1-2. Ko e hā kuo pau ke tau hokohoko atu ke fai hili ʻa e papitaisó? Fakamatalaʻi.

 ʻOKÚ KE fakamaʻa tuʻo fiha ho ʻapí? Mahalo ʻi he ki muʻa ke ke fuofua hiki ki aí, naʻá ke fakamaʻa fakaʻāuliliki ia. Kae fēfē kapau ʻokú ke fakaliʻeliʻaki ia ki mui ai? Hangē ko ia ʻokú ke ʻiloʻí, ʻe vave pē ʻene fonu efua mo ʻuli. Ke tauhi ho ʻapí ke maʻá, ʻoku fiemaʻu ke ke fakamaʻa maʻu pē ia.

² ʻOku fiemaʻu ʻa e feinga hokohoko meimei tatau kiate kitautolu ʻi heʻene haʻu ko ia ki heʻetau fakakaukaú mo hotau angaʻitangatá. Ko e moʻoni, ki muʻa ke tau papitaisó naʻa tau ngāue mālohi ke fai ʻa e ngaahi liliu pau ʻi heʻetau moʻuí koeʻuhi ke “fakamaʻa kitautolu mei he ʻuli kotoa pē ʻo e kakanó mo e laumālié.” (2 Kol. 7:1) Ka ʻi he taimi ní, ʻoku fiemaʻu ke tau muimui ki he akonaki ʻa e ʻapositolo ko Paulá ke “hokohoko atu hono fakafoʻou” kitautolú. (ʻEf. 4:23) Ko e hā ʻoku fiemaʻu ai ʻa e feinga hokohokó? Koeʻuhí ko e efu mo e ʻuli ʻo e māmani ko ení ʻe vave ʻene fokotuʻuna ʻi hotau lotó. Ke fakaʻehiʻehi mei hení pea ke nofoʻaki fakahōifua kia Sihová, kuo pau ke tau sivisiviʻi maʻu pē ʻetau fakakaukaú, hotau angaʻitangatá pea mo ʻetau ngaahi holí.

3. ʻOku ʻuhinga ki he hā ʻa e “fakafoʻou homou ʻatamaí”? (Loma 12:2)

³ Ko e hā ʻoku fiemaʻu ke tau fai ke fakafoʻou ai hotau ʻatamaí, ʻa ia, ke liliu ʻa e anga ʻetau fakakaukaú? (Lau ʻa e Loma 12:2.) Ko e kupuʻi lea faka-Kalisi naʻe liliu ko e “fakafoʻou homou ʻatamaí” ʻe lava ke liliu ia ko e “monomono homou ʻatamaí.” Ko ia ai, heʻikai lava ke tau teuʻi ʻetau moʻuí ʻaki ha ngaahi ngāue lelei siʻi pē. ʻI hono kehé, kuo pau ke tau sivisiviʻi ʻa hotau tangata ʻi lotó pea fai ha liliu pē ʻoku fiemaʻu koeʻuhi ke ʻai ʻetau moʻuí ke fehoanaki  mo e ngaahi tuʻunga ʻa Sihová ʻi he ofi taha ʻe ala lavá. ʻOku totonu ke tau fai eni, ʻo ʻikai tuʻo taha pē, kae fai hokohoko.

4. ʻE lava fēfē ke tau fakaʻehiʻehi mei hono fakaʻatā ʻetau fakakaukaú ke fakafuo ʻe he fokotuʻutuʻu ko ení?

