1. ʻE lava fēfē ke tau ʻiloʻi ha tokotaha falalaʻanga?

 KO HA tokotaha falalaʻanga ʻokú ne feinga ke tauhi ʻene palōmesí pea leaʻaki ʻa e moʻoní. (Saame 15:4) ʻOku ʻiloʻi ʻe he kakaí ʻoku lava ke nau falala kiate ia. ʻOku tau loto ke maʻu ʻe hotau fanga tokouá mo e fanga tuofāfiné ha ongoʻi pehē fekauʻaki mo kitautolu. Ko e hā ʻe lava ke ne tokoniʻi kitautolu ke maʻu ʻenau falalá?

2. ʻE lava fēfē ke tau fakamoʻoniʻi ʻoku tau falalaʻanga?

² Heʻikai lava ke tau fakamālohiʻi ʻa e niʻihi kehé ke nau falala mai kiate kitautolu. Ko e falalá kuo pau ke ke ngāueʻi ke maʻu mai. Kuo faʻa leaʻaki ʻo pehē ko e falalá ʻoku hangē ko e paʻangá. Ko hono ngāueʻi ke maʻu maí ʻoku faingataʻa; ko hono fakamoleki iá ʻoku faingofua. Ko Sihova kuó ne maʻu moʻoni mo ʻetau falalá. Heʻikai ʻaupito ha ʻuhinga ke mole ai ʻetau falala kiate iá koeʻuhí “ko e meʻa kotoa pē ʻokú ne faí ʻoku falalaʻanga.” (Saame 33:4) Pea ʻokú ne ʻamanekina mai ke tau faʻifaʻitaki kiate ia. (ʻEf. 5:1) Tau lāulea angé ki ha niʻihi ʻo e ngaahi faʻifaʻitakiʻanga ʻo e kau sevāniti ʻa Sihova ʻa ia naʻa nau faʻifaʻitaki ki heʻenau Tamai fakahēvaní pea naʻa nau fakamoʻoniʻi ʻoku nau falalaʻanga. Te tau toe vakai foki ki ha ʻulungaanga ʻe nima te ne tokoniʻi kitautolu ke hoko ʻo falalaʻanga.

3-4. Naʻe anga-fēfē hono fakamoʻoniʻi ʻe he palōfita ko Tanielá naʻá ne falalaʻangá, pea ko e hā ʻoku totonu ke ne ueʻi kitautolu ke fakakaukau ki aí?

³ Ko e palōfita ko Tanielá naʻá ne fokotuʻu ha faʻifaʻitakiʻanga lelei ʻaupito ʻo e hoko ʻo falalaʻangá. Neongo naʻe taki pōpula ia ʻe he kau Pāpiloné, naʻe vave hono ʻiloʻi ia ko ha tangata naʻe falalaʻanga. Naʻe toe tupulaki hono ongoongó, ʻi he tokoni ʻa Sihová, ʻi he taimi naʻá ne fakaʻuhingaʻi ai ʻa e misi ʻa Tuʻi Nepukanesa ʻo Pāpiloné. ʻI he taimi ʻe taha, naʻe pau ke tala ange ʻe Taniela ki he  tuʻí ko Sihova naʻe ʻikai te ne hōifua mai kiate ia​—ko ha faʻahinga pōpoaki heʻikai fiefanongo ki ai ha tuʻi. Naʻe fiemaʻu ki ai ʻa e loto-toʻa, he ko Nepukanesá ko ha tokotaha naʻe ʻita tōlili! (Tan. 2:12; 4:20-22, 25) ʻI ha laui taʻu ki mui ai, naʻe toe fakamoʻoniʻi ʻe Taniela ʻene falalaʻangá ʻi he taimi naʻá ne fakaʻuhingaʻi tonu mātē ai ha pōpoaki anga-kehe naʻe hā ʻi he holisi ʻo e palasi ʻi Pāpiloné. (Tan. 5:5, 25-29) Ka ki mui ai, ko Talaiasi ko e Mītiá pea mo ʻene kau ʻōfisa fakanofó naʻa nau fakatokangaʻi foki naʻe ʻia Taniela “ha laumālie makehe atu.” Naʻa nau ʻiloʻi ko Tanielá “naʻe falalaʻanga ia pea naʻe ʻikai ke ʻilo ʻiate ia ha fakataʻetaʻetokanga pe taʻefaitotonu.” (Tan. 6:3, 4) ʻIo, naʻa mo e kau pule panganí naʻa nau ʻiloʻi ko e tokotaha lotu ko eni ʻa Sihová ʻoku falalaʻanga!

