1. ‘Oku anga-fēfē hono fakahāhā ‘e he kau lotu ‘a Sihová ‘oku nau fe‘ofa‘akí?

KO E kau lotu ‘a Sihova takatakai ‘i he māmaní kotoa ‘oku nau kau ki ha fāmili. Ko e fanga tokoua mo e fanga tuofāfine kinautolu ‘oku nau fe‘ofa‘aki. (1 Sio. 4:16, 21) ‘I he taimi ‘e ni‘ihi ‘oku nau fai ha ngaahi feilaulau lalahi ma‘a honau fanga tokouá, ka ko e taimi lahi tahá ‘oku nau fakahāhā ‘a ‘enau ‘ofá ‘i he fanga ki‘i me‘a iiki lahi ‘oku nau fai ma‘anautolú. Ko e fakatātaá, ‘oku nau lea lelei nai ki honau fanga tokouá pe anga-lelei kiate kinautolu. ‘I he‘etau anga-faka‘atu‘i ki he ni‘ihi kehé, ‘oku tau fa‘ifa‘itaki ai ki he‘etau Tamai fakahēvaní.​—‘Ef. 5:1.

2. Na‘e anga-fēfē ‘a e fa‘ifa‘itaki ‘a Sīsū ki he ‘ofa ‘a ‘ene Tamaí?

² Na‘e fa‘ifa‘itaki haohaoa ‘a Sīsū ki he‘ene Tamaí. Na‘á ne anga-lelei ma‘u pē ki he ni‘ihi kehé. Na‘á ne pehē: “Ha‘u kiate au, ‘a kimoutolu kotoa ‘oku ongosia mo mafasiá, pea te u fakaivifo‘ou kimoutolu.” (Māt. 11:28, 29) ‘I he‘etau fa‘ifa‘itaki kia Sīsū pea fakahāhā ‘a e “faka‘atu‘i ki he tokotaha mā‘ulaló,” te tau ‘ai ai ‘a Sihova ke fiefia, pea te tau fiefia foki ai. (Saame 41:1) ‘I he kupú ni, te tau sio ai ki he founga ‘e lava ke tau anga-faka‘atu‘i ai ki he ngaahi mēmipa ‘o hotau fāmilí, ko hotau fanga tokouá mo e fanga tuofāfiné, mo e fa‘ahinga ‘oku tau fetaulaki ‘i he ngāue fakafaifekaú.

3. ‘E lava fēfē ke hoko ‘o anga-faka‘atu‘i ha husepāniti ki hono uaifí? (Sio ki he ‘uluaki fakatātā ‘i he kupú ni.)

³ ‘Oku fiema‘u ke fokotu‘u ‘e he ngaahi husepānití ‘a e fa‘ifa‘itaki‘angá pea fakahāhā ‘a e lahi ‘o ‘enau tokanga ki honau fāmilí. (‘Ef. 5:25; 6:4) ‘Oku pehē ‘e he Tohi Tapú kuo pau ki he ngaahi husepānití ke nau hoko ‘o anga-faka‘atu‘i mo mahino‘i ‘a honau uaifí. (1 Pita 3:7; fakamatala ‘i lalo) Ko ha husepāniti ‘okú ne ma‘u ‘a e mahinó ‘okú ne ‘ilo‘i neongo ‘okú ne kehe mei hono uaifí ‘i he ngaahi founga lahi, ‘oku ‘ikai te ne lelei ange ‘iate ia. (Sēn. 2:18) ‘Okú ne faka‘atu‘i ‘a ‘ene ongo‘í pea fakafeangai kiate ia ‘aki ‘a e fakangeingeia mo e fakalāngilangi. ‘Oku pehē ‘e ha uaifi ‘i Kānata fekau‘aki mo hono husepānití: “‘Oku ‘ikai ‘aupito te ne fakama‘ama‘a‘i ‘a ‘eku ongo‘í pe pehē, ‘‘Oku ‘ikai totonu ke ke ongo‘i pehē.’ Ko ha tokotaha fanongo lelei foki ia. ‘I he‘ene tokoni‘i au ke fakatonutonu ‘eku fakakaukau ki ha me‘á, ‘okú ne fai ia ‘i he anga-lelei.”

