1-2. Ko e hā ‘a e founga makehe na‘e hoko ‘i he ‘aho ‘o e Penitekosi 33 T.S.?

KO E pongipongi Sāpate ia ‘i Selusalema. Ko e ta‘u 33 T.S. ia, pea ko e ‘aho ia ‘o e Penitekosí. Ko ha kulupu ‘o e kau ākonga ‘e toko 120 nai ‘oku nau fakatahataha ‘i he loki ‘i ‘olunga ‘i ha fale. (Ngā. 1:13-15; 2:1) ‘I he ngaahi ‘aho si‘i ki mu‘á, na‘e fakahinohino‘i ‘e Sīsū kinautolu ke nau nofo ai pē ‘i Selusalema koe‘uhi na‘e teu ke nau ma‘u ha me‘a‘ofa makehe. (Ngā. 1:4, 5) Ko e hā ‘a e me‘a na‘e hoko atu aí?

² “Fakafokifā [‘oku] ongo mai ha longoa‘a mei he langí, ‘o hangē ko e mumuhu mai ‘a ha fu‘u matangi mālohí,” pea ‘okú ne fakafonu kotoa ‘a e falé. ‘Oku hā leva ‘i he ‘ulu ‘o e kau ākongá “‘a e ngaahi ulo‘i afi na‘e hangē ha ngaahi ‘eleló” pea ‘oku nau “fonu kotoa ‘i he laumālie mā‘oni‘oní.” (Ngā. 2:2-4) ‘I he founga makehe ko ení, ‘oku hua‘i hifo ai ‘e Sihova hono laumālie mā‘oni‘oní ki he kulupu ko iá. (Ngā. 1:8) ‘Oku nau hoko ko e fuofua fa‘ahinga ke pani ‘e he laumālie mā‘oni‘oní * pea ‘oange mo e ‘amanaki ke pule fakataha mo Sīsū ‘i hēvani.

3. Ko e hā na‘e ‘ikai toe veiveiua ai ‘a e fa‘ahinga ‘i he Penitekosí ki hono pani kinautolu ‘e he laumālie mā‘oni‘oní?

³ Kapau na‘á ke kau ‘i he kau ākonga na‘e fakatahataha ‘i he  loki ‘i ‘olungá ‘i he ‘aho ko iá, he‘ikai ‘aupito ngalo ia ‘iate koe. Ko ha me‘a ‘oku hangē ha ‘elelo‘i afí ‘oku ‘alu hifo ki ho ‘ulú, pea ‘oku kamata ke ke lea ‘i he ngaahi lea kehekehe! (Ngā. 2:5-12) He‘ikai ha‘o toe veiveiua ‘i ho‘o fakakaukaú kuo pani koe ‘e he laumālie mā‘oni‘oní. Ka ko e fa‘ahinga kotoa ‘oku pani ‘e he laumālie mā‘oni‘oní ‘oku ‘i ai ha founga makehe ‘oku pani ai kinautolu pea ‘oku pani kinautolu ‘i he taimi tatau ‘o ‘enau mo‘uí? ‘Ikai. ‘Oku anga-fēfē ‘etau ‘ilo‘í?

4. Na‘e ma‘u ‘e he kau pani kotoa ‘i he ‘uluaki senitulí honau uí ‘i he taimi tatau ‘i he‘enau mo‘uí? Fakamatala‘i.

⁴ Tau lāulea angé fekau‘aki mo e taimí. Ko e kulupu ko ia ‘o e kau Kalisitiane ‘e toko 120 nai na‘e ‘ikai ko kinautolu pē na‘e pani ‘e he laumālie mā‘oni‘oní ‘i he Penitekosi, 33 T.S. Ki mui ange ‘i he ‘aho ko iá, ‘oku fakafuofua ki he toko 3,000 kehe na‘a nau toe ma‘u ‘a e tala‘ofa ‘a e laumālie mā‘oni‘oní. Na‘e pani kinautolu ‘i he‘enau papitaisó. (Ngā. 2:37, 38, 41) Ka ‘i he ngaahi ta‘u hoko atu aí, na‘e ‘ikai ke pani ‘a e kau Kalisitiane paní kotoa ‘i he‘enau papitaisó. Na‘e pani ‘a e kau Samēliá ‘i ha taimi hili ‘enau papitaisó. (Ngā. 8:14-17) Pea ko hono pani ‘o Koliniusi mo hono falé na‘e mātu‘aki kehe. Na‘e pani kinautolu ki mu‘a ‘i he‘enau papitaisó.—Ngā. 10:44-48.

