1. Ko e hā ʻa e tuʻunga faingataʻa naʻe fehangahangai mo Sihoasi, ʻŪsaia mo Siosaiá?

 SIOLOTO atu ʻokú ke hoko ko ha tuʻi ʻo e kakai ʻa e ʻOtuá ʻi hoʻo kei tamasiʻí pe taʻu hongofulu tupú pē! ʻE anga-fēfē hoʻo ngāueʻaki ho mālohí mo e mafaí? ʻOku lave ʻa e Tohi Tapú ki he faʻahinga kei siʻi naʻa nau hoko ko e ngaahi tuʻi ʻo Siuta. Ko e fakatātaá, naʻe tuʻi ʻa Sihoasi ʻi hono taʻu 7 pē, ko ʻŪsaia ʻi hono taʻu 16, pea ko Siosaia ʻi hono taʻu 8. Fakakaukau atu ki he fatongia mafatukituki naʻa nau fuesiá! Ka neongo ʻa e faingataʻa honau tuʻungá, ko kinautolu kotoa naʻa nau maʻu ʻa e tokoni naʻe fiemaʻu ke ikuʻi ʻaki ʻa e ngaahi polé pea taki atu ki ha moʻui lavameʻa.

2. Ko e hā ʻoku totonu ai ke tau tokanga ki he faʻifaʻitakiʻanga ʻa Sihoasi, ʻŪsaia mo Siosaiá?

² ʻOku ʻikai ko ha ngaahi tuʻi pe ngaahi kuini kitautolu, ka ʻe lava ke tau ako ʻa e ngaahi lēsoni mahuʻinga mei he toko tolu ko eni ʻi he Tohi Tapú. Naʻa nau fai ʻa e ngaahi fili lelei, ka naʻa nau toe fai mo e ngaahi fili kovi. Te tau ngāueʻaki ʻenau ngaahi faʻifaʻitakiʻangá, ke vakai ai ki he ʻuhinga ʻoku fiemaʻu ai ke tau fili ʻa e ngaahi feohi leleí, nofoʻaki anga-fakatōkilalo, pea hanganaki kumi kia Sihová.

3. Naʻe anga-fēfē tali ʻa Tuʻi Sihoasi ki he fakahinohino ʻa e Taulaʻeiki Lahi ko Sihoiatá?

³ Faʻifaʻitaki ki he ngaahi fili fakapotopoto ʻa Sihoasí. ʻI he kei siʻi ʻa Tuʻi Sihoasí, naʻá ne fai ha fili fakapotopoto. ʻI he ʻikai haʻane tamaí, naʻá ne muimui ki he fakahinohino ʻa e Taulaʻeiki Lahi faitōnunga ko Sihoiatá. Naʻe akoʻi ʻe he taulaʻeiki ko iá ʻa Sihoasi ʻo hangē pē ko hano foha. ʻI he tali ki aí, naʻe fili fakapotopoto ʻa Sihoasi ke takimuʻa ʻi he lotu maʻá pea tauhi kia Sihova. Naʻe aʻu ʻo fokotuʻutuʻu ʻe Sihoasi ke fakaleleiʻi ʻa e temipale ʻo Sihová.—2 Kal. 24:​1, 2, 4, 13, 14.

4. ʻOku anga-fēfē ʻetau maʻu ʻaonga ʻi heʻetau koloaʻaki ʻa e ngaahi fekau ʻa Sihová? (Palōveepi 2:​1, 10-12)

