1-3. Ko e hā ʻa e ngaahi pole te ne ʻai nai ʻa e kakai ʻa Sihová ke nau fakatō loʻimatá?

KO FĒ ʻa e taimi fakamuimui taha naʻá ke tangi aí? ʻI he taimi ʻe niʻihi, ʻoku tau fakatō loʻimata ʻi he fiefia. Ka ko e taimi lahi, ʻoku tau tangi koeʻuhi ko e mamahi ʻi hotau lotó. Ko e fakatātaá, te tau tangi nai ʻi he taimi ʻoku mole ai ha taha ʻofeina ʻi he maté. Ko Lorilei, ko ha tuofefine ʻi ʻAmelika, naʻá ne tohi: “ʻI he mole ʻeku taʻahiné naʻe ʻi ai ʻa e ngaahi mōmeniti naʻá ku ongoʻi mamahi ʻaupito ʻo hā ngali naʻe ʻikai ʻaupito ha meʻa naʻá ne fakafiemālieʻi au. ʻI he ngaahi mōmeniti fakamamahi ko iá, naʻá ku fifili pe ko e hā ʻoku kei tā ai hoku mafú.” *

² Te tau fakatō loʻimata nai ʻi ha ngaahi ʻuhinga kehe. Ko Hiromi, ko ha tāimuʻa ʻi Siapani, naʻá ne pehē: “ʻI he taimi ki he taimi ʻoku ou loto-siʻi ʻi he taʻemahuʻingaʻia ʻa e kakai ʻoku ou fetaulaki mo ia ʻi he ngāue fakafaifekaú. ʻI he taimi ʻe niʻihi, ʻoku ou kole kia Sihova ʻi he loʻimataʻia ke ne tokoniʻi au ke maʻu ha taha ʻokú ne fekumi ki he moʻoní.”

³ Kuó ke faʻa ongoʻi pehē? Ko e tokolahi ʻo kitautolu kuo tau hokosia ia. (1 Pita 5:9) ʻOku tau loto ke “tauhi kia Sihova ʻi he nēkeneka,” ka te tau tauhi nai kiate ia ʻi he loʻimataʻia koeʻuhi ko e mamahí, loto-siʻí pe ko ha tuʻunga faingataʻa ʻokú ne ʻahiʻahiʻi ʻetau mateaki ki he ʻOtuá. (Saame 6:6; 100:2) ʻE lava fēfē ke tau fekuki mo hono lōmekina kitautolu ʻe he ngaahi ongoʻi peheé?

4. Ko e hā te tau lāulea ki ai ʻi he kupu ko ení?

⁴ ʻE lava ke tau ako mei he faʻifaʻitakiʻanga ʻa Sīsuú. ʻI he taimi ʻe niʻihi, naʻá ne hokosia foki ʻa e ngaahi ongoʻi mālohi naʻe ueʻi ai ia ke ne “tangi.” (Sione 11:35; Luke 19:41; 22:44; Hep. 5:7) Tau vakai angé ki he ngaahi taimi ko iá. ʻI heʻetau fai iá, te tau vakai ai  ki he ngaahi lēsoni ʻe lava ke tau ako. Te tau toe vakai ai ki he ngaahi founga ʻaonga ʻe lava ke tau fekuki ai mo e ngaahi pole ʻokú ne ʻai kitautolu ke tau tangi.

5. Ko e hā ʻoku tau ako fekauʻaki mo Sīsū mei he fakamatala ʻi he Sione 11:32-36?

⁵ ʻI he faʻahitaʻu momoko ʻo e 32 T.S., ko e kaumeʻa lelei ʻo Sīsū ko Lāsalosí naʻá ne puke peá ne mate. (Sione 11:3, 14) Naʻe ʻi ai ha ongo tuofāfine ʻo e tangatá, ko Mele mo Māʻata, pea naʻe ʻofa lahi ʻaupito ʻa Sīsū ʻi he fāmili ko ení. Naʻe loto-mamahi ʻaupito ʻa e ongo fefiné ʻi he mole atu hona tuongaʻane ʻofeiná. Hili ʻa e mate ʻa Lāsalosí, naʻe fononga ʻa Sīsū ki he kolo ko Pētaní, ʻa ia naʻe nofo ai ʻa Mele mo Māʻatá. ʻI he fanongo ʻa Māʻata ki he ʻalu atu ʻa Sīsuú, naʻá ne fakavave atu ke fakafetaulaki kiate ia. Sioloto atu ki heʻene loto-mamahi lahi ʻi heʻene pehē: “ʻEiki, kapau naʻá ke ʻi heni, ne ʻikai mei mate hoku tuongaʻané.” (Sione 11:21) ʻI he taimi nounou mei he sio ʻa Sīsū ki he tangi ʻa Mele mo e niʻihi kehé, naʻá ne “tangi.”​—Lau ʻa e Sione 11:32-36.

