1. ʻOku anga-fēfē ongoʻi ʻa Sihova ki heʻene kau sevānití?

 KO E hā ʻoku sio ki ai ʻa Sihova ʻi heʻene vakai hifo ki heʻene kau sevāniti ʻi he māmaní? ʻOkú ne ʻafioʻi ʻetau fiefiá mo ʻetau mamahí. (Saame 37:18) ʻI heʻene sio ʻoku tau tauhi kiate ia ʻi he lelei taha ʻo ʻetau malavá neongo ʻa e fekuki mo e ngaahi mamahi fakaeongó, he fiefia ē ko ia! Mahulu hake aí, ʻokú ne vēkeveke ke poupouʻi mo fakafiemālieʻi kitautolu.

2. Ko e hā ʻoku fai ʻe Sihova maʻá e faʻahinga ʻoku loto-laveá, pea ʻe lava fēfē ke tau maʻu ʻaonga mei heʻene tokangá?

² ʻOku pehē ʻi he Saame 147:3 ko Sihova ‘ʻokú ne haʻihaʻi ʻa e lavea’ ʻo e faʻahinga ʻoku loto-laveá. ʻOku fakatātaaʻi heni ʻa Sihova ʻokú ne tokangaʻi anga-fakaalaala ʻa e faʻahinga kuo nau lavea fakaeongó. Ko e hā kuo pau ke tau fai ke maʻu ʻaonga mei he tokanga ʻa Sihová? Fakakaukau ki ha fakatātā. Ko ha toketā mataotao ʻe lava ke ne fai ha meʻa lahi ke tokoni ki ha tokotaha lavea ke fakaakeake. Kae kehe, ke maʻu ʻaonga ʻa e tokotaha laveá kuo pau ke ne muimui fakalelei ki he fakahinohino ʻa e toketaá. ʻI he kupu ko ení, te tau sio ki he meʻa ʻoku leaʻaki ʻe Sihova ʻi heʻene Folofolá ki he faʻahinga ʻoku nau faingataʻaʻia fakaeongó pea te tau lāulea ki he founga ke ngāueʻaki ai ʻene faleʻi anga-ʻofá.

ʻOKU FAKAPAPAUʻI MAI ʻE SIHOVA ʻOKU TAU MAHUʻINGA

3. Ko e hā ʻoku ongoʻi ai ʻe he niʻihi ʻoku siʻi honau mahuʻingá?

³ ʻOku tau moʻui ʻi ha māmani ʻoku masiva he ʻofá, pea ko e meʻa fakamamahí, ko e kakai tokolahi kuo ʻai kinautolu ke nau ongoʻi ʻoku siʻi honau mahuʻingá. Ko ha tuofefine ko Helen a ʻokú ne pehē: “Naʻá ku tupu hake ʻi ha fāmili taʻeʻofa. Ko ʻeku tamaí naʻe anga-fakamālohi pea naʻá ne tala mai ʻi he ʻaho kotoa ʻoku mau moʻui taʻeʻaonga.” Hangē ko Helen, mahalo pē kuo ngaohikovia  koe, fakaangaʻi maʻu pē pe ʻai ke ke ongoʻi ʻoku ʻikai ʻofaʻi koe. Kapau ko ia, ʻe faingataʻa nai ke ke tui ʻoku ʻi ai ha taha ʻoku tokanga moʻoni fekauʻaki mo koe.

4. Fakatatau ki he Saame 34:​18, ko e hā ʻa e fakapapauʻiʻanga ʻoku ʻomai ʻe Sihova kiate kitautolú?

⁴ Neongo kapau kuo ngaohikovia koe ʻe he niʻihi kehé, ʻe lava ke ke fakapapauʻi ʻoku ʻofa ʻa Sihova ʻiate koe pea fakamahuʻingaʻi koe. ʻOkú ne “ofi . . . ki he loto-laveá.” (Lau ʻa e Saame 34:18.) Kapau ʻokú ke ‘laumālie mafesi,’ manatuʻi naʻe sio ʻa Sihova ki he ngaahi meʻa lelei ʻi ho lotó pea naʻá ne tohoakiʻi fakafoʻituitui koe kiate ia. (Sione 6:44) ʻOkú ne mateuteu maʻu pē ke tokoniʻi koe koeʻuhí ʻokú ke mahuʻinga kiate ia.