5. Fakatatau ki he 2 Kolinitō 1:21, 22, ko e hā ‘oku hoko ‘i hono pani ‘e he laumālie mā‘oni‘oní ha tokotaha?

⁵ Tau toe lāulea angé ki he me‘a ‘oku hoko ‘i he pani ‘e he laumālie mā‘oni‘oní ha tokotaha. Ko e ni‘ihi ‘oku paní ‘oku faingata‘a nai ‘i he kamatá ke nau tali kuo fili kinautolu ‘e Sihova. ‘Oku nau fifili nai, ‘Ko e hā na‘e fili ai au ‘e he ‘Otuá?’ He‘ikai nai ke ongo‘i pehē ‘a e ni‘ihi. Pe ko e hā pē ‘a e tu‘ungá, ‘oku fakamatala ‘a e ‘apositolo ko Paulá ki he me‘a ‘oku hoko ki he fa‘ahinga kotoa ‘oku paní: “‘I he hili ho‘omou tuí, na‘e sila‘i * kimoutolu fakafou ‘iate ia ‘aki ‘a e laumālie mā‘oni‘oni ne tala‘ofa‘akí, ‘a ia ko ha tomu‘a fakapapau‘i‘anga ‘o hotau tofi‘á.” (‘Ef. 1:13, 14; fkm. ‘i lalo) Ko ia ‘oku ngāue‘aki ‘e Sihova hono laumālie mā‘oni‘oní ke ‘ai ke papau mo‘oni ki he kau Kalisitiane ko ení kuó ne fili kinautolu. ‘I he foungá ni, ko e laumālie mā‘oni‘oní ko ha “fakapapau‘i‘anga [me‘a malu‘i pe tala‘ofa]” ‘oku ‘oatu ke fakapapau‘i kiate kinautolu ‘i he kaha‘ú te nau mo‘ui ta‘engata ‘i hēvani kae ‘ikai ‘i he māmaní.—Lau ‘a e 2 Kolinitō 1:21, 22.

6. Ko e hā kuo pau ke fai ‘e ha Kalisitiane pani ke ma‘u ai hono pale fakahēvani?

 ⁶ Kapau ‘oku pani ha Kalisitiane, te ne ma‘u ‘i he taimi pē ko iá hono pale fakahēvaní? ‘Ikai. ‘Okú ne fakapapau‘i kuo fili ia ke ‘alu ki hēvani. Kae kehe, kuo pau ke ne manatu‘i ‘a e ekinaki ko ení: “Fanga tokoua, ‘ai ke toe ‘āsili ange ho‘omou tōtōivi ‘i hono ‘ai ke papau homou uí mo homou filí, he kapau ‘oku mou hanganaki fai ‘a e ngaahi me‘á ni ‘e ‘ikai ‘aupito faifai ange pea mou hinga.” (2 Pita 1:10) Ko ia neongo kuo fili pe ui ha Kalisitiane pani ke ‘alu ki hēvani, te ne ma‘u hono palé ‘o kapau pē te ne nofo‘aki faitōnunga.—Fil. 3:12-14; Hep. 3:1; Fkh. 2:10.

7. ‘Oku anga-fēfē hono ‘ilo‘i ‘e he kau paní kuo nau ma‘u ‘a e ui fakahēvaní?

