Lolotonga ʻa e taʻú, naʻe fai ʻe he kautahá ʻa e ngaahi liliu ʻe niʻihi naʻe tokoni ke pouaki ʻa e fāʻūtaha ʻi he lotú ʻi he haʻohaʻonga ʻo e Kau Ako Tohi Tapú. Naʻe kamata ke pulusi ʻi he Watch Tower ʻa e fakamatala fekauʻaki mo e ngaahi veesi Tohi Tapu naʻa nau lāulea ki ai ʻi heʻenau Fakataha Lotu, Fakahīkihiki mo e Tala-Loto fakauiké. ʻIkai ko ia pē, naʻe faʻu ʻe he Kau Ako Tohi Tapú ha tohimāhina ʻo lisi ai ʻa e veesi Tohi Tapu ki he uike taki taha pehē ki ha himi ke hivaʻi lolotonga ʻa e ako fakafoʻituituí mo e lotu fakafāmilí.

ʻI he ngaahi fakatahá, ko e Kau Ako Tohi Tapú naʻa nau fai ʻa e “ngaahi tala-loto” fekauʻaki mo ha hokosia ʻi he ngāue fakafaifekaú, ko ha fakamālō kia Sihova, ko ha hiva pe naʻa mo ha lotu. Ko Eva Barney, naʻá ne papitaiso ʻi he 1923 ʻi hono taʻu 15, naʻá ne manatu: “Kapau naʻá ke loto ke fai ha tala-loto, te ke tuʻu hake pea kamata leaʻaki ha meʻa hangē ko e, ‘ʻOku ou fakaʻamu ke fakamālō ki he ʻEikí ki he lelei kotoa kuó ne fai maʻakú.’” Ko e fanga tokoua ʻe niʻihi naʻa nau saiʻia ke tala-loto. Naʻe hoko atu ʻa Tuofefine Barney: “Ko e tokoua ʻofeina ko Godwin naʻe lahi ʻaupito ʻa e ngaahi meʻa ke ne fakamālō ai ki he ʻEikí. Ka ʻi he sio ʻa hono uaifí ki he tokoua naʻá ne fakahoko ʻa e fakatahá ʻoku kamata ke ne hohaʻá, naʻá ne fusi ʻa e kote hono husepānití, pea te ne tangutu ki lalo.”

Ko e kalasi taki taha, naʻá nau fakahoko tuʻo taha ʻi he māhina ha Fakataha Lotu, Fakahīkihiki mo e Tala-Loto makehe. ʻI he fakamatala ki he fakataha ko ení, naʻe pehē ʻi he Watch Tower ʻo ʻEpeleli 1, 1923: “Ko e vaeua ʻo e fakatahá ʻoku totonu ke tuku taha ia ki he ngaahi tala-loto fekauʻaki mo e ngāue fakamalangá pea fakalototoʻaʻi ʻa e kau ngāué. . . . ʻOku mau tui ko e ngāue fāʻūtaha ko ení te ne tohoakiʻi ke toe vāofi ange ʻa e ngaahi kaungāmeʻá.”

Ko Charles Martin, taʻu 19, ko ha tokotaha ngāue ʻi he kalasí (tokotaha malanga ʻi he fakatahaʻangá) mei Vancouver, Kānata, naʻá ne maʻu ʻaonga lahi mei he ngaahi fakataha ko ení. Naʻá ne manatu ki mui ai: “Ko e feituʻu eni naʻá ku fuofua ako ai ʻa e meʻa ke leaʻaki ʻi he ngaahi matapaá. Naʻe ʻi ai maʻu pē ha taha naʻe lave ki ha hokosia mei he ngāue fale ki he falé. Naʻá ku maʻu mei heni ʻa e ngaahi fakakaukau ki he meʻa ke leaʻakí mo e founga ke tali ai ki he ngaahi fakafepaki kehekehe.”

“Ko e ngaahi ʻaho malangá” naʻe toe tokoni ia ki he fāʻūtaha fakaekautahá. Ko e ʻīsiu ʻo e  Watch Tower ʻo ʻEpeleli 1, 1923, naʻe fanongonongo ai: “Koeʻuhí ke tau ngāue fāʻūtaha kotoa . . . , ko e Tūsite, Mē 1, 1923, kuo vaheʻi ko ha ʻaho ke tau malanga kotoa ai. Pea pehē pē ki he ʻuluaki Tūsite ʻo e māhina taki taha hili iá . . . Ko e mēmipa kotoa pē ʻo e kalasi taki taha ʻoku totonu ke nau kau ʻi he ngāué.”

