1. Ko e hā ʻa e tuʻunga faingataʻa naʻe aʻu ki ai ʻa Tēvitá?

NAʻE hola ʻa Tēvita telia ʻene moʻuí. Ko Saula, ʻa e tuʻi mālohi ʻo ʻIsilelí, naʻá ne fakapapauʻi ke tāmateʻi ia. ʻI he fiemaʻu ʻe Tēvita ha meʻakaí, naʻá ne afe ʻi he kolo ko Nopí, ʻa ia naʻá ne kole ha foʻi mā pē ʻe nima. (1 Sām. 21:1, 3) Ki mui ai, ko ia mo ʻene kau tangatá naʻa nau kumi hūfanga ʻi ha ʻana. (1 Sām. 22:1) Naʻe anga-fēfē aʻu mai ʻa Tēvita ki he tuʻunga ko ení?

2. Naʻe anga-fēfē hono ʻai ʻe Saula ʻene moʻuí tonu ke ʻi ha tuʻunga fakatuʻutāmakí? (1 Sāmiuela 23:16, 17)

² Naʻe fuʻu meheka ʻa Saula ʻi he ʻiloa mo e ngaahi ikuna fakakautau ʻa Tēvitá. Naʻe toe ʻiloʻi ʻe Saula ko ʻene talangataʻá tonu naʻe taki atu ki hono siʻaki ia ʻe Sihova mei he hoko ko e tuʻi ʻo ʻIsilelí pea naʻe fili ʻe Sihova ʻa Tēvita ki he taloní. (Lau ʻa e 1 Sāmiuela 23:16, 17.) Ka, ʻi he hoko ko e tuʻi ʻo ʻIsilelí, naʻe maʻu ʻe Saula ha fuʻu kau tau mo e kau poupou tokolahi, ko ia naʻe pau ke hola ʻa Tēvita telia ʻene moʻuí. Naʻe fakakaukau moʻoni ʻa Saula ʻe lava ke ne fakafepakiʻi ʻa e taumuʻa ʻa e ʻOtuá kia Tēvitá? (ʻAi. 55:11) ʻOku ʻikai ke tala mai ia ʻe he Tohi Tapú, ka ʻoku lava ke tau fakapapauʻi ʻa e meʻa ʻe taha: Naʻe ʻai ʻe Saula ʻene moʻuí tonu ke ʻi ha tuʻunga fakatuʻutāmaki. Ko e faʻahinga ʻoku fakafepaki ki he ʻOtuá ʻoku nau foʻi maʻu pē!

3. Naʻe anga-fēfē ongoʻi ʻa Tēvita neongo ʻa e meʻa naʻe hoko kiate iá?

³ Ko Tēvitá naʻe ʻikai ko ha tangata naʻe sio tuʻunga. Naʻe ʻikai ke ne fili ke hoko ko e tuʻi ʻo ʻIsileli. Ko Sihova naʻá ne vaheʻi ange ʻa e ngafa ko iá. (1 Sām. 16:1, 12, 13) Naʻe mātuʻaki vakai ʻa Saula kia Tēvita ko ha fili. Ka naʻe ʻikai ke tukuakiʻi ʻe Tēvita ʻa Sihova  ki he fakatuʻutāmaki naʻá ne ʻi aí; pea naʻe ʻikai ke ne lāunga fekauʻaki mo e siʻisiʻi ʻa e meʻakaí pea mo e nofo ʻi ha ʻaná. ʻI hono kehé, mahalo ʻi he lolotonga ʻene ʻi he ʻana ko iá naʻá ne faʻu ai ʻa e hiva fakahīkihiki mālie ʻoku kau ai ʻa e ngaahi lea ʻo ʻetau konga tohi fakataʻú: “Ko e faʻahinga ʻoku kumi kia Sihová ʻe ʻikai te nau masiva ʻi ha meʻa ʻoku lelei.”​—Saame 34:10.

