1. Ko e hā ʻoku tokangataha ki ai ʻa e tokolahi ʻi he ʻahó ni?

 KUÓ KE fakatokangaʻi ko e tokolahi ʻi he ʻahó ni ʻoku nau nōfoʻi ʻi he fakakaukau pē kiate kinautolú? Ko e fakatātaá, ko e niʻihi ʻoku nau feinga lahi ʻi he mītia fakasōsialé ke tohoakiʻi ʻa e tokangá kiate kinautolu pea ki heʻenau ngaahi lavameʻá. Kae kehe, ko e niʻihi tokosiʻi ʻi he ʻahó ni ʻoku nau ʻoange ʻa e lāngilangí kia Sihova ko e ʻOtuá. ʻI he kupu ko ení, te tau lāulea ki he meʻa ʻoku ʻuhinga ki ai ʻa hono ʻoange kia Sihova ʻa e lāngilangí mo e meʻa ʻoku totonu ke ne ueʻi kitautolu ke fai peheé. Te tau toe ako ki he founga ʻe lava ai ke tau ʻoange ki he ʻOtuá ʻa e lāngilangi ʻokú ne tuha moʻoni mo iá pea mo e founga te ne fakalāngilangiʻi ai hono huafá ʻi he kahaʻu vave maí.

KO E HĀ ʻOKU ʻUHINGA KI AI ʻA HONO ʻOANGE KIA SIHOVA ʻA E LĀNGILANGÍ?

2. Naʻe anga-fēfē hono fakaeʻa ʻe Sihova hono lāngilangí ʻi he Moʻunga Sainaí? (Sio foki ki he fakatātā.)

² Ko e hā ʻa e lāngilangi? ʻI he Tohi Tapú, ko e foʻi lea “lāngilangi” ʻe lava ke ʻuhinga ia ki ha meʻa pē ʻokú ne ʻai ha tokotaha ke makehe. Naʻe fai ʻe Sihova ha fakahāhā tuʻu-ki-muʻa ʻo hono lāngilangí ʻi ha taimi nounou pē hili hono fakahaofi ʻa e puleʻanga ʻo ʻIsilelí mei he nofo pōpula ʻi ʻIsipité. Sioloto atu ki he meʻa ʻoku hokó: Ko e laui miliona ʻo e kau ʻIsilelí ʻoku nau fakatahataha ʻi he veʻe Moʻunga Sainaí ke nau fetaulaki mo honau ʻOtuá. ʻOku kāpui ʻe ha fuʻu konga ʻao fakapōpōʻuli ʻa e moʻungá. Fakafokifā pē, ʻoku tō ha fuʻu mofuike—ngalingali ʻoku haʻu fakataha ia mo e moʻui ʻa ha moʻunga afi—ʻo ne luluʻi ʻa e kelekele ʻoku nau tuʻu aí lolotonga ia ko e ʻuhilá, maná, mo e ongo leʻo-lahi ʻaupito ʻo ha meʻaifi ʻoku ʻalu he ʻataá. (ʻEki. 19:​16-18; 24:17; Saame 68:8) Fakaʻuta atu ki he ofoofo ʻa e kau ʻIsileli ko iá ʻi he taimi naʻe fakaeʻa ai ʻe Sihova ʻa e fakahāhā mālohi ko eni ʻo hono lāngilangí.

