1. Ko e hā ʻa e taumuʻa ʻaonga ʻe lava ke tau fokotuʻu ʻi he fakaʻaʻau ke tau taʻumotuʻa angé?

ʻI HE fakaʻaʻau ke tau taʻumotuʻa angé, te tau manavasiʻi nai naʻa ʻikai ke toe ʻi ai hatau ʻaonga kia Sihova ʻo hangē ko ia ki muʻá. Neongo ʻoku moʻoni nai ʻoku siʻi ange hotau iví he taimí ni, ʻe lava ke tau ngāueʻaki ʻa e poto mo e taukei kuo tau maʻú ke tokoniʻi ʻa e faʻahinga kei siʻi angé ke nau aʻusia ʻenau malava kakató pea fua ʻa e ngaahi fatongia foʻou. Naʻe pehē ʻe ha mātuʻa fuoloa, “ʻI he kamata ke u ongoʻi ʻa e fakangatangata ʻo e taʻumotuʻá, naʻá ku houngaʻia ʻi he ʻi ai ʻa e fanga tokoua taau kei siʻi ange naʻa nau faingamālie ke fai ʻa e ngāué.”

2. Ko e hā te tau lāulea ki ai ʻi he kupu ko ení?

² ʻI he kupu ki muʻá naʻe lāulea ai ki he founga ʻe maʻu ʻaonga ai ʻa e faʻahinga kei siʻí ʻi he taimi ʻoku nau ʻunuʻunu ofi ange ai ki he kau taʻumotuʻá. ʻI he kupu ko ení, te tau vakai ai ki he founga ʻe lava ke hanga ʻe he ngaahi ʻulungaanga hangē ko e anga-fakatōkilaló, anga-fakanānā, houngaʻiá mo e nima-homó ʻo tokoniʻi ʻa e kau taʻumotuʻá ke ngāue fakataha mo e faʻahinga kei siʻí, ʻo iku ia ko ha tāpuaki ki he fakatahaʻangá kotoa.

3. Fakatatau ki he Filipai 2:3, 4, ko e hā ʻa e anga-fakatōkilalo, pea ʻe lava fēfē ke ne tokoniʻi ha Kalisitiane?

³ Kuo pau ke anga-fakatōkilalo ʻa e kau taʻumotuʻá kapau ʻoku nau loto ke tokoniʻi ʻa e faʻahinga kei siʻí. Ko ha tokotaha anga-fakatōkilalo ʻokú ne vakai ki he niʻihi kehé ʻoku nau māʻolunga ange ʻiate ia. (Lau ʻa e Filipai 2:3, 4.) Ko e kau taʻumotuʻa ʻoku nau fakahāhā ʻa e ʻulungāngá ni ʻoku nau ʻiloʻi ʻi he ngaahi tuʻunga lahi ʻoku ʻikai ke taha pē ʻa e founga Fakatohitapu ola lelei ke fakahoko ai ha vāhenga-ngāue. Ko ia ai, ʻoku nau maʻu ha vakai totonu ki he founga naʻa nau fakahoko ai ʻa e ngaahi  meʻá ʻi he kuohilí. (Tml. 7:10) Lolotonga ʻoku nau maʻu ʻa e taukei mahuʻinga ke vahevahe mo e toʻutangata kei siʻi angé, ʻoku nau ʻiloʻi “ʻoku feliuliuaki ʻa e tuʻunga ʻo e māmani ko ení” pea ʻe fiemaʻu nai ke nau feʻunuʻaki ki he ngaahi tuʻunga foʻou.​—1 Kol. 7:31.

4. ʻOku anga-fēfē hono fakahāhā ʻe he kau ʻovasia sēketí ha vakai meimei tatau mo e kau Līvaí?

