1. Ko e hā ʻoku leaʻaki ʻe ha ʻāngelo, pea ko e hā ʻene ʻuhinga kiate kitautolú?

 KAPAU ʻe lea atu ha ʻāngelo kiate koe, te ke fanongo ki he meʻa te ne leaʻakí? ʻI he ʻahó ni, ʻoku lea ha ʻāngelo “ki he puleʻanga mo e matakali mo e lea mo e kakai kotoa pē.” Ko e hā ʻokú ne leaʻakí? “Mou manavahē ki he ʻOtuá pea ʻoange kiate ia ʻa e lāngilangí . . . Lotu ki he Tokotaha naʻá ne ngaohi ʻa e langí pea mo e māmaní.” (Fkh. 14:​6, 7) Ko Sihova ʻa e ʻOtua moʻoni pē taha ʻoku totonu ke lotu ki ai ʻa e tokotaha kotoa. He fakamālō ē ko kitautolu ʻi heʻene ʻomai ʻa e faingamālie mahuʻinga ke lotu kiate ia ʻi hono temipale lahi fakalaumālié!

2. ʻOku ʻuhinga ki he hā ʻa e temipale lahi fakalaumālie ʻo Sihová? (Sio foki ki he puha “ Meʻa ʻOku ʻIkai ʻUhinga ki Aí.”)

² ʻOku ʻuhinga moʻoni ki he hā ʻa e temipale fakalaumālié, pea ʻe lava ke tau maʻu mei fē ʻa e ngaahi fakaikiiki fekauʻaki mo iá? Ko e temipale fakalaumālié ʻoku ʻikai ko ha fuʻu fale moʻoni. Ko e fokotuʻutuʻu ia ʻa Sihova ki hono fakahoko ʻo e lotu ʻoku fakahōifua ʻo makatuʻunga ʻi he feilaulau huhuʻi ʻa Sīsuú. Naʻe fakamatalaʻi ʻe he ʻapositolo ko Paulá ʻa e fokotuʻutuʻu ko ení ʻi he tohi naʻá ne fai ki he kau Kalisitiane Hepelū ʻi he ʻuluaki senitulí ʻa ia naʻa nau nofo ʻi Siuteá. b

3-4. Ko e hā naʻe tokanga ki ai ʻa Paula fekauʻaki mo e kau Kalisitiane Hepelū ʻi Siuteá, pea naʻe anga-fēfē ʻene tokoniʻi kinautolú?

³ Ko e hā naʻe fai ai ʻe Paula ʻene tohi ki he kau Kalisitiane Hepelū ʻi Siuteá? ʻOku ngalingali ko ha ʻuhinga tefito ʻe ua. ʻUluakí, ke ʻoatu kiate kinautolu ʻa e fakalototoʻa. Ko e tokolahi taha ʻo kinautolú  naʻe ʻohake ʻi he lotu faka-Siú. Naʻe manukiʻi nai kinautolu ʻe honau kau taki lotu ki muʻá ki heʻenau hoko ko e kau Kalisitiané. Ko e hā hono ʻuhingá? Koeʻuhí naʻe ʻikai ha temipale fisifisimuʻa ki he kau Kalisitiané ke nau ʻalu ʻo lotu ai, ʻikai ha ʻōlita ke nau fai ai ʻa e ngaahi feilaulau ki he ʻOtuá, pea ʻikai ha kau taulaʻeiki ke fai fatongia kiate kinautolu. Naʻe mei lava ke fakalotosiʻi eni ki he kau ākonga ʻa Kalaisí pea fakavaivaiʻi ʻenau tuí. (Hep. 2:1; 3:​12, 14) Ko e niʻihi ʻo kinautolu naʻe aʻu nai ʻo fakataueleʻi ke foki ki he lotu faka-Siú.