⁴ ʻI heʻetau hoko ʻo haohaoá, te tau malava maʻu pē ʻo fakahōifuaʻi ʻa Sihova ʻi he meʻa kotoa ʻoku tau faí. ʻI he lolotongá ni, ʻoku fiemaʻu ke tau hanganaki ngāue mālohi ke aʻusia ʻa e taumuʻa ko iá. Fakatokangaʻi ʻa e fakafekauʻaki ʻe Paula ʻa hono fakafoʻou hotau ʻatamaí pea mo e lāuʻilo ki he finangalo ʻo e ʻOtuá, hangē ko ia ʻoku hiki ʻi he Loma 12:2. ʻI he ʻikai ke tau fakaʻatā pē kitautolu ke fakafuo ʻe he fokotuʻutuʻu ko ení, kuo pau ke tau ʻuluaki sivisiviʻi kitautolu ke fakapapauʻi pe ko e hā ʻa e lahi ʻetau fakaʻatā ʻa e fakakaukau ʻa e ʻOtuá​—ʻo ʻikai ko e māmaní​—ke ne tākiekina ʻetau ngaahi taumuʻá mo e filí.

5. ʻE lava fēfē ke tau sivisiviʻi ʻetau fakakaukau fekauʻaki mo e panaki mai ʻa e ʻaho ʻo Sihová? (Sio ki he fakatātaá.)

⁵ Fakakaukau ki ha fakatātā. ʻOku loto ʻa Sihova ke tau “hanganaki tauhi maʻu ʻi he ʻatamaí ʻa e hoko mai ʻa e ʻaho ʻo Sihová.” (2 Pita 3:12) ʻEke hifo kiate koe: ‘ʻOku fakahaaʻi ʻi heʻeku founga moʻuí ʻoku ou mahinoʻi ʻetau panaki atu ki he ngataʻanga ʻo e fokotuʻutuʻu ko ení? ʻOku fakahaaʻi ʻi heʻeku ngaahi fili fekauʻaki mo e akó mo e ngāué ko e ngāue kia Sihová ʻa e meʻa mahuʻinga taha ʻi heʻeku moʻuí? ʻOku ou tui ʻe tokonaki ʻa Sihova maʻaku mo hoku fāmilí pe ʻoku ou hohaʻa maʻu pē fekauʻaki mo e ngaahi meʻa fakamatelié?’ Fakakaukau ki he fiefia ʻa Sihova ʻi heʻene vakai mai ʻoku tau feinga ke moʻui ʻo fehoanaki mo hono finangaló.​—Māt. 6:25-27, 33; Fil. 4:12, 13.

6. Ko e hā ʻoku fiemaʻu ke tau hokohoko atu ke faí?

⁶ ʻOku fiemaʻu ke tau sivisiviʻi maʻu pē ʻetau fakakaukaú pea muimuiʻi ia ʻaki hono fai ha fakatonutonu pē ʻoku fiemaʻu. Naʻe tala ange ʻe Paula ki he kau Kolinitoó: “Hanganaki siviʻi pe ʻoku mou ʻi he tuí; hanganaki fakamoʻoniʻi ʻa e tuʻunga totonu ʻoku mou ʻi aí.” (2 Kol. 13:5)  Ko e “ʻi he tuí” ʻoku kau ki ai ʻa e meʻa lahi ange ʻi he maʻu pē ʻa e ngaahi fakataha faka-Kalisitiané mo e kau ʻi he ngāue fakafaifekaú mei he taimi ki he taimi. ʻOku kau foki ki ai ʻetau fakakaukaú, hehemá mo ʻetau fakaueʻilotó. Ko ia ʻoku fiemaʻu ke tau hanganaki fakafoʻou hotau ʻatamaí ʻaki hono lau ʻa e Folofola ʻa e ʻOtuá, ako ke fakakaukau ʻo hangē ko ʻene fakakaukaú, pea fai leva ha meʻa pē ʻoku fiemaʻu ke fakatonutonu kitautolu ke fehoanaki mo e finangalo ʻo Sihová.​—1 Kol. 2:14-16.

7. Fakatatau ki he ʻEfesō 4:31, 32, ko e hā mo ha toe meʻa ʻoku fiemaʻu ke tau fai, pea ko e hā nai ʻe hoko ai eni ko ha polé?