⁴ ʻI he fakakaukau ki he faʻifaʻitakiʻanga ʻa Tanielá, ʻoku lelei ke tau ʻeke hifo kiate kitautolu: ‘Ko e hā ʻa e ongoongo ʻoku ou maʻu ʻi tuʻa ʻi he fakatahaʻangá? ʻOku ʻiloʻi au ko ha tokotaha ʻoku ou fakahoko hoku ngaahi fatongiá pea falalaʻanga?’ Ko e hā ke tali ai ʻa e ongo fehuʻi ko iá? Koeʻuhí ʻoku tau ʻoatu ʻa e fakahīkihikí kia Sihova ʻi he taimi ʻoku tau hoko ai ʻo falalaʻangá.

5. Ko e hā naʻe ʻiloʻi ai ʻa Henania ko ha tokotaha falalaʻangá?

⁵ ʻI he 455 K.M., hili hono toe langa ʻe Kōvana Nehemaia ʻa e ngaahi ʻā ʻo Selusalemá, naʻá ne kumi ki ha kau tangata falalaʻanga ʻa ia te nau tokangaʻi lelei ʻa e koló. Naʻe kau ʻi he faʻahinga naʻe fili ʻe Nehemaiá, ʻa e ʻeiki ʻo e Feituʻu Fakakolotaú, ʻa Henania. ʻOku fakamatalaʻi ʻe he Tohi Tapú ʻa Henania ko ha “tangata mātuʻaki falalaʻanga ia pea naʻá ne manavahē ki he ʻOtua moʻoní ʻo laka ange ia ʻi he tokolahi.” (Nehe. 7:2) Ko e ʻofa kia Sihová mo e manavahē ki hono taʻefakahōifuaʻi iá naʻá ne ueʻi ʻa Henania ke ne fakahoko  fakamātoato ha faʻahinga vāhenga-ngāue pē naʻe ʻoange kiate ia. Ko e ongo ʻulungaanga ko iá te ne toe tokoniʻi foki kitautolu ke tau hoko ʻo falalaʻanga ʻi heʻetau ngāue ki he ʻOtuá.

6. Naʻe anga-fēfē hono fakamoʻoniʻi ʻe Tikiko ko ha kaumeʻa falalaʻanga ia ʻo e ʻapositolo ko Paulá?

⁶ Fakatokangaʻi ʻa e faʻifaʻitakiʻanga ʻa Tikiko, ko ha kaungāfononga falalaʻanga ʻo e ʻapositolo ko Paulá. ʻI he taimi naʻe tuku pōpula ai ʻa Paula ʻi ha falé, naʻá ne falala kia Tikiko, ʻo fakamatalaʻi ia ko ha “faifekau faitōnunga.” (ʻEf. 6:21, 22) Naʻe ʻikai ngata pē ʻa e falala ʻa Paula ke ne ʻave ʻa e ngaahi tohi ki he fanga tokoua ʻi ʻEfesō mo Kolosé kae pehē foki ke ne toe fakalototoʻaʻi mo fakafiemālieʻi kinautolu. ʻOku fakamanatu mai ʻe Tikiko kiate kitautolu ʻa e kau tangata faitōnunga mo falalaʻanga ʻoku nau tokangaʻi ʻetau ngaahi fiemaʻu fakalaumālié ʻi he ʻaho ní.​—Kol. 4:7-9.

7. Ko e hā ʻe lava ke ke ako fekauʻaki mo e falalaʻangá mei he kau mātuʻa mo e kau sevāniti fakafaifekau ʻi hoʻo fakatahaʻangá?