4. Ko e hā ʻa e ngaahi fehuʻi te tau lāulea ki aí, pea ko e hā ʻoku nau mahuʻinga aí?

⁴ ʻI he ʻahó ni, ko e tokolahi ʻo e kau sevāniti ʻa Sihová kuo nau hokosia ha nounou fakameʻatokoni pea pehē ki he ngaahi fiemaʻu tefito kehe ʻo e moʻuí. * Kuo tautefito ʻa e moʻoni ʻo e meʻá ni ʻi he lolotonga ʻa e mahaki fakaʻauha fakamuimuí. Pea ʻi he maluʻaki mai ʻa e ‘fuʻu mamahi lahí,’ ʻoku tau ʻamanekina te tau fehangahangai mo e ngaahi taimi faingataʻa ange. (Māt. 24:21) ʻI he fakakaukau ki he ngaahi moʻoniʻi meʻa ko iá, tau tali angé ha fehuʻi ʻe fā: ʻI he founga fē naʻe ʻikai hoko ai ʻa Tēvita ʻo “masiva ʻi ha meʻa ʻoku lelei”? Ko e hā kuo pau ai ke tau ako ke hoko ʻo fiemālié? Ko e hā ʻoku lava ai ke tau tuipau ʻe tokangaʻi kitautolu ʻe Sihová? Pea ʻe lava fēfē ke tau mateuteu he taimí ni ki he kahaʻú?

5-6. ʻOku anga-fēfē hono tokoniʻi kitautolu ʻe he Saame 23:1-6 ke mahinoʻi ʻa e meʻa naʻe ʻuhinga ki ai ʻa Tēvita ʻi heʻene pehē ko e kau sevāniti ʻa e ʻOtuá “ʻe ʻikai te nau masiva ʻi ha meʻa ʻoku lelei”?

⁵ Ko e hā naʻe ʻuhinga ki ai ʻa Tēvita ʻi heʻene pehē ko e kau sevāniti ʻa Sihová “ʻe ʻikai te nau masiva ʻi ha meʻa ʻoku lelei”? ʻE lava ke tau maʻu ʻa e ʻuhingá mei he lāulea ki he fakalea meimei tatau ʻi he Saame hono 23. (Lau ʻa e Saame 23:1-6.) ʻOku kamataʻaki ʻe Tēvita ʻa e saame ko iá ʻa e ngaahi lea: “Ko hoku Tauhi-Sipí ʻa Sihova. ʻE ʻikai te u masiva ʻi ha meʻa.” ʻI he toenga ʻo e sāmé, ʻoku lave ʻa Tēvita ki he ngaahi meʻa ʻoku mahuʻinga tuʻuloa moʻoni​—ko e ngaahi tāpuaki fakalaumālie hulu fau ʻokú ne maʻu ʻi hono tali ʻa Sihova ko hono Tauhi-Sipí. ʻOku taki atu ia ʻe Sihova ki he “ngaahi hala ʻo e māʻoniʻoní,” pea ʻokú Ne poupouʻi mateaki ʻa Tēvita ʻi he ngaahi  taimi lelei mo e taimi faingataʻa. ʻOku ʻiloʻi ʻe Tēvita ko ʻene moʻui ʻi he “ngaahi kaikaiʻanga musieʻia” ʻa Sihová heʻikai ke honge faingataʻa. ʻI he taimi ʻe niʻihi, te ne loto-siʻi nai, ʻo hangē ia ʻokú ne “ʻaʻeva ʻi he teleʻa ʻoku fakapoʻuli matolú,” pea ʻe ʻi ai hono ngaahi fili. Ka ʻi he hoko ʻa Sihova ko e Tauhi-Sipi ʻo Tēvitá, heʻikai ke ne “manavahē ki ha kovi.”