⁴ Kapau ʻoku akoʻi koe ke ʻofa kia Sihova pea moʻui ʻo fakatatau  ki heʻene ngaahi tuʻungá, ʻoku ʻoatu ai kiate koe ha meʻaʻofa mahuʻinga. (Lau ʻa e Palōveepi 2:​1, 10-12.) ʻE lava ke tokonaki ʻe he ngaahi mātuʻá ʻa e akó ʻi he ngaahi founga lahi. Fakakaukau ki he founga naʻe tokoniʻi ai ha tuofefine ko Katya ʻe heʻene tamaí ke ne fai ʻa e ngaahi fili lelei. ʻI he ʻaho taki taha ʻi hono ʻave ia ʻe heʻene tamaí ki he akó, naʻá na lāulea fakataha ki he konga tohi fakaʻahó. “Ko e ngaahi lāulea ko iá,” ko ʻene leá ia, “naʻá ne tokoniʻi au ke fekuki mo e ngaahi tuʻunga faingataʻa naʻe hoko ʻi he lolotonga ʻa e ʻahó.” Kae fēfē, kapau ko e fakahinohino Fakatohitapu ʻoku ʻoatu ʻe hoʻo ongo mātuʻá ʻoku hā ngali ʻokú ne fakangatangata hoʻo tauʻatāiná? Ko e hā ʻe lava ke ne tokoniʻi koe ke tali ʻenau tatakí? Ko ha tuofefine ko Anastasia ʻokú ne manatuʻi ko ʻene ongo mātuʻá naʻá na vaheʻi ʻa e taimi ke fakamatalaʻi ʻa e ʻuhinga naʻá na fokotuʻu ai ʻa e ngaahi lao pau. ʻOkú ne pehē, “Naʻe tokoniʻi ai au ke u tali ʻa e ngaahi fakataputapuí, ʻo ʻikai ko ha ngaahi fakangatangata pē, ka ko ha maluʻi anga-ʻofa.”

5. ʻE anga-fēfē kaunga hoʻo ngaahi tōʻongá ki hoʻo ongo mātuʻá mo Sihova? (Palōveepi 22:6; 23:​15, 24, 25)

⁵ ʻI hoʻo ngāueʻaki ʻa e faleʻi Fakatohitapu ʻokú ke maʻú, te ke ʻai ai hoʻo ongo mātuʻá ke fiefia. Ko e mahuʻinga angé, te ke ʻai ʻa e ʻOtuá ke fiefia pea langa hake ha kaumeʻa tuʻuloa mo ia. (Lau ʻa e Palōveepi 22:6; 23:​15, 24, 25.) ʻIkai ʻoku ʻoatu ai kiate koe ha ʻuhinga lelei ke faʻifaʻitaki ki he faʻifaʻitakiʻanga ʻa Sihoasí ʻi he taimi naʻá ne kei siʻi aí?

6. Ko e faleʻi ʻa hai naʻe kamata ke fanongo ki ai ʻa Sihoasí, pea ko e hā ʻa e olá? (2 Kalonikali 24:​17, 18)

⁶ Ako mei he ngaahi fili kovi ʻa Sihoasí. Hili ʻa e mate ʻa Sihoiatá, naʻe fili ʻe Sihoasi ʻa e ngaahi feohi kovi. (Lau ʻa e 2 Kalonikali 24:​17, 18.) Naʻá ne fili ke fanongo ki he houʻeiki ʻo Siutá ʻa ia naʻe ʻikai ke nau ʻofa kia Sihova. Ngalingali ʻokú ke tui naʻe totonu kia Sihoasi ke ne fakaʻehiʻehi mei he kau fakatupu kovi ko iá. (Pal. 1:10) ʻI hono kehé, naʻá ne fanongo ki hono ngaahi kaumeʻa lau peé. Ko hono moʻoní, ʻi he feinga ʻa Sākalaia ʻa ia naʻe tokouaʻaki ʻe Sihoasí ke fakatonutonu iá, naʻe fekau ʻe Sihoasi ke tāmateʻi ia. (2 Kal. 24:​20, 21; Māt. 23:35) He meʻa fakamamahi mo fakavalevale ē ko ia! Naʻe kamata lelei ʻa e moʻui ʻa Sihoasí, ka ko e fakamamahí naʻá ne hoko ko ha tokotaha tafoki ʻo fakafepaki ki he moʻoní pea mo ha tokotaha fakapō. Fakaʻosí, naʻe tāmateʻi ia ʻe heʻene kau sevānití tonu. (2 Kal. 24:​22-25) He mei kehe ē ko ʻene moʻuí kapau naʻá ne hokohoko atu ke fanongo kia Sihova pea mo e faʻahinga naʻa nau ʻofa kiate Iá! Ko e hā ʻa e lēsoni te ke saiʻia ke ako mei he faʻifaʻitakiʻanga ko iá?

