1. Ko e hā ʻa e ngaahi meʻa fakafiefia ʻoku fakatatali mai ʻi he lolotonga ʻa e Pule Taʻu ʻe Afé?

 ʻE HOKO ko ha taimi fakaofo ʻa e ʻaho ʻe kamata ai ʻa e toetuʻú ʻi heni ʻi he māmaní lolotonga ʻa e Pule Taʻu ʻe Afe ʻa Kalaisí! Ko e faʻahinga kotoa kuo mole honau ʻofaʻangá ʻoku nau holi ke toe sio kiate kinautolu. ʻOku ongoʻi pehē foki mo Sihova. (Siope 14:15) Sioloto atu ki he toe fakataha ʻi he fiefia ʻa e taha kotoa ʻi he māmaní. Hangē ko ia naʻa tau ako ʻi he kupu ki muʻá, ko e “māʻoniʻoní,” ʻa ia ko honau hingoá ʻoku hiki ʻi he tohi ʻo e moʻuí, te nau “toetuʻu ki he moʻui.” (Ngā. 24:15; Sione 5:29) Mahalo ko e tokolahi ʻi hotau ngaahi ʻofaʻangá te nau kau ʻi he faʻahinga ko ia ʻe toe fokotuʻu mai ki he moʻuí ʻi he kamataʻanga ʻo e toetuʻu ʻi he māmaní. * ʻIkai ko ia pē, ko e “taʻemāʻoniʻoní,” hangē ko e faʻahinga naʻe ʻikai ke nau maʻu ha faingamālie feʻunga ke ʻiloʻi ʻa Sihova pe ke tauhi faitōnunga kiate ia ki muʻa ke nau maté, ʻe fokotuʻu hake kinautolu ki ha “toetuʻu ki he fakamaau.”

2-3. (a) Hangē ko ia ʻoku fakahaaʻi ʻi he ʻAisea 11:9, 10, ko e hā ʻa e polokalama fakaeako lahi taha ʻe fakahoko ʻi he hisitōlia ʻo e tangatá? (e) Ko e hā te tau lāulea ki ai ʻi he kupu ko ení?

² Ko e faʻahinga kotoa ko eni ʻe toetuʻú ʻe fiemaʻu ke akoʻi kinautolu. (ʻAi. 26:9; 61:11) Ko ia ko e polokalama fakaeako lahi  taha ʻi he kotoa ʻo e hisitōlia ʻo e tangatá ʻe fiemaʻu ke fakahoko. (Lau ʻa e ʻAisea 11:9, 10.) Ko e hā hono ʻuhingá? Ko e ʻuhinga ʻe taha, ko e taʻemāʻoniʻoni ʻe toetuʻú ʻe fiemaʻu ke nau ako fekauʻaki mo Sīsū Kalaisi, ko e fokotuʻutuʻu ʻa e Puleʻangá, huhuʻí, pea mo e ʻīsiu lahi fakaeʻuniveesi ʻoku kaunga ki ai ʻa e huafa mo e tuʻunga-hau ʻo Sihová. Naʻa mo e māʻoniʻoní ʻe fiemaʻu ke nau ako ki he meʻa kuo fakahaaʻi mai ʻe Sihova fekauʻaki mo ʻene taumuʻa ki he māmaní. Ko e niʻihi ʻo e faʻahinga faitōnunga ko ení naʻa nau mate ki muʻa ke fakatahaʻi ʻa e folofola ʻa Sihová ki he Tohi Tapú. Ko e taʻemāʻoniʻoní mo e māʻoniʻoní fakatouʻosi ʻe lahi ʻa e meʻa ke nau akó.

³ ʻI he kupu ko ení, te tau lāulea ki he fehuʻi ʻe ua: Ko e hā ʻe kau ʻi hono fakahoko ʻo e polokalama fakaeako lahi ko ení? ʻE kaunga fēfē ʻa e polokalama ko iá ki hano hiki tuʻuloa pe ʻikai hiki ʻa e ngaahi hingoá ʻi he tohi ʻo e moʻuí? Ko e tali ki he ongo fehuʻi ko ení ʻoku totonu ke mahuʻinga kiate kitautolu he ʻahó ni. Hangē ko ia te tau vakai ki aí, ko e ngaahi kikite fakatoʻoaloto naʻe hiki ʻi he tohi ʻa Taniela mo Fakahaá ʻe tokoni ki hono fakamāʻalaʻala ʻetau mahino ki he meʻa ʻe hoko ʻi he taimi ʻe toetuʻu mai ai ʻa e maté. ʻUluakí, tau lāulea angé ki he ngaahi meʻa fakafiefia naʻe tomuʻa tala ʻi he kikite ʻa Taniela 12:1, 2.

