1. Ko e hā ʻoku ʻikai falala ai ʻa e tokolahi ʻi he ʻahó ni ki he Tohi Tapú?

 KO E kakai tokolahi ʻi he ʻahó ni ʻoku ʻikai ke nau ʻiloʻi pe ko hai ʻe lava ke nau falala ki aí. ʻOku nau fifili pe ko e kakai ʻoku nau hanga ki aí​—ʻa e kau politikí, faisaienisí, mo e kau pisinisí​—ʻoku nau tokanga moʻoni ange ki heʻenau leleí. ʻIkai ko ia pē, ʻoku ʻikai ke nau fakaʻapaʻapaʻi lahi ʻa e haʻa faifekau ʻo e Puleʻanga-Haʻa-Kalisitiané. Ko ia ʻoku ʻikai ha ofo ʻi heʻenau tui veiveiua ki he tohi ʻoku taku ʻe he kau taki lotu ko iá ʻoku nau muimui ki aí​—ʻa e Tohi Tapú.

2. ʻI he fehoanaki mo e Saame 119:160, ko e hā kuo pau ke tau falala pau ki aí?

² ʻI he tuʻunga ko e kau sevāniti ʻa Sihova, ʻoku tau falala pau ko ia ʻa e “ʻOtua ʻo e moʻoní” pea ʻokú ne fiemaʻu maʻu pē ʻa e lelei tahá maʻa kitautolu. (Saame 31:5; ʻAi. 48:17) ʻOku tau ʻiloʻi ʻe lava ke tau falala ki he meʻa ʻoku tau lau ʻi he Tohi Tapú. ʻOku tau tui ko e ‘uho tonu ʻo e folofola ʻa e ʻOtuá ʻoku moʻoni.’ b (Lau ʻa e Saame 119:160.) ʻOku tau loto-tatau mo e meʻa naʻe tohi ʻe ha mataotao Tohi Tapu ʻe taha: “ʻOku ʻikai ha hala ʻe taha pe ko e tō kelekele ha meʻa ʻe taha kuo leaʻaki ʻe he ʻOtuá. Ko e kakai ʻa e ʻOtuá ʻe lava ke nau falala ki he meʻa ʻokú ne leaʻakí koeʻuhí ʻoku nau falala ki he ʻOtua naʻá ne leaʻaki iá.”

3. Ko e hā te tau lāulea ki ai ʻi he kupu ko ení?

³ ʻE lava fēfē ke tau tokoniʻi ʻa e niʻihi kehé ke nau maʻu ʻa e falala pau tatau ʻoku tau maʻu ki he Folofola ʻa e ʻOtuá? Tau fakakaukauloto angé ki ha ʻuhinga ʻe tolu ʻe lava ke tau falala ai ki he Tohi Tapú. Te tau lāulea ki he tonu mātē ʻa e potutohí, ko hono fakahoko ʻo e kikite ʻi he Tohi Tapú, pea mo e mālohi ʻo e Tohi Tapú ke liliu ʻa e moʻuí.

4. Ko e hā ʻoku veiveiua ai ʻa e kakai ʻe niʻihi fekauʻaki mo e tonu mātē ʻa e Tohi Tapú?

⁴ Naʻe ngāueʻaki ʻe Sihova ko e ʻOtuá ha kau tangata faitōnunga ʻe toko 40 nai ke hiki ʻa e ngaahi tohi ʻo e Tohi Tapú. Neongo ia, ʻoku ʻikai ha muʻaki ngaahi tatau tohinima kuo hao mai ki hotau taimí. Ko e tatau pē ʻoku tau maʻú ko e hiki-tatau mei he ngaahi tatau. ʻOku fakatupunga heni ʻa e kakai ʻe niʻihi ke nau fifili pe ko e meʻa ʻoku nau lau ʻi he Tohi Tapú he ʻaho ní ʻoku tapua tonu mātē atu ai ʻa e potutohí ʻo hangē ko hono muʻaki hikí. Kuó ke fifili pe ʻe lava fēfē ke tau fakapapauʻi ia?

