1-2. Ko e hā ʻa e ngaahi pole ʻoku fehangahangai nai mo e kau sevāniti faitōnunga ʻa Sihová?

 KO E ngaahi meʻa fakamamahí ʻe lava ke ne liliu fakafokifā ʻetau moʻuí. Ko e fakatātaá, ko ha tokoua faitōnunga ko Luis a naʻá ne maʻu ha kalasi ʻo e kanisaá ʻoku hāhāmolofia ʻene ʻasí. Naʻe tala ange ʻe he toketaá kiate ia ʻoku toe pē ha laui māhina peá ne mate. Ko Monika mo hono husepānití naʻá na femoʻuekina ʻi he ngaahi ngāue fakalaumālié. ʻI he ʻaho leva ʻe taha, naʻe ʻiloʻi ʻe Monika ko hono husepānití, ʻa ia ko ha mātuʻa, naʻá ne moʻui lōua ʻi ha laui taʻu. Ko Olivia, ko ha tuofefine teʻeki mali, naʻe pau ke ne mavahe mei hono ʻapí koeʻuhí naʻe ofi mai ha afā mālohi. ʻI heʻene fokí, naʻá ne ʻiloʻi kuo maumauʻi ʻe he afaá hono falé. ʻI ha kiʻi taimi nounou, ko e moʻui ʻa e faʻahinga tāutaha ko ení naʻe liliu fakaʻaufuli. Kuó ke maʻu ha hokosia tatau ʻo hangē ko kinautolú? Kuó ke fehangahangai mo ha meʻa naʻe hoko ʻo ne liliu fakafokifā hoʻo moʻuí?

² ʻI he tuʻunga ko e kau sevāniti faitōnunga ʻa Sihova, ʻoku tau fehangahangai mo e ngaahi faingataʻa mo e mahamahaki ʻa ia ʻoku anga-maheni ki he faʻahinga kotoa ʻo e tangatá. Te tau toe kātekina nai ʻa e fakafepaki pe fakatanga mei he faʻahinga ʻoku nau fehiʻa ʻi he kakai ʻa e ʻOtuá. Ko e moʻoni heʻikai maluʻi kitautolu ʻe Sihova mei he ngaahi faingataʻa peheé, ka ʻokú ne talaʻofa te ne tokoniʻi kitautolu. (ʻAi. 41:10) ʻI heʻene tokoní, ʻe lava ke tau tauhi maʻu ʻetau fiefiá, fai ʻa e ngaahi fili lelei, pea nofoʻaki mateaki kiate ia naʻa mo e ngaahi tuʻunga faingataʻa tahá. ʻI he kupu ko ení, te tau sivisiviʻi ai ʻa e founga ʻe fā ʻoku tokoniʻi ai kitautolu ʻe Sihova lolotonga ʻa e ngaahi taimi kaupōʻuli ʻi heʻetau moʻuí. Te tau toe lāulea  foki ki he meʻa ʻoku fiemaʻu ke tau fai ke maʻu ʻaonga ai mei he tokoni ʻokú ne tokonaki maí.

ʻE MALUʻI KOE ʻE SIHOVA

3. ʻI heʻetau foua ha meʻa fakamamahi, ko e hā ʻe faingataʻa nai ke tau faí?