4-5. Ko e hā ʻoku fakahaaʻi ʻi he Taniela 12:1 fekauʻaki mo e taimi ʻo e ngataʻangá?

⁴ Lau ʻa e Taniela 12:1. Ko e tohi ʻa Tanielá ʻoku fakahaaʻi ai ʻa e hokohoko ʻo e ngaahi meʻa fakafiefia ʻe hoko ʻi he lolotonga ʻa e taimi ʻo e ngataʻangá. Ko e fakatātaá, ʻoku fakahaaʻi ʻi he Taniela 12:1 ko Maikeli, ʻa ia ko Sīsū Kalaisi, ʻokú ne ‘tuʻu maʻá e kakai ʻa e ʻOtuá.’ Ko e konga ko ia ʻo e kikité naʻe kamata fakahoko ia ʻi he 1914 ʻi hono fakanofo ʻo Sīsū ko e Tuʻi ʻo e Puleʻanga fakahēvani ʻo e ʻOtuá.

⁵ Kae kehe, naʻe toe tala foki kia Taniela ko Sīsū te ne “tuʻu hake” lolotonga “ha taimi ʻo e faingataʻa ʻa ia kuo teʻeki ai ke hoko ha meʻa pehē talu mei he hoko mai ha puleʻanga ʻo aʻu mai ki he taimi ko iá.” Ko e “taimi ʻo e faingataʻa” ko ení ko e “fuʻu mamahi lahi” ia ʻoku lave ki ai ʻi he Mātiu 24:21. ʻOku tuʻu hake ʻa Sīsū pe ngāue ke taukapoʻi ʻa e kakai ʻa e ʻOtuá, ʻi he ngataʻanga ʻo e taimi faingataʻa ko ení, ʻa ia, ʻi ʻĀmaketone. ʻOku lave ʻa e tohi ʻa Fakahaá ki he faʻahinga ko ení ko ha “fuʻu kakai lahi kuo nau hao mei he fuʻu mamahi lahí.”​—Fkh. 7:9, 14.

6. Ko e hā ʻe hoko ʻi he hili ʻa e hao atu ʻa e fuʻu kakai lahí ʻi he fuʻu mamahi lahí? Fakamatalaʻi. (Sio foki ki he “Fehuʻi mei he Kau Lautohí” ʻi he ʻīsiu ko ení fekauʻaki mo e toetuʻu ki he moʻui ʻi he māmaní.)

⁶ Lau ʻa e Taniela 12:2. Ko e hā ʻe hoko ʻi he hili ʻa e hao atu ʻa e fuʻu kakai lahí ʻi he taimi ko eni ʻo e faingataʻá? Ko e kikite ko ení ʻoku ʻikai ʻuhinga ia ki ha toetuʻu fakaefakatātā pe ko e fakaake fakalaumālie ʻa e kau sevāniti ʻa e ʻOtuá ʻa ia ʻoku hoko ʻi he lolotonga ʻo e ngaahi ʻaho fakaʻosí, hangē ko ia ko ʻetau mahino ki muʻá. * ʻI hono kehé, ko e ngaahi lea ko ení ʻoku ʻuhinga ia ki ha toetuʻu ʻa e maté ʻa ia ʻe fakahoko ʻi he māmani foʻou ka hoko maí. Ko e hā ʻe lava ke tau fai ai ʻa e fakamulituku ko iá? Ko e foʻi lea ko e “efu” ʻoku toe ngāueʻaki ia ʻi he Siope 17:16 ʻo ʻuhinga ki he “Faʻitoká.” Ko e moʻoniʻi meʻa ko ení ʻoku fakahaaʻi ai ko e Taniela 12:2 ʻoku ʻuhinga ia ki he toetuʻu moʻoni ʻe hoko ʻi he ngataʻanga ʻo e ngaahi ʻaho fakaʻosí pea ʻi he hili ʻo e tau ʻo ʻĀmaketoné.

7. (a) ʻI he ʻuhinga fē ʻe toetuʻu mai ai ʻa e niʻihi ki he ‘moʻui taʻengatá’? (e) ʻE anga-fēfē hoko eni ko ha “toetuʻu lelei ange”?

