1. Ko e hā ʻoku haʻu ki ho ʻatamaí ʻi hoʻo fakakaukau kia Sihová?

 KUO faifai ange peá ke feinga ke sioloto atu pe ko e tokotaha fēfē ʻa Sihova? ʻI hoʻo lea kiate ia ʻi he lotú, ko e hā ʻoku haʻu ki ho ʻatamaí? Neongo ko Sihová ʻoku taʻehāmai, ʻoku fakamatalaʻi ia ʻi he Tohi Tapú ʻi he ngaahi founga kehekehe. ʻOku ui ʻa Sihova “ko ha laʻā mo ha pā” pea mo ha “afi faifakaʻauha.” (Saame 84:11; Hep. 12:29) Ko ʻene ʻi aí ʻoku fakamatalaʻi ʻo hangē ia ko ha maka sāfaia, mētale ngingila, pea mo ha ʻumata ngingila. (ʻIsi. 1:​26-28) Ko e niʻihi ʻo e ngaahi fakamatala ko eni fekauʻaki mo Sihová te tau ongoʻi māluʻia nai ai pea naʻa mo e ongoʻi ilifia nai.

2. Ko e hā te ne taʻofi nai ʻa e niʻihi mei he ʻunuʻunu ofi kia Sihová?

² Koeʻuhí ʻoku ʻikai lava ke tau sio kia Sihova, ʻe faingataʻa nai ke tau tui ʻokú ne ʻofa mai kiate kitautolu. ʻOku fakakaukau ʻa e niʻihi heʻikai ʻaupito ʻofa ʻa Sihova ʻiate kinautolu koeʻuhí ko ʻenau ngaahi hokosia ʻi he kuohilí ʻi he moʻuí. Mahalo naʻe ʻikai ʻaupito ke ʻi ai haʻanau tamai naʻe ʻofa ʻiate kinautolu. ʻOku mahinoʻi ʻe Sihova ʻa e ngaahi ongoʻi peheé pea mo e anga ʻene uesia kitautolú. Ke tokoniʻi kitautolú, ʻokú ne fakahaaʻi mai hono ʻulungaanga fakaʻofoʻofá ʻi heʻene Folofolá.

3. Ko e hā ʻoku totonu ai ke tau vakai ofi ange ki he ʻofa ʻa Sihová?

³ Ko e foʻi lea ʻe taha ʻoku fakamatalaʻi lelei taha ʻaki ʻa Sihová ko e ʻofá. (1 Sio. 4:8) Ko e fakasino ia ʻo e ʻofá. ʻOkú ne tākiekina ʻa e meʻa kotoa ʻokú ne faí. Ko e ʻofa ʻa e ʻOtuá ʻoku māfana ʻaupito pea ʻoku mātuʻaki mālohi ʻa ia ʻokú ne toe fakaaʻu atu ia ki he faʻahinga ʻoku ʻikai ke nau ʻofa kiate iá. (Māt. 5:​44, 45) ʻI he kupu ko ení, te tau vakai ofi ange ai kia Sihova mo ʻene ʻofá. Ko e lahi ange ʻetau ako fekauʻaki mo hotau ʻOtuá, ko e lahi ange ia ʻetau ʻofa kiate iá.

ʻOKU ʻOFA LAHI ʻA SIHOVA ʻIATE KITAUTOLU

4. ʻOku ʻai koe ʻe he manavaʻofa loloto ʻa Sihová ke ke ongoʻi fēfē? (Sio foki ki he fakatātaá.)

