1-2. Ko e hā ʻa e founga lelei taha ke lau mo ako ai ʻa e Tohi Tapú? Fakatātaaʻi.

 SIOLOTO atu ʻokú ke fakakaukau pe te ke fakatau ha fale. Ko e hā te ke loto ke vakai ki aí ki muʻa ke ke fai hoʻo filí? Ko ha tā pē ʻo e konga ki muʻa ʻo e falé? ʻOku ʻikai ha veiveiua te ke loto ke vakai tonu ki he falé koeʻuhí ke ke lue takai holo ai, hū ki loto ke sivisiviʻi ʻa e ngaahi lokí, pea sio ki he tafaʻaki kotoa ʻo e falé. ʻE aʻu nai ʻo ke saiʻia ke vakaiʻi ʻa e mape ʻo e falé ke ʻiloʻi ʻa e founga naʻe langa aí. ʻOku hā mahino, te ke loto ke sio ki ho fale te ke fakataú mo hono ngaahi tafaʻakí kotoa.

² ʻE lava ke tau fai ʻa e meʻa meimei tatau ʻi heʻetau lau mo ako ʻa e Tohi Tapú. ʻOku fakahoa ʻe ha mataotao ʻa e pōpoaki ʻi he Tohi Tapú ki ha “fuʻu langa lahi māʻolunga pea loloto hono fakavaʻé.” Ko ia ai, ʻe lava fēfē ke tau hoko ʻo alāanga mo e meʻa kotoa ʻi he Tohi Tapú? Kapau te ke lau fakavave ia, te ke ako pē nai ʻa e ngaahi moʻoni tefitó—“ʻa e ngaahi meʻa tefito ʻo e ngaahi pōpoaki toputapu ʻa e ʻOtuá.” (Hep. 5:12) ʻI hono kehé, hangē pē ko e falé, hū “ki loto” ke sivisiviʻi ʻa e ngaahi fakaikiikí. Ko e founga lelei taha ke ako ai ʻa e Tohi Tapú ko e vakai ki he anga ʻo e fehoanakimālie ʻa e ngaahi konga kehekehe ʻo e pōpoaki ʻi aí. Feinga mālohi ke ʻikai ngata pē hoʻo mahinoʻi ʻa e meʻa ʻokú ke tui ki aí kae pehē foki ki he ʻuhinga ʻokú ke tui ai ki aí.

3. Ko e hā naʻe enginaki ʻe he ʻapositolo ko Paulá ki hono kaungā-Kalisitiané ke nau faí, pea ko e hā hono ʻuhingá? (ʻEfesō 3:​14-19)

³ Ke mahinoʻi kakato ʻa e ngaahi tafaʻaki kotoa ʻo e Folofola ʻa e ʻOtuá, kuo pau ke tau ako ʻa e ngaahi moʻoni loloto ʻo e Tohi Tapú. Naʻe enginaki ʻa e ʻapositolo ko Paulá ki hono fanga tokoua mo e  fanga tuofāfine Kalisitiané ke nau ako tōtōivi ʻa e Folofola ʻa e ʻOtuá koeʻuhí ke nau lava ʻo “mahinoʻi kakato ʻa e fālahi mo e lōloa mo e māʻolunga mo e loloto” ʻo e moʻoní. Pea te nau hoko ai ʻo “faiaka mo tuʻu maʻu” ʻi heʻenau tuí. (Lau ʻa e ʻEfesō 3:​14-19.) ʻOku fiemaʻu ke tau fai ʻa e meʻa tatau. Tau vakai angé ki he founga ʻe lava ke tau sivisiviʻi ai ʻa e Folofola ʻa e ʻOtuá ke maʻu ʻa e ʻata kakato ʻo hono ʻuhingá.