⁷ ʻI he ʻahó ni ʻoku tau houngaʻia lahi ʻi heʻetau kau mātuʻa mo e kau sevāniti fakafaifekau falalaʻangá. Hangē ko Taniela, Henania mo Tikikó, ʻoku nau fakahoko fakamātoato honau ngaahi fatongiá. Ko e fakatātaá, ʻi he taimi ʻoku tau maʻu ai ʻa e fakataha lolotonga e uiké, ʻoku ʻikai haʻatau veiveiua ko e ngaahi konga kotoa ki he polokalamá kuo ʻosi vaheʻi. Pea he houngaʻia ē ko e kau mātuʻá ʻi hono ʻiloʻi ʻe teuteu mo fakahoko ʻe he faʻahinga ko ia kuo vaheʻi ki aí ʻenau ngaahi konga ʻi he fakatahá! Ke fakatātaaʻí, ʻoku ʻikai ke tau toumoua ke fakaafeʻi ʻetau kau ako Tohi Tapú ke nau maʻu ʻa e fakataha fakaʻosinga e uiké, ʻo manavasiʻi naʻa ʻikai ke ʻi ai ha taha te ne fakahoko ha malanga maʻá e kakai. Pea ʻoku tau falala ko e ʻū tohi ʻoku tau fiemaʻu ki he ngāue fakafaifekaú ʻe ala maʻu. ʻOku tokangaʻi lelei kitautolu ʻe he fanga tokoua faitōnunga ko ení, pea ʻoku tau fakamālō kia Sihova koeʻuhi ko kinautolu! Ka ʻi he ngaahi founga fē ʻe lava ke tau fakamoʻoniʻi ai ʻoku tau falalaʻangá?

8. ʻE anga-fēfē ʻetau hoko ʻo mafamafatatau ʻi hono fakahāhā ʻa e mahuʻingaʻia ʻi he niʻihi kehé? (Palōveepi 11:13)

⁸ ʻOku tau ʻofa ʻi hotau fanga tokouá mo e fanga tuofāfiné, pea ʻoku tau mahuʻingaʻia ʻi heʻenau leleí. Kae kehe, kuo pau ke tau mafamafatatau pea fakaʻapaʻapaʻi ʻenau meʻa fakapulipulí. Ko e niʻihi ʻi he fakatahaʻanga Kalisitiane ʻi he ʻuluaki senitulí naʻa nau hoko ko e “kau ngutu-lau mo e kau kaunoa ʻi he ngaahi meʻa ʻa e kakai kehé, ʻo talanoa fekauʻaki mo e ngaahi meʻa ʻoku ʻikai totonu ke nau talanoa ki ai.” (1 Tīm. 5:13) Ko hono moʻoní ʻoku ʻikai ke tau loto ke hangē ko kinautolú. Ka tau pehē pē ʻoku vahevahe mai ʻe ha taha ha fakamatala fakafoʻituitui fekauʻaki mo ia peá ne falala mai heʻikai ke tau toe talanoa ia ki ha taha. Ko e fakatātaá, ko ha tuofefine te ne talanoa mai fekauʻaki mo ha mahaki ʻokú ne maʻu pe ko ha ʻahiʻahi kehe ʻokú ne fehangahangai mo ia, ʻo kole mai ke ʻoua te tau talanoa ia. ʻOku totonu ke tau fakaʻapaʻapaʻi ʻene kolé. * (Lau ʻa e Palōveepi 11:13.) Tau lāulea angé he taimí ni ki ha ngaahi tuʻunga kehe ʻa ia ʻoku mahuʻinga ke tau tauhi ai ha meʻa fakapulipuli.

9. ʻE lava fēfē ke fakamoʻoniʻi ʻe he ngaahi mēmipa ʻo e fāmilí ʻoku nau falalaʻangá?