5. Ko e hā naʻe kau ki hono hiki-tatau ʻo e Ngaahi Konga Tohi Tapu Faka-Hepeluú? (Sio ki he tā ʻi he takafí.)

⁵ Koeʻuhi ke fakatolonga mai ʻe Sihova ʻene pōpoaki fakamānavaʻí, naʻá ne tuʻutuʻuni ke hiki hano ngaahi tatau. Naʻá ne tala ki he ngaahi tuʻi ʻo ʻIsilelí ke nau hiki maʻanautolu ha ngaahi tatau ʻo e Lao kuo tohí, pea naʻá ne fakanofo ʻa e kau Līvaí ke akoʻi ʻa e Lao ko iá ki he kakaí. (Teu. 17:18; 31:24-26; Nehe. 8:7) Hili hono ʻave fakamālohi ʻa e kau Siú ki Pāpiloné, naʻe ʻi ai ha kulupu ʻo e kau hiki-tatau pōtoʻi naʻe kamata ke nau hiki ha ngaahi tatau ʻo e Ngaahi Konga Tohi Tapu Faka-Hepeluú. (ʻĒsela 7:6, fkm. ʻi lalo) Ko e kau tangata ko ení naʻa nau fakamākukanga. Naʻe faai atu pē, ʻo kamata ke lau ʻe he kau hiki-tataú ʻo ʻikai ngata pē ʻi he ngaahi foʻi leá kae aʻu ki he ngaahi mataʻitohí koeʻuhí ke fakapapauʻi naʻe hiki tonu mātē ʻa e meʻa kotoa. Neongo ia, koeʻuhi ko e taʻehaohaoá, naʻe ʻasi ha fanga kiʻi fehālaaki ʻi he Tohi Tapú. Kae kehe, naʻe lahi ʻa e ngaahi tatau naʻe hikí, ko ia ko e ngaahi fehālaaki ko iá naʻe lava ke ʻiloʻi ki mui ai. Anga-fēfē?

6. ʻE lava fēfē ke ʻiloʻi ʻa e fehālaaki ʻi he ngaahi hiki-tatau ʻo e Tohi Tapú?

⁶ Ko e kau mataotao ʻi onopōní ʻoku nau maʻu ha founga alafalalaʻanga ke ʻiloʻi ai ʻa e ngaahi fehālaaki naʻe fai ʻe he faʻahinga naʻa nau hiki-tatau ʻa e Tohi Tapú. Ke fakatātaaʻí: Tau pehē pē ʻoku vaheʻi ki ha kau tangata ʻe toko 100 ke nau hiki-tatau ha peesi ʻo ha fakamatala. Ko e taha ʻo e kau tangatá ʻoku ʻi ai ha kiʻi fehālaaki ʻi heʻene hiki ʻene tataú. Ko e founga ʻe taha ʻe lava ke tau ʻiloʻi ai ʻa e fehālaaki ko iá ko hono fakahoa ʻene tataú mo e toengá. ʻI he tuʻunga meimei tatau, ʻi hono fakahoa ha ngaahi tatau tohinima ʻo e Tohi Tapú, ʻoku malava ai ki he kau mataotaó ke nau ʻiloʻi ha ngaahi fehālaaki pe ko ha meʻa nai naʻe toʻo ʻe ha tokotaha hiki-tatau.