⁴ Ko e kau taʻumotuʻa anga-fakatōkilaló ʻoku nau lāuʻilo ʻi heʻenau hoholo ke motuʻá, heʻikai lava ke nau fai ʻa e meʻa lahi hangē ko ia naʻa nau anga ki aí. Ko e fakatātaá, fakakaukau ki heʻetau kau ʻovasia sēketí. ʻI heʻenau aʻu ki he taʻu 70, ʻoku fakaafeʻi ke nau fakahoko ha vāhenga-ngāue kehe. ʻE hoko nai ia ko ha pole. Naʻa nau koloaʻaki ʻa e monū ʻo e ngāue maʻa honau fanga tokouá. Ko ha vāhenga-ngāue ia naʻa nau ʻofa ai, pea ʻoku nau kei holi vēkeveke pē ke fai ʻa e ngāue ko iá. Ka ʻoku nau mahinoʻi ʻoku fiemaʻu ʻa e kau talavoú ke nau tokangaʻi ʻa e ngāué. ʻOku nau fakahāhā ai ha vakai meimei tatau mo e kau Līvai ʻi ʻIsileli ʻo e kuonga muʻá, ʻa ia ʻi he aʻu ki he taʻu 50 naʻe fiemaʻu ke nau mālōlō mei he ngāue ʻi he tāpanekalé. Ko e fiefia ʻa e kau Līvai taʻumotuʻa ko iá naʻe ʻikai ke fakatuʻunga ia ʻi ha monū pau. Naʻa nau ngāueʻaki kakato ʻa e ngaahi monū naʻe ʻatā kiate kinautolú, ʻo fai ʻa e kotoa naʻa nau malavá ke tokoniʻi ʻa e faʻahinga kei siʻí. (Nōm. 8:25, 26) ʻI he ʻahó ni, ko e kau ʻovasia sēketi ki muʻá, neongo ʻoku ʻikai ke nau toe ngāue ki ha ngaahi fakatahaʻanga lahi, ʻoku fakamoʻoniʻi ʻenau hoko ko ha tāpuaki moʻoni ki he fakatahaʻanga ʻoku vaheʻi kinautolu ki aí.

5. Ko e hā ʻokú ke ako mei he faʻifaʻitakiʻanga ʻa Dan mo Katie?

 ⁵ Fakakaukau ki he faʻifaʻitakiʻanga ʻa Dan, naʻá ne ngāue ko ha ʻovasia sēketi ʻi he taʻu ʻe 23. ʻI he aʻu ʻa Dan ʻo taʻu 70, ko ia mo hono uaifí, ʻa Katie, naʻe vaheʻi ke na tāimuʻa makehe. Kuo anga-fēfē ʻena feʻunuʻaki ki hona tuʻunga foʻoú? ʻOku pehē ʻe Dan ʻokú ne femoʻuekina ange he taimí ni ʻi ha toe taimi! ʻOkú ne tokanga ki hono ngaahi fatongia ʻi heʻene fakatahaʻangá, tokoniʻi ʻa e fanga tokouá ke taau ko ha sevāniti fakafaifekau, pea akoʻi ʻa e niʻihi kehé ke kau ʻi he faifakamoʻoni ʻi he feituʻu moʻumoʻuá mo e pilīsoné. Kau taʻumotuʻa, tatau ai pē pe ʻokú ke ngāue taimi-kakato pe ʻikai, ʻe lava ke ke fai ʻa e meʻa lahi ke tokoniʻi ʻa e niʻihi kehé. Anga-fēfē? Feʻunuʻaki ki ho tuʻunga foʻoú, fokotuʻu ʻa e ngaahi taumuʻa foʻou, pea tokangataha ki he meʻa ʻoku lava ke ke faí kae ʻikai ko e meʻa heʻikai lava ke ke faí.

6. Ko e hā ʻoku fakapotopoto ai ke anga-fakanānaá? Fakatātaaʻi.

⁶ Ko ha tokotaha anga-fakanānā ʻokú ne lāuʻilo ki hono ngaahi fakangatangatá. (Pal. 11:2) ʻOku ueʻi ia ʻe he anga-fakanānaá ke feʻunuʻaki ʻa e meʻa ʻokú ne ʻamanekiná ʻo fakatatau ki he meʻa ʻoku lava ke ne faí. Ko hono olá, te ne hanganaki fiefia ai mo lavameʻa. ʻE lava ke tau fakahoa ha tokotaha anga-fakanānā ki ha tokotaha ʻokú ne fakaʻuli ʻi ha meʻalele ʻi ha foʻi hake. ʻOku fiemaʻu ki he fakaʻulí ke fetongi ki he kia māʻulalo angé koeʻuhi ke lava ʻo hake ai pē. Ko e moʻoni, mahalo te ne fononga māmālie ange, ka te ne kei ngaʻunu pē ki muʻa. ʻI he tuʻunga meimei tatau, ko ha tokotaha anga-fakanānā ʻokú ne ʻiloʻi ʻa e taimi ke “fetongi ai ki he kia māʻulaló” koeʻuhi ke ne kei longomoʻui mo lavameʻa ai pē ʻi he ngāue ʻa Sihová.​—Fil. 4:5.

