1. Ko e hā ʻa e ʻuhinga ʻe taha naʻe kamataʻi ai ʻe Sihova ʻa e fokotuʻutuʻu ʻo e nofo malí?

 KO Sihova ʻa e “ʻOtua fiefiá,” pea ʻokú ne loto ke tau fiefia foki mo kitautolu. (1 Tīm. 1:11) Kuó ne ʻomai ʻa e ngaahi meʻaʻofa lahi ke tokoniʻi kitautolu ke fiefia ʻi he moʻuí. (Sēm. 1:17) Ko e taha ʻi he ngaahi meʻaʻofa ko iá ko e nofo malí. ʻI he taimi ʻoku mali ai ha tangata mo ha fefine, ʻokú na fuakava ke na feʻofaʻaki, fefakaʻapaʻapaʻaki mo fetauhiʻaki. Ko hono tauhi maʻu ha haʻi vāofi ʻe lava ke na maʻu ai ʻa e fiefia moʻoni.—Pal. 5:18.

2. Ko e hā ʻa e tuʻunga ʻoku ʻi ai ʻa e ngaahi nofo mali lahi he ʻaho ní?

² Ko e meʻa fakamamahí, ko e ngaahi hoa mali tokolahi ʻi he māmaní he ʻahó ni ʻoku ngalo ʻiate kinautolu ʻa e palōmesi naʻa nau fai ʻi honau ʻaho malí. Ko hono olá, ʻoku ʻikai ke nau fiefia. ʻOku fakahaaʻi ʻi ha līpooti ki muí ni mei he Kautaha Moʻui ʻa Māmaní ko e ngaahi husepāniti tokolahi ʻoku nau ngaohikoviʻi fakaesino, fakaelea, pe fakaeongo honau ngaahi uaifí. Ko ha husepāniti ʻoku fai pehē te ne fakafeangai anga-fakaʻapaʻapa nai ki hono uaifí ʻi he sio ʻa e niʻihi kehé ka ne ngaohikoviʻi ia ʻi ʻapi. ʻOku toe palopalema ʻa e ngaahi nofo mali lahi ʻi he sio ʻa e husepānití ʻi he ʻata fakalieliá.

3. Ko e hā ʻa e ngaahi meʻa ʻe lava ke ne fakatupunga ʻa e tōʻonga fakamamahi ʻa ha husepāniti?

³ Ko e hā ʻe lava ke ne fakatupunga ha ngaahi husepāniti ʻe niʻihi ke nau anga-fakamamahí? Naʻe ʻohake nai kinautolu ʻe ha tamai anga-fakamālohi, ko ia ʻoku nau fakakaukau ko e anga-fakamamahí ko ha meʻa anga-maheni. Ko e niʻihi ʻoku tākiekina ʻe honau anga fakafonuá, ʻa ia ʻokú ne pouaki nai ʻa e fakakaukau hala ko e “tangata moʻoní” kuo pau ke ne ngāueʻaki hono mālohí ke fakahaaʻi ki hono uaifí ko ia ʻoku pulé. Ko e kau tangata ʻe niʻihi naʻe ʻikai ke akoʻi ke nau mapuleʻi ʻenau ngaahi ongoʻí, kau ai ʻenau ʻitá. Ko e kau tangata ʻe niʻihi kuo nau fakatupulekina ha vakai hala ki he kakai fefiné mo e fehokotaki fakasinó koeʻuhí ko ʻenau sio maʻu pē ʻi he ʻata fakalieliá. ʻIkai ko ia pē, ʻoku fakahaaʻi ʻi he ngaahi līpōtí ko e mahaki fakaʻauha COVID-19 kuó ne fakalahi ʻa e ngaahi  palopalema ko ení. Ko e moʻoni, ko e ngaahi ʻuhinga ko ení ʻoku ʻikai ke ne fakatonuhiaʻi ʻa e tōʻonga fakamamahi ʻa ha husepāniti.