7. Naʻe tonu mātē fēfē ʻa e meʻa naʻe hiki ʻe he kau hiki-tatau tokolahi ʻo e Tohi Tapú?

⁷ Ko e faʻahinga naʻa nau hiki-tatau ʻa e ngaahi tatau tohinima ʻo e Tohi Tapú naʻa nau feinga lahi ke fai tonu mātē ia. Fakakaukau ki ha fakatātā ʻoku fakamoʻoniʻi ai ʻa e poini ko ení. Ko e tatau tohinima kakato motuʻa taha ʻo e Ngaahi Konga Tohi Tapu Faka-Hepeluú ʻoku mei he 1008 pe 1009 T.S. Naʻe ui ia ko e Leningrad Codex. Kae kehe, ki muí ni mai, naʻe maʻu ha ngaahi tatau tohinima mo e ngaahi kongokonga Tohi Tapu ʻoku nau motuʻa ange ʻaki ʻa e taʻu ʻe 1,000 ʻi he Leningrad Codex. ʻE fakakaukau nai ha taha ʻi he hili hono toutou hiki-tatau ʻa e ngaahi tatau tohinima ko iá ʻi ha vahaʻa taimi ʻo e taʻu ʻe 1,000, ko e fakamatala ʻi he Leningrad Codex ʻe ʻikai ke fuʻu faitatau mo e fakamatala ʻi he ngaahi tatau tohinima motuʻa ange ko iá. Neongo ia, ʻoku ʻikai ko e meʻa ia naʻe hokó. Ko e kau mataotao naʻa nau fakahoa ʻa e ngaahi tatau tohinima ki muʻa angé mo e ngaahi tatau tohinima ki muí ni maí naʻa nau ʻiloʻi neongo naʻe ʻi ai ʻa e fanga kiʻi faikehekehe siʻisiʻi ʻi he fakaleá, ko e kakano ʻo e pōpoaki ʻo e Tohi Tapú naʻe fakatolonga tonu mātē mai.

8. ʻOku fēfē ʻa e Ngaahi Konga Tohi Tapu Faka-Kalisi Kalisitiané ʻi hono fakahoa mo e ngaahi fakamatala ʻi he ngaahi tatau motuʻa fakamāmaní?

⁸ Ko e muʻaki kau Kalisitiané naʻa nau muimui ki he meʻa naʻe fai ʻe he kau hiki-tatau ʻo e Ngaahi Konga Tohi Tapu Faka-Hepeluú. Naʻa nau hiki-tatau fakamātoato ʻa e ngaahi tatau ʻo e ʻū tohi ʻe 27 ʻo e Ngaahi Konga Tohi Tapu Faka-Kalisí, ʻa ia naʻa nau ngāueʻaki ʻi heʻenau ngaahi  fakatahá mo ʻenau ngāue fakamalangá. Hili hono fakahoa ʻa e ngaahi tatau tohinima ʻo e Ngaahi Konga Tohi Tapu Faka-Kalisi ʻa ia naʻe hao maí mo ha ngaahi tatau tohinima kehe mei he vahaʻa taimi tatau, ʻoku pehē ʻe ha mataotao ʻe taha: “ʻI he tuʻunga fakalūkufuá, ʻoku lahi ange ʻa e [ngaahi tatau ʻo e Ngaahi Konga Tohi Tapu Faka-Kalisí], . . . pea ʻoku nau kakato ange.” Ko e tohi Anatomy of the New Testament ʻoku pehē ai: “ʻOku lava ke falala pau ha taha ko e meʻa ʻoku tau lau ʻi ha liliu alafalalaʻanga [ʻo e Ngaahi Konga Tohi Tapu Faka-Kalisí] ʻokú ne fakafofongaʻi moʻoni ʻa e meʻa naʻe hiki ʻe he kau faʻutohi ʻi he kuonga muʻá.”

9. Fakatatau ki he ʻAisea 40:8, ko e hā ʻoku fakamoʻoniʻi fekauʻaki mo e pōpoaki ʻo e Tohi Tapú?

⁹ Ko e ngāue fakamākukanga ʻa e kau hiki-tatau tokolahi ʻi he laui senituli kuo tokoni ia ki he tonu mātē ʻa e Tohi Tapu ʻoku tau lau mo ako ʻi he ʻaho ní. c ʻOku ʻikai ha veiveiua, ko Sihova ia naʻá ne fakapapauʻi ko ʻene pōpoaki ki he faʻahinga ʻo e tangatá ʻe fakatolonga tonu mātē mai. (Lau ʻa e ʻAisea 40:8.) Ko e moʻoni, ʻe taukaveʻi nai ʻe he niʻihi ʻoku ʻikai ʻuhinga pē hono fakatolonga mai ʻa e pōpoaki ʻo e Tohi Tapú naʻe fakamānavaʻi ia ʻe he ʻOtuá. Ko ia tau lāulea angé he taimí ni ki he fakamoʻoni ʻe niʻihi naʻe fakamānavaʻi ʻa e Tohi Tapú.