⁹ ʻI he fāmilí. Ko e mēmipa taki taha ʻo e fāmilí ʻokú ne maʻu ha fatongia ke tauhi ʻa e ngaahi meʻa pelepelengesi fakafāmilí ke fakapulipuli. Ko e fakatātaá, ko ha fefine Kalisitiane ʻokú ne maʻu nai ha tōʻonga ʻoku fakaoli ki hono husepānití. ʻE talanoa ia ʻe he husepānití ki he niʻihi kehé ʻo ʻai ai hono uaifí ke fakamāʻia? ʻIkai ʻaupito! ʻOkú ne ʻofa ʻi hono uaifí, pea heʻikai ʻaupito te ne loto ke fai ha meʻa ke fakalotomamahiʻi ia. (ʻEf. 5:33) Ko e kau taʻu hongofulu tupú ʻoku nau loto ke  fakaʻapaʻapaʻi kinautolu. ʻOku lelei ki he ngaahi mātuʻá ke nau ʻiloʻi eni. Heʻikai ke nau fakamaaʻi ʻenau fānaú ʻaki hono fakahaaʻi ʻenau ngaahi fehālaakí ki he niʻihi kehé. (Kol. 3:21) ʻOku fiemaʻu ki he fānaú ke nau ako ke fakapotopoto, ʻo ʻikai ke fakahaaʻi ha fakamatala ki he niʻihi kehé ʻe fakamaaʻi ai ʻa e ngaahi mēmipa kehe ʻo e fāmilí. (Teu. 5:16) ʻI he taimi ʻoku fai ai ʻe he mēmipa taki taha ʻi he fāmilí ʻene tafaʻakí ke tauhi ke fakapulipuli ʻa e ngaahi meʻa fakafoʻituitui fakafāmilí, ʻe fakaivimālohiʻi ai ʻa e haʻi ʻo e fāmilí.

10. Ko e hā ʻoku kau ki he hoko ko ha kaumeʻa moʻoní? (Palōveepi 17:17)

¹⁰ ʻI hotau ngaahi kaungāmeʻá. ʻI ha taimi, ko e tokolahi taha ʻo kitautolú ʻoku tau ongoʻi ʻa e fiemaʻu ke tau talanoa ki ha kaumeʻa ofi. ʻI he taimi ʻe niʻihi ʻe faingataʻa nai ke fai ia. ʻOku ʻikai nai ke tau anga ki hono fakahaaʻi ʻetau ngaahi fakakaukau lolotó ki ha taha, pea te tau loto-mamahi lahi kapau te tau ʻiloʻi ki mui ange kuo talanoaʻi ia ʻe hotau kaumeʻá ki he niʻihi kehé. ʻI he tafaʻaki ʻe tahá, he houngaʻia ē ko kitautolu ʻi ha taha ʻoku lava ke ne tauhi ha meʻa fakapulipuli! Ko ha “kaumeʻa moʻoni” ia.​—Lau ʻa e Palōveepi 17:17.

11. (a) ʻOku anga-fēfē hono fakahaaʻi ʻe he kau mātuʻá mo honau ngaahi uaifí ʻoku nau falalaʻangá? (e) Ko e hā ʻa e lēsoni ʻe lava ke tau ako mei ha mātuʻa naʻá ne tokangaʻi ha meʻa fakapulipuli ʻi he fakatahaʻangá pea ki mui ai ʻokú ne ʻi ʻapi mo hono fāmilí? (Sio ki he fakatātaá.)

