1-2. Ko e hā naʻe hoko ʻi he fononga atu ha ongo ākonga ʻa Sīsū ki ʻEmeasi?

 KO Nīsani 16, 33 T.S. eni. Ko e kau ākonga ʻa Sīsuú ʻoku nau moʻulongoa koeʻuhi ko e loto-mamahí mo puputuʻu ʻi he manavaheé. Ko e toko ua ʻo kinautolu ʻokú na mavahe mei Selusalema pea huʻu ki ʻEmeasi, ko ha kolo ʻoku kilomita nai ʻe 11 (maile ʻe 7) mei Selusalema. Ko e ongo tangata ko ení ʻokú na loto-mamahi lahi koeʻuhí ko Sīsū, ʻa e tangata naʻa nau muimui aí, kuo tāmateʻi. ʻOku hā ngali kuo siva ʻena ʻamanaki ki he meʻa ʻe fai ʻe he Mīsaiá. Ka ʻoku teu ke hoko ha meʻa fakaʻohovale ki he ongo tangatá.

² ʻOku fakaofiofi atu ha sola ʻo ne kamata fononga fakataha mo kinaua. ʻOku fakamatala ʻa e ongo ākongá ki heʻena loto-mamahi ʻi he meʻa naʻe hoko kia Sīsuú. ʻOku kamata leva ke talanoa ʻa e solá kiate kinaua fekauʻaki mo ha meʻa naʻe liliu ai ʻena moʻuí. “ʻI heʻene kamata ʻia Mōsese mo e kotoa ʻo e Kau Palōfitá,” ʻokú ne fakamatalaʻi ange ʻa e ʻuhinga naʻe pau ke faingataʻaʻia pea pekia ai ʻa e Mīsaiá. ʻI he aʻu ʻa e kau tangata ʻe toko tolú ki ʻEmeasí, ʻoku fakahaaʻi ʻe he solá ʻa hono tuʻunga moʻoní—ko Sīsū ia kuo toetuʻú! ʻOku tau sioloto atu pē ki he fiefia ʻa e ongo ākongá ʻi hono ʻiloʻi kuo toe moʻui ʻa e Mīsaiá!—Luke 24:​13-35.

3-4. Ko e hā naʻe hoko ki he kau ākonga ʻa Sīsuú, pea ko e hā te tau ako ʻi he kupu ko ení? (Ngāue 1:3)

³ Naʻe tuʻo lahi ʻa e hā ʻa Sīsū ki heʻene kau ākongá lolotonga ʻa e ʻaho ʻe 40 fakaʻosi ʻo ʻene ʻi he māmaní. (Lau ʻa e Ngāue 1:3.) ʻI he taimi ko iá, ko e kau muimui loto-mamahi mo manavahē ʻo Sīsuú naʻa nau hoko ko ha kongakau fiefia, loto-pau mo loto-toʻa ʻo e kau malanga mo e kau faiako ʻo e Puleʻangá. a

 ⁴ ʻE lava ke tau maʻu ʻaonga mei he ako fekauʻaki mo e vahaʻa taimi fakatoʻoaloto ko eni ʻi he moʻui ʻa Sīsuú. ʻI he kupu ko ení, te tau sio ki he founga naʻe ngāueʻaki ai ʻe Sīsū ʻa e taimi ko ení (1) ke fakalototoʻaʻi ʻene kau ākongá, (2) ke fakalolotoʻi ʻenau mahino fekauʻaki mo e Folofolá, pea (3) ke teuʻi kinautolu ke nau fua ʻa e ngaahi fatongia lahi ange. ʻI he tuʻunga taki taha, te tau sio ki he founga ʻe lava ai ke tau faʻifaʻitaki ki he faʻifaʻitakiʻanga ʻa Sīsuú.

FAKALOTOTOʻAʻI ʻA E NIʻIHI KEHÉ

5. Ko e hā naʻe fiemaʻu ai ʻe he kau ākonga ʻa Sīsuú ʻa e fakalototoʻá?

⁵ Naʻe fiemaʻu ʻe he kau ākonga ʻa Sīsuú ʻa e fakalototoʻá. Ko e hā hono ʻuhingá? Ko e niʻihi naʻa nau liʻaki honau ngaahi ʻapí, fāmilí mo e pisinisí ke muimui taimi-kakato kia Sīsū. (Māt. 19:27) Ko e niʻihi naʻe kapusi mei he ngaahi tuʻunga ʻi he sōsaietí koeʻuhí ko ʻenau hoko ko ʻene kau ākongá. (Sione 9:22) Naʻa nau fai ʻa e ngaahi feilaulau ko ení koeʻuhí naʻa nau tui ko Sīsū ʻa e Mīsaia naʻe talaʻofá. (Māt. 16:16) Ka ʻi he taimi naʻe tāmateʻi ai ʻa Sīsuú, naʻe tōnoa ʻenau ʻamanakí pea naʻa nau hoko ʻo loto-siʻi.