10. ʻOmai ha fakatātā ʻo ha kikite naʻe fakahoko ʻoku fakamoʻoniʻi ai ʻa e lea ʻi he 2 Pita 1:21. (Sio ki he fakatātaá.)

¹⁰ ʻOku maʻu ʻi he Tohi Tapú ʻa e ngaahi kikite lahi naʻe fakahoko, ko e niʻihi naʻe fakahoko ʻi he taʻu ʻe lauingeau hili hono hikí. ʻOku fakapapauʻi ʻi he hisitōliá ko e ngaahi kikite ko ení naʻe hoko moʻoni. ʻOku ʻikai ke tau ofo heni koeʻuhí ʻoku tau ʻiloʻi ko e Faʻutohi ʻo e kikite ʻi he Tohi Tapú ko Sihova. (Lau ʻa e 2 Pita 1:21.) Fakakaukau atu ki he ngaahi kikite fekauʻaki mo e tō ʻa Pāpilone ʻo e kuonga muʻá. ʻI he senituli hono valu K.M., ko e palōfita ko ʻAiseá naʻe fakamānavaʻi ke ne tomuʻa tala ko e kolo mālohi ʻo Pāpilone ʻi he taimi ko iá ʻe hamu. Naʻe aʻu ʻo ne ʻomai ʻa e hingoa ʻo hono tokotaha ikuná, ko Kōlesi, pea tomuʻa tala tonu mātē ʻa e founga ʻe hamu ai ʻa e koló. (ʻAi. 44:27–45:2) Naʻe toe kikiteʻi ʻe ʻAisea  ko Pāpilone ʻe faai atu pē ʻo fakaʻauha pea hoko ʻo maomaonganoa. (‘Ai. 13:19, 20) Ko e meʻa tofu pē ia naʻe hokó. Naʻe ikunaʻi ʻe he kau Mītiá mo e kau Pēsiá ʻa Pāpilone ʻi he 539 K.M., pea ko e feituʻu naʻe tuʻu ai ʻa e kolo lahi ko ení ʻoku hoko he taimí ni ko ha fokotuʻunga maumau.​—Sio ki he vitiō Naʻe Tomuʻa Tala ʻe he Tohi Tapú ʻa e Tō ʻa Pāpiloné ʻi he tatau fakaʻilekitulōnika ʻo e tohi Fiefia ʻi he Moʻuí ʻo Taʻengata!, lēsoni 03 poini 5.

