1. Ko e hā ʻa e ngaahi meʻaʻofa ʻe niʻihi kuo tau maʻu meia Sīsuú?

 KUO ʻikai ha tangata te ne fakahāhā ʻa e nima-homó ʻo lahi ange ʻia Sīsū. ʻI heʻene ʻi māmaní, naʻá ne ngāueʻaki loto-lelei hono mālohi fakaemaná ke tokoniʻi ʻa e niʻihi kehé. (Luke 9:​12-17) Naʻá ne foaki ʻa e meʻaʻofa lahi tahá ʻaki ʻene tuku atu ʻene moʻuí maʻatautolu. (Sione 15:13) Talu mei he toetuʻu ʻa Sīsuú, kuó ne hokohoko atu ke nima-homo. Hangē ko ia naʻá ne talaʻofá, kuó ne kole kia Sihova ke huaʻi hifo hono laumālie māʻoniʻoní ke akoʻi mo fakafiemālieʻi kitautolu. (Sione 14:​16, 17, fkm. ʻi lalo; 16:13) Pea fakafou ʻi heʻetau ngaahi fakatahá, ʻoku hokohoko atu hono teuʻi kitautolu ʻe Sīsū ke tau ngaohi ākonga ʻi he kotoa ʻo e māmaní.—Māt. 28:​18-20.

2. Ko hai ʻoku kau ki he “ngaahi meʻaʻofa ko e kau tangata” naʻe lave ki ai ʻi he ʻEfesō 4:​7, 8?

² Fakakaukau ki ha toe meʻaʻofa ʻe taha ʻa Sīsū. Naʻe tohi ʻe he ʻapositolo ko Paulá ʻi he hili ʻa e hāʻele hake ʻa Sīsū ki hēvaní, “naʻá ne foaki ha ngaahi meʻaʻofa ko e kau tangata.” (Lau ʻa e ʻEfesō 4:​7, 8.) Naʻe fakamatalaʻi ʻe Paula naʻe foaki ʻe Sīsū ʻa e ngaahi meʻaʻofa ko ení koeʻuhí ke poupouʻi ʻa e fakatahaʻangá ʻi he ngaahi founga kehekehe. (ʻEf. 1:​22, 23; 4:​11-13) ʻI he ʻahó ni, ko e “ngaahi meʻaʻofa ko e kau tangata” ko ení ʻoku kau ki ai ʻa e kau sevāniti fakafaifekaú, kau mātuʻa ʻi he fakatahaʻangá, mo e kau ʻovasia sēketí. a Ko e moʻoni, ko e kau tangata ko ení ʻoku nau taʻehaohaoa, ko ia ʻoku nau fai ʻa e ngaahi fehālaaki. (Sēm. 3:2) Ka ko hotau ʻEiki ko Sīsū Kalaisí ʻokú ne ngāueʻaki kinautolu ke tokoniʻi kitautolu; ko kinautolú ko ʻene ngaahi meʻaʻofa kiate kitautolu.

3. Fakatātaaʻi ʻa e founga ʻe lava ai ke tau poupou kotoa ki he ngāue ʻa e “ngaahi meʻaʻofa ko e kau tangata.”

³ Naʻe vaheʻi ʻe Sīsū ʻa e “ngaahi meʻaʻofa ko e kau tangata” ko ení ke nau langa hake ʻa e fakatahaʻangá. (ʻEf. 4:12) Ka ko e toenga ʻo  kitautolú ʻe lava ke tau tokoniʻi kinautolu ke fakahoko ʻa e fatongia mahuʻinga ko ení. Ke fakatātaaʻi: Ko e niʻihi ʻo kitautolu ʻoku tau kau tonu ʻi hono langa ha Fale Fakatahaʻanga. Ko e niʻihi kehé ʻoku nau poupou ki he ngāué ʻaki hono tokonaki ha meʻakai, meʻalele ki he fefonongaʻakí, mo e ngaahi ngāue kehe. ʻI he tuʻunga meimei tatau, ʻe lava ke tau poupou kotoa ki he ngaahi ngāue ʻa e kau sevāniti fakafaifekaú, kau mātuʻa ʻi he fakatahaʻangá, mo e kau ʻovasia sēketí, ʻaki ʻa e meʻa ʻoku tau leaʻaki mo faí. Tau lāulea angé ki he founga ʻoku tau maʻu ʻaonga ai mei heʻenau ngāue mālohí mo e founga ʻe lava ke tau fakahāhā ai ʻa e houngaʻia kiate kinautolu mo Sīsū, ʻa ia naʻá ne foaki mai ʻa e “ngaahi meʻaʻofa ko e kau tangata” ko ení.

