1-2. (a) Fakatatau ki he Palōveepi 16:31, ʻoku totonu ke fēfē ʻetau vakai ki he kau taʻumotuʻa faitōnungá? (e) Ko e hā ʻa e ngaahi fehuʻi te tau tali ʻi he kupu ko ení?

ʻOKU ʻi ai ha paʻake ʻi Arkansas, ʻAmelika, ʻoku lava ʻa e kau ʻaʻahi ki aí ʻo sio ki he taiamoní ʻoku faliki ʻi he kelekelé. Kae kehe, ko e ngaahi taiamoni ko iá ʻoku ʻi honau faʻunga fakanatulá pē ʻo teʻeki ke hifi. Ko hono olá, ko e tokolahi ʻoku ʻikai ke nau ʻiloʻi ko e taiamoni ʻoku nau sio ki aí pea ʻoku nau lue fakalaka pē ʻi he koloa mahuʻinga ko ení.

² ʻI he founga ʻe niʻihi, ko ʻetau kau taʻumotuʻa faitōnungá ʻoku nau hangē ko e ngaahi taiamoni ko iá; ko e ngaahi koloa mahuʻinga kinautolu. ʻOku fakatatau ʻe he Folofola ʻa e ʻOtuá ʻa honau ʻulu hinaá ki ha kalauni. (Lau ʻa e Palōveepi 16:31; 20:29) Neongo ia, ko e ngaahi koloa ko ení ʻe lavangofua pē ke tukunoaʻi. Ko e faʻahinga kei siʻi ʻoku nau mahinoʻi ʻoku mahuʻinga ʻa e kau taʻumotuʻá, ʻoku lava ke nau maʻu ha meʻa ʻoku ʻaonga ange ia ʻi he koloa fakamatelié. ʻI he kupu ko ení, te tau tali ai ʻa e fehuʻi ʻe tolu: Ko e hā ʻoku vakai ai ʻa Sihova ki he kau taʻumotuʻa faitōnungá ko ha koloá? Ko e hā ʻa e ngafa ʻo e faʻahinga ko iá ʻi he kautaha ʻa Sihová? Ko e hā ʻe lava ke tau fai ke maʻu ʻaonga kakato ai mei heʻenau faʻifaʻitakiʻangá?

3. ʻI he fehoanaki mo e Saame 92:12-15, ko e hā ʻoku mahuʻinga ai kia Sihova ʻa e kau taʻumotuʻa faitōnungá?

³ Ko e kau taʻumotuʻa faitōnungá ʻoku nau mahuʻinga kia Sihova ko e ʻOtuá. ʻOkú ne ʻafioʻi honau lotó pea ʻiloʻi lelei kinautolu, pea fakamahuʻingaʻi honau ngaahi ʻulungaanga fakaʻofoʻofá. ʻOkú ne houngaʻia ʻi hono akoʻi ʻe he kau taʻumotuʻá ki he faʻahinga kei siʻí ʻa e poto kuo nau maʻu ʻi heʻenau  ngāue faitōnungá. (Siope 12:12; Pal. 1:1-4) ʻOku toe koloaʻaki ʻe Sihova ʻenau kātakí. (Mal. 3:16) Ko ʻenau moʻuí naʻe ʻikai ke hao mei he faingataʻá; neongo ia, kuo ʻikai ʻaupito ueʻia ʻenau tui kia Sihová. Ko ʻenau ʻamanaki ki he kahaʻú ʻoku toe maama ange ia ʻi he taimi naʻa nau ʻuluaki ako ai ʻa e moʻoní. Pea ʻoku ʻofa ʻa Sihova ʻiate kinautolu koeʻuhi ko e hokohoko atu ʻenau talaki hono huafá “naʻa mo ʻenau taʻumotuʻá.”​—Lau ʻa e Saame 92:12-15.