⁷ Lau ʻa e ʻEfesō 4:31, 32. Tānaki atu ki hono fai ʻa e ngaahi liliu ʻi heʻetau fakakaukaú, ʻoku fiemaʻu ke tau “kofuʻaki ʻa e angaʻitangata foʻou.” (ʻEf. 4:24) ʻOku fiemaʻu ki ai ʻa e ngāue mei heʻetau tafaʻakí. ʻOku kau ʻi he ngaahi meʻa ko iá, ʻa e pau ke tau ngāue mālohi ke ikuʻi ʻa e ngaahi tōʻonga hangē ko e loto-kona fakalotokoví, ʻitá mo e lilí. Ko e hā nai ʻe hoko ai ia ko ha polé? Koeʻuhí ko e niʻihi ʻo e ngaahi tōʻonga ʻikai leleí ʻoku faiaka loloto. Ko e fakatātaá, ʻoku pehē ʻe he Tohi Tapú ko e kakai ʻe niʻihi ʻoku nau “hehema ki he ʻitá” pea “hehema ki he ʻita tōlilí.” (Pal. 29:22) Ko hono mapuleʻi ʻa e ngaahi tōʻonga kuo faiaka lolotó ʻoku ngalingali ʻe fiemaʻu ki ai ʻa e feinga hokohoko naʻa mo e hili ʻa e papitaisó, hangē ko ia ʻoku fakahaaʻi ʻi he hokosia hokó.

8-9. ʻOku anga-fēfē hono fakahaaʻi ʻi he hokosia ʻa Stephen ʻa e fiemaʻu ke tau hanganaki huʻi atu ʻa e angaʻitangata motuʻá?

⁸ Ko ha tokoua ko Stephen naʻe faingataʻa ke ne mapuleʻi ʻene ʻitá. “Naʻa mo e hili ʻeku papitaisó,” ko ʻene leá ia, “naʻe pau ke u hanganaki ngāue ki heʻeku ʻitá. Ko e fakatātaá, ʻi he taimi ʻe taha lolotonga ʻeku ʻalu mei he fale ki he falé ʻi he ngāue fakafaifekau faka-Kalisitiané, naʻá ku tuli ai ha tokotaha naʻá ne kaihaʻasi ʻa e letiō mei heʻeku kaá. ʻI heʻeku ofi ange kiate iá, naʻá ne lī ʻa e letioó kae lele. ʻI heʻeku talanoa ki he niʻihi kehe naʻa mau ngāué ʻa e founga naʻá ku maʻu mai ai ʻeku letioó, naʻe ʻeke mai ʻe ha mātuʻa ʻi he kulupú, ‘Stephen, ko e hā naʻá ke mei faí kapau naʻá ke maʻu ia?’ Naʻe ʻai au ʻe he fehuʻi ko iá ke u fakakaukau pea ueʻi au ke u hanganaki ngāue ki he fakamelinó.” b

⁹ Hangē ko ia ʻoku fakatātaaʻi ʻi he hokosia ʻa Stephen, ko ha tōʻonga ʻikai lelei ʻe lava ke ʻasi fakafokifā hake, naʻa mo e hili ʻetau fakakaukau kuo tau mapuleʻi iá. Kapau ʻe hoko ia kiate koe, ʻoua ʻe loto-siʻi pea ʻoua ʻe fakaʻosiʻaki kuó ke taʻelavameʻa ʻi he tuʻunga ko ha Kalisitiane. Naʻa mo e ʻapositolo ko Paulá naʻá ne fakahaaʻi: “ʻI he taimi ʻoku ou loto ai ke fai ʻa e meʻa ʻoku totonú, ʻoku ʻiate au ʻa e hehema ke fai ʻa e meʻa ʻoku koví.” (Loma 7:21-23) Ko e kotoa ʻo e kau Kalisitiane taʻehaohaoá kuo pau ke nau fekuki mo e ngaahi tōʻonga ʻikai lelei ʻoku toutou ʻasi hake ʻo hangē ko e efu mo e ʻuli ʻoku toutou hū mai ki hotau falé. ʻOku fiemaʻu ke tau hanganaki ngāue ke nofoʻaki maʻa. ʻE lava fēfē ke tau fai ia?