4. Ko e hā ʻoku fiemaʻu ke tokanga ki ai ʻa e ngaahi husepāniti Kalisitiané, pea ko e hā hono ʻuhingá?

⁴ Ko e ngaahi husepāniti Kalisitiané ʻoku fiemaʻu ke nau tokanga ke ʻoua te nau ohi ha vakai taʻetotonu ki he kakai fefiné. a Ko e hā hono ʻuhingá? Ko e ʻuhinga ʻe taha ko e ngaahi fakakaukau ʻa ha tokotaha ʻokú ne faʻa tākiekina ʻa e meʻa te ne faí. Naʻe fakatokanga ʻa e ʻapositolo ko Paulá ki he kau Kalisitiane pani ʻi Lomá ke “tuku hono fakafuo [kinautolu] ki he fokotuʻutuʻu ko ení.” (Loma 12:​1, 2) ʻI he taimi naʻe tohi ai ʻa Paula ki he kau Lomá, ʻoku hā mahino naʻe ʻosi fokotuʻu ʻa e fakatahaʻangá ʻi ha kiʻi vahaʻa taimi. Neongo ia, ʻoku fakahuʻunga mai ʻe he ngaahi lea ʻa Paulá ko e niʻihi ʻi he fakatahaʻangá naʻe kei tākiekina pē kinautolu ʻe he ngaahi anga fakafonua mo e fakakaukau ʻa e māmaní. Ko e ʻuhinga ia naʻá ne enginaki ai kiate kinautolu ke liliu ʻenau fakakaukaú mo e tōʻongá. Ko e faleʻi ko iá ʻoku kaunga moʻoni ki he ngaahi husepāniti Kalisitiané he ʻahó ni. Ko e meʻa fakamamahí, ko e niʻihi ʻo kinautolu kuo tākiekina ʻe he fakakaukau ʻa e māmaní pea kuo aʻu ʻo nau fakamamahiʻi honau uaifí. b ʻOku ʻamanekina ʻe Sihova ha husepāniti ke ne fakafeangai fēfē ki hono uaifí? ʻOku tau maʻu ʻa e talí ʻi he konga Tohi Tapu ʻo e kaveinga ʻo e kupu ko ení.

5. Fakatatau ki he 1 Pita 3:​7, ʻoku totonu ke fēfē ʻa e fakafeangai ha husepāniti ki hono uaifí?

⁵ Lau ʻa e 1 Pita 3:7. ʻOku fekauʻi ʻe Sihova ʻa e ngaahi husepānití ke nau fakangeingeiaʻi honau ngaahi uaifí. ʻOku ʻuhinga ia ki he anga ʻetau fakafeangai ki ha taha ʻoku tau fakaʻapaʻapaʻi. Ko ha husepāniti ʻokú ne fakangeingeiaʻi hono uaifí te ne fakafeangai kiate ia ʻi he anga-lelei mo e anga-ʻofa. ʻI he kupu ko ení, te tau lāulea ki he founga ʻe lava ai ʻe ha husepāniti ʻo fakangeingeiaʻi hono uaifí. Ka te tau ʻuluaki lāulea ki he faʻahinga tōʻonga ʻoku ʻikai ke ne fakangeingeiaʻi ʻa e ngaahi uaifí.

SIʻAKI ʻA E TŌʻONGA ʻOKU ʻIKAI KE NE FAKANGEINGEIAʻI HO UAIFÍ

6. ʻOku anga-fēfē ongoʻi ʻa Sihova ki he kau tangata ʻoku nau ngaohikoviʻi fakaesino honau ngaahi uaifí? (Kolose 3:19)

⁶ Ngaohikoviʻi fakaesino. ʻOku fehiʻa ʻa Sihova ʻi ha taha pē ʻoku anga-fakamālohi. (Saame 11:5) ʻOkú ne fakahalaiaʻi fakahangatonu ʻa e ngaahi husepāniti ʻoku nau ngaohikoviʻi honau uaifí. (Mal. 2:16; lau ʻa e Kolose 3:19.) Fakatatau ki heʻetau konga Tohi Tapu ʻo e kaveingá, ʻa e 1 Pita 3:​7, kapau ʻoku ʻikai ke ngaahileleiʻi ʻe ha husepāniti hono uaifí, ʻe uesia hono vahaʻangatae mo e ʻOtuá. ʻE aʻu nai ʻo ʻikai ke fanongo mai ʻa Sihova ki heʻene ngaahi lotú.