7. Ko hai ʻoku totonu ke ke fili ko ho ngaahi kaumeʻá? (Sio foki ki he fakatātaá.)

⁷ Ko e lēsoni ʻe taha ʻe lava ke tau ako mei he  fili kovi ʻa Sihoasí ko e fiemaʻu ke tau fili ʻa e ngaahi kaumeʻa te nau tākiekina lelei kitautolu—ko e ngaahi kaumeʻa ʻoku nau ʻofa kia Sihova pea loto ke ʻai ia ke fiefia. ʻOku ʻikai fiemaʻu ia ke tau fakangatangata ʻetau feohí ki he faʻahinga pē ʻi hotau toʻú. Manatuʻi, naʻe kei siʻi ange ʻa Sihoasi ʻi hono kaumeʻa ko Sihoiatá. ʻI he fekauʻaki mo hoʻo fili ʻo e ngaahi kaumeʻá, ʻeke hifo: ‘ʻOku nau tokoniʻi au ke fakaivimālohiʻi ʻeku tui kia Sihová? ʻOku nau fakalototoʻaʻi au ke u moʻuiʻaki ʻa e ngaahi tuʻunga ʻa e ʻOtuá? ʻOku nau talanoa fekauʻaki mo Sihova mo ʻene ngaahi moʻoni mahuʻingá? ʻOku nau fakaʻapaʻapaʻi ʻa e ngaahi tuʻunga ʻa e ʻOtuá? ʻOku nau tala mai pē ʻa e meʻa ʻoku ou loto nai ke fanongo ki aí, pe ʻoku nau maʻu ʻa e loto-toʻa ke fakatonutonu au kapau te u hē?’ (Pal. 27:​5, 6, 17) Ko e moʻoni, kapau ʻoku ʻikai ke ʻofa ho ngaahi kaumeʻá kia Sihova, tuku ange kinautolu. Ka ʻo kapau ʻokú ke maʻu ha ngaahi kaumeʻa ʻoku nau ʻofa kia Sihova, pīkitai kiate kinautolu—te nau tākiekina lelei koe!—Pal. 13:20.

8. Kapau ʻoku tau ngāueʻaki ʻa e mītia fakasōsialé, ko e hā ʻoku totonu ke tau fakakaukau ki aí?

⁸ Ko e mītia fakasōsialé ʻe lava ke hoko ko ha founga ola lelei ke fetuʻutaki ai mo e fāmilí mo e kaungāmeʻá. Kae kehe, ʻoku ngāueʻaki ʻe he kakai tokolahi ʻa e founga fetuʻutaki ko ení ke tohoakiʻi mai ʻaki ʻa e tokanga ʻa e niʻihi kehé, ʻo pousi ʻa e ngaahi tā mo e vitiō ʻo e meʻa naʻa nau fakatau mai pe fakahokó. Kapau ʻokú ke ngāueʻaki ʻa e mītia fakasōsialé, ʻeke hifo: ‘Ko ʻeku taumuʻá ke tohoakiʻi mai ʻa e tokanga ʻa e niʻihi kehé? Ko ʻeku taumuʻá ke langa hake ʻa e niʻihi kehé pe ke pouaki pē au? ʻOku ou fakaʻatā ʻa e kakai ʻoku nau ngāueʻaki ʻa e meʻangāue ko ení ke nau tākiekina ʻeku fakakaukaú, leá mo e tōʻongá ʻi ha founga ʻikai lelei?’ Ko Tokoua Nathan Knorr, naʻá ne ngāue ko ha mēmipa ʻo e Kulupu Pulé, naʻá ne fai ʻa e faleʻi ko ení: “ʻOua ʻe feinga ke fakahōhōʻiaʻi ʻa e tangatá. Te mou iku ai ʻo ʻikai fakahōhōʻiaʻi ha taha. Fakahōhōʻiaʻi ʻa Sihova, pea te mou fakahōhōʻiaʻi ai ʻa e faʻahinga kotoa ʻoku nau ʻofa kia Sihová.”