⁴ Ko hono uá, naʻe fakahaaʻi ʻe Paula ki he kau Kalisitiane Hepelū ko iá naʻe ʻikai te nau fai ha feinga ke mahinoʻi ʻa e ngaahi akonaki fakalaumālie foʻou pe lolotó, ʻa e “meʻakai mālohí” ʻa ia naʻe ʻi he Folofola ʻa e ʻOtuá. (Hep. 5:​11-14) ʻOku hā mahino, ko e niʻihi ʻo kinautolu naʻa nau kei pipiki pē ki he Lao ʻa Mōsesé. Neongo ia, naʻe fakamatalaʻi ʻe Paula, ko e ngaahi feilaulau naʻe fiemaʻu ʻe he Laó heʻikai lava ke ne toʻo fakaʻaufuli atu ʻa e angahalá. ʻI he ʻuhinga ko iá, ko e Laó naʻe “fakangata.” Ko ia naʻe hoko atu ʻa Paula ke akoʻi ʻa e ngaahi moʻoni loloto ange ʻe niʻihi. Naʻá ne fakamanatu ki hono kaungā-Kalisitiané ʻa e “meʻa lelei ange kuo [nau] ʻamanaki ki ai” ʻo makatuʻunga ʻi he feilaulau ʻa Sīsuú ʻa ia ʻe lava moʻoni ke tokoniʻi ai kinautolu ke “ʻunuʻunu ofi ki he ʻOtuá.”—Hep. 7:​18, 19.

5. Ko e hā ʻoku fiemaʻu ke tau mahinoʻi mei he tohi Tohi Tapu ʻa Hepeluú, pea ko e hā hono ʻuhingá?

⁵ Naʻe fakamatalaʻi ʻe Paula ki hono fanga tokoua Hepeluú ʻa e ʻuhinga naʻe māʻolunga ange ai ʻenau lotu faka-Kalisitiané ʻi he lotu naʻa nau fai ʻi he kuohilí. Ko e ngaahi tafaʻaki ʻo e lotu faka-Siú “ko ha ʻata [pē] ia ʻo e ngaahi meʻa ka hoko maí, ka ko e meʻa moʻoní ia ko e Kalaisí.” (Kol. 2:17) Ko e ʻata ʻo ha meʻa ko e fakalika pē ia ʻo e meʻa moʻoní. Ko ia, ʻoku pehē pē, ko e sīpinga lotu faka-Siu ʻi he kuonga muʻá ko ha ʻata pē ia ʻo e meʻa moʻoni naʻe teu ke hoko maí. ʻOku fiemaʻu ke tau mahinoʻi ʻa e fokotuʻutuʻu kuo fai ʻe Sihova maʻatautolu ke fakamolemoleʻi ai ʻetau angahalá koeʻuhi ke tau lava ʻo fai ʻa e lotu ʻoku fakahōifua kiate iá. Tau fakahoa angé ʻa e “ʻata” (ʻa e sīpinga faka-Siu he kuonga muʻá) mo e “meʻa moʻoní” (ʻa e founga lotu faka-Kalisitiané), ʻo hangē ko ia ʻoku fakamatalaʻi ʻi he Hepeluú. ʻI hono fai iá, ʻe lava ke tau mahinoʻi lelei ange ai ʻa e temipale fakalaumālié pea mo ʻene kaunga kiate kitautolú.