⁴ “Ko Sihová ʻoku manavaʻofa loloto ʻaupito.” (Sēm. 5:11) ʻI he  Tohi Tapú, ʻokú ne fakahoa ʻa ia tonu ki ha faʻē manavaʻofa. (ʻAi. 66:​12, 13) Sioloto atu angé ki ha faʻē ʻokú ne tokanga anga-ʻofa ki heʻene kiʻi tamá. ʻOkú ne huki anga-fakaalaala ia mo lulululu ʻi hono fungá, pea lea kiate ia ʻi ha leʻo anga-vaivai mo fakanonga. ʻI he taimi ʻoku tangi pe mamahi ai ʻa e kiʻi tamá, ʻokú ne fakapapauʻi ʻokú ne maʻu ʻa e meʻa ʻokú ne fiemaʻú. ʻI he taimi ʻoku tau mamahi aí, ʻe lava ke tau falala ki he ʻofa ʻa Sihová. Naʻe tohi ʻe he tokotaha-tohi-sāmé: “ʻI hono lōmekina au ʻe he ngaahi loto-moʻuá, naʻá ke fakafiemālieʻi mo fakanonga au.”—Saame 94:19.

5. Ko e hā ʻa e ʻuhinga ʻo e ʻofa mateaki ʻa Sihová kiate koé?

⁵ Ko Sihová ʻoku mateaki. (Saame 103:8) ʻOku ʻikai ke ne foʻi ʻiate kitautolu ʻi he taimi ʻoku tau faihala aí. Ko e puleʻanga ʻo ʻIsilelí naʻa nau toutou fakalotomamahiʻi ʻa Sihova; neongo ia, naʻá ne fakahaaʻi ʻene ʻofa heʻikai kaʻangá ki heʻene kakai fakatomalá ʻaki ʻa e ngaahi lea ko ení: “Naʻá ke hoko ʻo mahuʻinga kiate au, naʻe fakalāngilangiʻi koe, pea kuó u ʻofa ʻiate koe.” (ʻAi. 43:​4, 5) Ko e ʻofa ʻa e ʻOtuá kuo ʻikai liliu. ʻE lava ke tau falala maʻu pē ki ai. Neongo kapau te tau fai ha fehālaaki mafatukituki, heʻikai liʻaki kitautolu ʻe Sihova. ʻI heʻetau fakatomala pea foki kia Sihová, te tau vakai ai ʻokú ne kei ʻofa pē ʻiate kitautolu. ʻOkú ne talaʻofa “te ne fakamolemole ʻo lahi ʻaupito.” (ʻAi. 55:7) ʻOku fakamatalaʻi ʻe he Tohi Tapú ʻa e fakamolemole ko ení ʻo hangē ia ko e hoko mai “ʻa e ngaahi taimi ʻo e fakaivifoʻoú meia Sihova tonu.”—Ngā. 3:19.

6. Ko e hā ʻoku akoʻi mai kiate kitautolu ʻe he Sākalaia 2:8 fekauʻaki mo Sihová?

⁶ Lau ʻa e Sākalaia 2:8. Koeʻuhí ʻoku ʻofa ʻa Sihova ʻiate kitautolu, ʻokú ne ongongofua ki heʻetau ngaahi ongoʻí pea vēkeveke ke maluʻi kitautolu. ʻOkú ne ongoʻi mamahi ʻi he taimi ʻoku tau mamahi aí. Ko hono olá, ʻe lava moʻoni ke tau lotu: “Leʻohi au ʻo hangē ko e tamaʻimata ʻo ho fofongá.” (Saame 17:8) Ko e matá ko ha konga pelepelengesi mo mahuʻinga ia ʻo e sinó. Ko ia ʻi hono fakahoa kitautolu ʻe Sihova ki he tamaʻimata ʻo hono fofongá, ʻoku hangē ia haʻane pehē mai, ‘Ko ha taha pē ʻokú ne fai ha kovi kiate kimoutolu, ʻe hoku kakai, ko ʻene fai ia ʻa e kovi ki he meʻa ʻoku mahuʻinga kiate aú.’

7. Ko e hā ʻoku fiemaʻu ai ke tau fakaivimālohiʻi ʻetau falala pau ki he ʻofa ʻa Sihová?

⁷ ʻOku loto ʻa Sihova ke tau tuipau ʻokú ne ʻofa ʻiate kitautolu fakafoʻituitui. Ka ʻokú ne ʻiloʻi koeʻuhí ko ʻetau ngaahi hokosia ʻi he kuohilí, te tau fifili nai pe ʻe lava ke ne ʻofa ʻiate kitautolu. Pe ʻoku tau fehangahangai nai he taimí ni mo e ngaahi tuʻunga ʻokú ne ʻahiʻahiʻi ʻetau falala pau  ki he ʻofa ʻa Sihová. Ko e hā te ne fakaivimālohiʻi ʻetau falala paú? Ko e ako ki he anga hono fakahāhā ʻe Sihova ʻene ʻofá kia Sīsū, kau paní, pea mo kitautolu kotoa.