⁶ Ko ia ʻoku tau maʻu ʻa e tali ki heʻetau fehuʻí: ʻI he founga fē naʻe ʻikai hoko ai ʻa Tēvita ʻo “masiva ʻi ha meʻa ʻoku lelei”? ʻI ha ʻuhinga fakalaumālie, naʻá ne maʻu ʻa e meʻa kotoa naʻá ne fiemaʻú. Ko ʻene fiefiá naʻe ʻikai fakatuʻunga ia ʻi he ngaahi meʻa fakamatelié. Naʻe fiemālie ʻa Tēvita ʻi he meʻa naʻe tokonaki ange ʻe Sihová. Ko e meʻa naʻe mahuʻinga taha kiate iá ko e tāpuaki mo e maluʻi ʻa hono ʻOtuá.

7. Fakatatau ki he Luke 21:20-24, ko e hā ʻa e tuʻunga faingataʻa naʻe fehangahangai mo e kau Kalisitiane ʻi Siutea ʻi he ʻuluaki senitulí?

⁷ ʻI he ngaahi lea ʻa Tēvitá ʻoku lava ke tau sio ai ki he mahuʻinga kiate kitautolu ke maʻu ha vakai totonu ki he ngaahi meʻa fakamatelié. ʻE lava moʻoni ke tau fiefia ʻi ha meʻa fakamatelie pē ʻoku tau maʻu, ka ʻoku ʻikai totonu ke tau fakamuʻomuʻa ia ʻi heʻetau moʻuí. Ko ha moʻoni mātuʻaki mahuʻinga ia naʻe mahinoʻi ʻe he kau Kalisitiane ʻi Siutea ʻi he ʻuluaki senitulí. (Lau ʻa e Luke 21:20-24.) Naʻe fakatokanga ʻa Sīsū kiate kinautolu ʻe hoko mai ha taimi ʻe “ʻātakaiʻi ʻa Selusalema ʻe he kau taú.” ʻI he hoko iá, naʻe fiemaʻu ke nau “kamata hola ki he ngaahi moʻungá.” Ko ʻenau holá ʻe taki atu ia ki honau fakamoʻuí, ka ʻe hoko ai ha mole lahi. ʻI he ngaahi taʻu kuo maliu atú, naʻe fakalea ia ʻi he Taua Leʻo ʻo peheni: “Naʻa nau mavahe mei heʻenau ngaahi ngoué mo e ngaahi ʻapí, naʻa mo e ʻikai ke tānaki mai ʻenau ngaahi koloá mei honau ngaahi falé. ʻI he tuipau ki he maluʻi mo e poupou ʻa Sihová, naʻa nau fakamuʻomuʻa ʻa ʻene lotú ʻi he meʻa kehe kotoa pē ʻa ia naʻe hā ngali mahuʻingá.”

8. Ko e hā ʻa e lēsoni fakatupu fakakaukau ʻoku lava ke tau ako mei he meʻa naʻe hoko ki he kau Kalisitiane naʻe nofo ʻi Siutea ʻi he ʻuluaki senitulí?

⁸ Ko e hā ʻa e lēsoni fakatupu fakakaukau ʻoku lava ke tau ako mei he meʻa naʻe hoko ki he kau Kalisitiane naʻe nofo ʻi Siutea ʻi he ʻuluaki senitulí? Naʻe pehē ʻi he Taua Leʻo naʻe toki lave ki aí: “ʻE ʻi ai nai ha ngaahi ʻahiʻahi mei muʻa ki he anga ʻo ʻetau vakai ki he ngaahi meʻa fakamatelié; ko e meʻa mātuʻaki mahuʻinga tahá kinautolu, pe ʻoku mahuʻinga ange ʻa e fakamoʻui ko ia ʻe hoko mai maʻá e faʻahinga kotoa ʻi he tafaʻaki ʻa e ʻOtuá? ʻIo, ko ʻetau holá ʻe kau nai ki ai ha ngaahi faingataʻa mo e ngaahi mole. Kuo pau ke tau mateuteu ke fai ha meʻa pē ʻe fiemaʻú, ʻo hangē ko ia naʻe fai ʻe hotau tatau ʻi he ʻuluaki senitulí ʻa ia naʻa nau hola mei Siutea.” *