⁷ Ka ‘oku anga-fēfē hono ‘ilo‘i ‘e ha taha kuó ne ma‘u ha ui fakahēvani? Ko e talí ‘oku hā mahino ia ‘i he lea ‘a Paula ki he fa‘ahinga ‘i Lomá ‘a ia na‘e “ui ke hoko ko e kakai tapú.” Na‘á ne tala ange: “Na‘e ‘ikai te mou ma‘u ha laumālie ‘o e pōpula ‘o fakatupunga ai ha toe manavahē, ka na‘a mou ma‘u ha laumālie ‘o e ohi ko e ngaahi foha, ‘a ia ko e laumālie ia ‘oku tau kalanga ai ‘o pehē: ‘‘Apā, Tamai!’ Ko e laumālié tonu ‘oku kaungā-fakamo‘oni ia mo hotau laumālié ko e fānau kitautolu ‘a e ‘Otuá.” (Loma 1:7; 8:15, 16) Ko ia fakafou ‘i hono laumālie mā‘oni‘oní, ‘oku ‘ai ‘e he ‘Otuá ke hā mahino ki he kau paní kuo nau ma‘u ‘a e ui fakahēvani ko ení.—1 Tes. 2:12.

8. ‘Oku anga-fēfē hono fakahaa‘i ‘i he 1 Sione 2:20, 27 ko e kau Kalisitiane paní ‘oku ‘ikai ke nau fiema‘u ke fakapapau‘i ange ‘e he ni‘ihi kehé honau paní?

⁸ ‘Oku ‘ikai ke tuku ‘e Sihova ke toe ‘i ai ha veiveiua ‘i he ‘atamai mo e loto ‘o e fa‘ahinga ‘oku nau ma‘u ‘ene fakaafe ke ‘alu ki hēvaní. (Lau ‘a e 1 Sione 2:20, 27.) Ko e mo‘oni, ko e kau Kalisitiane paní ‘oku fiema‘u ke ako‘i ‘e Sihova fakafou ‘i he fakataha‘angá ‘o hangē pē ko e tokotaha kotoa. Ka ‘oku ‘ikai ke nau fiema‘u ke fakapapau‘i ange ‘e ha taha ‘oku pani kinautolu. Kuo ngāue‘aki ‘e Sihova ‘a e ivi mālohi taha ‘i he ‘univēsí, ‘a hono laumālie mā‘oni‘oní, ke fakahaa‘i papau kiate kinautolu ‘oku pani kinautolu!

9. ‘I he pani ha tokotaha, ko e hā ‘a e liliu ‘oku hokosia ‘e he tokotaha ko iá, hangē ko ia ‘oku fakamatala‘i ‘i he ‘Efesō 1:18?

⁹ Ko e tokolahi taha ‘o e kau sevāniti ‘a e ‘Otuá ‘i he ‘aho ní ‘oku faingata‘a nai ke nau mahino‘i ‘a e me‘a ‘oku hoko ki ha tokotaha ‘i he taimi ‘oku pani ai ia ‘e he ‘Otuá. ‘Oku anga-maheni pē eni koe‘uhí kuo te‘eki pani kinautolu. Na‘e fakatupu ‘e he ‘Otuá ‘a e fa‘ahinga ‘o e tangatá ke mo‘ui ta‘engata ‘i he māmaní, ‘o ‘ikai ‘i hēvani. (Sēn. 1:28; Saame 37:29) Ka kuo fili ‘e Sihova ‘a e ni‘ihi ke mo‘ui ‘i hēvani. Ko ia ‘i he taimi ‘okú ne pani ai kinautolú, ‘okú ne liliu he taimi pē ko iá ‘enau ‘amanakí mo e anga ‘enau fakakaukaú, ‘o nau fakatu‘otu‘a atu ai ke mo‘ui ‘i hēvani.—Lau ‘a e ‘Efesō 1:18.

10. ‘Oku ‘uhinga ki he hā ‘a e “fanau‘i fo‘ou”? (Sio foki ki he fakamatala ‘i lalo.)

¹⁰ ‘I he taimi ‘oku pani ai ‘a e kau Kalisitiané ‘e he laumālie mā‘oni‘oní, ‘oku “fanau‘i fo‘ou” ai kinautolu pe “fanau‘i mei ‘olunga.” * Na‘e toe fakahaa‘i ‘e Sīsū ‘oku faingata‘a ia ke fakamatala‘i totonu ki ha tokotaha kuo te‘eki ke pani ‘a e anga ‘o e ongo‘i fekau‘aki mo e hoko ‘o “fanau‘i fo‘ou,” pe “fanau‘i mei he laumālié.”—Sione 3:3-8; fkm. ‘i lalo.