4. Ko e hā ʻa e ngaahi fakakaukau ʻoku totonu ke fakafiemālie ki hotau fanga tokoua mo e fanga tuofāfine taʻumotuʻá?

⁴ Kapau ʻokú ke ʻalu ke taʻumotuʻa ange, fakapapauʻi ʻoku manatuʻi ʻe Sihova hoʻo ngaahi ngāue ʻi he kuohilí. (Hep. 6:10) Kuó ke poupou faivelenga ki he ngāue fakamalangá, pea ʻoku fakahōifua ia ki heʻetau Tamai fakahēvaní. Kuó ke kātekina ʻa e ngaahi ʻahiʻahi​—naʻa mo e ngaahi ʻahiʻahi fakalotomamahí​—ʻi hono pouaki ʻa e ngaahi tuʻunga māʻoniʻoni Fakatohitapú, fua ʻa e ngaahi fatongia mamafa, pea akoʻi ʻa e niʻihi kehé. Kuó ke fai ho lelei tahá ke laka fakataha mo e kautaha ngaʻunu vave ʻa Sihová. Kuó ke poupouʻi mo fakalototoʻaʻi ʻa e niʻihi kehé ʻi heʻenau tuli ki he ngāue fakafaifekau taimi-kakató. ʻOku ʻofa lahi ʻa Sihova ko e ʻOtuá ʻiate koe ʻi hoʻo mateakí. ʻOkú ne talaʻofa “ʻe ʻikai te ne liʻaki ʻa ʻene kau mateakí”! (Saame 37:28) ʻOkú ne fakapapauʻi atu kiate koe: “Te u kei fata ai pē koe ʻo aʻu ki he hinā ho ʻulú.” (ʻAi. 46:4) Ko ia ʻoua te ke pehē kuó ke taʻumotuʻá pea ʻoku ʻikai ke toe ʻi ai hao ngafa mahuʻinga ʻi he kautaha ʻa Sihová. ʻOkú ke mātuʻaki mahuʻinga!

5. Ko e hā ʻoku totonu ke manatuʻi ʻe he kau taʻumotuʻá?

⁵ Ko e kau taʻumotuʻá ʻoku lahi ʻenau ngaahi malavá. Neongo ʻoku ʻikai nai ke nau maʻu ʻa e mālohi naʻa nau maʻu ki muʻá, ʻoku nau maʻu ʻa e taukei lahi ʻi he faai mai ʻa e ngaahi taʻú. ʻOku hokohoko atu hono ngāueʻaki kinautolu ʻe Sihova ʻi he founga kehekehe, hangē ko ia te tau vakai ki ai ʻi he ngaahi faʻifaʻitakiʻanga ko eni mei he kuohilí mo e lolotonga ní.

6-7. ʻOmai ha fakatātā mei he Tohi Tapú ki ha kau taʻumotuʻa naʻe tāpuakiʻi ʻi heʻenau ngāue mateakí.

⁶ ʻOku lava ke tau maʻu ʻa e ngaahi faʻifaʻitakiʻanga lelei ʻi he Tohi Tapú ʻo e faʻahinga faitōnunga naʻa nau tauhi longomoʻui kia Sihova  ʻo aʻu ki heʻenau taʻumotuʻá. Ko e fakatātaá, ko Mōsese, naʻá ne taʻu 80 nai ʻi heʻene kamata ngāue ko ha palōfita ʻa Sihova mo e fakafofonga ʻo e puleʻanga ʻIsilelí. Naʻe kei ngāueʻaki pē ʻe Sihova ʻa e palōfita ko Tanielá ko ʻEne tangata-lea ʻi heʻene taʻu 90 tupú. Pea ko e ʻapositolo ko Sioné ʻoku ngalingali foki naʻá ne ʻi hono taʻu 90 tupú ʻi hono fakamānavaʻi ia ke ne hiki ʻa e tohi ʻa Fakahaá.

⁷ Ko e kau faitōnunga tokolahi kehe naʻe ʻikai ke nau tuʻu-ki-muʻa pe ʻiloa, pea naʻe lavangofua pē ke tukunoaʻi kinautolu. Neongo ia, naʻe fakatokangaʻi kinautolu ʻe Sihova pea fakapaleʻi ʻenau mateakí. Ko e fakatātaá, ko e tangata “māʻoniʻoni mo manavahē-ʻOtua” ko Simione ʻoku lave nounou ki ai ʻa e Tohi Tapú, ka naʻe ʻafioʻi lelei ia ʻe Sihova pea foaki kiate ia ʻa e monū ke sio ki he kiʻi valevale ko Sīsuú pea mo fai ha kikite fekauʻaki mo e kiʻi tamá mo ʻene faʻeé. (Luke 2:22, 25-35) Fakakaukau foki ki he uitou ko ʻAná ko ha palōfita fefine. Naʻá ne taʻu 84 ka naʻá ne “ʻalu maʻu pē ki he temipalé.” Ko ʻene faitōnunga ʻi he ʻalu maʻu pē ki he temipalé naʻá ne maʻu ai ʻa e tāpuaki lahi ʻi heʻene sio mo ia foki ki he kiʻi valevale ko Sīsuú. Ko Simione mo ʻAna naʻá na mahuʻinga kia Sihova.​—Luke 2:36-38.

8-9. Ko e hā ʻa e poupou ʻoku kei fai ʻe he kau uitoú?