4. ‘E lava fēfē ke fakahāhā ‘e ha husepāniti ‘okú ne faka‘atu‘i ‘a e ongo‘i ‘a hono uaifí ‘i he anga ‘o ‘ene fakafeangai ki he kakai fefine kehé?

⁴ Ko ha husepāniti ‘okú ne faka‘atu‘i ‘a e ongo‘i ‘a hono uaifí ‘oku ‘ikai ‘aupito te ne fakamalinga mo e kakai fefine kehé pe fakahāhā ha mahu‘inga‘ia ta‘etotonu ‘iate kinautolu, fakahangatonu, ‘i he mītia fakasōsialé, pe ‘i he ‘Initanetí. (Siope 31:1) ‘Oku ‘ikai te ne ngāue‘aki ‘a e mītia fakasōsialé ke fakamalinga ai, pea ‘oku ‘ikai te ne sio ‘i he ngaahi uepisaiti ‘oku ‘ikai leleí. ‘Io, ‘okú ne hanganaki mateaki ki hono uaifí koe‘uhi ‘okú ne ‘ofa ‘iate ia pea koe‘uhi ‘okú ne ‘ofa kia Sihova pea fehi‘a ‘i he me‘a ‘oku koví.​—Lau ‘a e Saame 19:14; 97:10.

5. ‘E lava fēfē ke faka‘atu‘i ‘e ha uaifi ‘a hono husepānití?

⁵ ‘I he fa‘ifa‘itaki ‘a ha husepāniti ki he fa‘ifa‘itaki‘anga anga-‘ofa ‘a hono ‘ulú, ‘a Sīsū Kalaisí, ‘e faingofua ange ai ki hono uaifí ke ne “faka‘apa‘apa loloto” kiate ia. (‘Ef. 5:22-25, 33) Pea ‘i he‘ene faka‘apa‘apa kiate iá, te ne feinga ke mahino‘i ‘a ‘ene ongo‘í pea anga-lelei kiate ia ‘i he‘ene femo‘uekina ‘i he ngaahi me‘a ‘a e fakataha‘angá pe ‘i he fiema‘u ke ne fekuki mo e ngaahi palopalemá. ‘Oku pehē ‘e ha husepāniti ‘i Pilitānia: “‘I he hoko ha me‘a, ‘oku ‘ilo‘i ‘e hoku uaifí mei he liliu ‘a ‘eku tō‘ongá ‘oku ‘i ai ha me‘a ‘oku ou hoha‘a ki ai. ‘Okú ne ngāue‘aki leva ‘a e tefito‘i mo‘oni ‘i he Palōveepi 20:5, neongo kapau ‘oku ‘uhinga ení ko e tatali ki he taimi totonu ke ‘fusi hake’ ai ‘eku fakakaukaú kapau ko ha me‘a ‘oku lava ke ma talanoa ki ai.”

6. ‘E lava fēfē ke tau hanga kotoa ‘o fakalototo‘a‘i ‘a e fānaú ke nau fakakaukau ki he ni‘ihi kehé pea ke nau anga-lelei, pea ‘e ma‘u ‘aonga fēfē mei ai ‘a e fānaú?

⁶ ‘I he fefakafeangai‘aki ‘a e ongo mātu‘á ‘i ha founga faka‘atu‘í, ‘okú na fokotu‘u ai ha fa‘ifa‘itaki‘anga lelei ki he‘ena fānaú. ‘Oku fiema‘u foki ke na ako‘i ‘ena fānaú ke nau fakakaukau ki he ni‘ihi kehé pea hoko ‘o anga-lelei. Ko e fakatātaá, ‘oku lava ke ako‘i ‘e he ngaahi mātu‘á ‘enau fānaú ke ‘oua te nau lele holo ‘i he Fale Fakataha‘angá. Pe ‘i he taimi ‘oku nau ‘i ha fakatahataha fakasōsiale ai, ‘e lava ke nau tala ki he‘enau fānaú ke nau tatali kae ‘oua kuo ‘uluaki ma‘u ‘e he fa‘ahinga ta‘umotu‘á ‘enau me‘akaí. Ko e mo‘oni, ‘e lava ke tokoni ‘a e tokotaha kotoa ‘i he fakataha‘angá ki he ngaahi mātu‘á. Ko ia ‘oku totonu ke tau fakaongoongolelei‘i ha ki‘i leka ‘i he‘ene fai ‘i he fakakaukau lelei ha me‘a, ko e fakatātaá, ‘i he‘ene fakaava kiate kitautolu ‘a e matapaá. ‘E ‘ai ‘e he me‘á ni ke ongo‘i lelei ‘a e ki‘i leká pea ‘e tokoni‘i ai ia ke ne ‘ilo‘i “‘oku ‘i ai ‘a e fiefia lahi ange ‘i he foaki atú ‘i he ma‘u maí.”​—Ngā. 20:35.