11. Fakamatalaʻi ʻa e anga hono fakahoko ʻo e Taniela 2:41-43 ʻi he ʻaho ní.

¹¹ Ko hono fakahoko ʻo e kikite ʻi he Tohi Tapú ʻoku ʻikai ko ha meʻa pē ia naʻe hoko ʻi he kuohilí; ʻoku tau vakai ki hono fakahoko ʻo e ngaahi kikité ʻi he ʻahó ni. Ko e fakatātaá, fakakaukau ki he fakaofo hono fakahoko ʻo e kikite ʻa Taniela fekauʻaki mo e Puleʻanga Hau ʻi Māmani ko Pilitānia-ʻAmeliká. (Lau ʻa e Taniela 2:41-43.) Naʻe tomuʻa tala tonu mātē ʻi he kikite ko iá ko e ongo puleʻanga hau ʻi māmani ko ení ʻe “mālohi ʻa hono konga” hangē ha ukameá pea ʻe “vaivai ʻa hono konga” hangē ko e ʻumeá. Kuo hoko moʻoni eni. Ko Pilitānia mo ʻAmelika kuó na fakahāhā ʻa e mālohi hangē ha ukameá, ʻi heʻena fakahoko ha ngafa mahuʻinga ʻi hono ikunaʻi ʻa e ongo Tau ʻe Ua ʻa Māmaní pea hokohoko atu ke maʻu ha kau tau mālohi lahi. Neongo ia, ko hona mālohí kuo fakavaivaiʻi ia ʻe he kakai ʻi hona malumalú, ʻa ia ʻoku nau tuʻu hake ke taukaveʻi ʻenau totonú fakafou ʻi he ngaahi kemipeini ki he totonu ʻa e kau ngāué mo e totonu ʻa e tangatá pea mo e ngaahi ngaʻunu ki he tauʻatāiná. Ko ha mataotao ʻi he politikí naʻá ne pehē: “ʻOku ʻikai ha fonua fakatemokalati ʻi onopooni ʻe māvahevahe ange mo fakameleʻi fakapolitikale ka ko ʻAmelika.” Pea ko Pilitānia, ʻa e konga ʻe taha ʻo e hau ʻi māmani ko ení, kuo tautefito ʻene māvahevahé ʻi he ngaahi taʻu ki muí ni maí koeʻuhi ko e ʻikai ke nau felotoi ki he ngaahi vā ʻoku totonu ke nau maʻu mo e ngaahi fonua ʻi he ʻIunioni ʻIulopé. Ko e ngaahi māvahevahe ko ení kuo nau ʻai ke meimei taʻemalava ki he Puleʻanga Hau ʻi Māmani ko Pilitānia-ʻAmeliká ke ngāue lelei.

12. Ko e hā ʻoku fakapapauʻi mai ʻe he kikite ʻi he Tohi Tapú?

¹² Ko e ngaahi kikite lahi ʻi he Tohi Tapú ʻa ia kuo ʻosi fakahokó ʻokú ne fakaivimālohiʻi ʻetau falala pau ki he alafalalaʻanga ko ia ʻa e ngaahi talaʻofa ʻa e ʻOtuá ʻi he kahaʻú. ʻOku tau ongoʻi ʻo hangē ko e tokotaha-tohi-sāmé ʻa ia naʻá ne lotu kia Sihova: “ʻOku ou holi ki hoʻo fakamoʻuí, he ko hoʻo folofolá ʻa hoku ʻamanakiʻangá.” (Saame 119:81) Fakafou ʻi he ngaahi peesi ʻo e Tohi Tapú, kuo ʻomai anga-lelei ʻe Sihova “ha kahaʻu pea mo ha ʻamanaki.” (Sel. 29:11) Ko ʻetau ʻamanaki ki he kahaʻú ʻoku makatuʻunga ia ʻo ʻikai ʻi he ngaahi feinga ʻa e tangatá, ka ʻi he ngaahi talaʻofa ʻa Sihová. ʻOfa ke hokohoko atu ʻetau langa hake ʻetau falala ki he Folofola ʻa e ʻOtuá ʻaki ʻa e hoko ko e kau ako tōtōivi ʻo e kikite ʻi he Tohi Tapú.

13. Fakatatau ki he Saame 119:66, 138, ko e hā ʻa e fakamoʻoni ʻe taha ʻo e alafalalaʻanga ʻa e Tohi Tapú?

¹³ Ko ha fakamoʻoni ʻe taha ʻe lava ke tau falala ai ki he Tohi Tapú, ko e fakakaukau ki he ngaahi ola lelei ʻoku hokosia ʻe he kakaí ʻi heʻenau muimui ki heʻene faleʻí. (Lau ʻa e Saame 119:66, 138.) Ko e fakatātaá, ko e ngaahi hoa mali naʻa nau meimei veté kuo nau fakataha fiefia he taimí ni. ʻOku fiefia ʻenau fānaú ʻi hono ʻohake ʻi ha ʻatimosifia anga-ʻofa ʻo ha ʻapi Kalisitiane, ʻa ia ʻoku nau ongoʻi malu mo ʻofaʻi ai kinautolu.​—ʻEf. 5:22-29.

14. Lave ki ha fakatātā ʻoku fakahaaʻi ai ko hono ngāueʻaki ʻa e moʻoni Fakatohitapú ʻokú ne liliu ʻa e kakaí ko ha kakai lelei ange.

