1-2. Ko e hā na‘e tala ‘e ha ‘āngelo ki he ongo fefine ‘i he fa‘itoka ‘o Sīsuú, pea ko e hā ‘a e fakahinohino na‘e ‘oange tonu ‘e Sīsuú?

KO E ma‘a hake eni ‘a e ‘ahó, ‘i Nīsani 16, 33 T.S. ‘I he loto-mamahi lahi, ko ha kulupu ‘o e kau fefine manavahē ‘Otua na‘a nau fononga atu ki he fonualoto ‘a ia ‘i he houa ‘e 36 ki mu‘a ange na‘e tanu ai ‘a e sino ‘o e ‘Eiki ko Sīsū Kalaisí. ‘I he‘enau a‘u ki he fa‘itoká, ‘o fakataumu‘a ke ‘ai ‘a e ngaahi sipaisi mo e ngaahi lolo namu-kakala ki he sinó, na‘a nau ‘ohovale ke ‘ilo ‘oku ‘ikai ha taha ‘i he fonualotó! Pea na‘e tala ‘e ha ‘āngelo ki ha ongo ākonga kuo toetu‘u ‘a Sīsū mei he maté mo pehē: “‘Okú ne mu‘omu‘a ‘iate kimoutolu ki Kāleli. Te mou sio ai kiate ia.”—Māt. 28:1-7; Luke 23:56; 24:10.

² Hili ‘a e mavahe ‘a e ongo fefiné mei he fonualotó, na‘e fakaofiofi atu ‘a Sīsū tonu kiate kinaua pea ‘oange ‘a e fakahinohino ko ení: “Mo ō, ‘o fakahā ki hoku fanga tokouá koe‘uhi ke nau ‘alu ki Kāleli, pea ko e feitu‘u ia te nau sio ai kiate aú.” (Māt. 28:10) Kuo pau pē na‘e ma‘u ‘e Sīsū ha fakahinohino mātu‘aki mahu‘inga ke ‘oange ki he‘ene kau ākongá, he ko e fakataha ko ení ‘a e fuofua me‘a na‘á ne fokotu‘utu‘u hili ‘ene toetu‘ú!

3-4. Ko e hā ‘oku lava ai ke tau pehē ko e fekau ‘oku hiki ‘i he Mātiu 28:19, 20 na‘e ‘ikai ke ‘oange pē ki he kau ‘apositoló? (Sio ki he tā ‘i he takafí.)

³ Lau ‘a e Mātiu 28:16-20. ‘I he fakataha na‘e fokotu‘utu‘u ‘e Sīsuú, na‘á ne fakamā‘ala‘ala ai ‘a e ngāue mātu‘aki mahu‘inga ‘e fakahoko ‘e he‘ene kau ākongá ‘i he kotoa ‘o e ‘uluaki senitulí—ko e ngāue tatau ‘oku tau fakahoko ‘i he ‘aho ní. Na‘e pehē ‘e Sīsū: “Ko ia ai, mou ō ‘o ngaohi ko e kau ākonga ‘a e kakai ‘o e ngaahi pule‘anga kotoa pē, . . . pea ako‘i kinautolu ke nau tauhi ‘a e ngaahi me‘a kotoa pē kuó u fekau atu kiate kimoutolú.”

 ⁴ ‘Oku loto ‘a Sīsū ke malanga ‘a e kotoa hono kau muimuí. Na‘e ‘ikai ke ne fakangatangata ‘a e fekau ko ení ki he kau ‘apositolo faitōnunga ‘e toko 11. ‘E lava fēfē ke tau fakapapau‘i? Ko ‘ene kau ‘apositoló pē na‘e ‘i ai ‘i he‘ene ‘oatu ‘a e fekau ke ngaohi ākongá ‘i he mo‘unga ‘i Kālelí? Manatu‘i ‘a e me‘a na‘e tala ange ‘e he ‘āngeló ki he ongo fefiné: “Te mou sio ai kiate ia [‘i Kāleli].” Ko ia kuo pau pē foki na‘e ‘i ai mo e kau fefine faitōnunga ‘i he fakataha ko iá. Ka ‘oku ‘ikai ko ia pē. ‘Oku fakahaa‘i ‘e he ‘apositolo ko Paulá ko Sīsū “na‘á ne hā ki he fanga tokoua ‘e toko 500 tupu ‘i he fo‘i taimi pē ‘e taha.” (1 Kol. 15:6) ‘I fē?