7. Naʻe anga-fēfē hono fakahāhā ʻe Pāsiliai ʻa e anga-fakanānaá?

⁷ Fakatokangaʻi ʻa e faʻifaʻitakiʻanga ʻa Pāsiliaí, naʻá ne taʻu 80 ʻi hono fakaafeʻi ia ʻe Tuʻi Tēvita ke hoko ko ha konga ʻo e lotoʻā fakatuʻí. Ko e anga-fakanānā ʻa Pāsiliaí naʻe ʻikai ke ne tali ai ʻa e fakaafe ʻa e tuʻí. ʻI he lāuʻilo ʻa Pāsiliai ki hono tuʻunga fakangatangata koeʻuhi ko hono taʻumotuʻá, naʻá ne fokotuʻu ange ha kiʻi talavou ko Kīmami ke ne fetongi ia. (2 Sām. 19:35-37) Hangē ko Pāsiliaí, ʻoku fiefia ʻa e kau tangata taʻumotuʻá ke ʻoange ʻa e ngāué ke fai ʻe he kau talavoú.

8. Naʻe anga-fēfē hono fakahāhā ʻe Tuʻi Tēvita ʻa e anga-fakanānaá ʻi he fekauʻaki mo e langa ʻo e temipalé?

⁸ Naʻe fokotuʻu foki ʻe Tuʻi Tēvita ʻa e faʻifaʻitakiʻanga lelei ʻaupito ʻo e anga-fakanānaá. Naʻá ne fakaʻamu ʻaki hono lotó kotoa ke langa ha fale moʻo Sihova. Ka ʻi hono fakahā ʻe Sihova kia Tēvita ko e monū ko ení ʻe ʻoange ki he kiʻi talavou ko Solomoné, naʻá ne tali ʻa e fili ʻa Sihová pea poupou ʻaufuatō ki he ngāue langá. (1 Kal. 17:4; 22:5) Naʻe ʻikai ke ongoʻi ʻe Tēvita ko ia ʻa e tokotaha lelei ange ki he ngāue ko iá koeʻuhi naʻe “kei siʻi mo taʻetaukei” ʻa Solomone. (1 Kal. 29:1) Naʻe ʻiloʻi ʻe Tēvita ko e lavameʻa ʻa e ngāue langá naʻe fakatuʻunga ia ʻi he tāpuaki ʻa Sihová, ʻo ʻikai ʻi he taʻumotuʻa pe taukei ʻa e faʻahinga ʻoku takimuʻá. ʻI he faʻifaʻitaki kia Tēvitá, ko e kau taʻumotuʻa ʻi he ʻaho ní ʻoku nau nofoʻaki longomoʻui naʻa mo e taimi ʻoku liliu ai honau fatongiá. Pea ʻoku nau ʻilo ʻe tāpuakiʻi ʻe Sihova ʻa e faʻahinga kei siʻi ʻoku nau fai ʻa e ngāue naʻa nau fai ki muʻá.