FAI ʻE HE KAU SEVĀNITI FAKAFAIFEKAÚ ʻA E “NGAAHI NGĀUE TOKONI”

4. Ko e hā ʻa e niʻihi ʻo e “ngaahi ngāue tokoni” naʻe fai ʻe he kau sevāniti fakafaifekaú ʻi he ʻuluaki senitulí?

⁴ ʻI he ʻuluaki senitulí, ko e niʻihi ʻo e fanga tokouá naʻe fakanofo ko e kau sevāniti fakafaifekau. (1 Tīm. 3:8) ʻOku hā ngali ko kinautolu ʻa e faʻahinga naʻa nau fai ʻa e “ngaahi ngāue tokoni” naʻe tohi ʻa Paula fekauʻaki mo iá. (1 Kol. 12:28) ʻOku hā mahino naʻe tokangaʻi ʻe he kau sevāniti fakafaifekaú ʻa e ngaahi meʻa naʻe fiemaʻu koeʻuhi ke lava ʻa e kau mātuʻá ʻo tokangataha ki he faiakó mo e tauhi-sipí. Ko e fakatātaá, naʻe tokoni nai ʻa e kau sevāniti fakafaifekaú ke hiki-tatau ʻa e Folofolá pe fakatau mai ʻa e ngaahi naunau naʻe fiemaʻu ki he hiki-tataú.

5. Ko e hā ʻa e niʻihi ʻo e “ngaahi ngāue tokoni” ʻoku fai ʻe he kau sevāniti fakafaifekaú ʻi he ʻahó ni?

⁵ Fakakaukau ki ha niʻihi ʻo e ngaahi ngāue tokoni ʻoku fai ʻe he kau sevāniti fakafaifekau ʻi hoʻo fakatahaʻangá. (1 Pita 4:10) ʻE vaheʻi nai kinautolu ke nau tokangaʻi ʻa e paʻanga ʻa e fakatahaʻangá pe feituʻu ngāué, ʻota ʻa e ʻū tohí pea ʻai ia ke ala maʻu ʻe he kau malangá, ngāue ki he naunau fakaleʻolahí mo e vitioó, ngāue ko e kau fakanofonofo, pe tokoni ke tokangaʻi ʻa e Fale Fakatahaʻangá. Ko e ngaahi ngāue kotoa ko ení ʻoku mātuʻaki fiemaʻu ia kae lele lelei ʻa e fakatahaʻangá. (1 Kol. 14:40) Tānaki atu ki aí, ko e niʻihi ʻo e kau sevāniti fakafaifekaú ʻoku nau fakahoko ʻa e ngaahi konga ʻi he Fakataha ki he Moʻuí mo e Ngāue Fakafaifekaú mo e ngaahi malanga maʻá e kakaí. Ko ha sevāniti fakafaifekau ʻe toe fakanofo nai ke ne tokoni ki ha ʻovasia kulupu. ʻI he taimi ʻe niʻihi, ko e kau sevāniti fakafaifekau tāú ʻoku nau kau fakataha mo e kau mātuʻá ʻi he ngaahi ʻaʻahi fakatauhisipí.