4. Ko e hā ʻe lava ke tau fai ke ʻunuʻunu ofi ange ai kia Sihova? ʻOmai ha fakatātā.

⁴ ʻI he tuʻunga ko e kau Kalisitiane, ʻoku ʻikai ke tau fiemālie pē ʻi hono maʻu ha mahino siʻisiʻi fekauʻaki mo e Tohi Tapú. ʻI he tokoni ʻa e laumālie māʻoniʻoni ʻo e ʻOtuá, ʻoku tau vēkeveke ke ako “naʻa mo e ngaahi meʻa loloto ʻa e ʻOtuá.” (1 Kol. 2:​9, 10) Fēfē ke ke kamataʻi ha poloseki ako fakafoʻituitui ʻa ia te ne ʻai koe ke ʻunuʻunu ofi ange kia Sihova? Ko e fakatātaá, ʻe lava ke ke sivisiviʻi ʻa e founga naʻá ne fakahāhā ai ʻene ʻofa ki heʻene kau sevāniti ʻi he kuonga muʻá mo e founga ʻoku fakamoʻoniʻi ai ʻokú ne ʻofa foki ʻiate koé. Te ke sivisiviʻi nai ʻa e fokotuʻutuʻu ʻa Sihova ki he lotu ʻi ʻIsilelí mo e founga hono fakahoa ia ki he fokotuʻutuʻu ʻa e Kalisitiané ʻi he ʻaho ní. Pe mahalo ʻe lava ke ke fai ha ako fakaʻāuliliki ʻo e ngaahi kikite naʻe fakahoko ʻe Sīsū lolotonga ʻene moʻui mo e ngāue fakafaifekau ʻi he māmaní.

5. ʻOku ʻi ai ha kaveinga ʻokú ke loto ke fekumi ki ai ʻi hoʻo poloseki ako fakafoʻituituí?

⁵ Kuo ʻeke ki he kau ako tōtōivi ʻe niʻihi ʻo e Tohi Tapú pe ko e hā ha ngaahi meʻa loloto ʻi he Folofola ʻa e ʻOtuá ʻoku nau loto ke sivisiviʻi fakafoʻituitui. Ko e niʻihi ʻo ʻenau ngaahi talí ʻoku lisi ʻi he puha “ Kaveinga ki he Ako Fakafoʻituituí.” ʻE lava ke ke maʻu ʻa e fiefia lahi ʻi hono ako ʻa e ngaahi kaveinga peheé fakataha mo e tokoni ʻa e Watch Tower Publications Index pe ko e Tataki Fakaefekumi Maʻá e Kau Fakamoʻoni ʻa Sihová. Ko hono ako loloto ʻa e Tohi Tapú ʻe lava ke ne fakaivimālohiʻi hoʻo tuí pea tokoniʻi koe ke “maʻu ai ʻa e ʻiloʻi ʻo e ʻOtuá.” (Pal. 2:​4, 5) Tau tokangataha he taimí ni ki he niʻihi ʻo e ngaahi moʻoni loloto ʻo e Tohi Tapú ʻa ia ʻe lava ke tau sivisiviʻí.

6. (a) Ko e hā ʻa e faikehekehe ʻi ha palani mo ha taumuʻa? (e) Ko e hā ʻe lava ke pehē ai ko e taumuʻa ʻa Sihova ki he tangatá mo e māmaní ʻoku “taʻengata”? (ʻEfesō 3:11)

⁶ Fakakaukau ki ha fakatātā ʻo e meʻa ʻoku leaʻaki ʻe he Tohi Tapú fekauʻaki mo e taumuʻa ʻa e ʻOtuá. ʻOku ʻi ai ʻa e faikehekehe lahi ʻi ha palani mo ha taumuʻa. Ko ha palani ʻoku hangē ia ha  hala ʻoku pau mo tuʻu maʻu, ʻa ia ʻe lava ke ne taki atu koe ke aʻu ki he feituʻu ʻokú ke ʻalu ki aí. Neongo ia, heʻikai malava ke fakahoko ʻa e palaní ʻi he taimi ʻoku ʻi ai ha taʻofiʻanga ʻi he halá. Ko ha taumuʻa ʻoku fakahangataha pē ia ki he feituʻu ʻoku fakataumuʻa ki ai ʻa e fonongá. ʻOku tau ʻiloʻi lelei ʻa e feituʻu ʻoku tau loto ke aʻu ki aí, ka ʻoku ʻikai fokotuʻu ha hala pau ke tau fononga ai. ʻE lava pē ke feʻunuʻaki ia ʻo kapau ʻe fiemaʻu. Kae mālō, kuo fakahaaʻi māmālie mai ʻe Sihova ʻene “taumuʻa taʻengata” ʻi he Tohi Tapú. (ʻEf. 3:11) ʻI ha faʻahinga founga pē, ʻokú ne lavameʻa maʻu pē koeʻuhí kuó ne “ʻai . . . ke hoko ʻa e meʻa kotoa pē koeʻuhi ko ʻene taumuʻá.” (Pal. 16:4) Pea ko e ola ʻo e meʻa ʻoku fai ʻe Sihová ʻe tolonga ʻo taʻengata. Ko e hā ʻa e taumuʻa ʻa Sihová, pea ko e hā ʻa e feʻunuʻaki kuó ne fai ke fakahoko ai iá?