11. Fakamatala‘i ‘a e liliu ‘i he fakakaukaú ‘oku hoko ‘i he taimi ‘oku pani ai ha tokotaha.

¹¹ Ko e hā ‘a e liliu ‘i he fakakaukaú ‘oku hoko ‘i he taimi ‘oku pani ai ‘a e kau Kalisitiané? Ki mu‘a ke pani ‘e Sihova ‘a e kau Kalisitiane ko ení, na‘a nau koloa‘aki ‘a e ‘amanaki ‘o e mo‘ui ta‘engata ‘i māmaní. Na‘a nau fakatu‘otu‘a mo vēkeveke lahi ki he taimi ‘e to‘o atu ai ‘e Sihova ‘a e fulikivanú kotoa pea ‘ai ‘a e māmaní ko ha palataisi. Mahalo na‘a nau sioloto atu ki he‘enau talitali  lelei ha mēmipa ‘o e fāmilí pe ko ha kaume‘a na‘e mate. Ka ‘i he hili hono pani kinautolú, na‘e kamata ke kehe ‘enau fakakaukaú. Ko e hā hono ‘uhingá? Na‘e ‘ikai ke nau hoko ‘o ta‘efiemālie ‘i he ‘amanaki ke mo‘ui ‘i he māmaní. Na‘e ‘ikai ke liliu ‘enau fakakaukaú koe‘uhi ko e ongo‘i loto-mafasia pe lōmekina. Na‘e ‘ikai ke fakafokifā pē ‘enau ongo‘i ‘e hoko ‘a e mo‘ui ta‘engata ‘i he māmaní ‘o fakapipiko. ‘I hono kehé, na‘e ngāue‘aki ‘e Sihova hono laumālie mā‘oni‘oní ke liliu ‘a e anga ‘enau fakakaukaú mo e ‘amanaki ‘oku nau koloa‘akí.

12. Fakatatau ki he 1 Pita 1:3, 4, ‘oku anga-fēfē ‘a e ongo‘i ‘a e kau Kalisitiane paní fekau‘aki mo ‘enau ‘amanakí?

¹² Ko ha tokotaha kuo pani te ne ongo‘i nai ‘oku ‘ikai ke ne taau mo e monū ma‘ongo‘onga ko ení. Ka ‘oku ‘ikai ‘aupito ha‘ane veiveiua kuo fili ia ‘e Sihova. ‘Oku fonu hono lotó ‘i he fiefia mo e hounga‘ia ‘i he taimi ‘okú ne fakakaukau ai ki he‘ene ‘amanaki ko eni ki he kaha‘ú.—Lau ‘a e 1 Pita 1:3, 4.

13. ‘Oku anga-fēfē ‘a e ongo‘i ‘a e kau paní fekau‘aki mo ‘enau mo‘ui ‘i heni he māmaní?

¹³ ‘Oku ‘uhinga ení ko e kau paní ‘oku nau loto ke mate? ‘Oku tali ‘e he ‘apositolo ko Paulá ‘a e fehu‘i ko iá? Na‘á ne fakahoa honau sino fakaetangatá ki ha tēniti pea pehē: “Ko hono mo‘oní, ko kitautolu ‘a ia ‘oku tau ‘i he tēnití ni ‘oku tau to‘e, mo mafasia, koe‘uhi ‘oku ‘ikai te tau loto ke hu‘i atu ‘a e tēnití ni, ka ‘oku tau loto ke tau kofu‘aki ‘a e fale ‘e tahá, koe‘uhi ke hoko ‘a e me‘a ‘oku matengofuá ‘o fetongi ‘aki ‘a e mo‘ui.” (2 Kol. 5:4) Ko e kau Kalisitiane ko ení ‘oku ‘ikai ke nau ta‘eoli‘ia ‘i he mo‘ui ko ení pea loto ke nau mate vave. ‘I hono kehé, ‘oku nau fiefia ‘i he mo‘uí pea loto ke ngāue‘aki ‘a e ‘aho taki taha ke tauhi kia Sihova fakataha mo honau fāmilí mo e kaungāme‘á. Neongo ia, tatau ai pē pe ko e hā ‘oku nau faí, ‘oku nau manatu‘i ma‘u pē ‘a e ‘amanaki lāngilangi‘ia ‘oku nau ma‘u ki he kaha‘ú.—1 Kol. 15:53; 2 Pita 1:4; 1 Sio. 3:2, 3; Fkh. 20:6.

