1. Ko e hā ʻe lava ke tau fai ke ʻai ʻa Sihova ke fiefiá?

 SIOLOTO atu ʻokú ke ʻoange ki ha tokotaha ʻokú ke ʻofa ai ha meʻaʻofa makehe ʻoku fakaʻofoʻofa mo ʻaonga. He fakalotomamahi ē kiate koe kapau ʻoku ʻalu pē ʻa e tokotahá ʻo faʻo ia ʻi ha puha pea ʻikai ke toe tokanga ki ai! ʻI he tafaʻaki ʻe tahá, ʻoku pau pē te ke fiefia kapau te ne ngāueleleiʻaki hoʻo meʻaʻofá peá ne houngaʻia ai. Ko e hā ʻa e poiní? Kuo foaki mai ʻe Sihova hono ʻAló maʻatautolu. He fiefia ē ko Sihova ʻi heʻetau fakahāhā ʻa e houngaʻia ki he meʻaʻofa mahuʻinga ko iá pea ki heʻene ʻofá, ʻa e meʻa naʻá ne ueʻi ia ke tokonaki mai ʻa e huhuʻí!—Sione 3:16; Loma 5:​7, 8.

2. Ko e hā te tau lāulea ki ai ʻi he kupu ko ení?

² Kae kehe, ʻi he faai atu ʻa e taimí, ʻe kamata nai ke tau fakamaʻamaʻaʻi ʻa e meʻaʻofa ʻo e huhuʻí. ʻE hangē ia ʻoku tau faʻo ʻa e meʻaʻofa ʻa e ʻOtuá ʻi ha puha. ʻOku tau fiefia ke maʻu ia, ka ʻoku tau hanganaki tukunoaʻi ia. Ke fakaʻehiʻehi mei he hoko iá, kuo pau ke tau fakafoʻou maʻu pē ʻetau houngaʻia ki he meʻa kuo fai ʻe he ʻOtuá mo Kalaisi maʻa kitautolú. Ko e kupu ko ení ʻe lava ke ne tokoniʻi kitautolu ke tau fai pehē. Te tau lāulea ki he founga ʻoku tau maʻu ʻaonga ai mei he huhuʻí ʻi he taimí ni pea mo e founga ʻe lava ai ke tau maʻu ʻaonga mei ai ʻi he kahaʻú. Te tau toe lāulea ki he founga ʻe lava ai ke tau fakahāhā ʻa e houngaʻia ki he ʻofa ʻa Sihová, tautefito ʻi he lolotonga ʻa e faʻahitaʻu Fakamanatu ko ení.

FOUNGA ʻOKU TAU MAʻU ʻAONGA AI ʻI HE TAIMI NÍ

3. Ko e hā ʻa e founga ʻe taha ʻoku tau maʻu ʻaonga ai mei he huhuʻí he taimí ni?

³ ʻOku tau ʻosi maʻu ʻaonga mei he feilaulau huhuʻi ʻa Kalaisí. Ko e fakatātaá, makatuʻunga ʻi he huhuʻí, ʻoku fakamolemoleʻi ʻe Sihova ʻetau ngaahi angahalá. ʻOku ʻikai ke ne moʻuaʻaki ke  fakamolemoleʻi kitautolu. Ka ʻokú ne loto ki ai. Naʻe hiva ʻa e tokotaha-tohi-sāmé ʻi he houngaʻia: “He ko koe, ʻe Sihova, ʻokú ke lelei mo mateuteu ke fakamolemole.”—Saame 86:5; 103:​3, 10-13.