6. Naʻe anga-fēfē hono ngāueʻaki ʻa e tāpanekalé?

⁶ Sīpinga he kuonga muʻá. Naʻe fakatefito ʻe Paula ʻene fakamatalá ʻi he tāpanekale naʻe  fokotuʻu ʻe Mōsese ʻi he 1512 K.M. (Sio ki he saati “Sīpinga he Kuonga Muʻá—Founga Lotu Faka-Kalisitiané.”) Ko e tāpanekalé ko ha faʻunga fakaelanga ia hangē ha tēnití ʻa ia naʻe hiki holo ʻe he kau ʻIsilelí ʻi he kamatá ʻi heʻenau hiki mei ha feituʻu ki ha feituʻu. Naʻa nau ngāueʻaki ia ʻi he meimei taʻu ʻe 500 kae ʻoua kuo langa ʻa e temipalé ʻi Selusalema. (ʻEki. 25:​8, 9; Nōm. 9:22) Ko e ‘tēniti feʻiloakiʻanga’ ko ení naʻe hoko ia ko e feituʻu tefito ki he kau ʻIsilelí ke fakaofiofi ai ki he ʻOtuá pea fai ai ʻenau ngaahi feilaulaú mo ʻenau lotú. (ʻEki. 29:​43-46) Kae kehe, naʻe toe fakafofongaʻi ʻe he tāpanekalé ha meʻa lahi ange naʻe teu ke hoko mai ki he kau Kalisitiané.

7. Ko fē taimi naʻe hoko ai ʻa e temipale fakalaumālié ko ha meʻa moʻoní?

⁷ Founga lotu faka-Kalisitiané. Ko e tāpanekale ʻi he kuonga muʻá ko ha “ʻata ia ʻo e ngaahi meʻa fakahēvaní,” pea naʻá ne fakatātaaʻi ʻa e temipale lahi fakalaumālie ʻo Sihová. Naʻe pehē ʻe Paula “ko e tēniti [pe tāpanekale] ko ení ko ha fakatātā ia ki he taimi lolotonga ko ení.” (Hep. 8:5; 9:9) Ko ia ʻi he taimi naʻá ne tohi ai ki he kau Hepeluú, ko e temipale fakalaumālié naʻe ʻosi hoko ia ko ha meʻa moʻoni ki he kau Kalisitiané. Naʻe hoko ia ʻi he 29 T.S. ʻI he taʻu ko iá, naʻe papitaiso ʻa Sīsū, pani ia ʻaki ʻa e laumālie māʻoniʻoni, pea kamata ngāue ko ha “fungani taulaʻeiki lahi” ʻa Sihova ʻi he temipale fakalaumālié. c—Hep. 4:14; Ngā. 10:​37, 38.

8-9. Fakatatau ki he Hepelū 7:​23-27, ko e hā ʻa e faikehekehe māʻalaʻala ʻi he kau taulaʻeiki lahi ʻo ʻIsilelí mo e fungani Taulaʻeiki Lahí, ʻa Sīsū Kalaisi?

⁸ Sīpinga he kuonga muʻá. Ko e taulaʻeiki lahí naʻe fakamafaiʻi ke ne fakafofongaʻi ʻa e kakaí ʻi he ʻao ʻo e ʻOtuá. Ko e ʻuluaki taulaʻeiki lahi ʻo ʻIsilelí, ʻa ʻĒlone, naʻe fakanofo ʻe Sihova ʻi he taimi naʻe huufi ai ʻa e tāpanekalé. Kae kehe, hangē ko ia naʻe fakamatalaʻi ʻe Paulá, “ko e tokolahi naʻe pau ke nau hoko ko e kau taulaʻeiki ke nau hokohoko atu ʻa e tuʻunga taulaʻeikí he naʻe taʻofi kinautolu ʻe he maté mei heʻenau hokohoko atu ko e taulaʻeikí.” d (Lau ʻa e Hepelū 7:​23-27.) Pea ʻi he tuʻunga ko e kau tangata taʻehaohaoa, ko e kau taulaʻeiki lahi ko iá naʻe pau ke nau fai ʻa e ngaahi feilaulau ki heʻenau ngaahi angahalá tonu. ʻOku fakahaaʻi māʻalaʻala heni ʻa e faikehekehe ʻi he kau taulaʻeiki lahi ʻo ʻIsilelí pea mo e fungani Taulaʻeiki Lahí, ʻa Sīsū Kalaisi.