³ Ko e polé. ʻI heʻetau hokosia ha meʻa fakamamahi, ʻe faingataʻa nai ke tau fakakaukau fakalelei pea fai ʻa e ngaahi filí. Ko e hā hono ʻuhingá? ʻOku tau hokosia nai ha mamahi lahi ʻi hotau lotó. ʻOku lōmekina nai ʻetau fakakaukaú ʻi he loto-moʻuá. Te tau ongoʻi nai ʻoku tau hē holo ʻi ha vaotā ʻi he fakapoʻulilōlō, ʻo ʻikai fakapapauʻi pe ko fē te tau ʻalu ki aí. Fakatokangaʻi ʻa e anga ʻo e ongoʻi ʻa e ongo tuofāfine naʻe lave ki ai ki muʻá fekauʻaki mo e ngaahi ʻahiʻahi naʻá na fehangahangai mo iá. ʻOku pehē ʻe Olivia: “Hili hono haveki ʻe he afaá hoku ʻapí, naʻá ku ongoʻi tuēnoa mo loto-mafasia moʻoni.” ʻOku pehē ʻe Monika fekauʻaki mo e lavaki ʻa hono husepānití: “Ko e anga ʻeku ongoʻí naʻe fakalaka atu ia ʻi he loto-mamahí. Naʻá ku ongoʻi loto-mafesi moʻoni. Naʻe ʻikai ke u ʻilo ʻa e founga ke ngāue ai ʻo hangē ko e tuʻunga anga-mahení. Naʻe taʻeʻamanekina ʻa e meʻa naʻe hoko kiate aú.” ʻOku anga-fēfē talaʻofa ʻa Sihova te ne tokoniʻi kitautolu ʻi he taimi ʻoku tau loto-mafasia aí?

4. Fakatatau ki he Filipai 4:​6, 7, ko e hā ʻoku talaʻofa mai ʻe Sihova kiate kitautolú?

⁴ Meʻa ʻe fai ʻe Sihová. ʻOkú ne talaʻofa te ne ʻomai ʻa e meʻa ʻoku ui ʻe he Tohi Tapú “ko e nonga ʻa e ʻOtuá.” (Lau ʻa e Filipai 4:​6, 7.) ʻOku ʻuhinga eni ki he nonga ʻo e ʻatamaí mo e lotó ʻa ia ʻoku tau hokosia mei hono maʻu ʻa e vahaʻangatae mahuʻinga mo ia. Ko e nonga ko ení “ʻoku fakalaka atu ʻi he mahino kotoa pē”; ʻoku fakaofo ange ia ʻi he meʻa ʻoku tau ala sioloto atu ki aí. Kuo faifai ange pea fakafokifā pē haʻo ongoʻi nonga ʻi he hili haʻo lotu tōtōivi kia Sihova? Ko e ongoʻi ko iá “ko e nonga [ia] ʻa e ʻOtuá.”

5. ʻOku anga-fēfē hono maluʻi ʻe he nonga ʻa e ʻOtuá hotau ʻatamaí mo e lotó?

⁵ ʻI he veesi tatau ʻoku pehē ai ko e nonga ʻa e ʻOtuá “te ne maluʻi homou lotó pea mo homou ngaahi mafai fakaefakakaukaú.” Ko e muʻaki foʻi lea ki he “maluʻí” ko ha kupuʻi lea fakakautau pea naʻe ʻuhingá ki he kau sōtia naʻe vaheʻi ke nau maluʻi ha kolo pea leʻohi ia mei hano ʻohofi. Ko e kakai naʻe nofo ʻi ha kolo naʻe maluʻi naʻa nau mohe ʻi he nonga, ʻi hono ʻiloʻi ko e kau sōtiá naʻa nau leʻohi ʻa e ngaahi matapaá. ʻI he tuʻunga meimei tatau, ʻi he taimi ʻoku maluʻi ai ʻe he nonga ʻa e ʻOtuá ʻa hotau lotó mo e ʻatamaí, ʻoku tau ongoʻi nonga, ʻi hono ʻiloʻi ʻoku tau malu. (Saame 4:8) Hangē ko e tuʻunga ʻo ʻAná, neongo kapau ʻoku ʻikai ke liliu vave ʻa hotau tuʻungá, ʻe kei malava pē ke tau maʻu ha ongoʻi nonga. (1 Sām. 1:​16-18) Pea ʻi heʻetau ongoʻi nongá, ʻoku faʻa faingofua ange ai ke tau fakakaukau fakalelei pea fai ʻa e ngaahi fili fakapotopoto.