6. Ko e hā naʻe tangi ai ʻa Sīsū ʻi he taimi ko iá?

⁶ Ko e hā naʻe tangi ai ʻa Sīsū ʻi he taimi ko iá? ʻOku tali eni ʻe he Insight on the Scriptures: “Ko e mate ko ia ʻa hono kaumeʻa ko Lāsalosí mo e mamahi ʻa e ongo tuofāfine ʻo Lāsalosí naʻá ne ʻai ʻa Sīsū ke ne ‘toʻe ʻi loto ʻiate ia peá ne tangi.’” * Naʻe fakakaukau nai ʻa Sīsū ki he mamahi naʻe hokosia ʻe hono kaumeʻa ʻofeina ko Lāsalosí lolotonga ʻene puké pea sioloto atu ki he anga ʻo e ongoʻi ʻa e tangatá ʻi heʻene ʻiloʻi naʻe faai atu ke mole ʻene moʻuí. Ko e moʻoni naʻe toe tangi ʻa Sīsū ʻi he sio ki hono uesia ʻa Mele mo Māʻata ʻe he mate ʻa hona tuongaʻané. Kapau kuo mole ʻi he maté hao kaumeʻa ofi pe ko ha mēmipa ʻo e fāmilí, ʻoku ʻikai ha veiveiua naʻá ke hokosia ʻa e ngaahi ongoʻi meimei tatau. Fakakaukau ki he lēsoni ʻe tolu ʻe lava ke ke ako mei he meʻá ni.

7. Ko e hā ʻoku tau ako fekauʻaki mo Sihova mei he fakatō loʻimata ʻa Sīsū koeʻuhi ko hono ngaahi kaumeʻá?

⁷ʻOku mahinoʻi ʻe Sihova ʻa e anga hoʻo ongoʻí. Ko Sīsū ʻa e ‘ʻīmisi tonu’ ʻo ʻene Tamaí. (Hep. 1:3) ʻI he tangi ʻa Sīsuú, naʻá ne tapua mai ʻa e  ngaahi ongoʻi ʻene Tamaí. (Sione 14:9) Kapau ʻokú ke kātekina ʻa e mole ha taha ʻofeina, ʻe lava ke ke fakapapauʻi ʻoku ʻikai ngata pē hono ʻiloʻi ʻe Sihova hoʻo mamahí ka ʻokú ne toe mātuʻaki kaungāongoʻi foki mo koe. ʻOkú ne loto ke faitoʻo ho loto-laveá.​—Saame 34:18; 147:3.

8. Ko e hā ʻoku lava ai ke tau tuipau ʻe fokotuʻu mai ʻe Sīsū hotau ngaahi ʻofaʻangá?

⁸ʻOku loto ʻa Sīsū ke fokotuʻu mai ho ngaahi ʻofaʻangá. Ki muʻa siʻi pē pea tangi ʻa Sīsuú, naʻá ne fakapapauʻi ange kia Māʻata: “ʻE tuʻu hake ho tuongaʻané.” Naʻe tui ʻa Māʻata kia Sīsū. (Sione 11:23-27) ʻI he tuʻunga ko ha tokotaha lotu faitōnunga ʻa Sihova, ʻoku ʻikai ha veiveiua naʻe ʻiloʻi ʻe Māʻata ʻa e ngaahi toetuʻu naʻe fakahoko ʻe ʻIlaisiā mo ʻIlaisa ʻi he laui senituli ki muʻa. (1 Tuʻi 17:17-24; 2 Tuʻi 4:32-37) Pea ʻoku ngalingali naʻá ne toe fanongo fekauʻaki mo e ngaahi toetuʻu naʻe fakahoko ʻe Sīsuú. (Luke 7:11-15; 8:41, 42, 49-56) ʻOku lava foki ke ke tuipau te ke toe sio ki ho ngaahi ʻofaʻanga kuo nau maté. Ko e tangi ko ia ʻa Sīsū ʻi heʻene ʻoatu ʻa e fakafiemālie ki hono ngaahi kaumeʻa naʻa nau mamahí ko ha fakamoʻoni ia ʻokú ne holi ke fokotuʻu mai ʻa e kau maté!