7. Fakatatau ki he ʻEfesō 4:​31, 32, ko e hā ʻa e faʻahinga lea kuo pau ke fakaʻehiʻehi mei ai ʻa e ngaahi husepānití? (Sio foki ki he “Lea mo Hono ʻUhinga.”)

⁷ Lea kovi. Ko e ngaahi husepāniti ʻe niʻihi ʻoku nau ngaohikoviʻi honau uaifí fakafou ʻi he ngaahi lea ʻita mo fakalotomamahi. Ka ʻoku fehiʻa ʻa Sihova ʻi he “ʻitá, lilí, fekailangakí, mo e laukoví.” c (Lau ʻa e ʻEfesō 4:​31, 32.) ʻOkú ne fanongo ki he meʻa kotoa pē. Ko e anga ʻo e lea ʻa e husepānití ki hono uaifí, naʻa mo ʻena ʻi hona ʻapí, ʻoku mahuʻinga kia Sihova. Ko ha husepāniti ʻoku lea anga-fefeka ki hono uaifí ʻoku ʻikai ngata pē ʻi heʻene maumauʻi ʻa ʻene nofo malí kae pehē foki ki heʻene kaumeʻa mo e ʻOtuá.—Sēm. 1:26.

8. ʻOku anga-fēfē vakai ʻa Sihova ki he ʻata fakalieliá, pea ko e hā hono ʻuhingá?

⁸ Sio ʻi he ʻata fakalieliá. ʻOku anga-fēfē vakai ʻa Sihova ki he ʻata fakalieliá? ʻOkú ne fehiʻa ai. Ko ia ko ha husepāniti ʻoku sio ʻi he ngaahi ʻata  taʻemaʻá ʻokú ne maumauʻi ai hono vahaʻangatae mo Sihová pea tuku hifo ʻa e ngeia hono uaifí. d ʻOku ʻamanekina ʻe Sihova ha husepāniti ke ne nofoʻaki mateaki ki hono uaifí ʻo ʻikai ʻi he tōʻongá pē kae pehē foki ki he fakakaukaú. Naʻe pehē ʻe Sīsū ko ha tangata ʻoku sio ki ha fefine kehe ʻo tafunaki ki ai ʻene holí kuó ne ʻosi tonoʻi ia “ʻi hono lotó.” e—Māt. 5:​28, 29.

9. Ko e hā ʻoku fehiʻa ai ʻa Sihova ʻi hono fai ʻe ha husepāniti ha tōʻonga fakaefehokotaki fakasino ololalo ki hono uaifí?

⁹ Tōʻonga fakaefehokotaki fakasino ololalo. Ko e ngaahi husepāniti ʻe niʻihi ʻoku nau tenge honau uaifí ke kau ʻi he ngaahi tōʻonga fakaefehokotaki fakasino ololalo pea ʻai ai ia ke ne ongoʻi taʻemaʻa pe ʻikai ke ʻofaʻi. ʻOku fehiʻa ʻa Sihova ʻi he tōʻonga taʻeʻofa mo taʻefakakaukau peheé. ʻOkú ne ʻamanekina ha husepāniti ke ne ʻofa mo tauhi hono uaifí pea fakaʻapaʻapaʻi ʻene ngaahi ongoʻí. (ʻEf. 5:​28, 29) Fēfē kapau ʻoku ʻi ai ha husepāniti Kalisitiane ʻokú ne tuku hifoʻi pe ngaohikoviʻi hono uaifí pe sio ʻi he ʻata fakalieliá? ʻE lava fēfē ke ne liliu ʻa ʻene fakakaukaú mo e tōʻongá?

FOUNGA KE IKUʻI AI ʻA E TŌʻONGA TAʻEFAKANGEINGEIÁ

10. ʻE lava fēfē ke maʻu ʻaonga ʻa e ngaahi husepānití mei he faʻifaʻitakiʻanga ʻa Sīsuú?