9. Naʻe anga-fēfē hono fakahāhā ʻe ha mēmipa ʻo ha Kōmiti Vaʻa ʻa e anga-fakanānaá?

⁹ Ko ha faʻifaʻitakiʻanga ʻi onopooni ʻo e anga-fakanānaá ko ha tokoua ko Shigeo. ʻI he 1976, ʻi heʻene taʻu 30, naʻe fakanofo ia ke ngāue ʻi ha Kōmiti Vaʻa. ʻI he 2004 naʻá ne hoko ko e sea ʻo e Kōmiti Vaʻá. Ki mui ai naʻá ne ʻiloʻi kuó ne aʻu ki he ngataʻanga hono mālohi fakaesinó pea  naʻe ʻikai kei lava ke ne fakahoko vave ʻa e ngāué. Naʻá ne fakakaukau ʻi he faʻa lotu ki he ʻaonga hono fua ʻe ha tokoua kei talavou ʻa e ngaahi fatongiá. Neongo ʻoku ʻikai ke kei hoko ʻa Shigeo ko e sea, ʻokú ne kei ngāue fakataha pē mo e kau mēmipa ʻo e Kōmiti Vaʻá. Hangē ko ia naʻa tau vakai ki ai ʻi he faʻifaʻitakiʻanga ʻa Pāsiliai, Tuʻi Tēvita mo Shigeo, ko ha tokotaha ʻoku anga-fakatōkilalo mo anga-fakanānā te ne tokangataha ki he mālohi ʻo e faʻahinga kei siʻí kae ʻikai ko ʻenau taʻetaukeí. Te ne vakai kiate kinautolu ko ha kaungāngāue kae ʻikai ko ha faʻahinga ke feʻauʻauhi mo ia.​—Pal. 20:29.

10. Ko e hā ʻa e vakai ʻoku maʻu ʻe he kau taʻumotuʻá ki he faʻahinga kei siʻi ʻi he fakatahaʻangá?

¹⁰ Ko e kau taʻumotuʻá ʻoku nau vakai ki he faʻahinga kei siʻí ko ha meʻaʻofa meia Sihova ʻa ia ʻoku nau houngaʻia ai. ʻI he holo ʻa e ivi ʻo e kau taʻumotuʻá, ʻoku nau fakamālōʻiaʻi ʻa e faʻahinga ʻoku nau maʻu ʻa e mālohi fakatalavoú ʻi heʻenau loto-lelei mo malava ke fakahoko ʻa e ngaahi fiemaʻú pea ngāue ʻi he fakatahaʻangá.

11. ʻOku anga-fēfē hono fakatātaaʻi ʻi he Lute 4:13-16 ʻa e ngaahi tāpuaki ʻi hono tali loto-houngaʻia ʻa e tokoni mei ha tokotaha kei siʻi?

¹¹ Ko Nāomi ko ha faʻifaʻitakiʻanga lelei ʻaupito ia ʻi he Tohi Tapú ʻo ha tokotaha taʻumotuʻa naʻá ne tali loto-houngaʻia ʻa e tokoni mei ha tokotaha kei siʻi. ʻI he kamatá, naʻe fakaʻaiʻai ʻe Nāomi ʻa e uaifi ʻo ʻene tama kuo maté ʻa Lute ke foki ki hono kakaí. Kae kehe, ʻi he vilitaki ʻa Lute ke foki mo Nāomi ki Pētelihemá, naʻá ne tali ʻa e poupou mateaki ʻa Luté. (Lute 1:7, 8, 18) Pea he tāpuaki ē ki he ongo fefiné fakatouʻosi! (Lau ʻa e Lute 4:13-16.) Ko e anga-fakatōkilaló te ne ueʻi ʻa e kau taʻumotuʻá ke nau muimui ʻi he faʻifaʻitakiʻanga ʻa Nāomí.

12. Naʻe anga-fēfē hono fakahāhā ʻe he ʻapositolo ko Paulá ʻene houngaʻiá?

¹² Ko e ʻapositolo ko Paulá naʻá ne houngaʻia  ʻi he tokoni naʻá ne maʻú. Ko e fakatātaá, naʻá ne fakamālō ki he kau Kalisitiane ʻi Filipaí ki he ngaahi meʻaʻofa fakamatelie naʻa nau ʻoange kiate iá. (Fil. 4:16) Naʻá ne fakahaaʻi ʻa e houngaʻia ʻi he tokoni naʻe fai ʻe Tīmote kiate iá. (Fil. 2:19-22) Pea naʻe fakamālō ʻa Paula ki he ʻOtuá koeʻuhi ko e faʻahinga naʻa nau omi ke fakalototoʻaʻi ia ʻi hono fakafolau ia ki Loma ko ha pōpulá. (Ngā. 28:15) Ko Paulá ko ha tokotaha longomoʻui naʻá ne fononga ʻi he maile ʻe laui afe ke malanga mo fakaivimālohiʻi ʻa e ngaahi fakatahaʻangá. Neongo ia, naʻá ne anga-fakatōkilalo ʻo tali ʻa e poupou mei hono fanga tokouá mo e fanga tuofāfiné.

13. ʻE lava fēfē ke fakahāhā ʻe he kau taʻumotuʻá ʻenau houngaʻia ʻi he faʻahinga kei siʻí?