9. Ko e hā naʻe tokoniʻi ʻe Sihova ʻa ʻŪsaia ke ne faí? (2 Kalonikali 26:​1-5)

⁹ Faʻifaʻitaki ki he ngaahi fili lelei ʻa ʻŪsaiá. ʻI he kei talavou ʻa Tuʻi ʻŪsaiá, naʻá ne anga-fakatōkilalo. Naʻá ne ako ke “manavahē ki he ʻOtua moʻoní.” Pea naʻe tāpuakiʻi ia ʻe Sihova ʻi he konga lahi taha ʻo e taʻu ʻe 68 naʻá ne moʻui aí. (Lau ʻa e 2 Kalonikali 26:​1-5.) Naʻe ikunaʻi ʻe ʻŪsaia ʻa e ngaahi fili lahi ʻo e puleʻangá pea fakafefekaʻi mo e tuʻunga fakaemaluʻi ʻo Selusalemá. (2 Kal. 26:​6-15) Naʻe fiefia moʻoni ʻa ʻŪsaia ʻi he meʻa kotoa naʻe tokoniʻi ia ʻe he ʻOtuá ke ne faí.—Tml. 3:​12, 13.

10. Naʻe iku ki he hā ʻa e moʻui ʻa ʻŪsaiá?

¹⁰ Ako mei he ngaahi fili kovi ʻa ʻŪsaiá. Naʻe anga ʻa Tuʻi ʻŪsaia ki hono tala ki he niʻihi kehé ke muimui ki heʻene fakahinohinó. Naʻe ʻai ʻe he meʻá ni ke ne fakakaukau ʻe lava ke ne fai ha meʻa pē naʻá ne loto ki ai? ʻI he ʻaho ʻe taha naʻe fili ʻa ʻŪsaia ke ne hū ki he temipale ʻo Sihová peá ne ʻafungi ʻo feinga ke tutu ʻa e ʻinisēnisi ʻi he ʻōlitá, ʻa ia naʻe ʻikai ngofua ke fai ia ʻe he ngaahi tuʻí. (2 Kal. 26:​16-18) Naʻe feinga ʻa e Taulaʻeiki Lahi ko ʻAsalaiá ke fakatonutonu ia, ka naʻe ʻita tōlili ʻa ʻŪsaia. Ko e meʻa fakamamahí, naʻe maumauʻi ai ʻe ʻŪsaia ʻene lēkooti ʻo e ngāue faitōnungá pea naʻe taaʻi ʻaki ia ʻa e kiliá. (2 Kal. 26:​19-21) He mei kehe ē ʻene moʻuí kapau naʻá ne nofoʻaki anga-fakatōkilalo!

11. Ko e hā ʻa e ngaahi tōʻonga ʻe fakahaaʻi nai ai pe ʻoku tau anga-fakatōkilalo? (Sio foki ki he fakatātaá.)

¹¹ ʻI he hoko ʻa ʻŪsaia ʻo mālohí, naʻe ngalo ʻiate ia ko Sihova ʻa e Matavai ʻo hono mālohí mo ʻene lakalakaimonuú. Ko e hā ʻa e lēsoní? ʻOku lelei ke tau fakamanatu kiate kitautolu ko hotau ngaahi tāpuakí mo e ngaahi monuú ko e haʻu meia Sihova. ʻI he ʻikai ke pōlepole ʻi heʻetau ngaahi lavameʻá, ʻoku totonu ke tau ʻave ʻa e  lāngilangí kia Sihova ki he meʻa ʻoku malava ke tau faí. b (1 Kol. 4:7) Kuo pau ke tau lāuʻilo anga-fakatōkilalo ʻoku tau taʻehaohaoa pea fiemaʻu ʻa e akonaki. Ko ha tokoua ʻi hono taʻu 60 tupú naʻá ne tohi: “Kuó u ako ke ʻoua te u fuʻu toʻo mamafa ʻa e ngaahi meʻá. ʻI hono akonakiʻi au ki ha ngaahi fehālaaki ngalivale ʻoku ou faʻa fai, ʻoku ou feinga ke tuʻu hake pea hanganaki laka ki muʻa.” Ko hono moʻoní, ʻi he taimi ʻoku tau manavahē ai kia Sihova pea tauhi maʻu ha vakai anga-fakatōkilalo kiate kitautolú, ʻe iku lelei ai ʻetau moʻuí.—Pal. 22:4.