6. Ko e hā naʻe fai ʻe Sīsū ʻi he hili ʻene toetuʻú?

⁶ ʻOku ʻikai ha veiveiua naʻe vakai ʻa Sīsū ki he mamahi ʻa ʻene kau ākongá ʻo ʻikai ko ha fakaʻilonga ʻo e vaivai fakalaumālie, ka ko ha fakafeangai anga-maheni ʻi he hoko ha mole fakamamahi. Ko ia ʻi he ʻaho pē ko ia naʻá ne toetuʻu aí, naʻá ne kamata fakalototoʻaʻi hono ngaahi kaumeʻá. Ko e fakatātaá, naʻá ne hā kia Mele Makitala lolotonga ʻene tangi ʻi hono fonualotó. (Sione 20:​11, 16) Naʻá ne toe hā foki ki he ongo ākonga naʻe fakamatala ki ai ʻi he kamataʻanga ʻo e kupu ko ení. Pea naʻá ne hā ki he ʻapositolo ko Pitá. (Luke 24:34) Ko e hā ʻe lava ke tau ako mei he faʻifaʻitakiʻanga ʻa Sīsuú? Fakakaukau ki he meʻa naʻe hoko ʻi he taimi naʻá ne fuofua hā aí.

7. Hangē ko ia naʻe lēkooti ʻi he Sione 20:​11-16, ko e hā ʻa e meʻa naʻe fai ʻe Mele ʻa ia naʻe vakai ki ai ʻa Sīsuú, pea naʻe ueʻi ai ʻa Sīsū ke ne fai ʻa e hā? (Sio foki ki he fakatātaá.)

⁷ Lau ʻa e Sione 20:​11-16. ʻI Nīsani 16, naʻe ʻalu atu pongipongia ha kau fefine mateaki ki he feituʻu naʻe ʻi ai ʻa e sino ʻo Sīsuú. (Luke 24:​1, 10) Tau tokangataha ki he hokosia ʻa e taha ʻo e kau fefiné, ko Mele Makitala. ʻI he aʻu atu ʻa Mele ki he fonualotó, naʻe ʻikai ke ʻi ai ʻa e sino ʻo Sīsuú. Naʻá ne lele ʻo tala kia Pita mo Sione peá ne muimui ʻiate kinaua ʻi heʻena fakavave atu ki he fonualotó. Hili hono fakapapauʻi ʻe he ongo tangatá naʻe ʻikai ha taha ʻi he fonualotó, naʻá na foki ki ʻapi. Ka naʻe nofo pē ai ʻa Mele, ʻo ne tangi. Naʻe ʻikai te ne ʻiloʻi naʻe sio atu  ʻa Sīsū. Naʻá ne vakai ki he loʻimataʻia ʻa e fefine faitōnunga ko ení pea naʻe maongo loloto kiate ia. Ko ia naʻá ne hā kia Mele pea naʻá ne fai leva ha meʻa faingofua pē ka naʻe mātuʻaki fakalototoʻa kiate ia. Naʻá ne lea kiate ia pea ʻoange ha vāhenga-ngāue mahuʻinga—ke vahevahe ʻa e ongoongo fekauʻaki mo ʻene toetuʻú ki hono fanga tokouá.—Sione 20:​17, 18.

8. ʻE lava fēfē ke tau faʻifaʻitaki kia Sīsuú?