5. Ko e hā ʻe lava ke tau ako mei he anga ʻo e fakafeangai ʻa Sīsū ki he faʻahinga naʻe siolalo ki ai ʻa e niʻihi kehé?

⁵ ʻE lava ke tau ako fekauʻaki mo e ngaahi ongoʻi ʻa Sihová ʻaki ʻa e fakakaukau ki he faʻifaʻitakiʻanga ʻa Sīsuú. Lolotonga ʻa e ngāue fakafaifekau ʻa Sīsū ʻi he māmaní, naʻá ne fakatokangaʻi ʻa e faʻahinga naʻe siolalo ki ai ʻa e niʻihi kehé, pea naʻá ne fakafeangai manavaʻofa kiate kinautolu. (Māt. 9:​9-12) ʻI he ala ha fefine naʻe tofanga ʻi ha mahaki fakamamahi ki he kofu tuʻa ʻo Sīsuú, ʻo fakaʻamu ke fakamoʻui iá, naʻá ne fakafiemālieʻi ʻa e fefiné pea fakaongoongoleleiʻi ia ki heʻene tuí. (Mk. 5:​25-34) ʻOku tapua haohaoa mai ʻe Sīsū ʻa e ʻulungaanga ʻene Tamaí. (Sione 14:9) Ko ia ʻe lava ke ke fakapapauʻi ʻoku fakamahuʻingaʻi koe ʻe Sihova pea ʻokú ne fakatokangaʻi ho ngaahi ʻulungaanga leleí, kau ai ʻa hoʻo tuí pea mo hoʻo ʻofa kiate iá.

6. ʻE lava fēfē ke fekuki ha tokotaha mo e ngaahi ongoʻi ʻoku ʻikai hano mahuʻingá?

⁶ Ko e hā ʻe lava ke ke faí kapau ʻoku hokohoko atu pe toe malanga hake hoʻo ongoʻi ʻoku ʻikai hao mahuʻingá? Lau ʻa e ngaahi veesi Tohi Tapu ʻoku fakapapauʻi atu ai kiate koe ho mahuʻinga kia Sihová pea fakalaulauloto ki ai. b (Saame  94:19) Kapau kuo ʻikai ke ke aʻusia ha taumuʻa pe ʻokú ke loto-siʻi koeʻuhí ʻoku ʻikai lava ke ke fai ʻa e meʻa lahi ʻo hangē ko e niʻihi kehé, ʻoua te ke fakamāuʻi fefeka koé. ʻOku fakaʻatuʻi ʻa Sihova ʻi he ngaahi meʻa ʻokú ne ʻamanekina meiate koé. (Saame 103:​13, 14) Kapau naʻe pāʻusiʻi koe ʻi he kuohilí, ʻoua te ke tukuakiʻi koe ki he meʻa naʻe fai atu ʻe he tokotahá. Naʻe ʻikai ke ke tuha mo ha fakafeangai pehē! Manatuʻi ko e kau faihalá ia te nau fai ʻa e fakamatala kia Sihová, ʻo ʻikai ko e kau maʻukoviá. (1 Pita 3:12) Ko Sandra, naʻe ngaohikovia ʻi heʻene kei siʻí, ʻokú ne pehē, “ʻOku ou kole maʻu pē kia Sihova ke ne tokoniʻi au ke u vakai kiate au ʻi ha founga mafamafatatau, ʻi he founga ʻokú ne vakai mai ai kiate aú.”

7. ʻE lava fēfē ke tau ngāueleleiʻaki ʻetau ngaahi hokosia ʻi he kuohilí ʻi he ngāue ʻa Sihová?

⁷ ʻOua ʻaupito ʻe veiveiua ʻe lava ke ngāueʻaki koe ʻe Sihova ke tokoniʻi ʻa e niʻihi kehé. Kuó ne ʻoatu kiate koe ʻa e lāngilangi ʻo e hoko ko hono kaungāngāue ʻi he ngāue fakafaifekau faka-Kalisitiané. (1 Kol. 3:9) Ko hoʻo ngaahi hokosia ʻi he moʻuí ʻoku ngalingali kuó ne ʻai koe ke ke kaungāongoʻi ki he niʻihi kehé pea ʻoatu mo e vavanga ki he anga nai ʻo ʻenau ongoʻí. ʻE lava ke ke fai ʻa e meʻa lahi ke tokoniʻi kinautolu. Ko Helen, naʻe lave ki ai ki muʻá, naʻá ne maʻu ʻa e tokoni pea ʻokú ne malava lelei ange he taimí ni ke tokoniʻi ʻa e niʻihi kehé. ʻOkú ne pehē: “Kuo hanga ʻe Sihova ʻo liliu ʻa e ‘meʻa noa’ ko aú ki ha tokotaha ʻokú ne ongoʻi ʻoku ʻofaʻi mo ʻi ai hono ʻaonga.” ʻOku fiefia ʻa Helen ke ngāue ko ha tāimuʻa tuʻumaʻu.