FOUNGA HONO FAKAHĀHĀ ʻE SIHOVA ʻENE ʻOFÁ

8. Ko e hā naʻe tuipau ai ʻa Sīsū fekauʻaki mo e ʻofa ʻene Tamaí?

⁸ ʻI ha ngaahi kuonga taʻefaʻalaua, naʻe faʻu ʻe Sihova ha haʻi vāofi ʻo e ʻofa loloto mo hono ʻAlo ʻofeiná. Ko ʻena vahaʻangataé ʻa e motuʻa taha ʻi he ʻunivēsí. Naʻe fakahaaʻi māʻalaʻala ʻe Sihova ʻene ʻofa kia Sīsuú, ʻo hangē ko ia ʻoku tau lau ʻi he Mātiu 17:5. Naʻe mei pehē pē ʻe Sihova, ‘Ko e tokotaha eni ʻa ia kuó u hōifua aí.’ Kae kehe, naʻá ne loto ke tau ʻiloʻi ʻa e lahi ʻo ʻene ʻofa ʻia Sīsuú, ko ia naʻá ne ui ia “ko hoku ʻAló eni, ʻa e ʻofeiná.” Naʻe laukauʻaki ʻe Sihova ʻa Sīsū pea mo e meʻa naʻe ʻamanaki ke ne fakahokó. (ʻEf. 1:7) Pea naʻe ʻikai ha veiveiua ʻa Sīsū fekauʻaki mo e ongoʻi ʻa ʻene Tamaí kiate iá. Ko e ʻofa ʻa Sihová naʻe mātuʻaki moʻoni kia Sīsū he naʻe lava ke ne ongoʻi loloto ia ʻiate ia. Naʻá ne toutou fakahaaʻi ʻi he falala pau naʻe ʻofa ʻa e Tamaí ʻiate ia.—Sione 3:35; 10:17; 17:24.

9. Ko e hā ʻa e kupuʻi lea ʻokú ne fakamatalaʻi ʻa e ʻofa ʻa Sihova ki he kau paní? Fakamatalaʻi. (Loma 5:5)

⁹ ʻOku toe fakapapauʻi ʻe Sihova ʻene ʻofá ki he kau paní. (Lau ʻa e Loma 5:5.) Fakatokangaʻi ʻa e kupuʻi lea “lilingi mai.” ʻI ha maʻuʻanga fakamatala ʻe taha ʻoku fakamatalaʻi ai ia ʻo hangē ko e “tafe mai ha tafenga vai.” He founga fakaofo ē ke fakatātaaʻiʻaki ʻa e lahi ʻo e ʻofa ʻa Sihova ki he kau paní! ʻOku ʻiloʻi ʻe he kau paní ko kinautolú ʻoku “ʻofeina ʻe he ʻOtuá.” (Sute 1) Naʻe fakahaaʻi ʻe he ʻapositolo ko Sioné ʻenau ongoʻí ʻi heʻene tohi: “Fakakaukau atu ki he faʻahinga ʻofa kuo foaki mai ʻe he Tamaí kiate kitautolú, ko ʻetau hoko ʻo ui ko e fānau ʻa e ʻOtuá!” (1 Sio. 3:1) ʻOku fakangatangata pē ʻa e ʻofa ʻa Sihová ki he kau paní? ʻIkai, kuo fakamoʻoniʻi ʻe Sihova ʻene ʻofá kiate kitautolu kotoa.