⁹ Founga lotu faka-Kalisitiané. ʻI he tuʻunga ko hotau Taulaʻeiki Lahi, ko Sīsū Kalaisi “ko ha faifekau ʻo e . . . tēniti moʻoní, ʻa ia kuo fokotuʻu ʻe Sihova, ʻo ʻikai ko e tangatá.” (Hep. 8:​1, 2) Naʻe fakamatalaʻi ʻe Paula koeʻuhí ko Sīsū ʻoku “hokohoko atu ʻene moʻuí ʻo taʻengatá, ʻoku ʻikai ai ke ʻi ai ha kau fetongi ke nau hoko atu hono tuʻunga taulaʻeikí.” Naʻe toe pehē ʻe Paula ko Sīsū ʻoku “ʻikai ʻuliʻi, ʻikai hangē ko e kau faiangahalá” pea ʻi he ʻikai hangē koe kau taulaʻeiki lahi ʻo ʻIsilelí, “ʻoku ʻikai fiemaʻu ia ke ne fai ha ngaahi feilaulau fakaʻaho” ki heʻene ngaahi angahalá. ʻI he taimi ní fakakaukau angé ki he faikehekehe ʻi he ʻōlitá mo e ngaahi feilaulau ʻi he sīpinga he kuonga muʻá mo ia ʻi he founga lotu faka-Kalisitiané.

10. Ko e hā naʻe tuhu ki ai ʻa e ngaahi feilaulau ʻi he ʻōlita kopá?

¹⁰ Sīpinga he kuonga muʻá. ʻI tuʻa ʻi he hūʻanga ʻo e tāpanekalé naʻe ʻi ai ha ʻōlita kopa ʻa ia naʻe ʻohake ai ʻa e ngaahi feilaulau monumanu kia Sihová. (ʻEki. 27:​1, 2; 40:29) Kae kehe, ko e ngaahi feilaulau ko iá heʻikai lava ke ne fakamolemoleʻi kakato ʻa e ngaahi angahala ʻa e kakaí. (Hep. 10:​1-4) Ko e feilaulau hokohoko  ʻo e fanga monumanú ʻi he tāpanekalé naʻe tuhu ia ki he feilaulau ʻe taha ʻa ia te ne huhuʻi fakaʻaufuli ʻa e faʻahinga ʻo e tangatá.

11. Naʻe foaki atu ʻe Sīsū ʻa ia tonu ko ha feilaulau ʻi ha ʻōlita fēfē? (Hepelū 10:​5-7, 10)

¹¹ Founga lotu faka-Kalisitiané. Naʻe ʻiloʻi ʻe Sīsū naʻe fekauʻi mai ia ʻe Sihova ki he māmaní ke foaki ʻene moʻui fakaetangatá ko ha feilaulau huhuʻi maʻá e faʻahinga ʻo e tangatá. (Māt. 20:28) Ko ia ʻi he papitaiso ʻa Sīsuú, naʻá ne foaki atu ia ke fai ʻa e finangalo ʻo Sihová. (Sione 6:38; Kal. 1:4) Naʻe foaki atu ʻe Sīsū ʻa ia tonu ʻi ha ʻōlita fakaefakatātā naʻá ne fakafofongaʻi ʻa e “finangalo” ʻo e ʻOtuá ki hono ʻAló ke feilaulauʻi ʻene moʻui haohaoa fakaetangatá. Naʻe ʻoatu “tā-tuʻo-taha” ʻa e moʻui ʻa Sīsuú ke fai ha fakalelei pe ʻufiʻufi fakaʻaufuli ʻa e ngaahi angahala ʻa e tokotaha kotoa ʻokú ne ngāueʻi ʻa e tui kia Kalaisí. (Lau ʻa e Hepelū 10:​5-7, 10.) Hokó, tau sivisiviʻi angé ʻa e meʻa ʻokú ne fakafofongaʻi ʻa e ngaahi meʻa ʻi he loto tāpanekalé.