3. Ko e hā ʻa e meʻa ʻoku ʻuhinga ki ai ʻa hono ʻoange kia Sihova ʻa e lāngilangí?

 ³ Kae fēfē ʻa e faʻahinga ʻo e tangatá? ʻE lava moʻoni ke tau ʻave ʻa e lāngilangí kia Sihova? ʻIo, te tau lava. Ko e founga ʻe taha ʻoku tau ʻoange ai kia Sihova ʻa e lāngilangí ko e talanoa ki he niʻihi kehé fekauʻaki mo hono mālohi fakaofó pea mo hono ngaahi ʻulungaanga fakalotomāfaná. ʻOku tau toe fakalāngilangiʻi ʻa e ʻOtuá ʻi heʻetau ʻoange kiate ia ʻa e fakahīkihiki ki he ngaahi meʻa ʻoku tau fakahoko ʻi hono mālohí. (ʻAi. 26:12) Ko Tuʻi Tēvita ko ha faʻifaʻitakiʻanga tuʻu-ki-muʻa ia ʻo ha tokotaha naʻá ne ʻoange ʻa e lāngilangí kia Sihova. ʻI ha lotu naʻe fai ʻe Tēvita ʻi he ʻao ʻo e fakatahaʻanga ʻo ʻIsilelí, naʻá ne pehē ki he ʻOtuá: “ʻOku ʻoʻou, ʻe Sihova, ʻa e lahí mo e mālohí pea mo e fakaʻofoʻofá mo e lāngilangí pea mo e ngeiá, he ko e meʻa kotoa pē ʻi hēvani pea ʻi he māmaní ʻoku ʻoʻou ia.” ʻI he fakaʻosi ʻa e lotu ʻa Tēvitá, “naʻe fakahīkihikiʻi ʻe he kotoa ʻo e fakatahaʻangá ʻa Sihova.”—1 Kal. 29:​11, 20.

4. Naʻe anga-fēfē hono ʻoange ʻe Sīsū ʻa e lāngilangí kia Sihová?

⁴ ʻI he ʻi māmani ʻa Sīsuú, naʻá ne fakalāngilangiʻi ʻene Tamaí ʻaki ʻene fakahaaʻi ko Ia ʻa e Matavai ʻo ʻene ngaahi maná. (Mk. 5:​18-20) Naʻe toe ʻoange foki ʻe Sīsū ʻa e lāngilangí kia Sihova ʻi he founga naʻá ne lea ai fekauʻaki mo ʻene Tamaí pea mo e anga ʻene fakafeangai ki he niʻihi kehé. ʻI he taimi ʻe taha, naʻe faiako ʻa Sīsū ʻi ha sinakoke. Naʻe kau ʻi he kau fanongo ko iá ha fefine ʻa ia naʻe uluisino ai ha tēmeniō ʻi he taʻu ʻe 18. Naʻe ʻai ia ʻe he tēmenioó ke ne pikoua koeʻuhí ke ʻikai ʻaupito malava ke ne tuʻu hangatonu hake. He meʻa fakamamahi moʻoni ē! ʻI hono ueʻi ʻa Sīsū ʻe he manavaʻofá, naʻá ne fakaofiofi ki he fefiné pea lea anga-fakaalaala kiate ia, ʻo pehē: “Fefine, kuo fakatauʻatāinaʻi koe mei ho puké.” Naʻá ne hili leva hono ongo nimá kiate ia, pea naʻá ne tuʻu hangatonu hake ʻi he taimi pē ko iá ʻo ne “kamata fakalāngilangiʻi ʻa e ʻOtuá,” naʻá ne toe foki ʻo moʻui lelei pea toe maʻu ʻa e ngeia! (Luke 13:​10-13) Ko e fefine ko iá naʻá ne maʻu ha ʻuhinga lelei ke ʻoange kia Sihova ʻa e lāngilangí, pea ʻoku pehē pē mo kitautolu.

KO E HĀ ʻOKÚ NE UEʻI KITAUTOLU KE ʻOANGE KIA SIHOVA ʻA E LĀNGILANGÍ?