10. Ko e hā ʻa e fakapapauʻiʻanga lahi taha ʻo e ʻofa ʻa Sihova kiate koé?

¹⁰ Ko e hā ʻa e fakapapauʻiʻanga lahi taha ʻo e ʻofa ʻa Sihová? Ko e huhuʻí—ko e fakahāhā tuʻu-ki-muʻa taha ia ʻo e ʻofá ʻi he ʻunivēsí! (Sione 3:16; Loma 5:8) Naʻe foaki ʻe Sihova ʻa hono ʻAlo mahuʻingá, ʻo fakaʻatā ia ke ne pekia maʻá e kotoa ʻo e faʻahinga ʻo e tangatá koeʻuhi ke lava ai ʻo fakamolemoleʻi ʻetau ngaahi angahalá pea malava ke tau hoko ai ko Hono kaumeʻa. (1 Sio. 4:10) Ko e lahi ange ʻetau fakalaulauloto ki he mahuʻinga naʻe totongi ʻe Sihova mo Sīsuú, ko e lahi ange ia ʻetau mahinoʻi ʻa e lahi ʻo ʻena ʻofa ʻiate kitautolu tāutahá. (Kal. 2:20) Naʻe ʻikai ke totongi ʻa e huhuʻí koeʻuhí pē ke fakakakato ha aleapau fakalao. Ko ha meʻaʻofa ia ʻo e ʻofá. Kuo fakamoʻoniʻi ʻe Sihova ʻene ʻofa ʻiate kitautolú ʻaki hono feilaulauʻi ʻa e meʻa mahuʻinga taha kiate iá—ʻa Sīsū. Naʻe fakaʻatā ʻe Sihova ʻa hono ʻAló ke faingataʻaʻia pea pekia koeʻuhi ko kitautolu.

11. Ko e hā ʻoku tau ako mei he Selemaia 31:3?

¹¹ Hangē ko ia kuo tau vakai ki aí, ʻoku ʻikai ke tauhi ʻe Sihova ʻene ngaahi ongoʻí ʻiate ia pē, ka ʻokú ne fakahaaʻi māfana ʻene ʻofá. (Lau ʻa e Selemaia 31:3.) Kuo tohoaki mai ʻe Sihova kitautolu kiate ia koeʻuhí ʻokú ne ʻofa ʻiate kitautolu. (Fakafehoanaki mo e Teutalōnome 7:​7, 8.) ʻOku halaʻatā ha meʻa pe ko ha taha ʻe malava ke ne fakamavaheʻi kitautolu mei he ʻofa ko iá. (Loma 8:​38, 39) ʻOku ʻai koe ʻe he ʻofa ko ení ke ke ongoʻi fēfē? Lau ʻa e Saame 23, pea vakai ki he kaunga ʻo e ʻofa mo e tokanga fakaalaala ʻa Sihová kia Tēvitá pea mo ʻene kaunga kiate kitautolu kotoá.

ʻOKU ʻAI KOE ʻE HE ʻOFA ʻA SIHOVÁ KE KE ONGOʻI FĒFĒ?

12. ʻE anga-fēfē haʻo fakanounouʻi ʻa e Saame 23?

¹² Lau ʻa e Saame 23:​1-6. Ko e Saame 23 ko ha hiva ia ʻoku fakahaaʻi ai ʻa e falala pau ki he ʻofa mo e tokanga fakaalaala ʻa Sihová. Ko Tēvita, ʻa e tokotaha-tohi ʻo e saame ko ení,  ʻokú ne fakamatalaʻi ʻa e haʻi mālohi ʻiate ia mo hono Tauhi-Sipí, ʻa Sihova. Naʻe ongoʻi malu ʻa Tēvita ʻi heʻene fakaʻatā ʻa Sihova ke ne tataki iá, pea naʻá ne falala kakato kiate Ia. Naʻe ʻiloʻi ʻe Tēvita ko e ʻofa ʻa Sihová e tulimui ʻiate ia ʻi he ngaahi ʻaho kotoa ʻo ʻene moʻuí. Ko e hā naʻá ne ʻai ia ke ne falala pau peheé?