7. Na‘e anga-fēfē ‘a e anga-faka‘atu‘i ‘a Sīsū ki ha tangata tuli, pea ko e hā ‘e lava ke tau ako mei he fa‘ifa‘itaki‘anga ‘a Sīsuú?

⁷ ‘I he ‘aho ‘e taha, na‘e ‘i he feitu‘u Tikapōlusí ai ‘a Sīsū ‘i he taimi na‘e hanga ai ‘e he kakaí ‘o “‘omi kiate ia ha tangata na‘e tuli mo faingata‘a ‘a ‘ene leá.” (Mk. 7:31-35) Na‘e fakamo‘ui ia ‘e Sīsū, kae ‘ikai ‘i he ‘ao ‘o e ni‘ihi kehé. Ko e hā hono ‘uhingá? Koe‘uhi na‘e tuli ‘a e tangatá, ‘oku ngalingali na‘á ne ongo‘i ta‘efiemālie ‘i he ‘i ai ha fu‘u kakai tokolahi. Na‘e mahino‘i ‘e Sīsū ‘ene ongo‘í pea na‘á ne “‘ave ia” ki ha feitu‘u na‘e ‘ikai ke ‘i ai ha kakai ‘o fakamo‘ui ai ia. Ko e mo‘oni, he‘ikai lava  ke tau fakahoko ha ngaahi mana, ka ‘oku totonu ke tau fakakaukau ki he ngaahi fiema‘u mo e ongo‘i ‘a hotau fanga tokouá pea anga-lelei kiate kinautolu. Na‘e tohi ‘e he ‘apositolo ko Paulá: “Tuku ke tau fetokanga‘aki koe‘uhi ke faka‘ai‘ai ai kitautolu ki he ‘ofá mo e ngaahi ngāue leleí.” (Hep. 10:24) Na‘e mahino‘i ‘e Sīsū ‘a e anga ‘o e ongo‘i ‘a e tangata tulí peá ne anga-lelei kiate ia. Ko ha fa‘ifa‘itaki‘anga lelei mo‘oni ia kiate kitautolu!

8, 9. ‘E lava fēfē ke tau fakahāhā ‘oku tau tokanga ki he kau ta‘umotu‘á mo e fa‘ahinga ‘oku faingata‘a‘ia fakaesinó? (‘Omai ha ngaahi fakatātā.)

⁸ Anga-faka‘atu‘i ki he kau ta‘umotu‘á mo e fa‘ahinga ‘oku faingata‘a‘ia fakaesinó. Ko e ‘ulungaanga mahu‘inga taha ‘i he fakataha‘anga Kalisitiané ko e ‘ofá, ‘o ‘ikai ko e lavame‘á. (Sione 13:34, 35) ‘Oku ‘ai kitautolu ‘e he ‘ofá ke tau fai ‘a e me‘a kotoa te tau malavá ke tokoni‘i hotau fanga tokoua mo e fanga tuofāfine ‘oku nau ta‘umotu‘a pe faingata‘a‘ia fakaesinó ke nau ma‘u ‘a e ngaahi fakatahá pea ke nau malanga. ‘Oku tau tokoni‘i kinautolu na‘a mo e ‘ikai hatau faingamālié pe na‘a mo e ‘ikai lava ke nau fai ha me‘a lahí. (Māt. 13:23) Ko Michael, ‘a ia ‘okú ne heka saliote, ‘okú ne hounga‘ia lahi ‘i he tokoni ‘oku fai ‘e hono fāmilí mo e fanga tokoua ‘i he‘ene fakataha‘angá. ‘Okú ne pehē: “Koe‘uhi ko e tokoni kotoa ‘oku nau fai maí, ‘oku malava ke u ma‘u ai ‘a e lahi taha ‘o e ngaahi fakatahá pea kau ma‘u pē ‘i he ngāue fakafaifekaú. ‘Oku ou sai‘ia tautefito ‘i he faifakamo‘oni ‘i he feitu‘u kakaí.”