9. Ko e hā ʻa e fakalototoʻa ʻokú ke maʻu mei he faleʻi ʻa e ʻapositolo ko Paulá ki he kau Hepeluú?

⁹ ʻE lava ke ke sioloto atu ki he faingataʻa ki he kau Kalisitiane ko iá ke liʻaki ʻa e meimei meʻa kotoa naʻa nau maʻú pea toe kamata foʻou? Naʻe fiemaʻu ʻa e tui mei heʻenau tafaʻakí ke falala kia Sihova ki heʻenau ngaahi fiemaʻu tefitó. Ka naʻe ʻikai ke nau masiva tokoni. ʻI he taʻu ʻe nima ki muʻa ke ʻātakaiʻi ʻe he kau Lomá ʻa Selusalemá, naʻe ʻoatu ʻe he ʻapositolo ko Paulá ki he kau Hepeluú ha faleʻi mahuʻinga: “Tuku ke hoko hoʻomou founga moʻuí ʻo ʻataʻatā mei he ʻofa ki he paʻangá, lolotonga ia hoʻomou fiemālie pē ʻi he ngaahi meʻa ʻoku mou maʻú. He kuó ne pehē: ‘ʻE ʻikai ʻaupito te u mavahe meiate koe, pea ʻe ʻikai ʻaupito te u liʻaki koe.’ Ko ia te tau mātuʻaki loto-toʻa ai ke pehē: ‘Ko Sihova ʻa hoku tokoní; ʻe ʻikai te u ilifia. Ko e hā ʻe lava ke fai mai ʻe he tangatá kiate au?’” (Hep. 13:5, 6) ʻOku ʻikai ha veiveiua ko e faʻahinga naʻa nau ngāueʻaki ʻa e faleʻi ʻa Paulá ki muʻa ʻi he ʻoho ʻa e kau Lomá naʻe faingofua ange ke nau feʻunuʻaki ki he moʻui fusimoʻomo ʻi honau ʻapi foʻoú. Naʻa  nau fakapapauʻi ʻe tokangaʻi ʻe Sihova ʻenau ngaahi fiemaʻu tefitó. Ko e ngaahi lea ʻa Paulá ʻoku fakapapauʻi mai ai ʻe lava ke tau maʻu ʻa e tuipau tatau.

10. Ko e hā ʻa e “fakapulipuli” ʻoku vahevahe mai ʻe Paula kiate kitautolú?

¹⁰ Naʻe ʻoange ʻe Paula ʻa e faleʻi meimei tatau kia Tīmote pea ʻoku aʻu mai kiate kitautolu he ʻahó ni. Naʻá ne tohi: “Ko ia ʻi hono maʻu ha meʻakai mo ha valá, te tau fiemālie pē ʻi he ngaahi meʻá ni.” (1 Tīm. 6:8) ʻOku ʻuhinga ení heʻikai lava ke tau fiefia ʻi ha houa kai lelei, maʻu ha feituʻu feʻunga ke nofo ai pe fakatau mai ha vala foʻou mei he taimi ki he taimi? ʻOku ʻikai ko e meʻa ia naʻe ʻuhinga ki ai ʻa Paulá. ʻOku pehē ʻe Paula ʻoku totonu ke tau fiemālie pē ʻi ha meʻa fakamatelie pē ʻoku tau maʻu. (Fil. 4:12) Ko e “fakapulipuli” ia ʻa Paulá. Ko ʻetau koloa mahuʻinga tahá ko hotau vahaʻangatae mo hotau ʻOtuá, ʻo ʻikai ko e meʻa fakamatelie ʻoku tau maʻú.​—Hap. 3:17, 18.

