Ko e fanga tokoua ʻi he Pētelí kuo nau ngāue ʻo laka hake ʻi he taʻu ʻe taha ke langa ʻa e fale fakamafolalea WBBR ʻi he motu ko Staten, ʻi Niu ʻIoke. Hili hono fakaʻataʻatā ʻa e konga kelekelé, naʻa nau langa ha fuʻu fale lahi ki he kau ngāué mo ha fale kehe ki he ngaahi naunaú. ʻI he kakato ʻa e ngāue ko ení, naʻe kamata ke tānaki ʻe he fanga tokouá ʻa e ngaahi naunau ʻoku fiemaʻu ki he fakamafolaleá. Ka naʻe fiemaʻu ke nau ikuʻi ha ngaahi fakafaingataʻaʻiaʻanga ʻe niʻihi.

Naʻe ʻiloʻi ʻe he fanga tokouá ko hono fokotuʻu ʻa e ʻenitena tefito ki he letioó naʻe faingataʻa. Ko e ʻenitena mita ʻe 91 (fute ʻe 300) naʻe pau ke tautau ia ʻi he vahaʻa ʻo ha ongo fuʻu pou naʻe mita ʻe 61 (fute ʻe 200) hona lōloá. Ko e ʻuluaki feingá naʻe ʻikai ke ola lelei. ʻI he falala ki he tokoni ʻa Sihová, naʻe faai atu pē ʻo lavameʻa ʻa e fanga tokouá. Ko Calvin Prosser, ʻa ia naʻe ngāue ʻi he polosekí, naʻá ne pehē, “Kapau naʻe ola lelei ʻemau ʻuluaki feingá, naʻa mau mei pōlepole ai mo pehē, ‘Sio ki he ngāue naʻa tau fakahokó!’” Naʻe ʻave ʻe he fanga tokouá ʻa e lāngilangi ʻo ʻenau lavameʻá kia Sihova, ka naʻe ʻikai ko e ʻosi ia ʻa e palopalemá.

Ko e fakamafola letioó naʻe toki kamata pē, pea naʻe ʻikai ke lahi ʻa e ngaahi naunau naʻe fakatau fakakomēsialé. Ko ia, naʻe maʻu mai ʻe he fanga tokouá ha meʻangāue fakaletiō ʻosi ngāueʻaki ʻa ia naʻe ngaahi ʻe ha taha. ʻI he ʻikai ke fakatau mai ha maiká, naʻa nau ngāueʻaki ʻa e maika mei ha telefoni. ʻI he pō ʻe taha ʻi Fepueli, naʻe tesi ʻe he fanga tokouá ʻa e ngaahi naunau fakataimi kotoa ko ení. Naʻa nau fiemaʻu ha polokalama ke fakamafola, ko ia naʻe hiva ʻe he fanga tokouá ʻa e ngaahi hiva ʻo e Puleʻangá. Ko Ernest Lowe naʻá ne manatu mo e fakaoliʻiá ki he lolotonga ko ia ʻa e hiva ʻa e fanga tokouá, naʻa nau maʻu ha telefoni  meia Fakamaau Rutherford, b ʻa ia naʻá ne fanongo ki heʻenau hivá ʻi heʻene letioó ʻi Brooklyn, ko e kilomita nai ʻe 25 (maile 15) hono mamaʻó.

“Taʻofi angé ʻa e fakamamahi telinga ko ená,” ko e fakakata ia ʻa Tokoua Rutherford. “ʻOku hangē homou leʻó ha fanga pusí!” ʻI he kiʻi fakamāʻia ʻa e fanga tokouá, naʻa nau tāmateʻi fakavave ʻa e letioó, ka naʻa nau tuipau kuo nau mateuteu ki heʻenau fuofua fakamafolaleá.

ʻI Fepueli 24, 1924, lolotonga ʻa e fuofua fakamafolalea fakaʻofisialé, naʻe fakatapui ʻe Tokoua Rutherford ʻa e fale fakamafolaleá ke ngāueʻaki “ki he ngaahi meʻa ʻo e Puleʻanga ʻo e Mīsaiá.” Naʻá ne fakahaaʻi ko e taumuʻa ʻo e falé ni “ke tokoniʻi ʻa e kakaí ke nau mahinoʻi mei he Tohi Tapú ʻa e taimi ʻoku tau lolotonga moʻui aí, neongo pe ko e hā ʻa e tui fakalotu pe siasi ʻoku nau kau ki ai.”

Ko e fuofua fakamafolaleá naʻe lavameʻa lahi. ʻI he taʻu ʻe 33 hono hokó, naʻe hoko ʻa e WBBR ko e fakamafola letiō tefito ia ʻa e kautahá.