¹¹ ʻI he fakatahaʻangá. Ko e kau mātuʻa ʻoku ʻiloʻi ʻaki ʻoku nau tauhi ha meʻa fakapulipuli ʻoku nau hoko ko ha “feituʻu toitoiʻanga mei he matangí, ko ha feituʻu maluʻanga” ki honau fanga tokouá. (ʻAi. 32:2) ʻOku tau ʻiloʻi ʻe lava ke tau talanoa tauʻatāina ki he kau tangata ko ení, ʻo falala pau ko e meʻa ʻoku tala ange kiate kinautolú ʻe tauhi ke fakapulipuli. ʻOku ʻikai ke tau tenge kinautolu ke tala mai ʻa e ngaahi meʻa ʻoku totonu ke nau tauhi ke fakapulipulí. ʻIkai ko ia pē, ʻoku tau houngaʻia ʻi he ngaahi uaifi ʻo ʻetau kau mātuʻá koeʻuhí ʻoku ʻikai ke nau feinga ke maʻu mai ha fakamatala fakapulipuli mei honau ngaahi husepānití. Ko e moʻoni, ko ha tāpuaki ia ke ʻikai tala ange ki ha uaifi ʻo ha mātuʻa ʻa e fakamatala fakafoʻituitui fekauʻaki mo hono fanga tokouá mo e fanga tuofāfiné. Naʻe pehē ʻe he uaifi ʻo ha mātuʻa ʻe taha: “ʻOku ou houngaʻia ʻi hono tauhi ʻe hoku husepānití ke fakapulipuli ʻa e fakamatala fekauʻaki mo e faʻahinga ʻokú ne  ʻaʻahi fakatauhisipi ki aí pe ko e faʻahinga ʻoku nau fiemaʻu ha tokoni fakalaumālié, ʻo ʻikai tala mai honau hingoá kiate au. ʻOku ou houngaʻia ʻi he ʻikai ke fakakavengaʻi ʻaki au ʻa e ngaahi ʻīsiu ʻoku ʻikai haʻaku kaunga ki ai. ʻOku malava ke u feohi tauʻatāina mo e faʻahinga kotoa ʻi he fakatahaʻangá. Pea ʻoku lava ke u tala ange ki hoku husepānití ʻeku ngaahi ongoʻi fakafoʻituituí pe ngaahi palopalemá ʻo falala ʻe tauhi foki mo ia ke fakapulipuli.” Ko e moʻoni, ʻoku tau loto kotoa ke ʻiloʻi kitautolu ʻoku tau falalaʻanga. Ko e hā ʻa e ngaahi ʻulungaanga te ne tokoniʻi kitautolu ke aʻusia ʻa e taumuʻa ko iá? Tau lāulea angé ki ha ʻulungaanga ʻe nima.

12. Ko e hā ʻoku lava ai ke tau pehē ko e ʻofá ko e makatuʻunga ia ki he falalá? ʻOmai ha fakatātā.

¹² Ko e ʻofá ko e makatuʻunga ia ki he falalá. Naʻe pehē ʻe Sīsū ko e ongo fekau lahi tahá ko e ʻofa kia Sihova pea ke ʻofa ki hotau kaungāʻapí. (Māt. 22:37-39) Ko ʻetau ʻofa kia Sihová ʻokú ne ueʻi kitautolu ke faʻifaʻitaki ki heʻene faʻifaʻitakiʻanga haohaoa ʻo e falalaʻangá. Ko e fakatātaá, ko e ʻofa ki hotau fanga tokouá mo e fanga tuofāfiné ʻokú ne ueʻi kitautolu ke tauhi ʻenau ngaahi meʻa fakafoʻituituí ke fakapulipuli. Heʻikai ʻaupito te tau loto ke fakahaaʻi ha meʻa ʻe lava ke ne uesia, fakamaaʻi pe fakalotomamahiʻi kinautolu.​—Sione 15:12.

13. ʻI he founga fē ʻoku tokoniʻi ai kitautolu ʻe he anga-fakatōkilaló ke tau hoko ʻo falalaʻangá?

¹³ Ko e anga-fakatōkilaló te ne tokoniʻi kitautolu ke tau hoko ʻo falalaʻanga. Ko ha Kalisitiane ʻokú ne anga-fakatōkilalo ʻoku ʻikai ke ne feinga ke tohoakiʻi mai ʻa e tokanga ʻa e niʻihi kehé ʻaki ʻa e hoko ko e fuofua tokotaha ke ne fakamatalaʻi ha meʻa. (Fil. 2:3) ʻOku ʻikai ke ne fakakaukau fakamafutofuta fekauʻaki mo ia tonu ʻaki hono fakahaaʻi ʻokú ne lāuʻilo ki he fakamatala ʻoku ʻikai ngofua ke ne ʻoatu ki ha taha. Ko e anga-fakatōkilaló te ne taʻofi foki kitautolu mei hono fakamafola ʻa e ngaahi fakamahalo fekauʻaki mo e ngaahi meʻa ʻoku ʻikai lāulea ki ai ʻi he Tohi Tapú pe ʻi heʻetau ʻū tohi Fakatohitapú.