11. Ko e hā ʻa e lēsoni fekauʻaki mo e fiemālié ʻoku tau ako mei he lea ʻa Mōsese ki he kau ʻIsilelí?

¹¹ ʻE ʻi ai nai ha faikehekehe ʻi heʻetau vakaí mo e vakai ʻa Sihova ki he meʻa ʻoku tau fiemaʻú. Fakakaukau ki he meʻa naʻe tala ange ʻe Mōsese ki he kau ʻIsilelí hili ʻa e taʻu ʻe 40 ʻenau ʻi he toafá: “Kuo faitāpuekina koe ʻe Sihova ko ho ʻOtuá ʻi he meʻa kotoa kuó ke faí. ʻOkú ne ʻafioʻi lelei ʻa hoʻo fononga holo ʻi he fuʻu toafa lahí ni. Ko e ngaahi taʻu ko eni ʻe 40 kuo ʻiate koe ai ʻa Sihova ko ho ʻOtuá, pea kuo ʻikai te ke masiva ʻi ha meʻa.” (Teu. 2:7) Lolotonga ʻa e taʻu ʻe 40 ko iá, naʻe tokonaki ʻe Sihova ki he kau ʻIsilelí ʻa e mana ke nau kai. Ko honau valá—ʻa e vala tofu pē ko ia naʻa nau mavahe mo ia mei ʻIsipité—naʻe ʻikai ke popo. (Teu. 8:​3, 4) Neongo naʻe vakai ki heni ʻa e niʻihi ko ha tokonaki faingofua pē, naʻe fakamanatu ʻe Mōsese ki he kau ʻIsilelí naʻa nau maʻu ʻa e meʻa kotoa naʻa nau fiemaʻú. ʻE fiefia ʻa Sihova kapau ʻe lava ke tau ako ke hoko ʻo fiemālie—ke houngaʻia naʻa mo e ʻi he ngaahi tokonaki faingofua ʻokú ne ʻomaí, ʻo vakai ki ai ko ha tāpuaki ia pea fakamālō fekauʻaki mo ia.

12. Ko e hā ʻokú ne fakahaaʻi naʻe tuipau ʻa Tēvita kia Sihova kae ʻikai kiate ia tonu?

¹² Naʻe ʻiloʻi ʻe Tēvita ʻoku mateaki mo tokanga lahi ʻa Sihova ki he faʻahinga ʻoku ʻofa kiate Iá. Neongo naʻe ʻi he tuʻunga fakatuʻutāmaki ʻa e moʻui ʻa Tēvitá ʻi heʻene faʻu ʻa e Saame hono 34, ʻi he mata ʻo e tuí naʻá ne sio ki he “ʻāngelo ʻa Sihová” ʻoku “ʻapitanga takatakai” ʻiate ia. (Saame 34:7) Mahalo naʻe fakahoa ʻe Tēvita ʻa e ʻāngelo ʻa Sihová ki ha sōtia ʻoku ʻapitanga ʻi ha malaʻe tau ʻo fakasio maʻu pē ki he filí. Neongo ko Tēvitá ko ha pāteʻi tau pea naʻe talaʻofa ʻe Sihova kiate ia ʻa e tuʻunga-tuʻí, naʻe ʻikai ke ne falala ki heʻene malava ke ngāueʻaki ha makatā pe heletā ke ikunaʻi ʻa e filí. (1 Sām. 16:13; 24:12) Naʻe tuku ʻe Tēvita ʻene falalá ki he ʻOtuá, ʻo tuipau ko e ʻāngelo ʻa Sihová te ne ‘fakahaofi ‘a e faʻahinga ʻoku manavahē kiate Iá.’ Ko e moʻoni, ʻoku ʻikai ke tau ʻamanekina ha maluʻi fakaemana ʻi he ʻahó ni. Ka ʻoku tau ʻiloʻi ʻoku ʻikai ha taha ʻe tuku ʻene falalá kia Sihova te ne tofanga ʻi ha maumau tuʻuloa.