5. Ko e hā ‘oku tau ako mei he 1 Kolinitō 15:6?

⁵ ‘Oku tau ma‘u ‘a e ngaahi ‘uhinga lelei ke fakakaukau na‘e fakakaukau ‘a Paula ki he fakataha tofu pē ‘i Kāleli ‘a ia na‘e fakamatala‘i ‘i he Mātiu vahe 28. Ko e hā hono ‘uhingá? ‘Uluakí, ko e tokolahi taha ‘o e kau muimui ‘a Sīsuú ko e kau Kāleli. Ko ia ko ha mo‘unga ‘i Kāleli—‘ikai ko ha ‘api ‘o ha taha ‘i Selusalema—‘e hoko ia ko ha feitu‘u fe‘ungamālie ki he fakatahataha ‘a ha fu‘u kakai tokolahi. Uá, ko Sīsū na‘e toetu‘ú na‘á ne ‘osi fetaulaki mo ‘ene kau ‘apositolo ‘e toko 11 ‘i ha ‘api ‘i Selusalema. Kapau na‘e loto ‘a Sīsū ke fakahinohino‘i pē ‘ene kau ‘apositoló ki he malangá mo e ngaohi ākongá, na‘á ne mei fai pē ia ‘i Selusalema kae ‘ikai ko e fekau kinautolu mo e kau fefiné mo e ni‘ihi kehe ke nau fakataha ‘i Kāleli.—Luke 24:33, 36.

6. ‘Oku anga-fēfē hono fakahaa‘i ‘i he Mātiu 28:20 ko e fekau ke ngaohi ākongá ‘oku ngāue‘aki ki he ‘ahó ni, pea ‘oku anga-fēfē talangofua ‘a e kakaí ki he fekau ko ení?

⁶ Fakatokanga‘i ha ‘uhinga mahu‘inga hono tolu. Ko e fekau ‘a Sīsū ke ngaohi ākongá na‘e ‘ikai fakangatangata pē ki he kau Kalisitiane ‘i he ‘uluaki senitulí. ‘Oku anga-fēfē ‘etau ‘iló? Na‘e faka‘osi ‘e Sīsū ‘ene fakahinohino ki hono kau muimuí ‘aki ‘a e ngaahi lea: “‘Oku ou ‘iate kimoutolu ‘i he ‘aho kotoa pē ‘o a‘u ki he faka‘osi‘osi ‘o e fokotu‘utu‘u lolotongá.” (Māt. 28:20) ‘I hono fakamo‘oni‘i ‘a e lea ‘a Sīsuú, ko e ‘ahó ni ko e ngāue ngaohi ākongá ‘oku lele ‘i matangí. Fakakaukau atu ki ai! ‘Oku ofi ki he kakai ‘e toko 300,000 ‘i he ta‘u taki taha ‘oku nau papitaiso ko e Kau Fakamo‘oni ‘a Sihova pea hoko ko e kau ākonga ‘a Sīsū Kalaisi!

7. Ko e hā te tau lāulea ki ai he taimi ní, pea ko e hā hono ‘uhingá?

⁷ Ko e tokolahi ‘oku nau ako ‘a e Tohi Tapú ‘oku nau fakalakalaka ‘o papitaiso. Kae kehe, ko e ni‘ihi ‘oku nau ako tu‘uma‘u ‘a e Tohi Tapú mo kitautolu ‘oku hā ngali ‘oku nau toumoua ke hoko ko ha ākonga. ‘Oku nau fiefia ‘i he‘enau akó, ka ‘oku ‘ikai ke nau fakalakalaka ke papitaiso. Kapau ‘okú ke fakahoko ha ako Tohi Tapu, ‘oku pau pē ‘okú ke loto ke tokoni‘i ho‘o tokotaha akó ke ngāue‘aki ‘a e me‘a ‘okú ne akó pea hoko ko ha ākonga ‘a Kalaisi. ‘E lāulea ‘a e kupu ko ení ki he founga ‘e lava ke tau a‘u ai ki he loto ‘o e tokotaha akó pea mo e founga ‘e lava ke tau tokoni‘i ai ia ke tupulaki fakalaumālié. Ko e hā ‘oku fiema‘u ai ke tau lāulea ki he kaveinga ko ení? Koe‘uhí ‘i ha taimi ‘e fiema‘u ke tau fili pe ‘e hokohoko atu ‘a e akó pe ‘ikai.