4. Naʻe tokonaki mai ʻe Sihova ʻa e huhuʻí kia hai? (Luke 5:32; 1 Tīmote 1:15)

⁴ ʻOku ongoʻi ʻe he niʻihi ʻoku ʻikai ke nau taau mo e fakamolemole ʻa Sihová. Ko hono moʻoní, ko kitautolu kotoa ʻoku ʻikai ke tau taau. Naʻe mahinoʻi ʻe he ʻapositolo ko Paulá naʻe “ʻikai [ke ne] taau mo hono ui ko ha ʻapositoló.” Pea neongo ia, naʻá ne toe pehē: “ʻI he ʻofa maʻataʻatā ʻa e ʻOtuá ʻoku ou ʻi he tuʻunga ai ʻoku ou ʻi aí.” (1 Kol. 15:​9, 10) ʻI heʻetau fakatomala ʻi heʻetau ngaahi angahalá, ʻoku fakamolemoleʻi kitautolu ʻe Sihova. Ko e hā hono ʻuhingá? ʻOku ʻikai ko e ʻuhingá ʻoku tau tuha mo ia, ka koeʻuhí ʻokú ne ʻofa ʻiate kitautolu. Kapau ʻoku fakahohaʻasi koe ʻe he ngaahi ongoʻi taʻetāú, manatuʻi naʻe tokonaki mai ʻe Sihova ʻa e huhuʻí, ʻo ʻikai ki he kakai ʻikai haʻanau angahalá, ka ki he kau faiangahala fakatomalá.—Lau ʻa e Luke 5:32; 1 Tīmote 1:15.

5. ʻOku totonu ke ongoʻi ʻe ha taha ʻo kitautolu ʻoku ʻi ai ʻene totonu ke maʻu ʻa e meesi ʻa Sihová? Fakamatalaʻi.

⁵ ʻOku ʻikai totonu ki ha taha ʻo kitautolu ke ne ongoʻi ʻoku ʻi ai ʻene totonu ke maʻu ʻa e meesi ʻa Sihová neongo kapau kuo tau fakamoleki ʻa e taʻu lahi ʻi heʻene ngāué. Ko e moʻoni, ʻoku fakahoungaʻi ʻe Sihova ʻetau lēkooti ʻo e faitōnungá. (Hep. 6:10) Naʻá ne foaki mai hono ʻAló ko ha meʻaʻofa taʻetotongi, ʻo ʻikai ko ha totongi ki he ngāue naʻa tau fakahokó. Kapau te tau taukaveʻi kuo tau tuha ke maʻu ʻene mēsí pe ʻoku tau maʻu ʻa e totonu ki ha tokanga makehe, ʻe hangē ia haʻatau pehē ko e koto kulanoa ʻa e pekia ʻa Kalaisí.—Fakafehoanaki mo e Kalētia 2:21.

6. Ko e hā naʻe ngāue mālohi ai ʻa Paula ʻi he ngāue ʻa Sihová?

⁶ Naʻe ʻiloʻi ʻe Paula heʻikai lava ke ne ngāueʻi ʻa e hōifua ʻa e ʻOtuá. Ko e hā leva naʻá ne mātuʻaki ngāue mālohi ai ʻi he ngāue ʻa Sihová? Naʻe ʻikai koeʻuhí ke fakamoʻoniʻi ʻokú ne tuha mo ia, ka ke fakahāhā ʻa e houngaʻia ki he ʻofa maʻataʻatā ʻa Sihová. (ʻEf. 3:7) Hangē ko Paulá, ʻoku hokohoko atu ʻetau tauhi faivelengá, ʻo ʻikai koeʻuhí ke maʻu ʻa e meesi ʻa Sihová, ka ke fakahāhā ʻa e houngaʻia ki ai.

7. Ko e hā ʻa e founga ʻe taha ʻoku tau maʻu ʻaonga ai mei he huhuʻí he taimi ni? (Loma 5:1; Sēmisi 2:23)

⁷ Ko e founga ʻe taha ʻoku tau maʻu ʻaonga ai mei he huhuʻí he taimi ní ʻoku lava ke tau maʻu ha vahaʻangatae fakafoʻituitui vāofi mo Sihova. a Hangē ko ia naʻe lave ki ai ʻi he kupu ki muʻá, ʻi he taimi naʻe fanauʻi ai kitautolú, naʻe ʻikai ke tau maʻu ha vahaʻangatae mo e ʻOtuá. Ka koeʻuhi ko e huhuʻí, ʻoku lava ke tau maʻu ʻa e “melino mo e ʻOtuá” pea ʻoku lava ai ke tau ʻunuʻunu ofi kiate ia.—Lau ʻa e Loma 5:1; Sēmisi 2:23.