13. ʻI he ʻoho ʻa Koki ʻo Mēkokí, ko e hā te tau hā ngali tuʻu laveangofua aí, ka ko e hā ʻa e ʻuhinga ki he tuipau te tau maʻú? (Sio ki he tā ʻi he takafí.)

¹³ ʻI he kahaʻu vave maí, ko ʻetau falala ki he malava ʻa Sihova ke maluʻi kitautolú ʻe ʻahiʻahiʻi. ʻI he taimi ʻe ʻohofi ai ʻe Koki ʻo Mēkoki, ko ha kulupu ʻo e ngaahi puleʻangá, ʻa e kakai ʻa e ʻOtuá, ko ʻetau moʻuí ʻe hā ngali ʻoku ʻi he tuʻunga fakatuʻutāmaki. ʻE fiemaʻu ke tau hoko ʻo tuipau ko Sihova ʻe lava pea te ne fakahaofi kitautolu. ʻE vakai mai ʻa e ngaahi puleʻangá, ʻoku tau hā ngali ʻo hangē ha fanga sipi liʻekina ʻo ʻikai ha taha te ne maluʻi kitautolu. (ʻIsi. 38:10-12) Heʻikai haʻatau meʻatau pe pōtoʻi tau. ʻE vakai mai ʻa e ngaahi puleʻangá ʻe ikuʻingofua kitautolu. Heʻikai ke nau sio ki he meʻa ʻoku tau sio ki ai ʻaki hotau mata ʻo e tuí​—ko ha kongakau ʻāngelo ʻoku nau ʻapitanga takatakai ʻi he kakai ʻa e ʻOtuá, ʻo mateuteu ke nau faitau maʻatautolu. ʻE anga-fēfē vakai ki ai ʻa e ngaahi puleʻangá? ʻOku ʻikai ke nau maʻu ha vakai fakalaumālie. He fakaʻohovale ē kiate kinautolu ʻi he haʻu ko ia ʻa e ngaahi kongakau fakahēvaní ʻo tokoniʻi kitautolú!​—Fkh. 19:11, 14, 15.

14. Ko e hā ʻa e ngaahi meʻa ʻe lava ke tau fai he taimí ni ke mateuteu ai ki he kahaʻú?

¹⁴ Ko e hā ʻe lava ke tau fai he taimí ni ke mateuteu ai ki he kahaʻú? Ko e ʻuluakí, ʻoku fiemaʻu ke tau maʻu ʻa e vakai totonu ki he ngaahi meʻa fakamatelié, ʻo ʻiloʻi ʻe ʻi ai ʻa e ʻaho te tau māvae ai mo e meʻa ʻoku tau maʻú. ʻOku fiemaʻu foki ke tau fiemālie pē pea maʻu ʻa e fiefia lahi tahá ʻi hotau vahaʻangatae mo Sihová. Ko e lelei ange ʻetau ʻiloʻi ʻa hotau ʻOtuá, ko ʻetau tuipau lahi ange ia ki heʻene malava ke maluʻi kitautolu ʻi hono ʻohofi ʻe Koki ʻo Mēkokí.