⁸ ʻE lava fēfē ke tau faʻifaʻitaki kia Sīsuú? ʻE lava ke tau fai ʻa e meʻa lahi ke ueʻi hotau fanga tokouá mo e fanga tuofāfiné ke nau hanganaki tauhi kia Sihova kapau ʻoku tau lāuʻilo ki heʻenau ngaahi faingataʻaʻiá pea lea ʻi he kaungāongoʻi kiate kinautolu, ʻo hangē ko Sīsuú. Fakakaukau angé ki he hokosia ha tuofefine ko Jocelyn, ʻa ia naʻe mate hono tokouá ʻi ha fakatuʻutāmaki fakamamahi. “ʻI he ngaahi māhina lahi, naʻá ku mamahi lahi ʻi he taimi kotoa pē,” ko ʻene leá ia. Kae kehe, naʻe fakaafeʻi ia ʻe ha tokoua mo hono uaifí ki hona ʻapí, fanongo ʻi he kaungāongoʻi kiate ia, pea fakapapauʻi ange ʻokú ne mahuʻinga ʻi he vakai ʻa e ʻOtuá. ʻOku pehē ʻe Jocelyn: “Naʻá ku ongoʻi ʻo hangē naʻe ngāueʻaki kinaua ʻe Sihova ke kaufakiʻi au mei ha tahi hou mo kaupōʻuli ki ha vaka fakahaofi moʻui. Naʻá na tokoniʻi au ke u toe maʻu ʻa e holi ke hokohoko atu ʻeku tauhi kia Sihová.” ʻE lava foki ke tau fakalototoʻaʻi ʻa e niʻihi kehé ʻaki ʻa e fanongo tokanga ʻi heʻenau huaʻi mai honau lotó pea ʻaki ʻa e lea ʻi he kaungāongoʻi, fakataha mo e taumuʻa ke fakaivimālohiʻi kinautolu ʻi heʻenau ngāue ki he ʻOtuá.—Loma 12:15.

FAKAʻUHINGA ʻI HE FOLOFOLÁ

9. Ko e hā ʻa e pole naʻe fehangahangai mo e kau ākonga ʻa Sīsuú, pea naʻe anga-fēfē hono tokoniʻi kinautolu ʻe Sīsuú?

⁹ Ko e kau ākonga ʻa Sīsuú naʻa nau tali ʻa e Folofola ʻa e ʻOtuá pea feinga mālohi ke ngāueʻaki ia ʻi heʻenau moʻuí. (Sione 17:6) Neongo ia, ko e pekia ʻa Sīsū ko ha tokotaha faihia ʻi ha ʻakau fakamamahí naʻe ʻai ai ke nau puputuʻu. Naʻe ʻiloʻi ʻe Sīsū ko ʻenau ngaahi veiveiuá naʻe tupu ia, ʻo ʻikai mei ha loto naʻe kovi, ka ko e siʻi ʻenau mahinó. (Luke 9:​44, 45; Sione 20:9) Ko ia naʻá ne akoʻi kinautolu ke fakaʻuhinga ʻi he Folofolá. Fakakaukau ki he founga naʻá ne fai ai iá ʻi heʻene hā ki he ongo ākonga ʻi he hala ki ʻEmeasí.

10. Naʻe anga-fēfē hono fakatuipauʻi ʻe Sīsū ʻene kau ākongá ko e moʻoni ko ia ʻa e Mīsaiá? (Luke 24:​18-27)

¹⁰ Lau ʻa e Luke 24:​18-27. Fakatokangaʻi naʻe ʻikai ke tala ange ʻe Sīsū ki he ongo tangatá ʻi he taimi pē ko iá pe ko hai ia. ʻI hono kehé, naʻá ne ʻeke ha ngaahi fehuʻi. Ko e hā hono ʻuhingá? Mahalo naʻá ne loto ke na fakahaaʻi ʻa e meʻa naʻe ʻi heʻena fakakaukaú pea mo hona lotó. Pea ko e meʻa ia naʻá na faí. Naʻá na tala ange kiate ia naʻa nau ʻamanaki ko Sīsū te ne fakahaofi ʻa ʻIsileli mei he fakafeʻātungia ʻa e kau Lomá. Hili ʻena fakahaaʻi māʻalaʻala ʻena ngaahi hohaʻá, naʻe ngāueʻaki ʻe Sīsū ʻa e Folofolá ke tokoniʻi ʻa e ongo tangatá ke na mahinoʻi ʻa e meʻa naʻe hokó. b Ki mui ʻi he efiafi ko iá, naʻe fakamoleki ʻe Sīsū ʻa e taimi ke fakapapauʻi ki he kau ākonga kehé ʻa e ngaahi moʻoni ko ení. (Luke 24:​33-48) Ko e hā ʻe lava ke tau ako mei he talanoa ko ení?

11-12. (a) Ko e hā ʻa e lēsoni ʻe lava ke tau ako mei he founga naʻe akoʻi ai ʻe Sīsū ʻa e ngaahi moʻoni Fakatohitapú? (Sio foki ki he fakatātaá.) (e) Naʻe anga-fēfē hono tokoniʻi ʻa Nortey ʻe heʻene faiako Tohi Tapú?