6. Ko e hā ʻe lava ke tau fai ke maʻu ʻaonga mei he nonga ʻa e ʻOtuá? (Sio foki ki he fakatātaá.)

⁶ Meʻa ʻoku fiemaʻu ke tau faí. ʻI he taimi ʻokú ke faingataʻaʻia aí, ui ki he tangata leʻó hangē ko e laú. Anga-fēfē? Lotu kae ʻoua kuó ke ongoʻi ʻa e  nonga ʻa e ʻOtuá. (Luke 11:9; 1 Tes. 5:17) Ko Luis, naʻe lave ki ai ki muʻá, naʻá ne fakamatala ki he founga naʻá ne malava ai mo hono uaifí, ʻa Ana, ke fekuki ʻi heʻena ʻiloʻi naʻe toe pē ha laui māhina peá ne mate. ʻOkú ne pehē: “ʻI ha mōmeniti hangē ko ení, ʻoku mātuʻaki faingataʻa ke fai ʻa e ngaahi fili fekauʻaki mo e tokangaekina ʻo e moʻui leleí mo e ngaahi meʻa kehe. Ka ko e lotú ʻa e meʻa mātuʻaki mahuʻinga naʻá ne ʻomai kiate kimaua ʻa e nonga lolotonga ʻa e taimi ko ení.” Naʻe pehē ʻe Luis mo hono uaifí naʻá na lotu lahi hokohoko, ʻo kole kia Sihova ke foaki ange kiate kinaua ʻa e nonga ʻo e ʻatamaí, ko ha loto nonga, mo e poto ke fai ʻa e ngaahi fili lelei. Pea naʻá na ongoʻi ʻene tokoní. Kapau ʻokú ke fehangahangai mo ha faingataʻa, kītaki ʻi he lotu, pea te ke hokosia ʻa e nonga ʻa Sihová ʻi heʻene maluʻi ho lotó mo e ʻatamaí.—Loma 12:12.

ʻE ʻAI KOE ʻE SIHOVA KE KE TUʻU MAʻU

7. Ko e hā nai te tau ongoʻi ʻi heʻetau hokosia ha ʻahiʻahi faingataʻa?

⁷ Ko e polé. ʻI heʻetau foua ha ʻahiʻahi faingataʻa, ko ʻetau ngaahi ongoʻí, fakakaukaú, mo e fakafeangaí heʻikai nai hoko ʻo mafamafatatau ʻo hangē ko e tuʻunga anga-mahení. Te tau ongoʻi nai ʻo hangē ʻoku fepālekina holo kitautolu ʻe heʻetau ngaahi ongoʻi mālohí. Ko Ana, naʻe lave ki ai ki muʻá, naʻá ne pehē naʻá ne fekuki mo ha ngaahi ongoʻi kehekehe hili ʻa e mate ʻa Luis. Naʻá ne pehē: “ʻI he kamata ke u ongoʻi ʻoku honge ifo ʻa e moʻuí, ʻoku kamata ke u ongoʻi fakaʻofaʻia ʻiate au. Naʻá ku toe ʻita foki ʻi heʻene pulí.” ʻIkai ko ia pē, naʻe ongoʻi liʻekina ʻa Ana peá ne ongoʻi feifeitamaki ʻi he pau ke ne fai ʻa e ngaahi fili fekauʻaki mo e ngaahi meʻa naʻe tokangaʻi lelei ʻe Luis. ʻI he taimi ʻe niʻihi, naʻá ne ongoʻi ʻo hangē ʻokú ne afāngia ʻi tahí. ʻOku anga-fēfē hono tokoniʻi kitautolu ʻe Sihova ʻi he taimi ʻoku kamata ai ke lōmekina kitautolu ʻe he ngaahi ongoʻi peheé?