10. ʻE lava fēfē ke tau tauʻi ʻa e ngaahi tōʻonga koví? (1 Sione 5:14, 15)

¹⁰ Lotu kia Sihova fekauʻaki mo e tōʻonga ʻokú ke fāinga mo iá, ʻo falala pau te ne fanongo mai kiate koe pea tokoniʻi koe. (Lau ʻa e 1 Sione 5:14, 15.) Neongo heʻikai ke toʻo fakaemana atu ʻe Sihova ʻa e tōʻonga ko iá, ʻe lava ke ne fakaivimālohiʻi koe koeʻuhi ke ʻoua te ke ʻulutukua ki ai. (1 Pita 5:10) ʻI he taimi ní, ngāue ʻo fehoanaki mo hoʻo ngaahi lotú ʻaki ʻa e ʻikai ke fafangaʻi ʻa e ngaahi hehema ʻo e angaʻitangata motuʻá. Ko e fakatātaá, tokanga fekauʻaki mo e sio ʻi he ngaahi faiva, sio ʻi he ngaahi polokalama televīsone pe ko e lau ʻa e ngaahi talanoa ʻokú ne fakaʻaiʻai ʻa e ngaahi angaʻitangata ʻokú ke feinga ke toʻo atú. Pea ʻoua ʻe fakaʻatā ho ʻatamaí ke nōfoʻi ʻi he ngaahi holi taʻetotonú.​—Fil. 4:8; Kol. 3:2.

11. Ko e hā ʻa e ngaahi sitepu ʻe lava ke tau fou ai ke hanganaki kofuʻaki ʻa e angaʻitangata foʻoú?

 ¹¹ Neongo kuó ke huʻi atu ʻa e angaʻitangata motuʻá ʻoku mahuʻinga ke fakatupulekina ha angaʻitangata foʻou. ʻE lava fēfē ke ke fai iá? ʻAi ko hoʻo taumuʻá ia ke faʻifaʻitaki kia Sihova ʻi hoʻo ako fekauʻaki mo hono ngaahi ʻulungāngá. (ʻEf. 5:1, 2) Ko e fakatātaá, ʻi hoʻo lau ha talanoa Fakatohitapu ʻokú ne fakamamafaʻi ʻa e fakamolemole ʻa Sihová, ʻeke hifo, ʻʻOku ou fakamolemoleʻi ʻa e niʻihi kehé?’ ʻI hoʻo lau fekauʻaki mo e kaungāongoʻi ʻa Sihova ki he faʻahinga kuo nau tō ki he faingataʻá, ʻeke hifo, ʻʻOku ou maʻu ʻa e tokanga tatau maʻá e kaungātui ʻoku nau fiemaʻu tokoní, pea ʻoku ou fakahāhā ia ʻi heʻeku ngāué?’ Hanganaki fakafoʻou ʻa e anga hoʻo fakakaukaú ʻaki hono fakatupulekina ʻa e angaʻitangata foʻoú peá ke faʻa kātaki ʻi hoʻo fai peheé.