6. Ko e hā ʻa e ngaahi ʻuhinga ʻe niʻihi ʻoku tau houngaʻia ai ʻi heʻetau kau sevāniti fakafaifekau ngāue mālohí?

⁶ ʻOku anga-fēfē maʻu ʻaonga ʻa e fakatahaʻangá mei he ngāue ʻa e kau sevāniti fakafaifekaú? “Mālō mo ʻemau kau sevāniti fakafaifekaú, ʻoku ou maʻu ʻaonga kakato ai mei he ngaahi fakatahá,” ko e lea ia ʻa Beberly, b ko ha tuofefine ʻi Polivia. “Koeʻuhí ko ʻenau ngāué, ʻoku lava ai ke u hiva, fai ʻeku ngaahi tali, fanongo ki he ngaahi malanga, pea ako mei he ngaahi vitioó mo e fakatātaá. ʻOku nau tokangaʻi ʻa e tuʻunga malú pea mo e faʻahinga ʻoku nau kau mai fakafou ʻi he tā vitioó. ʻI he tuku ʻa e fakatahá, ʻoku nau takimuʻa ʻi he fakamaʻá, tokoni ʻi he paʻangá, pea fakapapauʻi ʻoku mau maʻu ʻa e ʻū tohi ʻoku mau fiemaʻú. ʻOku ou houngaʻia ʻiate kinautolu!” Ko Leslie, ʻoku nofo ʻi Kolomupia pea ko ha mātuʻa hono husepānití, ʻokú ne pehē: “Ko hoku husepānití ʻokú ne falala ki he kau sevāniti fakafaifekaú ke nau tokangaʻi ʻa e ngaahi vāhenga-ngāue kehekehe. Ka ne ʻikai kinautolu, te ne toe femoʻuekina ange, ko ia ʻoku ou fakamālō ʻi heʻenau vēkeveke mo loto-lelei ke tokoní.” ʻOku ʻikai ha veiveiua ʻoku pehē hoʻo ongoʻí.—1 Tīm. 3:13.

7. ʻE lava fēfē ke tau fakahāhā ʻa e houngaʻia ki he kau sevāniti fakafaifekaú? (Sio foki ki he fakatātaá.)

⁷ Neongo ʻoku tau ongoʻi houngaʻia nai ʻi he kau sevāniti fakafaifekaú, ʻoku fakalototoʻaʻi kitautolu ʻe he Tohi Tapú ke tau fakahāhā kiate kinautolu ʻetau houngaʻiá. (Kol. 3:15) Ko Krzysztof,  ko ha mātuʻa ʻi Finilani, ʻokú ne fakahāhā ʻene houngaʻiá ʻo anga peheni: “ʻOku ou ʻave ha kaati pe ko ha pōpoaki ʻi he telefoní ʻo u lave ai ki ha konga Tohi Tapu mo ha founga pau naʻe fakalototoʻaʻi ai au ʻe he sevāniti fakafaifekaú pe ko e ʻuhinga ʻoku ou houngaʻia ai ʻi heʻene ngāué.” Ko Pascal mo Jael, ʻokú na nofo ʻi Niu Kaletōnia, ʻokú na lotu fakahangatonu maʻá e kau sevāniti fakafaifekaú. ʻOku fakamatala ʻa Pascal, “Ki muí ni maí, kuó ma fai ʻa e ngaahi kōlenga, hū tōtōaki, mo e ngaahi lotu ʻo e fakafetaʻi ʻo fekauʻaki mo e kau tangata kuo fakanofo ko eni ʻi heʻemau fakatahaʻangá.” ʻOku fanongo ʻa Sihova ki he ngaahi lotu peheé, pea ʻoku maʻu ʻaonga kātoa ai ʻa e fakatahaʻangá.—2 Kol. 1:11.

ʻOKU “NGĀUE MĀLOHI ʻI HOMOU LOTOLOTONGÁ” ʻA E KAU MĀTUʻÁ

8. Ko e hā naʻe lava ai ke tohi ʻe Paula ko e kau mātuʻa ʻi he ʻuluaki senitulí naʻa nau “ngāue mālohi”? (1 Tesalonaika 5:​12, 13)

⁸ Ko e kau mātuʻa ʻi he ʻuluaki senitulí naʻa nau ngāue mālohi maʻá e fakatahaʻangá. (Lau ʻa e 1 Tesalonaika 5:​12, 13; 1 Tīm. 5:17) Naʻa nau “tokangaʻi” ʻa e fakatahaʻangá—ʻo tataki ʻa e ngaahi fakatahá pea fai ʻa e ngaahi fili ʻi he tuʻunga ko ha kulupu ʻo e kau mātuʻa. Naʻa nau “faienginaki” ki honau fanga tokouá mo e fanga tuofāfiné—ʻo ʻoange ʻa e ngaahi akonaki papau kae anga-ʻofa koeʻuhí ke maluʻi ʻa e fakatahaʻangá. (1 Tes. 2:​11, 12; 2 Tīm. 4:2) Ko e moʻoni, naʻe toe ngāue mālohi ʻa e kau tangata ko ení ke tokonaki maʻa honau ngaahi fāmilí pea ke tauhi kinautolu tonu ke nau mālohi fakalaumālie.—1 Tīm. 3:​2, 4; Tai. 1:​6-9.