5. Ko e hā ʻa e ngaahi ʻuhinga ʻoku tau maʻu ke fakaʻapaʻapa ai kia Sihová?

⁵ ʻOku tau fakalāngilangiʻi ʻa Sihova koeʻuhí ʻoku tau fakaʻapaʻapa loloto kiate ia. ʻOku tau maʻu ʻa e ngaahi ʻuhinga lahi ke fakaʻapaʻapa kiate ia. Ko Sihová ʻoku māfimafi-aoniu; ʻokú ne maʻu ʻa e mālohi taʻefakangatangata. (Saame 96:​4-7) Ko hono poto kāfakafá ʻoku fakamoʻoniʻi māʻalaʻala ia ʻi he ngaahi meʻa kuó ne ngaohí. Ko ia ʻa e Matavai mo e Tokotaha-Fakatolonga ʻo ʻetau moʻuí. (Fkh. 4:11) ʻOkú ne mateaki. (Fkh. 15:4) Ko e meʻa kotoa ʻokú ne faí ʻoku lavameʻa, pea ʻokú ne fai maʻu pē ki heʻene ngaahi talaʻofá. (Sios. 23:14) Tā neʻineʻi ke lea ʻa e palōfita ko Selemaiá ʻo fekauʻaki mo Sihova: “ʻI he lotolotonga ʻo e kau poto kotoa ʻo e ngaahi puleʻangá pea ʻi he lotolotonga ʻo honau ngaahi puleʻangá kotoa, ʻoku ʻikai ʻaupito ha taha ʻe hangē ko koé”! (Sel. 10:​6, 7) Ko e moʻoni, ʻoku tau maʻu ʻa e ngaahi ʻuhinga lelei ke fakaʻapaʻapa ki heʻetau Tamai fakahēvaní. Ka ʻoku ʻikai ngata pē hono maʻu ʻe Sihova ʻetau fakaʻapaʻapá—ʻokú ne toe maʻu mo ʻetau ʻofá.

6. Ko e hā ʻoku tau ʻofa ai kia Sihová?

⁶ ʻOku tau fakalāngilangiʻi ʻa Sihova koeʻuhí ʻoku tau ʻofa lahi kiate ia. Fakakaukau ki ha ngaahi ʻulungaanga ʻe niʻihi ʻo Sihova ʻokú ne ʻai ke tau ʻofa kiate iá. ʻOkú ne faimeesi mo manavaʻofa. (Saame 103:13; ʻAi. 49:15) ʻOkú ne kaungāongoʻi; ʻi he taimi ʻoku tau ongoʻi mamahi aí, ʻokú ne ongoʻi mamahi. (Sāk. 2:8) ʻOkú ne ʻai ke faingofua kiate kitautolu ke ʻunuʻunu ofi kiate ia ko ha Kaumeʻa. (Saame 25:14; Ngā. 17:27) Pea ʻokú ne anga-fakatōkilalo; “ʻokú ne punou hifo ke vakai ki he langí mo e māmaní, ʻo ne hiki hake ʻa e māʻulaló mei he efú.” (Saame 113:​6, 7) Ko e hā ka taʻeloto ai ha taha ke fakalāngilangiʻi hotau ʻOtua lahí?—Saame 86:12.

7. Ko e hā ʻa e faingamālie makehe ʻoku tau maʻú?

 ⁷ ʻOku tau fakalāngilangiʻi ʻa Sihova koeʻuhí ʻoku tau loto ke ʻiloʻi ia ʻe he niʻihi kehé. Ko e tokolahi ʻoku ʻikai ke nau ʻilo ʻa e moʻoni fekauʻaki mo Sihová. Ko e hā hono ʻuhingá? Koeʻuhi kuo hanga ʻe Sētane ʻo fakakuihi honau ʻatamaí ʻaki hono fakamafola ʻa e ngaahi loi fakalilifu fekauʻaki mo Ia. (2 Kol. 4:4) Kuo hanga ʻe Sētane ʻo fakatuiʻi ʻa e kakaí ko Sihová ʻoku faisāuni, taʻetokanga, pea ko ia ʻokú ne fakatupunga ʻa e lahi ʻo e faingataʻaʻia ʻa e māmaní. Ka ʻoku tau ʻilo ʻe kitautolu ʻa e moʻoni fekauʻaki mo hotau ʻOtuá! ʻOku tau maʻu ʻa e faingamālie ke fakatonutonu ʻa e maʻuhalá pea ʻoku iku atu ia ki hono ʻave ʻa e lāngilangí kiate ia. (ʻAi. 43:10) Ko e Saame 96 ʻoku fakahangataha ia ki hono ʻoange ʻa e lāngilangí kia Sihová. ʻI heʻetau lāulea ki ha niʻihi ʻo e ngaahi lea fakamānavaʻi ʻi he saame ko ení, fakakaukau fekauʻaki mo e ngaahi founga ʻa ia te ke ʻoange nai ai kia Sihova ʻa e lāngilangi ʻokú ne tuha moʻoni mo iá.