 ⁷ Ka ʻoku ʻuhinga ki he hā ʻa e pehē ʻi he Taniela 12:2, ʻe ʻi ai ha niʻihi ʻe toetuʻu ki he “moʻui taʻengata”? ʻOku ʻuhinga iá ko e faʻahinga te nau toetuʻu pea nau hoko ʻo ʻiloʻi, pe hokohoko atu ke ʻiloʻi, pea talangofua kia Sihova mo Sīsū ʻi he lolotonga ʻa e taʻu ʻe 1,000 ʻe faai atu pē ʻo nau maʻu ʻa e moʻui taʻengatá. (Sione 17:3) ʻE hoko eni ko ha “toetuʻu lelei ange” ʻi he toetuʻu ʻa e faʻahinga ʻo e tangatá ʻi he kuohilí. (Hep. 11:35) Ko e hā hono ʻuhingá? Koeʻuhí ko e faʻahinga taʻehaohaoa ko iá naʻa nau toe mate pē.

8. ʻE anga-fēfē ʻa e toetuʻu mai ʻa e niʻihi ki he “luma mo e fehiʻanekinaʻi taʻengata”?

⁸ Ka heʻikai ke tali ʻe he faʻahinga kotoa ʻe toetuʻú ʻa e polokalama ako ʻa Sihová. ʻOku pehē ʻi he kikite ʻa Tanielá ko e niʻihi te nau toetuʻu “ki he luma mo e fehiʻanekinaʻi taʻengata.” Koeʻuhi te nau fakahāhā ha laumālie angatuʻu, ko honau hingoá heʻikai hiki ia ʻi he tohi ʻo e moʻuí pea heʻikai te nau maʻu ʻa e moʻui taʻengatá. ʻI hono kehé, te nau maʻu ʻa e “fehiʻanekinaʻi taʻengata,” pe fakaʻauha. Ko ia ʻoku lave ʻa e Taniela 12:2 ki he meʻa ʻe faai atu pē ʻo hoko ki he kotoa ʻo e faʻahinga ʻe toetuʻú ʻo makatuʻunga ʻi he meʻa te nau fai hili ʻenau toetuʻú. * (Fkh. 20:12) Ko e niʻihi te nau maʻu ʻa e moʻui taʻengatá; pea ko e niʻihi heʻikai ke nau maʻu ia.

9-10. Ko e hā ha toe meʻa ʻe hoko hili ʻa e fuʻu mamahi lahí, pea ko hai ʻa e faʻahinga “te nau ulo ngingila ʻo hangē ko e ʻatāloa ʻo e langí”?

⁹ Lau ʻa e Taniela 12:3. Ko e hā ha toe meʻa ʻe hoko hili ʻa e “taimi ʻo e faingataʻa” ʻoku teu ke hoko maí? Tānaki atu ki he Taniela 12:2, ʻi he veesi 3 ʻoku lave ai ki ha meʻa ʻe hoko ʻi he hili ʻa e fuʻu mamahi lahí.

¹⁰ Ko hai ʻa e faʻahinga “te nau ulo ngingila ʻo hangē ko e ʻatāloa ʻo e langí”? ʻOku tau maʻu ha fakalika ʻi he lea ʻa Sīsū ʻoku hiki ʻi he Mātiu 13:43: “ʻI he taimi ko iá ko e kau māʻoniʻoní te nau ulo ʻo ngingila ʻo hangē ko e laʻaá ʻi he Puleʻanga ʻo ʻenau Tamaí.” ʻI he potutohi ki he ngaahi lea ko ení, naʻe talanoa ʻa Sīsū fekauʻaki mo e “ngaahi foha . . . ʻo e Puleʻangá,” ʻa hono fanga tokoua paní, ʻa ia te nau ngāue fakataha mo ia ʻi he Puleʻanga fakahēvaní. (Māt. 13:38) Ko ia kuo pau pē ʻoku ʻuhinga ʻa e Taniela 12:3 ki he kau paní mo e ngāue te nau fai ʻi he lolotonga ʻa e Pule Taʻu ʻe Afé.

11-12. Ko e hā ʻa e ngāue ʻe fai ʻe he toko 144,000 lolotonga ʻa e taʻu ʻe 1,000?

¹¹ ʻE anga-fēfē hono ʻomai ʻe he kau paní “ʻa e tokolahi ki he māʻoniʻoní”? Ko e kau paní te nau ngāue vāofi mo Sīsū Kalaisi ke tataki ʻa e polokalama fakaeako ʻe fakahoko heni ʻi he māmaní lolotonga ʻa e taʻu ʻe 1,000. Ko e toko 144,000 heʻikai ngata pē ʻenau pule ko e ngaahi tuʻí ka te nau toe ngāue foki ko e kau taulaʻeiki. (Fkh. 1:6; 5:10; 20:6) ʻI he tuʻunga ko iá, te nau tokoni ki hono “faitoʻo ʻo e ngaahi puleʻangá”​—ʻo fakafoki māmālie ʻa e faʻahinga ʻo e tangatá ki he haohaoá. (Fkh. 22:1, 2; ʻIsi. 47:12) Ko ha meʻa fakafiefia ē ko ia ki he kau paní!

