‘Oku pehē ‘i he veesi fakatupu fakakaukau ko ení: “Kapau ‘okú ke sio ki hano ngaohikovia ‘o e masivá pea mo hano maumau‘i ‘a e fakamaau totonú mo e mā‘oni‘oní ‘i ho vahefonuá, ‘oua na‘á ke ‘ohovale ‘i he me‘á ni. He ko e ‘ōfisa mā‘olunga ko iá ‘oku siofi ia ‘e he tokotaha ‘oku mā‘olunga ange ‘iate ia, pea ‘oku ‘i ai mo e ni‘ihi kehe ‘oku nau toe mā‘olunga ange ‘iate kinautolu.”​—Tml. 5:8.

Mei he vakai ‘a e tangatá, ‘oku hā ngali ‘uhinga pē ‘a e fakamatala ko ení ki he kau tangata ma‘u mafai ‘i he pule‘angá. Neongo ia, ‘i he‘etau fakakaukau lahi ange fekau‘aki mo iá, ‘oku toe fakahaa‘i mai ai ha mo‘oni fekau‘aki mo Sihova, ‘a ia ‘oku totonu ke ne fakafiemālie‘i mo fakalototo‘a‘i kitautolu.

‘Oku lave ‘a e Tangata Malanga 5:8 ki ha tokotaha pule ‘okú ne ngaohikovia ‘a e masivá pea fakafeangai ta‘etotonu kiate kinautolu. ‘Oku totonu ki he tokotaha pulé ke ne manatu‘i ‘oku ngalingali ‘oku siofi ia ‘e ha tokotaha ‘okú ne ma‘u ha tu‘unga mā‘olunga ange pe mafai lahi ange ‘iate ia ‘i he pule‘angá. Ko hono mo‘oní, ‘oku ‘i ai pē nai ‘a e ni‘ihi kehe ‘oku nau ma‘u ‘a e ngaahi tu‘unga mā‘olunga ange. Ko e me‘a fakamamahí, ‘i he ngaahi pule‘anga fakaetangatá, ko e kotoa ‘o e kau pule ko ení ‘oku fakamele‘i nai, pea ko e kakaí kuo pau ke nau fekuki mo e fakamaau ta‘etotonú ‘i he ngaahi tu‘unga lahi.

Ka neongo ‘a e hā ngali ‘ikai nai ha ‘amanakí, ‘oku lava ke tau fiemālie ‘i he ‘ilo‘i ko Sihova ‘okú ne ‘siofi na‘a mo e kau ‘ōfisa mā‘olunga’ ‘i he ngaahi pule‘anga fakaetangatá. ‘E lava ke tau tautapa ki he ‘Otuá pea lī ‘etau kavengá kiate ia. (Saame 55:22; Fil. 4:6, 7) ‘Oku tau ‘ilo‘i “ko e ongo fo‘i fofonga ‘o Sihová ‘oku fetoutoumoliliu‘aki ‘i he māmaní kotoa ke fakahāhā hono mālohí koe‘uhi ko e fa‘ahinga ko ia ‘oku kakato honau lotó kiate iá.”​—2 Kal. 16:9.

Ko ia ai, ‘oku fakamanatu mai ‘i he Tangata Malanga 5:8 ‘a e māmani ‘oku tau nofo aí pea ‘oku ‘i ai ma‘u pē ha tokotaha ‘oku lahi ange hono mafaí. Ko e mahu‘inga angé, ‘oku tokoni‘i kitautolu ‘e he veesi ko ení ke fakakaukauloto ki he mo‘oni‘i me‘a ko ia ko Sihova ‘oku mā‘olunga tahá, ‘io ‘a e Mafai Aoniú. ‘Okú ne pule he taimí ni fakafou ‘i hono ‘Aló, ‘a Sīsū Kalaisi, ko e Tu‘i ‘o e Pule‘angá. Ko e Māfimafi-Aoniú, ‘a ia ‘okú ne siofi ‘a e me‘a kotoa pē, ‘okú ne fakamaau totonu mo faitotonu faka‘aufuli pea ‘oku pehē pē mo hono ‘Aló.