⁹ ‘I he ngaahi ‘api Pēteli lahi, ‘oku ‘i ai ‘a e fanga tokoua mo e fanga tuofāfine faitōnunga ‘oku nau ta‘umotu‘a pe faingata‘a‘ia fakaesino. Ko e kau ‘ovasia tokangá ‘oku nau fakahāhā ‘a e ‘ofa kiate kinautolu ‘aki ‘a e fokotu‘utu‘u ke nau malanga fakafou ‘i he faitohi mo ngāue‘aki ‘a e telefoní. Ko Bill, ‘a ia ‘oku ta‘u 86 pea ‘okú ne faitohi ki he kakai ‘i he feitu‘u mama‘ó, ‘okú ne pehē: “‘Oku mau hounga‘ia ‘i he monū ‘o e malava ke faitohí.” Ko Nancy, ‘a ia ‘oku meimei ta‘u 90, ‘okú ne fakamatala: “‘Oku ‘ikai te u vakai ki he faitohí ko hano fa‘o pē ha me‘a ‘i ha ngaahi sila. Ko e ngāue fakamalanga eni. ‘Oku fiema‘u ke ‘ilo ‘e he kakaí ‘a e mo‘oní!” ‘Oku pehē ‘e Ethel, ‘a ia na‘e fā‘ele‘i ‘i he 1921: “Ko e langá ko ha konga ia ‘o ‘eku mo‘uí. ‘I he ‘aho ‘e ni‘ihi ‘oku ou faingata‘a‘ia ‘i he feinga pē ke tui valá.” Na‘a mo ia, ‘okú ne fiefia ‘i he malanga ‘o ngāue‘aki ‘a e telefoní pea ma‘u ha ngaahi toe ‘a‘ahi lelei. ‘Oku fakamatala ‘a Barbara, ‘a ia ‘oku ta‘u 85: “Koe‘uhi ko ‘eku mahamahakí, ‘oku faingata‘a ‘aupito kiate au ke ‘alu ma‘u pē ‘i he ngāue fakamalangá. Ka ko e faifakamo‘oni ‘i he telefoní ‘okú ne ‘ai ke u malava ‘o lea ai ki he ni‘ihi kehé. Mālō, Sihova!” Si‘i hifo he ta‘u ‘e taha, ‘oku fakamoleki ai ‘e ha kulupu ‘o e fa‘ahinga ta‘umotu‘a ‘ofeiná ‘a e houa ‘e 1,228 ‘i he ngāue fakafaifekaú, fai ‘a e tohi ‘e 6,265, tā telefoni ‘e 2,000 tupu, pea tufa ‘a e ‘ū tohi ‘e 6,315! ‘Oku lava ke tau fakapapau‘i na‘e ‘ai ‘e he‘enau ngaahi feingá ‘a Sihova ke ne fiefia lahi!​—Pal. 27:11.

10. ‘E lava fēfē ke tau tokoni‘i hotau fanga tokouá ke nau ma‘u ‘aonga mei he ngaahi fakatahá ‘i he lahi taha ‘e ala lavá?