9. Hangē ko Sīsuú, ʻe lava fēfē ke ke poupou ki he faʻahinga ʻoku mamahí? ʻOmai ha fakatātā.

⁹ʻE lava ke ke poupou ki he faʻahinga ʻoku mamahí. Naʻe ʻikai ngata pē ʻi he tangi ʻa Sīsū fakataha mo Māʻata mo Melé ka naʻá ne toe fanongo foki mo lea fakalototoʻa kiate kinaua. ʻE lava foki ke tau fai ʻa e meʻa tatau ki he faʻahinga ʻoku mamahí. Ko Dan, ko ha mātuʻa ʻoku nofo ʻi ʻAositelēlia, ʻokú ne pehē: “Hili ʻa e mole hoku uaifí, naʻá ku fiemaʻu ha poupou. Ko e ngaahi hoa mali ʻe niʻihi naʻa nau fakafaingamālieʻi kinautolu ʻaho mo e pō koeʻuhi pē ke fanongo kiate au. Naʻa nau tuku pē ke u fakahaaʻi ʻeku mamahí pea ʻikai ke nau mā ʻi heʻeku tangí. Naʻa nau toe fai mai ha tokoni ʻaonga, hangē ko hono fufulu ʻeku meʻalelé, fai ʻeku ngaahi fakataú, pea feimeʻatokoni ʻi he taimi naʻe ʻikai ke u lava ai ʻo fai ʻa e ngaahi meʻa ko ení. Pea naʻa nau faʻa lotu fakataha mo au. Naʻa nau fakamoʻoniʻi ʻenau hoko ko e ngaahi kaumeʻa moʻoni mo e fanga tokoua ‘ʻoku fanauʻi mai ki he taimi faingataʻá.’”​—Pal. 17:17.

10. Fakamatalaʻi ʻa e meʻa naʻe hoko ʻi he Luke 19:36-40.

¹⁰ Naʻe aʻu ʻa Sīsū ki Selusalema ʻi Nīsani 9, 33 T.S. ʻI heʻene fakaofiofi ki he koló, naʻe fakatahataha mai ha fuʻu kakai pea nau fola honau ngaahi kofú ʻi he halá ʻi hono ʻaó ke fakahaaʻi ko ia honau Tuʻí. Naʻe hoko moʻoni ia ko ha taimi fakafiefia. (Lau ʻa e Luke 19:36-40.) Ko ia ko ʻene kau ākongá naʻe ʻikai nai ke nau ʻamanekina ʻa e meʻa ʻe hokó. “ʻI heʻene [Sīsū] fakaofiofi atú, naʻá ne vakai atu ki he koló peá ne tengihia ia.” Lolotonga iá naʻe lea ʻa Sīsū fekauʻaki mo e meʻa fakamamahi naʻe teu ke hoko ki he faʻahinga naʻe nofo ʻi Selusalemá.​—Luke 19:41-44.

11. Ko e hā naʻe tangi ai ʻa Sīsū koeʻuhi ko e faʻahinga naʻe nofo ʻi Selusalemá?

¹¹ Naʻe mamahi ʻa e loto ʻo Sīsuú koeʻuhí naʻá ne ʻiloʻi neongo hono talitali loto-māfana iá, ko e tokolahi taha ʻi hono kau tangataʻifonuá naʻa nau ʻosi fakahaaʻi heʻikai ke nau tali lelei ʻa e pōpoaki ʻo e Puleʻangá. Ko hono olá, ʻe fakaʻauha ʻa Selusalema pea ko ha Siu pē ʻe hao ʻi hono fakaʻauha ʻa e koló ʻe taki pōpula. (Luke 21:20-24) Ko e meʻa fakamamahí, hangē ko ia naʻe tomuʻa ʻilo ʻe Sīsuú, ko e tokolahi tahá naʻa nau talitekeʻi ia. ʻOku anga-fēfē fakafeangai ʻa e kakai fakalūkufua ʻi he feituʻu ʻokú ke nofo aí ki he pōpoaki ʻo e Puleʻangá? Kapau ʻoku tokosiʻi pē ʻa e faʻahinga ʻoku nau tali lelei hoʻo feinga ke akoʻi kiate kinautolu ʻa e moʻoní, ko e hā ʻe lava ke ke ako mei he tangi ʻa Sīsuú? Fakakaukau ki ha toe lēsoni ʻe tolu.