Naʻa mo e Kau Ako Tohi Tapu kei siʻí naʻa nau kau ʻi he ngāué ni. Ko Hazel Burford, naʻá ne taʻu 16 pē ʻi he taimi ko iá, naʻá ne pehē: “Naʻe ʻomai ʻi he Bulletin ha sīpinga fetalanoaʻaki ke mau ako maʻuloto. a Naʻá ku kau longomoʻui mo ʻeku kui tangatá ʻi he kotoa ʻo e ngaahi ngāue ko ení.” Kae kehe, ko Tuofefine Burford naʻá ne fehangahangai mo ha fakafepaki mei ha matavai taʻeʻamanekina. Naʻá ne pehē: “Ko ha tokoua taʻumotuʻa ʻofeina ʻe taha naʻá ne fakafepakiʻi mālohi ʻeku talanoa ki he kakaí. ʻI he taimi ko iá, naʻe ʻikai ke mahinoʻi ʻe he niʻihi ko e kotoa ʻo e Kau Ako Tohi Tapú, kau ai ʻa e ‘kau talavoú mo e kau finemuí,’ ʻoku totonu ke nau kau ʻi hono fakahīkihikiʻi hotau Tokotaha-Fakatupu Maʻongoʻongá.” (Saame 148:​12, 13) Ka naʻe kīvoi pē ʻa Tuofefine Burford. Ki mui ai, naʻá ne maʻu ʻa e kalasi hono ua ʻo e Akoʻanga Kiliatí pea ngāue ko ha misinale ʻi Panamā. ʻI he faai atu ʻa e taimí, ko e fanga tokoua ko iá naʻa nau fakatonutonu ʻenau vakai ki he kau ʻa e fānaú ʻi he ngāue fakafaifekaú.

Ko e ngaahi fakataha-lahi fakalotofonua mo fakavahé naʻá ne toe fakafāʻūtahaʻi ʻa e fanga tokouá. Ko e lahi ʻo e ngaahi fakataha-lahi ko ení naʻe kau ki ai ʻa e ngaahi ʻaho malanga, hangē ko ia naʻe fai ʻi Winnipeg, Kānata. ʻI Maʻasi 31, naʻe fakakau ʻi he fakataha-lahi ko ení ha “ʻAho Malanga Makehe ʻi Winnipeg,” ʻa ia naʻe fakaafeʻi ʻa e kau maʻu fakataha-lahí kotoa ke kau ki ai. Ko e ngaahi ʻaho malanga pehení naʻe fakatoka ai ha makatuʻunga ki ha ngāue lahi ange ʻi he kahaʻú. ʻI ʻAokosi 5, naʻe fakafuofua ki he kakai ʻe toko 7,000 naʻa nau maʻu ha fakataha-lahi ʻe taha ʻi Winnipeg. ʻI he taimi ko iá, ko e kau maʻu fakataha tokolahi taha eni ʻi ha fakataha-lahi ʻi Kānata.

Ko e fakataha-lahi mahuʻinga taha ki he kakai ʻa Sihová ʻi he 1923 naʻe fai ʻi ʻAokosi 18-26, ʻi Los Angeles, Kalefōnia. ʻI he ngaahi uike ofi ki he fakataha-lahí, naʻe tuʻuaki ʻi he nusipepá ʻa e kātoangá pea naʻe tufaki ʻe he Kau Ako Tohi Tapú ʻa e  lauʻipepa-tuʻuaki ʻe 500,000 tupu. Naʻe fakapipiki ʻa e tuʻuakí ʻi he ngaahi meʻalele uta pāsese maʻá e kakaí mo e fakatāutahá.