14. Ko e hā ‘oku ‘ikai ke ne fakamo‘oni‘i kuo pani ha taha ‘e he laumālie mā‘oni‘oní?

¹⁴ Mahalo ‘okú ke fifili pe kuo pani koe ‘e he laumālie mā‘oni‘oní. Kapau ko ia, fakakaukau angé ki he ngaahi fehu‘i mahu‘inga ko ení: ‘Okú ke ma‘u ha holi mālohi ke fai ‘a e finangalo ‘o Sihová? ‘Okú ke ongo‘i ‘okú ke mātu‘aki faivelenga ‘i he ngāue fakamalangá? Ko ha tokotaha ako vēkeveke koe ‘o e Folofola ‘a e ‘Otuá ‘a ia ‘okú ke sai‘ia ke ako fekau‘aki mo e “ngaahi me‘a loloto ‘a e ‘Otuá”? (1 Kol. 2:10) ‘Okú ke ongo‘i kuo ‘oatu ‘e Sihova ‘a e ngaahi ola fakaofo ‘i he ngāue fakamalangá? ‘Okú ke ongo‘i ‘okú ke fakamahu‘inga‘i lahi ho fatongia ke tokoni‘i fakalaumālie ‘a e ni‘ihi kehé? Kuó ke sio ki ha fakamo‘oni hono tokoni‘i koe ‘e Sihova ‘i he ngaahi tafa‘aki pau ‘i ho‘o mo‘uí? Kapau ‘oku papau ho‘o tali ‘io ki he ngaahi fehu‘i ko ení, ‘oku fakamo‘oni‘i heni kuó ke ma‘u he taimí ni ‘a e ui fakahēvaní? ‘Ikai ‘aupito. He ko e hā? Koe‘uhí ko e kotoa ‘o e kau sevāniti ‘a e ‘Otuá ‘oku lava ke nau ongo‘i pehē, tatau ai pē pe ‘oku pani kinautolu pe ‘ikai. Pea fakafou ‘i hono laumālie mā‘oni‘oní, ‘oku lava ke foaki ‘e Sihova ‘a e mālohi tatau ki ha taha pē ‘o ‘ene kau sevānití, tatau ai pē pe ko e hā ‘enau ‘amanakí. Ko hono mo‘oní, kapau ‘okú ke fifili pe kuo pani koe ‘e he laumālie mā‘oni‘oní, ko e veiveiua ko iá ‘iate ia pē ‘oku ‘uhingá kuo te‘eki ai ke pani koe. Ko e fa‘ahinga kuo ui ‘e Sihová ‘oku ‘ikai ke nau fifili pe kuo pani kinautolu pe ‘ikai! ‘Oku nau ‘ilo‘i!

15. ‘Oku anga-fēfē ‘etau ‘ilo‘i kuo ‘ikai fili ke ‘alu ki hēvani ‘a e fa‘ahinga kotoa kuo nau ma‘u ‘a e laumālie ‘o e ‘Otuá?

