sihová, ʻa e kakai kuó ne fili ko ʻene meʻa ʻaʻaná.” (Saame 33:10, 12) He ʻuhinga lelei ē ko ia ke tau tauhi maʻu ʻetau anga-tonu kia Sihová!

16. Ko e hā ʻe lava ke tau falala pau ki ai fekauʻaki mo e “fuʻu mamahi lahi,” pea ko e hā hono ʻuhingá? (Sio ki he fakatātaá.)

¹⁶ Kuo tau lau ʻa e meʻa naʻe fai ʻe Sihova ʻi he kuohilí. Ko e hā leva ʻoku tau ʻamanekina ʻe hoko ʻi he kahaʻu vave maí? ʻE lava ke tau falala pau ʻe fakahaofi ʻe Sihova ʻene kau sevāniti mateakí lolotonga ʻa e “fuʻu mamahi lahi” ʻoku tuʻunuku maí. (Māt. 24:21; Tan. 12:1) Te ne fai eni ʻi he taimi ʻe ʻohofi anga-fītaʻa ai ʻe ha kulupu ʻo e ngaahi puleʻangá, ʻa ia ʻoku ʻiloa ko Koki ʻo Mēkokí,  ʻa e faʻahinga ʻoku faitōnunga kia Sihova takatakai he māmaní. Neongo kapau ʻe kau ʻi he kulupu ko iá ʻa e kau mēmipa kotoa ʻe 193 ʻo e Ngaahi Puleʻanga Fakatahatahá, heʻikai pē haʻanau vāvātatau mo e Tokotaha Aoniú mo ʻene kau tau fakahēvaní! ʻOku talaʻofa ʻe Sihova: “Te u fakahīkihikiʻi moʻoni au mo fakamāʻoniʻoniʻi au pea ʻai ke u ʻiloa ʻi he ʻao ʻo e ngaahi puleʻanga lahi; pea kuo pau ke nau ʻilo ko Sihova au.”​—ʻIsi. 38:14-16, 23; Saame 46:10.

17. Ko e hā ʻa e kahaʻu ʻoku tomuʻa tala ʻe he Tohi Tapú fekauʻaki mo e ngaahi tuʻi ʻo e māmaní pea mo e faʻahinga ʻoku tauhi anga-tonu kia Sihová?

¹⁷ Ko e ʻoho ʻa Kokí te ne kamataʻi ʻa e tau lahi ʻa Sihova ʻi ʻĀmaketoné ʻi Heʻene fakaʻauha ʻa e “ngaahi tuʻi ʻo e māmani kotoa kuo nofoʻí.” (Fkh. 16:14, 16; 19:19-21) ʻI hono kehé, “ko e faitotonú pē ʻe nofo ʻi he māmaní, pea ko e tokotaha ʻoku tauhi anga-tonú te ne ʻi ai ai pē.”​—Pal. 2:21, fkm. ʻi lalo.

18. Ko e hā ʻa e meʻa kuo loto-lelei ʻa e kau Kalisitiane moʻoni tokolahi ke fai, pea ko e hā hono ʻuhingá? (Taniela 3:28)

¹⁸ ʻI he laui senituli, ko e kau Kalisitiane moʻoni tokolahi kuo nau tuku ke ʻi ha tuʻunga fakatuʻutāmaki ʻenau tauʻatāiná pea naʻa mo ʻenau moʻuí koeʻuhi ko ʻenau ʻofa kia Sihova ko honau Pule Fakalevelevá. Ko e kau tauhi anga-tonu kinautolu, ʻoku nau maʻu ʻa e fakapapau hangē ko e kau Hepelū ʻe toko tolu ʻa ia naʻe fakahaofi kinautolu mei he fōnise afí koeʻuhi ko ʻenau nofoʻaki faitōnunga ki he Tokotaha Aoniú.​—Lau ʻa e Taniela 3:28.

19. ʻE makatuʻunga ʻi he hā hono fakamāuʻi ʻe Sihova ʻene kakaí, pea ko e hā ʻoku fiemaʻu meiate kitautolu he taimi ní?

¹⁹ Naʻe tohi ʻe he tokotaha-tohi-saame ko Tēvitá fekauʻaki mo e mahuʻinga ʻo e tauhi maʻu ʻa e anga-tonu ki he ʻOtuá: “ʻE hilifaki ʻe Sihova ʻa e tautea ki he ngaahi kakaí. Fakamāuʻi au, ʻe Sihova, ʻo fakatatau ki heʻeku māʻoniʻoní pea fakatatau ki heʻeku anga-tonú.” (Saame 7:8) Pea naʻe toe hiki ʻe Tēvita: “ʻOfa ke maluʻi au ʻe he anga-tonú mo e faitotonú.” (Saame 25:21) Ko e founga lelei taha ke moʻui aí ko e nofoʻaki faitōnunga kia Sihova, ʻo tauhi maʻu ʻetau mateaki kiate iá tatau ai pē pe ko e hā te tau fehangahangai mo iá! Te tau maʻu leva ʻa e ongoʻi tatau mo e tokotaha-tohi-sāmé ʻa ia naʻá ne hiki: “Fiefia ē ko kinautolu ʻoku tauhi anga-tonu . . . , ʻa ia ʻoku nau ʻaʻeva ʻi he lao ʻa Sihová.”​—Saame 119:1, fkm. ʻi lalo.