¹¹ ʻE lava fēfē ke tau faʻifaʻitaki kia Sīsuú? ʻUluakí, ʻi hono akoʻi ʻa e kau ako Tohi Tapú, ʻeke ha ngaahi fehuʻi fakapotopoto te ne fusi hake ʻa e meʻa ʻi heʻenau fakakaukaú mo honau lotó. (Pal. 20:5) ʻI hoʻo mahinoʻi pē ʻenau ngaahi ongoʻí, fakahaaʻi ange ʻa e founga ke kumi ai ki ha ngaahi konga Tohi Tapu pau ʻoku kaunga ki honau tuʻungá. Talitekeʻi leva ʻa e hehema ke tala ange ʻa e meʻa ke nau faí. ʻI hono kehé, tokoniʻi  kinautolu ke nau fakaʻuhinga ʻi he Folofolá pea ke ʻiloʻi ʻa e founga ʻe lava ke nau ngāueʻaki ai ʻa e ngaahi tefitoʻi moʻoni Fakatohitapú ʻi heʻenau moʻuí. Fakakaukau angé ki he hokosia ha tokoua ʻi Kana ko Nortey.

¹² ʻI he taʻu 16 ʻa Nortey, naʻe kamata ke ne ako ʻa e Tohi Tapú. Kae kehe, naʻe vave hono fakafepakiʻi ia ʻe hono fāmilí. Ko e hā naʻá ne tokoniʻi ia ke nofoʻaki tuʻumaʻú? Ko ʻene faiako Tohi Tapú naʻá ne ngāueʻaki ʻa e Mātiu vahe 10 ke fakamatalaʻi ko e kau Kalisitiane moʻoní ʻe fakatangaʻi. “Ko ia ʻi he kamata ʻa e fakatangá,” ko e lea ia ʻa Nortey, “naʻá ku tuipau kuó u maʻu ʻa e moʻoní.” Naʻe toe tokoniʻi ia ʻe heʻene faiakó ke ne fakaʻuhinga ʻi he Mātiu 10:16 koeʻuhi ke ne lava ʻo fakapotopoto mo anga-fakaʻapaʻapa ʻi he talanoa fekauʻaki mo e ngaahi meʻa fakalotú ʻi hono ʻapí. Hili ʻa e papitaiso ʻa Nortey, naʻá ne loto ke tāimuʻa, ka naʻe ʻamanekina ia ʻe heʻene tamaí ke ne ʻalu ki he ʻunivēsití. ʻI he ʻikai tala ange kia Nortey ʻa e meʻa ke ne faí, naʻe fusi hake ʻe heʻene faiakó ʻa ʻene fakakaukaú ʻaki ʻa e ngaahi fehuʻi pea tokoniʻi ia ke ne fakaʻuhinga ʻi he ngaahi tefitoʻi moʻoni Fakatohitapú. Ko e olá? Naʻe fili ʻa Nortey ke hū ki he ngāue taimi-kakató. Naʻe fekau ia heʻene tamaí ke ne mavahe mei ʻapi. ʻOku anga-fēfē ongoʻi ʻa Nortey fekauʻaki mo e ngaahi meʻá ni? “ʻOku ou tuipau naʻá ku fai ʻa e fili totonú,” ko ʻene leá ia. ʻI heʻetau vaheʻi foki ʻa e taimi ke tokoniʻi ʻa e niʻihi kehé ke fakaʻuhinga ʻi he Folofolá, ʻoku tau tokoniʻi ai kinautolu ke nau hoko ko e kau Kalisitiane mālohi.—ʻEf. 3:​16-19.

TOKONIʻI ʻA E KAU TANGATÁ KE NAU TAAU KO E “NGAAHI MEʻAʻOFA KO E KAU TANGATA”