12. Ko hai ʻe lava ʻo hū ki he loki taki taha ʻo e tāpanekalé?

¹² Sīpinga he kuonga muʻá. Ko e tāpanekalé mo e temipale naʻe langa ki mui ai ʻi Selusalemá naʻe tatau pē ʻa hona faʻunga tefitó. Naʻe ʻi loto ha ongo loki ʻe ua—“ko e Potu Toputapú” mo e “Potu Fungani Toputapú”—naʻe vaheʻi ʻaki ha puipui kuo tui-teuteu. (Hep. 9:​2-5; ʻEki. 26:​31-33) ʻI loto ʻi he Potu Toputapú naʻe ʻi ai ha tuʻuʻanga maama koula, ko ha ʻōlita ki he tutu ʻinisēnisí, pea mo ha tēpile mā foaki. Ko e “kau taulaʻeiki pani” pē naʻe ngofua ke nau hū ki he Potu Toputapú ke fakahoko honau ngaahi fatongia toputapú. (Nōm. 3:​3, 7, 10) Ko e Potu Fungani Toputapú naʻe ʻi ai ʻa e ʻaʻake koula ʻo e  fuakavá ʻa ia naʻá ne fakafofongaʻi ʻa e ʻi ai ʻa Sihová. (ʻEki. 25:​21, 22) Ko e taulaʻeiki lahí pē naʻe ngofua ke ne hū atu ʻi he puipuí ki he Potu Fungani Toputapú ʻi he ʻAho ʻo e ʻUfiʻufi Angahala fakataʻú. (Liv. 16:​2, 17) ʻI he taʻu ki he taʻu, naʻá ne hū atu mo e toto ʻo e fanga monumanú ke ne fai ha feilaulau ʻufiʻufi angahala maʻa ʻene ngaahi angahalá pea maʻá e puleʻangá fakakātoa. Faai atu pē, ko Sihova, fakafou ʻi hono laumālie māʻoniʻoní, naʻá ne fakahaaʻi mahino ʻa e ʻuhinga moʻoni ʻo e ongo meʻa ko eni ʻi he tāpanekalé.—Hep. 9:​6-8. e

13. Ko e hā ʻoku fakafofongaʻi ʻe he Potu Toputapu mo e Potu Fungani Toputapu ʻo e tāpanekalé ʻi he founga lotu faka-Kalisitiané?

¹³ Founga lotu faka-Kalisitiané. Ko ha fika fakangatangata ʻo e kau ākonga ʻa Kalaisí kuo pani ʻaki ʻa e laumālie māʻoniʻoní, pea ʻoku nau maʻu ha vahaʻangatae makehe mo Sihova. Ko e toko 144,000 ko ení te nau ngāue ko e kau taulaʻeiki ʻi hēvani mo Sīsū. (Fkh. 1:6; 14:1) Ko e Potu Toputapu ʻo e tāpanekalé ʻokú ne fakafofongaʻi ʻa honau tuʻunga ko e ngaahi foha laumālie ohi ʻo e ʻOtuá lolotonga ʻenau kei ʻi he māmaní. (Loma 8:​15-17) Ko e Potu Fungani Toputapu ʻo e tāpanekalé ʻokú ne fakafofongaʻi ʻa hēvani, ʻa e feituʻu ʻoku ʻafio ai ʻa Sihová. Ko e “puipuí” ʻa ia ʻokú ne vaheʻi ʻa e Potu Toputapú mei he Potu Fungani Toputapú ʻokú ne fakafofongaʻi ʻa e sino fakaekakano ʻo Sīsuú ʻa ia ko ha meʻa naʻá ne taʻofi ia mei heʻene hū ki hēvaní ʻi hono tuʻunga ko e fungani Taulaʻeiki Lahi ʻo e temipale fakalaumālié. ʻI hono tuku atu ʻe Sīsū hono sino fakaetangatá ko ha feilaulau maʻá e faʻahinga ʻo e tangatá, naʻá ne fakaava ai ha hala ki he moʻui fakahēvaní maʻá e kau Kalisitiane paní kotoa. Kuo pau foki ke nau tuku ange honau sino fakakakanó kae maʻu honau pale fakahēvaní. (Hep. 10:​19, 20; 1 Kol. 15:50) Hili ʻa e toetuʻu ʻa Sīsuú, naʻá ne hū ki he Potu Fungani Toputapu ʻo e temipale fakalaumālié, ʻa e feituʻu ʻe faai atu pē ʻo ne kau fakataha ai mo e kotoa ʻo e kau paní.