ʻI he Tokonaki, ʻAokosi 25, naʻe fakahoko ʻe Tokoua Rutherford ʻa e malanga “Fanga Sipí mo e Fanga Kosí,” ʻa ia naʻá ne fakahaaʻi māʻalaʻala ai ko e “fanga sipí” ko e kakai hehema totonu ia te nau moʻui ʻi ha māmani palataisi. Naʻá ne toe fakahaaʻi ʻa e fakapapau “Ko ha Fakatokanga.” Naʻe fakahalaiaʻi ʻe he fakapapau ko ení ʻa e Puleʻanga-Haʻa-Kalisitiané pea ekinaki ki he faʻahinga loto-totonú ke nau mavahe mei “Pāpilone ko e Lahi.” (Fkh. 18:​2, 4) Ki mui ai, ko e Kau Ako Tohi Tapu faivelenga takatakai he māmaní naʻa nau kau fakataha ʻi hono tufaki ʻa e ngaahi tatau ʻe laui miliona ʻo e fakapapau ko ení.

ʻI he ʻaho fakaʻosi ʻo e fakataha-lahí, ko e kau maʻu fakataha ʻe toko 30,000 tupu naʻa nau fanongo ki hono fakahoko ʻe Tokoua Rutherford ʻa e malanga maʻá e kakai “Laka Atu ʻa e Ngaahi Puleʻangá Kotoa ki ʻĀmaketone, ka ko e Laui Miliona Heʻikai ʻAupito Ke Nau Mate.” ʻI he tomuʻa ʻiloʻi ʻe tokolahi ʻa e fuʻu kakaí, naʻe haea ʻe he Kau Ako Tohi Tapú ha fuʻu fale faiva naʻe toki langa foʻou ʻi Los Angeles. Ke fakapapauʻi ʻe lava ke fanongo ki ai ʻa e tokotaha kotoa, naʻe ngāueʻaki ʻe he fanga tokouá ʻa e naunau meʻa fakaongo leʻo-lahi ʻi he sitētiumé, ʻa ia ko ha tekinolosia foʻou ia ʻi he taimi ko iá. Naʻe fanongo ʻa e tokolahi ange ki he polokalamá ʻi he letioó.

ʻI he taʻu 1923, naʻe hā mahino ʻa e fakalahi atu ʻa e ngāue fakamalangá ʻi ʻAfilika, ʻIulope, ʻInitia mo ʻAmelika Tonga. ʻI ʻInitia, ko A. J. Joseph lolotonga ʻene tokangaʻi hono uaifí mo e fānau ʻe toko ono, naʻá ne tokangaʻi mo hono faʻu ʻo e ʻū tohí ʻi he lea faka-Hinitī, faka-Tamili, faka-Teluku mo e faka-ʻUtu.

ʻI Siela Leone, ko e Ako Tohi Tapu ko Alfred Joseph mo Leonard Blackman naʻá na tohi ki he ʻuluʻi ʻapitanga ʻi māmani ʻi Brooklyn, Niu ʻIoké, ʻo kole ha tokoni. ʻI ʻEpeleli 14, 1923, naʻe tali ai ʻena kolé. “ʻI he fuoloa ʻa e poʻulí ʻi ha Tokonaki ʻe taha,” ko e lau ia ʻa Alfred, “Naʻá ku maʻu ha tā telefoni taʻeʻamanekina.” Naʻá ne fanongo ki ha leʻo matolu ʻokú ne ʻeke ange, “Ko koe naʻá ke tohi ki he Watch Tower Society ʻo kole ki ha kau malangá?” “ʻIo,” ko e tali ia ʻa Alfred. “ʻIo, naʻa nau fekauʻi mai au.” Ko e leʻo ia ʻo William R. Brown. Naʻá ne tūʻuta atu ʻi he ʻaho ko iá mei he Kalipiané mo hono uaifí, ʻa Antonia mo ʻene ongo kiʻi tamaiki fefiné, ʻa Louise mo Lucy. Naʻe ʻikai tatali fuoloa ʻa e fanga tokouá ke fetaulaki mo e kau aʻu foʻou atú.

 Naʻe hoko atu ʻa Alfred, ʻo pehē: “ʻI he pongipongi hokó pē, lolotonga ʻema fakahoko mo Leonard ʻemau ako Tohi Tapu fakauiké naʻá ma sio atu ki ha tangata kaukaua ʻi he matapaá. Ko Tokoua Brown ia. Naʻá ne faivelenga ʻaupito ʻi he moʻoní he naʻá ne loto ke fai ha malanga maʻá e kakai ʻi he ʻaho hokó pē.” ʻI loto ʻi ha māhina ʻe taha, naʻe tufa ʻe Tokoua Brown ʻa e ʻū tohi kotoa naʻá ne haʻu mo iá. Naʻe vave ʻene maʻu ha toe ʻū tohi ʻe 5,000, pea ʻikai fuoloa naʻe toe fiemaʻu ʻa e ʻū tohi lahi ange. Ka naʻe ʻikai ke ʻiloa ʻa Tokoua Brown ko ha tokotaha fakatau tohi. ʻI he kotoa ʻene ngāue fuoloa ko ha sevāniti faivelenga ʻa Sihová, naʻá ne toutou lave ki he Folofolá ʻi heʻene ngaahi malangá, ʻo uiʻaki ai ia ʻa e hingoa ko Brown Tohi Tapu.