13. Ko e hā naʻe tuipau ai ʻa Tēvita ki he tokanga ʻa Sihová?

¹³ “ʻE ʻikai te u masiva ʻi ha meʻa.” Naʻe ongoʻi ʻe Tēvita naʻe tokangaʻi lelei iá koeʻuhí ko e ngaahi tokonaki hokohoko meia Sihová. Naʻe toe hoko ʻa Tēvita ko e kaumeʻa ʻo Sihova pea maʻu mo ʻene hōifuá. Ko e ʻuhinga ia naʻá ne fakapapauʻi ai neongo pe ko e hā ʻe hoko ʻi he kahaʻú, ʻe hokohoko atu ʻa Sihova ke tokangaʻi ʻa e kotoa ʻene ngaahi fiemaʻú. Ko e falala ʻa Tēvita ki he ʻofa fakaalaala ʻa Sihová naʻe mālohi ange ia ʻi heʻene ngaahi hohaʻá pea naʻe ʻoange ai kiate ia ʻa e fiefia mo e fiemālie lahi.—Saame 16:11.

14. ʻE anga-fēfē nai hono tokangaʻi anga-ʻofa kitautolu ʻe Sihova?

¹⁴ ʻOku tokangaʻi anga-ʻofa kitautolu ʻe Sihova, tautefito ʻi he taimi ʻoku hoko ai ʻa e ngaahi meʻa kovi ʻi heʻetau moʻuí. Ko Claire, a kuó ne ngāue ʻi he Pētelí laka hake ʻi he taʻu ʻe 20, naʻá ne ongoʻi ʻoku ʻikai hano tokoni ʻi he fehangahangai hono fāmilí mo ha ngaahi tā naʻe oʻo. Naʻe pā-kālava ʻene tamaí, tuʻusi ʻa hono tokoua siʻisiʻí, pea mole mo e kiʻi pisinisi hono fāmilí pea mo honau ʻapí. Naʻe anga-fēfē hono fakahāhā ʻe Sihova ʻene tokanga anga-ʻofá kiate kinautolú? ʻOku pehē ʻe Claire: “Naʻe fakapapauʻi ʻe Sihova naʻe maʻu maʻu pē ʻe homau fāmilí ʻa e meʻa naʻa mau fiemaʻú ʻi he ʻaho taki taha. ʻI he taimi ki he taimi, ko e meʻa naʻe tokonaki ʻe Sihová naʻe fakalaka atu ia ʻi ha meʻa pē naʻá ku ala sioloto atu ki ai! Naʻá ku faʻa fakakaukau ki he ngaahi mōmeniti naʻá ku hokosia  ai ʻa e ʻofa fakaalaala ʻa Sihová, pea naʻá ku koloaʻaki ia. Ko e ngaahi manatu melie ko ení kuó ne tokoniʻi au ke hokohoko atu lolotonga ʻa e ngaahi ʻahiʻahí.”

15. Ko e hā naʻe ongoʻi fakaivifoʻou ai ʻa Tēvitá? (Sio foki ki he fakatātaá.)

¹⁵ “ʻOkú ne fakaivifoʻou au.” ʻI he taimi ʻe niʻihi, naʻe ongoʻi faingataʻaʻia ʻa Tēvita koeʻuhí ko e ngaahi palopalema mo e ngaahi ʻahiʻahi kotoa naʻá ne fehangahangai mo iá. (Saame 18:​4-6) Neongo ia, ko e ʻofa mo e tokanga anga-fakaalaala ʻa Sihová naʻe fakaivifoʻou kiate ia. Naʻe taki ʻe Sihova hono kaumeʻa helaʻiá ki ha “ngaahi kaikaiʻanga musieʻia” mo e “ngaahi mālōlōʻanga vaiʻia.” Ko hono olá, naʻe toe maʻu ʻe Tēvita hono mālohí pea naʻe malava ke ne hokohoko atu.—Saame 18:​28-32.