14. Fakatatau ki he Hepelū 9:​12, 24-26, ko e hā ʻokú ne ʻai ʻa e fokotuʻutuʻu ʻa e temipale fakalaumālie ʻo Sihová ke māʻolunga angé?

¹⁴ ʻOku lava ke tau sio māʻalaʻala heni ki he māʻolunga ʻo e fokotuʻutuʻu ʻa Sihova ki he lotu maʻá ʻo makatuʻunga ʻi he feilaulau huhuʻí mo e tuʻunga taulaʻeiki ʻo Sīsū Kalaisí. Ko e taulaʻeiki lahi ʻi ʻIsilelí naʻá ne hū ki ha Potu Fungani Toputapu naʻe ngaohi ʻe he tangatá mo e toto ʻo e ngaahi feilaulau monumanu, ka ko Sīsū naʻá ne hū “ki hēvani tonu,” ʻa e potu toputapu tahá, ke hā ʻi he ʻao ʻo Sihová. Naʻá ne ʻoatu ai ʻa e mahuʻinga ʻo ʻene moʻui haohaoa fakaetangatá maʻatautolu “ke toʻo atu ai ʻa e angahalá fakafou ʻi hono feilaulauʻi ʻo ia tonú.” (Lau ʻa e Hepelū 9:​12, 24-26.) Ko e feilaulau ʻa Sīsuú ʻa e feilaulau fakaʻosi ʻokú ne tāmateʻi ʻa e angahalá ʻo taʻengata. Hangē ko ia ʻe hoko atu ki ai ʻetau akó, pe ʻoku tau ʻamanaki ke moʻui ʻi hēvani pe ʻi he māmaní, ʻe lava ke tau lotu kotoa kia Sihova ʻi hono temipale fakalaumālié.

15. Ko hai naʻe ngāue ʻi he lotoʻā ʻo e tāpanekalé?

¹⁵ Sīpinga he kuonga muʻá. Ko e tāpanekalé naʻe taha pē hono lotoʻaá—ko ha foʻi ʻataʻatā naʻe ʻaaʻi ʻa ia naʻe fakahoko ai ʻe he kau taulaʻeikí honau fatongiá. Ko e ʻōlita kopa lahi ʻo e feilaulau tutú naʻe tuʻu ia ʻi he lotoʻaá, fakataha mo ha fuʻu pēsoni kopa ʻo ʻai ki ai ha vai ke ngāueʻaki ʻe he kau taulaʻeikí ke fakamaʻa kinautolu ki muʻa ke fakahoko ʻenau ngāue toputapú. (ʻEki. 30:​17-20; 40:​6-8) Kae kehe, ko e ngaahi temipale naʻe langa ki mui aí, naʻe ʻi ai foki hono lotoʻā ʻi tuʻa ʻa ia ko e faʻahinga naʻe ʻikai ko ha kau taulaʻeikí naʻe lava ke nau tuʻu ai pea lotu ki he ʻOtuá.