ʻI Siulai 1924, naʻe fakatahataha ai ʻa e Kau Ako Tohi Tapú ki ha fakataha-lahi ʻi Columbus, Ohio. Naʻe haʻu ʻa e kau fakafofonga mei he māmaní takatakai, pea naʻa nau fanongo ki he ngaahi malanga naʻe fakahoko ʻi he lea faka-ʻAlepeá, faka-Pilitāniá, faka-Falanisē, faka-Siamane, faka-Kalisi, faka-Hungali, faka-ʻĪtali, faka-Lituēnia, faka-Pōlani, faka-Lūsia, faka-Sikenitinēvia mo e faka-ʻIukalainé. Ko e ngaahi konga ʻo e polokalamá naʻe fakamafola ʻi he letioó, pea naʻe fai ʻa e palani ke līpooti fakaʻaho ʻa e polokalama fakataha-lahí ʻi he Ohio State Journal.

ʻI he ʻaho Tuʻapulelulu, Siulai 24, ko e toko 5,000 tupu ʻo e kau maʻu fakatahá naʻa nau kau atu ki he ngāue fakamalangá. Naʻa nau tufa ʻa e meimei tohi ʻe 30,000 pea kamataʻi ʻa e ngaahi ako Tohi Tapu ʻe laui afe. Naʻe ui ʻi he Watch Tower ʻa e ʻaho ko ení “ko e konga fakafiefia taha ʻo e fakataha-lahí.”

Ko ha konga mahuʻinga ʻe taha ʻo e fakataha-lahí naʻe fakahoko ʻi he ʻaho Falaite, Siulai 25, ʻi hono lau ʻe Tokoua Rutherford ha tohi naʻe fakahalaiaʻi loto-toʻa ai ʻa e haʻa faifekaú. Naʻe hiki ia ʻi he faʻunga ʻo ha tohi fakalao pea naʻe tukuakiʻi ai ʻa e kau taki fakapolitikalé, kau taki lotú, mo e kau taki fakakomēsialé ʻoku nau “ʻai ʻa e kakaí ke nau taʻeʻilo ki he Puleʻanga ʻo e ʻOtuá ʻa ia ʻe fakafou mai ai ʻa e fakamoʻuí ki he faʻahinga ʻo e tangatá.” Tānaki atu ki ai, naʻe fakahaaʻi ʻi he tohí  ko e kau tangata ko ení naʻa nau “poupouʻi ʻa e Kautaha ʻa e Ngaahi Puleʻangá pea talaki ia ‘ko e fakafofonga fakapolitikale ʻo e puleʻanga ʻo e ʻOtuá ʻi he māmaní.’” Naʻe fiemaʻu ki he Kau Ako Tohi Tapú ʻa e loto-toʻa lahi ke ʻave ʻa e pōpoaki ko ení ki he kakaí.

ʻI hono fakamāʻopoʻopo ʻa e ola ʻo e fakataha-lahí, naʻe pehē ʻi he Watch Tower: “Ko e kiʻi kau tau ko eni ʻa e ʻEikí naʻe fakatahataha ʻi he Fakataha-Lahi ʻi Columbus naʻa nau ʻalu atu kuo fakaivimālohiʻi ʻenau tuí . . . , pea ʻoku ʻikai ha mālohi pe ngahau vela ʻa e filí ʻe lava ke ne fai ha meʻa kiate kinautolu.” Ko Leo Claus, naʻá ne maʻu ʻa e fakataha-lahí, naʻá ne manatu: “Naʻa mau mātuku atu mei he fakatahatahá mo e ongoʻi vēkeveke ke tufaki ʻa e tohí ʻi homau feituʻu ngāué.”

ʻI ʻOkatopa, naʻe kamata ke tufaki ʻe he Kau Ako Tohi Tapú ha tatau ʻe laui miliona ʻo e tuleki Ecclesiastics Indicted, ko ha tatau kuo pulusi ia ʻo e meʻa naʻe leaʻaki ʻe Tokoua Rutherford. ʻI he kiʻi kolo ko Cleveland, Oklahoma, ko Frank Johnson naʻe ʻosi ʻene tufa ai ʻa e tulekí ʻi ha miniti ʻe 20 ki muʻa ke haʻu ʻa e kau malanga kehé ʻo ʻave ia. Naʻe ʻikai lava ke ne nofo ai ʻo tali koeʻuhí naʻe ʻita ha kau tangata mei he koló ʻi heʻene malangá pea naʻa nau kumi holo ia. Naʻe pehē ʻe Tokoua Johnson ke ne toitoi ʻi ha fale lotu naʻe ofi ai. Naʻe ʻikai ha taha ai, ko ia naʻá ne tuku ha tatau ʻo e Ecclesiastics Indicted ʻi he Tohi Tapu ʻa e faifekaú pea ʻi he sea taki taha. Naʻe oma ange ʻene hū ki tuʻá ʻi heʻene hū ki lotó. Naʻe kei taimi pē, ko ia naʻá ne toe ʻalu ki ha fale lotu ʻe ua, ʻo fai pē ʻa e meʻa tatau.