8. Ko e hā ʻoku totonu ai ke tau houngaʻia kia Sihova ʻi he monū ʻo e lotú?

⁸ Fakakaukau angé ki ha tafaʻaki pē ʻe taha ʻo hotau vahaʻangatae mo Sihová—ko e monū ʻo e lotú. ʻOku fanongo ʻa Sihova ʻo ʻikai ngata pē ki he ngaahi lotu fakahāhā ʻa hono kakaí ʻi heʻenau fakatahataha fakatahá kae toe pehē foki ki he ngaahi lotu fakafoʻituitui ʻa e tokotaha taki taha ʻo kitautolu. Ko e lotú ʻe lava ke ne fakanonga hotau lotó pea ʻomai ʻa e nonga ʻo e ʻatamaí, ka ʻokú ne ʻomai ʻa e meʻa lahi ange ʻi he faitoʻo fakafiemālié pē. ʻE lava ke ne fakalolotoʻi ʻetau kaumeʻa mo e ʻOtuá. (Saame 65:2; Sēm. 4:8; 1 Sio. 5:14) Lolotonga ʻa e ʻi māmani ʻa Sīsuú, naʻá ne lotu maʻu pē koeʻuhí naʻá ne ʻiloʻi naʻe fanongo mai ʻa Sihova pea ko e lotú te ne tauhi ke mālohi ʻa hono vahaʻangatae mo ʻene Tamaí. (Luke 5:16) He houngaʻia ē ko kitautolu, makatuʻunga ʻi he feilaulau ʻa Sīsuú, ʻe lava ke tau kaumeʻa mo Sihova pea naʻa mo e lea kiate Ia ʻi he lotu!

 FOUNGA ʻE LAVA AI KE TAU MAʻU ʻAONGA ʻI HE KAHAʻÚ

9. ʻE anga-fēfē ʻaonga ʻa e huhuʻí ki he kau lotu faitōnungá ʻi he kahaʻú?

⁹ ʻE anga-fēfē maʻu ʻaonga ʻa e kau lotu faitōnunga ʻa Sihová mei he huhuʻí ʻi he kahaʻú? Te nau maʻu ʻa e moʻui taʻengatá. ʻOku fakakaukau ʻa e kakai tokolahi ʻoku taʻemalava eni koeʻuhí ko e faʻahinga ʻo e tangatá kuo nau mate ʻi he taʻu ē ʻe laui afe. Ka ko e muʻaki taumuʻa ʻa Sihova ki he faʻahinga ʻo e tangatá ke nau moʻui taʻengata. Kapau naʻe ʻikai ke faiangahala ʻa ʻĀtama, heʻikai ha taha ia ʻe fakakaukau ki he moʻui taʻengatá ko ha foʻi loi mālie. Pea neongo ʻoku hā ngali fakaofo nai ʻa e moʻui taʻengatá ʻi he taimí ni, ʻoku pehē pē mo e mahuʻinga naʻe totongi ʻe Sihova koeʻuhi ke toe fakafoki mai ʻa e ʻamanaki ko ení kiate kitautolú—ʻa e meʻaʻofa ko hono ʻAlo ʻofeiná.—Loma 8:32.