7. Hili ʻa e angatuʻu ʻa e ʻuluaki ongo mātuʻá, naʻe anga-fēfē feʻunuʻaki ʻe Sihova ʻa e founga ke aʻusia ai ʻene taumuʻá? (Mātiu 25:34)

⁷ Naʻe tala ʻe he ʻOtuá ki he ʻuluaki ongo mātuʻá ʻa ʻene taumuʻa kiate kinauá. Naʻe pau ke na “fanafanau mo fakatokolahi pea fakafonu ʻa e māmaní pea mo pule ki ai, pea pule ki he . . . meʻamoʻui kotoa pē” ʻi he māmaní. (Sēn. 1:28) ʻI he taimi naʻe angatuʻu ai ʻa ʻĀtama mo ʻIví, ʻo hoko mai ai ʻa e angahalá ki he fāmili ʻo e tangatá, naʻe ʻikai ke taʻofi ai ʻa e taumuʻa ʻa Sihová. Naʻá ne feʻunuʻaki ʻa e founga ʻe aʻusia ai iá. ʻI he taimi pē ko iá, naʻá ne fakapapauʻi ke fokotuʻu ha Puleʻanga ʻi hēvani te ne fakahoko ʻene muʻaki taumuʻa ki he faʻahinga ʻo e tangatá mo e māmaní. (Lau ʻa e Mātiu 25:34.) ʻI hono taimi kotofá, naʻe fekauʻi anga-ʻofa mai ʻe Sihova hono ʻAlo ʻuluaki fakatupú ki he māmaní ke akoʻi ʻa e kakaí fekauʻaki mo e Puleʻangá pea ke foaki ʻene moʻuí ke huhuʻi kitautolu mei he angahalá mo e maté. Pea naʻe fokotuʻu hake leva ʻa Sīsū ki hēvani ke pule ko e Tuʻi ʻo e Puleʻanga ʻo e ʻOtuá. Ka ʻoku toe lahi ʻa e meʻa ke fakakaukauloto ki ai fekauʻaki mo e taumuʻa ʻa e ʻOtuá.

8. (a) Ko e hā ʻa e kaveinga ʻo e Tohi Tapú? (e) Hangē ko ia ʻoku fakamatalaʻi ʻi he ʻEfesō 1:​8-11, ko e hā ʻa e taumuʻa tefito ʻa Sihová? (Sio ki he tā ʻi he takafí.)

⁸ Ko e kaveinga tefito ʻo e Tohi Tapú ko e huafa ʻo Sihová ʻe fakatonuhiaʻi ʻi heʻene fakahoko ʻene taumuʻa ki he māmaní fakafou ʻi hono Puleʻangá ʻi he malumalu ʻo Kalaisí. Ko e taumuʻa ʻa Sihová heʻikai lava ʻo liliu. Kuó ne fakapapauʻi te ne fakahoko lavameʻa ia. (ʻAi. 46:​10, 11, fkm. ʻi lalo; Hep. 6:​17, 18) ʻI he faai atu ʻa e taimí, ʻe liliu ʻa e māmaní ko ha palataisi ʻa ia ko e hako haohaoa mo māʻoniʻoni ʻo ʻĀtama mo ʻIví te nau “fiefia ʻi he moʻuí ʻo taʻengata.” (Saame 22:26) Mahulu atu aí, kuo ʻi he fakakaukau ʻa Sihová ha taumuʻa ʻoku lahi ange. Ko ʻene taumuʻa tefitó ke fakafāʻūtahaʻi ʻa ʻene ngaahi meʻamoʻui ʻatamaiʻia kotoa ʻi hēvani mo māmaní. Pea ko e faʻahinga kotoa leva ʻoku moʻuí te nau fakamoʻulaloa mateaki kiate ia ko honau Hau. (Lau ʻa e ʻEfesō 1:​8-11.) ʻIkai nai ʻokú ke ofo ʻi he founga fakaʻofoʻofa ʻoku fakahoko ai ʻe Sihova ʻene taumuʻá?