9. Ko e hā ʻa e niʻihi ʻo e ngaahi fatongia ʻoku tokangaʻi ʻe he kau mātuʻá ʻi he ʻahó ni?

⁹ Ko e kau mātuʻá ʻi he ʻahó ni ko e kau tangata femoʻuekina. Ko e kau ʻevangeliō kinautolu. (2 Tīm. 4:5) ʻOku nau takimuʻa faivelenga ʻi he malaʻe malangá, fokotuʻutuʻu ʻa e ngāue fakamalanga ʻi he feituʻu ngāue fakalotofonuá, pea akoʻi kitautolu ke malanga mo faiako ola lelei. ʻOku nau toe ngāue ko e kau fakamaau faimeesi mo taʻefilifilimānako. ʻI he fai ʻe ha Kalisitiane ha angahala mamafa, ʻoku feinga mālohi ʻa e kau mātuʻá ke tokoniʻi ia ke fakaleleiʻi ʻene kaumeʻa mo Sihová. ʻI he taimi tatau, ʻoku nau tokanga ke tauhi ʻa e fakatahaʻangá ke maʻa. (1 Kol. 5:​12, 13; Kal. 6:1) Ko e meʻa tefitó, ʻoku ʻiloa ʻa e kau mātuʻá ko e kau tauhi-sipi. (1 Pita 5:​1-3) ʻOku nau fakahoko ʻa e ngaahi malanga Fakatohitapu kuo teuteu lelei, feinga ke ʻiloʻi ʻa e tokotaha kotoa ʻi he fakatahaʻangá, pea fai ʻa e ngaahi ʻaʻahi fakatauhisipi. Ko e kau mātuʻa ʻe niʻihi ʻoku nau toe tokoni ʻi he ngāue ki hono langa mo monomono ʻa e Fale Fakatahaʻangá, fokotuʻutuʻu ʻa e fakataha-lahí, pea mo e ngāue ʻa e Kōmiti Fetuʻutaki Fakafalemahakí mo e Kulupu ʻAʻahi Mahakí, ʻo tānaki ia ki he ngaahi vāhenga-ngāue kehe. Ko e kau mātuʻá ʻoku nau ngāue mālohi maʻa kitautolu!

10. Ko e hā ʻa e ngaahi ʻuhinga ʻe niʻihi ʻoku tau houngaʻia ai ʻi heʻetau kau mātuʻa ngāue mālohí?

¹⁰ Naʻe tomuʻa tala ʻe Sihova ko e kau tauhi-sipí te nau tokangaʻi lelei kitautolu pea heʻikai ke tau “toe hoko ʻo ilifia pe manavahē.” (Sel. 23:4) Ko Johanna, ko ha tuofefine ʻi Finilani, naʻá ne hokosia moʻoni ʻa e ngaahi lea ko iá ʻi he puke lahi ʻene faʻeé. ʻOkú ne pehē: “Neongo naʻe faingataʻa ke u vahevahe ʻeku ngaahi ongoʻí ki he niʻihi kehé, ko ha mātuʻa ʻa ia naʻe ʻikai ke u fuʻu ʻiloʻi lelei, naʻá ne anga-kātaki mai kiate au, lotu fakataha mo au, pea fakapapauʻi mai ʻa e ʻofa ʻa Sihová. ʻOku ʻikai ke u manatuʻi ʻa e meʻa tofu pē naʻá ne leaʻakí, ka ʻoku ou manatuʻi naʻá ku ongoʻi malu. ʻOku ou tui naʻe fekauʻi mai ia ʻe Sihova ke ne tokoniʻi au ʻi he mōmeniti totonú.” Kuo anga-fēfē hono tokoniʻi koe ʻe he kau mātuʻa ʻi hoʻo fakatahaʻangá?

