‘I HE pongipongi Pulelulu, Sanuali 24, 2018, na‘e fiefia ai ‘a e fāmili Pēteli ‘i ‘Amelika mo Kānatá ke fanongo ki ha fanongonongo makehe: Ko Tokoua Kenneth Cook, Jr., kuó ne kau ‘i he Kulupu Pule ‘o e Kau Fakamo‘oni ‘a Sihová.

Ko Tokoua Cook na‘e fanau‘i pea ‘ohake ia ‘i Pennsylvania, ‘Amelika. Na‘á ne ako ‘a e mo‘oní mei ha kaungāako ki mu‘a pē ‘i he‘ene ma‘u tohi fakamo‘oni ako mei he kolisí pea na‘á ne papitaiso ‘i Sune 7, 1980. Na‘á ne kamata ngāue taimi-kakato ko ha tāimu‘a tu‘uma‘u ‘i Sepitema 1, 1982. Hili ha tāimu‘a ‘i he ta‘u ‘e ua, na‘e fakaafe‘i ia ki Pēteli, ‘o kamata ‘ene ngāue Pētelí ‘i Wallkill, Niu ‘Ioke, ‘i ‘Okatopa 12, 1984.

‘I he ta‘u ‘e 25 hono hokó, na‘e ngāue ‘a Tokoua Cook ‘i he ngaahi vāhenga-ngāue kehekehe ‘i he Fale Pulusí mo e ‘Ōfisi Pētelí. Na‘á ne mali mo hono uaifí, ‘a Jamie, ‘i he 1996, peá ne kau fakataha mo ia ‘i he ngāue Pētelí ‘i Wallkill. ‘I Tīsema 2009, na‘e vahe‘i ‘a Tokoua mo Tuofefine Cook ki he Senitā Fakaeako Taua Le‘o ‘i Patterson, Niu ‘Ioke, ‘a ia na‘e vahe‘i ai ‘a Tokoua Cook ke ngāue ‘i he Potungāue Fetu‘utaki Faitohí. ‘I ‘Epeleli 2016, hili ha foki taimi nounou ki Wallkill, na‘e vahe‘i ‘a Tokoua mo Tuofefine Cook ki Brooklyn, Niu ‘Ioke. ‘I he hili ha māhina ‘e nima mei ai, na‘á na hiki ki he ‘ulu‘i ‘apitanga ‘i māmaní ‘i Warwick, Niu ‘Ioke. ‘I Sanuali 2017, na‘e fakanofo ai ‘a Tokoua Cook ke ngāue ko ha tokotaha tokoni ki he Kōmiti Hiki-Tohi ‘a e Kulupu Pulé.