9. ʻI hono lau ʻa e Tohi Tapú, ʻoku mamaʻo fēfē hoʻo vakai ki he kahaʻú?

⁹ Fakakaukau ki he kikite naʻe fakahaaʻi ʻe Sihova ʻi he ngoue ʻo ʻĪtení, hangē ko ia ʻoku hiki ʻi he Sēnesi 3:15. b Naʻe lave ai ki he ngaahi meʻa te ne fakahoko ʻene taumuʻá ka ʻe toki hoko ia ʻi ha ngaahi taʻu ʻe laui afe ki mui ai. Ko e ngaahi meʻa ko ení naʻe kau ki ai hono fakatupu ʻo e hako ʻo ʻĒpalahamé, ʻa e laine hohoko ʻe taki atu ki he ʻaloʻi ʻo e Kalaisí. (Sēn. 22:​15-18) Pea ʻi he 33 T.S., naʻe taaʻi ʻa Sīsū ʻi hono muivaʻé, hangē ko ia naʻe tomuʻa talá. (Ngā. 3:​13-15) Ko e aofangatuku ʻo e kikite ko iá, ʻa hono laiki ʻa e ʻulu ʻo Sētané, ʻe toki hoko ia laka hake ʻi ha taʻu ʻe 1,000 mei heni. (Fkh. 20:​7-10) Pea ʻoku fakahaaʻi mai ʻi he Tohi Tapú ʻa e meʻa lahi ange fekauʻaki  mo e tumutumu ʻo e fetāufehiʻaʻaki ʻi he vahaʻa ʻo e fokotuʻutuʻu ʻa Sētané mo e kautaha ʻa Sihová.

10. (a) Ko e hā ʻa e ngaahi meʻa ʻoku vavé ni ke hoko mai ʻi he kahaʻú? (e) ʻE lava fēfē ke tau teuʻi hotau ʻatamaí mo e lotó? (Sio ki he fakamatala ʻi laló.)

¹⁰ Fakakaukau ki he ngaahi meʻa mātuʻaki mahuʻinga ko eni ʻe hoko ʻa ia ʻoku tomuʻa tala ʻe he Tohi Tapú. ʻUluakí, ko e ngaahi puleʻangá te nau fanongonongo ʻa e “melino mo malu!” (1 Tes. 5:​2, 3) “ʻI he taimi pē ko iá,” ʻe kamata ʻa e fuʻu mamahi lahí ʻi he taimi ʻe ʻohofi ai ʻe he ngaahi puleʻangá ʻa e kotoa ʻo e lotu loí. (Fkh. 17:16) Hili iá, ʻe hā nai ha fakaʻilonga anga-kehe ʻo e “Foha ʻo e tangatá ʻokú ne haʻu ʻi he ngaahi ʻao ʻo e langí fakataha mo e mālohi mo e lāngilangi lahi.” (Māt. 24:30) ʻE fanongonongo ʻe Sīsū ʻa e fakamaau ki he faʻahinga ʻo e tangatá, ʻo fakamavaheʻi ʻa e fanga sipí mei he fanga kosí. (Māt. 25:​31-33, 46) Neongo ia, ko Sētane, heʻikai te ne nofo noa. ʻI heʻene tāufehiʻá, te ne fakaʻaiʻai ha kulupu ʻo e ngaahi puleʻangá ʻa ia ʻoku ui ʻi he Tohi Tapú ko Koki ʻo e fonua ko Mēkokí ke ʻohofi ʻa e kau lotu maʻa ʻa Sihová. (ʻIsi. 38:​2, 10, 11) ʻI ha taimi lolotonga iá, ko e toenga ʻo e kau paní ʻe tānaki kinautolu ki hēvani ke kau fakataha mo Kalaisi pea mo ʻene kau tau fakahēvaní ke faitau ʻi he tau ʻo ʻĀmaketoné, ko e konga fakaʻosi ia ʻo e fuʻu mamahi lahí. c (Māt. 24:31; Fkh. 16:​14, 16) Pea ʻe kamata leva ʻa e Pule Taʻu ʻe Afe ʻa Kalaisi ki he māmaní.—Fkh. 20:6.