¹⁰ Anga-faka‘atu‘i ‘i he ngaahi fakataha faka-Kalisitiané. ‘I he‘etau anga-faka‘atu‘í, ‘oku tau tokoni‘i ai hotau fanga tokouá ke nau ma‘u ‘a e ‘aonga lahi taha ‘e ala lavá mei he ngaahi fakatahá. Anga-fēfē? Ko e founga ‘e taha ko e a‘u taimi totonu ki ai koe‘uhi ke ‘oua te tau fakahoha‘asi kinautolu. ‘I he taimi ‘e ni‘ihi, ‘e ‘ai nai ‘e ha ngaahi me‘a ta‘e‘amanekina ke tau tōmui. Ka ‘o kapau ‘oku tau fa‘a tōmui, ‘oku totonu ke tau fakakaukau ki hono uesia ‘e he me‘á ni hotau fanga tokouá mo ha ngaahi liliu ‘e lava ke tau fai ke fakahāhā ‘oku tau tokanga kiate kinautolu. Manatu‘i foki, ko Sihova mo hono ‘Aló ‘okú na fakaafe‘i kitautolu ki he ngaahi fakatahá. (Māt. 18:20) ‘Oku totonu ke tau fakahāhā mo‘oni ‘etau faka‘apa‘apa kiate kinauá ‘aki ‘etau tauhi taimi!

11. Ko e hā ‘oku totonu ai ki he fanga tokoua ‘oku ‘i ai ‘enau konga ‘i ha fakatahá ke nau muimui ‘i he fakahinohino ‘i he 1 Kolinitō 14:40?

¹¹ Kapau ‘oku tau anga-faka‘atu‘i ki hotau fanga tokouá, te tau muimui ‘i he fakahinohino ‘a e Tohi Tapú: “Tuku ke fakahoko ‘a e ngaahi me‘a kotoa pē ‘i ha tu‘unga taau mo maau.” (1 Kol. 14:40) Ko e fanga tokoua ‘oku ‘i ai ‘enau konga ‘i ha fakatahá ‘oku nau muimui ki he fakahinohino ko ení ‘i he‘enau  ‘osi taimi totonú. ‘I he foungá ni, ‘oku nau anga-faka‘atu‘i ai ‘o ‘ikai ki he tokotaha-malanga pē hono hokó kae pehē foki ki he fakataha‘angá fakakātoa. Fakakaukau ki he founga ‘e uesia nai ai ‘a e ni‘ihi kehé kapau ‘e tōmui ‘a e tuku ‘a e fakatahá. ‘Oku fiema‘u ki he fanga tokoua ‘e ni‘ihi ke nau faka‘uli ki ha feitu‘u mama‘o ‘i he foki ki honau ‘apí. ‘Oku fiema‘u ki he ni‘ihi ke nau ma‘u ha pasi pe ko ha lēlue. Pea ko e ni‘ihi ‘oku nau ma‘u ha hoa ta‘etuí ‘oku nau ‘amanekina ke nau ‘i ‘api ‘i ha taimi pau.

12. Ko e hā ‘oku tuha ai ‘a e kau mātu‘á mo e faka‘apa‘apa mo e ‘ofá? (Sio ki he puha “ Anga-Faka‘atu‘i ki he Fa‘ahinga ‘Oku Takimu‘á.”)

¹² ‘Oku ngāue mālohi ‘a e kau mātu‘á ‘i he fakataha‘angá pea ‘i he ngāue fakafaifekaú, ko ia ‘oku nau tuha mo ‘etau faka‘apa‘apá mo e ‘ofá. (Lau ‘a e 1 Tesalonaika 5:12, 13.) Ko e mo‘oni ‘okú ke hounga‘ia lahi ‘i he me‘a kotoa ‘oku nau fai ma‘aú. ‘E lava ke ke fakahaa‘i eni ‘aki ‘a e talangofua loto-lelei mo poupou kiate kinautolu, koe‘uhí “‘oku nau hanganaki le‘ohi kimoutolu ‘i he tu‘unga ko e fa‘ahinga ‘a ia te nau fai ha fakamatala ki he me‘á ni.”​—Hep. 13:7, 17.