11. ʻE lava fēfē ke tau fakahāhā ʻa e houngaʻia ki he kau mātuʻá? (Sio foki ki he fakatātaá.)

¹¹ ʻOku fiemaʻu ʻe Sihova ke tau fakahāhā ʻa e houngaʻia loto-māfana ki he kau mātuʻá “koeʻuhí ko ʻenau ngāué.” (1 Tes. 5:​12, 13) Ko Henrietta, ʻoku nofo foki ʻi Finilani, ʻokú ne pehē: “Ko e kau  mātuʻá ʻoku nau tokoniʻi loto-lelei ʻa e niʻihi kehé, ka ʻoku ʻikai ʻuhinga ení ʻoku nau maʻu ʻe kinautolu ʻa e taimi mo e ivi lahi ange pe ʻoku ʻikai ke ʻi ai ha ngaahi pole ia ʻi heʻenau moʻuí. ʻI he taimi ʻe niʻihi ʻoku ou tala ange pē kiate kinautolu: ‘ʻOkú ke ʻilo ha meʻa? Ko ha tokotaha mātuʻa lelei moʻoni koe. ʻOku ou fakaʻamu pē ʻokú ke ʻiloʻi ia.’” Ko ha tuofefine ʻi Toake ko Sera, ʻokú ne pehē: “ʻOku fiemaʻu ʻe he kau mātuʻá ha fakalototoʻa ke kei hokohoko atu. Ko ia ʻe lava ke tau ʻave kiate kinautolu ha kaati, fakaafeʻi ki ha houa kai, pe kau fakataha mo kinautolu ʻi he malaʻe malangá.” ʻOku ʻi ai ha mātuʻa ʻa ia ko ʻene ngaahi feingá ʻoku tautefito hoʻo houngaʻia aí? Kumi ki ha ngaahi founga ke fakahāhā ai ʻa e houngaʻia ko iá.—1 Kol. 16:18.

LANGA HAKE ʻE HE KAU ʻOVASIA SĒKETÍ ʻA E FAKATAHAʻANGÁ

12. Ko e hā ʻa e fokotuʻutuʻu naʻe langa hake ai ʻa e ngaahi fakatahaʻanga ʻi he ʻuluaki senitulí? (1 Tesalonaika 2:​7, 8)

¹² Naʻe foaki ʻe Kalaisi Sīsū ki he fakatahaʻangá ha “ngaahi meʻaʻofa ko e kau tangata” ʻa ia ʻoku nau ngāue ʻi ha founga ʻe taha. ʻI he malumalu ʻo ʻene tatakí, ko e kau mātuʻa ʻi Selusalemá naʻa nau fekauʻi atu ko ha kau ʻovasia fefonongaʻaki ʻa Paula, Panepasa mo e niʻihi kehe. (Ngā. 11:22) Ko e hā hono ʻuhingá? ʻI he ʻuhinga tatau pē ko ia naʻe fakanofo ai ʻa e kau sevāniti fakafaifekaú mo e kau mātuʻá: Ke langa hake ʻa e ngaahi fakatahaʻangá. (Ngā. 15:​40, 41) Naʻe feilaulauʻi ʻe he kau tangata ko ení ʻenau fiemālié pea aʻu ʻo tuku ʻenau moʻuí ke ʻi ha tuʻunga fakatuʻutāmaki koeʻuhi ke akoʻi mo fakalototoʻaʻi ʻa e niʻihi kehé.—Lau ʻa e 1 Tesalonaika 2:​7, 8.