8. Hangē ko ia ʻoku fakahaaʻi ʻi he 1 Pita 5:​10, ko e hā ʻoku fakapapauʻi mai ʻe Sihova kiate kitautolú?

⁸ Meʻa ʻe fai ʻe Sihová. ʻOkú ne fakapapauʻi mai te ne ʻai kitautolu ke tau tuʻu maʻu. (Lau ʻa e 1 Pita 5:10.) ʻI hono maʻu ʻe ha afā ha vaka ʻi tahi, ʻe kamata nai ke sēlue. Ke taʻotaʻofi ení, ko e ngaahi vaka lahi ʻoku ʻi ai ʻa e meʻa ʻi lalo ʻi he ongo tafaʻaki ʻo e vaká ʻokú ne ʻai ia ke tuʻu maʻu. ʻOku tokoni eni ki hono fakasiʻisiʻi ʻa e sēlue ʻa e vaká, ʻo ʻai ʻa e tuʻungá ke malu ange mo fakafiemālie ange ki he kau pāsesé. Kae kehe, ko e ngaahi meʻa ko eni ʻoku tokoni ki hono fakatuʻumaʻuʻi ʻa e vaká ʻoku ngāue lelei tahá ʻi he taimi ʻoku ngaʻunu ai ʻa e vaká ki muʻá. ʻI he tuʻunga meimei tatau, ʻe ʻai kitautolu ʻe Sihova ke tau tuʻu maʻu ʻi heʻetau ngaʻunu faitōnunga ki muʻa ʻi he ngaahi taimi ʻo e ʻahiʻahí.

9. ʻE lava fēfē ke tokoniʻi kitautolu ʻe heʻetau ngaahi meʻangāue fakaefekumí ke tauhi maʻu ʻetau mafamafatataú? (Sio foki ki he fakatātaá.)

⁹ Meʻa ʻoku fiemaʻu ke tau faí. ʻI he taimi ʻokú ke  ʻi he uhouhonga ai ʻo ha matangi fakaeongo, fai ho lelei tahá ke tauhi maʻu hoʻo taimi-tēpile fakalaumālié. Ko e moʻoni, heʻikai nai malava ke ke fai ʻa e meʻa lahi ʻo hangē ko ia naʻá ke fai ki muʻá, kae manatuʻi ko Sihová ʻoku fakaʻatuʻi. (Fakafehoanaki mo e Luke 21:​1-4.) ʻAi ko ha konga ʻi hoʻo taimi-tēpile fakalaumālié, ʻa hono vaheʻi ha taimi ki he ako fakafoʻituituí mo e fakalaulaulotó. Ko e hā hono ʻuhingá? Fakafou ʻi he kautaha ʻa Sihová, kuó ne tokonaki mai ai ʻa e fakamatala Fakatohitapu fakaofo ʻe lava ke ne tokoniʻi kitautolu ke tauhi maʻu ʻetau mafamafatataú. Ke maʻu ʻa e meʻa ʻokú ke fiemaʻú, ʻe lava ke ke ngāueʻaki ʻa e ngaahi meʻangāue fakaefekumi ʻoku ala maʻu ʻi hoʻo leá, hangē ko e JW Library^®, Watch Tower Publications Index mo e Tataki Fakaefekumi Maʻá e Kau Fakamoʻoni ʻa Sihová. Ko Monika, naʻe lave ki ai ki muʻá, naʻá ne pehē naʻá ne hanga ki he ngaahi meʻangāue fakaefekumí ki ha faleʻi ʻi heʻene ongoʻi ʻoku teu ke ne fehangahangai mo ha matangi fakaeongo. Ko e fakatātaá, naʻá ne fekumi ki he foʻi lea ko e “ʻita.” ʻI he ngaahi taimi kehé, naʻá ne fekumi ki he “lavaki” pe “mateaki.” Pea te ne lau ia kae ʻoua kuó ne ongoʻi lelei ange. ʻOkú ne pehē: “ʻI heʻeku kamata fekumí ne u hohaʻatuʻu, ka naʻe iku atu ia ʻo hangē ʻoku fāʻofua mai ʻa Sihova kiate aú. ʻI heʻeku lau iá naʻá ku ʻiloʻi ʻoku mahinoʻi ʻe Sihova ʻa e kotoa ʻeku ngaahi ongoʻí, pea naʻá ne tokoniʻi au.” Ko ha tokoni pehē meia Sihova ʻe lava foki ke ne tokoniʻi koe ke tauhi maʻu hoʻo mafamafatataú kae ʻoua kuó ke aʻu ki ha tahi ʻoku nonga ange.—Saame 119:​143, 144.