13. Ko e hā ‘oku lava ke tau ako mei he anga ‘o e fakafeangai ‘a Sīsū ki he kakaí?

¹³ ‘I he kikite fekau‘aki mo Sīsuú, na‘e pehē ‘e ‘Aisea: “He‘ikai te ne maumau‘i ha kaho kuo laiki, pea he‘ikai te ne tāmate‘i ha vavae maama ‘oku tamatemate.” (‘Ai. 42:3) Ko e ‘ofa ‘a Sīsū ki he kakaí na‘á ne ‘ai ia ke ne ma‘u ‘a e kaungāongo‘i. Na‘á ne mahino‘i ‘a e ongo‘i ‘a e fa‘ahinga na‘e ongo‘i loto-si‘i mo vaivai ‘o hangē ko ha “kaho kuo laiki” pe ko ha “vavae maama ‘oku tamatemate,” ko ia na‘á ne anga-lelei mo anga-kātaki kiate kinautolu. Na‘a mo e fānaú na‘a nau loto ke ‘ia Sīsū. (Mk. 10:14) Ko e mo‘oni, he‘ikai lava ke tau mahino‘i pe ako‘i ‘a e kakaí ‘i he founga na‘e fai ‘e Sīsuú! Ka ‘e lava ke tau fakahāhā ‘oku tau anga-faka‘atu‘i ki he fa‘ahinga ‘i hotau feitu‘u ngāué ‘i he anga ‘o ‘etau lea kiate kinautolú, ‘i he taimi ‘oku tau fai ai iá, pea mo hono fuoloa ‘o ‘etau nofo aí.

14. Ko e hā ‘oku totonu ai ke tau fakakaukau ki he anga ‘o ‘etau lea ki he kakaí?

¹⁴ ‘Oku totonu ke fēfē ‘etau lea ki he kakaí? Ko e laui miliona ‘o e kakai he ‘aho ní kuo “ngaohikovia kinautolu mo li‘ekina” ‘e he kau taki pisinisi,  kau taki fakapolitikale, mo e kau taki lotu kākā mo anga-fakamamahi ‘o e māmani ko ení. (Māt. 9:36) Ko hono olá, ‘oku ‘ikai ke falala ‘a e tokolahi ki ha taha pē pea ‘oku ‘ikai ha‘anau ‘amanaki. Ko e ‘uhinga ia ‘oku fiema‘u ai ke fakahāhā kiate kinautolu ‘i he lea ‘oku tau ngāue‘akí mo e tō ‘o hotau le‘ó ‘oku tau anga-lelei pea ‘oku tau tokanga kiate kinautolu! ‘Oku loto ‘a e kakai tokolahi ke fanongo ki he‘etau pōpoakí ‘o ‘ikai koe‘uhi pē ko ‘etau ngāue‘aki lelei ‘a e Tohi Tapú ka koe‘uhí foki ko ‘etau mahu‘inga‘ia mo‘oni ‘iate kinautolu mo fakahāhā ‘a e faka‘apa‘apa kiate kinautolú.

15. Ko e hā ha ngaahi founga ‘e lava ke tau anga-faka‘atu‘i ai ki he kakai ‘i hotau feitu‘u ngāué?

¹⁵ ‘Oku lahi ‘a e ngaahi founga ‘e lava ke tau anga-faka‘atu‘i ai ki he kakai ‘i hotau feitu‘u ngāué. ‘Oku fiema‘u ke tau ‘eke ha ngaahi fehu‘i ‘i he anga-lelei mo e anga-faka‘apa‘apa. Na‘e ngāue ha tāimu‘a ‘i ha feitu‘u ‘a ia na‘e mā ai ‘a e tokolahi ‘o e kakaí, ko ia na‘á ne faka‘ehi‘ehi mei hono ‘eke ha ngaahi fehu‘i ‘e ‘ai ai ke nau ongo‘i mā kapau ‘oku ‘ikai te nau ‘ilo ‘a e tali totonú. Na‘e ‘ikai te ne ‘eke, “‘Okú ke ‘ilo‘i ‘a e huafa ‘o e ‘Otuá?” pe “‘Okú ke ‘ilo‘i pe ko e hā ‘a e Pule‘anga ‘o e ‘Otuá?” ‘I hono kehé, na‘á ne lea‘aki ha me‘a hangē ko ení, “Kuó u ‘ilo‘i mei he Tohi Tapú ko e ‘Otuá ‘oku ‘i ai hono huafa fakafo‘ituitui. ‘E lava ke u fakahaa‘i atu ‘a e huafa ko iá?” ‘Oku ‘ikai ke ngāue‘aki ‘a e foungá ni ‘i he feitu‘u kotoa pē, koe‘uhí he ‘oku kehekehe ‘a e kakaí mo e anga fakafonuá. Ka ‘oku totonu ke tau fakafeangai ma‘u pē ‘i he anga-lelei mo e anga-faka‘apa‘apa ki he kakai ‘i hotau feitu‘u ngāué. Ke fai ení, ‘oku fiema‘u ke tau feinga ke ‘ilo‘i lelei kinautolu.