¹³ Kau taʻumotuʻa, ʻe lava ke mou fakahāhā hoʻomou houngaʻia ʻi he faʻahinga kei siʻi ʻi hoʻomou fakatahaʻangá ʻi he ngaahi founga lahi. Kapau ʻoku nau loto ke tokoni kiate kimoutolu ʻi he fefonongaʻakí, fai ha fakatau pe ngaahi fiemaʻu fakaesino kehe, tali loto-houngaʻia ʻenau poupoú. Vakai ki he tokoni peheé ko ha fakahāhā ia ʻo e ʻofa ʻa Sihová. Te mou ʻohovale nai ʻi he haʻi ʻo e kaumeʻa ʻe lava ke fakatupulekina aí. Fakahāhā maʻu pē ʻa e mahuʻingaʻia ʻi he tupu fakalaumālie ho kaungāmeʻa kei siʻí, pea tala ange ʻa hoʻo fiefia ʻi he vakai ki he faʻahinga kei siʻi ʻoku nau kakapa atu ki ha ngāue lahi ange ʻi he fakatahaʻangá. Pea loto-lelei ke vaheʻi ha taimi ke vahevahe kiate kinautolu hoʻo ngaahi hokosia ʻi he moʻuí. ʻI hoʻo fai iá, te ke “fai maʻu pē [ai] ʻa e fakamālō” kia Sihova koeʻuhi ko e faʻahinga kei siʻi kuó ne tohoaki mai ki he fakatahaʻangá.​—Kol. 3:15; Sione 6:44; 1 Tes. 5:18.

14. Naʻe anga-fēfē hono fakahāhā ʻe Tuʻi Tēvita ʻene nima-homó?

¹⁴ ʻOku tau maʻu ʻi he faʻifaʻitakiʻanga ʻa Tuʻi Tēvitá ha toe ʻulungaanga mātuʻaki mahuʻinga ʻoku fiemaʻu ke fakahāhā ʻe he kau taʻumotuʻá​—ko e nima-homo. Naʻá ne fai ha fuʻu tokoni lahi ʻaki ʻene koloa fakafoʻituituí ke poupou ki he langa ʻo e temipalé. (1 Kal. 22:11-16; 29:3, 4) Naʻá ne fai eni neongo ko e lāngilangi ʻo e ngāué ʻe ʻave ia ki hono foha ko Solomoné. ʻI he ʻikai ke tau toe maʻu ʻa e mālohi fakaesino ke kau ʻi he ngaahi langa fakateokalatí, ʻe lava ke hokohoko atu ʻetau poupou ki he ngaahi ngāue ko ení fakafou ʻi heʻetau ngaahi tokoní, ʻo fakatatau ki hotau tuʻungá. Pea ʻe lava ke tau tokoni ki he faʻahinga kei siʻí ke nau maʻu ʻaonga mei he taukei kuo tau maʻu ʻi he faai mai ʻa e ngaahi taʻú.

15. Ko e hā ʻa e ngaahi meʻaʻofa mahuʻinga naʻe vahevahe ʻe he ʻapositolo ko Paulá kia Tīmoté?

¹⁵ ʻI he fekauʻaki mo e nima-homó, fakakaukau ki he faʻifaʻitakiʻanga naʻe fokotuʻu ʻe he ʻapositolo ko Paulá. Naʻe fakaafeʻi ʻe Paula ʻa Tīmote ke kau mo ia ʻi he ngāue fakamisinalé, pea naʻá ne vahevahe nima-homo ange ʻene founga malangá mo e faiakó ki he kiʻi talavou ko ení. (Ngā. 16:1-3) Naʻe akoʻi ʻe Paula ʻa Tīmote ke ne malangaʻi ola lelei ʻa e ongoongo leleí. (1 Kol. 4:17) Naʻe ngāueʻaki leva ʻe Tīmote ʻa e ngaahi founga ʻa Paulá ke akoʻi ʻa e niʻihi kehé.