12. Naʻe anga-fēfē hokosia ʻe Stephen ʻa e mālohi fakaeliliu ʻo e Tohi Tapú?

¹² Ko Stephen, naʻe lave ki ai ki muʻá, naʻá ne fakatokangaʻi naʻe faai atu pē ʻo ne malava ke kofuʻaki ʻa e angaʻitangata foʻoú. ʻOkú ne pehē: “Talu mei heʻeku papitaisó, kuó u fehangahangai mo ha ngaahi tuʻunga fakatupu ʻita ʻaupito. Naʻá ku ako ke mavahe mei he kakai ʻoku nau feinga ke fakaʻitaʻi aú pe fakaleleiʻi ʻa e tuʻungá ʻi ha founga kehe. Ko e kakai tokolahi, kau ai hoku uaifí, kuo nau fakaongoongoleleiʻi au ʻi he anga ʻo ʻeku fakaleleiʻi ʻa e ngaahi tuʻunga ko ení. Naʻa mo au ʻoku ou ʻohovale ai! ʻOku ʻikai te u pehē ko e tupu pē meiate au ʻa e ngaahi liliu ko eni ʻi hoku angaʻitangatá. Ka, ʻoku ou tui ko e fakamoʻoni ia ki he mālohi fakaeliliu ʻo e Tohi Tapú.”

13. Ko e hā te ne tokoniʻi kitautolu ke fakatupulekina ʻa e ngaahi holi totonú? (Kalētia 5:16)

¹³ Lau ʻa e Kalētia 5:16. Ke tokoniʻi kitautolu ke ikuna ʻi he faitau ke fai ʻa e meʻa ʻoku totonú, ʻoku tokonaki nima-homo mai ʻe Sihova hono laumālie māʻoniʻoní. ʻI heʻetau ako ʻa e Folofola ʻa e ʻOtuá, ʻoku tau fakaʻatā ai kitautolu ke tākiekina ʻe he laumālie ko iá. ʻOku tau toe maʻu ʻa e laumālie māʻoniʻoní ʻi heʻetau maʻu ʻetau ngaahi fakatahá. ʻI he ngaahi fakatahataha faka-Kalisitiane ko iá, ʻoku lava ke tau fakamoleki ai ʻa e taimi mo hotau fanga tokouá mo e fanga tuofāfiné ʻa ia, hangē ko kitautolú, ʻoku nau feinga mālohi ke fai ʻa e meʻa ʻoku totonú, pea ʻoku fakalototoʻa ia. (Hep. 10:24, 25; 13:7) Pea ʻi he taimi ʻoku tau fakaofiofi ai kia Sihova ʻi he lotu tōtōivi pea kōlenga ke ne tokoniʻi kitautolu ʻi ha vaivaiʻanga ʻoku tau maʻu, te ne foaki mai ʻa hono laumālie māʻoniʻoní ke fakaivimālohiʻi kitautolu ke hanganaki faitau. Neongo ko e ngaahi ngāue ko ení heʻikai nai ke ne ʻai ke puli atu ʻa e ngaahi holi fehālaakí, ʻe tokoniʻi ai kitautolu ke talitekeʻi ʻa e holi ke fakatōliʻa ʻa e ngaahi holi ko iá. Hangē ko e lau ʻa e Kalētia 5:16, ko e faʻahinga ʻoku nau ʻaʻeva ʻi he laumālié “ʻe ʻikai ʻaupito te [nau] fakahoko ai ʻa e holi fakakakanó.”

14. Ko e hā ʻoku mahuʻinga ai ke hanganaki fakatupulekina ʻa e ngaahi holi totonú?

¹⁴ ʻI heʻetau fokotuʻu pē ha taimi-tēpile lelei ʻo e ngaahi ngāue fakalaumālié, ʻoku mātuʻaki mahuʻinga ke tau tauhi maʻu ʻa e taimi-tēpile ko iá pea hanganaki fakatupulekina ʻa e ngaahi holi totonú. Ko e hā hono ʻuhingá? Koeʻuhí ko e taha ʻi hotau ngaahi filí ʻoku ʻikai pē ke ne mohe. Ko e fili ko iá ko e fakatauele ke fai ʻa e meʻa ʻoku halá. Naʻa mo e hili ʻetau papitaisó te tau fakatokangaʻi nai ʻoku tau hehema ke fai ʻa e ngaahi meʻa tofu pē ʻoku totonu ke tau fakaʻehiʻehi mei aí, kau ai ʻa e pelepaʻangá, ngāuehalaʻaki ʻa e ʻolokaholó pe ko e mamata ʻi he ʻata fakalieliá. (ʻEf. 5:3, 4) ʻOku pehē ʻe ha kiʻi tokoua Kalisitiane: “Ko e taha ʻo e ngaahi meʻa faingataʻa taha kuó u fāinga mo iá ko ʻeku manako ʻi he kakai tangatá. Naʻá ku fakakaukau ko e ngaahi ongoʻi ko iá ʻe faai atu pē ʻo puli, ka ʻokú ne kei lōmekina pē au.” Ko e hā ʻe lava ke ne tokoniʻi koe kapau ʻoku fuʻu mālohi ha holi taʻetotonu?