16. Kuo anga-fēfē hono fakaivifoʻou koe ʻe he ʻofa ʻa Sihová?

¹⁶ ʻI he tuʻunga meimei tatau ʻi he ʻahó ni, “koeʻuhi ko e ʻofa mateaki ʻa Sihová kuo ʻikai ke tau ʻauha ai” ʻi heʻetau fehangahangai mo e ngaahi ʻahiʻahi mo e ngaahi fāinga ʻo e moʻuí. (Tangi. 3:22; Kol. 1:11) Fakakaukau ki he faʻifaʻitakiʻanga ʻa Rachel. Naʻá ne loto-mamahi lahi ʻi hono liʻaki ia ʻe hono husepānití pea mavahe meia Sihova lolotonga ʻa e mahaki fakaʻauha COVID-19. Ko e hā naʻe fai ʻe Sihova maʻaná? ʻOkú ne pehē: “Naʻe fakapapauʻi ʻe Sihova naʻá ku ongoʻi naʻe ʻofaʻi au. Naʻá ne ʻomai kiate au ʻa e ngaahi kaungāmeʻa naʻa nau fakamoleki ʻa e taimi mo au, ʻomai ʻa e ngaahi meʻakai, ʻomai ʻa e ngaahi pōpoaki fakalototoʻa mo e ngaahi veesi Tohi Tapu, malimali mai kiate au, pea hanganaki fakamanatu mai naʻe tokangaʻi au ʻe Sihova. ʻOku ou fakamālō maʻu pē kia Sihova ki hono foaki mai kiate au ha fāmili anga-ʻofa tokolahi.”

17. Ko e hā naʻe ʻikai ke ‘manavahē ai ʻa Tēvita ki ha koví’?

¹⁷ “ʻOku ʻikai te u manavahē ki ha kovi, he ʻokú ke ʻiate au.” Ko e moʻui ʻa Tēvitá naʻe faʻa ʻi he tuʻunga fakatuʻutāmaki, pea naʻe ʻi ai hono ngaahi fili mālohi tokolahi. Kae kehe, ko e ʻofa ʻa Sihová naʻá ne ʻai ia ke ne ongoʻi malu. Naʻe lava ke ongoʻi ʻe Tēvita naʻe ʻiate ia ʻa Sihova ʻi he tuʻunga kotoa pē, pea naʻe fakalototoʻa ia kiate ia. Ko ia naʻe lava ke ne hiva: “[Ko Sihova] naʻá ne fakahaofi au mei heʻeku ngaahi manavaheé kotoa.” (Saame 34:4) Ko e ngaahi manavahē ʻa Tēvitá naʻe moʻoni; ka ko e ʻofa ʻa Sihová naʻe mālohi ange ia ʻi heʻene ngaahi manavaheé.

18. ʻE anga-fēfē hono fakaivimālohiʻi nai koe ʻe he tuipau ʻoku ʻofa ʻa Sihova ʻiate koé ʻi he taimi ʻokú ke ilifia aí?

¹⁸ ʻOku anga-fēfē hono fakaivimālohiʻi kitautolu ʻe he tuipau ʻoku ʻofa ʻa Sihova ʻiate kitautolú  ʻi heʻetau fehangahangai mo e ngaahi tuʻunga fakamanavaheé? Ko ha tāimuʻa ko Susi ʻokú ne fakamatala ki he anga ʻene ongoʻi mo hono husepānití ʻi he taimi naʻe toʻo ai ʻe hona fohá ʻene moʻuí: “Ko e hoko fakafokifā ha meʻa fakamamahi ʻoku fakaʻohovale pea ʻe lava ke ne ʻai ha taha ke ongoʻi ʻoku tuʻu laveangofua mo ʻikai hano tokoni. Ka ko e manavaʻofa loloto ʻa Sihová kuó ne ʻai kimaua ke ma ongoʻi nonga mo malu.” Ko Rachel, naʻe lave ki ai ki muʻá, ʻokú ne manatu: “ʻI he pō ʻe taha ʻi he langa hoku mafú peá u hohaʻa lahi mo ilifiá, naʻá ku tangi leʻo-lahi kia Sihova. ʻI he taimi pē ko iá naʻá ku ongoʻi naʻá ne fakanonga hoku lotó pea fakafiemālieʻi au, ʻo hangē ko e fai pehē ha faʻē ki heʻene kiʻi pēpeé, pea naʻá ku tō ʻo mohe. Heʻikai ʻaupito ngalo ʻiate au ʻa e mōmeniti ko iá.” Ko ha mātuʻa ko Tasos naʻá ne fakamoleki ʻa e taʻu ʻe fā ʻi pilīsone ʻi heʻene fakafisi ke kau ʻi he taú. Naʻe anga-fēfē ʻene hokosia ʻa e ʻofa mo e tokanga ʻa Sihová? ʻOkú ne pehē: “Naʻe tokangaʻi ʻe Sihova ʻeku ngaahi fiemaʻú kotoa pea toe mahulu atu ai. Naʻe fakaivimālohiʻi heni ʻeku falala pau ʻe lava ke u falala kakato kiate ia. Pehē foki, fakafou ʻi hono laumālié, naʻe ʻomai ʻe Sihova kiate au ʻa e fiefia neongo ʻeku ʻi ha ʻātakai fakatupu loto-mafasia. Naʻe fakapapauʻi mai heni kiate au ko e vāofi ange ʻeku ngāue mo iá, ko e lahi ange ia ʻeku maʻu ʻaonga mei heʻene leleí. Ko ia naʻe kamata ke u ngāue kiate ia ko ha tāimuʻa tuʻumaʻu lolotonga ʻeku ʻi pilīsoné.”