8. Ko e hā ‘e lava ke faingata‘a ai ke a‘u ki he lotó?

⁸ ‘Oku finangalo ‘a Sihova ki he kakaí ke tauhi kiate ia koe‘uhi ko ‘enau ‘ofa kiate iá. Ko ia ko ‘etau taumu‘á ke tokoni‘i ‘etau kau akó ke mahino‘i ‘oku tokanga loloto mai ‘a Sihova kiate kinautolu taautaha pea ‘okú ne ‘ofa lahi ‘iate kinautolu. ‘Oku tau loto ke tokoni‘i kinautolu ke vakai kia Sihova “ko ha tamai ia ‘a e tamai-maté pea ko ha tokotaha malu‘i ‘o e kau uitoú.” (Saame 68:5) ‘I he hoko ho‘o kau akó ‘o hounga‘ia ‘i he ‘ofa ‘a e ‘Otuá ‘iate kinautolú, ‘oku ngalingali ‘e maongo ki honau lotó pea ko ‘enau ‘ofa kiate iá ‘e tupulaki. Ko e kau ako ‘e ni‘ihi ‘e faingata‘a nai ke nau vakai kia Sihova ko ha Tamai ‘ofa koe‘uhi ko ‘enau tamaí tonu na‘e ‘ikai ke ne fakahaa‘i ange ha ‘ofa kiate kinautolu. (2 Tīm. 3:1, 3) ‘I ho‘o fakahoko leva ‘a e akó, fakamamafa‘i ‘a e ngaahi ‘ulungaanga fakamānako ‘o Sihová. Tokoni‘i ho‘o kau akó ke nau mahino‘i ko hotau ‘Otua  ‘ofá ‘okú ne finangalo ke nau ma‘u ‘a e mo‘ui ta‘engatá, pea ‘okú ne mateuteu ke tokoni‘i kinautolu ke a‘usia ‘a e taumu‘a ko iá. Ko e hā ha toe me‘a ‘e lava ke tau fai?

9-10. Ko e hā ‘a e ongo tohi ‘oku totonu ke tau ngāue‘aki ‘i hono fakahoko ‘a e ngaahi ako Tohi Tapú, pea ko e hā hono ‘uhingá?

⁹ Ngāue‘aki ‘a e tohi “Ko e Hā ‘Oku Lava ke Ako‘i Mai ‘e he Tohi Tapú?” mo e “Founga ke Nofo Ma‘u Ai ‘i he ‘Ofa ‘a e ‘Otuá.” Ko e ongo tohi ko iá na‘e fa‘u tefito ia ke tokoni‘i kitautolu ke a‘u ki he loto ‘etau kau akó. Ko e fakatātaá, ko e vahe 1 ‘o e tohi Ako‘i Mai ‘oku tali ai ‘a e ngaahi fehu‘i ko ení: ‘Oku tokanga mai ‘a e ‘Otuá kiate kitautolu pe ‘okú ne anga-fakamamahi?, ‘Oku anga-fēfē ‘a e ongo‘i ‘a e ‘Otuá ‘i he taimi ‘oku faingata‘a‘ia ai ‘a e kakaí? mo e ‘E lava ke ke hoko ko ha kaume‘a ‘o Sihova? Fēfē ‘a e tohi Nofo Ma‘u ‘i he ‘Ofa ‘a e ‘Otuá? Ko e tohi ko iá ‘e tokoni ki ha tokotaha ako ke ne mahino‘i ‘a e founga ‘e hanga ai ‘e hono ngāue‘aki ‘a e ngaahi tefito‘i mo‘oni Fakatohitapú ‘o fakalelei‘i ‘ene mo‘uí peá ne ‘unu‘unu ofi ange ai kia Sihova. Neongo kapau kuó ke ‘osi ako ‘i he ongo tohi ko ení mo e ni‘ihi kehé, teuteu lelei ki he ako taki taha, pea fakakaukau ma‘u pē ki he ngaahi fiema‘u tefito ‘a e tokotaha akó.