15. Ko e hā ʻoku fakalototoʻa ai ke ʻiloʻi ko e ngaahi holi taʻetotonú ʻoku “anga-maheni ki ai ʻa e tangatá”? (Sio ki he fakatātaá.)

 ¹⁵ ʻI hoʻo fāinga mo ha holi taʻetotonu ʻa ia ʻoku hoko ko ha fili olopoto, manatuʻi ʻoku ʻikai te ke toko taha. ʻOku pehē ʻe he Tohi Tapú: “ʻOku ʻikai ha ʻahiʻahi kuo hoko mai kiate kimoutolu tuku kehe pē ʻa ia ʻoku anga-maheni ki ai ʻa e tangatá.” (1 Kol. 10:13a) ʻOku peheni hono fakalea ʻa e veesi ko ení ʻi ha liliu ʻe taha: “ʻOku ʻikai ha ʻahiʻahi ʻe aʻu mai kiate kimoutolu ʻa ia ʻoku anga-kehe ki he faʻahinga ʻo e tangatá.” Ko e lea ko iá naʻe fakahoko ki he kau tangata mo e kau fefine Kalisitiane ʻi Kolinitoó. Ko e niʻihi naʻa nau hoko ki muʻa ko e kau tono, kau fakasōtoma mo e kau faʻa konā. (1 Kol. 6:9-11) ʻOkú ke fakakaukau hili ʻenau papitaisó, naʻe ʻikai ʻaupito ke nau fāinga mo ha ngaahi holi taʻetotonu? Naʻe ʻikai ko e tuʻungá ia. Ko e moʻoni, ko e kau Kalisitiane pani kotoa kinautolu, ka naʻa nau kei taʻehaohaoa pē. ʻOku ʻikai ha veiveiua naʻe pau ke nau fāinga mo e ngaahi holi taʻetotonú mei he taimi ki he taimi. ʻOku totonu ke fakalototoʻa ia kiate kitautolu. Ko e hā hono ʻuhingá? Koeʻuhí ʻoku fakahaaʻi ai tatau ai pē pe ko e hā ʻa e holi taʻetotonu ʻokú ke faitau mo iá, kuo talitekeʻi ia ʻe ha tokotaha kehe. Ko e moʻoni, ʻe lava ke ke nofoʻaki “tuʻu maʻu ʻi he tuí, ʻi hono ʻiloʻi ko e faʻahinga faingataʻaʻia tatau pē ʻoku hokosia ʻe he haʻohaʻonga kotoa ʻo homou fanga tokouá.”​—1 Pita 5:9.