ʻUNUʻUNU OFI KI HO ʻOTUA MANAVAʻOFA LOLOTÓ

19. (a) ʻE lava fēfē ke hoko ʻetau ʻiloʻi ʻoku ʻofa ʻa e ʻOtuá ʻiate kitautolú ʻo tākiekina ʻa e meʻa ʻoku tau leaʻaki ʻi heʻetau ngaahi lotú? (e) Ko fē ʻa hono fakamatalaʻi ʻo e ʻofa ʻa Sihová ʻoku maongo kiate koe fakafoʻituituí? (Sio ki he puha “ Ngaahi Lea ʻOkú Ne Tokoniʻi Kitautolu ke Ongoʻi ʻa e ʻOfa Māfana ʻa Sihová.”)

¹⁹ Ko e ngaahi hokosia kuo tau lāulea ki aí ʻoku nau fakamoʻoniʻi kotoa ko Sihova, “ko e ʻOtua ʻo e ʻofá,” ʻokú ne ʻiate kitautolu! (2 Kol. 13:11) ʻOkú ne mahuʻingaʻia fakafoʻituitui ʻiate kitautolu. ʻOku tau tuipau ʻoku “takatakaiʻi [kitautolu] ʻe Heʻene ʻofa mateakí.” (Saame 32:10) Ko e lahi ange ʻetau fakalaulauloto ki he founga kuó ne fakahāhā mai ai ʻene ʻofá, ko ʻene moʻoni ange ia kiate kitautolú pea ko ʻetau ongoʻi ofi ange ia kiate iá. ʻOku lava ke tau fakaofiofi tauʻatāina kiate ia pea tala ange ʻa e lahi ʻo ʻetau fiemaʻu ʻene ʻofá. ʻE lava ke tau vahevahe kiate ia ʻa e kotoa ʻetau ngaahi hohaʻá, ʻo falala pau ʻokú ne mahinoʻi kitautolu pea ʻokú ne vēkeveke ke tokoniʻi kitautolu.—Saame 145:​18, 19.

20. ʻOku anga-fēfē hono tohoakiʻi kitautolu ʻe he ʻofa ʻa Sihová ke ofi ange kiate iá?

²⁰ Hangē pē ko hono tohoakiʻi kitautolu ki ha afi māfana ʻi ha ʻaho momoko, ʻoku tohoakiʻi kitautolu ki he ʻofa māfana ʻa Sihová. Neongo ko e ʻofa ʻa Sihová ʻoku mālohi, ʻoku toe anga-fakaalaala foki. Ko ia tali lelei ʻa e ʻofa māfana ʻa Sihová ki hoʻo moʻuí. Pea fakatauange ke tau tali kotoa ʻa ʻene ʻofá ʻaki ʻetau pehē: “ʻOku ou ʻofa kia Sihova”!—Saame 116:1.