⁸ ʻI onopooni, ko e tokolahi ʻo e kau taʻumotuʻa faitōnungá ʻoku nau hoko ko e kau faʻifaʻitakiʻanga lelei ʻaupito ki he faʻahinga kei siʻí. Fakakaukau ki he hokosia ʻa e tuofefine ko Lois Didur. ʻI heʻene taʻu 21 pē naʻá ne kamata ngāue ko ha tāimuʻa makehe ʻi Kānata. Hili iá, ko ia mo hono husepānití ʻa John, naʻá na kau ki he ngāue fefonongaʻakí ʻi ha laui taʻu. Ki mui ai, naʻá na ngāue ʻi he Pēteli ʻi Kānatá ʻo laka hake ʻi he taʻu ʻe 20. ʻI he taʻu 58 ʻa Lois, naʻe fakaafeʻi ia mo John ke na ngāue ʻi ʻIukalaine. Ko e hā te na faí? Te na fakakaukau nai kuó na fuʻu taʻumotuʻa ke ngāue ʻi ha fonua kehe? Naʻá na tali ʻa e vāhenga-ngāué, pea naʻe fakanofo ʻa John ke ngāue ʻi he Kōmiti Vaʻa ʻi aí. ʻI he hili ʻa e taʻu ʻe fitu naʻe mate ʻa John, naʻe fili ʻa Lois ke nofo pē ʻi hono vāhenga-ngāué. ʻOku taʻu 81 ʻa Lois ʻi he taimí ni, pea ʻokú ne kei ngāue longomoʻui pē pea ʻoku ʻofeina lahi ia ʻe he fāmili Pēteli ʻi ʻIukalainé.

⁹ Ko e kau uitou hangē ko Lois heʻikai nai ke fuʻu fakatokangaʻi kinautolu ʻo hangē ko e taimi naʻe kei moʻui ai honau husepānití; ka, ʻoku ʻikai ʻaupito ke fakasiʻisiʻi ai honau mahuʻingá. ʻOku fakamahuʻingaʻi lahi ʻe Sihova ʻa e fanga tuofāfine naʻa nau poupouʻi honau husepānití ʻi he laui taʻu pea ʻi he taimí ni ʻoku nau kei fakahāhā pē ʻa e tuʻu maʻu tatau. (1 Tīm. 5:3) ʻIkai ngata aí, ʻoku nau fakalototoʻaʻi moʻoni ʻa e faʻahinga kei siʻí.

10. Ko e hā ʻa e faʻifaʻitakiʻanga lelei ʻaupito naʻe fokotuʻu ʻe Tony?

¹⁰ Ko e kau taʻumotuʻa faitōnunga tokolahi ʻoku nau nofo ʻi he ʻapi tauhiʻanga vaivaí ko ha koloa fakalaumālie foki kinautolu. Ko e fakatātaá, ko ha tokoua ko Tony ʻoku nofo he taimí ni ʻi ha feituʻu pehē. Naʻá ne papitaiso  ʻi hono taʻu 20 ʻi ʻAokosi 1942 ʻi Pennsylvania, ʻAmelika. Naʻe vave ʻene fehangahangai mo e ʻīsiu ʻo e tuʻu-ʻataá pea tuku pilīsone ia ʻi he taʻu ʻe ua mo e konga. Ko ia mo hono uaifí ʻa Hilda, naʻá na ʻohake ʻena ongo tamaikí ʻi he moʻoní. ʻI he faai mai ʻa e ngaahi taʻú, naʻe ngāue ʻa Tony ʻi ha fakatahaʻanga ʻe tolu ko ha ʻovasia tauhi (ʻa ia ʻoku ui he taimí ni ko e sea ʻo e kulupu ʻo e kau mātuʻá) pea hoko ko ha ʻovasia ʻi he ʻasemipilī fakasēketí. Naʻá ne fakahoko ʻa e ngaahi fakataha mo e ako Tohi Tapu ʻi ha pilīsone. ʻI he taʻu 98 ʻa Tony ʻoku teʻeki ai pē holo ʻene ngāue kia Sihová. ʻOkú ne kei fai pē hono lelei tahá ke ngāue kia Sihova pea ngāue vāofi mo e fakatahaʻangá!

11. ʻE lava fēfē ke tau fakahāhā ʻoku tau koloaʻaki ʻa e faʻahinga ʻoku nofo ʻi he ngaahi ʻapi tauhiʻanga vaivaí?