ʻE LAVA FĒFĒ KE TAU ʻOANGE KIA SIHOVA ʻA E LĀNGILANGI ʻOKÚ NE TUHA MO IÁ?

8. Ko e hā ʻa e founga ʻe taha ʻe lava ke tau fakalāngilangiʻi ai ʻa Sihová? (Saame 96:​1-3)

⁸ Lau ʻa e Saame 96:​1-3. ʻE lava ke tau fakalāngilangiʻi ʻa Sihova ʻaki ʻa e meʻa ʻoku tau leaʻaki fekauʻaki mo iá. ʻI he ngaahi veesi ko ení, ko e kakai ʻa Sihová ʻoku fakaafeʻi ke nau “hiva kia Sihova,” ke “fakahīkihikiʻi hono huafá,” ke “fanongonongo ʻa e ongoongo lelei ʻo ʻene fakamoʻuí,” pea ke “talaki hono lāngilangí ʻi he lotolotonga ʻo e ngaahi puleʻangá.” Ko e ngaahi founga kotoa eni ʻe lava ke tau fakalāngilangiʻi ai ʻetau Tamai fakahēvaní. Ko e kau Siu faitōnungá mo e kau Kalisitiane ʻi he ʻuluaki senitulí naʻe ʻikai ke nau toumoua ke tala ki he niʻihi kehé ʻa e ngaahi meʻa lelei kotoa kuo fai ʻe Sihova maʻa kinautolú pea ke taukapoʻi hono ongoongó. (Tan. 3:​16-18; Ngā. 4:29) ʻE lava fēfē ke tau fai ʻa e meʻa tatau?

9-10. Ko e hā ʻokú ke ako mei he hokosia ʻa Angelena? (Sio foki ki he fakatātaá.)

⁹ Fakakaukau ki he hokosia ʻa Angelena, a ko ha tuofefine ʻoku nofo ʻi ʻAmelika. Naʻá ne taukapoʻi loto-toʻa ʻa e ongoongo ʻo Sihová ʻi he ngāueʻanga naʻá ne ngāue aí. ʻI he tuʻunga ko ha tokotaha ngāue foʻou, naʻe fakaafeʻi ʻa Angelena ki ha fakataha ʻa ia ko e faʻahinga naʻa nau toki hū ki he ngāueʻangá naʻe ʻoange ʻa e faingamālie ke nau fakamatala ki honau ngaahi kaungāngāué ha meʻa fekauʻaki mo honau puipuituʻá. Naʻe teuteu ʻa Angelena ke ne fakahaaʻi ha ngaahi tā ʻa ia naʻá ne tapua atu ʻa e fiefia naʻá ne maʻu ʻi he hoko ko ha taha ʻo e Kau Fakamoʻoni ʻa Sihová.  Kae kehe, ki muʻa ke aʻu ki he taimi ke ne lea aí, naʻe lea ha kaungāngāue ʻo fakafeʻiloaki ko iá naʻe ʻohake ko ha taha ʻo e Kau Fakamoʻoni ʻa Sihová. Naʻe kamata ke ne manukiʻi ʻetau ngaahi tuí. ʻOku pehē ʻe Angelena: “Naʻe tā vave hoku mafú. Ka naʻá ku pehē loto pē: ‘Te u fakaʻatā ha tokotaha ke ne loi fekauʻaki mo Sihova? Pe te u taukapoʻi Ia?’”