12. ʻI he kei talavou ʻa Siosaiá, naʻe anga-fēfē ʻene kumi kia Sihová? (2 Kalonikali 34:​1-3)

¹² Faʻifaʻitaki ki he ngaahi fili lelei ʻa Siosaiá. Naʻe taʻu hongofulu tupu ʻa Siosaia ʻi heʻene kamata ke kumi kia Sihová. Naʻá ne loto ke ako fekauʻaki mo Sihova pea fai hono finangaló. Kae kehe, naʻe ʻikai ke faingofua ʻa e moʻuí ki he tuʻi kei siʻi ko ení. Naʻe pau ke ne tuʻu maʻá e lotu moʻoní ʻi he taimi naʻe failahia ai ʻa e lotu loí. Pea ko hono moʻoní naʻá ne fai pehē! Ki muʻa ke taʻu 20 ʻa Siosaiá, naʻe kamata ke ne toʻo atu ʻa e lotu loí mei he puleʻangá.—Lau ʻa e 2 Kalonikali 34:​1-3.

13. ʻE anga-fēfē hono tākiekina koe ʻe hoʻo fakatapui kia Sihová?

¹³ Neongo kapau ʻokú ke fuʻu kei siʻi, ʻe lava ke ke fili ke faʻifaʻitaki kia Siosaia ʻaki ʻa e kumi kia Sihova pea ako ke houngaʻia ʻi Hono ngaahi ʻulungāngá. Ko e ʻalunga lelei ko iá te ne ueʻi koe ke fakatapui kiate ia. ʻE anga-fēfē hono tākiekina ʻe he fakatapui ko iá hoʻo moʻui fakaʻahó? Ko Luke, naʻá ne papitaiso ʻi hono taʻu 14, ʻokú ne pehē, “Mei he taimí ni ʻo faai atu, te u fakamuʻomuʻa ʻa e tauhi kia Sihová ʻi heʻeku moʻuí pea te u feinga ke ʻai ia ke ne fiefia.” (Mk. 12:30) Ko ha tāpuaki ē kiate koe kapau te ke holi ke fai ʻa e meʻa tatau!

14. ʻOmai ha fakatātā ʻo e founga ʻo e faʻifaʻitaki ʻa e kau talavou ʻe niʻihi kia Tuʻi Siosaia.