Naʻe foki fakavave ʻa Frank ki he feituʻu naʻe ʻai ke ʻave ia mei aí. Naʻá ne toitoi ʻi ha pausa mo fakasio pē ʻa e kau tangata naʻa nau kumi iá. Naʻe lele hake ʻa e kau tangatá, ka naʻe ʻikai ke nau sio kiate ia. Ko ʻenau pulí atu pē mo e aʻu mai ʻa e kaungā-malanga ʻo Frank, ʻa ia naʻa nau malanga ofi atu pē ki ai, ʻo ʻave ia pea nau ō.

“ʻI heʻemau mavahe mei he koló,” ko e manatu ia ha tokoua ʻe taha, “naʻa mau fakalaka atu ʻi he fale lotu ʻe tolú. Naʻe ʻi ai ha kakai ʻe toko 50 nai naʻa nau tuʻu ʻi tuʻa ʻi he fale lotu taki taha. Ko e niʻihi naʻa nau lau ʻa e tulekí, ko e niʻihi naʻa nau puke hake ʻa e tulekí ke sio ki ai ʻa e faifekaú. Ko e mālō pē ʻemau hao! Ka naʻa mau fakamālō ki homau ʻOtua ko Sihová ki heʻene maluʻí pea ki he poto ne mau lava ai ʻo fakamatavaleaʻi ʻa e ngaahi fili ko eni ʻo e Puleʻangá.”

ʻI he ngaahi fonua kehe, ko e Kau Ako Tohi Tapú naʻa nau muimui ʻi ha sīpinga meimei tatau ʻo e faifakamoʻoni loto-toʻá. ʻI he fakatokelau ʻo Falaniseé, naʻe malanga ai ʻa Józef Krett ki he kau ngāue keli malala naʻa nau haʻu mei Pōlaní. Naʻe fokotuʻutuʻu ke ne fai ha malanga naʻe fakakaveinga “ʻOku Vavé Ni ke Toetuʻu ʻa e Kau Maté.” ʻI hono tufa ʻa e tohi fakaafé ki he kakai ʻo e koló, naʻe fakatokanga ha pātele ʻi he koló ki hono kāinga lotú ke ʻoua te nau ʻalu ki ai. Naʻe kehe ʻa e meʻa naʻe hokó ʻi heʻene fakatokangá. Ko e toko 5,000 tupu naʻa nau ʻalu ki he malangá, ʻo kau ai ʻa e pātelé! Naʻe fakaafeʻi ʻe Tokoua Krett ʻa e pātelé ke taukapoʻi ʻene tuí, ka naʻá ne fakafisi. Naʻe tufa kotoa ʻe Tokoua Krett ʻa e ʻū tohi naʻá ne maʻú, peá ne fakatokangaʻi ko e kakai naʻá ne faifakamoʻoni ki aí naʻa nau fieinua ki he Folofola ʻa e ʻOtuá.—ʻĒm. 8:11.

ʻI ʻAfilika, naʻe ʻave ʻe Claude Brown ʻa e ongoongo leleí ki he Matāfonua Koulá, ʻoku ʻiloa he taimí ni ko Kaná. Ko ʻene ngaahi malangá mo e ʻū tohi naʻá ne tufakí naʻe tokoni ia ke mafola vave ʻa e moʻoní ʻi he fonua ko iá. Ko John Blankson, ʻa ia naʻá ne ako ke hoko ko ha tokotaha tala vai, naʻá ne ʻalu ki he taha ʻo e ngaahi malanga ʻa Tokoua Brown. Naʻe vave ʻene ʻiloʻi kuó ne maʻu ʻa e moʻoní. “Naʻe ʻai au ʻe he moʻoní ke u ongoʻi fiefia  lahi,” ko e manatu ia ʻa John, “pea naʻá ku talanoa tauʻatāina fekauʻaki mo ia ʻi homau ʻapiakó.”

ʻI he ʻaho ʻe taha, naʻe ʻaʻahi ʻa John ki ha fale lotu ʻo e Siasi ʻIngilaní ke ʻeke ki he pātelé ʻo fekauʻaki mo e Tolu-Tahaʻi-ʻOtuá, he kuo mahinoʻi māʻalaʻala ʻe John he taimi ko ení ko ha akonaki taʻefakatohitapu ia. Naʻe tuli ia ʻe he pātelé mo kaikaila: “ʻOku ʻikai ko ha Kalisitiane koe; ʻokú ke kau mo e Tēvoló. Mavahe mei heni!”