¹⁰ Ko e hā ʻe lava ke ne tokoniʻi ha husepāniti ke ikuʻi ʻa e tōʻonga fakamamahí mo ololaló? ʻE lava ke ne feinga ke faʻifaʻitaki kia Sīsū. Neongo naʻe ʻikai ke mali ʻa Sīsū, ko e founga ʻene fakafeangai ki heʻene kau ākongá ko ha sīpinga ia ki he founga ʻoku totonu ke fakafeangai ai ha husepāniti ki hono uaifí. (ʻEf. 5:25) Ko e fakatātaá, fakakaukau ki he meʻa ʻe lava ke ako ʻe he ngaahi husepānití mei he anga ʻo e fakafeangai mo e lea ʻa Sīsū ki heʻene kau ʻapositoló.

11. Naʻe anga-fēfē fakafeangai ʻa Sīsū ki heʻene kau ʻapositoló?

¹¹ Naʻe fakafeangai ʻa Sīsū ki heʻene kau ʻapositoló ʻi ha founga anga-lelei mo fakangeingeia. Naʻe ʻikai ʻaupito ke ne anga-fefeka pe fakaaoao. Neongo ko Sīsū ʻa honau ʻEikí mo e Pulé, naʻe ʻikai ke ne ongoʻi naʻe fiemaʻu ke ne fakamoʻoniʻi hono mafaí kiate kinautolu ʻo ngāueʻaki hono mālohí. ʻI hono kehé, naʻá ne ngāue anga-fakatōkilalo kiate kinautolu. (Sione 13:​12-17) Naʻá ne tala ki heʻene kau ʻapositoló: “Ako meiate au, he ʻoku ou anga-malū mo loto-fakatōkilalo, pea te mou maʻu ha fakaivifoʻou kiate kimoutolu.” (Māt. 11:​28-30) Fakatokangaʻi ko Sīsuú naʻe anga-malū. Ko ha tokotaha anga-malū ʻoku ʻikai ko ha tokotaha vaivai ia. ʻI hono kehé, ʻokú ne maʻu ʻa e mālohi ʻi loto ke fakahāhā ʻa e faʻamataʻofi. ʻI hono fakaʻitaʻí, ʻokú ne hanganaki nonga pea mapuleʻi ʻene ngaahi ongoʻí.

12. Naʻe anga-fēfē lea ʻa Sīsū ki he niʻihi kehé?

¹² Naʻe ngāueʻaki ʻe Sīsū ʻene ngaahi leá ke fakafiemālieʻi mo fakaivifoʻou ʻa e niʻihi kehé. Naʻe ʻikai ke ne lea anga-kakaha ki hono kau muimuí. (Luke 8:​47, 48) Naʻa mo e taimi naʻe leakovia ai ia ʻe he kau fakafepakí pea feinga ke fakaʻitaʻi iá, “naʻe ʻikai te ne tali ʻaki ha lea kovi.” (1 Pita 2:​21-23) ʻI he taimi ʻe niʻihi, naʻe aʻu ʻo fili ʻa Sīsū ke hanganaki fakalongo pē kae ʻikai ke fai ha tali anga-fefeka. (Māt. 27:​12-14) He faʻifaʻitakiʻanga lelei ʻaupito ē ki he ngaahi husepāniti Kalisitiané!

13. Hangē ko ia ʻoku fakahaaʻi ʻi he Mātiu 19:​4-6, ʻe lava fēfē ke “pīkitai [ha husepāniti] ki hono uaifí”? (Sio foki ki he fakatātaá.)

¹³ Naʻe fakahinohino ʻa Sīsū ki he ngaahi husepānití ke nau nofoʻaki mateaki ki honau uaifí. Naʻá ne toe leaʻaki ʻa e meʻa naʻe leaʻaki ʻe heʻene Tamaí, ʻa ia naʻá ne pehē ko ha husepāniti ʻoku totonu ke ne “pīkitai ki hono uaifí.” (Lau ʻa e Mātiu 19:​4-6.) Ko e foʻi veape faka-Kalisi naʻe ngāueʻaki ʻi he konga tohi ko iá ki he “pīkitai” ʻoku ʻuhinga fakafoʻileá ke “kuluuʻi.” Ko ia ai, ko e haʻi ʻo e nofo malí ʻi he vahaʻa ʻo ha husepāniti mo ha uaifi ʻoku totonu ke mālohi ʻaupito ʻo  hangē pē ʻoku kuluuʻi fakataha kinauá. Heʻikai lava ke motuhi ʻa e haʻi ko iá ʻo taʻeuesia ai kinaua fakatouʻosi. Ko ha husepāniti ʻokú ne fakatupulekina ha haʻi pehē mo hono uaifí te ne talitekeʻi ʻa e ngaahi founga kotoa pē ʻo e ʻata fakalieliá. Te ne hanga kehe ʻi he taimi pē ko iá ke ʻoua te ne “sio ki he meʻa ʻoku taʻeʻaongá.” (Saame 119:37) Ko hono moʻoní, ʻokú ne fai ha aleapau mo hono matá ke ʻoua te ne sio ʻo holi ki ha fefine kehe mei hono uaifí.—Siope 31:1.