¹⁴ Ko e hā ʻa e ngaahi pole te ke fehangahangai nai mo ia ʻi he tuʻunga ko ha sevāniti kei siʻi ʻa Sihova? Ko Johan, naʻá ne papitaiso ʻi hono taʻu 12, ʻokú ne fakamatala ki hono tenge ia ʻe hono kaungāakó ke ngāueʻaki ʻa e sikaleti ʻuhilá—ʻa e veipí. Ke maʻu ʻa e mālohi ke talitekeʻi ʻa e tenge ko iá, ʻoku fakamanatu ʻe Johan kiate ia tonu ʻe  lava ke uesia ʻe he veipí ʻene moʻui leleí mo ʻene kaumeʻa mo Sihová. Ko Rachel, naʻá ne papitaiso ʻi hono taʻu 14, ʻokú ne fakamatala ki he meʻa ʻokú ne tokoniʻi ia ke fekuki mo e ngaahi pole ʻokú ne fehangahangai mo ia ʻi he ʻapiakó. ʻOkú ne pehē: “ʻOku ou feinga ke fakafekauʻaki ʻa e meʻa ʻoku ou sio ki aí ki ha meʻa fakalaumālie. Ko e fakatātaá, ko ha lēsoni hisitōlia te ne fakamanatu mai nai ha talanoa pe ko ha kikite ʻi he Tohi Tapú. Pe ko ha fetalanoaʻaki te ne fakamanatu mai nai ha veesi Tohi Tapu ʻaonga ʻe lava ke u vahevahe mo ha taha.” Ko e ngaahi pole ʻokú ke fehangahangai mo iá ʻe kehe nai ia mei he pole naʻe fehangahangai mo Tuʻi Siosaiá, ka ʻe lava ke ke fakapotopoto mo mateaki ʻo hangē ko iá. Ko e fekuki mo e ngaahi ʻahiʻahí ʻi he tuʻunga ko ha talavou ʻe teuʻi ai koe ke fehangahangai mo e ngaahi pole kehe ʻi he ngaahi taʻu ka hokó.

15. Ko e hā naʻá ne tokoniʻi ʻa Siosaia ke tauhi faitōnunga kia Sihová? (2 Kalonikali 34:​14, 18-21)

¹⁵ ʻI he hoko ʻa Tuʻi Siosaia ko ha tokotaha lahí, naʻe kamata ke ne fakaleleiʻi ʻa e temipalé. Lolotonga ʻa e ngāue ko iá, naʻe maʻu ai “ʻa e tohi Lao ʻa Sihova naʻe fakafou mai ʻia Mōsesé.” ʻI he fanongo ki hono lau iá, naʻe ueʻi ai ʻa e tuʻí ke ne fai ha ngāue ʻaki ʻa e talangofua ki he meʻa naʻe leaʻaki aí. (Lau ʻa e 2 Kalonikali 34:​14, 18-21.) Te ke saiʻia ke lau tuʻumaʻu ʻa e Tohi Tapú? Kapau ʻokú ke kei feinga pē, ʻoku fēfē? ʻOkú ke muimuiʻi ʻa e ngaahi veesi ʻe tokoni fakafoʻituitui nai kiate koe? Ko Luke, naʻe lave ki ai ki muʻá, ʻokú ne hiki ʻi ha tohinoa ʻa e ngaahi poini fakatupu tokanga ʻokú ne maʻú. ʻE tokoni nai kiate koe hono fai ʻa e meʻa meimei tatau ke manatuʻi ʻa e ngaahi veesi pe ngaahi poini ʻokú ke saiʻia aí? Ko e lahi ange hoʻo ʻilo mo e ʻofa ʻi he Tohi Tapú, ko e lahi ange ia hoʻo loto ke tauhi kia Sihová. Pea hangē ko Tuʻi Siosaiá, ʻe ueʻi ai koe ʻe he Folofola ʻa e ʻOtuá ke fai ha ngāue.

16. Ko e hā naʻe fai ai ʻe Siosaia ha fehālaaki mafatukituki, pea ko e hā ʻa e lēsoni kiate kitautolú?

¹⁶ Ako mei he fili kovi ʻa Siosaiá. ʻI he taʻu 39 ʻa Siosaiá, naʻá ne fai ha fehālaaki ʻo iku mole ai ʻene moʻuí. Naʻá ne falala kiate ia pē kae ʻikai ke kole ʻa e tataki ʻa Sihová. (2 Kal. 35:​20-25) ʻOku  tau ako ha lēsoni mei heni. Tatau ai pē pe ko e hā hotau taʻumotuʻá pe ko e hā e fuoloa ʻetau ako ʻa e Tohi Tapú, kuo pau ke tau hanganaki kumi kia Sihova. ʻOku kau ki ai ʻa e lotu maʻu pē ki heʻene tatakí, ako ʻene Folofolá, pea maʻu ʻaonga mei he faleʻi ʻa e kau Kalisitiane matuʻotuʻá. ʻOku ngalingali ʻe siʻi ange ai haʻatau fai ha ngaahi fehālaaki mafatukituki pea ʻe ngalingali te tau fiefia ange ai.—Sēm. 1:25.