 ¹⁰ Kae kehe, tau pehē pē, ko ha tokotaha ako ‘okú ne mahu‘inga‘ia ‘i ha kaveinga ‘oku lāulea ki ai ha tohi ‘oku ‘ikai kau ‘i he‘etau Puha Me‘angāue Fakafaiakó. Mahalo ‘e lava ke ke fakalototo‘a‘i ia ke lau ‘a e tohi ko iá ‘i hono taimi pē ‘o‘ona koe‘uhi kae lava ke hokohoko atu ‘a e akó ‘i he taha ‘etau ongo tohi ‘oku fokotu‘u mai ke fai ai ‘a e ako Tohi Tapú ‘a ia na‘a tau toki lāulea ki aí.

11. Ko fē taimi ‘oku totonu ke kamata mo faka‘osi‘aki ai ‘a e akó ha lotú, pea ‘e anga-fēfē nai ha‘o lāulea ki he kaveinga ko iá?

¹¹ Kamata ‘a e ako taki taha ‘aki ha lotu. ‘I hono fakalūkufuá, ‘oku lelei tahá ke kamata mo faka‘osi‘aki ‘a e akó ha lotu ‘i he vave taha ‘e ala lavá, ko e anga-mahení ‘i he ngaahi uike si‘i pē mei hono kamata ha ako tu‘uma‘u. Kuo pau ke tau tokoni‘i ‘a e tokotaha akó ke ne ‘ilo‘i ‘e lava ke tau toki mahino‘i pē ‘a e Folofola ‘a e ‘Otuá ‘i he tokoni ‘a e laumālie ‘o e ‘Otuá. Ko e kau faiako Tohi Tapu ‘e ni‘ihi ‘oku nau lāulea ki he kaveinga ‘o e lotú ‘aki hono lau ‘a e Sēmisi 1:5, ‘a ia ‘oku pehē: “Kapau ‘oku ‘i ai ha taha ‘o kimoutolu ‘oku masiva ‘i he potó, tuku ke ne hanganaki kole ki he ‘Otuá.” ‘Oku ‘eke leva ‘e he faiakó ki he tokotaha akó, “‘E lava fēfē ke tau kole ‘a e poto ‘o e ‘Otuá?” ‘Oku ngalingali ‘e loto-tatau ‘a e tokotaha akó ‘oku totonu ke tau lotu ki he ‘Otuá.

12. ‘E anga-fēfē ha‘o ngāue‘aki ‘a e Saame 139:2-4 ke tokoni‘i ha tokotaha ako ke fakalelei‘i ‘a e anga ‘o ‘ene lotú

¹² Ako‘i ho‘o tokotaha akó ki he founga ke lotu aí. Fakapapau‘i kiate ia ‘oku loto ‘a Sihova ke fanongo ki he‘ene ngaahi lotu loto-mo‘oní. Fakamatala‘i ‘i he‘etau ngaahi lotu fakafo‘ituituí, ‘e lava ke tau fakaava mo‘oni hotau lotó kia Sihova—fakahaa‘i kiate ia ‘a e ngaahi ongo‘i ‘oku tau toumoua nai ke vahevahe ki ha tangata. He ko ē, ‘oku ‘osi ‘ilo‘i ‘e Sihova ‘etau ngaahi ongo‘i lolotó. (Lau ‘a e Saame 139:2-4.) ‘E lava foki ke tau fakalototo‘a‘i ‘etau tokotaha akó ke kole ki he tokoni ‘a e ‘Otuá ke liliu ‘a e fakakaukau halá pea iku‘i ‘a e ngaahi tō‘onga koví. Ko e fakatātaá, tau pehē pē, ko ha tokotaha kuó ne ako ‘i ha vaha‘a taimi ‘okú ne sai‘ia ‘i ha ‘aho mālōlō fakapangani. ‘Okú ne ‘ilo ‘oku hala ia, ka ko hono mo‘oní ‘okú ne sai‘ia ‘i ha tafa‘aki pau ‘o ia. Fakalototo‘a‘i ia ke ne fakamatala‘i papau kia Sihova ‘a e anga ‘ene ongo‘í pea kōlenga ki ha tokoni ke ‘ofa pē ‘i he me‘a ‘oku ‘ofa ai ‘a e ‘Otuá.—Saame 97:10.