16. Ko e hā naʻe akoʻi ai ʻe Shigeo ʻa e niʻihi kehé?

¹⁶ Ko e kau taʻumotuʻa ʻi he ʻaho ní ʻoku ʻikai ke nau manavasiʻi naʻa ʻikai ke toe ʻi ai hanau ʻaonga kapau te nau akoʻi ʻa e faʻahinga kei siʻí ke nau fai ʻa e ngāue naʻa nau fai ki muʻa ʻi he fakatahaʻangá. Ko e fakatātaá, ʻi he faai mai ʻa e ngaahi taʻú, ko Shigeo naʻe lave ki ai ki muʻá, naʻá ne akoʻi ʻa e ngaahi meʻa ʻaonga ki he kau mēmipa kei siʻi ʻi he Kōmiti Vaʻá. Naʻá ne fai eni ke tokoni ki he ngāue ʻo e Puleʻangá ʻi he fonua naʻe nofo aí. Ko hono olá, ʻi he aʻu ki he taimi ke mālōlō ai mei he seá, naʻe ʻi ai ha tokoua naʻe ʻosi akoʻi lelei ke ne fetongi ia. ʻOku hokohoko atu hono vahevahe ʻe Shigeo ʻene ngaahi hokosia  laka hake ʻi he taʻu ʻe 45 ʻi he Kōmiti Vaʻá ki he fanga tokoua kei siʻí. Ko ha tāpuaki ē ʻa e faʻahinga peheé ki he kakai ʻa e ʻOtuá!

17. ʻI he fehoanaki mo e Luke 6:38, ko e hā ʻe lava ke foaki ʻe he kau taʻumotuʻá ki he niʻihi kehé?

¹⁷ Ko kimoutolu fanga tokoua mo e fanga tuofāfine taʻumotuʻa ko e fakamoʻoni mahino ko e ngāue kia Sihova ʻaki ʻa e tui mo e anga-tonú ʻa e founga lelei taha ʻo e moʻuí. Fakafou ʻi hoʻomou faʻifaʻitakiʻangá, ʻoku mou fakahaaʻi ai ʻoku tuha mo e feingá ʻa hono ako ʻa e ngaahi tefitoʻi moʻoni Fakatohitapú pea ngāueʻaki ia ʻi hoʻomou moʻuí. ʻOku mou ʻiloʻi mei hoʻomou hokosiá ʻa e founga naʻe fakahoko ai ʻa e ngaahi meʻá ʻi he kuohilí, ka ʻoku mou toe vakai ki he fiemaʻu ke feʻunuʻaki ki he ngaahi tuʻunga foʻoú. Ko kimoutolu kau taʻumotuʻa naʻe toki papitaisó ʻoku lahi foki mo e meʻa ke mou foakí; ʻe lava ke mou vahevahe atu ʻa e fiefia ʻo hono toki ʻiloʻi ʻa Sihova ʻi he taʻumotuʻá. ʻE houngaʻia ʻa e faʻahinga kei siʻí ke fanongo ki hoʻomou ngaahi hokosiá mo e ngaahi lēsoni kuo mou akó. Kapau te mou “hanganaki foaki” mei hoʻomou feleoko ʻo e hokosiá, ʻe tāpuakiʻi lahi kimoutolu ʻe Sihova.​—Lau ʻa e Luke 6:38.

18. Ko e hā ʻa e ʻaonga ʻe lava ke fakatou maʻu ʻe he kau taʻumotuʻá mo e faʻahinga kei siʻí?

¹⁸ Siʻi faʻahinga taʻumotuʻa ʻi hoʻomou ʻunuʻunu ofi ange ki he faʻahinga kei siʻí, ʻe malava ke mou fepoupouaki ai. (Loma 1:12) Ko e tokotaha taki taha ʻokú ne maʻu ha meʻa mahuʻinga ʻoku ʻikai ke maʻu ia ʻe he tokotaha ʻe tahá. ʻOku maʻu ʻe he kau taʻumotuʻá ʻa e poto mo e taukei naʻa nau maʻu ʻi he faai mai ʻa e taimí. ʻOku maʻu ʻe he faʻahinga kei siʻí ʻa e ivi mo e mālohi. ʻI he taimi ʻoku ngāue fakataha ai ʻa e kei siʻi mo e taʻumotuʻa ko ha ngaahi kaumeʻá, ʻoku nau ʻave ai ʻa e fakahīkihikí ki heʻetau Tamai fakahēvani ʻofá pea ko ha tāpuaki ia ki he kotoa ʻi he fakatahaʻangá.