11. Ko e hā ʻene ʻuhinga kiate koe ʻa e ʻamanaki ʻo e moʻui taʻengatá? (Sio foki ki he fakatātaá.)

¹¹ Tau toe vakai mamaʻo atu angé ki he kahaʻú. ʻOku pehē ʻi he Tohi Tapú ko hotau Tokotaha-Fakatupú “kuo aʻu ʻo ne ʻai ʻa ʻitāniti ki [hotau] lotó.” (Tml. 3:11) Fakakaukau atu ki heʻene ʻuhinga kiate koe pea mo ho vahaʻangatae mo Sihová. Ko e tohi ʻUnuʻunu Ofi kia Sihova, peesi 319, ʻokú ne langaʻi ʻetau mahuʻingaʻiá ʻi heʻene pehē: “ʻI he hili ʻa e moʻui atu ʻi he ngaahi taʻu ʻe laui teau, laui afe, laui miliona, naʻa mo e laui piliona, te tau ʻilo ʻo toe lahi ange ai fekauʻaki mo Sihova ko e ʻOtuá ʻi heʻetau ʻilo he taimi ní. Ka te tau kei ongoʻi ʻoku ʻi ai ʻa e ngaahi meʻa fakaofo taʻefaʻalaua ke ako ki ai. . . . Ko e moʻui taʻengatá ʻe mohu ʻuhinga taʻealasioloto atu ki ai mo kehekehe—pea ko e ʻunuʻunu ofi ange kia Sihová ʻe hoko maʻu pē ko e konga fakafiemālie lahi  taha ia ʻo e moʻui taʻengatá.” ʻI he lolotonga iá, ʻi heʻetau hokohoko atu ke ako ʻa e Folofola ʻa e ʻOtuá, ko e hā mo ha toe meʻa ʻe lava ke tau sivisiviʻi?

12. ʻE lava fēfē ke tau hanga hake ki he langi taukakapá? ʻOmai ha fakatātā.

¹² ʻOku ʻomai ʻe he Folofola ʻa e ʻOtuá ha tomuʻa fakalika ʻo e ʻafio ʻa Sihova “ʻi he taukakapá.” (ʻAi. 33:5) ʻOku fakaeʻa mai ʻi he Tohi Tapú ʻa e ngaahi meʻa fakaofo fekauʻaki mo Sihova pea mo e konga fakahēvani ʻo ʻene kautahá. (ʻAi. 6:​1-4; Tan. 7:​9, 10; Fkh. 4:​1-6) Ko e fakatātaá, ʻoku lava ke tau lau fekauʻaki mo e ngaahi meʻa fakamanavahē naʻe sio ki ai ʻa ʻIsikeli ʻi he taimi “naʻe fakaava mai ʻa e langí pea naʻe kamata [ke ne] sio ki ha ngaahi vīsone mei he ʻOtuá.”—ʻIsi. 1:1.

13. Ko e hā ʻokú ke houngaʻia ai fekauʻaki mo e ngafa ʻo Sīsū ʻi hēvaní, ʻo hangē ko ia ʻoku fakamatalaʻi ʻi he Hepelū 4:​14-16?

¹³ Fakakaukau foki fekauʻaki mo e ngafa ʻo Sīsū ʻi hēvani ko hotau Tuʻi mo e Taulaʻeiki Lahi kaungāongoʻí. Fakafou ʻiate ia ʻe lava ke tau fakaofiofi ki he “taloni ʻo e ʻofa maʻataʻataá” ʻa e ʻOtuá ʻi he lotu pea kole ki ha meesi mo e tokoni “ʻi he taimi totonú.” (Lau ʻa e Hepelū 4:​14-16.) ʻOfa ke ʻoua naʻa ʻosi atu ha ʻaho ʻoku teʻeki ke tau fakakaukauloto ki he meʻa kuo fai ʻe Sihova mo Sīsuú pea mo e meʻa ʻokú na lolotonga fai maʻatautolu mei hēvaní. Ko ʻena ʻofa kiate kitautolú ʻoku totonu ke aʻu moʻoni ki hotau lotó pea ueʻi kitautolu ke hoko ʻo faivelenga ʻi heʻetau ngāué mo e lotú.—2 Kol. 5:​14, 15.