10. Ko e hā ʻoku fakatuʻotuʻa atu ki ai ʻa e kau paní mo e fanga sipi kehé?

¹⁰ Neongo ko e moʻui taʻengatá ko ha ʻaonga ia te tau maʻu ʻi he kahaʻú, ʻoku loto ʻa Sihova ke tau tomuʻa fakakaukau atu ki ai ʻi he taimí ni. ʻOku fakatuʻotuʻa atu ʻa e kau paní ki ha moʻui mohu taumuʻa ʻi hēvani ʻi heʻenau pule mai ki he māmaní fakataha mo Kalaisi. (Fkh. 20:6) ʻOku ʻamanaki atu ʻa e fanga sipi kehé ki he moʻui ʻi ha māmani palataisi ʻo ʻataʻatā mei he langá mo e mamahí. (Fkh. 21:​3, 4) Ko e taha koe ʻo e fanga sipi kehé fakataha mo e ʻamanaki ʻo e moʻui taʻengata ʻi he māmaní? Ko e pale ko iá ʻoku ʻikai ko ha fakahounga pē! Ko e taumuʻa ia naʻe fakatupu ai ʻa e faʻahinga kotoa ʻo e tangatá. Ko e moʻui ʻi he māmaní te ne ʻai kitautolu ke tau fiefia lahi.

11-12. Ko e hā ʻa e ngaahi tāpuaki ʻe niʻihi ʻi he Palataisí ʻe lava ke tau tomuʻa fakakaukau atu ki aí? (Sio foki ki he fakatātaá.)

¹¹ Sioloto atu pe ʻe fēfē hoʻo moʻuí ʻi he māmani Palataisí. Heʻikai ʻaupito te ke hohaʻa fekauʻaki mo e puké pe ko e maté. (ʻAi. 25:8; 33:24) ʻE fakatōliʻa ʻe Sihova ʻa e holi totonu kotoa pē ʻokú ke maʻú. Ko e hā ʻa e malaʻe te ke saiʻia ke tuli ki aí? Fīsiki? Kemi? Mūsika? ʻAati? ʻOku ʻikai ha veiveiua, ʻe fiemaʻu ha kau ʻākiteki, kau langa, mo e kau ngoue. Ko e moʻoni, ʻe ʻi ai foki mo ha fiemaʻu ki he ngaahi ngāue tokoni  mo monomonó, hangē ko e teuteu ʻo e meʻatokoní, faʻu ʻa e ngaahi meʻangāué, pea tokangaʻi ʻa e ʻātakai fakaʻofoʻofá. (ʻAi. 35:1; 65:21) ʻI he kotoa ʻo ʻitānití, te ke maʻu ʻa e taimi ke ako ha faʻahinga pōtoʻi pē te ke fakakaukau atu ki ai.

¹² He meʻa fakafiefia ē ke talitali lelei ʻa e faʻahinga ʻe fokotuʻu hake mei he maté! (Ngā. 24:15) Sioloto atu foki ki he fiefia te ke maʻu ʻi he ako lahi ange fekauʻaki mo Sihova ʻaki hono sivisiviʻi ʻene ngaahi ngāue fakaefakatupu kāfakafá. (Saame 104:24; ʻAi. 11:9) Hiliō he meʻa kotoa, he meʻa fakafiefia ē ke lotu kia Sihova ʻo ʻikai ha ongoʻi halaia ʻe taha! Te ke fakafetongi ʻa e ngaahi tāpuaki ko eni ʻi he kahaʻú ʻaki “ʻa e fiefia fakataimi ʻi he angahalá”? (Hep. 11:25) ʻIkai ʻaupito! Ko e ngaahi tāpuaki ko ení ʻoku tuha ia mo ha feilaulau pē kuo pau ke tau fai he taimí ni. Manatuʻi, ʻe ʻikai ke hoko ai pē ʻa e māmani Palataisí ko ha ʻamanaki ki he kahaʻú. ʻE faai atu pē ʻo hoko ia ko e meʻa moʻoní. Naʻe ʻikai mei malava eni kapau naʻe ʻikai ke ʻofa lahi ʻa Sihova ʻiate kitautolu ʻo ne tokonaki mai ʻa e meʻaʻofa ko hono ʻAló!