¹⁵ ‘I he kotoa ‘o e Tohi Tapú, ‘oku lahi ‘a e ngaahi fa‘ifa‘itaki‘anga ‘o e kau tangata ‘o e tuí na‘a nau ma‘u ‘a e laumālie mā‘oni‘oní; neongo ia, na‘e ‘ikai ke nau ma‘u ‘a e ‘amanaki ‘o e mo‘ui ‘i hēvaní. Ko Tēvita na‘e tataki ‘e he laumālie mā‘oni‘oní. (1 Sām. 16:13) Na‘e tokoni‘i ia ‘e he laumālie mā‘oni‘oní ke mahino‘i ‘a e ngaahi me‘a loloto fekau‘aki mo Sihová pea tataki foki ia  ke hiki ‘a e ngaahi konga ‘o e Tohi Tapú. (Mk. 12:36) Ka neongo ia, na‘e pehē ‘e he ‘apositolo ko Pitá “na‘e ‘ikai ke ‘alu hake ‘a Tēvita ia ki he langí.” (Ngā. 2:34) Ko Sione Papitaiso na‘e “fonu ‘i he laumālie mā‘oni‘oní.” (Luke 1:13-16) Na‘e pehē ‘e Sīsū na‘e ‘ikai ha tangata ‘e lahi hake ‘ia Sione, ka na‘á ne pehē leva he‘ikai kau ‘a Sione ia ‘i he Pule‘anga fakahēvaní. (Māt. 11:10, 11) Na‘e ngāue‘aki ‘e Sihova hono laumālie mā‘oni‘oní ke ‘oange ki he kau tangata ko ení ‘a e mālohi ke fai ‘a e ngaahi ngāue fakaofo, ka na‘e ‘ikai ke ne ngāue‘aki ‘a e laumālie ko iá ke fili kinautolu ke mo‘ui ‘i hēvani. ‘Oku ‘uhinga ení na‘e si‘i ange ‘enau faitōnungá ‘i he fa‘ahinga na‘e fili ke pule ‘i hēvaní? ‘Ikai. ‘Oku ‘uhinga pē ia ‘e fokotu‘u mai kinautolu ‘e Sihova ke mo‘ui ‘i he Palataisi ‘i he māmaní.—Sione 5:28, 29; Ngā. 24:15.

16. Ko e hā ‘a e pale ‘oku fakatu‘otu‘a atu ki ai ‘a e tokolahi taha ‘o e kau sevāniti ‘a e ‘Otuá ‘i he ‘ahó ni?

¹⁶ Ko e tokolahi taha ‘o e kau sevāniti ‘a e ‘Otuá ‘i he māmaní he ‘ahó ni ‘oku ‘ikai ke nau ma‘u ‘a e ‘amanaki ke mo‘ui ‘i hēvaní. Hangē ko ‘Ēpalahame, Sela, Tēvita, Sione Papitaiso mo e kau tangata mo e kau fefine tokolahi kehe ‘i he taimi ‘o e Tohi Tapú, ‘oku nau fakatu‘otu‘a atu ke mo‘ui ‘i he māmaní ‘i he taimi ‘e pule mai ai ‘a e Pule‘anga ‘o e ‘Otuá kiate kinautolú.—Hep. 11:10.

17. Ko e hā ‘a e ngaahi fehu‘i te tau lāulea ki ai ‘i he kupu hoko maí?

¹⁷ Koe‘uhi ko e ni‘ihi ‘o e kau paní ‘oku nau kei ‘i he ha‘oha‘onga ‘o e kakai ‘a e ‘Otuá ‘i he ‘ahó ni, ‘oku malanga hake ai ‘a e ngaahi fehu‘i ‘e ni‘ihi. (Fkh. 12:17) Ko e fakatātaá, ‘oku totonu ke fēfē ‘a e vakai ‘a e kau paní kiate kinautolu tonú? Kapau ‘oku kamata ha tokotaha ‘i ho‘o fakataha‘angá ke ma‘u ‘inasi ‘i he Fakamanatú, ‘oku totonu ke fēfē ho‘o fakafeangai ki he tokotaha ko iá? Pea fēfē kapau ‘oku tupulaki pē ‘a e tokolahi ia ‘o e fa‘ahinga ‘oku nau pehē ‘oku pani kinautolú? ‘Oku totonu ke ke hoha‘a ki ai? Te tau lāulea ki he tali ‘o e ngaahi fehu‘i ko iá ‘i he kupu hoko maí.