14. ʻOku anga-fēfē hono tokoniʻi kitautolu ʻe he ʻiloʻiló ke tau hoko ʻo falalaʻangá?

¹⁴ Ko e ʻiloʻiló te ne tokoniʻi ha Kalisitiane ke ne fakafaikehekeheʻi “ha taimi ke fakalongolongo mo ha taimi ke lea.” (Tml. 3:7) “Ko e leá ko e siliva, ko e fakalongolongó ko e koula” ko ha kupuʻi lea anga-maheni ia ʻi he anga fakafonua ʻe niʻihi. ʻI hono fakalea ʻe tahá, ʻoku ʻi ai ʻa e ngaahi taimi ko e lelei tahá ke fakalongolongo ʻo ʻikai lea. ʻOku feʻungamālie ai ʻa e faleʻi ʻi he Palōveepi 11:12: “Ko e tangata ʻiloʻilo moʻoní ʻokú ne hanganaki fakalongolongo.” Fakakaukau ki ha fakatātā. Ko ha mātuʻa taukei ʻoku faʻa kole ke ne tokoni ʻi he ngaahi fakatahaʻanga kehé ʻi heʻenau ngaahi palopalema mafatukitukí. ʻI he lave fekauʻaki mo e meʻá ni, naʻe pehē ʻe ha kaungāmātuʻa, “ʻOkú ne tokanga maʻu pē ke ʻoua ʻaupito ʻe fakahaaʻi ha fakamatala pelepelengesi fekauʻaki mo e ngaahi fakatahaʻanga kehé.” Ko e ʻiloʻilo ʻa e mātuʻá kuó ne maʻu ai ʻa e fakaʻapaʻapa ʻa e kulupu ʻo e kau mātuʻa ʻi heʻene fakatahaʻangá. ʻOku nau fakapapauʻi heʻikai ke ne fakahaaʻi ʻenau ngaahi meʻa fakapulipulí ki he niʻihi kehé.

15. ʻOmai ha fakatātā ʻoku fakahaaʻi ai ʻa e anga hono ikunaʻi mai ʻe he faitotonú ʻa e falala ʻa e niʻihi kehé.

¹⁵ Ko e faitotonú ko ha toe tafaʻaki ia ʻe taha ʻo e falalá. ʻOku tau falala ki ha tokotaha faitotonu koeʻuhí ʻoku tau ʻiloʻi te ne leaʻaki maʻu pē ʻa e moʻoní. (ʻEf. 4:25; Hep. 13:18) Ko e fakatātaá, tau pehē pē ʻokú ke loto ke fakaleleiʻi hoʻo malava fakafaiakó. Ko ia ʻokú ke kole ki ha tokotaha ke fanongo ki hoʻo malangá pea ʻoatu ha ngaahi fokotuʻu ʻaonga ki he founga ʻe lava ke ke fakalakalaka aí. Ko hai te ke falala te ne ʻoatu ha fokotuʻu faitotonú? Ko ha tokotaha ʻa ia ʻokú ne tala atu ʻa e meʻa ʻokú ke loto ke fanongo ki aí pe ko ha tokotaha ʻokú ne tala atu anga-lelei ʻa e moʻoní? ʻOku hā mahino ʻa e talí. ʻOku pehē ʻe he Tohi Tapú: “ʻOku lelei ange ʻa e valoki fakahāhaá  ʻi hono maʻu ʻa e ʻofá kae ʻikai fakahāhā iá. Ko e ngaahi lavea ʻoku fakatupunga ʻe ha kaumeʻá ko e faitōnunga ia.” (Pal. 27:5, 6) Neongo ʻoku faingataʻa ke fanongo ki he ngaahi fokotuʻu faitotonu mei ha kaumeʻa ʻi he kamatá, ka te tau maʻu ʻaonga mei ai ʻi he lele lōloá.