16, 17. ‘E lava fēfē ke tau fakahāhā ‘a e anga-lelei ‘i hono fakapapau‘i ‘a e (a) taimi ke ‘a‘ahi ai ki he kakaí? (e) fuoloa ‘o ‘etau talanoa mo kinautolú?

¹⁶ Ko fē ‘a e taimi ‘oku totonu ke tau ‘a‘ahi ai ki he kakaí? ‘I he‘etau ‘alu mei he fale ki he falé, ‘oku ‘ikai ke ‘amanekina kitautolu ‘e he kakaí koe‘uhí na‘e ‘ikai te nau fakaafe‘i kitautolu. ‘Oku mātu‘aki mahu‘inga leva ke tau ‘a‘ahi kiate kinautolu ‘i ha taimi nai te nau loto-lelei ange ai ke talanoá. (Māt. 7:12) Ko e fakatātaá, ‘oku sai‘ia ‘a e kakai ‘i ho feitu‘u ngāué ke mohe fuoloa ‘i he faka‘osinga uiké? Mahalo ‘e lava ke kamata ho‘o ngāue fakafaifekaú ‘aki ho‘o ngāue ‘i he halá, faifakamo‘oni ‘i he feitu‘u kakaí, pe fai ha ngaahi toe ‘a‘ahi ki he kakai ‘okú ke ‘ilo‘i te nau faingamālie ke talanoá.

¹⁷ ‘Oku totonu ke fuoloa fēfē ‘etau ‘i aí? ‘Oku femo‘uekina ‘aupito ‘a e kakai tokolahi, ko ia ‘e lelei nai ke tauhi ke nounou ‘etau ‘a‘ahí, tautefito ‘i he ‘uluaki taimí. ‘Oku lelei ange ke ‘osi vave ‘etau talanoá ‘i ha‘atau nofo ai ‘o fu‘u fuoloa. (1 Kol. 9:20-23) ‘I he sio ‘a e kakaí ‘oku tau mahino‘i ‘oku nau femo‘uekiná, te nau loto-lelei ange ai ke talanoa mo kitautolu ‘i he taimi hono hoko te tau sio ai kiate kinautolú. Kapau ‘oku tau fakahāhā ‘a e ngaahi ‘ulungaanga ‘oku ha‘u mei he laumālie ‘o e ‘Otuá, te tau hoko mo‘oni ai ko e ‘kaungāngāue ‘o e ‘Otuá.’ ‘E a‘u nai ‘o ngāue‘aki kitautolu ‘e Sihova ke tokoni‘i ha tokotaha ke ne ako ‘a e mo‘oní!​—1 Kol. 3:6, 7, 9.

18. ‘I he‘etau anga-faka‘atu‘i ki he ni‘ihi kehé, ko e hā ‘a e ngaahi tāpuaki ‘oku tau ‘amanaki te tau ma‘ú?

¹⁸ Ko ia tau fai ‘a e me‘a kotoa te tau malavá ke hoko ‘o anga-faka‘atu‘i ki he ngaahi mēmipa ‘o hotau fāmilí, ki hotau fanga tokouá mo e fanga tuofāfiné, mo e fa‘ahinga ‘oku tau fetaulaki ‘i he ngāue fakafaifekaú. Te tau ma‘u leva ai ‘a e tāpuaki lahi, ‘i he taimí ni pea ‘i he kaha‘ú. Hangē ko e lau ‘a e Saame 41:1, 2: “Fiefia ē ko ha taha ‘okú ne fakahāhā ‘a e faka‘atu‘i ki he tokotaha mā‘ulaló; ‘e fakahaofi ia ‘e Sihova ‘i he ‘aho ‘o e faingata‘á. ‘E le‘ohi ia ‘e Sihova pea tauhi ia ke ne mo‘ui. ‘E fakahaa‘i ia ko ha tokotaha fiefia ‘i he māmaní.”