FAKAFEANGAI KI HE ʻOFA ʻA SIHOVÁ

13. ʻE lava fēfē ke tau fakahāhā ʻa e houngaʻia ki he ʻofa ʻa Sihová? (2 Kolinitō 6:1)

¹³ ʻE lava fēfē ke tau fakahāhā ʻa e houngaʻia kia Sihova ʻi hono tokonaki mai ʻa e huhuʻí? ʻAki hono fakamuʻomuʻa ʻene ngāué ʻi heʻetau moʻuí. (Māt. 6:33) He ko ē, naʻe pekia ʻa Sīsū “koeʻuhi ko e faʻahinga ko ia ʻoku moʻuí ke ʻoua te nau kei moʻui maʻanautolu, ka maʻá e tokotaha naʻe pekia maʻanautolu pea fokotuʻu haké.” (2 Kol. 5:15) Ko e moʻoni ʻoku ʻikai ke tau loto ke taʻemaʻu ʻa e taumuʻa ʻo e ʻofa maʻataʻatā ʻa Sihová.—Lau ʻa e 2 Kolinitō 6:1.

14. ʻE lava fēfē ke tau ngāueʻi ʻa e tui ki he tataki ʻa Sihová?

¹⁴ ʻE lava foki ke tau fakafeangai ki he ʻofa ʻa Sihová ʻaki hono ngāueʻi ʻa e tui ki heʻene tatakí. Anga-fēfē? ʻI he teu ke tau fai ha ngaahi fili, hangē ko e lahi ʻo e ako fakamāmani ʻoku tau fiemaʻú pe ko e faʻahinga ngāue ʻoku totonu ke tau talí, kuo pau ke tau fakakaukau ki he meʻa ʻoku loto ʻa Sihova ke tau faí. (1 Kol. 10:31; 2 Kol. 5:7) ʻI heʻetau ngāueʻi ʻetau tuí, ʻoku hoko ha meʻa fakaofo—ko ʻetau tui kia Sihová mo ʻetau kaumeʻa mo iá ʻoku tupu ʻo toe mālohi ange. Ko ʻetau ʻamanakí ʻoku toe fakaivimālohiʻi.—Loma 5:​3-5; Sēm. 2:​21, 22.

15. ʻE lava fēfē ke tau fakahāhā ʻetau houngaʻiá lolotonga ʻa e faʻahitaʻu Fakamanatú?

¹⁵ ʻOku toe ʻi ai ha founga ʻe taha ʻe lava ke tau fakahāhā ai ʻa e houngaʻia ki he ʻofa ʻa Sihová. Ko hono ngāueʻaki ʻa e faʻahitaʻu Fakamanatu ko ení ke fakahaaʻi kia Sihova ʻa e lahi ʻetau houngaʻia ʻi he huhuʻí. Tānaki atu ki he palani ke maʻu ʻa e Fakamanatú, ʻe lava ke tau fakaafeʻi ʻa e niʻihi kehé ke nau maʻu ia. (1 Tīm. 2:4) Fakamatalaʻi ki he faʻahinga ʻokú ke fakaafeʻí ʻa e meʻa ʻe fai ʻi he Fakamanatú. ʻE tokoni kiate koe ke ke fakahaaʻi ange ʻi he jw.org ʻa e vitiō Ko e Hā Naʻe Pekia Ai ʻa Sīsuú? mo e Fakamanatu ʻa e Pekia ʻa Sīsū. Ko e kau mātuʻá ʻoku totonu ke nau fakapapauʻi ke fakaafeʻi ʻa e faʻahinga ʻikai longomoʻuí.  Sioloto atu ki he fiefia ʻi hēvani mo māmani kapau ʻoku ueʻi ha niʻihi ʻo e fanga sipi mole ʻa Sihová ke nau foki ki heʻene tākangá! (Luke 15:​4-7) ʻI he Fakamanatú, tau ʻai ko ha taumuʻa ia ke lea fakafeʻiloaki ʻo ʻikai ki he fanga tokouá pē kae tautefito ki he faʻahinga foʻoú pe ki he faʻahinga kuo fuoloa ʻa e ʻikai ke nau maʻu ʻa e fakatahá. ʻOku tau loto ke ʻai ke nau ongoʻi ʻoku talitali lelei kinautolu!—Loma 12:13.