¹¹ ʻE lava fēfē ke tau fakahāhā ʻa e fakaʻapaʻapa ki he kau taʻumotuʻa ʻi he ʻapi tauhiʻanga vaivaí? Ko e kau mātuʻá ʻe lava ke nau fakakau kinautolu ki he ngāue ʻa e fakatahaʻangá te nau ala lavá. ʻE lava ke tau fakahāhā ʻa e tokanga fakafoʻituitui ʻaki ʻa e ʻaʻahi kiate kinautolu pe fakaafeʻi ki ha tā vitiō. ʻOku tau loto ke fai ha tokanga makehe ki he kau taʻumotuʻa ʻoku nau nofo nai ʻi ha ʻapi ʻo mamaʻo mei heʻenau fakatahaʻangá. Kapau heʻikai ke tau tokanga, ʻe lava ke ngalo ʻiate kitautolu ʻa e kau taʻumotuʻa ko ení. Ko e niʻihi ʻoku faingataʻa nai ke nau talanoa fekauʻaki mo kinautolu pe fakakaukau ʻoku ʻikai feʻungamālie ke fai pehē. Ka te tau maʻu ʻaonga lahi ʻi hono vaheʻi ha taimi ke ʻeke ha fehuʻi pea fanongo ki heʻenau fakamatala ki he fiefia naʻa nau hokosia ʻi he kautaha ʻa Sihová.

12. Ko e hā ʻe lava ke tau ʻiloʻi ʻi heʻetau fakatahaʻangá tonu?

¹² Te tau ʻohovale nai ke ʻiloʻi ʻoku lahi ʻa e ngaahi faʻifaʻitakiʻanga tuʻu-ki-muʻa ʻo e kau taʻumotuʻa faitōnunga ʻi heʻetau fakatahaʻangá tonu. Ko ha tuofefine ko Harriette naʻá ne tauhi faitōnunga kia Sihova ʻi he laui hongofuluʻi taʻu ʻi heʻene fakatahaʻangá ʻi New Jersey, ʻAmelika. Pea naʻá ne hiki ke nofo mo ʻene taʻahiné. Ko e fanga tokoua ʻi heʻene fakatahaʻanga foʻoú naʻa nau vaheʻi ʻa e taimi ke nau maheni mo ia, pea naʻa nau ʻiloʻi ko ha koloa mahuʻinga ia. Naʻá ne fakalototoʻaʻi kinautolu ʻaki ʻa e talanoa fekauʻaki mo ʻene ngāue fakafaifekaú ʻi heʻene fuofua ako ʻa e moʻoní ʻi he 1920 tupú. ʻI he taimi ko iá, naʻá ne ʻalu maʻu pē mo ʻene polosi fufulu nifó ʻi he ngāue fakamalangá​—naʻa puke ia ʻo fakahū. Ko hono moʻoní, naʻe tuʻo ua ʻene nofo pilīsone ʻi ha uike ʻe taha ʻi he 1933. Lolotonga ʻa e taimi ko iá, ko hono husepāniti taʻetuí naʻá ne poupou kiate ia ʻi hono tokangaʻi ʻena fānau ʻe toko tolu. Ko e moʻoni, ko e kau taʻumotuʻa faitōnunga hangē ko Harriette ʻoku taau ke koloaʻaki!

13. Ko e hā te tau ako fekauʻaki mo e ngafa mahuʻinga ʻo e kau taʻumotuʻá ʻi he fokotuʻutuʻu ʻa Sihová?

¹³ Ko hotau fanga tokoua mo e fanga tuofāfine taʻumotuʻá ʻoku ʻi ai honau ngafa mahuʻinga ʻi he fokotuʻutuʻu ʻa Sihová. Kuo nau vakai ki he anga hono tāpuakiʻi ʻe Sihova ʻi he founga kehekehe ʻene kautahá mo kinautolu tāutaha. Kuo nau ako ʻa e ngaahi lēsoni mahuʻinga mei he fehālaaki naʻa nau faí. Vakai kiate kinautolu ko ha “matavai ʻo e potó” pea ako mei heʻenau hokosiá. (Pal. 18:4) Kapau te ke vaheʻi ha taimi ke ʻiloʻi kinautolu, ʻe fakaivimālohiʻi ai hoʻo tuí pea te ke ako ʻa e meʻa lahi!