ʻOKU LOTO ʻA SIHOVA KE TAU TALI ʻENE FAKAMOLEMOLÉ

8. Ko e hā ʻa e fakapapauʻiʻanga ʻoku tau maʻu ʻi he ʻAisea 1:18?

⁸ Ko e niʻihi ʻo e kau sevāniti ʻa Sihová ʻoku fakahohaʻasi lahi ʻe he fakaʻiseʻisa ʻi heʻenau ngaahi tōʻonga ʻi he kuohilí, ʻi he ki muʻa pe naʻa mo e hili ʻenau papitaisó. Ka ʻoku lelei ke tau manatuʻi naʻe tokonaki mai ʻe Sihova ʻa e huhuʻí koeʻuhí ko ʻene ʻofa loloto ʻiate kitautolú. Ko e moʻoni, ʻokú ne loto ke tau tali ʻene meʻaʻofá. ʻOku fakapapauʻi mai ʻe Sihova ʻi he hili ʻetau “fakamahino ʻa e ngaahi meʻá” c mo iá, ʻoku ʻikai ke ne toe fakalau ʻetau ngaahi angahalá. (Lau ʻa e ʻAisea 1:18.) He anga-ʻofa ē ko Sihova ʻi he ʻikai ke ne toe manatua ʻetau ngaahi angahala ʻi he kuohilí! ʻI he taimi tatau, ʻoku ʻikai ʻaupito ke ne fakangaloʻi ʻa e lelei kuo tau faí.—Saame 103:​9, 12; Hep. 6:10.

9. Ko e hā ʻoku totonu ai ke tau fai hotau lelei tahá ke tokangataha ki he tuʻunga lolotongá mo e kahaʻú kae ʻikai ki he kuohilí?

⁹ Kapau ʻoku fakahohaʻasi lahi koe ʻe he ngaahi fakaʻiseʻisa fekauʻaki mo e kuohilí, fai ho lelei tahá ke tokangataha ki he tuʻunga lolotongá mo e kahaʻú kae ʻikai ki he kuohilí. Fakakaukau ki he faʻifaʻitakiʻanga ʻa Paulá. Naʻá ne fakaʻiseʻisa ʻi heʻene fakatangaʻi anga-kakaha ki muʻa ʻa e kau Kalisitiané, ka naʻá ne ʻiloʻi kuo fakamolemoleʻi ia ʻe Sihova. (1 Tīm. 1:​12-15) Naʻá ne nōfoʻi ʻi he fakakaukau ki heʻene ngaahi angahala ʻi he kuohilí? ʻOku ʻikai ha veiveiua naʻá ne fakafisi ke fai pehē, ʻo hangē pē ko e ʻikai ke ne nōfoʻi ʻi he fakakaukau ki heʻene ngaahi lavameʻa ki muʻa ʻi he poupou ki he lotu faka-Siú. (Fil. 3:​4-8, 13-15) ʻI hono kehé, naʻe tokanga faivelenga ʻa Paula ki heʻene ngāue fakafaifekaú pea hanga atu ki he kahaʻú. Hangē ko Paulá, heʻikai lava ke ke liliu ʻa e kuohilí. Ka ʻe lava ke ke fakalāngilangiʻi ʻa Sihova ʻi ho tuʻunga lolotongá pea hanga atu ki he kahaʻu fakaofo kuó ne talaʻofa kiate koé.

10. Ko e hā ʻe lava ke tau faí kapau kuo fakalotomamahiʻi ʻe heʻetau ngaahi tōʻonga ʻi he kuohilí ʻa e niʻihi kehé?

¹⁰ ʻE fakahohaʻasi nai koe ʻe hoʻo ngaahi tōʻonga ʻe niʻihi ʻi he kuohilí ʻa ia naʻá ne fakalotomamahiʻi  ʻa e niʻihi kehé. Ko e hā ʻe lava ke tokoní? Fai ʻa e meʻa te ke malavá ke fakaleleiʻi ʻa e maumaú, kau ai hono fai ha kole fakamolemole loto-moʻoni. (2 Kol. 7:11) Kole kia Sihova ke ne tokoniʻi ʻa e faʻahinga naʻe uesia ʻe hoʻo ngaahi tōʻongá. ʻE lava ke ne tokoniʻi koe mo e faʻahinga kuó ke fakalotomamahiʻí ke kātaki pea toe maʻu ʻa e melinó.