13. Ko e hā naʻe fai ʻe Sīsū ke fakapapauʻi naʻe hokohoko atu hono tokangaʻi ʻa e ngāue ʻene Tamaí? (ʻEfesō 4:8)

¹³ ʻI he ʻi māmani ʻa Sīsuú, naʻá ne tokangaʻi haohaoa ʻa e ngāue naʻe ʻoange ʻe heʻene Tamaí ke ne faí. (Sione 17:4) Ka naʻe ʻikai ke maʻu ʻe Sīsū ʻa e fakakaukau, ‘Kapau ʻokú ke fiemaʻu ke fai ha meʻa ke tonu, kuo pau ke ke fai pē ia ʻe koe.’ Lolotonga ʻa e taʻu ʻe tolu mo e konga ʻo ʻene ngāue fakafaifekaú, naʻá ne teuʻi ʻa e niʻihi kehé ke nau fai ʻa e ngāué. Ki muʻa ke foki ʻa Sīsū ki hēvaní, naʻá ne tuku ki heʻene kau ākongá—ko e niʻihi naʻa nau taʻu 20 tupu nai—ʻa e fatongia ke tokangaʻi ʻa e fanga sipi mahuʻinga ʻa Sihová pea takimuʻa ʻi he ngāue fakamalangá mo e faiakó. (Lau ʻa e ʻEfesō 4:8.) Naʻe anga-fēfē hono ngāueʻaki ʻe Sīsū hono ʻaho ʻe 40 fakaʻosí ke tokoniʻi ʻa e kau tangata līʻoa, mateaki mo ngāue mālohi ko ení ke nau taau ke hoko ko e “ngaahi meʻaʻofa ko e kau tangata”?

14. Naʻe anga-fēfē hono tokoniʻi ʻe Sīsū ʻene kau ākongá ke nau tupu fakalaumālie lolotonga ʻa e ʻaho ʻe 40 fakaʻosi ʻo ʻene ʻi he māmaní? (Sio foki ki he fakatātaá.)

 ¹⁴ Naʻe ʻoange ʻe Sīsū ki heʻene kau ākongá ʻa e akonaki fakahangatonu kae anga-ʻofa. Ko e fakatātaá, naʻá ne fakatokangaʻi ko e niʻihi ʻo kinautolu naʻa nau maʻu ʻa e hehema ke veiveiuá, ko ia naʻá ne akonakiʻi kinautolu. (Luke 24:​25-27; Sione 20:27) Naʻá ne fakamamafaʻi ʻa e fiemaʻu kiate kinautolu ke nau tokanga lahi ange ki he ngāue fakatauhisipí ʻi heʻenau ngāue paʻangá. (Sione 21:15) Naʻá ne fakamanatu kiate kinautolu ke ʻoua te nau hoko ʻo hohaʻa tōtuʻa fekauʻaki mo e ngaahi monū ʻe maʻu nai ʻe he niʻihi kehé ʻi he ngāue ʻa Sihová. (Sione 21:​20-22) Pea naʻá ne fakatonutonu ha ngaahi fakakaukau hala ʻe niʻihi naʻa nau maʻu fekauʻaki mo e Puleʻangá pea tokoniʻi kinautolu ke nau tokangataha ki hono malangaʻi ʻa e ongoongo leleí. (Ngā. 1:​6-8) Ko e hā ʻe lava ke ako ʻe he kau mātuʻá meia Sīsuú?

15-16. (a) ʻI he ngaahi founga fē ʻe lava ke faʻifaʻitaki ai ʻa e kau mātuʻá kia Sīsuú? Fakamatalaʻi. (e) Naʻe anga-fēfē maʻu ʻaonga ʻa Patrick mei he akonakí?

¹⁵ ʻE lava fēfē ke faʻifaʻitaki ʻa e kau mātuʻá kia Sīsuú? Kuo pau ke nau teuʻi pea tokoniʻi ʻa e kau tangatá, kau ai ʻa e faʻahinga ʻoku nau kei siʻi nai, ke nau taau ki he ngaahi fatongia lahi ange. c Ko e kau mātuʻá ʻoku ʻikai ke nau ʻamanekina ʻa e faʻahinga ʻoku nau teuʻí ke nau haohaoa. ʻOku totonu ke nau ʻoange ha ngaahi akonaki anga-ʻofa koeʻuhí ke maʻu ʻe he fanga tokoua kei siʻi ko ení ʻa e taukei pea sio ki he fiemaʻu ke hoko ʻo anga-fakatōkilalo, faitōnunga pea loto-lelei ke ngāue maʻá e niʻihi kehé.—1 Tīm. 3:1; 2 Tīm. 2:2; 1 Pita 5:5.