14. Ko e hā ʻoku fakalototoʻaʻi ʻe he Teutalōnome 32:7 ʻa e faʻahinga kei siʻí ke nau faí?

¹⁴ Tamuʻomuʻa ke talanoa mo e kau taʻumotuʻá. (Lau ʻa e Teutalōnome 32:7.) Ko e moʻoni, kuo nenefu nai ʻenau sió, totoho ange nai ʻenau lué, pea vaivai ange nai ʻenau leá, ka ʻoku nau kei holi pē ke longomoʻui, pea kuo nau ʻai “ha hingoa lelei” ʻi he vakai mai ʻa Sihová.  (Tml. 7:1) Manatuʻi ʻa e ʻuhinga ʻoku koloaʻaki ai kinautolu ʻe Sihová. Hokohoko atu ke fakaʻapaʻapaʻi kinautolu. Hoko ʻo hangē ko ʻIlaisá. Naʻá ne fakapapauʻi ke nofo fakataha mo ʻIlaisiā ʻo aʻu ki hona ʻaho fakaʻosi fakatahá. Naʻe tuʻo tolu hono fakahaaʻi ʻe ʻIlaisa: “Heʻikai te u mavahe meiate koe.”​—2 Tuʻi 2:2, 4, 6.

15. Ko e hā nai ʻa e ngaahi fehuʻi te tau ʻeke ki he kau taʻumotuʻá?

¹⁵ Fakahāhā ʻa e mahuʻingaʻia moʻoni ʻi he kau taʻumotuʻá ʻaki ʻa e fusi hake ʻenau fakakaukaú ʻi he anga-ʻofa. (Pal. 1:5; 20:5; 1 Tīm. 5:1, 2) ʻEke ʻa e ngaahi fehuʻi hangē ko ení: “ʻI hoʻo kei siʻí, ko e hā naʻá ne fakatuipauʻi koe kuó ke maʻu ʻa e moʻoní?” “Kuo anga-fēfē hono tohoakiʻi koe ʻe hoʻo ngaahi hokosiá ke ofi ange kia Sihová?” “Ko e hā kuó ke ʻiloʻi ko e fakapulipuli ia ki he nofoʻaki fiefia ʻi he ngāue ʻa Sihová?” (1 Tīm. 6:6-8) Pea fanongo ki heʻenau fakamatalá.

16. ʻE lava fēfē ke maʻu ʻaonga ha tokotaha taʻumotuʻa mo ha tokotaha kei siʻi mei heʻena fetalanoaʻakí?

¹⁶ ʻI he taimi ʻoku fetalanoaʻaki ai ha tokotaha taʻumotuʻa mo ha tokotaha kei siʻi, ʻokú na fakatou maʻu ʻaonga. (Loma 1:12) Ko kimoutolu faʻahinga kei siʻí ʻe fakalahi ai hoʻomou houngaʻia ʻi he anga hono tokangaʻi ʻe Sihova ʻene kau sevāniti faitōnungá, pea ʻe ongoʻi ʻe he tokotaha taʻumotuʻá ʻoku fakangeingeiaʻi ia. Te ne fiefia ke fakalau atu kiate kimoutolu ʻa e founga kuo tāpuakiʻi ai ia ʻe Sihová.

17. Ko e hā ʻoku lava ai ke tau pehē ko e kau taʻumotuʻa faitōnungá ʻoku nau toe fakaʻofoʻofa ange ʻi he ʻalu ʻa e taʻú?

¹⁷ Ko e fakaʻofoʻofa fakaesinó ʻoku mole fakataha atu pē mo e taʻumotuʻá, ka ko e faʻahinga ʻoku mateaki kia Sihová ʻoku nau toe fakaʻofoʻofa ange ʻi he ʻalu ʻa e taʻú. (1 Tes. 1:2, 3) Ko e hā ʻoku moʻoni ai iá? Koeʻuhí ʻi he faai atu ʻa e taʻú, kuo nau fakaʻatā ʻa e laumālie ʻo e ʻOtuá ke ne fakafuo mo sivi kinautolu. Ko e lahi ange ʻetau ʻiloʻi, fakaʻapaʻapaʻi pea ako mei hotau fanga tokoua mo e fanga tuofāfine taʻumotuʻa mahuʻingá, ko e lahi ange ia ʻetau vakai kiate kinautolu ko ha koloa mahuʻinga taʻealafakatataua!

18. Ko e hā te tau lāulea ki ai ʻi he kupu hono hokó?

¹⁸ Ko e fakatahaʻangá ʻoku tupu ʻo toe mālohi ange ʻi hono koloaʻaki ʻe he faʻahinga kei siʻí ʻa e kau taʻumotuʻá pea pehē foki ki hono fakamahuʻingaʻi ʻe he kau taʻumotuʻá ʻa e faʻahinga kei siʻí. ʻI heʻetau kupu hono hokó, te tau lāulea ai ki he founga ʻe lava ke fakahāhā ai ʻe he kau taʻumotuʻá ʻoku nau koloaʻaki ʻa e faʻahinga kei siʻi ʻi he fakatahaʻangá.