11. Ko e hā ʻe lava ke tau ako mei he faʻifaʻitakiʻanga ʻa e palōfita ko Sioná? (Sio foki ki he fakatātā.)

¹¹ Ako mei he ngaahi fehālaaki ʻi he kuohilí, pea loto-lelei ke fakaʻatā ʻa Sihova ke ngāueʻaki koe ʻi ha founga pē ʻokú ne loto ki ai. Fakatokangaʻi ʻa e faʻifaʻitakiʻanga ʻa e palōfita ko Sioná. ʻI he ʻikai fononga ki Ninive ʻo hangē ko e fekau ʻa e ʻOtuá, naʻe hola ʻa Siona ia ki ha feituʻu kehe. Naʻe akonakiʻi ʻe Sihova ʻa Siona, pea naʻá ne ako mei heʻene fehālaakí. (Siona 1:​1-4, 15-17; 2:​7-10) Naʻe ʻikai ke foʻi ʻa Sihova ʻia Siona. Naʻe ʻoange ʻe he ʻOtuá kiate ia ha toe faingamālie ke ʻalu ki Ninive, pea naʻe talangofua leva ʻa Siona. Naʻe ʻikai ke ne fakaʻatā ʻa e fakaʻiseʻisa ʻi heʻene fehālaaki ʻi he kuohilí ke taʻofi ia mei hono tali ʻa e vāhenga-ngāue ko eni meia Sihová.—Siona 3:​1-3.

FAKAFIEMĀLIEʻI KITAUTOLU ʻE SIHOVA FAKAFOU ʻI HE LAUMĀLIE MĀʻONIʻONÍ

12. ʻOku anga-fēfē hono ʻomai kiate kitautolu ʻe Sihova ʻa e nongá ʻi heʻetau hokosia ha mamahi pe ko ha mole? (Filipai 4:​6, 7)

¹² Fakafou ʻi hono laumālie māʻoniʻoní, ʻoku fakafiemālieʻi kitautolu ʻe Sihova ʻi heʻetau tofanga ʻi ha mamahi pe ko ha mole. Fakakaukau ki he hokosia ʻa Ron mo Carol. Ko e meʻa fakamamahí, naʻe toʻo ʻe hona fohá ʻene moʻuí. ʻOkú na pehē: “Naʻá ma foua ʻa e ngaahi ʻahiʻahi faingataʻa ki muʻa, ka ko e kovi tahá eni. Naʻá ma lotu lolotonga ʻa e ngaahi pō ʻo e taʻemamohe, pea naʻá ma ongoʻi moʻoni ʻa e nonga ʻoku fakamatalaʻi ʻi he Filipai 4:​6, 7.” (Lau.) Kapau ʻokú ke fekuki mo ha ʻahiʻahi fakatupu loto-lavea, ʻe lava ke ke huaʻi atu ho lotó kia Sihova ʻi he lotu ʻi he tuʻo lahi pea ʻi he lōloa ʻokú ke loto ki aí. (Saame 86:3; 88:1) Toutou kole kia Sihova ke ne foaki mai hono laumālie māʻoniʻoní. Heʻikai ʻaupito ke ne tukunoaʻi hoʻo ngaahi kolé.—Luke 11:​9-13.

13. ʻE lava fēfē ke tokoniʻi kitautolu ʻe he laumālie māʻoniʻoní ke hokohoko atu ʻetau lotu faitōnunga kia Sihová? (ʻEfesō 3:16)

¹³ Kuo ʻai koe ʻe ha hokosia fakamamahi ke ke ongoʻi vaivai? Ko e laumālie māʻoniʻoní ʻe lava ke ne fakaivia koe ke hokohoko atu hoʻo lotu faitōnunga kia Sihová. (Lau ʻa e ʻEfesō 3:16.) Fakakaukau ki he hokosia ha tuofefine ko Flora. Ko ia mo hono husepānití naʻá na ngāue ko ha ongo misinale ʻi he taimi naʻe taʻefaitōnunga ai hono husepānití kiate ia, pea naʻá na vete. ʻOkú ne pehē: “Ko e mamahi naʻá ku ongoʻi koeʻuhi ko ʻene lavakí naʻá ne keina au. Naʻá ku lotu ʻo kole ʻa e laumālie māʻoniʻoni ʻo Sihová ke tokoniʻi au ke u kītaki. Naʻe ʻomai ʻe Sihova ʻa e meʻa naʻá ku fiemaʻú ke fakaakeake pea ke fekuki mo ha meʻa naʻe hā ngali taʻealaikuʻi ʻi he kamatá.” ʻOku ongoʻi ʻe Flora naʻe tokoniʻi ia ʻe he ʻOtuá ke tupulaki ʻene tuipaú pea te ne poupouʻi ia ʻi he kotoa hono ngaahi ʻahiʻahí. ʻOkú ne toe pehē: “Ko e ngaahi lea ʻi he Saame 119:32 naʻe kaunga kiate au: ‘Te u tuli vēkeveke ki he ʻalunga ʻo hoʻo ngaahi fekaú koeʻuhí ʻokú ke fakaʻatā ia ke ʻi hoku lotó.’”