16. Ko e hā ʻa e tauhele ʻoku totonu ke tau fakaʻehiʻehi mei aí, pea ko e hā hono ʻuhingá?

¹⁶ Fakaʻehiʻehi mei he tauhele ʻo e fakakaukau heʻikai lava ʻe ha taha ia ʻo mahinoʻi ʻa e pole ʻokú ke fehangahangai mo iá. Ko e fakakaukau peheé ʻe lava ke ne taki atu koe ke fakamulituku ʻoku ʻikai pē ha ʻamanaki ia pea ʻoku ʻikai hao mālohi ke talitekeʻi ʻa e ngaahi holi taʻetotonú. ʻOku kehe ʻa e meʻa ia ʻoku tala mai ʻe he Tohi Tapú. ʻOku pehē ai: “Ko e ʻOtuá ʻoku faitōnunga, pea ʻe ʻikai te ne tuku ke ʻahiʻahiʻi kimoutolu ʻo fakalaka atu ia ʻi he meʻa ʻoku malava ke mou kātekiná, kae fakataha mo e ʻahiʻahí te ne ʻai foki mo ha  haoʻanga koeʻuhi ke mou malava ai ke kātakiʻi ia.” (1 Kol. 10:13e) Ko ia ai, neongo kapau ʻoku mālohi ha holi taʻetotonu, ʻe lava ke tau kātekina lavameʻa ia. ʻI he tokoni ʻa Sihová, ʻe lava ke tau fakaʻehiʻehi mei hono fakatōliʻa iá.

17. Neongo heʻikai nai malava ke tau taʻofi ʻa e ʻasi hake ʻa e ngaahi holi taʻetotonú, ko e hā ʻe lava ke tau mapuleʻí?

¹⁷ Manatuʻi maʻu pē eni: ʻI he tuʻunga ko e faʻahinga taʻehaohaoa ʻo e tangatá, heʻikai nai malava ke ke taʻofi ʻa e ngaahi holi taʻetotonú mei heʻene ʻasi haké. Ka ʻi heʻenau ʻasi haké, ʻe lava ke ke talitekeʻi leva ia, ʻo hangē ko ia naʻe fai ʻe Siosifá ʻi he taimi naʻá ne hola vave ai mei he uaifi ʻo Pōtifá. (Sēn. 39:12) ʻOku ʻikai fiemaʻu ia ke ke fakatōliʻa ʻa e ngaahi holi taʻetotonú!

18-19. Ko e hā ʻa e ngaahi fehuʻi ʻe lava ke tau ʻeke hifo kiate kitautolu ʻi heʻetau feinga ko ia ke fakafoʻou hotau ʻatamaí?

¹⁸ Ko hono fakafoʻou hotau ʻatamaí ʻoku kau ki ai ha feinga hokohoko ke ʻai ʻetau fakakaukaú mo e ngaahi tōʻongá ke fehoanaki mo e finangalo ʻo Sihová. Ke fai iá, sivisiviʻi maʻu pē koe pea ʻeke hifo: ‘ʻOku ou tōʻonga ʻi ha founga ʻoku fakahaaʻi ai ʻoku ou lāuʻilo ki he fakavavevave ʻo e taimi ʻoku tau moʻui aí? ʻOku ou fai ha fakalakalaka ʻi hono kofuʻaki ʻa e angaʻitangata foʻoú? ʻOku ou fakaʻatā ʻa e laumālie ʻo Sihová ke ne tataki ʻeku moʻuí koeʻuhí ke u lava ʻo talitekeʻi ʻa e holi ke fakatōliʻa ʻa e ngaahi holi fakakakanó?’

¹⁹ ʻI hoʻo sivisiviʻi koé, vakai ki hoʻo fakalakalaká, kae ʻikai ko e haohaoá. Kapau ʻokú ke vakai ki ha tafaʻaki ke fakaleleiʻi, ʻoua ʻe loto-siʻí. ʻI hono kehé, muimui ʻi he ekinaki ʻa e Filipai 3:16: “Ko e tuʻunga ko ia kuo aʻu ki ai ʻetau fakalakalaká, tuku ke hokohoko atu ʻetau ʻaʻeva taau ʻi he ʻalunga tatau pē ko iá.” ʻI hoʻo fai iá, hoko ʻo fakapapauʻi ʻe tāpuakiʻi ʻe Sihova ʻa hoʻo ngaahi feinga ke hanganaki fakafoʻou ho ʻatamaí.