12. Ko e hā ʻoku lava ke tau ako fekauʻaki mo Sihova mei he fakatō loʻimata ʻa Sīsū koeʻuhi ko hono kaungāʻapí?

¹²ʻOku tokanga ʻa Sihova ki he kakaí. Ko e tangi ʻa Sīsuú ʻoku fakamanatu mai ai ʻa e lahi  ʻo e tokanga ʻa Sihova ki he kakaí. “ʻOku ʻikai te ne finangalo ke fakaʻauha ha taha ka ʻokú ne finangalo ke aʻusia ʻe he tokotaha kotoa ʻa e fakatomalá.” (2 Pita 3:9) ʻI he ʻahó ni ʻoku tau fakahāhā ʻetau ʻofa ki hotau kaungāʻapí ʻaki ʻa e kītaki ʻi heʻetau ngaahi feinga feilaulauʻi-kita ke aʻu ki honau lotó mo e ongoongo leleí.​—Māt. 22:39. *

13-14. Naʻe anga-fēfē hono fakahāhā ʻe Sīsū ʻa e manavaʻofa ki he kakaí, pea ʻe lava fēfē ke tau fakatupulekina ʻa e ʻulungaanga ko iá?

¹³Naʻe ngāue mālohi ʻa Sīsū ʻi he ngāue fakafaifekaú. Naʻá ne fakahaaʻi ʻene ʻofa ki he kakaí ʻaki hono akoʻi kinautolu ʻi he faingamālie kotoa pē. (Luke 19:47, 48) Ko e hā naʻá ne ueʻi ia ke fai peheé? Naʻe ongoʻi manavaʻofa ʻa Sīsū kiate kinautolu. ʻI he taimi ʻe niʻihi, koeʻuhi ko e loto ʻa e tokolahi ke fanongo ki he ngaahi lea ʻa Sīsuú ko ia mo ʻene kau ākongá naʻe “ʻikai lava ai naʻa mo haʻanau maʻu meʻatokoni.” (Mk. 3:20) Naʻá ne fakafaingamālieʻi foki ia ʻi he poʻulí​—ko ha taimi naʻe faingamālie ange ai ha taha ʻo ʻene kau fanongó. (Sione 3:1, 2) Ko e tokolahi taha ʻo e faʻahinga naʻa nau ʻuluaki fanongo kia Sīsuú naʻe ʻikai ke nau hoko ko ʻene kau ākonga. Ka ko e faʻahinga kotoa naʻa nau fanongo kiate iá naʻa nau maʻu ha fakamoʻoni fakaʻāuliliki. ʻI he ʻahó ni ʻoku tau loto ke ʻoange ki he taha kotoa ʻa e faingamālie ke fanongo ki he ongoongo leleí. (Ngā. 10:42) Ke fakahoko ení, ʻe fiemaʻu nai ke tau feʻunuʻaki ʻa e founga ʻoku tau malanga aí.

¹⁴Hoko ʻo loto-lelei ke fai ʻa e ngaahi feʻunuʻaki ʻoku fiemaʻú. Kapau heʻikai ke tau malanga ʻi he ngaahi taimi kehekehe, heʻikai nai ke tau aʻu ki he faʻahinga te nau tali lelei ʻa e ongoongo leleí. Ko ha tāimuʻa ko Matilda ʻokú ne pehē: “ʻOku ou feinga mo hoku husepānití ke ʻaʻahi ki he kakaí ʻi he ngaahi taimi kehekehe. ʻOkú ma ngāue pongipongia ʻi he feituʻu pisinisí. ʻI he hoʻataá ko e taimi feʻaluʻaki ia ʻa e kakaí, ʻokú ma ngāueʻaki ʻa e papa tuʻuaki tohí. ʻI he fakaʻosinga ʻo e ʻahó, ʻokú ma ʻiloʻi ʻoku maʻu ange ai ʻa e kakai tokolahi ʻi honau ʻapí.” ʻI he ʻikai pipiki ki ha taimi-tēpile ʻoku feʻungamālie kiate kitautolú, ʻoku totonu ke tau loto-lelei ke feʻunuʻaki ʻetau taimi-tēpilé ke malanga ʻi he taimi ʻoku ngalingali te tau fetaulaki ai mo e kakaí. Kapau te tau fai ia, ʻe lava ke tau fakapapauʻi ʻe fiefia ʻa Sihova.