14. ʻE lava fēfē ke tau fakaʻatā ʻa e laumālie ʻo e ʻOtuá ke ngāue ʻiate kitautolu?

¹⁴ ʻE lava fēfē ke ke ngāue ʻo fehoanaki mo hoʻo kole ʻa e laumālie māʻoniʻoní? Kau ʻi he ngaahi ngāue ʻe fakaʻatā ai ʻa e laumālie ʻo e ʻOtuá ke ngāue ʻiate koe. ʻOku kau ki heni hono maʻu ʻa e ngaahi fakatahá mo faifakamoʻoni ki he niʻihi kehé. Fakafonu ho ʻatamaí ʻaki ʻa e ngaahi fakakaukau ʻa Sihová fakafou ʻi hono lau ʻene Folofolá ʻi he ʻaho kotoa pē. (Fil. 4:​8, 9) ʻI hoʻo lau iá, fakatokangaʻi ʻa e faʻahinga ʻi he Tohi Tapú naʻa nau hokosia ʻa e ngaahi ʻahiʻahí pea fakalaulauloto ki he anga hono tokoniʻi kinautolu ʻe Sihova ke kātakí. Ko Sandra, naʻe  lave ki ai ki muʻá, naʻá ne tofanga ʻi ha ngaahi faingataʻa mafatukituki mo hokohoko. ʻOkú ne pehē: “Ko e talanoa kia Siosifá ʻoku maongo moʻoni kiate au. Naʻe ʻikai te ne tuku ʻa e ngaahi ʻahiʻahi mo e fakamaau taʻetotonu naʻá ne tofanga aí ke ne fakavaivaiʻi hono vahaʻangatae mo Sihová.”—Sēn. 39:​21-23.

FAKAFIEMĀLIEʻI KITAUTOLU ʻE SIHOVA FAKAFOU ʻI HE KAUNGĀTUÍ

15. Ko hai ʻe lava ke tau maʻu mei ai ʻa e fakafiemālié, pea ʻe lava fēfē ke nau tokoniʻi kitautolu? (Sio foki ki he fakatātaá.)

¹⁵ ʻI heʻetau faingataʻaʻiá, ko hotau kaungātuí ʻe lava ke nau hoko “ko ha matavai ʻo e fakafiemālie lahi.” (Kol. 4:11) Ko hotau fanga tokouá ko e moʻoni ko ha fakahāhā tonu ia ʻo e ʻofa ʻa Sihova ʻiate kitautolú. Ko e kaungātuí ʻe lava ke nau fakafiemālieʻi kitautolu ʻaki ʻenau fanongo mo e kaungāongoʻí, pe te nau poupouʻi nai kitautolu ʻaki ʻenau ʻi hotau tafaʻakí. Te nau vahevahe mai nai ha veesi Tohi Tapu fakatupu tuipau pe lotu fakataha mo kitautolu. d (Loma 15:4) ʻI he taimi ʻe niʻihi, ko ha tokoua pe tuofefine te ne fakamanatu mai nai ʻa e anga ʻo e fakakaukau ʻa Sihová pea ʻoku tokoniʻi ai kitautolu ke tauhi maʻu ʻetau mafamafatataú. ʻOku lava ke toe ʻomai ʻe he kaungā-Kalisitiané ʻa e poupou ʻaonga, hangē ko hono ʻomai ha meʻakai ʻi he taimi ʻoku tau faingataʻaʻia aí.