ʻE POUPOUʻI KOE ʻE SIHOVA

10. ʻE anga-fēfē nai ʻetau ongoʻí ʻi he hili ʻa e hoko ha meʻa fakamamahi?

¹⁰ Ko e polé. Hili hono hokosia ha meʻa fakamamahi, ʻe ʻi ai nai ʻa e ngaahi ʻaho te tau ongoʻi vaivai fakaesino mo fakaeongo. Te tau ongoʻi nai ʻo hangē ko ha tokotaha ʻatelita naʻe lavea ʻa ia naʻá ne lele vave ki muʻa ka ʻi he taimi ní ʻokú ne toketu. Te tau fāinga nai mo e ngaahi ngāue naʻe faingofua ke tau fai ia ki muʻa, pe ʻoku ʻikai nai haʻatau loko fakaueʻiloto ke fakahoko ʻa e ngaahi ngāue naʻa tau fiefia ai ki muʻá. Hangē ko ʻIlaisiaá, te tau ongoʻi nai ʻoku fuʻu faingataʻa ke tuʻu hake. ʻOku tau loto pē ke mohe. (1 Tuʻi 19:​5-7) Ko e hā ʻoku talaʻofa mai ʻe Sihova ke fai ʻi heʻetau ongoʻi vaivaí?

11. Ko e hā ha founga ʻe taha ʻoku tokoniʻi ai kitautolu ʻe Sihova? (Saame 94:18)

¹¹ Meʻa ʻe fai ʻe Sihová. ʻOkú ne talaʻofa ke poupouʻi kitautolu. (Lau ʻa e Saame 94:18.) Hangē pē ko e fiemaʻu ʻe ha tokotaha ʻatelita naʻe lavea ha poupou ke ʻalu holo, te tau fiemaʻu nai ʻa e tokoni ke hanganaki longomoʻui ʻi he ngāue ʻa Sihová. ʻI he ngaahi mōmeniti ko iá, ʻoku fakapapauʻi mai ʻe Sihova: “Ko au Sihova ko ho ʻOtuá,  ʻoku ou puke ho nima toʻomataʻú, ʻa e Tokotaha ʻoku lea atu kiate koe, ‘ʻOua ʻe ilifia. Te u tokoniʻi koe.’” (ʻAi. 41:13) Naʻe hokosia ʻe Tuʻi Tēvita ʻa e tokoni ko ení. ʻI he fehangahangai mo e ngaahi ʻahiʻahí mo hono ngaahi filí, naʻá ne pehē kia Sihova: “ʻOku poupouʻi au ʻe ho nima toʻomataʻú.” (Saame 18:35) Ka ʻoku anga-fēfē hono tokonaki mai ʻe Sihova ʻa e poupoú?

12. Ko hai ʻe ngāueʻaki nai ʻe Sihova ke tokoniʻi kitautolu ʻi heʻetau ongoʻi vaivaí?

¹² ʻOku faʻa poupouʻi kitautolu ʻe Sihova ʻaki hono ueʻi ʻa e niʻihi kehé ke tokoniʻi kitautolu. Ko e fakatātaá, ʻi he taimi ʻe taha naʻe ongoʻi vaivai ʻa Tēvita, ko hono kaumeʻa ko Sionatané naʻá ne ʻaʻahi kiate ia ke fai ha poupou fakaeongo mo ha lea fakalototoʻa. (1 Sām. 23:​16, 17) ʻI he tuʻunga meimei tatau, naʻe fili ʻe Sihova ʻa ʻIlaisa ke tokonaki ha tokoni ʻaonga kia ʻIlaisiā. (1 Tuʻi 19:​16, 21; 2 Tuʻi 2:2) ʻI he ʻahó ni, ʻe ngāueʻaki nai ʻe Sihova ʻa e fāmilí, ngaahi kaumeʻá pe ko e kau mātuʻá ke poupouʻi kitautolu. Neongo ia, ʻi he taimi ʻoku tau mamahi aí, te tau hehema nai ke fakamavaheʻi kitautolu. ʻOku tau loto pē ke nofo toko taha. Ko ha fakafeangai anga-maheni ia. Ko e hā ʻe lava ke tau fai ke maʻu ai ʻa e poupou ʻa Sihová?