15. Ko e hā naʻe hoko ʻi he pō fakaʻosi ʻo e moʻui ʻa Sīsuú, hangē ko ia ʻoku hiki ʻi he Luke 22:39-44?

¹⁵ ʻI he efiafi poʻuli ʻo Nīsani 14, 33 T.S. naʻe ʻalu ʻa Sīsū ki he ngoue ko Ketisemaní. Naʻá ne huaʻi atu ai hono lotó kia Sihova. (Lau ʻa e Luke 22:39-44.) Ko e lolotonga ʻa e ngaahi houa faingataʻa ko iá naʻe fai ai ʻe Sīsū “ʻa e ngaahi hū tōtōaki . . . fakataha mo e ngaahi kalanga leʻo-lahi mo e loʻimataʻia.” (Hep. 5:7) Ko e hā naʻe lotu ʻa Sīsū fekauʻaki mo ia ʻi he pō fakaʻosi peá ne pekiá? Naʻá ne lotu ki ha mālohi ke nofoʻaki mateaki kia Sihova pea ke fai hono finangaló. Naʻe fanongo ʻa Sihova ki he mamahi ʻi he lotu ʻa hono ʻAló pea naʻá ne fekauʻi atu ha ʻāngelo ke fakaivimālohiʻi ia.

16. Ko e hā naʻe faingataʻaʻia ai ʻa Sīsū lolotonga ʻene lotu ʻi he ngoue ko Ketisemaní?

¹⁶ ʻOku ʻikai ha veiveiua naʻe tangi ʻa Sīsū lolotonga ʻene lotu ʻi he ngoue ko Ketisemaní koeʻuhi naʻá ne faingataʻaʻia ʻi heʻene fakakaukau atu ki he vakai kiate ia ʻa e niʻihi kehé ko ha tokotaha lea fieʻotua. Naʻá ne toe lāuʻilo foki ki he fatongia mafatukituki ʻokú ne fatakí​—ko hono fakatonuhiaʻi ʻa e huafa ʻo ʻene Tamaí. Kapau ʻokú ke fehangahangai mo ha tuʻunga faingataʻa ʻa ia ʻoku ʻahiʻahiʻi ai hoʻo mateaki kia Sihová, ko e hā ʻe lava ke ke ako mei he tangi ʻa Sīsuú? Fakakaukau ki ha toe lēsoni ʻe tolu.

17. Ko e hā ʻoku lava ke tau ako fekauʻaki mo Sihova mei heʻene tali ki he lotu tōtōivi ʻa Sīsuú?

¹⁷ʻOku fanongo ʻa Sihova ki hoʻo ngaahi hū tōtōakí. Naʻe fanongo ʻa Sihova ki he ngaahi kole tōtōivi ʻa Sīsuú. Ko e hā hono ʻuhingá? Koeʻuhí ko e meʻa naʻe hohaʻa tefito ki ai ʻa Sīsuú ko e nofoʻaki mateaki ki heʻene Tamaí pea fakatonuhiaʻi Hono huafá. Kapau ko e meʻa ʻoku tau hohaʻa tefito ki aí ko e nofoʻaki mateaki kia Sihova pea fakatonuhiaʻi hono huafá, te ne tali ʻetau lotu ki ha tokoní.​—Saame 145:18, 19.

18. ʻI he founga fē ʻoku hangē ai ʻa Sīsū ko ha kaumeʻa kaungāongoʻi?