13. Ko e hā ʻa e niʻihi ʻo e ngaahi fatongia ʻo e kau ʻovasia sēketí?

¹³ Ko e kau ʻovasia sēketí ʻoku nau ngaʻunu maʻu pē. Ko e niʻihi ʻoku nau fononga ʻi he kilomita ʻe lauingeau mei he fakatahaʻanga ki he fakatahaʻanga. ʻI he uike taki taha, ko ha ʻovasia sēketi ʻokú ne fakahoko ha ngaahi malanga, ʻalu ʻi he ngaahi ʻaʻahi fakatauhisipi, pea fakahoko ha fakataha tāimuʻa, ko ha fakataha mo e kau mātuʻá, pea mo e ngaahi fakataha ki he ngāue fakamalangá. ʻOkú ne teuteu ha ngaahi malanga  pea fokotuʻutuʻu ʻa e ngaahi ʻasemipilī fakasēketí mo e ngaahi fakataha-lahí. ʻOkú ne faiako ʻi he ngaahi ako tāimuʻá, fai ha fokotuʻutuʻu ki ha fakataha makehe mo e kau tāimuʻa ʻi he sēketí, pea fakahoko ʻa e ngaahi ngāue kehe ʻoku vaheʻi kiate ia ʻe he ʻōfisi vaʻá pea ʻi he taimi ʻe niʻihi ʻoku fiemaʻu fakavavevave ia.

14. Ko e hā ʻa e ngaahi ʻuhinga ʻe niʻihi ʻoku tau houngaʻia ai ʻi heʻetau kau ʻovasia sēketi ngāue mālohí?

¹⁴ ʻOku anga-fēfē maʻu ʻaonga ʻa e ngaahi fakatahaʻangá mei he meʻaʻofa ko e kau ʻovasia sēketí? ʻI he lave fekauʻaki mo e ngaahi ʻaʻahi ʻa e kau ʻovasia fefonongaʻakí, ko ha tokoua ʻi Toake ʻokú ne pehē: “Ko ʻenau ʻaʻahi kotoa pē ʻoku ueʻi ai au ke u fakamoleki ʻa e taimi lahi ange ʻi he tokoni ki hoku fanga tokouá. Kuó u fetaulaki mo e kau ʻovasia sēketi tokolahi; neongo ia, naʻe ʻikai ha taha ʻo kinautolu te ne ʻai ke u ongoʻi naʻá ne fuʻu femoʻuekina pe hā ngali ʻikai ke fotungofua.” Ko Johanna, naʻe lave ki ai ki muʻá, naʻá ne ngāue mo ha ʻovasia sēketi ʻi he ngāue fakafaifekaú, ka naʻe ʻikai ke na maʻu ha taha ʻi ʻapi. “Neongo ia,” ko ʻene leá ia, “ʻE ʻikai ke toe ngalo ʻiate au ʻa e ʻaho ko iá. Ko hoku ongo tokouá naʻá na toki hiki atu pē, pea naʻá ku taʻelata. Naʻe fakalototoʻaʻi loto-māfana au ʻe he ʻovasia sēketí pea tokoniʻi au ke u sio ʻi he ngāue ʻa Sihová ko e nofo vā mamaʻó ʻoku fakataimi pē ka ʻi he māmani foʻoú, te mau maʻu ai ʻa e ngaahi faingamālie taʻefaʻalaua ke feohi fakataha.” Ko e kau ʻovasia sēketi tokolahi kuo ʻofeina kinautolu ʻi he tuʻunga meimei tatau ʻe he faʻahinga ʻoku nau ngāue ki aí.—Ngā. 20:37–21:1.

15. (a) ʻI he fehoanaki mo e 3 Sione 5-8, ʻe lava fēfē ke tau fakahāhā ʻa e houngaʻia ki he kau ʻovasia sēketí? (Sio foki ki he fakatātaá.) (e) Ko e hā ʻoku totonu ai ke tau fakahāhā ʻa e fakaʻatuʻi ki he ngaahi uaifi ʻo e kau tangata kuo fakanofó, pea ʻe anga-fēfē haʻatau fai pehē? (Sio ki he puha “ Manatuʻi Honau Ngaahi Uaifí.”)