17. Ko e hā ʻe lava ke tau fakamulitukuʻaki mei he talanoa fekauʻaki mo e ngaahi tuʻi ʻe toko tolu ʻo Siutá?

¹⁷ ʻOku lahi ʻa e ngaahi meʻa fakafiefia ke fai ʻi he vahaʻa taimi ʻo e talavoú. Ko e talanoa ʻo Sihoasi, ʻŪsaia mo Siosaiá ʻoku fakatātaaʻi ai ko e fānaú ʻe lava ke nau fai ʻa e ngaahi fili fakapotopoto pea muimui ʻi ha ʻalunga ʻoku fakahōifua kia Sihova. Ko e moʻoni, hangē ko ia naʻa tau vakai ki aí, ko ha ikuʻanga lelei ʻoku ʻikai ke fakapapauʻi. Ka neongo ia, ʻe lava ke tau faʻifaʻitaki ki he lelei naʻe fai ʻe he ngaahi tuʻi ko ení pea fakaʻehiʻehi mei hono fai ʻa e ngaahi fehālaaki naʻa nau faí. Pea ʻe lava leva ke tau fakatuʻotuʻa atu ki ha ikuʻanga lelei.

18. Ko e hā ʻa e ngaahi faʻifaʻitakiʻanga Fakatohitapu ʻoku fakahaaʻi ai ʻe lava ke iku lelei hoʻo moʻuí? (Sio foki ki he fakatātaá.)

¹⁸ ʻOku maʻu ʻi he Folofolá ʻa e talanoa ki he kau talavou kehe naʻa nau ʻunuʻunu ofi kia Sihova, maʻu ʻene hōifuá, pea nau sio ki he iku lelei ʻenau moʻuí. Ko e taha ʻo kinautolu ko Tēvita. ʻI heʻene kei siʻí, naʻá ne fili ʻa e faʻahi ʻa e ʻOtuá pea ki mui ai naʻá ne hoko ko ha tuʻi mateaki. Ko e moʻoni, ʻi he taimi ʻe niʻihi naʻá ne fai ʻa e ngaahi fehālaaki, ka ko hono fakakātoá naʻe hōifua mai ʻa e ʻOtuá kiate ia. (1 Tuʻi 3:6; 9:​4, 5; 14:8) ʻE lava ke fakalototoʻa mo fakaueʻiloto kiate koe ʻa e ako fekauʻaki mo e moʻui ʻa Tēvitá mo ʻene ngāue faitōnungá. Pe ʻe lava ke ke fakahangataha hoʻo poloseki akó ki he faʻifaʻitakiʻanga ʻa Maʻake pe ko Tīmoté. Te ke vakai ai naʻá na ngāue kia Sihova mei heʻena kei siʻí pea maʻu ha lēkooti tuʻuloa ʻo e hōifua ʻa e ʻOtuá; naʻe iku lelei moʻoni ʻena moʻuí.

19. ʻE iku ki he hā hoʻo moʻuí?

¹⁹ Ko e ikuʻanga hoʻo moʻuí ʻe lava ke fakapapauʻi ia ʻi he founga ʻokú ke ngāueʻaki ai ia ʻi he taimi ní. Ko hoʻo falala kia Sihova ʻo ʻikai ki hoʻo mahino pē ʻaʻaú ʻe taki atu ia ki Heʻene tataki hoʻo ngaahi laká. (Pal. 20:24) ʻE lava ke ke maʻu ha moʻui fiefia mo fakakoloa. Manatuʻi, ʻoku fakamahuʻingaʻi ʻe Sihova ʻa e meʻa ʻokú ke fai maʻaná. Ko e hā ha toe founga lelei ange ʻe lava ke ke ngāueʻaki ki ai hoʻo moʻuí ka ko e tauhi ki heʻetau Tamai fakahēvani anga-ʻofá?