¹⁸ʻOku kaungāongoʻi ʻa Sīsū mo koe. ʻI he taimi ʻoku tau puputuʻu aí, he fiefia ē ko kitautolu ke maʻu ha fakafiemālie mei ha kaumeʻa kaungāongoʻi, tautefito kapau ko e tokotaha ko iá naʻá ne fehangahangai mo e ngaahi ʻahiʻahi meimei tatau mo kitautolú. Ko Sīsū ʻa e kaumeʻa ko iá. ʻOkú ne ʻiloʻi pe ʻoku fēfē ʻa e ongoʻi vaivaí mo e fiemaʻu ha tokoní. ʻOkú ne mahinoʻi hotau faʻungá, pea te ne fakapapauʻi ʻoku tau maʻu ʻa e poupou ʻoku tau fiemaʻú “ʻi he taimi totonú.” (Hep. 4:15, 16) Hangē pē ko e tali ʻe Sīsū ʻa e tokoni  mei ha ʻāngelo ʻi he ngoue ko Ketisemaní, ʻoku totonu ke tau loto-lelei ke tali ʻa e tokoni ʻoku tokonaki mai ʻe Sihová, tatau ai pē pe ʻoku fakafou mai ia ʻi ha tohi, vitiō, malanga pe ko ha ʻaʻahi fakalototoʻa mei ha mātuʻa pe ko ha kaumeʻa matuʻotuʻa.

19. ʻE lava fēfē ke ke maʻu ʻa e mālohi ʻi hoʻo fehangahangai mo hano ʻahiʻahiʻi hoʻo mateaki ki he ʻOtuá? ʻOmai ha fakatātā.

¹⁹ʻE foaki atu ʻe Sihova ʻa e “nonga ʻa e ʻOtuá.” ʻE anga-fēfē hono fakaivimālohiʻi kitautolu ʻe Sihová? ʻI he taimi ʻoku tau lotu aí, te tau maʻu ʻa e “nonga ʻa e ʻOtuá ʻa ia ʻoku fakalaka atu ʻi he mahino kotoa pē.” (Fil. 4:6, 7) Ko e nonga ʻoku meia Sihová ʻokú ne fakanonga hotau lotó pea ʻai ke tau fakakaukau fakalelei. Fakakaukau ki hono fakamoʻoniʻi eni ʻe ha tuofefine ko Luz. ʻOkú ne pehē: “ʻOku ou fāinga mo e ongoʻi taʻelatá. ʻI he taimi ʻe niʻihi, ʻoku ʻai au ʻe he ngaahi ongoʻi ko iá ke u fakakaukau ʻoku ʻikai ke ʻofa ʻa Sihova ʻiate au. Ka ʻi he hoko iá, ʻoku ou tala ange ʻi he taimi pē ko iá kia Sihova ʻa e anga ʻo ʻeku ongoʻí. Ko e lotú ʻokú ne ʻai au ke u mapuleʻi ʻeku ngaahi ongoʻí.” Hangē ko ia ʻoku fakahaaʻi mai ʻi heʻene hokosiá, ʻe lava ke tau maʻu ʻa e nonga fakafou ʻi he lotú.

20. Ko e hā ʻa e ngaahi lēsoni ʻoku tau ako mei he fakatō loʻimata ʻa Sīsū?

²⁰ He ngaahi lēsoni fakafiemālie mo ʻaonga ē ʻoku lava ke tau ako mei he tangi ʻa Sīsuú! ʻOku fakamanatu mai ai ke tau poupou ki hotau ngaahi kaumeʻa ʻoku mamahí pea ke falala ko Sihova mo Sīsū te na poupouʻi kitautolu ʻi he mole ha taha ʻoku tau ʻofa ai ʻi he maté. ʻOku ueʻi kitautolu ke tau malanga mo faiako fakataha mo e manavaʻofa koeʻuhí ko Sihova ko e ʻOtuá mo Sīsū Kalaisi ʻokú na fakahāhā ʻa e ʻulungaanga fakaalaala ko ení. Pea ʻoku tau maʻu ʻa e fakafiemālie ʻi hono ʻiloʻi ʻoku mahinoʻi ʻe Sihova mo hono ʻAlo ʻofeiná ʻa e anga ʻo ʻetau ongoʻí, kaungāongoʻi mai ki heʻetau vaivaiʻangá, pea ʻokú na loto ke tokoniʻi kitautolu ke kātaki. ʻOfa ke hokohoko atu ʻetau ngāueʻaki ʻa e meʻa kuo tau akó ʻo aʻu ki he ʻaho ʻe toki fakahoko ai ʻe Sihova ʻene talaʻofa fakalotomāfana ke “holoholo ʻa e loʻimata kotoa pē mei [hotau] matá”!​—Fkh. 21:4.