14. Ko e hā ʻa e taha ʻi he ngaahi meʻa lelei taha ʻe lava ke tau fai ke fakahāhā ai ʻa e lahi ʻetau houngaʻia ʻia Sihova mo Sīsuú? (Sio foki ki he fakatātaá.)

¹⁴ Ko e taha ʻi he ngaahi founga lelei taha ke fakahāhā ai ʻa e lahi ʻetau houngaʻia ʻi hotau ʻOtuá mo hono ʻAló ko e feinga mālohi ke tokoniʻi ʻa e niʻihi kehé ke hoko ko e Kau Fakamoʻoni ʻa Sihova mo e kau ākonga ʻa Sīsū. (Māt. 28:​19, 20) Ko e meʻa eni naʻe fai ʻe he ʻapositolo ko Paulá ʻi he houngaʻia ki he ʻOtuá mo Kalaisi.  Naʻá ne ʻiloʻi ko e finangalo ʻo Sihová ke “fakahaofi ʻa e faʻahinga kakai kotoa pē pea ke nau aʻusia ha ʻilo totonu ki he moʻoní.” (1 Tīm. 2:​3, 4) Naʻá ne ngāue mālohi ʻi heʻene ngāue fakafaifekaú ke tokoniʻi ʻa e kakai tokolahi taha ʻe ala lavá koeʻuhi ke ne lava “ʻi he founga kotoa pē ʻoku ala lavá ʻo fakahaofi ha niʻihi.”—1 Kol. 9:​22, 23.

15. Fakatatau ki he Saame 1:​2, ko e hā te ne ʻai kitautolu ke fiefiá?

¹⁵ ʻOku feʻungamālie ai hono fakamatalaʻi ʻe he tokotaha-tohi-sāmé ha tokotaha fiefia mo lavameʻa ko ha taha ʻa ia “ko ʻene fiefiá ʻoku ʻi he lao ʻa Sihová” pea ʻokú ne “fakalaulauloto ki Heʻene laó ʻi he ʻaho mo e pō.” (Saame 1:​1-3; fkm. ʻi lalo) ʻI hono fakamatalaʻi ʻe ha tokotaha liliu Tohi Tapu ko Joseph Rotherham ʻa e veesi ko ení ʻi heʻene tohi Studies in the Psalms, naʻá ne pehē ko ha tokotaha ʻoku totonu ke ne “fiemaʻu lahi ʻa e tataki fakaʻotuá ʻo ne kumi ai ki ai, ako ia pea nōfoʻi ai.” Naʻá ne tānaki mai ko ha tokotaha lau Tohi Tapu te ne “lau ko ha ʻaho mole ia kapau ʻoku ʻikai ke ne feinga ke maʻu ha vakai māʻalaʻala ange ki he poto ʻoku maʻu mei aí.” ʻE lava ke ke fiefia ʻi he ako ʻa e Tohi Tapú ʻaki ʻa e feinga ke maʻu ʻa e ngaahi fakaikiiki kotoa te ke malavá pea sio ki he anga ʻenau fehoanakimālié. He fiefia ē ko kitautolu ʻi hono sivisiviʻi ʻa e tafaʻaki kotoa ʻo e Folofola ʻa e ʻOtuá!

16. Ko e hā te tau lāulea ki ai ʻi he kupu hono hokó?

¹⁶ Ko e ngaahi moʻoni fakaʻofoʻofa ʻoku akoʻi mai ʻe Sihova ʻi heʻene Folofolá ʻoku ʻikai ke fakalaka atu ia ʻi heʻetau mahinó. ʻI he kupu hono hokó, te tau lāulea ai ki he taha ʻo e ngaahi moʻoni loloto angé—ko e temipale lahi fakalaumālie ʻo Sihová, ʻa ia naʻe fakamatalaʻi ʻe Paula ʻi heʻene tohi ki he kau Kalisitiane Hepeluú. Fakatauange ke ke maʻu ʻa e fiefia lahi ʻi hono sivisiviʻi ʻa e kaveinga ko iá.