13. (a) Ko e hā ‘oku totonu ai ke tau fakaafe‘i ‘etau kau akó ke ma‘u ‘a e ngaahi fakatahá ‘i he vave taha ‘e ala lavá? (e) ‘E lava fēfē ke tau ‘ai ha tokotaha ako ke ongo‘i fiemālie ange ‘i he Fale Fakataha‘angá?

¹³ Fakaafe‘i ho‘o ako Tohi Tapú ke ma‘u ‘a e ngaahi fakatahá ‘i he vave taha ‘e ala lavá. Ko e me‘a ‘oku fanongo mo sio ki ai ho‘o tokotaha akó ‘i he fakataha faka-Kalisitiané ‘e lava ke a‘u ia ki hono lotó pea tokoni‘i ia ke fakalakalaka. Hulu‘i ange ‘a e vitiō Ko e Hā ‘Oku Fai ‘i ha Fale Fakataha‘anga? pea fakaafe‘i loto-māfana ia ke mo ‘alu. Tala ange te ke ‘ave ia ‘o ka malava. Ko ha fakakaukau lelei ke fakaafe‘i ha kau malanga kehekehe ke ‘alu mo koe ki he akó. ‘I he founga ko iá, ko ho‘o tokotaha akó ‘e maheni mo e ni‘ihi kehe ‘i he fakataha‘angá, pea ‘oku ngalingali te ne ongo‘i fiemālie ange ‘i he‘ene ma‘u ‘etau ngaahi fakatahá.

14. Ko e hā ‘e lava ke ne ue‘i ha tokotaha ako ke tupu fakalaumālie?

¹⁴ Ko ‘etau taumu‘á ke tokoni‘i ‘etau ako Tohi Tapú ke tupu fakalaumālie. (‘Ef. 4:13) ‘I he loto ha tokotaha ke ako ‘a e Tohi Tapú, te ne mahu‘inga‘ia tefito nai ‘i he founga te ne ma‘u ‘aonga fakafo‘ituitui ai mei aí. Kae kehe, ‘i he tupulaki ‘ene ‘ofa kia Sihová, ‘oku ngalingali te ne kamata ke fakakaukau fekau‘aki mo e founga ‘e lava ke ne tokoni ai ki he ni‘ihi kehé, kau ai ‘a e fa‘ahinga ‘oku nau ‘osi hoko ko e konga ‘o e fakataha‘angá. (Māt. 22:37-39) ‘I he taimi fe‘ungamālié, ‘oua ‘e tautoloi ke lave ki he monū ‘o hono poupou‘i fakapa‘anga ‘a e ngāue ‘o e Pule‘angá.

15. ‘E lava fēfē ke tau tokoni‘i ha ako Tohi Tapu ke fakafeangai lelei ‘i he malanga hake ha palopalema?

¹⁵ Ako‘i ho‘o ako Tohi Tapú ki he me‘a ke fai ‘i he malanga hake ha palopalema. Ko e fakatātaá,  tau pehē pē, ko ho‘o tokotaha akó, ko ha tokotaha malanga te‘eki papitaiso, ‘okú ne tala atu kuo faka‘ita‘i ia ‘e ha taha ‘i he fakataha‘angá. ‘I he ‘ikai kau ki ha fa‘ahí, fēfē ke ke fakamatala‘i ange ‘a e vakai ‘a e Tohi Tapú ke ne fili mei ai. ‘E lava ke ne fakamolemole‘i ‘a e tokouá pe kapau he‘ikai lava ke ne fakangalo‘i ia, fakaofiofi ki he tokotahá ‘i he anga-lelei mo e anga-‘ofa mo e taumu‘a ke “ma‘u mai [hono] tokouá.” (Fakafehoanaki mo e Mātiu 18:15.) Tokoni ki ho‘o tokotaha akó ke teuteu ‘a e me‘a te ne lea‘akí. Fakahaa‘i ange ‘a e founga ke ngāue‘aki ai ‘a e JW Library^®, Tataki Fakaefekumi Ma‘á e Kau Fakamo‘oni ‘a Sihová, mo e jw.org^® ke ako ‘a e ngaahi founga ‘aonga ke fekuki ai mo e tu‘ungá. Ko e lahi ange ‘a e ako ‘okú ne ma‘u ki mu‘a ke ne papitaisó, ko ‘ene fetaulaki lelei ange ia mo e ni‘ihi kehe ‘i he fakataha‘angá ‘amui ange.