16. Ko e hā ʻe fiemaʻu nai ke tau fai ke maʻu ʻa e poupou mei he niʻihi kehé?

¹⁶ Ke maʻu ʻa e poupou mei he niʻihi kehé, ʻe fiemaʻu nai ke tau kole ia. Ko hotau fanga tokouá  mo e fanga tuofāfiné ʻoku nau ʻofa ʻiate kitautolu pea loto ke tokoni. (Pal. 17:17) Ka heʻikai nai ke nau ʻiloʻi ʻa e anga ʻetau ongoʻí pe ko e meʻa ʻoku tau fiemaʻú. (Pal. 14:10) Kapau ʻokú ke mamahi fakaeongo, loto-lelei ke vahevahe hoʻo ongoʻí ki ha ngaahi kaungāmeʻa matuʻotuʻa. ʻAi ke nau ʻiloʻi ʻa e meʻa te ne tokoniʻi koé. Te ke vahevahe nai hoʻo ongoʻí ki ha mātuʻa ʻe toko taha pe toko ua ʻa ia ʻokú ke fiemālie ʻi he talanoa ki aí. Ko e niʻihi ʻo e fanga tuofāfiné ʻoku nau maʻu ʻa e fakafiemālie ʻi he talanoa ki ha tuofefine matuʻotuʻa.

17. Ko e hā ʻa e ngaahi pole ʻe niʻihi ʻe lava ke ne taʻofi kitautolu mei hono maʻu ʻa e fakalototoʻá, pea ʻe lava fēfē ke tau ikuʻi iá?

¹⁷ Talitekeʻi ʻa e hehema ke fakamavaheʻi koé. Koeʻuhi ko e ngaahi mamahi fakaeongó, te ke ongoʻi nai ʻoku ʻikai ke ke fie feohi mo e niʻihi kehé. ʻI he taimi ʻe niʻihi, ko ho fanga tokouá te nau maʻuhala nai fekauʻaki mo koe pe leaʻaki nai ha ngaahi lea fakalotomamahi. (Sēm. 3:2) ʻOua ʻe fakaʻatā ʻa e ngaahi pole peheé ke ne taʻofi koe mei hono maʻu ʻa e fakalototoʻa ʻokú ke fiemaʻú. Ko ha mātuʻa ko Gavin, ʻoku fekuki mo e loto-mafasiá, ʻokú ne pehē: “Ko e fetuʻutaki mo hoku ngaahi kaungāmeʻá ʻoku faʻa hoko ia ko e meʻa fakamuimui taha ʻoku ou fie faí.” Neongo ia, ʻoku ʻikai ke ʻulutukua ʻa Gavin ki heʻene ngaahi ongoʻí, pea ʻokú ne maʻu ʻaonga ʻi he feohi mo e niʻihi kehé. Ko ha tuofefine ko Amy ʻokú ne pehē: “Koeʻuhi ko ʻeku ngaahi hokosia ʻi he kuohilí, ʻoku faingataʻa ke u falala ki he kakaí. Ka ʻoku ou ako ke ʻofa mo falala ki hoku fanga tokouá ʻo hangē ko Sihová. ʻOku ou ʻiloʻi ʻoku fiefia heni ʻa Sihova, pea ʻoku ou fiefia foki mo au.”

MAʻU ʻA E FAKAFIEMĀLIE ʻI HE NGAAHI TALAʻOFA FAIFAKAMOʻUI ʻA SIHOVÁ

18. Ko e hā ʻe lava ke tau fakatuʻotuʻa atu ki ai ʻi he kahaʻú, pea ko e hā ʻe lava ke tau fai he taimi ní?

¹⁸ ʻE lava ke tau hanga atu ki he kahaʻú ʻi he tuipau, ʻo ʻiloʻi ʻe vavé ni ke fakamoʻui ʻe Sihova ʻa e lavea fakaeongó kotoa pea toʻo fakaʻaufuli atu ʻa e mamahi fakaesinó. (Fkh. 21:​3, 4) ʻI he taimi ko iá, ko e ngaahi meʻa fakamamahi kuo tau hokosiá ʻe ʻikai ke toe “ʻalu hake ia ʻi he lotó.” (ʻAi. 65:17) Hangē ko ia kuo tau sio ki aí, ko Sihova ʻokú ne “haʻihaʻi ʻa [hotau] laveá” naʻa mo e taimí ni. Ngāuekakatoʻaki ʻa e ngaahi tokonaki anga-ʻofa ʻa Sihova ke ʻoatu kiate koe ʻa e fakafiemālié mo e fakanongá. ʻOua ʻaupito naʻá ke veiveiua ʻi ha foʻi mōmeniti ko Sihová “ʻokú ne tokanga mai kiate [koe].”—1 Pita 5:7.