¹² Ko hai ʻe kau ʻi he “tokolahi” ʻe ʻomai ki he māʻoniʻoní? ʻE kau heni ʻa e faʻahinga ʻe toetuʻú pea pehē foki ki he faʻahinga te nau hao atu ʻi ʻĀmaketone fakataha mo ha fānau pē ʻe fanauʻi ʻi he māmani foʻoú. ʻI he ngataʻanga ʻo e taʻu ʻe 1,000, ko e kotoa ʻe nofo ʻi he māmaní te nau hoko ʻo haohaoa. Ko ia ko fē taimi ʻe hiki tuʻuloa ai honau hingoá ʻi he tohi ʻo e  moʻuí ʻaki ʻa e vaitohí kae ʻikai ʻaki ʻa e peni vahevahé?

13-14. Ko e hā ʻe fiemaʻu ke fakahāhā ʻe he kakai haohaoa kotoa ʻi he māmaní ki muʻa ke nau maʻu ʻa e moʻui taʻengatá?

¹³ Kuo pau ke tau manatuʻi ko e hoko ʻo haohaoá ʻoku ʻikai ʻuhinga iá ʻe ʻotomētiki pē hono maʻu ʻe ha taha ʻa e moʻui taʻengatá. Fakakaukau kia ʻĀtama mo ʻIvi. Naʻá na haohaoa, ka naʻe fiemaʻu ke na fakahāhā ʻena talangofua kia Sihova ko e ʻOtuá ki muʻa ke na maʻu ʻa e moʻui taʻengatá. Pea ko e pangó, naʻe ʻikai ke na talangofua kiate ia.​—Loma 5:12.

¹⁴ Ko e hā ʻa e tuʻunga ʻe ʻi ai ʻa e faʻahinga ʻi he māmaní ʻi he ngataʻanga ʻo e taʻu ʻe 1,000? ʻE haohaoa ʻa e taha kotoa. ʻE poupou kakato ʻa e kakai haohaoa ko iá ki he pule ʻa Sihová ʻo taʻengata? Pe ʻe hoko nai ha niʻihi ʻo hangē ko ʻĀtama mo ʻIví​—neongo ʻena haohaoá naʻá na hoko ʻo taʻefaitōnunga? Ko e ongo fehuʻi ko ení ʻe fiemaʻu ke tali, ka ʻe anga-fēfē?

15-16. (a) Ko fē taimi ʻe maʻu ai ʻe he faʻahinga kotoa ʻo e tangatá ha faingamālie ke fakahāhā ʻenau mateaki kia Sihová? (e) Ko e hā ʻa e ola fakaʻosi ʻo e ʻahiʻahi ko ení?

¹⁵ ʻE tuku pilīsone ʻa Sētane ʻi he taʻu ʻe 1,000. Lolotonga ʻa e taimi ko iá, heʻikai malava ke ne takihalaʻi ha taha. Neongo ia, ʻi he ngataʻanga ʻo e taʻu ʻe 1,000, ʻe tuku ange mai ʻa Sētane. Te ne feinga leva ke takihalaʻi ʻa e faʻahinga haohaoa ʻo e tangatá. Lolotonga ʻa e  ʻahiʻahi ko iá, ko e kotoa ʻo e faʻahinga haohaoa ʻo e tangata ʻi he māmaní te nau maʻu ʻa e faingamālie ke fakahaaʻi mahino ʻa e tafaʻaki ʻoku nau tuʻu ai ʻi he ʻīsiu ʻo e huafa mo e tuʻunga-hau ʻo e ʻOtuá. (Fkh. 20:7-10) Ko ʻenau fakafeangai tāutaha ki he ngaahi feinga ʻa Sētané ʻe fakapapauʻi ai pe ʻoku totonu ke hiki tuʻuloa honau hingoá ʻi he tohi ʻo e moʻuí.

¹⁶ Ko e niʻihi, ʻa ia ʻoku ʻikai ha fika pau ki ai, te nau hoko ʻo hangē ko ʻĀtama mo ʻIví, ʻo talitekeʻi ʻa e tuʻunga-pule ʻa Sihová. Ko e hā ʻe hoko kiate kinautolú? ʻI he Fakahā 20:15 ʻoku tala mai ai: “ʻIlonga ha taha naʻe ʻikai tohi hono hingoá ʻi he tohi ʻo e moʻuí naʻe lī ia ki he ano afí.” ʻIo, ko e faʻahinga angatuʻu ko ení ʻe fakaʻauha taʻengata kinautolu. Ka ko e tokolahi taha ʻo e faʻahinga haohaoa ʻo e tangatá te nau lavaʻi ʻa e ʻahiʻahi fakaʻosi ko ení. ʻE hiki tuʻuloa leva honau hingoá ʻi he tohi ʻo e moʻuí.