15. Ko e hā ʻa e ngaahi hokosia ʻi he kei talavou ʻa Tēvitá naʻe akoʻi ange ai heʻikai ʻaupito liʻaki ia ʻe Sihová?

¹⁵ Fakakaukau angé ki ha toe meʻa naʻá ne tokoniʻi ʻa Tēvita pea ʻe lava ke ne tokoniʻi kitautolu ke mateuteu ki he ʻahiʻahí. Naʻe pehē ʻe Tēvita: “Mou ʻahiʻahiʻi ke mou ʻilo ʻoku lelei ʻa Sihova; fiefia ē ko e tangata ʻoku hūfanga kiate iá.” (Saame 34:8) ʻOku fakamatalaʻi ʻi he ngaahi lea ko iá ʻa e ʻuhinga naʻe ʻiloʻi ai ʻe Tēvita ʻe lava ke ne falala ki he poupou ʻa Sihová. Naʻe falala maʻu pē ʻa Tēvita kia Sihova, pea naʻe ʻikai  ʻaupito liʻaki ia ʻe hono ʻOtuá. ʻI he kei talavou ʻa Tēvitá, naʻá ne fehangahangai mo e saianiti Filisitia ko Kolaiaté peá ne tala ange ki he tangata tau fakamanavahē ko iá: “ʻI he ʻaho tofu pē ko ení ʻe tuku mai ai koe ʻe Sihova ki hoku nimá.” (1 Sām. 17:46) Ki mui ai, naʻe ngāue ʻa Tēvita ki ha tuʻi, ko Saula, ʻa ia naʻe tuʻo lahi ʻene feinga ke tāmateʻi ia. Ka “naʻe kau . . . ʻa Sihova” mo Tēvita. (1 Sām. 18:12) Koeʻuhi naʻe hokosia ʻe Tēvita ʻa e tokoni ʻa Sihová ʻi he kuohilí, naʻe ʻiloʻi ʻe Tēvita ʻe lava ke ne falala kiate Ia lolotonga hono ʻahiʻahiʻi ia he taimi ko ení.

16. Ko e hā ʻa e ngaahi founga ʻaonga ʻe lava ke tau “ʻahiʻahiʻi” ai ʻa e lelei ʻa Sihová?

¹⁶ Ko e lahi ange ʻetau hanga kia Sihova ki ha tataki he taimi ní, ko e lahi ange ia ʻetau tuipau ki heʻene malava ke fakahaofi kitautolu ʻi he kahaʻú. ʻOku fiemaʻu ʻa e tui mo e loto-lelei ke falala kia Sihova ke tau kole ki heʻetau pule ngāué ha taimi mālōlō ke lava ʻo tau maʻu ha ʻasemipilī pe ko ha fakataha-lahi pe kole ke feʻunuʻaki ʻetau taimi ngāué koeʻuhi ke tau maʻu kotoa ʻetau ngaahi fakatahá pea fakamoleki ha taimi lahi ange ʻi he ngāue fakafaifekaú. Tau pehē pē ʻoku ʻikai tali ʻe heʻetau pule ngāué ʻetau kolé pea mole ʻetau ngāué. ʻOku tau maʻu ʻa e tui heʻikai ʻaupito mavahe pe liʻaki kitautolu ʻe Sihova pea te ne tokonaki maʻu pē ʻetau ngaahi fiemaʻu tefitó? (Hep. 13:5) Ko e tokolahi ʻoku nau ʻi he ngāue taimi-kakató ʻoku lava ke nau lave ki he ngaahi hokosia hono tokoniʻi kinautolu ʻe Sihova ʻi heʻenau fiemaʻu vivili taha iá. ʻOku faitōnunga ʻa Sihova.

17. Ko e hā ʻa e konga tohi fakataʻu ki he 2022, pea ko e hā ʻoku feʻungamālie aí?

¹⁷ Koeʻuhi ʻoku ʻi hotau tafaʻakí ʻa Sihova, ʻoku ʻikai ha ʻuhinga ke tau ilifia ki he ngaahi ʻaho ʻoku tuʻunuku maí. Heʻikai ʻaupito liʻaki kitautolu ʻe hotau ʻOtuá kapau te tau fakamuʻomuʻa hono finangaló ʻi heʻetau moʻuí. Ke fakamanatu mai kiate kitautolu ʻa e fiemaʻu ke tau mateuteu he taimí ni ki he ngaahi ʻaho faingataʻa ʻoku tuʻunuku maí pea falala heʻikai ʻaupito liʻaki kitautolu ʻe Sihová, kuo fili ai ʻe he Kulupu Pulé ʻa e Saame 34:10 ko ʻetau konga tohi fakataʻu ki he 2022: “Ko e faʻahinga ʻoku kumi kia Sihová ʻe ʻikai te nau masiva ʻi ha meʻa ʻoku lelei.”