14. Ko e hā ʻa e ngaahi sitepu ʻoku totonu ke fou ai ha husepāniti anga-fakamamahi ke fakaleleiʻi hono vahaʻangatae mo Sihová pea mo hono uaifí?

¹⁴ Ko ha husepāniti ʻokú ne ngaohikoviʻi fakaesino pe fakaelea ʻa hono uaifí ʻoku fiemaʻu ke ne fou ʻi ha toe ngaahi sitepu ke fakaleleiʻi hono vahaʻangatae mo Sihová pea mo hono uaifí. Ko e hā ʻa e ngaahi sitepu ko ení? ʻUluakí, ʻokú ne lāuʻilo ʻokú ne maʻu ha palopalema mafatukituki. ʻOku ʻikai ke puli ha meʻa mei he vakai ʻa Sihová. (Saame 44:21; Tml. 12:14; Hep. 4:13) Uá, ʻokú ne taʻofi ʻa ʻene ngaohikoviʻi hono uaifí pea liliu ʻene tōʻongá. (Pal. 28:13) Tolú, ʻokú ne kole fakamolemole ki hono uaifí pea kia Sihova pea kumi ki heʻene fakamolemolé. (Ngā. 3:19) ʻOku totonu foki ke ne kōlenga kia Sihova ke ʻoange kiate ia ʻa e holi ke liliú mo e tokoni ke mapuleʻi ʻene ngaahi fakakaukaú, leá, mo e tōʻongá. (Saame 51:​10-12; 2 Kol. 10:5; Fil. 2:13) Faá, ʻokú ne ngāue ʻo fehoanaki mo ʻene ngaahi lotú ʻaki ʻa e ako ke fehiʻa ʻi he founga kotoa pē ʻo e fakamālohí mo e lea koví. (Saame 97:10) Nimá, ʻokú ne kumi leva ki ha tokoni mei he kau tauhi-sipi anga-ʻofa ʻi he fakatahaʻangá. (Sēm. 5:​14-16) Onó, ʻokú ne fokotuʻu ha palani ʻa ia ʻe tokoni kiate ia ke ne fakaʻehiʻehi mei ha faʻahinga tōʻonga pehē pē ʻi he kahaʻú. Ko ha husepāniti ʻoku sio ʻi he ʻata fakalieliá ʻoku totonu ke ne muimui ʻi he ngaahi sitepu tatau pē ko ení. ʻE tāpuakiʻi ʻe Sihova ʻene ngaahi feinga ke liliu ʻene tōʻongá. (Saame 37:5) Ka ʻoku ʻikai ke feʻunga pē ki ha husepāniti ke ne siʻaki ʻa e tōʻonga taʻefakangeingeiá. ʻOku toe fiemaʻu ke ne ako ke fakangeingeiaʻi ʻa hono uaifí. ʻE lava fēfē ke ne fai ia?

FOUNGA KE FAKANGEINGEIAʻI AI HO UAIFÍ

15. ʻE lava fēfē ke fakahāhā ʻe ha husepāniti ʻa e ʻofá ki hono uaifí?