16. Ko e hā hono lelei ‘a hono fakaafe‘i ha tokotaha malanga kehe ke mo ō ki he akó?

¹⁶ Fakaafe‘i ‘a e ni‘ihi kehe mei he fakataha‘angá—mo e ‘ovasia sēketí ‘i he‘ene ‘a‘ahi ki he fakataha‘angá—ke mo ō ki he akó. Ko e hā hono ‘uhingá? Tānaki atu ki he ngaahi ‘uhinga na‘e lave ki ai ki mu‘á, ko e kau malanga kehé ‘e malava nai ke nau tokoni‘i ho‘o tokotaha akó ‘i he ngaahi founga ‘oku ‘ikai te ke malava. Ko e fakatātaá, mahalo kuo feinga ‘a e tokotaha akó ke ta‘ofi ‘ene ifi tapaká ka kuó ne toutou tō. Fakaafe‘i ha tokotaha Fakamo‘oni na‘á ne iku‘i ‘a e tō‘onga ko iá, mahalo na‘á ne toutou tō mo ia ki mu‘a, ke kau fakataha mo koe ‘i he akó. Ko ho kaungā-Fakamo‘oní ‘e malava ke ne ‘oatu ‘a e fale‘i ‘aonga ‘a ia ‘oku fiema‘u ‘e he tokotaha akó ke fanongo ki ai. Kapau ‘oku ‘ikai ke ke ongo‘i fiemālie ‘i hono fakahoko ha ako ‘i he ‘i ai ha tokoua taukei, kole ange ke ne fakahoko ‘a e akó. ‘I ha tu‘unga, ngāue‘aonga‘aki ‘a e taukei ‘a e ni‘ihi kehé. Manatu‘i, ko ‘etau taumu‘á ke tokoni‘i ‘a e tokotaha akó ke tupu fakalaumālie.

17-18. Ko e hā ‘oku totonu ke ke fakakaukau ki ai ‘i he fili pe ‘oku totonu ke ke ta‘ofi ha ako?

¹⁷ Kapau ‘oku ‘ikai fai ‘e ho‘o ako Tohi Tapú ha fakalakalaka lelei, ‘e faai atu pē ‘o ke ‘eke hifo, ‘‘Oku totonu ke u ta‘ofi ‘a e akó?’ ‘I hono sivisivi‘i ‘a e tu‘ungá, ‘oku totonu ke ke fakakaukau ki he malava ‘a e tokotahá. ‘Oku fiema‘u ‘a e taimi lahi ke fakalakalaka ai ‘a e kakai ‘e ni‘ihi mei he ni‘ihi. ‘Eke hifo: ‘‘Oku fakalakalaka ‘eku tokotaha akó ‘i he vave fe‘unga ‘o fakatatau ki hono tu‘ungá?’ ‘‘Oku kamata ke ne “tauhi” pe ngāue‘aki ‘a e ngaahi me‘a ‘okú ne akó?’ (Māt. 28:20) ‘E tuai nai ‘a e fakalakalaka ha tokotaha ako, ka ‘oku totonu ke ne fai ha liliu māmālie ‘i he‘ene mo‘uí.

¹⁸ Kae fēfē kapau ko ha taha kuó ne ako ‘i ha vaha‘a taimi, ‘oku si‘isi‘i pe ‘ikai hā mai ha faka‘ilonga ‘okú ne hounga‘ia ‘i he akó? Fakakaukau ki he tu‘unga ko ení: Ko ho‘o tokotaha akó kuo kakato ‘ene akó ‘i he tohi Ako‘i Mai pea mahalo kuo kamata ke ne ako mo e tohi Nofo Ma‘u ‘i he ‘Ofa ‘a e ‘Otuá, ka kuo te‘eki ke ne ma‘u ha fakataha ‘e taha—‘o a‘u ki he Fakamanatú! Pea ‘okú ne fa‘a kaniseli ‘a e akó ‘i he ngaahi me‘a ‘ikai mahu‘inga. ‘I ha tu‘unga pehē, ‘oku lelei ke ke fai ha talanoa hangatonu mo e tokotaha akó. *

19. Ko e hā te ke tala ange nai ki ha taha ‘oku hā ngali ‘oku ‘ikai ke ne hounga‘ia ‘i he‘ene ako Tohi Tapú, pea ko e hā ‘e fiema‘u ke ke fakakaukau ki aí?