¹⁰ ʻI he ʻosi e lea hono kaungāngāué, naʻe fai ʻe Angelena ha kiʻi lotu fakalongolongo. Naʻá ne lea anga-lelei leva kiate ia, ʻo pehē: “Ko hoku puipuituʻá ʻoku meimei tatau mo koe. Naʻe ʻohake foki au ko e taha ʻo e Kau Fakamoʻoni ʻa Sihová, pea ʻoku ou kei kau pē ki ai ʻo aʻu mai ki he ʻahó ni.” Neongo naʻe taulōfuʻu ʻa e tuʻungá, naʻe hanganaki nonga pē ʻa Angelena lolotonga ʻene fakahaaʻi ʻa e ngaahi tā fakalotomāfana mei he ngaahi fakatahataha fakalaumālie naʻá ne kau ki aí pea ʻi heʻene taukapoʻi fakapotopoto ʻene ngaahi tuí. (1 Pita 3:15) Ko e hā ʻa e olá? ʻI he aʻu ki he ngataʻanga ʻo e lea ʻa Angelena, kuo vai hifo e loto ʻo e tangatá. Naʻe aʻu ʻo ne fakahaaʻi naʻe ʻi ai ʻene ngaahi manatu melie ki he tupu hake ko e taha ʻo e Kau Fakamoʻoni ʻa Sihová. ʻOku pehē ʻe Angelena: “ʻOku tuha ʻa Sihova ke taukapoʻi. Ko ha lāngilangi ia ke lea maʻa hono huafá.” Ko kitautolu foki ʻoku tau maʻu ʻa e lāngilangi ʻo hono fakahīkihikiʻi ʻa Sihova pea fakalāngilangiʻi ia naʻa mo e taimi ʻoku taʻefakaʻapaʻapaʻi ai ia ʻe he niʻihi kehé.

11. ʻI he faai mai ʻa e hisitōliá, kuo anga-fēfē ʻa e muimui ʻa e kau lotu moʻoní ki he tefitoʻi moʻoni ʻi he Saame 96:8?

¹¹ Lau ʻa e Saame 96:8. ʻE lava ke tau fakalāngilangiʻi ʻa Sihova ʻaki ʻetau ngaahi meʻa mahuʻingá. Ko e kau lotu moʻoní kuo nau fakalāngilangiʻi maʻu pē ʻa Sihova ʻi he founga ko iá. (Pal. 3:9) Ko e fakatātaá, ko e kau ʻIsilelí naʻa nau fai ha tokoni ki hono langa mo monomono ʻa e temipalé. (2 Tuʻi 12:​4, 5; 1 Kal. 29:​3-9) Ko e kau ākonga tokanga ʻa Kalaisí naʻa nau tokangaʻi ia mo ʻene kau ʻapositoló “ʻaki ʻenau ngaahi koloá.” (Luke 8:​1-3) Ko e kau Kalisitiane ʻi he ʻuluaki senitulí naʻa nau toe ʻave ha tokoni fakatamaki ki honau fanga tokoua mo e fanga tuofāfine fakalaumālié. (Ngā. 11:​27-29) ʻI he ʻahó ni, ko kitautolu foki ʻe lava ke tau fakalāngilangiʻi ʻa Sihova fakafou ʻi heʻetau ngaahi tokoni loto-fiefoakí.

12. ʻE lava fēfē ke ʻave ʻe heʻetau ngaahi tokoní ʻa e lāngilangí kia Sihova? (Sio foki ki he fakatātaá.)

¹² Fakakaukau angé ki ha hokosia ʻe taha ʻoku fakahaaʻi ai ʻa e founga ʻoku ʻave ai ʻe heʻetau ngaahi tokoní ʻa e lāngilangí kia Sihova. Naʻe fakamatalaʻi ʻi ha līpooti ʻi he 2020 ʻa e uesia ʻe ha laʻalaʻā fuoloa ʻa Simipāpuē. Ko e laui miliona naʻa nau ʻi he ngutuluo ʻo e hōngeá, ʻo kau ai ha tuofefine ko Prisca. Neongo ʻa e laʻalaʻaá, naʻe  hokohoko atu pē ʻa e malanga tuʻupau ʻa Prisca ʻi he Pulelulú mo e Falaité, naʻa mo e lolotonga ʻa e faʻahitaʻu teuteu ki he tō-taʻú. Naʻe manukiʻi ia ʻe hono ngaahi kaungāʻapí ʻi heʻene ʻalu ʻaʻana ʻo ngāue fakamalanga kae ʻikai ke ngāue ʻi heʻene ngoué, ʻo pehē, “Te ke mate he fiekaiá.” Naʻe tali ange ʻe Prisca ʻi he falala pau, “Kuo teʻeki ai ʻaupito ke liʻaki ʻe Sihova ʻene kau sevānití.” ʻIkai fuoloa mei ai, naʻá ne maʻu ʻaonga mei he ngaahi tokoni fakatamaki mei heʻetau kautahá. Mālō mo ʻetau ngaahi meʻaʻofá naʻe lava ai ke ala maʻu ʻa e ngaahi tokoni fakatamaki ko iá. Naʻe ʻohovale ʻa e ngaahi kaungāʻapi ʻo Prisca, pea nau tala ange kiate ia, “Kuo ʻikai ʻaupito ke liʻaki koe ʻe he ʻOtuá, ko ia ʻoku mau loto ke ako lahi ange fekauʻaki mo ia.” Ko e toko fitu hono ngaahi kaungāʻapí naʻe kamata ke nau maʻu ʻa e ngaahi fakataha ʻa e fakatahaʻangá.