¹⁵ Naʻe fakalototoʻaʻi ʻe he ʻapositolo ko Sioné ʻa Keio ke ne fakahāhā ʻa e anga-talitali kakai ki he fanga tokoua ʻaʻahí pea “tuku [atu] kinautolu ʻi heʻenau fonongá ʻi ha founga ʻoku fakahōifua ki he ʻOtuá.” (Lau ʻa e 3 Sione 5-8.) Ko e founga  ʻe taha ke tau fai ai iá ko hono fakaafeʻi ʻa e ʻovasia sēketí ki ha houa kai. Ko e founga ʻe taha ko hono poupouʻi ʻa e fokotuʻutuʻu ki he ngāue fakamalangá lolotonga ʻene ʻaʻahí. Ko Leslie, naʻe lave ki ai ki muʻá, ʻokú ne fakahāhā foki ʻene houngaʻiá ʻi ha ngaahi founga kehe. “ʻOku ou lotu ke hanga ʻe Sihova ʻo tokangaʻi ʻenau ngaahi fiemaʻú,” ko ʻene leá ia. “Ko au mo hoku husepānití kuó ma toe fai ha ngaahi tohi kiate kinautolu, ʻo tala ange ʻa e tokoni lahi ʻenau ngaahi ʻaʻahí kiate kimauá.” Manatuʻi, ko e kau ʻovasia sēketí ʻoku ʻikai ke nau maʻu ha mālohi anga-kehe. Ko e taimi ʻe niʻihi, ʻoku nau puke, loto-moʻua pea naʻa mo e loto-siʻi. Mahalo ko hoʻo ngaahi lea anga-leleí pe ko ha kiʻi meʻaʻofa ʻe hoko ia ko e tali ki he lotu hoʻo ʻovasia sēketí ki ha tokoní!—Pal. 12:25.

ʻOKU TAU FIEMAʻU ʻA E “NGAAHI MEʻAʻOFA KO E KAU TANGATA”

16. ʻI he fehoanaki mo e Palōveepi 3:​27, ko e hā ʻa e ngaahi fehuʻi ʻe ʻeke hifo nai ʻe he fanga tokouá kiate kinautolu?

¹⁶ ʻI māmani lahi, ʻoku tau fiemaʻu ha fanga tokoua tokolahi ange ke ngāue ko e “ngaahi meʻaʻofa ko e kau tangata.” Kapau ko ha tokoua ʻosi papitaiso koe, “ʻoku ʻi ho mafaí ke fai ha tokoni”? (Lau ʻa e Palōveepi 3:27.) ʻOkú ke loto-lelei ke ke feinga ke taau ke hoko ko ha sevāniti fakafaifekau? ʻE lava ke ke kakapa atu ke tokangaʻi ʻa e ngaahi fiemaʻu ho fanga tokouá ʻi he tuʻunga ko ha mātuʻa? c ʻOku lava ke ke feʻunuʻaki ho ngaahi tuʻungá ke tohi kole ki he Ako Maʻá e Kau ʻEvangeliō ʻo e Puleʻangá? Ko e ako ko iá ʻe teuʻi ai koe ke toe ngāueʻaki kakato ange ʻe Sīsū. Kapau ʻokú ke ongoʻi ʻoku ʻikai te ke taau, lotu kia Sihova. Kole kiate ia ki he tokoni ʻa hono laumālie māʻoniʻoní ke ke fakahoko lavameʻa ha vāhenga-ngāue pē ʻoku ʻoatu kiate koe.—Luke 11:13; Ngā. 20:28.

17. Ko e hā ʻoku fakamoʻoniʻi ʻe he ‘ngaahi meʻaʻofa ko e kau tangatá’ fekauʻaki mo hotau Tuʻí, ʻa Kalaisi Sīsū?

¹⁷ Ko e fanga tokoua ʻa ia kuo fakanofo ʻe Sīsū ko e ‘ngaahi meʻaʻofa ko e kau tangatá’ ʻoku nau hoko ko ha fakamoʻoni kuó ne tataki kitautolu lolotonga ʻa e ngaahi ʻaho fakaʻosi ko ení. (Māt. 28:20) ʻIkai ʻokú ke houngaʻia ʻoku tau maʻu ha Tuʻi ʻoku anga-ʻofa, nima-homo mo tokanga, pea ʻokú ne tokonaki mai ha fanga tokoua taau ke tokangaʻi ʻetau ngaahi fiemaʻú? Peʻi kumi leva ki ha ngaahi faingamālie ke fakahāhā hoʻo houngaʻia ki he kau tangata ngāue mālohi ko ení. Pea ʻoua naʻa ngalo ke fakamālō kia Sihova, ʻa e Matavai tefito ʻo e “meʻaʻofa lelei kotoa pē mo e foaki haohaoa kotoa pē.”—Sēm. 1:17.