¹⁴ ʻI hono ngāueʻaki ʻa e faleʻi fakapotopoto ʻa e Tohi Tapú, naʻa mo e kau faihia fakatuʻutāmakí kuo nau liliu fakaʻaufuli. Fakakaukau ki he anga hono tākiekina ʻe he faleʻi ʻa e Tohi Tapú ha tokotaha ngāue pōpula ko Jack. d Naʻá ne  hoko ko ha tokotaha faihia fakamālohi, ʻo ʻiloʻi ia ko e taha ʻo e kau pōpula fakatuʻutāmaki taha ʻoku tautea maté. Ka naʻe kau ʻa Jack ʻi ha ako Tohi Tapu. Ko e anga-lelei naʻe fakahāhā ʻe he fanga tokoua naʻa nau fakahoko ʻa e akó naʻe maongo loloto kiate ia, pea naʻá ne kamata foki ke ako. ʻI heʻene ngāueʻaki ʻa e moʻoni ʻo e Tohi Tapú ʻi heʻene moʻuí, ko ʻene tōʻongá pea naʻa mo hono angaʻitangatá naʻe kamata ke liliu. ʻI he faai atu ʻa e taimí, naʻe taau ʻa Jack ke hoko ko ha tokotaha malanga teʻeki papitaiso peá ne hoko ʻo papitaiso. Naʻá ne malanga faivelenga ki hono kaungāpōpulá fekauʻaki mo e Puleʻanga ʻo e ʻOtuá pea tokoniʻi ha toko fā ʻo kinautolu ke ako ʻa e moʻoní. ʻI he aʻu ki he ʻaho ke fakahoko ai ʻa e tautea mate ʻo Jack, naʻá ne ʻosi liliu fakaʻaufuli. Naʻe pehē ʻe he taha ʻo ʻene kau loeá: “Ko Jack ʻoku ʻikai ke toe tatau ia mo e tokotaha naʻá ku ʻiloʻi ʻi he taʻu ʻe 20 kuohilí. Ko e ngaahi akonaki ʻa e Kau Fakamoʻoni ʻa Sihová kuó ne liliu ʻene moʻuí.” Neongo naʻe fakahoko pē ʻa e tautea mate ʻo Jack, ko ʻene faʻifaʻitakiʻangá ʻoku fakamamafaʻi moʻoni ai ʻoku lava ke tau falala ki he Folofola ʻa e ʻOtuá pea ʻokú ne maʻu ʻa e mālohi ke liliu ʻa e kakaí ke nau hoko ko ha kakai lelei ange.​—ʻAi. 11:6-9.

15. ʻOku anga-fēfē hono fakafaikehekeheʻi ʻa e kakai ʻa Sihová ʻi he ʻahó ni ʻi hono ngāueʻaki ʻa e moʻoni mei he Tohi Tapú? (Sio ki he fakatātaá.)