13. ʻE lava fēfē ke tau fakalāngilangiʻi ʻa Sihova ʻaki ʻetau tōʻongá? (Saame 96:9)

¹³ Lau ʻa e Saame 96:9. ʻE lava ke tau fakalāngilangiʻi ʻa Sihova ʻaki ʻetau tōʻongá. Ko e kau taulaʻeiki naʻe ngāue ʻi he temipale ʻo Sihová naʻe fiemaʻu ke nau maʻa fakaesino. (ʻEki. 40:​30-32) Neongo ia, ko e meʻa ʻoku toe mahuʻinga ange ʻi he maʻa fakaesinó ko e maʻa fakaeʻulungāngá. (Saame 24:​3, 4; 1 Pita 1:​15, 16) ʻOku fiemaʻu ke tau ngāue mālohi ke huʻi atu “ʻa e angaʻitangata motuʻá”—ʻa e ngaahi fakakaukau mo e tōʻonga taʻemaʻá—pea ke kofuʻaki kitautolu “ʻa e angaʻitangata foʻoú”—ʻa e anga ʻo e fakakaukau mo e tōʻonga ʻokú ne tapua atu ʻa e ngaahi ʻulungaanga lāngilangiʻia ʻo Sihová. (Kol. 3:​9, 10) ʻI he tokoni ʻa Sihová, naʻa mo e faʻahinga ʻoku ʻulungaanga taʻetaau mo anga-fakamālohi tahá ʻe lava ke nau liliu pea ʻai ʻa e angaʻitangata foʻoú.

14. Ko e hā ʻokú ke ako mei he hokosia ʻa Jack? (Sio foki ki he fakatātaá.)

¹⁴ Fakakaukau ki he hokosia ʻa Jack, ko ha tangata anga-fakamālohi mo fakatuʻutāmaki naʻe ui pē ko e Tēvoló. Koeʻuhi ko ʻene ngaahi hiá, naʻe tautea mate ai ʻa Jack. Kae kehe, lolotonga ʻa e tatali ki he ʻaho ʻe fakahoko ai ʻa e tauteá, naʻe loto-lelei ʻa Jack ke ako Tohi Tapu mo ha tokoua naʻe ʻaʻahi ki he pilīsone naʻe tauhi ai iá. Neongo ʻa e puipuituʻa ʻo Jack, naʻá ne huʻi atu hono angaʻitangata motuʻá pea ʻi he faai atu ʻa e taimí naʻá ne taau ke papitaiso. Naʻe liliu lahi ʻa Jack he ʻi he ʻaho naʻe hilifaki ai hono tauteá, ko e niʻihi ʻo e kau sela ʻi he pilīsoné naʻa nau tangi ʻi heʻenau lea māvae kiate iá. Ko ha sātini naʻe ngāue ʻi he pilīsoné naʻá ne pehē: “Naʻe ʻi ai e taimi naʻe hoko ai ʻa Jack ko e pōpula kovi taha ʻi he feituʻú ni. Ko eni ʻokú ne hoko ko e taha ʻi he kau pōpula anga-lelei tahá.” ʻI he uike hili hono  tāmateʻi ʻa Jack, ko e fanga tokoua naʻa nau toe foki ke fakahoko ʻa e fakataha fakauike ʻi he pilīsoné naʻa nau fetaulaki mo ha pōpula ʻa ia ko e fuofua taimi eni ke ne maʻu ai ʻa e fakatahá. Ko e hā naʻá ne ueʻi ia ke ne maʻu ʻa e fakatahá? Naʻe maongo kiate ia ʻa e liliu ʻa e tōʻonga ʻa Jack pea naʻá ne loto ke ʻiloʻi ʻa e meʻa naʻe fiemaʻu ke ne fai ke lotu ai kia Sihová. ʻOku hā mahino, ko ʻetau tōʻongá ʻe lava ke ne ʻave ʻa e lāngilangí ki heʻetau Tamai fakahēvaní!—1 Pita 2:12.