Lolotonga iá, ko e ʻōfisi vaʻa ʻi Barmen, Siamané, naʻe fuʻu tokolahi, pea naʻe fehangahangai ʻa e koló mo e fakamanamana ʻo hano ʻohofi ʻe he fonua kaungāʻapi ko Falaniseé. Naʻe maʻu ʻe he Kau Ako Tohi Tapú ha fale ʻi Magdeburg naʻe hā ngali feʻungamālie mo ʻenau ngāue pulusí. ʻI Sune 19, naʻe maau hono fakamāʻopoʻopo ʻe he fanga tokouá ʻa e meʻangāue pulusí mo e ngaahi naunau kehe pea hiki ki he Pēteli foʻou ʻi Magdeburg. ʻI he ʻaho hili pē hono fakahā ki he ʻuluʻi ʻapitanga ʻi māmaní kuo kakato ʻa e hikí, naʻe fanongonongo ʻi he ngaahi nusipepá kuo puke ʻe Falanisē ʻa e kolo ko Barmen. Naʻe vakai ʻa e fanga tokouá ko e hikí ko e fakamoʻoni ia ʻo e tāpuaki mo e maluʻi ʻa Sihová.

ʻI Pelēsila, ko George Young, naʻá ne fononga ʻi he ngaahi feituʻu lahi ke fakamafola ʻa e ongoongo leleí, fokotuʻu ha vaʻa foʻou pea kamata ke pulusi ʻa e Watch Tower ʻi he lea faka-Potukalí. ʻI loto pē ʻi ha ngaahi māhina siʻi, naʻá ne tufa ʻa e ʻū tohi ʻe 7,000 tupu. Ko ʻene tūʻuta ʻi Pelēsilá naʻe maʻu foki ai ʻe Sarah Ferguson ha faingamālie fakafiefia. Naʻá ne lau ʻa e Watch Tower talu mei he 1899, ka naʻe teʻeki ai malava ke ne fakaʻilongaʻi ʻene fakatapuí ʻaki ʻa e papitaiso ʻi he vaí. ʻI ha ngaahi māhina siʻi ki mui ai, ko Tuofefine Ferguson mo ʻene fānau ʻe toko fā naʻe malava ke nau fou ʻi he sitepu mahuʻinga ko ení.

ʻI he fakaʻosinga ʻo e taʻú, ko e ola ʻo e feinga ʻa e Kau Ako Tohi Tapú ke fāʻūtaha ʻi he lotú naʻe lave ki ai ʻi he Watch Tower ʻo Tīsema 15, 1923: “ʻOku faingofua ke ʻiloʻi ko e ngaahi kalasí . . . ʻoku nau ʻi ha tuʻunga fakalaumālie lelei . . . Tau tui hotau teunga taú pea fakafoʻou ʻetau faivelengá mo e fakapapau ke tutui atu lolotonga ʻa e taʻu ʻoku hanga mei muʻá, ʻo fiefia ʻi heʻetau laka atú.”

Ko e taʻu ka hokó ko ha taʻu fakahisitōlia ia ki he Kau Ako Tohi Tapú. Ko e fanga tokoua ʻi he Pētelí naʻa nau ngāue ʻi he laui māhina ʻi ha konga kelekele ʻi he Motu ko Staten, ko ha fononga nounou mei honau ʻuluʻi ʻapitanga ʻi Brooklyn. Ko e langa naʻe fai ʻi he konga kelekele foʻou ko iá naʻe kakato ʻi he konga ki muʻa ʻo e 1924, pea naʻe tokoni ia ki hono fakafāʻūtahaʻi ʻa e fetokouaʻakí pea fakamafola ʻa e ongoongo leleí ʻi he ngaahi founga naʻe ʻikai ʻaupito malava ki muʻa.