13. Ko e hā ʻoku fiemaʻu ke tau faí ke maʻu ʻaonga ai mei he poupou ʻa Sihová? (Sio foki ki he fakatātaá.)

¹³ Meʻa ʻoku fiemaʻu ke tau faí. Tauʻi ʻa e hehema ke fakamavaheʻi koé. ʻI heʻetau fakamavaheʻi kitautolú, ʻoku faʻa pokopokosiʻi ai ʻa e anga ʻetau vakaí, pea kamata ke tau fakakaukau kiate kitautolu pē mo e ngaahi palopalema ʻoku tau fouá. Ko e faʻahinga fakakaukau ko ení ʻe lava ke ne uesia ʻa e ngaahi fili ʻoku tau faí. (Pal. 18:1) Ko e moʻoni, ʻoku tau fiemaʻu kotoa ha kiʻi taimi ke toko taha, tautefito ʻi he taimi ʻoku tau fehangahangai ai mo e ngaahi tuʻunga fakamamahí. Kae kehe, kapau te tau fakamavaheʻi kitautolu ʻi ha vahaʻa taimi fuoloa, ʻe lava ke tau talitekeʻi ai ʻa e ngaahi founga tofu pē ʻoku ngāueʻaki ʻe Sihova ke poupouʻi kitautolú. Ko ia neongo ʻa e hā mātuʻaki faingataʻa nai ʻa e tuʻunga ʻokú ke ʻi aí, tali lelei ʻa e tokoni mei ho fāmilí, ngaahi kaumeʻá, mo e kau mātuʻá. Vakai kiate kinautolu ʻi honau tuʻunga totonú—ko e founga ia ʻa Sihova ke poupouʻi ai koé.—Pal. 17:17; ʻAi. 32:​1, 2.

ʻE FAKAFIEMĀLIEʻI KOE ʻE SIHOVA

14. Ko e hā ʻa e ngaahi tuʻunga fakamanavahē ʻe lava ke tau fehangahangai mo iá?

¹⁴ Ko e polé. Te tau foua nai ha ngaahi mōmeniti te tau ongoʻi manavahē ai. ʻI he Tohi Tapú, ko e kau sevāniti faitōnunga ʻa e ʻOtuá ʻoku nau lave ki he ngaahi taimi naʻa nau faingataʻaʻia ai mo tetetete koeʻuhí ko honau ngaahi filí pe ngaahi tenge kehe pē. (Saame 18:4; 55:​1, 5) ʻI he  tuʻunga meimei tatau, ʻe lava ke tau fehangahangai mo e fakafepakí ʻi he ʻapiakó, ʻi he ngāueʻangá, mei hotau fāmilí pe mei he puleʻangá. ʻE aʻu nai ʻo tau fehangahangai mo e maté koeʻuhí ko ha palopalema fakafaitoʻo. Lolotonga ʻa e ngaahi taimi peheé, te tau ongoʻi nai ʻo hangē ʻoku ʻikai hatau tokoní ʻo hangē ko ha kiʻi leka. ʻOku anga-fēfē hono tokoniʻi kitautolu ʻe Sihova ʻi he ngaahi mōmeniti pehení?