ʻI he aʻu ʻa John ki ʻapí, naʻá ne fai ha tohi ki he pātelé, ʻo fakaafeʻi ia ke ne taukapoʻi ʻa e Tolu-Tahaʻi-ʻOtuá ʻi ha fakatahataha ʻi ha feituʻu kakai. Naʻe tali ange ʻe he pātelé ʻaki ʻene fekauʻi ʻa John ke ʻalu ki he ʻōfisi ʻo e faiako pulé, ʻa ia naʻe ʻeke ange ai ʻe he faiakó pe ko e moʻoni naʻá ne fai ha tohi ki he pātelé.

“ʻIo, naʻá ku fai pehē,” ko e tali ia ʻa John.

Naʻe fekau ʻe he faiakó ʻa John ke ne faitohi ʻo kole fakamolemole ki he pātelé. Ko ia naʻe tohi ʻe John:

“Tangataʻeiki, naʻe kole mai ʻe heʻeku faiakó ke u fai ha tohi ʻo kole fakamolemole atu kiate koe pea ʻoku ou ʻosi maau ke fai ʻa e tohí ka te u toki kole fakamolemole pē ʻo kapau te ke fakahaaʻi ʻokú ke akoʻi ʻa e ngaahi tokāteline loi.”

Naʻe ʻohovale ʻa e faiakó peá ne ʻeke ange, “Blankson, ko e tohi eni ʻokú ke faí?”

“ʻIo. Ko e kotoa pē ena ʻa e meʻa te u tohí.”

“ʻE tuli koe he akó. ʻE lava fēfē ke ke lea fakafepaki ki he pātele ʻo e siasi ʻa e puleʻangá pea ʻamanekina te ke kei ngāue ʻi he puleʻangá?”

“Tangataʻeiki, . . . ʻi he taimi ʻokú ke faiako ai ʻi ha lēsoni pea ʻoku ʻi ai e ngaahi poini ʻoku ʻikai ke mau mahinoʻi, ʻikai ʻoku mau ʻeke atu ha ngaahi fehuʻi?”

“ʻIo ʻoku mou ʻeke mai.”

“Ko ia tangataʻeiki, ko e meʻa pē ia naʻe hokó. Naʻe akoʻi mai ʻe he tangatá ʻa e Tohi Tapú pea naʻá ku ʻeke ange kiate ia ha fehuʻi. Kapau ʻoku ʻikai ke ne lava ʻe ia ʻo tali ʻa e fehuʻí, ko e hā ka u ka fai ai ha tohi ʻo kole fakamolemole kiate ia?”

Naʻe ʻikai ke tuli ʻa Blankson ʻi he akó. Pea naʻe ʻikai ke fai ha tohi ʻo kole fakamolemole.

Ke fakamāʻopoʻopo ʻa e ngāue ʻi he taʻú, naʻe fakahaaʻi ʻi he Watch Tower: “ʻE lava moʻoni ke tau lea fakataha mo Tēvita: ‘Te ke teuʻi au ʻaki ʻa e mālohi ki he taú.’ (Saame 18:39) Ko ha taʻu mātuʻaki fakalototoʻa eni, koeʻuhí kuo tau mātā ʻa e toʻukupu ʻo e ʻEikí . . . Ko ʻene kau sevāniti faitōnungá . . . kuo nau faifakamoʻoni ʻi he fiefia.”

ʻI he konga ki mui ʻo e taʻú, naʻe palani ʻa e fanga tokouá ke fakalahi atu ʻa e ngāue fakafaifekau fakafou ʻi he letioó. Naʻe kamata ʻa e ngāue ki ha fale fakamafolalea ʻe taha ofi ki Chicago. Ko e fale fakamafolalea foʻou ko ení naʻe ui ia ko e WORD. ʻI hono ngāueʻaki ha meʻangāue fakaletiō mālohi ange, naʻe malava ke fakamafola ʻa e pōpoaki ʻo e Puleʻangá ʻi he maile ʻe lauingeau, ʻo aʻu ki he fakatokelau ʻo Kānatá.

Ko e taʻu 1925 naʻe vavé ni ke ne tapua mai ʻa e ngaahi maama fakalaumālié, ʻo fakamāʻalaʻala ʻa e mahino ʻa e Kau Ako Tohi Tapú ki he Fakahā vahe 12. Naʻe hoko ia ko ha tūkiaʻanga ki he niʻihi. Kae kehe, ko e tokolahi naʻa nau tali lelei ʻa e vavanga ko eni ki he ngaahi meʻa ʻe hoko ʻi he fekauʻaki mo e langi taʻehāmaí pea mo e kaunga ʻa e mahino ko ení ki he kakai ʻa e ʻOtuá ʻi he māmaní.