16. Ko hai ʻoku ngāue ʻi he lotoʻā taki taha ʻo e temipale fakalaumālié?

¹⁶ Founga lotu faka-Kalisitiané. Ki muʻa ke ʻalu hake ʻa e toenga ʻo e fanga tokoua pani ʻo Sīsuú ʻo ngāue ko e kau taulaʻeiki ʻi hēvaní, ʻoku nau  ngāue faitōnunga ʻi he lotoʻā ʻi loto ʻo e temipale fakalaumālie ʻi he māmaní. Ko e ʻi ai ʻa e fuʻu pēsoni vaí ko ha fakamanatu mahuʻinga ia kiate kinautolu, pea pehē ki he kotoa ʻo e kau Kalisitiané, ke nau nofoʻaki maʻa fakaeʻulungaanga mo fakalaumālie. Ko fē leva ʻa e feituʻu ʻoku fakahoko ai ʻe he “fuʻu kakai lahi,” ʻa ia ʻoku nau poupou mateaki ki he fanga tokoua pani ʻo Kalaisí, ʻa ʻenau lotú? Naʻe sio ʻa e ʻapositolo ko Sioné “ʻoku nau tuʻu ʻi he ʻao ʻo e taloní,” ʻa e meʻa ʻoku fehoanaki ʻi he māmaní mo e lotoʻā ʻi tuʻá, ʻa e feituʻu ʻoku nau fai ai ki he ʻOtuá “ʻa e ngāue toputapu ʻi he ʻaho mo e pō ʻi hono temipalé.” (Fkh. 7:​9, 13-15) He koloaʻaki ē ko kitautolu ʻa hono maʻu ha feituʻu ʻi he fokotuʻutuʻu ʻa Sihova ki he lotu maʻá!

17. Ko e hā ʻa e ngaahi feilaulau ʻoku tau koloaʻaki ke ʻoatu kia Sihová?

¹⁷ ʻI he ʻahó ni ʻoku maʻu ʻe he kotoa ʻo e kau Kalisitiané ʻa e monū ke fai ʻa e ngaahi feilaulau kia Sihova ʻaki hono ngāueʻaki honau taimí, iví mo ʻenau koloá ke fakalahi ʻa e ngaahi meʻa ʻo e Puleʻanga ʻo e ʻOtuá. Hangē ko ia naʻe tala ʻe he ʻapositoló ki he kau Kalisitiane Hepeluú, ʻe lava ke tau “ʻoatu maʻu pē ki he ʻOtuá . . . ha feilaulau ʻo e fakafetaʻi, ʻa ia ko e fua ʻo hotau loungutú ʻokú ne talaki fakahāhā ʻa hono huafá.” (Hep. 13:15) ʻE lava ke tau fakahāhā ʻoku tau koloaʻaki hotau monū ke lotu kia Sihová ʻaki hono ʻoatu kiate ia ʻa ʻetau ngaahi feilaulau lelei tahá.

18. Fakatatau ki he Hepelū 10:​22-25, ko e hā ʻoku totonu ke ʻoua ʻaupito naʻa tau fakaliʻeliʻakí, pea ko e hā ʻoku totonu ke ʻoua ʻaupito naʻa ngalo ʻiate kitautolú?

¹⁸ Lau ʻa e Hepelū 10:​22-25. ʻI he ofi ki he fakaʻosinga ʻo e tohi ʻa Paula ki he kau Hepeluú, ʻokú ne lave ki he ngaahi tafaʻaki kehekehe ʻo ʻetau lotú ʻoku totonu ke ʻoua ʻaupito te tau fakaliʻeliʻaki. ʻOku kau ki heni ʻa e fakaofiofi kia Sihova ʻi he lotu, talaki fakahāhā ʻetau ʻamanakí, fakataha fakatahataha ko ha fakatahaʻanga pea fefakalototoʻaʻaki ʻo “toe ʻāsili angé ʻi [heʻetau] sio ko ia ki he fakaofiofi mai” ʻa e ʻaho ʻo Sihová. ʻI he ofi ki he ngataʻanga ʻo e fakamatala ʻi he Fakahaá, ko e ʻāngelo ʻa Sihová ʻokú ne leaʻaki tuʻo ua ʻa e meʻá ni ke fakamamafaʻi: “Lotu ki he ʻOtuá!” (Fkh. 19:10; 22:9) ʻOfa ke ʻoua ʻaupito naʻa ngalo ʻa e moʻoni fakalaumālie loloto ko eni fekauʻaki mo e temipale lahi fakalaumālie ʻo Sihová pea mo e monū ʻoku tau koloaʻaki ke lotu ki hotau ʻOtua lahí!