¹⁵ Koeʻuhi ko hono ngāueʻaki ʻe he kakai ʻa Sihová ʻa e moʻoni mei he Tohi Tapú, ʻoku nau hoko ai ʻo fāʻūtaha. (Sione 13:35; 1 Kol. 1:10) Ko ʻetau melinó mo e fāʻūtahá ʻoku tautefito ʻene hā mahinó ʻi hono fakahoa ki he māvahevahe fakapolitikale, fakamatakali mo e fakasōsiale ʻi he māmaní. Ko e vakai ki he fāʻūtaha ʻi he haʻohaʻonga ʻo e kakai ʻa Sihová naʻe maongo lahi ki ha kiʻi talavou ko Jean. Naʻá ne tupu hake ʻi ha fonua ʻi ʻAfilika. ʻI he mapuna hake ʻa e tau fakalotofonuá, naʻá ne hū ki he sōtiá ka ki mui ai naʻá ne hola ki ha fonua kaungāʻapi. Naʻá ne fetaulaki ai mo e Kau Fakamoʻoni ʻa Sihová. ʻOku pehē ʻe Jean: “Naʻá ku ako ko e kau muimui ʻo e lotu moʻoní ʻoku ʻikai ke nau kau ʻi he ngaahi meʻa fakapolitikalé pea ʻoku ʻikai ke nau māvahevahe. ʻI hono kehé, ʻoku nau feʻofaʻaki.” ʻOkú ne toe pehē: “Naʻá ku tukupā ʻeku moʻuí ke maluʻi ha fonua. Ka ʻi heʻeku ako ʻa e moʻoni mei he  Tohi Tapú, naʻe ueʻi ai au ke u fakatapui ʻeku moʻuí kia Sihova.” Naʻe liliu fakaʻaufuli ʻa Jean. ʻI he ʻikai ke faitau mo e kakai mei ha puipuituʻa kehe, ʻokú ne vahevahe he taimí ni ʻa e moʻoni fakafāʻūtaha mei he Tohi Tapú ki he tokotaha kotoa ʻokú ne fetaulaki mo iá. Ko e mātuʻaki ʻaonga ko ia ʻa e faleʻi ʻa e Tohi Tapú ki he kakai mei he ngaahi puipuituʻa kehekehé ko ha fakamoʻoni mālohi ia ʻoku lava ke tau falala ki he Folofola ʻa e ʻOtuá.

16. Ko e hā ʻoku mātuʻaki mahuʻinga ai ke fakaivimālohiʻi ʻetau falala pau ki he Folofola ʻa e ʻOtuá?

¹⁶ ʻI he ʻalu ke toe kovi ange ʻa e māmani ko ení, ko ʻetau falala pau ki he moʻoní ʻe ʻahiʻahiʻi. ʻE feinga nai ʻa e kakaí ke tō ʻa e veiveiuá ʻi hotau ʻatamaí​—ʻa e veiveiua fekauʻaki mo e moʻoni ʻa e Tohi Tapú pe kuo fakanofo ʻe Sihova ʻa e tamaioʻeiki anga-tonu mo potó ke tataki ʻene kau lotú ʻi he ʻahó ni. Ka ʻo kapau ʻoku tau falala pau ko e Folofola ʻa Sihová ʻoku moʻoni maʻu pē, ʻe malava ai ke tau talitekeʻi ʻa hono ʻohofi ko ia ʻetau tuí. Te tau ‘fakapapau ke talangofua ki he ngaahi tuʻutuʻuni ʻa Sihová ʻi he taimi kotoa pē, ʻo aʻu ki he ikuʻangá.’ (Saame 119:112) “ʻE ʻikai [te tau] mā” ke tala ki he niʻihi kehé ʻa e moʻoní pea fakalototoʻaʻi kinautolu ke moʻui ʻo fehoanaki mo ia. (Saame 119:46) Pea ʻe malava ke tau kātekina ʻa e ngaahi tuʻunga faingataʻa tahá, kau ai ʻa e fakatangá, “ʻi he kātaki mo e fiefia.”​—Kol. 1:11; Saame 119:143, 157.

17. Ko e hā ʻe fakamanatu mai ʻe heʻetau konga tohi fakataʻú?

¹⁷ He fakamālō ē ko kitautolu ʻi hono fakaeʻa mai ʻe Sihova ʻa e moʻoní! Ko e moʻoni ko iá ʻokú ne ʻai ke tau tuʻu maʻu, ʻo ʻomai kiate kitautolu ha taumuʻa pau pea mo ha tataki māʻalaʻala ʻi ha māmani ʻoku fakautuutu ai ʻa e veiveiuá mo e māveuveú. ʻOku tokonaki mai ai ʻa e ʻamanaki ki ha kahaʻu lelei ange ʻi he malumalu ʻo e pule ʻa e Puleʻanga ʻo e ʻOtuá. Fakatauange ke tokoniʻi kitautolu ʻe heʻetau konga tohi fakataʻu ki he 2023 ke tau tuʻu maʻu ʻi heʻetau tuipau ko e kotoa ʻo e Folofola ʻa e ʻOtuá​—ʻa hono uhó tonu​—ʻoku moʻoni!​—Saame 119:160.