“NAʻÁ KU taʻu 15 ʻi he taimi naʻá ku papitaiso aí, pea ʻi he māhina ʻe ono ki mui aí naʻe kamata ke u kau ʻi he ngāue ko ha tāimuʻa tokoni. Hili ʻa e taʻu ʻe taha, naʻá ku tohi kole ki he ngāue tāimuʻa tuʻumaʻú. ʻI he taimi naʻá ku ʻosi ai mei he kolisí, naʻá ku kole ke ngāue ʻi he feituʻu ʻoku lahi ange ai ʻa e fiemaʻu ki he kau malanga ʻo e Puleʻangá. Naʻá ku loto ke hiki mei hoku koló pea mei heʻeku kui fefine naʻá ma nofó he naʻe ʻikai ko ha taha ia ʻo e Kau Fakamoʻoni ʻa Sihová. He meʻa fakamamahi ē ko e taimi naʻe tala mai ai ʻe he ʻovasia sēketí ko ʻeku vāhenga-ngāué ʻa e kolo ko eni naʻe fanauʻi ai aú! Naʻá ku feinga ke ʻoua te ne ʻilo ʻa e anga ʻeku ongoʻí. Naʻá ku mavahe mo punopunou pē ʻo fakakaukau ki he meʻa naʻá ne leaʻakí. Naʻá ku tala ange ki hoku hoa ngāué: ‘ʻOku ou fakakaukau ʻoku ou hangē ko Sioná. Ka ʻi he fakaʻosí naʻe ʻalu ʻa Siona ia ki Ninive. Neongo ia, te u ngāue foki ʻi he feituʻu kuo vaheʻi au ki aí.’

“Kuó u tāimuʻa he taimí ni ʻi hoku koló ʻi he taʻu ʻe fā, pea ʻoku lava ke u sio ki he fakapotopoto ʻo e muimui ki he fakahinohino kuo ʻomaí. Ko ʻeku fakakaukau ʻikai leleí naʻe hoko ia ko e palopalema tefitó. ʻOku ou maʻu he taimí ni ʻa e fiefia lahi. ʻI he māhina ʻe taha, naʻá ku fakahoko ai ha ako Tohi Tapu ʻe 24. Fakamālō kia Sihova he naʻe aʻu ʻou kamata ke ako Tohi Tapu mo ʻeku kui naʻe fakafepaki ki muʻá.”

KO HA tokotaha ako Tohi Tapu ʻi Fisi naʻe pau ke ne fili pe te ne maʻu ʻa e fakataha-lahi faka-Kalisitiané pe te ne ʻalu mo hono husepānití ki ha paati faiʻaho ʻa hono kāingá. Naʻe loto hono husepānití ke ʻalu hono uaifí ki he fakataha-lahí. Naʻá ne tala ange ki hono husepānití ʻe lava ke ne toki ʻalu atu ki he pātí hili ʻa e fakataha-lahí. Kae kehe, ʻi he foki ki ʻapi ʻa e uaifí hili ʻa e fakataha-lahí, naʻá ne ongoʻi ʻe lelei ange ke ne fakaʻehiʻehi mei hano ʻai ia ke ne ʻi ha tuʻunga fakatuʻutāmaki fakalaumālie, ko ia naʻe ʻikai ke ne ʻalu.

ʻI he taimi ko iá, naʻe tala ange ʻe he husepānití ki hono kāingá ʻe toki haʻu hono uaifí hili ʻene foki mai mei ha “fakataha ʻa e Kau Fakamoʻoní,” naʻa nau tali ange, “Heʻikai haʻu ia; he ʻoku ʻikai ke kātoangaʻi ʻe he Kau Fakamoʻoni ʻa Sihová ʻa e faiʻahó!” *

Naʻe hoko ia ke laukauʻaki ʻe he husepānití hono uaifí ʻi heʻene tuʻumaʻu ʻo fakatatau ki he meʻa ʻokú ne tui ki aí mo hono konisēnisí. Ko ʻene ʻalunga faitōnungá naʻá ne maʻu ki mui ai ha faingamālie ke faifakamoʻoni ki hono husepānití, pea pehē ki he niʻihi kehé. Ko e olá? Naʻe tali ʻe he husepānití ke ako ʻa e Tohi Tapú pea naʻe kamata ke ne maʻu ʻa e ngaahi fakatahá mo hono uaifí.