 ¹⁹ Te ke kamata nai ‘aki hono ‘eke ange kiate ia, ‘‘Okú ke fakakaukau ko e hā ‘e hoko ko e pole lahi taha kiate koe ‘i ho‘o hoko ko e taha ‘o e Kau Fakamo‘oni ‘a Sihová?’ ‘E tali nai ‘a e tokotaha akó, ‘‘Oku ou sai‘ia hono ako ‘a e Tohi Tapú, ka he‘ikai ‘aupito te u hoko ko e taha ‘o e Kau Fakamo‘oni ‘a Sihová!’ Kapau ko ‘ene fakakaukaú ia ‘i he hili ‘ene ako ‘i ha vaha‘a taimi, ‘oku ‘i ai ha ‘uhinga ke hokohoko atu ai ‘a e akó? ‘I he tafa‘aki ‘e tahá, ko e fuofua taimi nai eni ke fakahaa‘i atu ai ‘e ho‘o tokotaha akó ‘a e me‘a ‘okú ne ta‘ota‘ofi ia. Ko e fakatātaá, ‘okú ne ongo‘i nai he‘ikai ‘aupito lava ke ne malanga mei he fale ki he fale. ‘I hono ‘ilo‘i he taimí ni ‘a e anga ‘ene ongo‘í, te ke ‘i ha tu‘unga lelei ange ai ke tokoni‘i ia.

20. ‘I hono mahino‘i ‘a e Ngāue 13:48, ‘oku lava fēfē ke ne tokoni‘i kitautolu ke ‘ilo‘i pe ‘e hokohoko atu ha ako pe ‘ikai?

²⁰ Ko e me‘a fakamamahí, ko e kau ako ‘e ni‘ihi ‘oku nau hangē ko e kau ‘Isileli ‘i he taimi ‘o ‘Isikelí. Fakatokanga‘i ‘a e me‘a na‘e lea‘aki ‘e Sihova fekau‘aki mo kinautolu kia ‘Isikelí: “Vakai! ‘Okú ke hangē kiate kinautolu ha fo‘i hiva ‘eva, ‘oku hiva‘i ‘aki ha le‘o lelei pea mālie hono taá ‘i ha me‘alea filo. Te nau fanongo ki ho‘o ngaahi leá, ka he‘ikai ha taha te ne fai ki ai.” (‘Isi. 33:32) ‘E faingata‘a nai ke tau tala ange ki ha taha te tau ta‘ofi ‘a e ako mo iá. Kae kehe, “ko e taimi ‘oku toé ‘oku tātāi‘i.” (1 Kol. 7:29) ‘I he ‘ikai fakamoleki ‘a e taimi lahi ange ‘i hono fakahoko ha ako ‘ikai fakalakalaká, ‘oku fiema‘u ke tau kumi ha taha ‘okú ne fakahaa‘i ‘okú ne “hehema totonu ki he mo‘ui ta‘engatá.”—Lau ‘a e Ngāue 13:48.

21. Ko e hā ‘etau konga tohi fakata‘u ki he 2020, pea ko e hā ‘oku fe‘ungamālie aí?

²¹ Lolotonga ‘a e 2020, ko ‘etau konga tohi fakata‘ú te ne tokoni‘i kitautolu ke tokangataha ki hono fakalelei‘i ‘a e tu‘unga ‘oku ‘i ai ‘etau ngāue ngaohi ākongá. ‘Oku kau ai ‘a e ni‘ihi ‘o e ngaahi lea na‘e lea‘aki ‘e Sīsū lolotonga ‘a e fakataha mahu‘inga ko ia ‘i ha mo‘unga ‘i Kālelí: Mou ō ‘o ngaohi ākonga, ‘o papitaiso kinautolu.—Māt. 28:19.