15. Ko e hā ʻa e fakapapau ʻoku tokonaki mai ʻi he Saame 94:19?

¹⁵ Meʻa ʻe fai ʻe Sihová. ʻOkú ne fakafiemālieʻi mo fakanonga kitautolu. (Lau ʻa e Saame 94:19.) ʻOku ʻai nai kitautolu ʻe he saame ko ení ke tau fakakaukau ki ha kiʻi taʻahine ʻokú ne ilifia pea ʻikai lava ke ne mohe koeʻuhi ko ha mana fatulisi. ʻE lava ke tau sioloto atu ʻoku hū atu ʻene tamaí, ʻo fua hake ia ki hono fatafatá kae ʻoua kuó ne mohe. Neongo ʻe kei tō pē ʻa e taufá, ko e fāʻofua mo e fakafiemālie mei heʻene tamaí ʻokú ne ʻai ia ke ne ongoʻi malu. ʻI heʻetau fehangahangai mo e ngaahi ʻahiʻahi fakamanavaheé, te tau fiemaʻu nai ʻetau Tamai fakahēvaní ke ne fua hake kitautolu kae ʻoua kuo mole atu ʻa e ngaahi ongoʻi ilifiá. ʻE lava fēfē ke tau maʻu ha fakafiemālie pehē meia Sihova?

16. Ko e hā ʻe lava ke tau fai ke maʻu ʻaonga ai mei he fakafiemālie ʻa Sihová? (Sio foki ki he fakatātaá.)

¹⁶ Meʻa ʻoku fiemaʻu ke tau faí. Fakamoleki maʻu pē ʻa e taimi mo Sihova—lotu kiate ia pea lau ʻene Folofolá. (Saame 77:​1, 12-14) Pea ʻi he taimi leva ʻokú ke loto-mafasia aí, ko e meʻa te ke ʻuluaki fakakaukau ki aí ʻoku ngalingali ko e hanga ki hoʻo Tamai fakahēvaní. Vahevahe hoʻo ngaahi manavaheé mo e ngaahi hohaʻá kia Sihova. Tuku ke ne lea atu kiate koe pea fakanonga koe fakafou ʻi he Folofolá. (Saame 119:28) Te ke maʻu nai ʻa e ngaahi konga Tohi Tapu pau ʻe lava ke hoko ʻo fakafiemālie ʻi he taimi ʻokú ke manavahē aí. Ko e fakatātaá, te ke maʻu nai ʻa e fakalototoʻa ʻi he tohi ʻa Siopé, Sāmé, mo e Palōvēpí pehē foki ki he ngaahi lea ʻa Sīsū ʻoku maʻu ʻi he Mātiu vahe 6. ʻI hoʻo lotu kia Sihova pea lau ʻene Folofolá, te ke ongoʻi ai ʻokú ne fakafiemālieʻi koe.

17. Ko e hā ʻa e falala pau ʻe lava ke tau maʻú?

¹⁷ ʻE lava ke tau falala pau ʻe ʻi ai ʻa Sihova kiate kitautolu ʻi he lolotonga ʻa e ngaahi taimi kaupōʻuli ʻo ʻetau moʻuí. Heʻikai ʻaupito ke tau tuēnoa. (Saame 23:4; 94:14) ʻOku talaʻofa ʻe Sihova te ne maluʻi kitautolu, ʻai ke tau tuʻu maʻu, poupouʻi, pea fakafiemālieʻi kitautolu. ʻI he fekauʻaki mo Sihová, ʻoku pehē ʻi he ʻAisea 26:3: “Te ke maluʻi ʻa e faʻahinga ʻoku nau falala kakato atu kiate koé; te ke ʻoange kiate kinautolu ha melino hokohoko, koeʻuhi ko koe ʻoku nau falala atu ki aí.” Ko ia falala kia Sihova, pea ngāue ʻaonga ʻaki ʻa e ngaahi founga ʻokú ne ngāueʻaki ke tokoniʻi koé. Kapau te ke fai ia, te ke toe maʻu ʻa e mālohi naʻa mo e ʻi he lolotonga ʻa e ngaahi taimi faingataʻá.