16. ʻOku anga-fēfē hono fakamamafaʻi ʻi he Palōveepi 10:19 ʻa e fiemaʻu ke mapuleʻi-kitá?

¹⁶ Ko e mapuleʻi-kitá ʻoku mātuʻaki mahuʻinga kapau ʻoku tau loto ke maʻu ʻa e falala ʻa e niʻihi kehé. Ko e ʻulungaanga ko iá ʻokú ne tokoniʻi kitautolu ke mapuleʻi ʻa hotau loungutú ʻi he taimi ʻoku fakataueleʻi ai kitautolu ke fakahaaʻi ha meʻa fakapulipuli naʻe tala mai kiate kitautolu. (Lau ʻa e Palōveepi 10:19.) Te tau ʻiloʻi nai ʻoku ʻahiʻahiʻi ʻetau mapuleʻi-kitá ʻi he taimi ʻoku tau ngāueʻaki ai ʻa e mītia fakasōsialé. Kapau ʻoku ʻikai ke tau tokanga, ʻe lava ke tau fakahaaʻi atu ʻi he taʻeʻilo ʻa e ngaahi meʻa fakapulipulí ki ha fuʻu kakai tokolahi. Pea ʻi he taimi pē ʻoku tau fakamafola atu ai ʻa e fakamatalá ʻi he founga fakaʻilekitulōniká, ʻoku ʻikai ke tau toe puleʻi ʻa e founga ʻe ngāueʻaki ki aí pe ko e lahi ʻo e maumau te ne fakatupungá. Ko e mapuleʻi-kitá ʻokú ne fakaʻatā foki ke tau nofoʻaki fakalongolongo ʻi he taimi ʻoku feinga ai ʻa e kau fakafepakí ke kākaaʻi kitautolu ke fakahaaʻi ʻa e ngaahi meʻa ʻe lava ke ne ʻai ʻa hotau fanga tokouá ke nau ʻi he tuʻunga fakatuʻutāmaki. ʻE hoko nai eni ʻi he taimi ʻoku fakaʻeke ai kitautolu ʻe he kau polisí ʻi ha fonua ʻoku tapui pe fakangatangata ai ʻetau ngāué. ʻOku tau ngāueʻaki ʻa e tefitoʻi moʻoni ke “maluʻi ʻa [hotau] ngutú ʻaki ha piti” ʻi he ngaahi tuʻunga ko ení pea pehē ki he ngaahi tuʻunga kehe. (Saame 39:1) Tatau ai pē pe ko ʻetau fakafeangai ki hotau fāmilí, ngaahi kaumeʻá, fanga tokouá mo e fanga tuofāfiné pe ki ha faʻahinga taha pē, ʻoku fiemaʻu ke tau hoko ʻo falalaʻanga. Pea ke hoko ʻo falalaʻangá, ʻoku fiemaʻu ke tau mapuleʻi-kita.

17. ʻOku lava fēfē ke tau tokoni ki hono maʻu ha laumālie ʻo e falalá ʻi heʻetau fakatahaʻangá?

¹⁷ He fakamālō ē ko kitautolu ʻi hono tohoakiʻi mai kitautolu ʻe Sihova ki ha fetokouaʻaki ʻoku faʻuʻaki ʻa e kakai ʻoku anga-ʻofa mo falalaʻanga! ʻOku tau maʻu kotoa ha fatongia ke ngāue ke maʻu mai ʻa e falala ʻa hotau fanga tokouá. ʻI heʻetau ngāue tāutaha ke fakahāhā ʻa e ʻofá, anga-fakatōkilaló, ʻiloʻiló, faitotonú mo e mapuleʻi-kitá, ʻoku tau tokoni ai ke maʻu ha laumālie ʻo e falalá ʻi heʻetau fakatahaʻangá. Ko hono langa hake ʻa e falalá ko ha ngāue hokohoko. ʻOfa ke tau faʻifaʻitaki ki hotau ʻOtuá, ʻa Sihova, pea hanganaki fakamoʻoniʻi ʻoku tau falalaʻanga.