16. Ko e hā ʻoku totonu ai ke tau fakakaukau ke fakalahi ʻetau ngāue fakafaifekaú lolotonga ʻa e faʻahitaʻu Fakamanatú?

¹⁶ ʻE lava ke ke fakalahi hoʻo ngaahi ngāue fakalaumālié lolotonga ʻa e faʻahitaʻu Fakamanatú? Ko e fai peheé ko ha founga lelei ia ki hono fakahāhā ʻa e houngaʻia ki he meʻa kotoa kuo fai ʻe he ʻOtuá mo Kalaisi maʻa kitautolú. Ko e lahi ange ʻetau kau ʻi he ngāue ʻa Sihová, ko e lahi ange ia ʻetau hokosia ʻene poupoú, pea ko hono olá, ko ʻetau falala pau kiate iá ʻe tupu ʻo toe mālohi ange. (1 Kol. 3:9) Pehē foki, fakapapauʻi ke muimui ʻi he lau Tohi Tapu ki he Fakamanatú ʻa ia ʻoku hā ʻi he Ko Hono Vakaiʻi Fakaʻaho ʻa e Tohi Tapú pe ʻi he saati ʻoku maʻu ʻi he polokalama ngāue ki he fakataha lolotonga e uiké. Te ke fili nai ke ngāueʻaki ʻa e ngaahi konga Tohi Tapu ko iá ko ha makatuʻunga ki ha poloseki ako.

17. Ko e hā ʻa e meʻa ʻoku fakahōifua kia Sihová? (Sio foki ki he puha “ Founga ke Fakafeangai Ai ki he ʻOfa ʻa Sihová.”)

¹⁷ Ko e moʻoni, heʻikai nai ke fakaʻatā koe ʻe ho tuʻungá ke ke fai ʻa e meʻa kotoa naʻe fokotuʻu atu ʻi he kupu ko ení. Kae kehe, manatuʻi ʻoku ʻikai ke sio hifo ʻa Sihova ʻo fakahoa ʻa e lahi ʻo e meʻa ʻokú ke foakí ki he meʻa ʻoku foaki ʻe he niʻihi kehé; ʻokú ne sio ki he meʻa ʻoku ʻi ho lotó. ʻOkú ne hōifua ʻi heʻene vakai hifo ki hoʻo houngaʻia loto-moʻoni ʻi heʻene meʻaʻofa mahuʻingá, ʻa e huhuʻí.—1 Sām. 16:7; Mk. 12:​41-44.

18. Ko e hā ʻoku tau houngaʻia ai ʻia Sihova ko e ʻOtuá mo Sīsū Kalaisí?

¹⁸ Koeʻuhí pē ko e huhuʻí ʻoku malava ai ke fakamolemoleʻi ʻetau ngaahi angahalá, hoko ko ha kaumeʻa ʻo Sihova, pea maʻu ʻa e ʻamanaki ʻo e moʻui taʻengatá. ʻOfa ke tau fakahāhā maʻu pē ʻetau houngaʻia ki he ʻofa ʻa Sihová, ʻa e meʻa naʻá ne ueʻi ia ke ne ʻai ke tau ala maʻu ʻa e ngaahi tāpuaki ko ení. (1 Sio. 4:19) ʻOfa ke tau toe fakahāhā ʻetau houngaʻia kia Sīsū, ʻa ia naʻá ne ʻofa lahi ʻaupito ʻiate kitautolu ʻo ne foaki ai ʻene moʻui fakaetangatá maʻatautolu!—Sione 15:13.