ʻE ANGA-FĒFĒ HONO FAKALĀNGILANGIʻI ʻE SIHOVA HONO HUAFÁ ʻI HE KAHAʻU VAVE MAÍ?

15. ʻE anga-fēfē hono fakalāngilangiʻi fakaʻaufuli ʻe Sihova hono huafá ʻi he kahaʻu vave maí? (Saame 96:​10-13)

¹⁵ Lau ʻa e Saame 96:​10-13. Ko e ngaahi veesi fakaʻosi ko eni ʻo e Saame 96 ʻoku fakamatalaʻi ai ʻa Sihova ko ha Fakamaau mo ha Tuʻi māʻoniʻoni. ʻE anga-fēfē hono fakalāngilangiʻi ʻe Sihova hono huafá ʻi he kahaʻu vave maí? Fakafou ʻi heʻene ngaahi fakamāú. ʻE vavé ni ke ne fakaʻauha ʻa Pāpilone ko e Lahi ʻi heʻene lumaʻi ʻa hono huafa māʻoniʻoní. (Fkh. 17:​5, 16; 19:​1, 2) Ko e niʻihi te nau sio tonu ʻi hono fakaʻauha ʻo Pāpilone ko e Lahí te nau kau nai mo kitautolu ʻi he lotu moʻoní. Fakaʻosí, ʻi ʻĀmaketone, ʻe fakaʻauha ʻe Sihova ʻa e fokotuʻutuʻu kotoa ʻa Sētané, ʻo toʻo ʻosi atu ʻa e faʻahinga kotoa ʻoku fakafepaki kiate ia mo laukovi ki hono huafá, kae fakahaofi ʻa e faʻahinga kotoa ʻoku ʻofa mo talangofua kiate iá pea ʻoku nau laukauʻaki ke ʻoange kiate ia ʻa e lāngilangí. (Mk. 8:38; 2 Tes. 1:​6-10) Hili ʻa e ʻahiʻahi fakaʻosi ʻi he ngataʻanga ʻo e Pule Taʻu ʻe Taha Afe ʻa Kalaisí, ʻe fakamāʻoniʻoniʻi fakaʻaufuli ʻe Sihova hono huafá. (Fkh. 20:​7-10) ʻI he taimi ko iá, “ko e māmaní ʻe fonu ʻi he ʻilo ki he lāngilangi ʻo Sihová ʻo hangē ko hono ʻufiʻufi ʻe he vaí ʻa e tahí.”—Hap. 2:14.

16. Ko e hā ʻokú ke fakapapauʻi ke faí? (Sio foki ki he fakatātaá.)

¹⁶ He fakafiefia moʻoni ē ko e taimi ʻe hanga ai ʻe he tokotaha kotoa ʻo ʻoange kia Sihova ʻa e lāngilangi ʻoku tuha mo hono huafá! Ka ʻi he teʻeki ke aʻu ki he ʻaho ko iá, ʻe lava ke tau fai ʻetau tafaʻakí ʻaki hono fakalāngilangiʻi hotau ʻOtuá ʻi he faingamālie kotoa pē. Ke fakamamafaʻi ʻa e ʻīsiu mahuʻinga ko ení, kuo fili ʻe he Kulupu Pulé ʻa e Saame 96:8 ko ʻetau konga tohi fakataʻu ki he 2025: “ʻOange kia Sihova ʻa e lāngilangi ʻoku tuha mo hono huafá.”