¹⁵ Fakahāhā ʻa e ʻofá. Ko e niʻihi ʻo e fanga tokoua ʻoku nau nofo mali fiefiá ʻoku nau angaʻaki ʻa hono fai ha meʻa ʻi he ʻaho kotoa ke fakahaaʻi ki honau uaifí ʻa e lahi ʻenau ʻofa ʻiate iá.  (1 Sio. 3:18) ʻE fakahāhā nai ʻe ha tokoua ʻa e manavaʻofa loloto ki hono uaifí ʻi ha fanga kiʻi founga iiki, hangē ko e piki nima pe fāʻofua māfana mo ia. Te ne ʻave nai ha kiʻi pōpoaki ʻi he telefoní pea tala ange “ʻOku ou mate he ʻofa atú” pe ʻeke ange “ʻOkú ke fēfē hake?” ʻI he taimi ki he taimi, te ne fakahāhā nai ʻene ʻofá ʻaki hono ʻave kiate ia ha kaati kuo tohi ai ha ngaahi lea ʻosi filifili lelei. ʻI hono fai ʻe ha husepāniti ʻa e ngaahi meʻa ko ení, ʻokú ne fakangeingeiaʻi ai hono uaifí pea fakaivimālohiʻi ʻena nofo malí.

16. Ko e hā ʻoku totonu ai ki ha husepāniti ke ne fakahīkihikiʻi hono uaifí?

¹⁶ Fakahāhā ʻa e houngaʻia. Ko ha husepāniti ʻokú ne fakangeingeiaʻi hono uaifí ʻokú ne langa hake mo fakalototoʻaʻi ia. Ko e founga ʻe taha ʻokú ne fai ai ení ko e manatuʻi ke fakahāhā ʻa e houngaʻia ki hono uaifí ʻi he meʻa kotoa kuó ne fai ke poupou kiate iá. (Kol. 3:15) ʻI hono fakahīkihikiʻi loto-moʻoni ʻe ha husepāniti hono uaifí, ʻokú ne ʻai ai ke māfana hono lotó. Te ne ongoʻi malu, ʻofaʻi, mo fakangeingeiaʻi.—Pal. 31:28.

17. ʻE lava fēfē ke fakahāhā ʻe ha husepāniti ʻa e fakaʻapaʻapá ki hono uaifí?

¹⁷ Hoko ʻo anga-lelei mo anga-fakaʻapaʻapa. Ko ha husepāniti ʻoku ʻofa ʻi hono uaifí ʻokú ne fakamahuʻingaʻi mo tauhi ia. ʻOkú ne vakai kiate ia ko ha meʻaʻofa taʻehanotatau meia Sihova. (Pal. 18:22; 31:10) Ko ia ai, ʻokú ne fakafeangai anga-lelei mo anga-fakaʻapaʻapa kiate ia, naʻa mo e lolotonga ʻa e taimi fekoekoeʻi ʻi he nofo malí mo e ngaahi meʻa fakaefehokotaki fakasinó. Heʻikai te ne tenge ia ke kau ʻi he ngaahi tōʻonga fakaefehokotaki fakasino ʻe ʻai ai ia ke ne ongoʻi taʻefiemālie, ololalo, pe fakahohaʻasi ai hono konisēnisí. f Te ne feinga foki ke tauhi maʻu ha konisēnisi maʻa ʻi he ʻao ʻo Sihová.—Ngā. 24:16.

18. Ko e hā ʻoku totonu ke fakapapauʻi ʻe he ngaahi husepānití ke faí? (Sio foki ki he puha “ Founga ʻe Fā ke Hoko Ai ko ha Husepāniti Anga-Fakaʻapaʻapa.”)

¹⁸ Ngaahi husepāniti, ʻe lava ke ke fakapapauʻi ʻoku ʻafioʻi mo fakahoungaʻi ʻe Sihova hoʻo ngaahi feinga ke fakangeingeiaʻi ho uaifí ʻi he tafaʻaki kotoa ʻo hoʻo moʻuí. Hoko ʻo fakapapauʻi ke fakangeingeiaʻi ia ʻaki ʻa e fakaʻehiʻehi mei he tōʻonga taʻefakangeingeiá pea ʻaki ʻa e hoko ʻo anga-lelei, anga-fakaʻapaʻapa, pea anga-ʻofa kiate ia. ʻI he fai peheé, ʻokú ke fakahaaʻi ai ʻokú ke ʻofa mo fakamahuʻingaʻi ia. Fakangeingeiaʻi ho uaifí, pea te ke maluʻi ai ʻa e vahaʻangatae mahuʻinga taha ʻokú ke maʻú—ʻa hoʻo kaumeʻa mo Sihová.—Saame 25:14.