17. Ko e hā naʻe tala kia Taniela ʻe hoko ʻi hotau taimí? (Taniela 12:4, 8-10)

¹⁷ He fakafiefia ē ke fakakaukau atu ki he ngaahi meʻa ko eni ʻe hoko ʻi he kahaʻú! Kae kehe, naʻe toe maʻu ʻe Taniela ha fakamatala mahuʻinga mei ha ʻāngelo fekauʻaki mo hotau taimí, ʻa e “taimi ʻo e ngataʻangá.” (Lau ʻa e Taniela 12:4, 8-10; 2 Tīm. 3:1-5) Naʻe tala ange ʻe he ʻāngeló kia Taniela: “ʻE lahi ʻaupito  ʻa e ʻilo moʻoní.” ʻIo, ko e ngaahi lea fakaekikite ʻi heʻene tohí ʻe mahinoʻi kakato ange ʻe he kakai ʻa e ʻOtuá. Naʻe toe pehē ʻe he ʻāngeló ʻi he lolotonga ʻo e taimi ko ení “ko e kau fulikivanú te nau fai ʻa e tōʻonga fulikivanu, pea ʻe ʻikai ha kau fulikivanu te nau mahinoʻi” ia.

18. Ko e hā ʻoku vavé ni ke hoko ki he fulikivanú?

¹⁸ ʻI he ʻahó ni ʻoku hā ngali ʻoku ʻikai tauteaʻi ʻa e fulikivanú ki heʻenau tōʻonga fulikivanú. (Mal. 3:14, 15) Ka ʻoku vavé ni ke fakamāuʻi ʻe Sīsū ʻa e faʻahinga hangē ha kosí pea fakamavaheʻi kinautolu mei he faʻahinga hangē ha sipí. (Māt. 25:31-33) Ko e faʻahinga fulikivanu ko ení heʻikai ke nau hao atu ʻi he fuʻu mamahi lahí, pea heʻikai ke fokotuʻu mai kinautolu ke moʻui ʻi he māmani foʻoú. Ko honau hingoá heʻikai hiki ia ʻi he “tohi ʻo e manatú” ʻa ia ʻoku lave ki ai ʻi he Malakai 3:16.

19. Ko e hā ʻoku totonu ke tau fai he taimi ní, pea ko e hā hono ʻuhingá? (Malakai 3:16-18)

¹⁹ Ko e taimi pē eni ke tau fakamoʻoniʻi ai ʻoku ʻikai ke tau kau ʻi he faʻahinga fulikivanú. (Lau ʻa e Malakai 3:16-18.) ʻOku fakatahatahaʻi ʻe Sihova ʻa e faʻahinga ʻokú ne vakai ki ai ko ha “koloa makehé,” pe ko ha mataʻikoloá. ʻOku tau loto kotoa ke kau ai.

20. Ko e hā ʻa e talaʻofa fakaʻosi naʻe fai kia Tanielá, pea ko e hā ʻokú ke fakatuʻotuʻa atu ai ki he fakahoko ʻo e talaʻofa ko iá?

²⁰ Ko e moʻoni, ʻoku tau moʻui ʻi ha taimi fakatoʻoaloto. Ka ʻoku ʻi ai ʻa e ngaahi meʻa ʻoku toe fakaofo ange ʻoku tuʻunuku mai. ʻOku vavé ni ke tau sio ki hono fakaʻauha ʻa e kotoa ʻo e fulikivanú. ʻI he hoko atu aí, te tau sio ki hono fakahoko ʻa e talaʻofa ʻa Sihova kia Taniela: “Te ke tuʻu hake ʻo maʻu ho ʻinasí ʻi he ngataʻanga ʻo e ngaahi ʻahó.” (Tan. 12:13) ʻOkú ke holi ke aʻu ki he ʻaho ʻe toe “tuʻu hake” ai ʻa Taniela fakataha mo ho ngaahi ʻofaʻangá? Kapau ko ia, fai ho tūkuingatá ʻi he taimí ni ke hoko ʻo faitōnunga, pea ʻe lava ke ke fakapapauʻi ʻe hiki ai pē ho hingoá ʻi he tohi ʻo e moʻui ʻa Sihová.