¹⁶ Fakakaukau ki he anga ʻo e maʻu ʻaonga ha tokoua ko Patrick mei he akonakí. ʻI heʻene kei siʻí, naʻá ne hehema ke lea anga-fefeka mo tōʻonga taʻeʻofa, ʻo aʻu ki he fanga tuofāfiné. Naʻe fakatokangaʻi ʻe ha mātuʻa matuʻotuʻa ʻa e ngaahi vaivaiʻanga ʻo Patrick peá ne ʻoange ha akonaki anga-lelei kae hangatonu. “ʻOku ou fiefia naʻá ne fai pehē,” ko e lea ia ʻa Patrick. “Naʻá ku faʻa loto-siʻi ʻi heʻeku sio ki he fanga tokoua kehé ʻoku nau maʻu ʻa e ngaahi monū ʻo e ngāué naʻá ku fiemaʻú. Ka ko e akonaki ʻa e mātuʻá naʻá ne tokoniʻi au ke u sio ki he fiemaʻu ke  tokangataha ki he ngāue anga-fakatōkilalo maʻa hoku fanga tokouá mo e fanga tuofāfiné kae ʻikai ki hono maʻu ha tuʻunga pe monū ʻi he fakatahaʻangá.” Ko e olá, naʻe fakanofo ʻa Patrick ko ha mātuʻa ʻi hono taʻu 20 tupu siʻí.—Pal. 27:9.

17. Naʻe anga-fēfē hono fakahāhā ʻe Sīsū naʻá ne falala ki heʻene kau ākongá?

¹⁷ Naʻe ʻoange ʻe Sīsū ki heʻene kau ākongá ʻa e fatongia ke ʻikai ngata pē ʻi he malangá ka ke faiako foki. (Māt. 28:20) Naʻe ongoʻi nai ʻe he kau ākongá naʻe ʻikai ke nau taau ki he vāhenga-ngāue ko iá. Kae kehe, naʻe ʻikai ke veiveiua ʻa Sīsū te nau lava ʻo fai ʻa e ngāué, pea naʻá ne tala ange ia kiate kinautolu. ʻI hono fakahaaʻi ʻa e falala pau kakato kiate kinautolú, naʻe pehē ʻe Sīsū: “Hangē tofu pē ko hono fekauʻi mai au ʻe he Tamaí, ʻoku ou fekauʻi atu foki kimoutolu.”—Sione 20:21.

18. ʻE lava fēfē ke faʻifaʻitaki ʻa e kau mātuʻá kia Sīsuú?

¹⁸ ʻE lava fēfē ke faʻifaʻitaki ʻa e kau mātuʻá kia Sīsuú? Ko e kau mātuʻa taukeí ʻoku nau vahevahe atu ʻa e fatongiá. (Fil. 2:​19-22) Ko e fakatātaá, ko e kau mātuʻá ʻe lava ke nau fakakau ʻa e faʻahinga kei siʻí ʻi hono fakamaʻa mo monomono ʻa e Fale Fakatahaʻangá. Hili hono vahe ha ngāue, ʻe lava ke nau fakahaaʻi ʻenau falala pau ki he faʻahinga kuo fili ke fakahoko ʻa e ngāué ʻaki hono teuʻi kinautolu pea falala leva te nau fakahoko totonu ʻa e ngāué. Ko ha mātuʻa foʻou ko Matthew ʻokú ne pehē ʻokú ne houngaʻia moʻoni ʻi he kau mātuʻa taukei ʻoku nau teuʻi fakalelei ia ke fakahoko ha vāhenga-ngāue pea falala ange leva ke ne fakakakato ia. ʻOkú ne pehē, “Kuó u maʻu ʻaonga ʻi heʻenau vakai ki heʻeku ngaahi fehālaakí ko ha konga pē ia ʻo e akó pea tokoniʻi leva au ke u fakalakalaka.” d

19. Ko e hā ʻoku totonu ke tau fakapapauʻi ke faí?

¹⁹ Naʻe ngāueʻaki ʻe Sīsū ʻa e ngaahi ʻaho ʻe 40 fakaʻosi ʻo ʻene ʻi he māmaní ke fakalototoʻaʻi, akoʻi mo teuʻi ʻa e niʻihi kehé. ʻOfa ke tau fakapapauʻi ke muimui ofi ʻi heʻene faʻifaʻitakiʻangá. (1 Pita 2:21) Te ne tokoniʻi kitautolu ke fai pehē. He ko ē, naʻá ne talaʻofa: “ʻOku ou ʻiate kimoutolu ʻi he ʻaho kotoa pē ʻo aʻu ki he fakaʻosiʻosi ʻo e fokotuʻutuʻu lolotongá.”—Māt. 28:20.